للرومانسيين... صلح زوجي على الطريقة المصرية

السلام عليكم

كتبت الأخت العزيزة سودانية 2000 موضوعا عن الرومانسية في الحياة الزوجية (فرع السودان) وقد وصلني عن طريق الايميل الوصف التالي للرومانسية في الحياة الزوجية (فرع مصر) وأهديه لها ولكم

أغرب طريقة صلح زوجي في مصر

شهدت منطقة حلمية الزيتون بمحافظة القاهرة واقعة غريبة للغاية ، عندما رفع رجل لافتة اعتذار لزوجته في الشارع يبلغ طولها 12 مترا وعرضها 8 أمتار ، تختلط فيها عبارات الحب بوعود الحياة "مع أفضل إنسان في الحياة".

وأفادت تقارير صحفية امس الخميس بأن الزوج استعان بمجموعة من العمال في رفع اللافتة المكتوبة باللغة الانجليزية ، كما استعان بفرقة موسيقية لتعزف أشجى الاغاني الرومانسية بمجرد إطلال الزوجة من شرفة المنزل.

وقالت التقارير إن الواقعة شهدت تجمع عدد من الصحفيين وكاميرات الفضائيات بدعوة من الزوج إيهاب معوض الذي يعمل مهندس ديكور ، وذلك ليكون الاعلام شاهدا على "أغرب صلح زوجي في التاريخ" ، كما وصفه الزوج .

ونقلت التقارير عن الزوج قوله:
"زي ما أنا زعلتها أمام عائلتها ، قلت لازم اعتذر لها بس أمام الملايين".

وكانت مشادة كلامية بين إيهاب وزوجته ريهام تصاعدت إلى خصام ثم طلب للانفصال ، وكان تفسيره لتمسكها بطلبها هو أنه جرح مشاعرها أمام أفراد أسرتها وأمام ابنيهما ،
ففكر في الطريقة التي يصالحها بها ثم هداه تفكيره إلى عمل لافتة الاعتذار أمام البيت حتى يفاجئها حين تدخل الشرفة.

وبعد "حفل الاعتذار العلني" استقبلت ريهام زوجها بعبارة واحدة:
"أنا مش محتاجة كل ده. بس أوعدني ماتعملش كده تاني".

[URL=http://www.youtube.com/watch?v=fm0Fwka_kIE[/URL]

رومانسي آخر لكنه ما صادف نجاح :(

يا ربي القلد التاني منو؟؟

http://www.youtube.com/watch?v=_A5Y4B7zOBA&NR=1

ما عندو موضوع ساي!

الأردنية لسان حالها يقول:
إعتذارك ما بفيدك
ودموعك مبتعيدك
العملتو كان بايدك

الفيديو التاني باهداء خاص للأستاذ الطيب شيقوق

Quote: ما عندو موضوع ساي!

محمد الصايم..
شايفاك عااااامل حسابك! بكرة المدام لما تتطالب باعتذار مماثل حتقول ليها أنا من زمان في بوست رمانة قلت الراجل ما عنده موضوع
حسادة ساكت :)

الأخ جلال جبريل
شكرا على احضار الفيديو
الــ show واضح في الفلم كله، مش؟
بس برضو حلو :) غلبها البتقوله

ــــــــــ
والله روحي حرقتني وأنا بحاول أجيب الفيديو أو اللنك

Quote: بكرة المدام لما تتطالب باعتذار مماثل حتقول ليها أنا من زمان في بوست رمانة قلت الراجل ما عنده موضوع

لكن هو فعلا ما عندو موضوع!
ياخ يزعل مرتو من الأساس ليه؟

حدّ يزعل مراتو؟

يا بت هوي فتحي عينك و ابقي نجيضة وفالحة..... قدر ما اجي داخله عليكم القاكي .... هي هي هي .... و قر قر قر .. الراجل ما تضحكيلو كتير..... يسعالني الله، يحقر بك....الراجل اديهوالعين الحمرا. وان قدرك الله ايدك تلحقيها ليهو لحقيها...ابقي نجيضة.....آآية..... زي امك.....الله بسعلني وقت ابوكي يقول حاجة تضحك.... امشي اتحشر في الاوضة واضحك زيييين واجي مارقة صارة وشي.... وبعدين اوعك واوعك وبعدين تااااني اوعك... تقوليلو الجلابية دي سمحة والله العمه اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....واكربيهو بالطلبات.... اوعي تخليلك قرش يبيت في جيبو...واوعك تخليهو يشوف ال...... بيخربن الرجال... و وقت المسلسل داك يبدأ ...جيبي فندكك واقعدي دقي أي حاجة جنبو ويا ريت لوكانت شطة... ولا كان شافعك جيعان وداير يرضع وبيبكي خليهو في بكاءهو داك لمن المسلسل ينتهي....

وبعدين ما يجى داخل يلقاكى تغنى حتى ان بقيتي دايرة تغني اوعك من الغنا الخايس ناس حبيبي حبيبي.... امسكي في الغنا الحار زي البيجري نسيبتو و مرتو طلقانة ولا اندب حظي ولا دفاعنا الشعبي ياهو ديل ولا النار ولعت بقلبيبطفيها.....اااااااااااي.... عشان تربيلو الزلعة .....والخلعة....بس اوعك تغني ليها لليلة يوم الرجال.... بيقوم يصدق و يتحنفش فوقك ساكت........ واوعك تشكريلو حاجة جابها.... ان جاب لك لحم ختي ايدك فوق راسك وقولي لو ووب علي ووب علي ووووب علي غشوك وادوك الجلافيط.....وان جاب لك فتيل ريحة اول ما تفتحيهو وتشميهو طوالي صرى وشك وقبلي غادي وابزقي وقوليلو دا شنو يا عبدالله؟......الريحة المتل ريحة الفسيخ دي جايبها من وين؟ غايتو انت مغستك تقد
وان جنك نسوان ولا بنات....ما تخليهو يقعد وسطن....ويتونس.... طيريهو من البيت
وان ابى يمرق... قدرمايقول ليو نكته ولا يخفف دمو قدامن صري ليهو وشيك.... وقوليلو انت ........... ما عندك غير النكتة دي؟يا خي عملت لنا بها وجع وش
اصلهم الرجال عارفاهم... الواحد فيهم من يشوفلو لمت بنات يقعد يخفف في دمو ويعمل فيها ودنفاش.....وتلقيهو يضحك بلا سبب... حتى ان واحدة قحت ساكت ... يقعد يضحك ويصفق اديهو....واوعك تخليهو معاهن وتدخلي المطبخ تسوي لك شربات .....وحات الله بنات الزمن دا ان غفلت من راجلك دقيقة بس تلقيها عرستو... ااااااى اسمعى كلام امك يا بت حشاى امك دايرة مصلحتك

رمّانة .. محمد اللمين دا ما تشتغلي بيهو!

Quote: حدّ يزعل مراتو؟

ود الصايم عفيت منها.. كجوك آآه..
---
رمانة ازيك وين الحي بيك؟

Quote: ود الصايم عفيت منها.. كجوك آآه..

حليمة .. المرة هددتني .. النفط مقابل الغذاء

وعلي ايه الزعل بين الازواج ما الحياة خارج المنزل فيها منغصات كثيرة وزعل كثير فلماذا يجر الواحد او الواحدة زعل برة لجوة ...وبعدين اها بعد اكثر من ربع قرن زواج ما عارف الزعل في شنو هن حيستحملن ايه واللا ايه ؟؟ وبعدين لزومو ايه ال showbiz ما بدل اليافطة billboard المكلفة دي ما كان يشتري ليها هديةويقدمها قدام الزعل شريكتو قدامهم في عزومة عشاء او رحلة نيلية او فوق السطوح ويصورو الحدث ويختو الصورة في الصالة قدام الباب عشان اي واحد داخل البيت يشوفها (سيناريو لفيلم مصري ببلاش) .... دة كلام؟ ما فيش خلق وابداع ؟؟ بعدين الكلمة الحلوة صدقة واحسن من مليون يافطة ...

الأخ محمد الأمين
قطع شك .. الاتبرعت بالوصية هي النسيبة
بتحريض من الزوج
عشان يتزوج تاني بارتياح
ما تقول الرجال السودانيين بقوا متلقين حجج
الواحد لو زوجته كحت بس ينتهزها فرصة وعلى طول يروح كاتب كتابه على واحدة تانية

الأخت حليمة
شكرا ليك على التحية..أنا في الغالب بعاين من الشباك
ومرة مرة بدخل شوية وأمشي
ــــــــــــ


بست .. على جنب كده: مش انت حليمتنا الزمان ذاتها(حليمة2) ولا بس يخلق من الشبه أربعين
أول مداخلة لحليمتنا كانت في بوست عن الشاعرات العربيات
لحد الآن لا زلت أذكر الموضوع :)

Quote: قطع شك .. الاتبرعت بالوصية هي النسيبة

في بعض الاوقات تسلم الزوجه اذنها(اضانها) الى تجارب فاشلة وتبني عليها

Quote: الواحد لو زوجته كحت بس ينتهزها فرصة وعلى طول يروح كاتب كتابه على واحدة تانية

هو في تين؟ مثل سوداني

Quote: وبعدين اها بعد اكثر من ربع قرن زواج ما عارف الزعل في شنو هن حيستحملن ايه واللا ايه ؟؟

يا أستاذ أبوبكر
انت متأكد انه كلامك ده ما للاستهلاك الاعلامي.. لأن الكلام ده ممكن اتأرشف ويسترد عند الطلب.. وبعدين في احتمال تلقى نفسك في ورطة ما بتحلها ليك لا لافتة ولا فرقة موسيقية

بعدين لكل مقام مقال
مهندس الديكور صاحب اللافتة قال ليك لما تكون الزعلة زغنونة برضيها بالزهور
لكن لما يزعلها قدام عيالها وأهلها لابد من حضور وسائل الاعلام

يا قول حبوبتي.....
بِس!

الأخ أبو مهند
شكرا على المشاركة.. الكلام الذكرته ينطبق على الزوج والزوجة

الأخت مريم بنت الحسين
انت وأخوك صلاح غريبة



كرهتوا الحبوبات عيشتهم الله يسامحكم


سلام

ايهاب بالغ لكن !!! كان يعمل لافتة صغيرة بس تجي جارية ....

الزمن ده العرس ساهل ولا ساهل ....

Quote: عندما رفع رجل لافتة اعتذار لزوجته في الشارع يبلغ طولها 12 مترا وعرضها 8 أمتار ، تختلط فيها عبارات الحب بوعود الحياة

مافي داعي...

الأخ الكريم ود القاضي سلامات
لك شكري على المشاركة


"أعفي عني" "عافي منك" "العفو والعافية" عبارات أصلية نستعملها بكل أريحية وصدق بيننا وبعضنا لكنها أحيانا تكون صعبة على اللسان بين الأزواج. بعض الأزواج يفضلون اللف والدوران حول عبارة واضحة كـ "أنا أعتذرأخطأت في حقك"..لأن هذه العبارة تعطي احساسا زائفا بانتفاء أو المساس بكبرياء الزوج أو الزوجة.. مع أن الكبرياء بين الزوجين في الأصل قد لفته بعناية تلك الورقة المسماة قسيمة الزواج بحيث لا يستطيع التنفس الا بصعوبة.
الرومانسية هي الأصل في الزواج وهي ذاتها المودة التى اشار إليها الله سبحانه وتعالى في القرآن والود هو أن يعمل الانسان بجهد وبكافة الصور لارضاء من يودهم وهو سعيد ومبسوط أربعة وعشرين قيراط فما بالك بالرحمة.
وطبعا من غير المنطقي أن نفترض الا يحدث شجار وخصام بين اثنين يتشاركان في كل شيء. لا بد من حدوث ما يغضب وقد شاهدت فيديو به مقطع صغير خفيف الظل من حديث شيخ لعله اماراتي يتحدث فيه بكلمات وأفكار بسيطة عن كيفية امتصاص الزوج لغضب الزوجة
وببساطة الكلمات تتمثل في قوله أن الزوجة إذا قالت له لا أريدك ولا أريد العيش معك فليقل لها لكني أريدك لأنك الاوكسجين الذي اتنفسه .. انت البحر وأنا سمكة..الخ..أو كما قال.. باختصار يمتص الغضب بكلمات رومنسية هي من صميم المودة التي جعلها الله بين الزوجين
ويحضرني هنا حديث عن الرسول عليه الصلاة والسلام أو قصة ترويها لنا السيدة عائشة رضي الله عنها وهي تحكي عن أخلاق الرسول الكريمة ويظهر فيها جانب من شخصيتها التي نعرفها وهي غيرتها التي تمارسها بدون قيود. أن الرسول عليه الصلاة والسلام كان معه ضيوف وقد أرادت السيدة عائشة أن تقدم لهم طعاما غير أن إحدى زوجات الرسول الأخريات سبقتها باحضار الطعام فما كان منها إلا أن تعمدت كسر الاناء حتى لا يوضع أمام ضيوف الرسول (ص) غير طعامها. فلم يغضب أو يتضايق أو "يزعأ" فيها كما فعل هذا الرجل أمام الناس بل رفع الاناء المكسور ووضعه أمام الضيوف وقال لهم:"كلوا، غارت امكم، غارت أمكم" ولم تحكي لنا أن الرسول (ص) قد ثار أو عاملها بطريقة قاسية فيما بعد عقابا لها على هذا الموقف.
هناك بوست فيه تساؤل عن أسباب عدم امساك الزوج بيد زوجته في الاماكن العامة وهو مظهر بسيط وصغير من مظاهر الود والسبب هو أننا نعتقد دائما أنه ..ما في داعي.. مافي داعي لأي مظهر من مظاهر المودة بين الزوجين ومافي داعي أكثر لو كان هذا المظهر خارج حدود البيت.. بل ربما ما في داعي حتى خارج حدود غرفة الزوجين.. هل يقبل الزوج زوجته (على الخد أو الجبين أو اليد) أمام أولادهما؟ أهلها؟ أهله؟ أصدقائهما؟ في الشارع؟ في المطارعند عودتها من السفر؟ مافي داعي .. ما في داعي حتى من باب الاحترام والتقدير. مافي داعي أن ينشأ أبناؤهما على رؤية مظاهر المودة والرحمة مافي داعي أن يعلم أهلها انها موضع التقدير ما في داعي أن يحس اهله بأن من ارتضوها زوجة لابنهم تسعده ما في داعي أن يعتذر لها أمام الناس حتى لو "كسفها" أمام الناس ما في داعي أن تطل الرومانسية برأسها في أي شكل بسيط أو كبير قليل أو كثير ما في داعي للرومانسية نفسها طالما هما زوجين وخلاص .

للمتداخلين الود والشكر على المشاركات
رمانة

بري يا يمه، حبوبتي برية من حبوبة غريبة والكلام البتقول فيه ده..... الله يرحمها


وتاني بِس.... قال بحبها أوي قال

Quote: وكانت مشادة كلامية بين إيهاب وزوجته ريهام تصاعدت إلى خصام ثم طلب للانفصال ، وكان تفسيره لتمسكها بطلبها هو أنه جرح مشاعرها أمام أفراد أسرتها وأمام ابنيهما

يا الهي و يا مجيب الدعوات و الله يا رمانة مشكلة زي دا لو بعملوا ليها لافتة قماش ستة أمتار و فرقة موسيقية خالتي التومة يلزمها لافتة قماش بقدر كساء الكعبة و يجوا يغنوا ليها ناس Back street boys الله يصبرك يا خالتي التومة* بس أجرك عن ربنا (ههههههههه)


شكرا رمانة علي البوست دا


---------------------------
* ما في زول يسألني خالتي التومة دي منو أي زول/ة يفكر و يخت محل خالتي التومة دي اي خالة

Quote: وببساطة الكلمات تتمثل في قوله أن الزوجة إذا قالت له لا أريدك ولا أريد العيش معك فليقل لها لكني أريدك لأنك الاوكسجين الذي اتنفسه .. انت البحر وأنا سمكة..الخ..أو كما قال.. باختصار يمتص الغضب بكلمات رومنسية هي من صميم المودة التي جعلها الله بين الزوجين

عليك الله فتشي لينا الفيديو ده.. ده زول زكي خلاص...

بمناسبة الكتابة الطاعمة دي يا رمّانه... اهدي ليك الايميل الوصلني ده

Quote: عندما يفلح شيطان الغضب في تغييب العقل، ويذكي نار الخلاف بين إثنين وتندلع (الشكلة)، يظل هناك درجة من الوعي الداخلى يدفعنا، عندما نختلف مع الغريب لأن نضع في إعتبارنا مساحة من المراعاة، على عدم الوصول بـ(الشكلة) لنهايات اللاعودة .. ليقيننا بأنه بعد أن يهدأ الغضب ويذهب الشيطان تظل الدواخل تحمل بين طياتها الحزن وطعم الجرح وشئ من حتى. أما بين الأخوان فسرعان ما تصل (الشكلة) لقمة منحنى الغلط بأنواعه، من تلاسن وتجريح وسباب وتشابك بالأيدي والأرجل كمان، ربما لأنهم يحملون في دواخلهم يقين بأنهم مهما إختلفوا أو أساءوا لبعضهم البعض، فما أن يهدأ الغضب حتى يعودون لبعضهم (زي السمن على عسل) فاهلنا بيقولوا (شكل الأخوان زي شكل المصاريين في البطن) .. تغلط في بعضا وترجع. للشكل عند الأزواج (نظام براهو) .. فالنساء يملن للتنفيس عن الكبت وضغوط الحياة الزوجية بسلاح التهديد وما أن يشتعل أوار الشكلة حتى تتهور الزوجة بالقول: إنت كان راجل .. تطلقني هسي دي .. أنا تاني يوم واحد ما بقعدوا معاك! تقولها وهم الإثنان على أتم يقين بأنو (ده كلام شكل ساي .. مابتقصدوا) فلو تابعها الزوج في تهورها وقال: أمشي إنتي طلـ... لسقطت من طولها غائبة عن الوعي ولسان حالها يقول: إنت ما صدقتا يا سيد ؟!! 0 على العكس من (علوية) سريعة الغضب بطبعها الحامي ونفسها القصير، كان زوجها (كامل) هادي الطبع أميل ما يكون للبرود وعدم المبالاة، ولذلك كانت (علوية) ما أن تؤجج نار الشكلة بينهما حتى يصب عليها (كامل) الماء البارد بلا مبالاته المغيظة، مما يشعرها بالكبت فتندفع في محاولة تصعيد المشكلة، لعلها تفلح في جره معها للشكل والتنفيس عما بها ، لذلك عندما لاحقته بكترة الكلام في ذات شكلة، فكر في الخروج من البيت هربا من النقة فلاحقته حتى الباب وهي تصيح خلفه: ما ترد علي .. مخليني أهوهو زي الكلبة مالك؟ .. طبعا ما معتبرني بني آدم زيك .... وعندما فتح الباب وخرج دون أن يلتفت إليها صاحت فيه: خليك عارف يا كامل .. لو طلعتا .. ما حا تجي تلقاني قاعدة ليك في البيت ده .. ترسل لي ورقتي في بيت أبوي. ما إن أغلق الباب وراءه حتى إنفجرت في البكاء، ومع إنحسار نوبة البكاء كانت قد وصلت لقناعة بأنه لا يأخذ تهديداتها على محمل الجد، لأنها دائما ما تهدده بترك البيت ثم لا تفعل .. إنتصبت واقفة وجمعت ثيابها وحاجياتها في (هاند باك) بسرعة .. وتركت له رسالة لطختها بدموعها تخبره فيها عن إستحالة العيش بينهم وتطلب منه الطلاق ثم وضعتها في مكان بارز على التسريحة وخرجت من البيت. ركبت الحافلة وهي تعاني من تنازع شديد طوال الطريق لبيت أهلها، فقد أحست بشئ من الندم على تهورها وخافت من تبعات تصعيد الشكلة بتدخل أسرتها في الموضوع .. سرحت مع أفكارها في محاولة لتصور ردة فعل (كامل) عندما يعود للبيت ويجدها قد نفذت تهديدها وتركته .. حدثها قلبها بأنه سوف يحزن ويكتئب لفراقها ولكن شيطانها صوّر لها سعادته الغامرة بتخلصه منها، وتراءى لها وهو يضحك سعيدا بحريته .. فرقت بأصابعها للكمساري - عندما وصلت بأفكارها لتلك المحصلة - لكي تنزل .. وعادت بالحافلة العائدة على نفس الخط وهي تجاهد في إقناع نفسها بعدم (نخّتها) عن الزعلة، فكل الحكاية أنها تريد أن ترى ردة فعله على مغادرتها البيت عند عودته .. جلست تنتظر على نار حتى سمعت صوت مفتاحه يفتح الباب فأسرعت بالنزول للأرض وحشرت نفسها تحت السرير وإنتظرت. من مكمنها تحت السرير راقبته عندما دخل وقرأ الرسالة ثم تعالى صوته وهو يصفر ويدندن لحن أغنيته المفضلة .. قلب الرسالة بعد أن أتم قراءتها وكتب على ظهرها بضعة كلمات، ثم فتح الدولاب وأخرج ملابسه ودخل الحمام دون أن يتوقف عن الدندنة والصفارة .. ظلت في مكمنها تتقلب في نار الغيظ من لا مبالاته، وفضلت الإنتظار حتى خرج من الحمام حيث حمل الموبايل واضجع على السرير .. سمعته يضحك وهو يضرب موعدا مع أحدهم ويدعوه لقضاء الأمسية معا ويختم مكالمته بالقول: أيوه .. الليلة مسجون وأنفكا .. السهرة صبّاحي .. أيوة غارت مشت بيت أهلا .. ربنا ريحني منها .. يلا خلاص نتقابل بعد نص ساعة !! كادت تنفجر غيظا وسالت دمعاتها حتى بللت الأرضية بينما إنهمك – هو - في القشرة وكبكبة العطور وتأمل نفسه في المرآة بسعادة قبل أن يحمل مفاتيحه ويخرج. أنتظرت حتى سمعت صوت إغلاقه للباب الخارجي واسرعت بالخروج من تحت السرير .. إندفعت لتحمل الرسالة وتقرأ ما كتبه على ظهرها .. فوجئت بأنه كتب ثلاث كلمات فقط: عاآآآآرفِك تحت السرير!!!!

الأخ حافظ حسن ابراهيم
لك تحياتي
خالتك التومة ليها رب العباد ..ونعم الوكيل :) شكرا ليك على الاضافة

الأخت مريم
شكرا على الايميل.. الطلاق في الاسلام كلمة بس لا اقتسام ثروات ولا اجراءات تسل الروح. لو ما الواحد بقى عاقل بتهيأ لي مافي بيت حيصمد أكثر من يومين العسل. الفيديو لما ألقاه حأرسله لجلال جبريل عشان ينزله هنا

تحياتي
رمانة