... وبقيت الطيش علي المدرسة في إمتحان الشهادة! (قصّة حقيقيّة)

بمناسبة إعلان نتائج إمتحانات الأساس

ألف ألف مبروك لكل الناجحين

:)

اليوم إعلان نتيجة إمتحانات الشهادة المتوسطة!

الناس كلها في إنتظار المؤتمر الصحفي لوزير التربية والتعليم بعد نشرة الساعة الثالثة كالمعتاد

ما متذكّر كيف قضيت صباح اليوم مع الترقب والإنتظار

لكن متذكّر إنّي ما لبست هدوم المدرسة إستعداداً للذهاب إليها إلا بعد ما أتي والدي رحمة الله عليه مبكّراً علي غير العادة من مكتبه

لبست أحسن ما عندي من ملابس المدرسة

ومشينا أنا وهو لوحدنا للمدرسة

مدرستنا كانت نموذجيّة بحق وحقيقة ... قبل ما تنتشر حكاية المدارس النموذجيّة دي

المدرسة كانت إحدي المدارس التي كان يتدرب فيها المدرسين وطلاب كليّة التربية بجامعة الخرطوم

لكن طاقم الاساتذة الأساسي الكان فيها كان علي أعلي مستوي من الكفاءة

وما كانوا بيقيّدوا حريتنا في التفكير .. بل أحياناً كان أستاذ الزين مثلاً بيقبل مننا طرق لإثبات نظريات حساب المثلثات غير الموجودة في الكتاب!

ومع إنّو المدرسة كانت حكوميّة، لكن كان أغلب ما فيها مكتمل؛ وتقريباً كنّا بنطبّق كل تجارب العلوم في معمل المدرسة

الحصص المدرسيّة كانت بتشتمل علي الرياضة - وده طبعاً شئ طبيعي في كل المدارس

لكن كانت برضو عندنا حصص موسيقي ومسرح وفنون وتربية ريفيّة - نظري وعملي!

ولسّة متذكّر يوم جات الأستاذة تماضر شيخ الدين عشان تدرسنا حصّة مسرح

:)

كنّا الدفعة التالتة في المدرسة

الدفعة الأولي لمّا إمتحنت الشهادة المتوسّطة، المدرسة كانت الأولي علي ولاية الخرطوم بنسبة نجاح ٩٨٪ تقريباً

والدفعة التانية سارت علي درب الأولي - برضو المدرسة كانت الأولي بنسبة نجاح ١٠٠٪!

دفعتنا كان طرحها واضح من البداية:

كنّا بنقول للأساتذة حنطلّع المدرسة الطيش!

وصلنا - أنا ووالدي - المدرسة

كان بعض الزملاء موجودين في إنتظار النتيجة. وكان بعض أولياء الأمور موجودين برضو

تشاغلت بالحديث مع زملائي وكلنا قلق علي النتيجة وترقب ليها

خاصة مع الشائعات الكانت بتقول إنّو في طلاب من مدرستنا في العشرة الأوائل!

وفجأة، وصل الأساتذة من الكنترول ومعهم النتائج!!!!

ودخلوا مكتب أستاذ حمودة مدير المدرسة وقفلوه عليهم!

وبقينا علي أعصابنا!

كان في حوار دار بين الأساتذة ووالدي رحمة الله عليه؛ عرفت عنه لاحقاً

بعدين لقيتهم أخدوني علي جنب كده وقالوا لي إنّو في خطأ في نتيجتي، وإنّهم لمّا استلموا النتيجة من الكنترول فتّشوا إسمي في بداية القائمة وفي النهاية لقوه في آخرها!!

برضو عرفت إنهم إعترضوا في الكنترول ولكن إدارة الكنترول طلبت منهم الحضور في اليوم التالي للمراجعة

وما كانوا عايزين يعلنوا نتيجة المدرسة للطلاب لغاية ما تتصحّح نتيجتي، لكن والدي ومعه أحد أولياء الأمور أقنعوهم إنّو باقي الطلاب ما عندهم ذنب

وقتها كنت متماسك ومتفائل إنّو إن شاء الله كلها يوم وأعرف نتيجتي الحقيقيّة

ومشيت قعدت في العربيّة برّه المدرسة في إنتظار إتفاق والدي مع الأساتذة علي ترتيبات اللقاء في صباح اليوم التالي عشان نمشي الكنترول

كانت لحظات عصيبة عليّ وكل شويّة يجيني واحد من الزملاء فرحان بنتيجتو ويسألني عن نتيجتي

عرفت إنّو المدرسة كانت الأولي علي الولاية بنسبة نجاح ١٠٠٪ وبأعلي نسبة تحصيل - كانت ٢٠٨ درجات من ٢٥٠ علي ما أذكر

لأ وبل كان أوّل الولاية وثالثها وسادسها من المدرسة برضو!

وأنا طيش المدرسة بمجموع ١٣٧ درجة بس!!!!

وأنا في إنتظار والدي رحمة الله عليه، فوجئت بوالدتي وواحدة من خالاتي بينزلوا من تاكسي!

لاحقاً عرفت إنّو والد أحد أصدقائي من أقربائنا كان مع الأساتذة في الكنترول وعرف بالخطأ في نتيجتي. وإنّو مشي البيت عشان يمنعني أجي المدرسة لغاية ما النتيجة تتصحّح، لكن كنا أنا ووالدي وقتها مشينا المدرسة

كانت والدتي بتبكي وهي بتحاول تشجعني وتقول لي إنهم واثقين إنّو دي ما نتيجتي

منظر بكاها وكلماتها الكان قصدها التشجيع قضوا علي البقية الباقية من قوّة تحمّلي

وفعلاً صعبت عليّ نفسي وصعبت عليّ خيبة أمل والديّ - حتّي لو ما كان عندي ذنب في الحاصل

وبكيت لبكاء والدتي

ونواصل في المرّة القادمة إن شاء الله كيف قضيت مساء وليلة اليوم العصيب ده

وشنو الحصل تاني يوم في الكنترول

وهل كانت النتيجة خطأ فعلاً؟ وشنو الخطأ فيها بالضبط!

:)

منتظرين
باقى
الحكاية

Quote: منتظرين باقى الحكاية

خالد

في الانتظار

اها الحصل شنو ؟؟؟؟

سلام يا سلمي، عاطف، شبكة وشادية

مشكورين علي المرور والإهتمام

نواصل القصّة ونشوف آخرتها :)

رجعنا البيت

إتغديت؟ ما إتغديت؟ ما متذكّر!

لكن المتذكّرو إنّو العصر والدي كان ماشي لبيت حبوبتي - رحمة الله عليهما - كعادته كل يوم

وطلبت منه إنّي أمشي معاه

ما كنت قادر ولا عايز أقابل زول من أصحابي وزملائي لغاية ما نعرف آخر حكاية نتيجتي دي

وفعلاً لمّا رجعنا بالليل للبيت عرفت إنّو بعض أصدقائي حضروا للسؤال عنّي

وبدأت واحدة من أطول الليالي في عمري ...

كانت ليلة صعبة ..

مرّة أنوم شويّة، ومرّة أصحي

ومرّات أفكّر

وأتقلّب علي سريري من جانب للتاني

ما عارف مرّت كيف الليلة دي

لكن أكيد إنّي كنت صاحي من وقت الصبح!

وببراءة شديدة، جمعت ملف فيه كل نتائجي في الإمتحانات الشهريّة في المدرسة. وأضفت عليه نتائجي في مدرستي الإبتدائيّة وفي إمتحان الشهادة الإبتدائيّة!!

وكأن النتائج دي ممكن تقنع ناس الكنترول إنو في خطأ في نتيجتي!

أذكر إنو والدتي سألتني - وكأنها عايزة تهيئني لكل الإحتمالات - عن الحأعملو لو قالوا إنّو فعلاً دي نتيجتي

قلت ليها:

حأسيب القراية!

:(

ومشينا المدرسة عشان نقابل الأساتذة ونمشي مع بعض للكنترول

لقيناهم ما قدروا ينتظروا ومشوا هناك من بدري!

في الكنترول دخل والدي وفضلنا أنا ووالدتي في العربيّة

يااااه ... الإنتظار ده ممل بشكل! :-s

وما في شئ ممكن أعمله غير التفكير واستعادة الذكريات ..

ذكريات كتيرة عشتها في المدرسة دي ..

رحلات علميّة لأماكن منها محطة الاقمار الصناعية - أبوحراز ..

ورحلات ترفيهية للكلية الحربيّة وغيرها!

دفعتنا كانت أكبر دفعة في المدرسة

وده السبب الخلي الإدارة تقسمنا فصلين في سنة تالتة: "أ" و "ب"

رامي، الطلع أول الشهادة، كان أول تالتة "ب"؛ وأنا كنت أول تالتة "أ" ... وطيش المدرسة حتّي إشعار آخر!

المنافسة كانت شديدة بين الفصلين. خاصة وإنو كانت عندنا إمتحانات شهريّة

يعني الواحد لازم يكون مستعد علي طول!

بالجد كانت مدرسة مميزة شديد

وكانت المنافسة علي أشدها بيننا وبين مدرسة بنات بنفس إسم مدرستنا - رغم بعد المدرستين عن بعض من ناحية الموقع

أذكر إنو في سنة تالتة رابطة طلاب ودنوباوي بالجامعات والمعاهد العليا نظّمت مسابقات المدارس علي غرار البرنامج التلفزيوني الشهير بمشاركة عدد من المدارس المتوسطة بأمدرمان

تغلبنا علي مدرستين قبل الوصول للنهائي

وواجهنا فيه مدرسة البنات إياها!

كانت ليلة عجيبة!

بصراحة لغاية الآن ما عارف فزنا عليهم كيف، لأنو تنظيمهم كان أحسن مننا بكتير!

وفجأة إنتهت لحظات الإنتظار!

لقينا والدي جاي علينا ومعه الأساتذة وناس من إدارة الكنترول

ألف مبروك! معليش كان في خطأ في نتيجتك نقصت بسببه ١٠٠ درجة!!!!

نعم؟!

كيف يعني؟

الأستاذ الرصد درجاتك كتب المجموع صاح بقلم الرصاص، لكن الظاهر إنّو لمّا مسحو عشان يكتبو بالحبر إنشغل ولا حاجة وكتبو ١٣٧ بدل ٢٣٧ درجة!



مباااااالغة!

لكن ٢٣٧ دي معناها إنّي ... إنّي ... إنّي التاني علي الولاية بفارق درجة واحدة من الأوّل!!

الحمد لله

كابوس وأخيراً إنزاح عننا!

:)

بعدها طالب والدي ومعه الأساتذة إدارة الكنترول بإعادة حقّي الأدبي وحق المدرسة في إعلان نتيجتي الصحيحة

لأنو بسبب الخطأ ده ما تمت إذاعة إسمي مع العشرة الأوائل ولا إتنشر معاهم في الجرائد

وفعلاً بعد كم يوم لقينا خبر صغير كده في الجريدة بعنوان "الثاني سقط سهواً"!

وسمعنا من واحدة قريبتنا إنو الخبر إتذاع برضو

لغاية الآن محتفظ بقصاصة الجريدة كذكري لتجربة صعبة عشتها :)


لكن برضو بقول الحمد لله إنّو لمّا ناس الكنترول غلطوا غلطهم كان في ١٠٠ درجة بحالها، ما ٥ ولا ١٠ درجات!

الطريف في الموضوع إني لاحقاً سمعت إنّو كانت في إشاعة منتشرة إنّو التاني إسمو سقط ولمّا عرف أغمي عليه وإتجرّس وكده

باقي إنّي أذكر إسم مدرستنا المتميزة: التدريب المتوسّطة بنين


وإنّي أذكر اسماء أعضاء هيئة التدريس علي أيامنا

الناس العلمونا كتير وفضلهم علينا لا ينسي ..

منهم علي سبيل المثال:


أستاذ الجعلي - أوّل مدير للمدرسة

أستاذ حمودة (رحمة الله عليه) - مديرنا

أستاذ زين العابدين (الزين) - رياضيّات

أستاذ صدّيق - لغة عربيّة

أستاذ عبد المجيد المهدي - علوم

أستاذ معتصم عبدالرحيم - تربية إسلاميّة

أستاذ إبراهيم - لغة إنجليزيّة

أستاذة إخلاص (رحمة الله عليها) - جغرافيا

أستاذة نجاة - تاريخ

أستاذ الخزين - لغة عربيّة

أستاذ مامون - موسيقي

أستاذة تماضر شيخ الدين - مسرح

أستاذ خضر - تربية ريفيّة



ربنا يقدّرنا علي رد جزء من العملتوهو معانا

:)

الأخ خالد عثمان جعفر
سلام .....

كانت تجربة عصيبة بالنسبة ليك وحسب كلامك انك اجتزتها بنجاح ...
ألف مبروك ......ولكن بوستك دا أكد لي يما في طلاب كتير اتظلموا بسبب
عدم المراجعة الدقيقة لناس الكونترول وضياع حقوق طلاب كثيرة ...
ألف مبروك لارجاع حقوقك كاملة ....

كلما يتم ذكر مدرسة التدريب أتذكر أستاذ الأجيال الأستاذ القدير /
بشير عثمان صالح جبريل وعلى يديه تخرجت أجيال ومن ضمنهم شقيقي الأكبر الذي
كان الأول على مستوى مديرية الخرطوم آنذاك ....وعند دخوله للأهلية الوسطى
أحرز كأس مسابقات المدارس وكانت آخر منافسة تم تسجيلها في التلفزيون القومي
وحينها استلم أخي كأس الفوز للمدرسة في ذلك الزمن الجميل ....

التحية للمعلمين الأجلاء ...

تحياتي لكم وللمتداخلين وزوار البوست الأكارم

سلام يا رضا،

الله يبارك فيك! الحمد لله ربنا صبّرني لغاية ما الموضوع إتصلّح. بالعكس، في البداية كنت ماخد الحكاية بروح رياضيّة، ولمّا كنت مستني والدي في العربيّة خارج المدرسة وكانوا أصحابي وزملائي بيسألوا عن نتيجتي كنت بأقول ليهم طلعت الطيش

ما شاء الله علي أخوك الكبير! لكن متأكّد إنّو المدرسة القصدتها هي التدريب المتوسّطة؟ علي حد علمي المرّة الوحيدة الكان أوّل الولاية من التدريب حصلت في دفعتنا.

بعدين برنامج مسابقات المدارس التلفزيوني مش كان للمدارس الثانويّة بس؟

الأخ خالد
سلام مرة أخرى

أنا بتكلم عن زمن سابق لزمانكم الحالي ...وقصدي هو مدرسة المشاة الأولية
ولقد خلطت بينها وبين مدرسة التدريب ....وكان مقرها في مكان السلاح الطبي
الحالي وكان مديرها هو أستاذ الأجيال كما ذكرت سابقا بشير ابراهيم ...
وعند انتقال أخي للوسطى آنذاك كانت هنالك منافسات بين المدارس الوسطى
تتم في المدارس حتى التصفيات النهائية وبعد ذلك يتبقى فريقان يتم الفصل
بينهم لتحديد المدرسة الفائزة في المركز الأول ويتم تسجيلها في استوديوهات
التلفزيون .....
أما المسابقات للمدارس الثانوية بدأت في ثمانينات القرن الماضي وكانت تحت
اشراف الأستاذ / عوض أحمد ...

تحياتي