رسالة للسيد الرئيس

الشاعر عبدالله عبدالرحمن عبدالله

"بسم الله الرحمن الرحيم




رسالة للسيد الرئيس


صوتَ ليك
ومآلى بعد الله عليك
وانا صوتى قارى كتاب مُناى
قُبال يجيك

وانا صوتى ليك
ترعى المبادى تكون وفى
الزين لاهلك تصطفى
والشين مخاصمك مُنْتفِى
بى سمح رعيتك تحتفى
فى اتراحا ظاهرو ما خفى

صوتنا ليك
والكُلْ بقت آمالو فيك
يالجيت بأمر المشورة
شتلاتنا راجياك تمطرة
وصحرا الأمانى تخضرا
واحلام شبابنا تفسرا

للوحدة عايزنك ضرا
نتلمَّ فيهو محاورة
وننعم نتائج مُثمرة

نمى الفضايل وانشرا
الحوجة بالخير بشرا
اخطاءنا ربك بغفرا
جهِز مواعين الشِرا
بيع واشرى واحمى المشترى
وسُبُلْ التزاوج سهِلا
وطُرق التراحم مهلا
وطنك معافى من البلا
،،،،،،،،،،،،،،،،،،،،،،،
للنهضة طاقتك وفرا
وسفاسف القول اجهلا
الأُمة راجياك تحملا
فوق للثريا توصلا
تاهت وانتَ البوصلة
موصولة بيك رحم وصِلة
ارعاها اكفى المسألة
عايش هموما واسألا
وجاوبها كل الاسئلة
،،،،،،،،،،،،،،،،،،،،،،،،،،
أجلس تلاميذ الفصول
وخريج يحول
على حالو حول
آمالو بلفاها الذبول
وظِف ربيبات الحجول
العِفة بالحوجة بتزول!!
والعصمة ما فاتت رسول !!
،،،،،،،،،،،،،،،،،،،،،،
جهز مُعينات الفصول
خلى الخريف وكتين يدور
نرجاهو بى فرحة وسرور
شِدنا المجارى بنينا خور
و شبكة مياهنا الفيها قول
غيرها من جيد العصور

،،،،،،،،،،،،،،،،،،،،،،،،
نوِّرنا .. نورت العُقول
حسِن مُعينات الدخول
مَكنْ المصانع يوم يدور
خيراتنا ما بتستثنى زول
سودانا فيهو الخير مهول
النيل بفيض بسقى الحقول
ومطرنا ساقينا وهطول
،،،،،،،،،،،،،،،،،،،،،،،،،،
شيل الزراعة معاكَ همْ
واديها من فكرك سهم
شجرة هشابك قدرا
التمرة حسن صدرا
والترعة ارجع احفرا
ابنى المشاريع خضرا
وحواشة القطن نورا
،،،،،،،،،،،،،،،،،،،،،،
و جهِز بنوكك حضرا
خلى السياسات حاضرة
ما فيها منتج مُزدرى
،،،،،،،،،،،،،،،،،،،،،،،
وسِّع مواعين الفهم
الثروة نميها بفهم
تنهال وتنساب النِعم
نوع مصادرك ودا الاهم
،،،،،،،،،،،،،،،،،،،،،،،،،،
حسِّن للعمال الاجور
واضبط مواعيد الحضور
وامنع مواعين الفجور
ومظهر فتاتك ليهو دور
رغبها فى احسن ظهور
والصحة اس التنمية
خليها فى ذهنك حضور

بترولنا جد كان الاساس
طلع الدهب وجاى النحاس
وبحرنا ما خاتيهو ماس
ووضعنا للنهضة الاساس
،،،،،،،،،،،،،،،،،،،،،،،،،،
يالجيت عملت المستحيل
احلام بقت واقع جميل
الخطوة بتمشيكا ميل
والحمل مهما كان تقيل
ما بسوى حاجة من القبيل
وتمَّ السلام مرحب حليل
وللامن معدوم البديل
وللوحدة ما تاه الدليل
،،،،،،،،،،،،،،،،،،

صوتَ ليك
ومآلى بعد الله عليك
وانا صوتى قارى كتاب مناى
قُبال يجيك

بالأمس قالها سوار الذهب
وسبق بها الشيخ صيام في خطبة الجمعة الماضية
(الرجال دناقر ولا كبر عناقر)

- تحسين ظروف المعيشة لجميع الناس .
- التنمية الإجتماعية.
- حفظ الموارد المائية والبيئية.
- اتباع أنماط إنتاج واستهلاك متوازنة.
- عدم الإفراط في الاعتماد على الموارد الطبيعية.
- النمو الإقتصادي .
تلك هي بعض من محاور التنمية المستدامة للقضاء على الفقر.



1- المياه:
2- الغذاء:
3- الصحة:
4- التعليم :
5- المأوى والخدمات:
6- الدخل:
7- الفساد!!