Post: #1
Title: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 04-29-2010, 08:59 AM
إحدى قريباتى - وكانت تحب النكتة والمزاح – كانت تسير جنب الى جنب مع زوجها فى السوق وفجأة حاولت مسك يده وتأبطه فما كان منه إلا أن صاح ( منتزعاً يده ) : إنتى جنيتى ولا شنو ؟!!!
|
Post: #2
Title: Re: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 04-29-2010, 09:05 AM
Parent: #1
هذا وتجدر الإشارة الى أن ما دفع قريبتى لهذا الفعل (إضافة الى كونها تحب النكتة) إنها رأت مصرية تسير زهواً وهى تتأبط زوجها.
المكان : السوق
الوصف : مكان عام
|
Post: #3
Title: Re: االسوداني فى الأماكن العامة ...لماذا لا يتأبط زوجته !!!!
Author: عزام حسن فرح
Date: 04-29-2010, 09:12 AM
Parent: #2
السوداني فى الأماكن العامة ... لماذا لا يتأبط شرًا
|
Post: #4
Title: Re: االسوداني فى الأماكن العامة ...لماذا لا يتأبط زوجته !!!!
Author: عزام حسن فرح
Date: 04-29-2010, 09:19 AM
Parent: #3
مره أكُنا في الحديقة العامة ... فارشين والأولاد بِنطِطو تقول راكِبم جان ... بِت إبراهيم ناولتني صحن نقيمات أكانت رامياها مِن الدُغُش ... قُمت إتناولت لي واحدة وقربتها مِن خشما ... تسمعا بِتقول لي : إنت عوير ولا شنو ، باكُل براي ... فنظرُت إلى السماء ، فأدركت إن الله أخذني بِذنبٍ سابِق
|
Post: #5
Title: Re: االسوداني فى الأماكن العامة ...لماذا لا يتأبط زوجته !!!!
Author: جلال جبريل
Date: 04-29-2010, 09:19 AM
Parent: #2
وليد
دي حاجات مهما نظرنا فيها مابتزول
صحيح.. نقول المفروض نكون ونكون لكن هيهات ليييه؟
المجتمع السوداني مجتمع محافظ للحد البعيد
الشعب السوداني شعب جاد بطبعه ولايمكن للرجل أو المرأة
أنو يصدر أي ملمح من ملامح الحميمية بيناتن في إلى الشارع
والموضوع دا حايجرك بعيد شديد ونقتو تقيلة وبدون جدوى
ودي
|
Post: #6
Title: Re: االسوداني فى الأماكن العامة ...لماذا لا يتأبط زوجته !!!!
Author: أيمن الطيب
Date: 04-29-2010, 09:32 AM
Parent: #5
سلام يا وعزام/ وليد,,| Quote: مره أكُنا في الحديقة العامة ... فارشين والأولاد بِنطِطو تقول راكِبم جان ... بِت إبراهيم ناولتني صحن نقيمات أكانت رامياها مِن الدُغُش ... قُمت إتناولت لي واحدة وقربتها مِن خشما ... تسمعا بِتقول لي : إنت عوير ولا شنو ، باكُل براي ... فنظرُت إلى السماء ، فأدركت إن الله أخذني بِذنبٍ سابِق |
بت إبراهيم دى أهلها كان عارفينك بتوديها حديقة بجو يقلعوها منك ويشلخوك ويمشو,, أما بخصوص اللقيمات ف حا يخيروك فى الطريقة التى تفضل أن تأكلها بها!!!
تانى يا عزام ما تعمل كدا...
تحياتى,,
|
Post: #7
Title: Re: االسوداني فى الأماكن العامة ...لماذا لا يتأبط زوجته !!!!
Author: منال
Date: 04-29-2010, 09:37 AM
Parent: #5
| Quote: مره أكُنا في الحديقة العامة ... فارشين والأولاد بِنطِطو تقول راكِبم جان ... بِت إبراهيم ناولتني صحن نقيمات أكانت رامياها مِن الدُغُش ... قُمت إتناولت لي واحدة وقربتها مِن خشما ... تسمعا بِتقول لي : إنت عوير ولا شنو ، باكُل براي ... فنظرُت إلى السماء ، فأدركت إن الله أخذني بِذنبٍ سابِق |
|
Post: #10
Title: Re: االسوداني فى الأماكن العامة ...لماذا لا يتأبط زوجته !!!!
Author: ahmed haneen
Date: 04-29-2010, 09:50 AM
Parent: #7
يا شباب
يتابط دي كتيرة
لأنو معقد
والسودانية ظاتا ما بترضي التابط دي ..
والتوب ما بخليك تتأبط
يمكن تشنكلوا بيهو وتقعوا الإثنين
الـتابط دايرو ليهو
بنطلون جينز او بلوزة خطوة وفتحة من وراء
وايضا المرة ظاتا تكون كشخة ...
|
Post: #15
Title: Re: االسوداني فى الأماكن العامة ...لماذا لا يتأبط زوجته !!!!
Author: محمد عبد الماجد الصايم
Date: 05-01-2010, 08:19 AM
Parent: #10
Quote: الـتابط دايرو ليهو
بنطلون جينز او بلوزة خطوة وفتحة من وراء
وايضا المرة ظاتا تكون كشخة ... |
دي تأبط شرّا
|
Post: #8
Title: Re: االسوداني فى الأماكن العامة ...لماذا لا يتأبط زوجته !!!!
Author: FAKHER ELDEEN AHMED
Date: 04-29-2010, 09:41 AM
Parent: #1
لانه حينما يتزوجها تكون غزاله
وحين يمر الزمن تصبح وكاله (دكان خردوات)
فمن غير المنطق أن تتأبط غزالة
لتجي فيما بعد بعد متأبط وكاله
|
Post: #11
Title: Re: االسوداني فى الأماكن العامة ...لماذا لا يتأبط زوجته !!!!
Author: منال
Date: 04-29-2010, 09:56 AM
Parent: #9
| Quote: منا ل ازيك واحشانا بوستاتك |
تسلمى ياوجن مايوحشك غالى ...
|
Post: #12
Title: Re: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 05-01-2010, 07:02 AM
Parent: #1
منال ووجن
أمنع الحوارات الجانبية :)
كدى أدونا رأيكم فى قصة (التأبط دى؟)
|
Post: #13
Title: Re: االسوداني فى الأماكن العامة ...لماذا لا يتأبط زوجته !!!!
Author: Shawgi Sulaiman
Date: 05-01-2010, 07:37 AM
Parent: #12
سلام وإحترام
العلاقة الزوجية بين المرأة السودانية والرجل السوداني هي علاقة مشوهة 95% من نساء بلادي لا يصلحن زوجات 95% من رجال بلادي لا يصلحوا أزواج عشان كدة العلاقة الزوجية الطيبة إذا كملت سنة ما بتكون قصرت . مشروع الزواج السوداني ده مشروع فاشل فاشل ومؤلم.
|
Post: #14
Title: Re: االسوداني فى الأماكن العامة ...لماذا لا يتأبط زوجته !!!!
Author: شمس الدين ساتى
Date: 05-01-2010, 08:10 AM
Parent: #13
يا شوقى ليه تكون قاسى كدا زيك زى راغب إيه مش عارف
والله السودانية عندى أجمل من أى عربية كانت أو أوروبية
بس عندنا أعراف وتقاليد ماشين بيها . الحميمية دى ممكن
نعملها خارج السودان . لكن جوة لا
|
Post: #16
Title: Re: االسوداني فى الأماكن العامة ...لماذا لا يتأبط زوجته !!!!
Author: عزام حسن فرح
Date: 05-01-2010, 08:23 AM
Parent: #14
أيمن الطيب
| Quote: بت إبراهيم دى أهلها كان عارفينك بتوديها حديقة بجو يقلعوها منك ويشلخوك ويمشو,, أما بخصوص اللقيمات ف حا يخيروك فى الطريقة التى تفضل أن تأكلها بها!!! |
أكان < قلعو > مِنا بِتهُم ، ياهو < القلِعْ > وياهو سالِف الكواهلة مِن قديم ... وأكان < شلخوني > ردوني للأهلي المحس وطبعهُم ... عِلا حرم ما آكُل النِقيمات إلا بِخاطري وبِالفجه البدورا ، هو شنو الحِكاية < خرِت > وحقارا كمان
|
Post: #17
Title: Re: االسوداني فى الأماكن العامة ...لماذا لا يتأبط زوجته !!!!
Author: عبد الناصر الخطيب
Date: 05-01-2010, 08:33 AM
Parent: #14
| Quote: كدى أدونا رأيكم فى قصة (التأبط دى؟) |
نحنه كدة الله خلقنا كدة شعب غير متأبط
بعدين بتصور أنو الزوجين ديل عندهم بيت بتأبطوا في زي ما عوزين
فما في داعي للكلام ده في الشارع
حيث انا طبعا ما بلاحظه في الشارع لكين في السوق غالبا
لما تكون بتجيب في مقاضيك يوم الخميس , مرات بتلاقي أخوانا المصريين متأبطين
لو كانت معاى بت أبوبكر بشرح ليها الوضع أنو بتكون خائفة يطير منها عشان كده قابضة فيّ قوي
في النهاية المسألة ثقافات شعوب وعاداته
ممكن يسايرة البعض كنوع من التقليد
أو يمشي على حاجاتو وكلها مسأل تقديرة شخصي بحت
السوداني الوحيد القابلتو قبل كدة متأبط في مطار وبصراحة كان شكلو سخيف للغاية
---------------------
*ما عندي رأى سلبي في التأبط العوز يتعبط يتعبط بعافيتوا
|
Post: #30
Title: Re: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 05-02-2010, 07:13 AM
Parent: #17
عبد الناصر إزيك
Quote: في النهاية المسألة ثقافات شعوب وعاداته
ممكن يسايرة البعض كنوع من التقليد
أو يمشي على حاجاتو وكلها مسأل تقديرة شخصي بحت
السوداني الوحيد القابلتو قبل كدة متأبط في مطار وبصراحة كان شكلو سخيف للغاية |
حسب تصوري انه عندما يتعلق الامر "بالسوداني" يكون فى الغالب سلوك
|
Post: #18
Title: Re: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 05-01-2010, 09:02 AM
Parent: #1
شكراً لكل أدلى بدلوه هنا
فى الغالب التأبط ( لمن يتأبطون) يكون فى السوق لكن والشاهد بأن السوداني عندما يسير مع زوجته فى السوق تجد المسافة بينهم لا تقل عن 10 امتار فما فوق ، يعنى تلقاهو ماشى زهجان ومرتو هناااااااك شايله ليها كيس ، فمن الذوق - و إن كان يستسخف مسألة التأبط دى - ان يسير معها جنب الى جنب !!
|
Post: #19
Title: Re: االسوداني فى الأماكن العامة ...لماذا لا يتأبط زوجته !!!!
Author: محمد عبدالرحمن
Date: 05-01-2010, 09:17 AM
Parent: #18
وليد ابن طه ..تحياتى ..
يحكى لى احد معارفى ان اخيه كان مغترب بالجماهيريه فى الثمانينات..
ايام الغربة كانت غربة ..(غربة زمان ديك) ...لاتلفون ...لامسافر..لاجاى ..
اخوهم طلب منهم صورة لوالده ولوالدته ..حكى لى انه اخذوا فترة شهر
لاقناع الوالد بالسفر للمدينة القريبة مع زوجته لاخذ صورة مشتركة..
وافق الوالد بعد حجة (لاليها اول لا اخر) انو يمشى ويتصور ..بس
مابمشى معاها فى عربية واحده ..الزوجه مستهبله وبتاعت نكته (برضو) ..قاليك
عندما جلسوا للصورة اثر الزوجه على الاحتفاظ بمساحه كبيره بينه وبين زوجته
فى المقعد المحدد للتصوير ..وكلما حاولت الزوجة تقليص هذه المساحة يبتعد
الرجل قليلا ...وبهجمة سريعه ومباغته من الزوجه حاولت جعل المساحه غير موجوده
انتهت المباغته بان وجد الزوج ملقيا على الارض بقرب ا لمقعد ...
برضو تقول لى يتابطو ...اها الصورة الفوق دى من (ناس زمان) ..يعنى اسى
قصة الطلوع معا وقضاء الاوقات فى المطاعم خارج البيت نعمة ..والعافية
درجات ..التابط دا خليهو لى ناس الجيل القادم ..(ناس اضربنى بمسدسك)
كما يقول خليل ...وديل ابشركم...والله تشوفوا جنس تابط لما تحتاروا
ذاتو ...
|
Post: #20
Title: Re: االسوداني فى الأماكن العامة ...لماذا لا يتأبط زوجته !!!!
Author: نادر النور آدم
Date: 05-01-2010, 09:28 AM
Parent: #19
تحياتي لصاحب البوست والمتداخلون
الموضوع دا شخصي في النهاية
وبرجع لي ثقافة الزول الشخصية
أما أنا رأيي الشخصي بشوف إنو ضرورة
كدعم نفسي ومعنوي للكائن المرتبط بيهو يعني..
وتعبير عن الاهتمام، وعن إنك مبسوط بالزولة الماشة جنبك دي
وأمبارح القريبة دي شفت شاب سوداني "متأبط" يد زوجتو في مكان عام في أماااان الله
لكن اتخيل لي حتى لو انت عملت الحاجة دي عن اقتناع
ممكن نظرة المجتمع ليك حا تكون غريبة شوية
تحياتي
|
Post: #21
Title: Re: االسوداني فى الأماكن العامة ...لماذا لا يتأبط زوجته !!!!
Author: Hisham Ibrahim
Date: 05-01-2010, 10:20 AM
Parent: #20
السوداني واللبناني زوجاتهم راحن في السوق وهم بعرفو بعض
السوداني للبناني : إنت زوجتك لابسه شنو ؟؟
اللبناني : تنورة حمراء وجينز ( بودي ) وشعرها أشقر متدلي
اللبناني للسوداني : وإنت شو لابسه زوجتك ؟
السوداني : خليها زوجتي أرح نفتش زوجتك إنت !!!
هو التأبط دا ما عندو نظام ما هبتلي سااااااااكت كدا !!
ـــــــــــــــــــــــــــــــــــ
مره مطوع شاف لبنانية في قناة البي سي : قال ديل مالهم بصورو
البرنامج قبل ما الناس يلبسوا هدومهم !!
هشام
|
Post: #22
Title: Re: االسوداني فى الأماكن العامة ...لماذا لا يتأبط زوجته !!!!
Author: وليد عبد اللطيف
Date: 05-01-2010, 10:25 AM
Parent: #21
وليد طه
ياخي سلام وتاني سلام
|
Post: #26
Title: Re: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 05-01-2010, 11:54 AM
Parent: #22
ياااا وليد عبد اللطيف
ياخ إزيك
مراحب وتانى مراحب
|
Post: #24
Title: Re: االسوداني فى الأماكن العامة ...لماذا لا يتأبط زوجته !!!!
Author: walid taha
Date: 05-01-2010, 11:18 AM
Parent: #19
اووو محمد عبد الرحمن إزيك
| Quote: التابط دا خليهو لى ناس الجيل القادم . |
ده إلأ ندخل (التأبط) ضمن المناهج كقيمة إنسانية :)
أرقد عافية يا زول
|
Post: #23
Title: Re: االسوداني فى الأماكن العامة ...لماذا لا يتأبط زوجته !!!!
Author: محمد المختار الزيادى
Date: 05-01-2010, 10:41 AM
Parent: #1
| Quote: السوداني فى الأماكن العامة ...لماذا لا يتأبط زوجته !!!! |
كده خلينا لما نتأهل
نتأبط ونتشعبط شعبيط
|
Post: #25
Title: Re: االسوداني فى الأماكن العامة ...لماذا لا يتأبط زوجته !!!!
Author: ابو جهينة
Date: 05-01-2010, 11:24 AM
Parent: #23
وليد
مشتاقين ياخي
كل ما يخص الزوجة عاطفيا عند السوداني فمكانه أربعة جدران فقط
و أعتقد إنو أنا في الحتة دي أقف مع تصرفنا هذا و أتحيز له
هذه الزوجة معي ليل نهار ، فما معنى أن أمسك يدها و كأني أريد أن أثبت للمارة بأنها حلالي بلالي ؟
ممكن أمشي معها جنبا إلى جنبا ( و ليس أمامها بفارق كيلو متر و كأنها تطاردني )
أما البخل في البوح العاطفي فنحن فيه أساتذة ، فتجد الواحد يذوب حبا في زوجته و لكنه لا يدلق مشاعره ، ربما ليس بخلا ، و لكنه شيء مستقر في دواخلنا جراء موروث في الأسرة ، فأمهاتنا يجلسن أمام الآباء في صمت له قدسيته و إحترام شامل و كذلك الأب ، لم نسمعهما يوما يتحدثان بحديث به بهار الغزل أو الحب رغم أن تصرفاتهما تنم عن كم هائل من المودة و الحب.
دمتم
|
Post: #27
Title: Re: االسوداني فى الأماكن العامة ...لماذا لا يتأبط زوجته !!!!
Author: amir jabir
Date: 05-01-2010, 12:16 PM
Parent: #25
تحياتى للجميع
والله انا شايف الحركة بتاعت التابط دى ((دسيسه)) جدا بس الاجواء السودانية من تراب وغبار وسخانة ما بتساعد زائد الشمار ناس ((عيان عيان ديل ماشين كيف ))
وجدان وشعور الانسان ما عندو مكان محدد وتعبيرك عن الحب له صور منوعة ومختلفه تختلف الثقافات لكن الهدف واحد : عدم التعبير عن المشاعر بصورة صحيحة طبعا قد ينتج عنه مرض نفسى او اجتماعى
الكبت الحرامان اثبت الدراسات انو عند المتزوجين كمان كيف (( يعنى السودان-ين-نات )) مدمنين على المسلسات زى ((مهند ونور )) لية لانو بعوضوا عن النقاص عندهم مسلسات ساى
وامكن الابداع الحاصل فى بعض دول اروبا ناتج للاستقرار الاجتماعى العاطفى .. الخ
----
انا ما شايف انوا الموضوع اصلا محتاج الى نقاش قدر دة كل زول يعمل الشايفوا صح واى زول يبطل شمار
|
Post: #28
Title: Re: االسوداني فى الأماكن العامة ...لماذا لا يتأبط زوجته !!!!
Author: الامين موسى البشاري
Date: 05-01-2010, 12:38 PM
Parent: #27
الأخ وليد طه
ســــلامي وتحياتي...
ملاحظة جديرة بالاهتمام ...وللتربية الخاطئة دور كبير في ذلك بما نغرسه من مفاهيم مضللة لدى الرجل والمرأة على الســـواء
مفروض المرأة هي التي تتأبط ذراع زوجها .. وعلى الزوج ألا يمانع ...وما فيها حاجة طالما هي زوجته على سنة الله ورســـوله
وأعتقد الســــبب الأســــاسي كما قلت في التربية فالأب والأم يطلقون المحاذير دون استثناءات وهي النقطة المفقودة في هذا الأمر
فتترسخ في الاذهان أوامــــــر المنع بكلياتها .. بدون استثناءات
خليك من المواقع العامة فالمــرأة في البيت لو عايزة تغير ملابســـها بتقول ليك لو سمحت اتخارج بره عايز ألبس 
فكيف يكون الحال في الشـــــــارع أو في الأمـــاكن العامة .... مع العلم أنني لا أعفي الرجل أيضـــا من المســــــــؤولية
ودي
|
Post: #29
Title: Re: االسوداني فى الأماكن العامة ...لماذا لا يتأبط زوجته !!!!
Author: عبد الناصر الخطيب
Date: 05-01-2010, 01:56 PM
Parent: #28
المكرم / وليد طه
معليش قبيل كنت مستعجل اخت المداخلة وماشي المهم ليك التحية وكتير السلام
لما رجعته للبوس تلقيته بلا سلام فتقبل اعتذاري
Quote: شكراً لكل أدلى بدلوه هنا
فى الغالب التأبط ( لمن يتأبطون) يكون فى السوق لكن والشاهد بأن السوداني عندما يسير مع زوجته فى السوق تجد المسافة بينهم لا تقل عن 10 امتار فما فوق |
*ياخوي في السوق ده تلز ليها العربية ولا تراجع معاها لسته مشترواتكم .............ولا تتأبط
عشرة امتار دي عشان تسرع وتمش كل ماكان الحركة بطئية كل ما قعدت تتذكر في حاجات تضاف للقائمة
وفي الاخر ما حتقدر تقول ليها بغم ......يبقي أفضل حل تأكله جري ...
وبدون تأبط
*ملاحظة اخيرة ناسنا ديل زي شافع العرب لو شاف الزاد جعان ولو شاف الموية عطشان
أى تقليعة يشوفوها عند غيرهم يقولو ليه نحنه ما زيهم وينقوا في حاجاتهم ياخي ما زيهم لانوا عندهم ثقافة
مختلفة عنك زي ما عندك ثقافتك وخصوصيتك البتميزك عنهم , وما اى شي حتشوفو عند غيرك ينفع تعملوا
تحياتي
|
|