|
|
 قلبـــك كيــف ....؟؟؟
|
حدثنـي والدي , عن المريض السوداني الذي اصيب بـ (ذبحه قلبيه نتيجه ضيق في الشرايين)
وتم نقله الى مستشفى الخرطوم على وجه السرعـه .. وقد كانوا انذاك (والدي ومن زامله)
طلبه طب بجامعه الخرطوم سنه 77 تقريبا .. (يعني ابوي اصغر من اساسي  )
حدثني انه تم جمع طلبه كليه الطب بمعظم المستويات كي يشاهدواهذا (الكيس Case) النادر
الوجود في ذلك الوقت ..!!
فلم تكن امراض القلب والشرايين مرضـا شائع الوجود .. بل انك -كطالب- قد لا (تزرزر)
بالسؤال عنها في الامتحانات وذلك لندرتها ولعدم وجود مرضى يتلقى الطلبه من خلالهم التدريب
الكافي في التعامـل مع مثل هذه الحالات ..
|
|
  
|
|
|
|
|
|
|
 Re: قلبـــك كيــف ....؟؟؟ (Re: داليا الكباشى)
|
بشكـل عـام , يفتقد السودان الى خاصيه البحث العلمي
وتفتقد معظم المرافق الحياتيه الى خاصيه الاحصـاء ..
بالعربي كـدا ما عندنا احصاءات حقتنأ نحن ..
ومعظم البروتوكولس اللي بنستخدمها في التعامل مع المرضى يوميا
مستقاه من النسب والاحصاءات اللي في الكتب الطبيه والمراجع العلميه
اللي مؤلفنيها ناس تانيين عملوا بحوث على ناس تانيين (ليس لهم نفس مواصفاتنا
من لون وطول وعرق وعادات غذائيه وثقافات ) ..
سأحاول ان اركز على النقاط المهمه فيما يتعلق بامراض القلب والشرايين وانتشارها
في السنوات الاخيره في السودان ..
خاصه انو في حاجات بسيطه ممكن كلنا نعملها وتكون سبب في الوقايه
حا اتكلم بي اسلبو مبسط وبدون انجليزي كتير عشان ود الصايم السمين ما يقدنـا
| |
|
|
|
|
|
|
|
|
 Re: قلبـــك كيــف ....؟؟؟ (Re: داليا الكباشى)
|
Quote: مؤلفنيها ناس تانيين عملوا بحوث على ناس تانيين (ليس لهم نفس مواصفاتنا
من لون وطول وعرق وعادات غذائيه وثقافات ) ..
|
برضو ركزي لينا على جوانب القصور من الدراسات البتجي من مجتمعات مختلفة
ولماذا لاتوجد بحوث في السودان .. مع إنو المجتمع السوداني أكثر مجتمع صالح
لأي نوع من البحوث بتعدد السحنات والبيئات..
........
متابعين يادكتورة
| |
|
|
|
|
|
|
|
|
 Re: قلبـــك كيــف ....؟؟؟ (Re: داليا الكباشى)
|
العوامـل المؤثره كتيره جدا ..
نبدا بالحاجات اللي ممكن اي زول يعملها عشان نكون عمليين ..
يا اخوانــا امشــوا بكرعينكـم شويـه ..!! :
بابا قال لي زمان كنا بنمشي بكرعينا من (داخليه حسيب) لحدي جمب الريفيرا امد درمان
نحضر الحفله ونجي راجعين بي كرعينا تاني !! (استحالـه امشي مسافه قدر دي حتى لو حا يغني خـدر)
انتشار السيارات في شوارع الخرطوم بصوره خياليه ادهش صديقنا الطبيب السعودي المتخصص في
امراض الاوعيه الدمويه فخاطبني قائلا: والله يا دكتوره زمان ازين شي في السودانيين انهم يمشـون !!
المشي -عدا عن انه يحافظ على الوزن- يضمن جريان الدم في الاوعيه الدمويه للجسم وخاصه الساقين
وهي الاكثر عرضه للاصابه بالانسدادات وخاصه عند مرضى السكري ..
ما بالضروره يكون برنامج ثابت ,, يعني ممكن لمن نصل الشغل نوقف العربيه بعيد شويه ونمشي
بكرعينا مسافه معقوله كل يوم .. صدقوني حا تلاحظوا الفرق .. الجسم حا يكون مرتاح اكتر
والنفس ما بيقوم لمن نطلع السلالم ..(اي زول حايقول فعلا والله السلالم بتتعبني) .. وطبعا دا من نزول لياقه الجسم ..
للناس اللي بيقدروا يعملوا المشي برنامج ثابت : احسن حاجه المشي بالخطوه العاديه ومده 30 دقيقه الى ساعه بتكون تمام جدا..
N.B
- نوقف العربيه بعيد شويه من المكتب ونمشي المسافه الباقيه بكرعينا..
- احسن وقت نمشي فيهو الصباح بدري او المسا بعد الشمس ما تغيب..
- ممكن نعملوا برنامج ثابت يوم بعد يوم 30 دقيقه الى ساعه..
- جربوا الكلام دا وحا تدعوا لي بعد اسبوع بس والفرق حايكون كبير ..
- مرضى السكري : المشي الزامـــي ..!! والكلام ليك يـا
| |
|
|
|
|
|
|
|
|
|
Re: قلبـــك كيــف ....؟؟؟ (Re: داليا الكباشى)
|
السلام عليكم يا دكتورة
شكرا لبوست النصائح والتوعية الصحية
لو تكرمت بتأجيل الرد على المداخلات* غير ذات الصلة حتى لا تخل بتسلسل الموضوع يكون أفضل وأنفع لنا .
-----
*بما فيها مداخلتي دي
| |
|
|
|
|
|
|
|
|
|
Re: قلبـــك كيــف ....؟؟؟ (Re: ارصد محمد جلال)
|
Quote: السلام عليكم يا دكتورة
شكرا لبوست النصائح والتوعية الصحية
لو تكرمت بتأجيل الرد على المداخلات* غير ذات الصلة حتى لا تخل بتسلسل الموضوع يكون أفضل وأنفع لنا . |
كلام صاح ............ لكن لابأس من موسيقي تصويرية بمداخلات من ودالصايم 
| |
|
|
|
|
|
|
|
|
|
Re: قلبـــك كيــف ....؟؟؟ (Re: omer osman)
|
شفتي ياداليا
كل سبت بقرر انو اعمل ب
Quote: نوقف العربيه بعيد شويه من المكتب ونمشي المسافه الباقيه بكرعينا..
- احسن وقت نمشي فيهو الصباح بدري او المسا بعد الشمس ما تغيب..
- ممكن نعملوا برنامج ثابت يوم بعد يوم 30 دقيقه الى ساعه..
- جربوا الكلام دا وحا تدعوا لي بعد اسبوع بس والفرق حايكون كبير ..
- |
لكن لي هسة السبت دا ما جا
| |
|
|
|
|
|
|
|
|
 Re: قلبـــك كيــف ....؟؟؟ (Re: داليا الكباشى)
|
اطفـــي السيجــاره الفي يدكـ دي اســـي..!!!!
زي ما اتفقنا انو كلامنا في هنا يكون مبسط وعملي وخالي فلسفه وخالي انجليزي
(التدخين مضر بالصحه) ..
اكيد كنا مقتنعين بالحاجه دي بما فينا الناس البيدخنوا عدد لا نهائي من المرات في اليوم ..
بس كيف نقتنع انو لازم نقلع عن التدخين وبسرعـه .. ؟؟
اوريكـم ..
ماده النيكوتين اللي في السيجاير ماده سغيله جدا ولايوقه .. الجسم ما بيقدر يتخلص
منها بسهولـه .. عشان كدا بتتراكم في عده اماكن في الجسم :
- في الجلـد (ريحتكم طوالي سجاير يا بالتدخنوا)
- في الشفـاه (لونهـا اسود او بني شكلها ما جميل صـاح..؟؟)
- بتيتراكم في الشرايين .. وبي طول المده ممكن يسبب الانسداد الشرياني مما يسبب الذبحـه !!
معظم الناس جربوا اللبان والتسالي وحبوب النيكوتين واللصقات !!
بس اهم حاجه في الموضوع دا هي العزيمـــــه !!
N.B ......
- السجاير بيخلي ريحه الجسم والفم ما حلوه .. حاجه الناس الحوالينك ما قادرين يقولوها ليكـ !!
- نكتب عدد السجاير البنشربوا كل يوم ونبدا ننقص كل يوم واحده .. من تالت يوم حا نلاحظ الفرق في النفس !!
- السجاير بيقلل شهيه الاكل وبيستهلك من طاقه الجسم .. حا يكون شكلك تعبان دايما ومرهق ..
- جرب تقلل السجاير حا تلاحظ الميزانيه ظبطت اكتر ونفسك ارتاح اكتـر ..
- تأكـد انك بتضر اولادك , جيرانك , الناس القاعدين جمبك, بنفس القدر البتضر بيهو روحكـ ويمكن اكتر .. موش بتحب اولادك ..؟؟
- لمن نفسك تجي في سجاره , اعمل اي حاجه تانيه , اطلع البلكونه , اتمشى شويه , سوق الاولاد اشتري ليهم ايس كريم , اكل لبانه او اشرب كاس مويه
كبير (نصيحه مجربه في بابا) ..
- واخيـرا .. لمن تبدا تقلل السجاير حا تحس بي راحه كبيره لانك انجزتا حاجه مهمه وحافظتا على صحتك .. (تميز بي انجازاتكـ)
| |
|
|
|
|
|
|
|
|
|
Re: قلبـــك كيــف ....؟؟؟ (Re: داليا الكباشى)
|
نشـــرب مــــويه ...!!! كتيـــرااااااا
المويه المويه حبيبتي المويه ..
طبعا مساله انو المويه مهمه جدا وغنيه بالاملاح والعناصر المفيده والمعادن ... الخ (دا كلام ممكن تقروهو في قوقل )
يلا نجي نشوف المويه مهمه للجسم كيف وبتحافظ على قلوبنا كيف ..؟؟
بتحافظ على التوزان الداخلي للجسم , بتنقي السموم وتهضم الاكل سريع
وبتاعد في طرح الفضلات بسهوله وبي كدا بتحافظ على ضغط الدم وبتمنع الامساك ..
معظم الناس بيشربوا بارد (بيبسي- كولا- مشروبات غازيه- عصير) بعد الاكل بدل المويه (غلط غلط غلط)
الحاجات دي بتصعب الهضم وكمان فيها سكر كتير , بتبطىء عمليه التمثيل الغذائي
وبتخلينا مرخمين وما قادرين نشتغل لانو الترويه الدمويه كلها بتمشي للمعده المسكينه الما قادره تهضم
وبي كدا بيقل الدم الطالع الى الدماغ وعشان كدا بننعس !!
N.B.........
-لا بديـل للماء الا المــاء ..
- نشرب اقل حاجه 8 كبايات مويه في اليوم ..
- ما نشرب مشروبات غازيه بعد الاكـل (ولو استبدلناها بالعصير الطبيعي او المويه يكون احسن)
- لو ما بنحب المويه الساده ممكن نخت فيها ليمونه او ورقه نعناع ..
- الجفاف ممكن يسبب الصداع والارق والمزاج السيء .. نشرب مويه عشان المود يكون لطيف ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: داليا الكباشى)
|
الشباب القاعدين والبنات الحلوات ..
اخدوا راحتكم البوست بوستكيم ..
تداخلوا كما يحلو لكـم ..
اعفوني بس من الردود اسي ..
ود الصايـم تمدد يا عمك براحتك ..(بس مافي الحجم لووول) !!
جنابو وشبكه وهويدا وشاذلي وجلال وود البوش وارصد ومحمد اي سليمان مراحب بيكم شرفتوا..
محمد اي سليمان اقتراحك جميل وسوف اعمل به !
| |
|
|
|
|
|
|
|
|
 Re: قلبـــك كيــف ....؟؟؟ (Re: humida)
|
سلامات ياخ
ما ممكن معاكم وين الأبديت؟
قاعد لي ساعة بعمل في رفرش ، وأخر حاجة واقف في الموية
الموضوع دا مهم يا دكترة ، أنا شخصياً عندي وسواس أني حأتلحس بالبتاع دا
لحمة الصاج والبيرقر والكوارع والقراصة بالدمعة والتقلية عندها علاقة بالحاجات دي؟
يا سلام على هكذا مواضيع تنويرية
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد يوسف الزين)
|
شـاي ولا قهـوه ..؟؟ يا( بخــاري )عذبتنــا ....!!!
وبخاري المقصود اعلاه هو الـ Tea boy في مكتب زوجنا العزيز وزميل البورض (تمبس)..!
وبخاري يضع على طاولته يوميا كاسا من الشاي وفنجانا من القهوه , وبمجرد ان تكمل
احدهما , وقبل ان تستوعب اصلا انهم نزلوا معتدتك -عزيز تمبس القارىء- تجده يسارع الى
وضع كاس اخر مصحوبا بفنجان اخر من القهوه ..!!
اجريت حول الشاي والقهوه دراسات عده , اتفقت معظمها على انهما من المشروبات
المفيده جدا للجسم اذا تناولناها باعتـــدال ..
و(اعتدال) المعموله بالبولد دي معناها ما نتجاز فنجانين قهوه في اليوم وياريت
لو عملناها بنفسنا او على الاقل نمشي المحمصه ونخليهم يطحنوا لينا البن قدامنا .. ليــه ؟؟
- عشان نختار الحبوب الفاتحه واللي فيها نسبه بتاعت كافيين اقل
- نطلب من العامل بتاع المخمصه ما يحمصها شديد يعني ما يحرق الحبوب بالنار شديد وتكون مقليه نص نص كدا .. بتكون اصـح ..
- عدد المرات البتمشي فيها تشتري البن حا يقل لانك حا تراقب كميه القهوه البتشربها وبي كدا تكون انت المستفيد بكل النواحي ..
بالنسبه للشاي , فا احسن حاجه نشرب الشاي الاخضـــر لانو فيهو عوامل الاكسده
اللي بتحرق الدهون , وكمان بنزل ضغط الدم المرتفح وبينشط الدوره الدمويـهعشان كدا القلب بيحبو ..
الشاي الاحمر كويس جدا برضو لانو فيهو مواد ماكسده ..
بس في حاجه غلط انا متاكده كلنــا بنعملهـاوهي بنشرب الشاي بعد الاكـل مباشره غلط غلط غلط غلط
الشاي بعد الاكل بيصعب عمليه الهضم , احسن حاجه نشرب الشاي بعد ساعتين على الاقل من الوجبه ..
N.B.........
-ما نشرب قهوه اكتر من فنجانيين في اليوم (الفنجان نص كبايه عثمان حسبن)
- نحاول نشتري البن حقنا برانا ..
- ما نشرب اي منبهات بعد الاكل مباشره ولا قبل النوم بفتره قريبه ..
- احسن حاجه الشاي الاخضر او شاي الاعشاب او النعناع المغلي (بيهدي الاعصاب وبيحرق الدهون)
- الشاي باللبن : كبايه الشاي الساده فيها معلقتين صغار لبن + ملعقه سكر واحده (دهون اقل , سكر اقل , قلبك بيكون مبسوط منك )
- لو عندك بخاري في المكتب خليهو يقرا البوست دا
| |
|
|
|
|
|
|
|
|
 Re: قلبـــك كيــف ....؟؟؟ (Re: محمد يوسف الزين)
|
Quote: -ما نشرب قهوه اكتر من فنجانيين في اليوم (الفنجان نص كبايه عثمان حسبن)
- نحاول نشتري البن حقنا برانا ..
- ما نشرب اي منبهات بعد الاكل مباشره ولا قبل النوم بفتره قريبه ..
- احسن حاجه الشاي الاخضر او شاي الاعشاب او النعناع المغلي (بيهدي الاعصاب وبيحرق الدهون)
- الشاي باللبن : كبايه الشاي الساده فيها معلقتين صغار لبن + ملعقه سكر واحده (دهون اقل , سكر اقل , قلبك بيكون مبسوط منك)
- لو عندك بخاري في المكتب خليهو يقرا البوست دا |
.. والله دا الكنت خايف منو ..
كلو ولا بخاري ..
عارفه بخاري دا لما يسافر إجازة .. انا بتضرر اكتر من الشركة لانو هو الوحيد الفاهم نفسياتي المزاجية .. اللحظة البشم فيها ريحة القهوة .. بلقاهو جاب لي القهوة ..
اللحظة البضوق فيها طعم الشاي في لساني ..بيكون جاب لي جردل بتاع شاي
ما من هواة الشاي باللبن .. شاي سادة وفوقو اتنين (تي باق) ..
أنا اشرب شاي أخضــر ؟؟ 
ملحوظة:
والله اللحظة البكتب في السطر الفوق دا .. اسمع ليك ( تتتج) .. بخاري رقعني ليك بي اكبر فنجان عندو قهوة نسكافية حالتي ولا قلت ليهو جيب لي حاجة .. يبدو أن بخاري بيجرب فيني كل الاستوك العندو نهاية اليوم من منبهات .. وأنا رضيان .. الحمد لله ما عندو حاجات تانية ..
والله راسنا بكلفنا كتير .. آخر مرة مشيت اقلع ضرس .. ماخد تلاتة حقن بتاعت بنج .. وعادي جدا قلعتو الدكتورة بعدما قالت لي دي ميزانية.. غايتوالواحد اخد كوريكتو وسكت ..
سلامات يا عمنا جعفر اسماعيل .. الله يديك الصحة والعافية ...
| |
|
|
|
|
|
|
|
|
|
Re: قلبـــك كيــف ....؟؟؟ (Re: tmbis)
|
| Quote: الشاي بعد الاكل بيصعب عمليه الهضم , احسن حاجه نشرب الشاي بعد ساعتين على الاقل من الوجبه .. |
اها يادكتورة ..... قولي ودالصايم جاء السودان وقمت عزمتو غداء ..........
هو طالع اديهو ظرف تي باق وسكر في قرطاس وقزازة موية يعملم شاي بعد ساعتين والا كيف الحكاية دي ..... ؟؟
| |
|
|
|
|
|
|
|
|
 Re: قلبـــك كيــف ....؟؟؟ (Re: omer osman)
|
Quote: اها يادكتورة ..... قولي ودالصايم جاء السودان وقمت عزمتو غداء ..........
هو طالع اديهو ظرف تي باق وسكر في قرطاس وقزازة موية يعملم شاي بعد ساعتين والا كيف الحكاية دي ..... ؟ |
ود الصايم مالو الضيف الملخوم ياكل ويقوم ؟؟
كان اكل ومشى زاتوو ما تعزمو تاني ..
هو جاي يزورك ويتونس ولا ياكل..؟؟؟ 
بعدين نفترض جا اكل وما اديتو شاي نوهائيتن كدا ..
اها حا يحصل شنو يعنـي ..؟؟
عالم تحـب الشبك
| |
|
|
|
|
|
|
|
|
|
Re: قلبـــك كيــف ....؟؟؟ (Re: tmbis)
|
امس انا ووجن كنا بنقطع في صورتك الفي افتتاح نادية وعثمان... ولاحظنا حاجات كده.... ممكن اقولها ليك بعدين ههههههههههههه بناءاً على كلامك الكتبتيه ده، انا قررت اني امشي كل يوم لمدة نص ساعة... باقي الحاجات اصلا بعملها... بشرب موية كتير، اول شي من الصباح بشرب لي كبايتين موية على الريق... وباقي اليوم بتم الكمية الباقية... التدخين خلييييييييييييناه... والقهوة اصلا ما بحبها.. والشاي بشرب كباية الصباح ومرااااااااااات بالمساء(دي زاتها ما دايماً).... حأجي اوريك النتيجة... تلميح بي تحت اشتقنا لكتاباتك الطالعة من جوّه دي.... فترة ساس يسوس ديك الله لا يعيدها
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد البشرى الخضر)
|
Quote: والله تشربه شراب وتغسّل العدة كمان
أتحدّاك قول لأ |
.. الشاي الأخـدر قالو فوايدو عظيمة غايتو بنحاول نكسرو بي اي حاجة .. ممكن كيس اخـدر وكيس أحمر .. على شرط الاتنين ليبتون ..
أما بالنسبة لي غسيل العدة التاعبك دا .. فأنا بغسل في حالة واحدة ..
لو وقفوني من البورد ..
في الحتة دي ,.. انا راقد قفا .. إنو بستفيد منك ..
من كترت التوقيف .. بقيت حريف في الغسلان .. بقيت
| |
|
|
|
|
|
|
|
|
|
Re: قلبـــك كيــف ....؟؟؟ (Re: مريم بنت الحسين)
|
يلا يا جماعه عشان كلنا نستفيد ويكون الكلام عملـي..
نلتزم بي حاجه اسمها دلــوش اسكيــل ..
كلنا نعمل ورقـه كبيره نرقمها من واحد لحدي عشــرين ..
الليله اخدنا من العشرين :
(1) وقفنا العربيه بعيد من مكان الشغل او اتمشينا لمده 30 دقيقه على الاقل..
(2) قللنا عدد السجاير البنشربوا بمعدل سيجاره في اليوم على الاقـل ..
(3) شربنـا 8 كبايات مويـه في اليـوم على الاقـل ..
(4) شربنا فنجانين قهـوه (قهوتنا نحن) او اقـل ..
(5) اخرنـا مواعيدا الشاي , او استبدلناهو بالاخضر او النعناع او الاعشاب ..
يلا قدام كل واحده من ديل نرسم لمن نلتزم بالاسكيل
ونرسم لمن ما نلتزم ..
مثلا ود الاصيم الاسكيل بتاعو بكره حايكون :
(1)
(2)
(3)
(4)
(5)
كـدا تلاته من خمسه .. برافــوو
وهكذا ك يوم لمن نتم العشرين كلها ,,
بعد نتم العشرين نعملها كل يوم وخاتلاحظوا الفرق خلال الشهر دا .. اوعدكـم ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: مريم بنت الحسين)
|
يلا عاينوا الاسكيل بتاع مريومه دا كيف ..
(بالمناسبه لمن نتم العشرين حاتكوني الاولى عديل كدا) ..
(1)
(2)
(3)
(4)
(5)
برافـوو مريومه 
عشان تكوني برافوو اكتر :
كبايه الشاي بتاعت المسا خليها تكون شاي اخضــر
والمشي لازم تستمري فيهوانشالله يوم بعد يوم
------------
تسلمي يا حبيبه انتو زاتكم وحشوتني .. وبالمناسبه عينك نجيضـه
| |
|
|
|
|
|
|
|
|
|
Re: قلبـــك كيــف ....؟؟؟ (Re: tmbis)
|
| Quote: شاي سادة وفوقو اتنين (تي باق) |
علاقتــك بالشوايقه كيـف..؟؟
رضيـان ولا قلتا ليـهو الفوره الــف ؟؟
| Quote: قالت لي دي ميزانية |
اوعى تكون مرصــوده ..؟؟
| |
|
|
|
|
|
|
|
|
 Re: قلبـــك كيــف ....؟؟؟ (Re: محمد يوسف الزين)
|
ازيكـ .. اول حاجه بعيد الشر عنك وانشالله طوله العمر يارب ..
خليك متابع واعمل الاسكيل وانشالله ما تجيك العوجـه باءذن الله ..
شكرا للمتابعه وانشالله تكون مستفيـد ..
تحياتي ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: Gaafar Ismail)
|
Quote: شكرا جزيلا دكتورة داليا
بوست مفيد جدا
تحياتنا عبرك للحبيب تمبس |
المحترم جعفر اسماعيل
شرف كبير ان تكون متابع للبوست وكمان مستفيد منو
ما تنسى تعمل الاسكيل معانا عشان تتم الفايده ..
تحياتنا اليك .. تمبس وانـا ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: شول اشوانق دينق)
|
| Quote: يا اخوانــا امشــوا بكرعينكـم شويـه ..!! : |
الركشات هي اصل البلاء , زمان الناس بتمشي مشي الجن و لمسافات طويلة , اسي عشان تمشي ليك بلوكين في الحلة إلا بي ركشة
و كمان ما تمشي و تقيف لحدي ما تلقى ليك رقشة اسه بكون عندك رقم السواق تتصل و لمن يجيك برة .. يرن ليك و تقوم تتكل على الله
ولاحظت في زيارتي الأخيرة للسودان النسوان و البنات الشابات بقوا زايدين زيادات ملحوظة في الوزن و يقولوا ليك نحن ما بناكل كتير
لكن ما عارفين الشحم ده من شنو !!! فكرة عدم الأكل براها ما بتنفع زي ما قالت ليكم د. دلوش لازم تتمشوا زي زمان و وفروا قروش الرقشات
و إستمتعوا بصحتكم و عافيتكم.
شكرا دلوش بوست مفيد
| |
|
|
|
|
|
|
|
|
|
Re: قلبـــك كيــف ....؟؟؟ (Re: سناء عبد السيد)
|
داليا أم قلبأ كبير..
أنا قلبى الحمدالله بخير..
إلا .......
لكن الحمدالله لا سجائر ولا ولا ولا..فل أتوماتيك ماشاء الله والحمدالله..
الشاى لو لقينا بنشبرو ولو مالقيناهو مابنسكو..
مشى وكورة وجرى ونطيط..الدنيا عايزة كده..الله يمتع الجميع بالصحة..يارب.
بوست مفيد..
تقديرى وأحترامى..
| |
|
|
|
|
|
|
|
|
|
Re: قلبـــك كيــف ....؟؟؟ (Re: salee)
|
صبــاحكم خير انشالله ..
يا ســلااام .. اهم حاجه انو الموضوع عجبكم واستفدتو بالجد ..
كلم اعملوا الاسكيل عشان تستفيدوا اكتــر .. وانشالله قلبوكم دايما عمرانـه بالحـب ..
معليش اعذروني .. حا ارجع ارد عليكم واحد واحد .. تحياتي ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: داليا الكباشى)
|
بتمشـــوا الحمـــام كــم مـــره في اليـــوم ..؟؟
لاحظتا في السنوات الاخيره انو معظم السودانيين بيمشوا الحمام الصباح (لمن يصحوا من النوم)
والمره التانيه بتكون أخر اليوم لمن يرجعوا البيت (يعني ما بيمشوا الحمام في الشغل) ..!!
غلــط غلــط غلــط
بالنسبه للتبول : المفروض انو جسمك يتخلص من 25 مل كل ثلاث ساعات على الاقل (في اختلافات حسب الوزن والعمر)
وبي كده المفروض انك تمشي الحمام (للتبول) مره الصباح ومرتين اثناء الدوام قبل ماترجع البيت ..
الحاجه دي مهمه لانها بتخلص الجسم من كميه من السموم , وبتريح المثانه وبتنشط الدوره الدمويه .. وبي كدا قلبك يحبك ..
بالنسبه للبراز : المعدل الطبيعي للاخراج هو 3 مرات في اليوم - 3 مرات في الاسبوع
بس احسن كلام في الموضوع دا قريتو في دراسه حديثه انو لازم تعود جسمك على وقت معين للاخراج (التبرز)
اثناء اليوم , وفي الوقت دا , تخش الحمام وتقعد على راحتك (حتى لو ما كنت حاسي انو انت عايز تعملها يعني)
ممكن تسمع مزيكه, تلعب قيم في الموبايل , او تقرا جريده .. بمرور الايام حا تلقى انو جسمك اتعود على الوقت دا
وبقى دا هو وقت الاخراج ...
بعد كم يوم حا تلاحظ الفرق .. الغازات حاتقل , سوء الهضم والحرقان والتلبكات المعويه بتختفي , وكمان
بيحميك من الاصابه بالبواسيـر لانو اهم اسبابها الامساك المزمن ..
الاستعجال في القيام من الحمام ما كويس , ناخد راحتنا على الاخـر ..
من اهم اسباب ارتفاع نسبه الاصابه بالتلبكات المعويه والبواسير هو الاستعجال في الحمام ..!!
N.B..........
-نمشي الحمام اثنـاء دوام العمل على لااقل مرتين ..
- نخصص وقت يومي نقعد فيهو في الحمام اقل حاجه 15 دقيقه (حتى لو مافي رغبه للتبرز)
- ما نستعجل في القيام من الحمام الا بعد نخلص تماما ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد عبد الماجد الصايم)
|
Quote: يلا يا جماعه عشان كلنا نستفيد ويكون الكلام عملـي..
نلتزم بي حاجه اسمها دلــوش اسكيــل .. |
يادكتورة
اسكيلك العالي === مهرك الغالي
ياخي زمان وزني 64 كيلو ولما ازيد كيلو كنت بجر (بجك التلاته كباري )
جينا الغربة وفرشنا (والفرشة عملت نفسيات )
الان اي حاجة يابت جيبي مويه
يا (ام اسيل ) جيبي صحن نغسل يدي
الحل شنو ؟
-------------------------
تحياتي وعبرك للعريس تمبس و (دعوتنا مفتوحة )
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد يوسف الزين)
|
بنـادول .. اسبريــن .. كـافلجين .. فولتريـن .. الـــخ .....!!!!!!
عندك بنادول في شنطتـك ..؟؟ في جيبكـ..؟؟ في درج العربيـه ..؟؟
اكيد عندك .. الناس بتبلـع سااااي عمال على بطـال كدا .. غلط غلط غلـط ..
مسكنات الالم عده انواع .. كل حاجه ليها مكان معين بتشتغل فيهو .. وجرعه محدده لازم ما نتعداها..
البنادول مثلا : 1 جرام (بالنسبه للبالغين) وما تكرر الجرعه الا بعد مرور 8 ساعات على الاقل
الاسبرين : 100 جرام وما نكرر الجرعه الا بعد 6 الى 8 ساعات لو الالم مستمر ..
الفولترين او الفوتركس : 500 ملجم وما نكرر الا بعد 8 ساعات ..
الايبوبروفين : 500 جرام وممنـوع منعا باتا للناس اللي عندهم مشاكل في المعده (قرحـه .. الخ)
اهم حاجه انو نعرف اسباب الالم شنو ؟ يعني الصداع مثلا ممكن يكون من الجفاف او بسبب الامساك او لانو جسمك ما ماخد كفايتو من النوم ..
الاسبرين بالذات بيزيد سيوله الدم , الدراسات القديمه بتقول انو نبلع حبه اسبرين كل يوم
عشان تعمل وقايه من الجلطات , بس الدراسات الحديثه ضد الكلام دا تماما (وانا زاتي ضدو)
لانو لو انجرحتا او حصل ليك حادث لا سمح الله بيكون ايقاف النزيف صعب جدا ..
- نكون حذرين في التعامل مع المسكنات شويه ..
- ما نبلع اكتر من الجرعه المقرره ..
- نفتش عن اسباب الالم (خاصه الصداع) المحتمله الاخرى ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: khaleel)
|
| Quote: - واخيـرا .. لمن تبدا تقلل السجاير حا تحس بي راحه كبيره لانك انجزتا حاجه مهمه وحافظتا على صحتك .. (تميز بي انجازاتكـ) |
علي الطلاق دا كلام زول مجرررررررررررررررب يا ود الصايم.
وبالمناسبة مع انو بوستك يبدو للعيان انو صحي وتثقيفي لكن اجندتك ضد شركات السجاير واااااضحة.
| |
|
|
|
|
|
|
|
|
|
Re: قلبـــك كيــف ....؟؟؟ (Re: شمائل النور)
|
شكرا ليك يا دكتورة موضوع مفيد جدا بالذات لينا نحن ناس ما بعد منتصف العمر ديل و بالمناسبة دي الأولاد الصغار يمنعوا الفوضى و يخلونا نستفيد.
و برضو سلام يا تمبس.
| |
|
|
|
|
|
|
|
|
|
Re: قلبـــك كيــف ....؟؟؟ (Re: شمائل النور)
|
Quote:
بتمشـــوا الحمـــام كــم مـــره في اليـــوم ..؟؟
|
عارفه يا دكتورة
الفقرة دي كنت عايز اكتب فيها موضوع عديل
واحد صاحبي عندو صديقه دكتور
سألو قال ليهو سر صفاء بشرتك شنو
قال ليهو بمشي الحمام كتير
صاحبنا استغرب طبعا،، المهم اداهو شرح في انو الواحد مفروض يتخلص من اللي في بطنو أول بأول
لأنو دي سموم.. وإلخ
شكرا ليك على النصائح
أكان كدا من الليلة نشوف مكان اللخدر بي وين
| |
|
|
|
|
|
|
|
|
|
Re: قلبـــك كيــف ....؟؟؟ (Re: motaz)
|
أحم أحم
صباح الخير يا جماعة
أحييكم من داخل الحمام .. حسب توجيهات الدكتورة
بانو لمن تخشوا الحمام تكونوا ريلاكس .. أها
أنا مركلس جوّه الحمام ومشغل سودانيز وبسمع في خدر
في ريلاكسيشن أكتر من كــدا؟
بس أوعوا تكونوا شامين حاجة!
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد عبد الماجد الصايم)
|
Quote: الديمقراطية دي مش معناها أي زول
يقول الكلام العندو؟ |
بي فهمك دا للديمقراطية حساب في الفيس بووك ما بضمنو ليك ناهيك عن الفوراول
______________________________
مداخلتك بتاعة الركلسة دي تكتبها هناك , فيها سماحة كاريكاتير من عمك حسن
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد عبد الماجد الصايم)
|
دلوش لكن إسكيلك عااالي
ياحبيبة ياخ بوست زي الفل ..
تعرفي أنا لزمن طويل يا داليا محافظة على وزن معين بدون إجتهاد ـ خلقة الله ـ أو كنت قايلة كدة ، ومؤخرا برضو كنت ملتزمة بزمن للرياضة ، قمت سكنت لي جنب محل شهير بتاع "كشري "..طبعا بدت المسألة كنوع من التجريب ..وأنقلب حب واصبح إدمان ..حاجة غريبة صاح ؟، ناس المطعم طبعا مستغربين جدا لأنهم هم زاتهم بجي بلقاهم بياكلوا في حاجة تانية ..، أها أتطور الأمر بانهم أول ما يلمحوا عربتي جري بجوا جارين بالكيس ..، والله في شهرين انا زدتا 8 كيلو ..، وطاخ دق ناقوس الخطر ..، هسة بقيت باكل يوم بعد يوم ، وبغمض لمن أجي ماشة بعندو ..
المقدمة دي كلها ..عشان أقول ليك بالله كلمينا عن (السلوك الغذائي )..والكوارث البتحصل منو ، وعشان
تعرفي الشقي ما بسعد ..الناس هنا بسمنو بالكنتاكي وماجاورهو وأنا واقعة" كشري "
ــــــــــــــــــــــــ
بضرب ليك بعدين ..في أخبار وكدة ..
| |
|
|
|
|
|
|
|
|
 Re: قلبـــك كيــف ....؟؟؟ (Re: داليا الكباشى)
|
الدكتورة / عروس الجنا
سؤال جادي
شايفاك جايبة سيرة النعناع
اها انا الاخضر ما بلم فيهو طوالي
وعارفة طبعاً انو اي شي طازج احسن من المجفف
لكن المجفف بشتغل مع نصيحتك بتاع تهدئة الاعصاب دي ؟
والله مغرودة في التهدئة دي غرد
العلامة الفوق الارسال بتاعي دا لي بوستك مش لي مداخلتي
ههههههه
| |
|
|
|
|
|
|
|
|
|
Re: قلبـــك كيــف ....؟؟؟ (Re: الجندرية)
|
يادكتورة القلب الحمد لله تمام
لكن ياريت تعرجي لينا على مصران الجن العصبي دا
حمت الجهات السبعة مالقيتلو دواء
ماتجي تقولي تنظيم غذائي برضو
الادوية الجربناها:-
duspatalin 200 mg
nexium40
colpermin
disflatyl
داغير ناس
النعناع والحلبة والحرجل والرمان وعيييييييييك
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد عبد الماجد الصايم)
|
حأسميك من الليله نطاسة البورد الرائعه .
والبوست ده مفروض يكون زى العيادات الفى
الشركات الكبيره ( عشان الموظفين ما يتسيبوا ) .
أكيد كلامك مفيد للغايه وبتهضم بـسرعه لانو الواحد
بـحس بيهو كلام أخوان فى شكل ونسه عاديه وأحسن
مما تسمعوا فى عيادة دكتور راسو مشيب ولا بـس ليهو
نضارات كبار ووشو جادى .
عموما أنا فى حكاية المشى والحمام مؤيدك تماما ومن
الليله بعمل بنصايحك .
بـس فى موضوع السجاير ده أنا ما معاك لحدى ماتمبس
يوقف , لأنو ماممكن باب النجار يكون مخلع !!
متين ماتمبس يوقف أنا بوقف .
بعدين شوفى لينا الرأى الطبى فى موضوع الشيشه التى
يتناولها ود الصائم عشره مرات فى اليوم .
مساهمه مقدره يادكتوره كونك لسه فى بداية الطريق
وخريجه جديده ,, تمبس البت دى لازم توديها لندن تعمل
الزمالات والشهادات والحاجات السمحه البتتكتب فى
اليافطات البنقراها فى شارع الدكاتره ديك .
يعنى أوعك تجيبها تسكنها فى غبيره ولا أم الحمام
وهاك ياولاده وبامبرز وبزز وسهر وتسنين ,, تقوم تفك
منها الشغله وتبقى المهنه ( ربة منزل ) .
وبعدين حنحملك المسئوليه كامله .
| |
|
|
|
|
|
|
|
|
|
Re: قلبـــك كيــف ....؟؟؟ (Re: محمد عبد الماجد الصايم)
|
| Quote: يا زول هوي أمرق بررره الموضوع! |
طبعا دا الدايرو انت . لكن مافي ليكـ
------------
بابدري اول حاجه وعليكم السلام ورحمه اللله وبركاته (التسوي بي ايدك غايتو
الحاجه التانيه حا اعود لي موضوع الشيشه والتمباك بي باسهـــــــاب
(كيتن في ود الصايم اولا)
(ولانو مدام ود الصايم فترت واشتكت لي شديد)
(ولاهميه الموضوع بالطبع) ....
| |
|
|
|
|
|
|
|
|
|
Re: قلبـــك كيــف ....؟؟؟ (Re: ABUHUSSEIN)
|
| Quote: طلبه طب بجامعه الخرطوم سنه 77 تقريبا .. (يعني ابوي اصغر من اساسي ) |
د. داليا - تحياتي،
أولا: شكرا على الكلام المهم ده ..
ثانيا .. كنتا سنة 1980 شغال في مكتبة الطب
في الخرطوم .. وأنا في حالي ده .. الله يستر
أبوك كان طالب سنة 77 .. يعني أنا أكبر من
أساسي .. طيب بكون وين لـ ود الصايم
ثالثا وهذا هو المهم: مشيت قبل عشرة يوم
لـ د. جلي في مستشفي الحبيب سألني عندك
شنو .. قلت ليهو ما عارف لكين لي خمســة
شهور كده ما طبيعي وانا ما قاعد أزور
المستشفى إلا تغلب أم غلاب .. طيب المطلوب؟!
قلت ليهو داير أعرف أي حاجة عندي وعلى الله
المهم عمل صور وفحص شامل .. ولما جيت لصورة
القلب .. رقدت وأقول ألله يستر .. الله يستر ..
يا ربي قلبي يكون ثابت .. درعت الممرضة
الاجهزة إياها وكان وجهي معاكسا لجهة الجهاز
فأتكلت على الحي الذي لا يموت وغافلت الممرضة
وعاينت فإذا بقلبي ينبض .. شافتني الممرضة
أعاين ولا سألتني .. معناها مش ممنوع الزول
يعاني لقلبو وجها لظهر .. دخل سوداني ملتحي سلم علي
وأتكلم مع الممرضة كلام زول مسؤول عن ما يجري
في أمور القلب .. وقعد يؤشر لقلبي وينضم مع
الممرضة ويمردغ في الانجليزي عشان ما أفهم
حاجة .. الله يستر .. وكت شفتا الموضوع طول
قلتا يازول هو عاوز يعمل شنو أصلو ما الباقي
باقي موت موت حيا حيا .. ففتح الله عليه بكليمة
محمد تمام ما شاء الله .. قلت له: الله يبشرك
يعني حاقول ليهو شنو بعد الزرده دي
وأقول ليك قولي ياموية من هنا ورايح ..
تحياتنا يا دكتور .. نتابع
| |
|
|
|
|
|
|
|
|
 Re: قلبـــك كيــف ....؟؟؟ (Re: Mohamed Abdelgaleel)
|
| Quote: وأقول ليك قولي ياموية من هنا ورايح .. |
بـرافوو (عمو) محمد عبدالجليل (لانو ثبت بالدليل القاطع انك اكبر من اساسي)
اهم حاجه عملتها هي حكايه الـ Check Up
ودي حاجه اساسيه جدا , وضروريه .. حا اتكلم عنها لي قدام ..
تحياتي وانشالله نتلاقى قريب ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: كمال سالم)
|
| Quote: حأسميك من الليله نطاسة البورد الرائعه . |
تشكـر يا ذوق ..
Quote: تمبس البت دى لازم توديها لندن تعمل
الزمالات والشهادات والحاجات السمحه البتتكتب فى
اليافطات البنقراها فى شارع الدكاتره ديك .
يعنى أوعك تجيبها تسكنها فى غبيره ولا أم الحمام
وهاك ياولاده وبامبرز وبزز وسهر وتسنين |
| |
|
|
|
|
|
|
|
|
|
Re: قلبـــك كيــف ....؟؟؟ (Re: ismeil abbas)
|
Quote: لكن الحمدالله لا سجائر ولا ولا ولا..فل أتوماتيك ماشاء الله والحمدالله..
الشاى لو لقينا بنشبرو ولو مالقيناهو مابنسكو..
مشى وكورة وجرى ونطيط..الدنيا عايزة كده..الله يمتع الجميع بالصحة..يارب.
|
عمـو اسماعيـل الملك ..
انت كـده 
ربنا يديك الف عافيه انشالله
------------
ما جايينا قريب ..؟؟
| |
|
|
|
|
|
|
|
|
|
Re: قلبـــك كيــف ....؟؟؟ (Re: سناء عبد السيد)
|
| Quote: النسوان و البنات الشابات بقوا زايدين زيادات ملحوظة في الوزن |
وتقولي شنو يا سنويه لو عرفتي انهم بيفتشوا للسمنه دي تفتيش ..؟؟
| Quote: ما قالت ليكم د. دلوش لازم تتمشوا زي زمان و وفروا قروش الرقشات |
تسلمـي يا حبيبي انشالله ..
خليكي قريبه ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: الطيب شيقوق)
|
| Quote: داليا بت الكباشي خليني اقرأ ما تضحكيني حتك |
اقرا بي مهلتكط يا قريبي ..
انشالله تستفيد ..
ود الصايم دا ختيناهو كـ موسيقى تصويريه عشان الزهج ما يحصـل ..
نوووورت البوست ..
| |
|
|
|
|
|
|
|
|
|
Re: قلبـــك كيــف ....؟؟؟ (Re: عمران حسن صالح)
|
Quote: نوقف العربيه بعيد شويه من المكتب ونمشي المسافه الباقيه بكرعينا..
- احسن وقت نمشي فيهو الصباح بدري او المسا بعد الشمس ما تغيب..
- ممكن نعملوا برنامج ثابت يوم بعد يوم 30 دقيقه الى ساعه..
- جربوا الكلام دا وحا تدعوا لي بعد اسبوع بس والفرق حايكون كبير ..
|
دلويه يا عسلنا ..
غايتو بوست المادخله ندمان ..
تسلمي انتى وربنا يعليك اكتر واكتر ..
اها تعرفى انا المشى ده عندي معاهو غرام ما عادي ..
يعني ممكن امشي ليك مسافة من الخرطو لي امدرمان دون كلل او تعب ..
وبزهج جدا من السواقه او اكون راكبه .. مرات بقول اركن واتم الباقي ماشي ..
خاصة .. يجيرك الله نحن هنا عندنا زنقه ازدحام الله لا وراك ليها ..
اها يا بت أمي المشي الفايت حده ده يعملوا معاهو شنو ... ؟
يعني بالواضح كده كساحة نمره واحد .. ههههههههههههه ..
| |
|
|
|
|
|
|
| |
داليا الكباشى
محمد عبد الماجد الصايم
عبدالله ود البوش
جلال جبريل
الشاذلى خيرى عبد الله
Mohamed E. Seliaman
ارصد محمد جلال
omer osman
SHIBKA
humida
محمد يوسف الزين
Gaafar Ismail
عمران حسن صالح
طارق جبريل
tmbis
مريم بنت الحسين
محمد البشرى الخضر
ABUHUSSEIN
شول اشوانق دينق
سناء عبد السيد
ismeil abbas
ابو جهينة
بشير جبريل علي
salee
وليد عبد اللطيف
khaleel
شمائل النور
Elawad
motaz
داليا حافظ
الجندرية
زول ساكت
البدري عبد الله
كمال سالم
Mohamed Abdelgaleel
الطيب شيقوق
عفاف الصادق بابكر
فيس بوك
تويتر
انستقرام
يوتيوب
بنتيريست