Post: #1 Title: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-01-2010, 02:28 PM
إلى سيف الدولة كامل، اميرة الشيخ، هواري نمر، ومن خجّ خجهم...
المكان: عاصمة الوطن التائه... ردّ الله غربته... الزمان: نُصّت نِهآر... في غمرة طلة سريعة للبلد كنت اتجوّل في السوق المركزي... لفت إنتباهي... شكله يوحي بأنه غير مستقر في السودان، ليس بالقصير ولا الطويل. علآمات الزحف الصحراوي بدأت تظهر على راسه. خاتف لونين يميل قليلاً إلى الإصفرار من جرا راحات الغربة، يضع منديل حول لياقة القميص للعرق والجنصصة معاً، تظهر عليه علآمات التِضِهِب. يتلفت يمين وشمال مبحلقاً في الناس والرقشات والعربات والكاروهات والعجلات والزحيح والوحيح والهرج والمرج وأصوات الباعة المختلطة بِأصوات عوادم الركشات ودخاخينها والهايسات والماشات والجايات... الشكل ليس بالغريب!!! يبدو لى انني قابلته من قبل!!! إقتربت منه بدافع الفضول...
في هذه اللحظة اتى بتاع ورنيش، وراح يكش كِش قريباً منه مردداً : ورنيش، ورنيش، ورنيش... ورنِش يا... ردّ عليه بلكنة شايقية فُصحى : بتدور تورنشو في شِنو؟ شكآلك!!! نظر إليه بتاع الورنيش شذراً وإنصرف...
Post: #2 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: سلمى الشيخ سلامة Date: 05-01-2010, 02:31 PM Parent: #1
خاينين الاتنين
Post: #3 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-01-2010, 02:31 PM Parent: #1
إقتربت منه محيياً. ردّ التحيّة، ثمّ بادرته قائلاً: يا ابن العم، شكلك ده ما غريب علي!!! قال لِي: يبقى تكون مشبهني سآكت!!! قلت له: جايز... وجايز نكون إتقابلنا قبل كده... قال لِي: بتكون شايفني في المغرب. شكلك جاي من برّه... قلت له :انا قبل كده ما مشيت المغرب... قال لِي :قول لِي، إسمك منو؟ يبقى اعرفك... قلت له : معاوية المدير... قال لِي :عِلِي تكون الفي سودانيز، مانِي خابر لِي واحداً غيرو. عِلِي ما ظنيتك هو. البيجيبو هِنِي شِنو؟؟؟ قلت له :ايّوه، انا هو زاتو... إنت منو؟؟؟ قال لِي :هي يا مقطوع الطاري... واللهِ الليلِي ده يوماً بخيت وسعيد... انا طارق جبرين... طوالي رحتَ ما خدو بالحضن وسلمنا سلآم شديد جداً علي بعض، ثمّ توجهنا لأقرب كشك عشان نشرب حاجة باردة... فلت له : والله يا ود جبرين، مشتهي لي عصير جوآفة... قال لِي :انا براي مِشتهيلِي جوآفة...ادنا إتنين يا جنا... صاحب الكشك خلط لينا الجوآفة... راح شافط كبايتو بسرعة... قال لِي :بتدور تطبقلك وحِيدِي تانيِ ؟ قلت له : كتّر خيرك... كفاي... قال لبتاع الكشك : افرك لِي وحيدِي تآني... شفط الويحيدِي التانيِ... قال لِي :والله يا حليلك يا ود المدير... الحمد لله اللِتلآقينا في الدِنيِ الزايلِي دي... قلت له :البركة في حوش بكري الخلانا نعرف بعض... قال لِي :ايّ والله صدق... عِلِي ملآن لي خشمو مطاميس... قلت له : كيف الكلآم ده؟!!!؟ قال لِي :حسِي في ضُمتك، ود الصايم ده مو مِطيميس؟؟؟ قلت له :والله في دي صدق... كنت داير اقولك، اميرة بت الشيخ...عِلآ خُفت علي رقبتي... قال لِي :هي يا الحبيب، رقبتك ياتِي البتخاف عليها؟! وحآت نضري، ناس الليل لحدهن مطاميس، وبت الشيخ دي طمستا مخالفِي... قلت له : هسّع إنعام عبد الحفيظ دي، ما زولة هآدية ورآيقة... قال لِي :ايِ والله صدق في بت عبد الحفيض... عِلِي مرّة، مرّة كدي مطرطشِي... قلت له :غايتو بطريقتك دي، ما اظن واحد منهن يسلم!!! قال لِي : عاد مِي ياهِي النصيحِي... هسع عاين لهواري ده بيتنخج من متين؟؟؟ قلت له : هواري ده ما سيد الجلد والراس... قال لٍي :ايِّ وحات الرسول صدق...عايل لِي جاي الحدِسك، ناس هواري ديل كانو زمان يقعدو فوق شوالآت الفحم عند الدكان للصباح، محجرين البِنيِ البتجي تِشتريلا كروسة كبريت، وللا لبان الرخاء، اها يقعدو يبحلقو فيها ويقهو، وفوتتا كدي وحاتك النخجي يقع... قلت له : نآن فوق شوالآت الفحم ما بيقرصو...! قال لِي :هي وحاتك ديل الواحد فيهن العقرب دي تقرصو الليلِي ما يخبرا إلِي باكر، شِدّة ماهن قاعدين يبحلقو بالحيل ويقهو... قلت له :يا طارق، يا ريت لو صاحبك سيف الدولة كان معانا... قال لِي :سيف الدولة ياتو؟... المِدرّس!!! قلت له :إياهو المدرّس... قال لِي :ايِّ والله، امانِي ماهو زولاً عديل وطيّب... عِلِي عندو هوسة بتقوم عليهو كدي مرّة، مرّة... قلت له :كمان هوسة شنو؟؟؟ الزول ده انا طوالي بتكلم معاهو بالتلفون!!! قال لِي :مياها هوسة الناس البيشجعو الهِلآل... وحاتك كلهم مطرطشين، وإنت اولُن مسوي خِليقتتك دي... قلت له : عاد ده كلآم يا ود جبرين!!! حتى انا لحقتني؟؟؟!!! قال لِي :هي يا مقطوع الطاري، اوّل قايل نفسك اخير منهن شي؟؟؟ . . . . . يــــا ســــآتِــــــــر... اكل الفول الكتير قبل النوم بيجيب الكباس...
Post: #4 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: سيف اليزل برعي البدوي Date: 05-01-2010, 02:40 PM Parent: #3
ههههههههههههههههه مبالغة يا مدير
Post: #5 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-01-2010, 02:58 PM Parent: #4
Quote: خاينين الاتنين
والله مشتاقين يا بت الشيخ، ما تصبري تخلي الحكاية تنتهي، إنت صبراً يبل اللآبري ما عندك؟؟؟!!!
Post: #6 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاذ حسن Date: 05-01-2010, 03:19 PM Parent: #5
تلج في السودان ..مبالغة!!
أبشرك يا المدير ود جبرين السنة دي ان شاء الله الشافو في قندهار ما كضب بس جنس حر اليومين دي ما بقدر عليهو
Post: #7 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-01-2010, 09:55 PM Parent: #6
Quote: ههههههههههههههههه مبالغة يا مدير
ســـــــــــلآم،ود البرعي...
Post: #8 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-01-2010, 11:22 PM Parent: #7
شقي الحال كيفنك الله لا كسبك والله قايل نفسي مشيت ضُمة ضُمة وحاتك يا ود المدير بقيت اهضرب بالمشي للسودان اشتهيت اهلي يا الحبيب اشتهيت تميراتنا في شبا والبركل اشتهيت امشي لي قبر امي وادعيلا واحكيلا عن ولادي اشتهيت ابوي وكتين يقعدني جنبو ويقولي شعر الشوايقة اشتهيت اخواتي وونستن في بطن التُكل ود المدير مالك علي ياخي
Post: #9 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: عمر صديق Date: 05-01-2010, 11:33 PM Parent: #8
Quote: شقي الحال كيفنك الله لا كسبك والله قايل نفسي مشيت ضُمة ضُمة وحاتك يا ود المدير بقيت اهضرب بالمشي للسودان اشتهيت اهلي يا الحبيب اشتهيت تميراتنا في شبا والبركل اشتهيت امشي لي قبر امي وادعيلا واحكيلا عن ولادي اشتهيت ابوي وكتين يقعدني جنبو ويقولي شعر الشوايقة اشتهيت اخواتي وونستن في بطن التُكل ود المدير مالك علي ياخي
دكتور طارق
تحياتي
وانا كمان افتكرت انو معاوية المدير قابل ناصر اخوك وخلط بيناتكم
شكرا معاوية علي جمال الخيال والمقال
Post: #10 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: هاشم محمد الحسن عبدالله Date: 05-02-2010, 08:02 AM Parent: #9
شكرا جزيلا معاوية المدير ، على هذا الابداع والجمال، والله العظيم نفسى أقابل هذا المبدع الحبيب ود جبرين فالرجل يركبه الجمال والالق ، مودتى .
Post: #11 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-02-2010, 01:14 PM Parent: #10
Quote: تلج في السودان ..مبالغة!!
أبشرك يا المدير ود جبرين السنة دي ان شاء الله الشافو في قندهار ما كضب بس جنس حر اليومين دي ما بقدر عليهو
لكن يا معاذ قالوا عندكم فاسوخي مبااالغة. تبشرني بي شنو يا زول؟ انا داير المشية لرقبتي دي...
Post: #12 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: سيف الدولة كامل Date: 05-02-2010, 10:00 PM Parent: #11
يا سلالالالالالام يا معاوية ,,, المحبة في القلوب, كلنا مشتهين نقابل ود جبرين
انا ما شفته من سنة 1985 , أها ان شاء الله المرة الجاية تقابلوا بالجد.
Post: #13 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: هواري نمر Date: 05-02-2010, 10:56 PM Parent: #12
ود المدير...ود جبرين..استاذنا سيف..وبت الشيخ وكل المخجوجين..نــــــــــاس الليل البكاء..النخي والنقزي... المارين بي هنا...والبعيدين الزينا...في المهاجر.. من عند بهاء طوكيو...لي براري كندا... وفي وسط الخرطوم كرش الفيل.. من فاس الماوراها ناس...ولي الخليج وكل الناس... لي ناس بلاد العم سام.. واوروبا العجوز القديمة المعتقة... سلام...سلام..ســـــــــــــــــــــــــلام
جايييكم بي مهلة...ومحنة وشوق علا يا ود جبريل.. ناغمنا محمد عثمان...خليه اليدينا غنوة من بيت الكلاوي اصلو الليلة خلاص... ميتة وخراب ديار...
Post: #14 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-03-2010, 00:18 AM Parent: #13
Quote: جايييكم بي مهلة...ومحنة وشوق علا يا ود جبريل.. ناغمنا محمد عثمان...خليه اليدينا غنوة من بيت الكلاوي
يا ســــــــــلآم لو تكون اغنية: وكت السمحة في هيباتا تتجلى تراني حلفت بالله...
عليك الله يا ود جبرين حاولها. مع شوقنا الدافق لربابة ود كرم الله...
كلنا جايين...
Post: #15 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-03-2010, 05:22 AM Parent: #14
الله يسالنى قلبى شححححححح شح,,,
بجييييكم بمهلة,,,
Post: #16 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: حمور زيادة Date: 05-03-2010, 05:27 AM Parent: #15
النبي فوقك يا ود المدير ما حلمتبو جا مصر ؟
Post: #17 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-03-2010, 06:00 AM Parent: #16
اول ما قريت العنوان طوالي فكرت انو هسة بقدر اجازة ولي لا واحجز واسافر واحصل المولد دا
امشي لي قدام في القراية القاهو كان حلمة
بت الشبخ سلمي ما خاتية عليكم
Post: #18 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-03-2010, 06:46 AM Parent: #17
Quote: قال لِي :هي وحاتك ديل الواحد فيهن العقرب دي تقرصو الليلِي ما يخبرا إلِي باكر، شِدّة ماهن قاعدين يبحلقو بالحيل ويقهو...
Post: #19 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-03-2010, 11:39 AM Parent: #18
Quote: شقي الحال كيفنك الله لا كسبك والله قايل نفسي مشيت ضُمة ضُمة وحاتك يا ود المدير بقيت اهضرب بالمشي للسودان اشتهيت اهلي يا الحبيب اشتهيت تميراتنا في شبا والبركل اشتهيت امشي لي قبر امي وادعيلا واحكيلا عن ولادي اشتهيت ابوي وكتين يقعدني جنبو ويقولي شعر الشوايقة اشتهيت اخواتي وونستن في بطن التُكل ود المدير مالك علي ياخي
يا بركة من جعل محمد نبي، تمشي يا ود جبرين وانا الآقيك هناك، ونلآقي كلّ الناس العملوا مداخلآت هنا...
Post: #20 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-03-2010, 12:56 PM Parent: #19
Quote: دكتور طارق
تحياتي
وانا كمان افتكرت انو معاوية المدير قابل ناصر اخوك وخلط بيناتكم
شكرا معاوية علي جمال الخيال والمقال
شكراً لك اخي عمر صديق، أتمنى إني اقابلك تاني. سلآمي للأخ ناصر جبريل...
Post: #21 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-03-2010, 01:53 PM Parent: #20
عاد يا ود المدير الحبان ديل كلهم داير اقابلهم كيفن وحات ود الكرسني قلبي لامن فررررا
Post: #22 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-03-2010, 02:01 PM Parent: #21
Quote: عاد يا ود المدير الحبان ديل كلهم داير اقابلهم كيفن وحات ود الكرسني قلبي لامن فررررا
كدي شوفلنا غنوة، وكت السمحة في هيباتا تتجلى. الملاقاة دي على الله ماها بعيدة...
Post: #23 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-03-2010, 02:19 PM Parent: #22
Post: #24 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ياسر بيناوي Date: 05-03-2010, 05:08 PM Parent: #23
سلام
كل الحبان
خالص الود
Post: #30 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-04-2010, 07:45 AM Parent: #23
وتراني حلفت بي الله انكم ابداااع اسه في داعي لي قليب المواجع والشوق؟ هو شوق الجن بيتبل؟ تقبلوا مروري
Post: #25 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-03-2010, 08:00 PM Parent: #3
Quote: مِطيميس
Quote: مطرطشِي
حبوبتى الله يرحمها بتقعدنى مطموسة وبتقومنى مطموسة عاميتنا دى فيها مصطلحات عجيبة ..... مرات مابتلقى ليها اصل ولا معنى ..بس تحس بيها جوووووووووة فى عضمة قلبك احمدالله انى اتربيت وسط حبوبات وخالات وعمات شان كدى حاجة واحدة بتفوت على مافى ,,,,يعنى الطمسة على اصولها
ودالمدير البوستات الزى دى مفترض تقول ناس الشهادة العربية وناس الخرطوم (جناح الحنكشة) يمتنعون .....
Quote: كروسة كبريت، وللا لبان الرخاء،
عليكم النبى دا حال ناس مفترض يطلعو شبر من السودان لبرة؟ طولت طول ما سمعت كروسة كبريت دى ... لبان الرخاء دا الاحمر المدردم صغار داك؟
Post: #26 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-03-2010, 09:10 PM Parent: #25
طرينا مشوار العصارى.... البلوم فى فرعو غنا طرانا ياالحبان اهلنا.. المسافرين بالسلامة بلغو الحال لاهلنا .. بصوت نسرين هندى ...
الاهداء الى...معاوية المدير ....هوارى.... طارق جبريل .. سيف الكامل
ولكل الذين عبرو من هنا ولازال الحب هو هو رهانهم الاوحد ..
_________________________________________ اصبح الشوق هو النديم والخل الوفى ...
---------------------------- ممكن زول يعيد تنزيل الفيديو دى مباشر على الصبفحة
Post: #27 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 00:42 AM Parent: #26
Quote: شكرا جزيلا معاوية المدير ، على هذا الابداع والجمال، والله العظيم نفسى أقابل هذا المبدع الحبيب ود جبرين فالرجل يركبه الجمال والالق ، مودتى .
ســـــــــلآم يا هاشم، والله صدقت، ود جبرين ده زولاً مُو هيّن وكلنا نتمنى نلتقيه.
مشكور علي الإطراء والمرور. لك كامل الوُد...
Post: #28 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 07:27 AM Parent: #27
Quote: يا سلالالالالالام يا معاوية ,,, المحبة في القلوب, كلنا مشتهين نقابل ود جبرين
انا ما شفته من سنة 1985 , أها ان شاء الله المرة الجاية تقابلوا بالجد.
دعواتك يا السيف اخوي، إن شاء الله كلنا نتقابل، والفِي إيد المولى مِي بعيدة...
Post: #29 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 07:43 AM Parent: #28
Quote: الله يسالنى قلبى شححححححح شح,,,
بجييييكم بمهلة,,,
لِسّع ما بدينا يا بت الشيخ...
Post: #32 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 07:48 AM Parent: #29
Quote: النبي فوقك يا ود المدير ما حلمتبو جا مصر ؟
شيخ كُتاب المنير، حمور زيادة، والله مشتاقين. طال غيابك علينا با راجل، وود جبرين ده تب بنجيبو ليك في مصر، شرطاً إنّك تجينا اوّل في بلدنا الفي سقط لقط دي...
Post: #31 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: هواري نمر Date: 05-04-2010, 07:46 AM Parent: #28
شِبكة يا صديقة... انا مُش قُلته ليـــــــك.. حفلات الطمبور دي, ما تمشيها ..الا وتكلمي ود جبريل....لووووول شفته يا طارق..قريبتك كاتلة ليـــــها حفلة بتاعة طمبور...وما حدثتك...
____ يا ود جبريل...الله يعلم ناوي الجية ليكم وبس القدم ليه رافع
Post: #33 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-04-2010, 10:18 AM Parent: #31
يا ود نمر نان لي متين ننتظر فيك
ياخي نفسي ألِم في الحبان ديل كلهم في حوشا ماهل وكبابي الشاي تطاقش ونسكت ونطبق في الكبابي وناكل في الزلابيي
Post: #34 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-04-2010, 10:28 AM Parent: #33
Quote: ياخي نفسي ألِم في الحبان ديل كلهم في حوشا ماهل وكبابي الشاي تطاقش ونسكت ونطبق في الكبابي وناكل في الزلابيي
اجازة جماعية مع سبق الاصرار والترصد,, واول عزومة فى بيتنا.....انا حاجزة,,
قلتو شنو??شان انزل ليكم المنيو من اسى
Post: #35 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-04-2010, 10:33 AM Parent: #34
بت الشيخ يمين اسويها حددي الوقت من هسي حتى ان بقى رفدوني ياني الجاييكم
Post: #36 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: هواري نمر Date: 05-04-2010, 10:56 AM Parent: #35
Quote: اجازة جماعية مع سبق الاصرار والترصد,, واول عزومة فى بيتنا.....انا حاجزة,,
وانا معاكم.. شهر 12 . كيف معاكم الكريسماس وراس السنة.. انا غايتو جااااااااي... لو اوبامـــــا زاتو منعني ..مسافر مسافر.. اها يا الحبـــــــــان كيف معاكم الكلام ده..؟
Post: #37 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-04-2010, 11:02 AM Parent: #36
هوارى وودجبريل,,والله العظيم انا جادة,,,,
شهر 12 بس من بداتو,,
تااانى قلبى شححححح,,,
يلا خلونا نكون جادين,,,ممكن التوقيت بتاع الاجازات يكون متفاوت لكن ممكن نخليهو يكون قريب لبعض ,,,,
بقدر الامكان,,
Post: #38 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-04-2010, 11:05 AM Parent: #36
Quote: بت الشيخ يمين اسويها حددي الوقت من هسي حتى ان بقى رفدوني ياني الجاييكم
Quote: وانا معاكم.. شهر 12 . كيف معاكم الكريسماس وراس السنة.. انا غايتو جااااااااي... لو اوبامـــــا زاتو منعني ..مسافر مسافر.. اها يا الحبـــــــــان كيف معاكم الكلام ده..؟
Post: #39 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ندى عثمان حسن Date: 05-04-2010, 11:09 AM Parent: #38
ممكن اشارك؟
Post: #40 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-04-2010, 11:10 AM Parent: #39
ممكن يا ندى
يا جماعة عيد الفطر كيف
Post: #41 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-04-2010, 11:14 AM Parent: #40
Quote: يا جماعة عيد الفطر كيف
ياخ عيد الاضحى شان الشربوووووووت واللحم
Post: #43 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-04-2010, 11:21 AM Parent: #41
غايتو معاوية المدير وسيف الدولة لما يصحو بلقونا حجزنا,,,
او يطلع الموضوع كلو حلم فى حلم,,وتبقى دى عوجة
Post: #42 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: هواري نمر Date: 05-04-2010, 11:20 AM Parent: #40
Quote: ممكن يا ندى
يا ندي..حبايك عشرة مرحب بيــــــــــــــك في (ناس الليل) بس اعملي حسابك احنا بتاعين بكاء ونخجي وسكلبة وكلام تقيل...هههههههههه
Quote: يا جماعة عيد الفطر كيف
والله يا ود جبريل انا ما عندي طريقة الا اخر السنة,, الا لو الحبان اتفقو يتلاقو في عيد الفطر...يبقي ما في مشكلة يكون ماعندي في الطيب نصيب.. المهم اتشاورو وشوف الوقت المناسب لي اجازاتكم.. كيف.؟؟
Post: #44 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-04-2010, 11:33 AM Parent: #42
يا جماعة عبد الفطر غيره ما بيدوني اجازي دحين شوفولكم حل او اقوم اجي عن طريق قطر واميرة تشوف لي الفيزا والفندق والملاهط
Post: #45 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: الطيب شيقوق Date: 05-04-2010, 11:34 AM Parent: #42
ودالمدير المسنوح لميت المسانيح كلهم بجاى
بالمناسبة ليك اى علاقة بالفاتح المدير الطالب بجامعة بونا؟
مودتى
Post: #49 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ندى عثمان حسن Date: 05-04-2010, 11:41 AM Parent: #45
تسلم ياطارق
ياهوارى بشارك من مقاعد المتفرجين ساى, بكا مافى مروة نهائى.
ياأميرة , لا تقبلو دعواتنا لاتعزمونا, الله فى.
Post: #46 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-04-2010, 11:38 AM Parent: #31
هواري
Quote: شِبكة يا صديقة... انا مُش قُلته ليـــــــك.. حفلات الطمبور دي, ما تمشيها ..الا وتكلمي ود جبريل....لووووول شفته يا طارق..قريبتك كاتلة ليـــــها حفلة بتاعة طمبور...وما حدثتك...
حالتو انا موصياك
اتلومت معاي لكن الزول دا الطنبور بعمل ليهو وِردة ما تجيب ليهو السيرة
Post: #47 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-04-2010, 11:40 AM Parent: #46
Quote: الزول دا الطنبور بعمل ليهو وِردة ما تجيب ليهو السيرة
نان هي وِردَة نصاح
Post: #48 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-04-2010, 11:40 AM Parent: #46
ياجماعة
افقوا على عيد الضحية
عيد الفطر صعب وكمان شهر 12 صعب
قولوا خير
Post: #50 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 11:43 AM Parent: #46
Quote: اول ما قريت العنوان طوالي فكرت انو هسة بقدر اجازة ولي لا واحجز واسافر واحصل المولد دا
امشي لي قدام في القراية القاهو كان حلمة
بت الشبخ سلمي ما خاتية عليكم
بكل اسف يا شبكة مولدنا ده قبلو هنا، نحن ناس بنتمنى والله بدي الجنّة. اسمعي كلآم عمك هواري، وبت الشيخ سلمى دي هسع كان جات لقت ود كرم الله ده هنا بتنسى القالتو...
Post: #51 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-04-2010, 11:58 AM Parent: #50
معاوية
Quote: بكل اسف يا شبكة مولدنا ده قبلو هنا، نحن ناس بنتمنى والله بدي الجنّة. اسمعي كلآم عمك هواري، وبت الشيخ سلمى دي هسع كان جات لقت ود كرم الله ده هنا بتنسى القالتو...
رب مولد خير من لا شي
Post: #52 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 12:12 PM Parent: #50
وكت السمحة...
وكت السمحة في هيباتا تتجلى تراني حلفت بالله تشيل خطواتا في إيقاع وحلات إيدينا في التلة تودي صديرا قداما تخلي سبيبا يدلى تخلي الدارة فوق نيرانها تتقلى
طبيعي غزير لا باروكة لا سلّة كأنو حرير وكاسيهو السواد حُلّة كلو الشافا قال بعد العجب طلّ واصبح فوق سعير اشواقو يتملى...
تعال يا ود جبرين شوف السهلة، قشوها ورشوها وحضرو الرتاين وفرشو العناقريب وجهزو البنابر للحبوبات، وكفو الضيفان لحدهم، والبِنيات إتجيهن، وود كرم الله جاب ربابتو وجاء لِقى المكرفونات مربطة فوق النخل والناس بقو ناس لِعٍب تب... قال كدي نقر طمبورو. وحاتك مقدمة الأُغنية براها تقدح في القلوب الشوق... قالت كدي قامت على حيلها وكاد جمالها يقعدها، فشرابّت لها الأعناق وخفقت لها القلوب. إنّ للجمال رهبة وعظمة تقهر العتاة والطغاة. اقسم الشاعر بالله العظيم انّ السمحة عندما تقوم إستعداداً لدخول الدارة لها هيبة، وكلمة (وكت) تضفي حلآوة وطلآوة علي التعبير. تبدأ السمحة تتمايل مع نغمات الطمبور في إنسجام تام مابين نغماته ووقع اقدامها، مع فرد يديها للخلف وإبراز صدرها للأمام ورقبتها إلي أعلى مع إنخفاض الراس إلي أسفل السبب الذي يجعل ديسها ينبهل. وهو شعر طبيعي كما الحرير وحالك السواد كما الليل المدلهم. مع نغمات الطمبور وصوت ود كرم الله الجميل وجمال الرقص مع جمال هذه الفاتنة، كلّ هذا الزخم جعل الدارة تمور بالناس لينسجو إنسجام تآم مع هذا الإبداع الممزوج بالجمال. كل من راها أعجب بها إعجاب وصل حدود الدهشة، السبب الذي جعلهم يتسألون وهي ما زالت تملأ الدارة حيوية ونشاط أمامهم، هل ستعيد الكرّة مرّة أُخرى؟؟؟
قٍليبي وراها مشغول دِيّمة يا خِلآ أقولو خلآس نخليها. يقول لِي هي نآن بتتخلى؟ أقولو كفاك تبل الشوق هو شوق الجِن بيتبلآ ؟؟؟!
تعلق بها قلبي واصبحت تلازمني دوماً، فما الحل، يا خِلآني واصحابي؟ ها انا ذا استشيركم بعد ان إستشرت قلبي فيها، وإقترحت عليه تركها ونسيانها. فأجابني مُتسائِلاً،ومستنكراً هِي نان بِتتخلى؟، سؤال متضمن إجابة صريحة مفادها، لابتتخلى لاحاجة. فأجبتة، إن كان الأمر هكذا فما عليك إلا ان تكتفي بأن تبل الشوق. فأجابني، متسائِلاً مستنكراً مرّةً أُخرى، هو شوق الجِن بيتبلا؟ ايضاً سؤال مفاده، تصريح تام بانّ الشوق الذي تملكني سيجعلني دوماً متعطش ومتلهف لرؤية جمالها... هو نان بيتبلا؟؟؟.
تعال يا بدري عاين بدرك الهلّ إنت عقلك يبقى ثابت وما يكون ولى نورو جهرنا، نورك يا بدر طلّ؟ ماهماهو شوقي ان زاد او قلّ
ايها البدر الذي إكتمل في سماه، تعال وانظر إلى البدر الذي يُنسب إليك وقد إكتمل ، يتمايل ويتراقص على وجه الأرض. تعال إن لم تكن قد اصابتك لوثة من الجنون بسبب هذه الفاتنة الساحرة التي إمتلكت القلوب وسلبت العقول. إنّ نورها قد جهرنا حتى أعشى ابصارنا، فهل نورك ظهر في السماء؟ أخبرنا بربّك!!!. إنها تائهة في جمالها تمرح في نعيم شبابها وتختال في جنّة رونقها وبهائها، لا يهمها إن كان شوقي لها زاد او قلّ...
عشان عارف السميحين زيو في قِلّة كلما قلنا ينزل لينا هو يتعلى تسعد دارنا كان اداها يوم طلّة ينور بيتنا للجيران والحِلّة...
لأنها تعلم علم اليقين ان جمالها لا يضاهى وانّ اللآتي يتمتعن بمثل جمالها نذر قليل، فهي تتدلل علينا، وتعيش بمعزل عنا في ابراج جمالها العالية ورونق جنّة سحرها، بعيداً عن جحيم عذابنا. إن تجود بطلة علينا في دارنا، فإنّ دارنا تسعد سعادة حقيقية ليست مجازيّة، ويسعد كل من فيها، ويغمرها نور جمالها، ويغمر نور حسنها وجمالها المنبعث من داخل بيتنا كلّ بيوت الحِلّة...
Post: #53 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 01:38 PM Parent: #52
Quote: سلام
كل الحبان
خالص الود
بيناوي يا فردة، والله شوقنا بالجرانين. يا اخي جيب عارآتك، وتعال اربط حاحايتك هنا، بت الشيخ قالت ناس الشهادة العربية وحناكيش الخرتوم ما يجو. بسراعك تعال حاحيهم يا الخزين...
Post: #55 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-04-2010, 01:45 PM Parent: #53
ود المدير ان بقيت جبتلك: مسخت عوم البترطن في جروفها باقيلي بتجن ضُمة ضُمة
Post: #54 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: سيف الدولة كامل Date: 05-04-2010, 01:43 PM Parent: #52
عييييييييييييييك يا ود المدير الناس سافرت ونحن نايمين.
أميرة الشيخ وطارق جبرين وشبكة توقيتهم قريب من بعض لكن
يا هواري المصحيك لي الوقت داك شنو ما وراك شغل, ولا شغال
ليل وبتاوق من المكتب؟ والله انا معاكم في اي وقت عندي أجازة
لي 3 سنوات ما أجزت , ان شاء الله تتفقوا يا رب وننزل كلنا ان
شاء الله بتلاتة جواكر ما عندنا مانع. تحياتي لكم جميعا يا حلوين.
Post: #56 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-04-2010, 01:58 PM Parent: #54
Quote: والله انا معاكم في اي وقت عندي أجازة
لي 3 سنوات ما أجزت , ان شاء الله تتفقوا يا رب وننزل كلنا ان
سيف الهلالابى المغلوب من الاسماعيلى,, كدا المسالة دى قرررربت تظبط وكان ماظبطت حنظبطهاغصبا عنها,,
اتفقنا ياشباب,,,,,
تحياتى يااستاذ سيف,,
Post: #57 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-04-2010, 02:06 PM Parent: #56
Quote: اجازة جماعية مع سبق الاصرار والترصد,, واول عزومة فى بيتنا.....انا حاجزة,,
الفاتح بتاعي دا ما عارفه من وين لكن نجاضتو نجاضة ناس الباوقة وصلاي بصلي الوقت قبال يجي
عارف يا ود شيقوق، الناس بيقولو: اكان لاقاك الدابي والإنقريابي، أكُتل الإنقريابي وخلِي الدابي. عليك الله ما بهتونا؟ إنت تراك الإنقرياب خالتهن. بالحيل انا جنا إنقر الجن المصنقر. مأمون هواري بعرفو، عِلّ الباقيين شاخت الذاكرة وبعُدت الشُقة. برضو كحلآوي قريبي معاكم في عمان، سلّم لي عليهو...
Post: #65 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-05-2010, 04:56 PM Parent: #64
عليكم الله ود كرم الله ما بالغ في الغنية دي
Post: #66 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 01:16 AM Parent: #65
Quote: عليكم الله ود كرم الله ما بالغ في الغنية دي
بنتنا شبكة، ود كرم الله ده كان ما زول ختري، ما كان قدر في الفترة البدا فيها يظهر لانو عملآق الطمبور النعام كان في الساحة. كدي خسمي ود جبرين ده ينزّل لك غنوة، مسخت عوم البترطن في جروفا. البترطن في جروفا دي الوزينة. تخيلي البت دي بترقص والناس مشنكتين فوقا النفس غالِبا والمسيكين ده جا يدافر في الناس ويقول لهن: هوي يا ناس فِجولِي الشوّفا!!!!
مشنكتين: متلمين ومتزاحمين لامن مكومين فوق بعضُن...
Post: #67 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-06-2010, 05:40 AM Parent: #66
معاوية
Quote: ود كرم الله ده كان ما زول ختري، ما كان قدر في الفترة البدا فيها يظهر لانو عملآق الطمبور النعام كان في الساحة. كدي خسمي ود جبرين ده ينزّل لك غنوة، مسخت عوم البترطن في جروفا.
كدي انا بقوقل وبجيب الكلام لكن انت لو شرحتو زي ما عملت قبيل بتكون اوفيت وما قصرت
طارق النبي كان تجيب لينا مسخت عوم البترطن في جروفا.
من كلامكم انت ومعاوية هي بتجنن
جبوها خلونا النجن
Post: #68 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-06-2010, 05:43 AM Parent: #67
مسخت عوم البترطن في جروفه
اه يا خلايه فجولي اللشوفه
الصدير رجفاته سبب لي خوفه
خام ثمار ال الله قال دانيت قطوفا
الرقيبه قزازة الروم في وقوفا
جرعتني العلاقم بي صنوفه
بروقيها الداره لخبطي لي صفوفا
خلي حسادك عديل تخضع انوفا
ديسه شوف عيني من شكت كتوفا
الا دايما نافره يا ناس ما ولوفا
صممن جاراتا قال لي عطوفه
ملا شوفته لي تشهر لي سيوفا
العلي والبي كلو سبب عزوفا
لو تحلو رموز اصابع اليد حروفا
اه يا خلايا
غايتو في زول والله اعلم بكون لما وصل اه يا خلايا
جن ضُمة ضُُمة
Post: #69 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-06-2010, 07:13 AM Parent: #58
ود المدير كيفنك يابا وانشاء الله شديد دحين الغنية دي وسلك ود جباره بيخلن الزول يقعد الشي بس اشغل الغنية واقعد ازوزي برااي . والله نفسي في حفله بي سلك كارب اخد لي فيها نقزه نقزتين باقي طولنا من الطمبور.
Post: #70 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-06-2010, 07:46 AM Parent: #58
Post: #71 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-06-2010, 09:16 AM Parent: #70
يمين من ادخل الخرابة دة بقيت انقز واترتر وكمان ليلى ولعت النيران زيادة ورررررووووووووووك انا فِتِر ضُمة ضُمة
Post: #72 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-06-2010, 09:20 AM Parent: #71
الاغنية دي اتقالت في حفلة والزولة القالوا فيها القصيدة دي انا بعرفها ومحمد كرم الله لحن الاغنية بين الفواصل وغناها شوفتوا الجن دة كيفنهو
Post: #73 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: سيف الدولة كامل Date: 05-06-2010, 09:52 AM Parent: #72
اميرة الشيخ ,,,سلامات,,, خلاص اتفقنا لكن طارق جبريل ده الا نربطه في كراع العنقريب,, لانه اكيد بفز يخلينا باقي لي عنده بواقي دريبات بمشي يفتشه,,,
ان شاء الهلال يغلب يا بت الشيخ.
Post: #74 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-06-2010, 09:55 AM Parent: #73
حبيبنا استاذنا سيف كيفنك ياخي انا غايتو من هسي ماشي عيد رمضان آآآآبقدر اصبر اكتر من كدي
Post: #75 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: الطيب شيقوق Date: 05-06-2010, 10:05 AM Parent: #74
Quote: إنت تراك الإنقرياب خالتهن.
كيف وكمان اهلي يا ود المدير انا عبدلابي
ما شايفني شفقان دنيا وبدخل الوقت في الوقت ؟
Post: #76 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-06-2010, 10:43 AM Parent: #71
والله يا ود جبرين انا اخدت لي كم نقزة لمن ريقي نشف واتلفت لايبقي في زول متابعني
Post: #77 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-06-2010, 10:51 AM Parent: #76
وحات الله يا بت عثمان انا من قبيل انقز وسط المغاربة ديل
Post: #78 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 12:53 PM Parent: #77
الاهداء الى...معاوية المدير ....هوارى.... طارق جبريل .. سيف الكامل
ولكل الذين عبرو من هنا ولازال الحب هو هو رهانهم الاوحد ..
وعد مني، ونضر فوقي يا بت الشيخ الغنوة دي أفتح لها بوست كامل نسةً لأنها لاتتحمل تعليق عابر...
Post: #79 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 01:05 PM Parent: #78
Quote: من كلامكم انت ومعاوية هي بتجنن
جبوها خلونا النجن
اها يا شبكة، باقيلك ما بتخلي الزول هايم ساكت في شوارع الله ما عارف نفسو قبلتو وين؟؟؟
Post: #80 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-06-2010, 01:19 PM Parent: #78
Quote: انا غايتو من هسي ماشي عيد رمضان
اخرها شوووووية ,,,نحن كووولنا مابين شهر11و12 يعنى ات ليست ممكن تلاقى نفر نفرين منهم او كوووولهم لكن عيد رمضان دا صعب ومافى زول لافق معاهو,,,
بلييييز تراى
Post: #81 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 01:22 PM Parent: #80
Quote: اخرها شوووووية ,,,نحن كووولنا مابين شهر11و12 يعنى ات ليست ممكن تلاقى نفر نفرين منهم او كوووولهم لكن عيد رمضان دا صعب ومافى زول لافق معاهو,,,
بلييييز تراى
غايتو يا بت الشيخ، انا بعد منتصف شهر 12 دي كويسة معاي جداً كان الجنا اب رِويس ده وافق...
Post: #82 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 01:28 PM Parent: #81
Quote: كيف وكمان اهلي يا ود المدير انا عبدلابي
ما شايفني شفقان دنيا وبدخل الوقت في الوقت ؟
عليك الله يا ود شيقوق، شفت المسانيح ديل لمونا في بعض كيفن!!! يا سيف الدولة، العربي صاحبك طلع قريباً لي...
Post: #83 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 01:41 PM Parent: #82
Quote: حبوبتى الله يرحمها بتقعدنى مطموسة وبتقومنى مطموسة عاميتنا دى فيها مصطلحات عجيبة ..... مرات مابتلقى ليها اصل ولا معنى ..بس تحس بيها جوووووووووة فى عضمة قلبك
بنت الشيخ المطموسة، تصدقي قبل كم يوم كنت بفكر في عبارة (وكت الليل يفلل). وقفت كتير مع كلمة يفلل وعاميتنا السودانية!!! حاولت اعرف مصدر إشتقاقها من الفصحى ما لقيت كلمة قريبة ليها غير (في الليل)، لكن إستبعدتها وإقتنعت إنو الكلمة منجورة نجر والمرادف ليها في الفصحى ( عسعس الليل). بس الليل يفلل دي، ليها طعم خاص ومذاق حلو. كدي اسمعي: كان تعرف شنو البحصل لِي وكت الليل يفلل. يا جنون قوموا امشو الواطة ما تفلل عليكن. يا زول بيّت وكت اصلها الواطة فللت. اكان الليل فلل علينا بنبيّت فوق المُشرع. وحات الله طعم الكلآم ده ضقتو في خشمي...
Post: #84 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-06-2010, 01:57 PM Parent: #83
Quote: ود المدير كيفنك يابا وانشاء الله شديد دحين الغنية دي وسلك ود جباره بيخلن الزول يقعد الشي بس اشغل الغنية واقعد ازوزي برااي . والله نفسي في حفله بي سلك كارب اخد لي فيها نقزه نقزتين باقي طولنا من الطمبور.
والله يا بت عثمان عبيد، انا خايف الواحد فينا يوم في الغربة دي يلقوهو ممدد لا إيد لا كراع...
Post: #85 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-06-2010, 07:56 PM Parent: #78
Quote: وعد مني، ونضر فوقي يا بت الشيخ الغنوة دي أفتح لها بوست كامل نسةً لأنها لاتتحمل تعليق عابر...
كلام زى الورد .... لانها بتستاهل,,
وانا شريكتك فى البوست ..
وننزلها بكل الاصوات ....
يعنى كم زول غناها ..
والايام دى انا بنوم بيها وبصحى بيها
Post: #86 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-07-2010, 01:51 PM Parent: #85
Quote: يمين من ادخل الخرابة دة بقيت انقز واترتر وكمان ليلى ولعت النيران زيادة ورررررووووووووووك انا فِتِر ضُمة ضُمة
قلنا عيد الضحية. اركز لاتخرب لنا الرصة بترتيرك ده...
Post: #87 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-07-2010, 04:43 PM Parent: #86
يا احباب اها بقينا علي متين لا تجهجهوني المغاربة ما بيدوني اجازي بالساهل
Post: #88 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: Amira Elsheikh Date: 05-08-2010, 05:21 AM Parent: #87
Quote: يا احباب اها بقينا علي متين لا تجهجهوني المغاربة ما بيدوني اجازي بالساهل
يازول عيد رمضان الا تمشى براااااك
الخيارات المتاحة كالاتى ...
عيد الاضحى .... الكريسماس ,,راس السنة ,,,
ودا كلو ببدا من نهاية 11 لحدوووووووووووووووووت 1/1 راس السنة
بالعربى كدا ياشايقى يا لكلة* عيد رمضان دا ما بخارج ومبدئيا كدا ... هوارى ..معاوية,,,,,, سيف وشخصى الضعيف قافلين على الاوقات دى بس بعد داك ببقى اى زول حيصل متين دى مافرقت حيكون فرق ايام بس ... غايتو اتصرف ...
Post: #89 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-08-2010, 07:39 AM Parent: #88
نتفق على الضحية ياجماعة
طارق عليك الله اشتغل على كدا
وكلم المغاربة ديل قول ليهم عندي ناس مغروض فيهم ما بلقاهم الا في الوقت دا
Post: #90 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-09-2010, 08:04 AM Parent: #85
وتاني دي من النجار
Post: #91 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-09-2010, 10:22 AM Parent: #90
يا اخوانا المدير بتاعي ((لِكة)) عكلت عديييييييل كدة قال الا الصيف ولا رمضان هسي انا اقبل وين اقع البحر
Post: #92 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: SHIBKA Date: 05-09-2010, 10:34 AM Parent: #91
طارق
Quote: قال الا الصيف ولا رمضان هسي انا اقبل وين اقع البحر
لا سيف لا رمضان ما ياهو قاصد ليك الضحية
جات من عندك يا الله
Post: #93 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-09-2010, 10:55 AM Parent: #92
يا شبكة اقولك قال لي تمشي يا في الصيف يا في رمضان تقوليلي الضحية
Post: #94 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-09-2010, 01:18 PM Parent: #93
Quote: قال الا الصيف
يا ود جبرين، نقولك حتي الطيف، تقول مديرك قال إلا الصيف!!! المغاربة ديل مابيفهمو والا شنو؟؟؟ اكان رحل خلآك الواطة في خشمك...
Post: #95 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-10-2010, 07:09 AM Parent: #91
ود جبرين سلامات ياخي مديرك دا قوليهو السنة دي نحن صايمين مع الضحية وما دام هو ما بفهم اكيد بتمشي فيهو
Post: #96 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-10-2010, 09:58 AM Parent: #95
Quote: ود جبرين سلامات ياخي مديرك دا قوليهو السنة دي نحن صايمين مع الضحية وما دام هو ما بفهم اكيد بتمشي فيهو
كبليهو المكنة يا ود جبرين ما تلاوز، صدقني بتمشي فيهو بت عثمان عبيد دي نجيضة...
Post: #97 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: طارق جبريل Date: 05-10-2010, 10:15 AM Parent: #96
المكنة عندكم يا ليلى وود المدير
ياخي شوفوا طريقة في عيد الفطر شوفوا ليكم حل انا غلبني
Post: #98 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-11-2010, 09:52 AM Parent: #97
Quote: المكنة عندكم يا ليلى وود المدير
ياخي شوفوا طريقة في عيد الفطر شوفوا ليكم حل انا غلبني
إنت مالك، كدي جرّب نصيحة ليلى دي يمكن تصدق مين عارف؟؟؟
Post: #99 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: ليلي عثمان عبيد Date: 05-11-2010, 11:55 AM Parent: #97
ود جبرين قبل المكنه اول ما تدخل علي المدير انده بنات اللار امات فزعا حار وتور الاراك وود النقر وود عدلان بعدين كلمو الناس ديل واصلين وانا متاكدي اجازتك حيقولك حدد وقتها متي ما تحب لك ودي
Post: #100 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-13-2010, 02:20 PM Parent: #99
Quote: كدي انا بقوقل وبجيب الكلام لكن انت لو شرحتو زي ما عملت قبيل بتكون اوفيت وما قصرت
مسّخت عوم البترطن في جروفا...
رقيص الرقبة... هذا الضرب من الرقص في تراثنا له علآقة بعوم الوزين ورقص الحمام. قال الغناي: إنت كُلّك زينة، وعآية كالوزينة... وقال المرحوم حسن الدابي:
مسّخت عوم البترطن في جروفا يا خِلآيا فجو لِي اللشوفا...
لم يجد الشاعر مجال كي يمتع نفسه برؤية هذه الفاتنة البارعة في الرقص لشدة تجمهر الناس وإلتفافهم حولها. فالكل يريد ان يمتع نظره بهذا الجمال الذي يتوزع ويتنقل في جنبات الدارة، فناشد الناس قائلآً: فجولِي اللشوفا، هذه المسّخت علينا بجميل منظرها وبراعتها في الرقص، منظر الوزينة وهي عايمة بصدرها في مياه النيل... اشار إلى الوزينة بالبترطن في جروفا، حيث انه كلّ كلآم لانفهمه في عاميتنا نطلق عليه كلمة رُطانة...
Post: #101 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-13-2010, 02:22 PM Parent: #100
الصدير رجفاتو سبّب ليَ خوفة خآم ثمار ال الله قال دانيات قُطوفا الرِقيبة قزازة الروم في وقوفا جرعتني العلآقم بصنوفا
تمكن الشاعر من إيجاد فرقة تثنى له من خلالها رؤية هذه الفاتنة، فقال مُصرحاً في وصفه: إنّ إهتزاز صدرها مع إيقاع الدليب وصوت الطمبور كاد يخلع قلبي من مكانه وقد حمل صدرها نهدين كأنهُنّ ثمار من ثمار الجنّة، مشيراً إلي الجنّة بالدانيات قطوفا لِقوله تعالى:(قطوفها دآنية). اما عنقها فتكاد ترى من خلاله الدم يجري في عروقها لجمال لونها وصفائه وإعتدال عنقها كما زجاجة الروم. هذا الجمال والسحر والرقص المسكون بالإبداع مع البُعد وإستحالة الوصل جعلني اشعر بمرارة الألم لبعد الوصال...
Post: #102 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-13-2010, 02:23 PM Parent: #101
فيها طبع اللأُمو تعرف بالكُرُوفا نافرِي من الحركة، وادي الشين علوفا عبيرا كافن كافن المافيهو زوّفا انا داير اسكن جوارا، ولا لا ما بتنفعني طوفة
طبعها طبع الرِيم، فالغزالة تعرف جناها بتكرّف ريحته. ويتكرّف الشئ يشمه بشدّة، ونحن نتكرّف ابناءنا. الواحد يقول لولدوا، او بنتو الصغار، تعال اشمّك. والحبوبات يقولن، تعال لي الإتكرّفك. طافري من الحركة، اي تحب الأماكن الهادئة البعيدة من الضجيج، ورائحة جسدها كرائحة العطر المشهور في ذلك الزمان كآفِن كآفِن الأصلي الغير مزيّف. يقول، لاتنفعني طلّة سريعة منها ولاتُشبع رغبتي ولا تروي ظمائي، ولا ارضى بغير جوارها كما يجاور المريد في ارض الحجآز...
Post: #103 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-13-2010, 02:24 PM Parent: #102
من جِليدا عطورا، ليها مِرايا جوفا الجبين الباقي فد يوم من خسوفا ديسا شوف عينيى منو شكت كتوفا
جسمها تتضوع منه رائحة العطر العابقة فيه، ودواخلها نقية صافية مما ينعكس على ظاهرها. اما جبينها فكأنّه بدر التمام، وجعل القمر مؤنث وهذا جائز في عاميتنا حيث اننا نطلق علي القمر إسم القمرا... شعرها الغزير تنؤ بحمله اكتافها وتشهد علي ذلك عيناي اللتان شاهدتا هذا المنظر الخرافي...
Post: #104 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-13-2010, 02:25 PM Parent: #103
جاراتها وصويحباتها قالن ليّ بإصرار، من يعرفها عن كثب، إنها مع جمالها وإشراقها تتدفق حِنيّة وعطف، لكن الشئ الذي يحيرني إنها كلما تراني تسحب سيوفها من اغمادها وتصلطها علي شخصيّ!!! ارقصي وابدعي في الرقص، واجعلي الدارة تمور مورا وتتلخبط صفوفا ويختلط حابلها بنابلها حتى ينكسر حُسادك وعُزالك وتلتصق انوفها بالتراب...
Post: #105 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-13-2010, 02:26 PM Parent: #104
العلي والبيّ كلو سبب عُزوفا ولو تحلو رموز اصابع اليد حروفا...
كلّ الذي اصابني من لوعة وصبابة، وتباريح الحب التي عصفت بِجَلدي وصبري وفتكت بجسدي سببه عزوفها وصدها عني، وعدم تجاوبها مع عشقي لها وهيامي بها... إن كنتم من الذين يفكون الطلآسم ويحلو الرموز فإنّ عدد حروف إسمها بعدد اصابع اليد...
طبعاً ود جبرين عارف الإسمــ...
Post: #106 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-15-2010, 11:39 AM Parent: #105
Quote: وتاني دي من النجار
مبدع هذا النجار يا بت عبيد...
Post: #107 Title: Re: يا سيف الدولة كامل، واميرة الشيخ، وهواري نمر... لآقـيـت طـارق جـبـريـن فـي الـخرتـوم... Author: معاوية المدير Date: 05-19-2010, 10:56 AM Parent: #106
