كيف (تقلع وتتوقف تماما) عن الإهتمام بالسياسة السودانية للأبد!!!!؟؟؟

بعد عشر سنوات إدمان استطعت بحمد الله التوقف نهائيا عن(تعاطي) الدخان,حدث هذا قبل عامين وبحمد الله عادت رئتي نقية كيوم ولدتني خالتي ,واستطعت مرة اخرى ان اتذوق الطعم الفعلي للماء والاكسجين والطعام وهي امور كل المدخنين يحرمون انفسهم منها ولكنهم لا يدرون.

وقبل عدة سنوات اتخذت أحد اشجع القرارات في حياتي حينما قررت التوقف عن تعاطي ملاح الخدره وملاح ام بقبقية والجبنة والكمونية والمراراة بالشطة الحمراء المندنكلة بالليمون والدكوة ,حدث ذلك بعد اصابتي بالمصران العصبي وقد نفذت ذلك القرار بلا هوادة..(ما هي الهوادة؟).

مؤخرا..
وبعد تفكير عميق اتخذت قرارا شجاعا وأنانيا وحاسما وعقلانيا بالاقلاع عن متابعة اخبار السياسية السودانية وعدم الاهتمام بحالها ومآلها الى الأبد وخليهم يعوسو زي ما عايزين... وأنا مال أهلي!! فلأهتم بشئوني الخاصة.

القرار صدر بعد ان لاحظت تدهورا كبيرا في الاداء العام لشخصي على كافة الصعد,اكتشفت ذلك اثناء جلسة تقييم الاداء السنوية لشخصي و التي انعقدت مؤخرا .

من ضمن اسباب القرار حالة حردان وزعل سياسي نتيجة القرف المتراكم والمستمر من ممارسات رموز السياسة السودانية وحالة تشاؤم حادة من مصير البلد ومآل الحال,
وما أوشك ان يصيبني بالضغط والسكري وداء البواسير وداء الفالج هو ان قطاعات كبيرة من الشعب (شمالا وجنوبا) مبسوطين للوضع الراهن ومتحمسين للمسيرة القاصدة ومتفائلين بالمستقبل الواعد للبلد!!

أطلب المساعدة في اقتراح الآليات المناسبة لتنفيذ القرار المذكور
وشكرا,,

Quote: أطلب المساعدة في اقتراح الآليات المناسبة لتنفيذ القرار المذكور

دى ابليس ما لاقيها !!

سياسيست: هو اسم جين وراثي موجود لدى كافة القبائل السودانية - وينتقل إليهم بالوراثة من جيل إلى جيل -

وقد فشلت جميع محاولات الاستئصال التي قام بها العلماء والأدباء والمفكرون ، لأن استئصال هذا الجين من أي إنسان سوداني - يؤدي إلى الوفاة

Quote: سياسيست: هو اسم جين وراثي موجود لدى كافة القبائل السودانية - وينتقل إليهم بالوراثة من جيل إلى جيل - وقد فشلت جميع محاولات الاستئصال التي قام بها العلماء والأدباء والمفكرون ، لأن استئصال هذا الجين من أي إنسان سوداني

سلام يا هندسة
جابت لها جينات واستئصال صعبتها زيادة!!
اليك بعض الآليات التي تساعد في التقليل من سطوة هذا (الجن) الوراثي.

- اول حاجة خلق اهتمامات موازية مثل متابعة المسلسلات المكسيكية وحاليا عندي مسلسل اسمو (ليتي) حا يستمر لحدي ما بعد الانفصال.
-الانهماك في قضايا سياسية بديلة ترضي غرور الجن الوراثي مثل قضية فلسطين والتي سوف تستمر لحدي ما الواحد يفلسع ويرتاح من السياسة .
- عدم دخول سودانيز اون لاين نهائيا ومقاطعة الجرايد وقنوات الاخبار وسلم الريموت كنترول للمدام.
- عليك بكرة القدم ففيهاإرواء وإلهاء لا حدود لهما.

Quote: [Quote: أطلب المساعدة في اقتراح الآليات المناسبة لتنفيذ القرار المذكور دى ابليس ما لاقيها !!

أي الإبليسين؟
ابليس البودي النار والا إبليسنابتاع حديث الغرباوية؟

تحياتي اخ يوسف

Quote: وأنا مال أهلي!!

كدا إنت ماشي كويس

شوية الحين وايش دا

وضمائر الام بانواعها

وتصل لتكون مثال للمواطن

السالب .






..............................حجر.

Quote: وما أوشك ان يصيبني بالضغط والسكري وداء البواسير وداء الفالج هو ان قطاعات كبيرة من الشعب (شمالا وجنوبا) مبسوطين للوضع الراهن ومتحمسين للمسيرة القاصدة ومتفائلين بالمستقبل الواعد للبلد!!

صديقي معاذ,

لا تعتزل يا معاذ فالمطلوب من كل هذه الممارسات أن يعتزل أمثالك عن الاهتمام بهموم الوطن



أحمد الشايقي

نحن السودانيين لا نستطيع الإقلاع عن السياسة أبداً
فهي تجري فينا مجرى الدم في العروق
ولا نستطيع أن نستهل أي عشرة ونسة كاربة
إلا عبر الدخول إلى دهاليز السياسة ومن ثم الخروج عبر منافذ الرياضة

Quote: نحن السودانيين لا نستطيع الإقلاع عن السياسة أبداً فهي تجري فينا مجرى الدم في العروق

يا ابو الجعافر
فرية خدعنا بها انفسنا زمنا طويلا

الشعب السوداني (اتكالي) جدا يخاف من المستقبل ولديه رغبة غريزية في وجود (اصنام) يرمي همومه
وأحماله عليهاويرتاح ,
حين لم يكن يجمعنا ما يجمعنا الان
وجد اجدادنا (اصنامهم) بطرق مختلفة
بعضهم وجدها في مشايخ الصوفية فعاشو في حماهم قرونا
وبعضهم في ملوك الممالك السودانية المختلفة التي عمرت طويلا
وبعضهم وجد اصنامه في العمد والسلاطين وزعماء القبائل فتعنصرت الخلق وتشلخت
التراث الحافل بالغناء وتمجيدالزعماء والمشايخ وجميع الاصنام الراحلة يفضح المكونات (الاتكالية)
للشخصية السودانية.

الناس ما عايزة تمارس سياسة
عايزين من يشعرهم ولو كذبا -كما يفعل البشير -بان الامور سوف تكون بخير والاشياء معدن والامور تحت السيطرة ولديهم استعداد كبير لتصديق اكبر الكذابين طالما انه يعزف النغمة المحببة.

هي ..نسيت دا ما كلام سياسة!!

فتك بعافية يا زول انا من النهار دا مش بتاع سياسة!!

Quote: فالمطلوب من كل هذه الممارسات أن يعتزل أمثالك عن الاهتمام بهموم الوطن

الصديق احمد الشايقي
لا تناقش ولا تجادل
وانما اهلك الذين قبلكم كثرة مسائلهم واختلافهم على أنبيائهم
العمل السياسي السوداني هو جهل نشط جدا,,
وتبديد للموارد والطاقة البشرية والوقت (على غير سنع).على قول السعوديين برضووكيتا في حجر,,

Quote: وتصل لتكون مثال للمواطن السالب

سلام يا حجر
هل سمعت عن الايجابية السالبة!!ومقابلها السلبية الايجابية؟
ازعم ان مجمل النشاط السياسي السوداني هو عمل يحسبه اصحابه ايجابيا الا انه
يصب مباشرة في خانة السالب,,
أنظر للمسيرة من 56 والمنتهية في 2011
ليت الانجليز عينوا أحد السيدين ملكا وتركونا زي جماعة (الحين وايش هذا )
الذين نعيش أنا وانت من خيراتهم,,

Quote: لا تعتزل يا معاذ

يا زول اعتزل وانزوي في اضيق كورنر
وخت راسك فوق ركبتيك وهيم في عوالم من صنعك الخاص
ما تسمع كلام أحمد الشايقي ده
فامثالك وامثاله من الشرفاء غير مرغوب في وجودهم اساسا
فاصحاب هذا الزمان لا زي ولا زيك ولا زي الشايقي


قلت لي المسلسل المكسيكي يستمر حتما بعد الانفصال؟
رابط القناة لو سمحت !

Quote: بعد تفكير عميق اتخذت قرارا شجاعا وأنانيا وحاسما وعقلانيا بالاقلاع عن متابعة اخبار السياسية السودانية وعدم الاهتمام بحالها ومآلها الى الأبد وخليهم يعوسو زي ما عايزين... وأنا مال أهلي!! فلأهتم بشئوني الخاصة.

عليك الله لما يدوك وصفة الريجيم ده، نزلها لينا هنا، لاننا خلااااااااااااص، وصلنا الحد

جك 2 كلم واشرب ليك بيضتين (جنى جداد)

كيف (تقلع وتتوقف تماما) عن الإهتمام بالسياسة السودانية للأبد!!!!؟؟؟


الجواب بكل بساطة ان تصبح غير سوداني

ياخ السودانيين ديل لو مافي سياسة بموتوا عديل كدة

Quote: يا زول اعتزل وانزوي في اضيق كورنر

يعني نتقوقع يا ابو حريره
القوقعة ما بناباها والله
بس كيف؟!