دحشة حميدان ... أبداً ما دحشة نصاح ...

كنا في صباح النهيق الأول علي مشارفِ قبرٍ من ( الكتكوتة)
في وقتٍ بدأنا نرفسُ فيه بحوافرِ أسئلة الطفولة الشقية
التي أعيانت قوة لجامها
ولم نكن نعلم ونحن نحاول إمتطاء سروجها بأننا نحيا في دنيا

عايرة و أدوها سوط !!

في هذا الصباح الشتوي العاري من سروال الدفء ، هذا الصباح
الذي دقّ أوتاد زمهريره في وجوهنا البائسة
فاخذت تأكل من حشائش نضارتها حتي أصبحت في خشونةِ وقسوةِ نبات ( الحلفا)

في هذا الصباح الذي لم تلجمَ شمسه حلكة ما أشتهينا سطوعه
كانت حمي ( الكتكوتة )تخاشن في صدورنا بغلظةٍ و تتركنا نكحّ ونسعلُ
ونحن نخرجُ روث أنوفنا المتشققة من كثرةِ المخاط
فيما أجتهدوا أهالينا ساعيين لتجنيبنا هذا الخطر الداهم
وبذلوا في ذلك ما أستطاعوا من الأعشابِ و البنسلين و حليب الحمير ..!



يتبع

ومع ذلك ما زالت صدورنا تنهقُ حتي تدمعُ عيوننا من شدةِ السعال

في هذا الصباح الذي تجحّشت ملامحه لكثرةِ ما تردّد فيهِ من نهيقٍ متبادل
أنجبت إتانٌ كانت مملوكةٌ لوالد صديقي ( حميدان) جحشةً رفستها من رحمها
في هذا الصباح البائس
ولسؤ حظ الجحشة المسكينة أنها ولدت في هذه الفترة التي تفشّي فيها وباء الكتكوتة
أحد أمراض الطفولة الست التي تربطُ أوتادها في صدورِ الصغار
الذين وجدوا انفسهم أخوةً لها بالرضاعة!

فنشأت هذه الجحشة المسكينة منغولية معولقة بائسة!


يتبع

وأنا أذكرُ فيما أذكر و أنا أحاول أن أجر عربة كارو أفكاري
أن الفضل الأكبر في عدم نفوقها يرجع إلي ( حميدان) نفسه
فقد كان يقتطع من كورة الحليب التي تسقيها له والدتهُ وهي تقول :

( هاك يا جَنَي أشرب النِقيطة دي ..) !

في زمنٍ كانت فيه نِقيطة الحليب كورة كاملة الدسم
في بلدٍ لم تسمع فيه بسيد اللبن ولا كل تقنيات البسترة !

فقد كان (حميدان) يسقيها الحليب بنفس البزازة التي تشربُ منها أخته الرضيعة
فنشأت بينهمافيما بعد مودةٌ ورحمة
حتي أنها عندما كبرت أصبح لها صوتاً ذكورياً منقطع النهيق !

يتبع

الله اجازيك
ياولد انت بتجيب الكلام دا من وين؟؟؟؟؟؟؟؟؟؟؟؟؟

Quote: الله اجازيك ياولد انت بتجيب الكلام دا من وين؟؟؟؟؟؟؟؟؟؟؟؟؟

ماما ناجية

هو إنتي أديتيني فرقة أنضُم؟
ما جيتي تووووش قطعتي وتِد أفكاري!!


تسلمي والله ربنا يخليكي يا رب

وبعد زوال الوباء
عاشت دحشة حميدان حياة كريمة هانئة
و أصبحت أشهر من نخلةٍ في حوضِ برسيم !!
ليس هذا فحسب!
بل رفعت من مكانةِ صاحبها الإجتماعية و كان كثيراً ما تسمع أحدهم يقول للآخر :

( تعال لي جمب بيت ناس دحشة حميدان ...)

ومن المصادفات القدرية يقال أنهُ في نفس العام الذي ولدت فيه هذه الجحشة المباركة
فتحت السماء أبواب رزقها علي أسرة حميدان
وصاروا بين رفسةِ جحشٍ ونهيقهِ من عليةِ القوم الذين يركبون في سرجٍ واحدٍ مع
بلة شيخ الحلة و سيد الطاحونة !


فكان لها ذات الحظ المنغولي الغريب!

يتبع

كانت جحشة بنتِ محظوظة لا تعدم ملوة العيش التي تحرك بها أضراسها طيلة النهار
ولا يخلو هذا الشئ القماشي الذي كان يوضع فيه العلوق
( لا أتذكر أسمه)
كان لا يخلو من الامباز أبداً
وكان حميدان يمتطيها وهو يتفرّج علي مباريات ( التيوة )
وهي ما زالت أنثي صغيرة بنتِ بنوت ولا تقدر علي الوطء
فحين تري الصغار الجهال وهو يراقبونا في غيظٍ ستعرف انهم يحسدونها
علي حزمة البرسيم التي لم تظفر بها معيزهم
فتعتقد أنهم ربما سيبنوا عليها بنياناً أو يتخذوا زريبتها مزاراً
يتبرّكون من روثهِ المقدس


يتبع

و كبرت الجحشة المحظوظة وبلغت الرسالة !
وكانت مطية حميدان المحببة وهو سادِر و متدلّي وهو يحمل علي ظهرها
حزمة برسيم أو عِدلة عيش ريف
كانت جحشة هدية و رضية لا تهرب ولا تعِير من صاحبها أبداً
ولكن إذا فكر أحداً غيره في إمتطاءها
فقد كانت في هذه الحالة من صاحباتِ العيار الثقيل !!
كانت ترفسهُ لترميه من ظهرها كمتسابق روليت مبتدئ
ولا تتوقف بعد ذلك إلا في زريبتها
تنفق الوقت في قزقزة ما تبقي من عليقتها التي عجزت صغار الماعز من الوصول إليها



يتبع

....

كان هذا آخر عهدي بها

وبعدها فرّقت بيننا الأيام و نوائب الدهر و المنافي
و بعد مضي ما يقارب العشرة سنوات

قابلت أحد أصدقاء الطفولة البائسة صدفةً
في أحد المواني

وقبل أن أسألهُ عن الأهل و البلد و النيل

سألتهُ عن دحشة حميدان!

فأجابني وهو يغالبُ دمعه!

لقد ماتت تحت عجلات لوري مثقل بالبرسيم عندما كانت في طريقها
إلي زريبتها هاربة من أحد الصبية الأشقياء الذي كان يحاولُ تطييعها

وشعرت بالكثيرِ من الأسف و أنا أستمع إلي هذه النهاية المأساوية

ومما لا شك فيه !

أن حميدان سيكون قد شعر بحالةٍ من اليتم و القهرِ و البؤس!

منقطع النهيق !!

.
.

يتبع

جلال جبرين

طالما الموضوع فيه يتبع

نرجاك تكمل و نرد عليك

Quote: ولا يخلو هذا الشئ القماشي الذي كان يوضع فيه العلوق ( لا أتذكر أسمه)

(مُخلاية) ..

أفكارك كما هي تابرة الوصف يا حبيبه.

يا حليله الدحيشه اللا (نطّاقه) ولا (هنّاقه)..

أو كما قال :

كما القمرية بين أغصانه

أشرف من موائد ناس.



يا جنا مشتاقين

Quote: مُخلاية) .. أفكارك كما هي تابرة الوصف يا حبيبه. يا حليله الدحيشه اللا (نطّاقه) ولا (هنّاقه)..

أبو حوة

عارف انا قلت إلا يجي واحد مثقف
علي اليمين قبل ما أعمل سيند ضربت لي واحد من عندينا سألتوا
طلعت أنا أخير منو

أنا كويس يا جنا

Quote: جلال جبرين طالما الموضوع فيه يتبع نرجاك تكمل و نرد عليك

ياحبيبنا مافيها حاجة واصل ونحن نواصل المشكلة شنو

....

شكلي دخلت لِفت ياحبيبنا؟ ماعاش البيزعلك

....

جينا نساعد ونساهم ما جينا نحتلاهو ياحبيب

Quote: ياحبيبنا مافيها حاجة واصل ونحن نواصل المشكلة شنو .... شكلي دخلت لِفت ياحبيبنا؟ ماعاش البيزعلك .... جينا نساعد ونساهم ما جينا نحتلاهو ياحبيب

لا بالعكس يا ود جبرين
أنا أفتكرتك عند باقي جكي
قلت أخليك تتموا وبعدين أرد عليك

جيت لقيتك مسحت السبورة

أنا خلاص الدحيشاية و ماتت تاني ما عندي يتبع!

Quote: أنا خلاص الدحيشاية و ماتت تاني ما عندي

الواثق أخوي
اللخو إنت صورتك دي سكاي بي !

علي اليمين أصلها ما صورة نصاح!

Quote: الواثق أخوي اللخو إنت صورتك دي سكاي بي ! علي اليمين أصلها ما صورة نصاح!

حبيب نورة يازول يا عسل
والله عندي ليك سماحة قصص مع الدحوش والدحيشات ديل بس كان حكيتم ليك بوستك ده بلحق حبوبتي


الصورة ماخودة فعلا بي كمرة كمبيوتر

Quote: حبيب نورة يازول يا عسل والله عندي ليك سماحة قصص مع الدحوش والدحيشات ديل بس كان حكيتم ليك بوستك ده بلحق حبوبتي

الكونت
يازول إنشاء الله يعدم طفاي النار

أحكي ساهي وربنا يديك العافية

* ما ينوم *

يا لطيييف منك يا لطيييف


سهر الجداد ولا نومو

حالة صعبة يا قريبي

.

Quote: ولا يخلو هذا الشئ القماشي الذي كان يوضع فيه العلوق

و الله يا حبيب وكت بقرا في كلامك البتور النفس دا وقت وصلت الحتة الفوق دي قلت بس قبلك يا حافظ لقيت ليك حاجة تتفلهم بيها علي الحبيب دا الا القدر كان حدية ... يجي ود ابوحوة من فوق و يرمي الاجابة قبالي لكن برضو مخلاية

تسلم يا حبيب علي النضم المنضموم

حافظ يا حفييييظ
يا راجل والله صابحك أبو حوة دة مسلّط
بس مشكلتوا بلدي بالرشوشة شوية كدة
يعني هسة في داعي يجيب لينا المخلاية في البوست
البركة الما بِقت خرتاية

كان حردتوا ليهُ

مشكور يا حبيبو

أبو مهند
ياخي تسلم
مع إنك شغال معانا بي سياسة غيب وتعال
تلقانا نحن يانا نحن
لكن برضو حضورك سمح

شكرن كتيرن!

Quote: تعال لي جمب بيت ناس دحشة حميدان ...

و جيب معاك المعلوم


حبيب نورة
إزيكـ ياخ

عكاشة يا حبيبي
جراداي ما يجيبك
تجيبك دحيشاي!

وبرضو كتر خيرك يا جميل

تسلم تسلم تسلم

Quote: في زمنٍ كانت فيه نِقيطة الحليب كورة كاملة الدسم في بلدٍ لم تسمع فيه بسيد اللبن ولا كل تقنيات البسترة !

والترابلة ناس أخوالي وولادم من (المتره) ولي صحن العشاء
ربع شوال قمح وارد الساقي ومطحون في طاحونة الحلة " محل لمة الحمير " ، صحن يخت الرحمن في القلب ، وإيدين مغسلة من موية ( المتره ) من زمااااااااان
وهاكـ يا لهطي وضحكـ ( والجِد ) عين الرضاء مالية وشو والعافيو مالية وليداتو وولادم .
ونحن الباقي لي حسي قاعدين نتمو موية
وحكي
وذكريات
وديمقراطية وارد قوش
وطووووووووز لي حد المتر الواقف بلا مويي ليهو سنين

كلام حنيييين يا عمران
حنين ومستّف بي مخللايات الزمن السمح
دغدغت خوطري
ورجعتني لي سكنة أركان منسية من جخانين ذاكرتي الخربة

لي أيام كنا بنطرب فيها لي جوقة المَتَرات
و إيقاعا المنتظم


تسلم والله يا عمران

و شوكران علي المداخلة السمحة

بعد غياب دام لمدة 5 سنوات وفي نهارات و(قهابين ) تلفح الوش ....
اتجهت صوب الحلة .. نعم كما تركتها بنفس التفاصيل اللهم الا ما اقتصته الردمية من الشارع القديم
جنينة شرف الفرن مساكن (الكبقة والتاما) المدرسة اشجار المسكيت وبقايا من نبات السنمكة مصفرة ويابسة
ثم المقابر وشجرة اللالوب تقف شامخة تردد الفاتحة من خلفي بداية بالفكي عبدالله حتي اخر من توفي تبينت قبر ابي بعد جهد وقفت قبالة القبر جثيت علي ركبتي إنتحبت بعدها شعرت بارتياح شديد لمحني محمود الجعلي هاشا باشا يتمص حزن وملح ادمعي بعناق حار. احتفظت ذاكرتي بنهيق يشق صمت الحلة منذ زمن بعيد لحمير مميزات حمار ود علي بائع الفواكه وحمار الزين الجزار وحمار ابو شليخ وحمار منصور صاحب الطاحونة
حمير في ذاكرة الحلة.

الزين ود الدخيري صاحب حمار (شاب) ينضح فحولة ونشاطا يتناول الفتريتا ثلاث مرات يوما(لعله اكتشاف مبكر لآكتساب للفحولة) لهذا الحمار الغريب وكثيرا ما تشاغب امنة بت منصور النور ود الزين بان (الحمار ده احسن تعرسو ليهو ولا تتطهرو) ولبت منصور لسان ذرب في ذكر محاسن الفحولة تصيب نساء الحلة بالخجل والاستمتاع خسلة بتعليقاتها بينما يستمتع بتعليقاتها من دون حرج مضوي سيد الدكان و ود الهجيمة والجهيني ويوسف (المرد)وكثيرا مايجرجرونها نحو ذلك كلما اكتظ دكان مضوي بالفتيات فتبدا بت منصور بحمار الزين ساعتها تنفض الفتيات بين علامات الخجل والضحك المكتوم. ومنهم من تنسي اغراضها فيلاحقها مضوى بعبارات بت منصور وما نسيت من اغراض.

عمر الحاج صديقي الجميل
عارف أنا تاوقت كم مرة علي المداخلة دي
وما لقيت نضم أقولوا ليك

وصراحة كدة قاعد تمتّعني شديد

Quote: اتجهت صوب الحلة .. نعم كما تركتها بنفس التفاصيل اللهم الا ما اقتصته الردمية من الشارع القديم

خليتني أضهب في زقاقات الكلام
وحِفيت وأنا بتحاوم كدّاري في محطاتو

عليك النبي دي ما متعة؟؟

Quote: الزين ود الدخيري صاحب حمار (شاب) ينضح فحولة ونشاطا يتناول الفتريتا ثلاث مرات يوما(لعله اكتشاف مبكر لآكتساب للفحولة) لهذا الحمار الغريب وكثيرا ما تشاغب امنة بت منصور النور ود الزين بان (الحمار ده احسن تعرسو ليهو ولا تتطهرو) ولبت منصور لسان ذرب في ذكر محاسن الفحولة تصيب نساء الحلة بالخجل والاستمتاع خسلة بتعليقاتها بينما يستمتع بتعليقاتها من دون حرج مضوي سيد الدكان و ود الهجيمة والجهيني ويوسف (المرد)وكثيرا مايجرجرونها نحو ذلك كلما اكتظ دكان مضوي بالفتيات فتبدا بت منصور بحمار الزين ساعتها تنفض الفتيات بين علامات الخجل والضحك المكتوم. ومنهم من تنسي اغراضها فيلاحقها مضوى بعبارات بت منصور وما نسيت من اغراض.

بس عارفك دسّيت مني باقي الحكي

بتعملا إنت!!

سرت بشارع الجامع قاصدا بيت عمتي (طويلة) هكذا نناديها بينما جدي ابو نائب يتبرم من وذلك ويناديها بام الحسن وللعمة طويلة برلمان نسائي يبدا جلساته بتدوال القهوه وإحتساء فناجين (القطعية) يتخلله المشاط ثم يعرجن على اخبار متفرقة من كرامات شيخ محمد وكتابات فكي علي ، ويوميات لقيط الطماطم والبامية بجنينة ابراهيم امام وتتكون عضوية البرلمان من بخيتة مرة البشير ازرق وغداية وعلبة مرة محمد طاحونة وملح القعدة حاجة بعشوم بتعليقاتها الفكهه وهي تصف عيون دار السلام بت طويلة بانها تكثر من الكحل وعيونها(متل عيون بقرة الوسيلة) ولبعشوم اياد لاتعرف الراحة فهي بين فرك المترار و وريق (الخدرة) او مداعبة ايادي الغوغاية وهي تمضغ القطن في صمت ، لم يمهلني علي ودقسم الله كثيرا بتنحنحه في ميكرفون الجامع وسعاله المسموع لكل الناس فلايطيب له السعال والنحنحه الا امام ميكرفون الجامع حين ينادي للصلاة وكثيرا ما ينتقده محمد احمد طه شيخ الحله ويتهمه البعض بانه يدس مفتاح الجامع ويحتكر اجر نظافة المسجد والاذان معا. واطرف القصص لكحة علي ود قسم الله عندما وصفه الشيخ ادريس (علي ود قسم الله دا والله التقول في حلقو عش طير) يكح الليل والنهار.

نهيق حمار منصور علامه مميزة ونغمة ترشد السائرين بالقرب من زقاق بيت ام رزق بان تسرع في مشيتك فالزقاق ضيق ومعوج يبداء بحيطة الطين ثم الطوب الاحمر في اعوجاج منتظم لينتهي بالزريبة تفوح منه رائحة روث البقر مثل معبد هندوسي ، لفريق الشرفة (هكذا نمسيه فغالبية ساكنية من اصحاب البشرة الصفراء ويسمون انفسهم بالاشراف) دروب وزقاقات مثل المتاهه كنا نتحاشي السير فيها خوفا من شقاوة (علاء الدين ود الضيف) فهو صاحب نبلة لاتخطئ هدفها ثم كلبة (عبضول) التي تتلصص في السير خلفك ثم تنبح فجاءة باثة الرعب والهلع، وبقرة (الضيف) التي تستقبلك بقرونها ويقال بانها نطحت (طه ود امندي فعورت عينه) او هكذا يشاع عنها...

يااااااااااااه يا عمر
قاعد تنضُم عقد الحكي بحبوباتية عميقة وأنا
بقراك بجيني إحساس زول بشرع في فض بكارة ( سحارة) منسية في غرفة منسية
و صراحة كدة
حقّوا بعد دة نقوم نوثّق
ح يجي زمن الحكاوي دي بتبقي مقبرة فرعونية مطمورة

و عايز أحكي ليك شوية عن حمار طه السكرجي

خليني أنجمّ فكرياً

عشان أقدر أناضمك


ما تمش بعيد

هسي الـ ما نصيح إنت والدحشة!
الله يرحما ياخ!

ود الصايم
ياخوي دي دحشة المفروض تدخل التاريخ من أوسع زريبة
إنت قايلا هينة؟؟

طه ود امندي ب(حوصته) الشهيره وبريمة وعائد اصدقاء لحمارودعلي وكثيرا ما يقتادونه الي البياره حيث النجيلة وماء الصهريج تشكل مرتعا لحمير الحلةوبمجرد وصوله الى هناك يبداء في التهيج وملاحقة اناث الحمير وسط التصفيقات والهتاف وطه معجب ايما اعجاب بفحولة حمار ود علي وسيما ان الرجل جده من ناحية الام
ولود علي ثلاث بنات (ام سر والنخيل ورقية) ورفيقة عمره( بت احمودي) واوضة طين ذات جدران سميكة من كثرة (اللياس) وراكوبة يتقاصر عنها زبائن ودعلي فهو يبيع الموز والمنقة فقط دون سائر فواكه الدنيا يضع بضاعته في تلك الاوضة المظلمة والمغروسة (متل ضرس العقل) وعندما تبدا بنفاذ صلاحيتها يرمي بها لحماره يتلذذ بها لا يشاركه في ذلك الا (بشير ود النعير) بين صيحات ودعلي ونهيق حماره يفر بشير بما نهب من ثروة متجها صوب (الكنار) او السكة حديد يتلذذ بطعم الحموضة للمنقا النافقة ولزوجة الموز نافذ الصلاحية وبشير ذو سيقان ملتوية وراس (مطبطب) وشعر (منكنش) وبشره تميل الي لون الحمرة واسنان بارزة فكنوه (بالطيار الروسي) اسوة بطياري رش الحواشات وقتها بالجزيرة فكانت اشكالهم غريبة لم يألفها اهل المنطقة ... ومن المشاكسين والمشاركين لوجبة حمار ودعلي عثمان (ود نفيسه العسيرا) فشغله الشاغل الزريبة وملاكزة الحمار بعصا طويلة في اماكن تثير غريزته وعندما يصل الحمار اوج تلذذه يضربه عثمان بعصاه فتطارده (بت احمودى) زوجة ود علي بالسباب والشتائم .................

Quote: فقد كان (حميدان) يسقيها الحليب بنفس البزازة التي تشربُ منها أخته الرضيعة

حميدان البعرفوا شافع ام قنطو العالجوه بقاشيت حمارتن الزرقا حرم البزازة ما شافا بعينو الا اكان حميدان العالجوه عن الحكيم
وحميدان الرضع من شطر حمارتن الزرقا وبقى اخو دحيشتو بالرضاعة
شرعا مابتحل ليهو ابدا

Quote: فنشأت بينهمافيما بعد مودةٌ ورحمة

الا كان دا حميدانا ممسوخ ساي

Quote: وهي ما زالت أنثي صغيرة بنتِ بنوت ولا تقدر علي الوطء

حبيب نورة .......
قول بسم الله قول بسم الله
يا أبو ادريس من التميس

بعد اذنك يا حبيب نورة داير اركب فوق دحيشة افكارك العايرة دي
( دحيشة حميدان عشرت بالحرام ) يوجد اجهاض

Quote: بعد اذنك يا حبيب نورة داير اركب فوق دحيشة افكارك العايرة دي ( دحيشة حميدان عشرت بالحرام ) يوجد اجهاض

يازول أجهاض شنو؟؟؟
علي اليمين دي لا شافتوا لا رأتوا
ماتت فِتيّة بِكرة

Quote: حبيب نورة ....... قول بسم الله قول بسم الله يا أبو ادريس من التميس

يا أبو إدريس من التميس

التميس العنصري يا ود البوش !!!

أكادُ أجزمُ بأنني أكثر إنسان مستمتع بالكلام دة يا عمر الحاج

وعشان ما أقاطعك
انا ح اخليك تواصل حكي


.......

حبيبها
مرور على سبيل الإستمتاع و التحية

فقد كان (حميدان) يسقيها الحليب بنفس البزازة التي تشربُ منها أخته الرضيعة
فنشأت بينهمافيما بعد مودةٌ ورحمة
حتي أنها عندما كبرت أصبح لها صوتاً ذكورياً منقطع النهيق !

دي بالغت فيها الله يجازيك بالخير
دمتم

صديقي القديم الجميل أبو جهينة
و أنت تعلم تماماً بأني سعادتي بهذا المرور الأنيق
هي أكثر و أكثر و أكثر


ربنا يخليك يا ريس

ودمت

شكرن كتيرن!

سلام يا حبيبة يا جميل
صاح دحشة حيمدان أبدا ما دحشة نصاح .. دحشة ولا دستة حمير


تحياتي وإحترامي

مرتضي
ياخي تسلم كتير
عارف عايزين نعمل تلميع للدحشة دي
يمكن تطلع إنتخابات و تفوز

المؤشرات كلها بتؤكد صحة كلامي

شكرن كتيرن!

يا حبيب والله صراحة خشيت عشان استمتع بما تكتب فهاجت اشجاني الي ازمان بعيدة للحمير فيها ذكريات مجيدة استطاعت ان تخترق بها المجتمع الادمي وتفاصيلة او ان شئت قل انها صارت تفصيلة في حد ذاتها من التفاصيل اليومية .. ، شدتني في صغري مجلة ميكي ماوس بحيوانتها الناطقة والملونة ووكثيرا ما اتعجب لماذا تتبكم الحيوانات عندنا.. وعند مشاهدتي لتوم اند جيري كنت اكثر من الجلوس في المخزن سيما ان جيري متواجد بكثرة خلف شولات الفول واللوبة والقمح والعيش لكنه لا يشبه ذلك الشقي الذى اشاهده فتعاطفت مع الفيران حتي انني (كسرت القلابة) وزهدت في استخدام الكجامة ومطاردة الفيران في الحواشات وسط الدكنوج وتقانت القمح .. وعند ظهور مسلسلات ماوكلي (فتي الكرتون الذى يحاور حيوانات الغابة) وكيف ان الضباع ارضعته حليبها ولغتها فصار كليمها حاولت يومها ان استنطق جرو استجبلته من الجيران ففشلت وحينها قاطعت الكرتون ورجعت لمطاردة الكدايس والكلاب ونصب الكجامة والقلابة من جديد.
وها انت تفعل بي هذا ايضا بالعودة لزكريات وتفاصيل هاربة تصعب مطاردتها
ولكني سأفعل حبا وكرامة ..
فانا من استمع حقيقة بما تكتب وقد جعلتني مثل عوض بطاطس (جاء ليتاوق فاصبح من مواطني حلتنا) ول عوض بطاطس هذا قصة ساقصها لك لاحقا.......

عمر الحاج ياخ ما عندي عربي بجيك راجع

حبيب نورة


ياخي و الله امتعتنا بجد

متعك الله بالصحة و العافية



رجعتنا عشرين سنة للوراء
حيث كنت اتمني لو توقفت عجلة الزمن

هناك ..... و كنا حيث كنا ... مع
بقرنا .. و حميرنا .... و خيلنا

(( و كمان الدحيشات الزي دحشة حميدان ))



ادم العمار

حبيب نورة ... حــدد يااااااخ

الدحشــــة .. ولا ... الدهشــة
عشـــان نعرف نرد؟
...
...

واحد سألوه قالو ليهو عـــرف الدهشــــة؟
قام جاوب وقال ليهو: هــي أنثى الهمـــار (الحمار)

دحين انت قاصـــــد ياتو واحدة فيهم؟
_________
تحاياي

Quote: حبيب نورة ... حــدد يااااااخ الدحشــــة .. ولا ... الدهشــة عشـــان نعرف نرد؟ ... ... واحد سألوه قالو ليهو عـــرف الدهشــــة؟ قام جاوب وقال ليهو: هــي أنثى الهمـــار (الحمار) دحين انت قاصـــــد ياتو واحدة فيهم؟ _________ تحاياي

البشاري

الدحشة بفتح الهاء!
بس أعمل حسابك ما تقوم ترفسك

بس بيني بينك مبالغة الدهشة حقتك دي
إتخيلتها وهي بتفنجط

لووووولز

لحين عودتك يا حبيب الكل ..
تعال لآحكي لك قصة عوض بطاطس .......
اكاد اجزم بان لكل شخص في حلتنا لقب او اسم (قفر) كما يقولون او اسم الشهره كماهو مدون بفورمات التقديم للوظائف وبعض اوراق الحكومة ومن السهولة بمكان ان يطلق عيك لقبا فتسير به الركبان حتي يصل القري المجاروة ؛ عبد الوهاب ابن عمتي شاب ماهر وحاذق في فن إطلاق الالقاب ولم يسلم منه حتي اقرب الاقربين والاصدقاء فهومن سمي البشير ودحرم بالقونجا وقرشي ود الصادق بي اب كريق وفيصل ود زهراء جربيك وعوض ود الطيب بي جقمة .
البحر في ذاكرتنا مربوط بالسواهي والدواهي وقصص تنؤ بحملها مخيلتنا الصغيرة في ذلك الزمان وكثرة الحكاوي والقصص واشهرهاقصة عبد الحفيظ الذى امسك به التمساح ومازالت اثار ذلك موجوده برجله اليسري ولولا جده عبدالله لابتلعه التمساح فكنا نهابه ليلا ونمرغ اجسادنا في رماله الناعمة نهارا ثم نتلصص صوب الجناين والمزارع فالبطيخ والطماطم تمارس علينا الاغراء بالسرقة وتحمل مشقة المطاردة او اخذ علقة ساخنة نتكتم عليها خشية السخرية من بعضهم او خوفا من العقاب الاسري. بمرور الزمن اصبح المزاعين بالبحر والتربالة علاقة ما بالحلة فهم يقصدونها للتبضع او للزيارة لبعض من يشتغلون معهم من اهل الحلة وكذالك مواسم الحصاد المختلفة ولقيط الطماطم والبامية وغيرها فنشأة صداقات متددة جعلتنا نتنقل بين الجناين ونصطاد مواسم الحصاد وبلغ بنا الترف ان نكسر بطيخة امام صاحب المزراعة لمجرد الاشتباه بانها(حلوة وقبلها احمر) ونختار القلب فقط دون سائر جسم البطيخة.
نواصل

آدم العمار
مشكور أخوي أولاً علي المرور

وثانياً علي الشعور و الذوق الجميل

ربنا يقدرني و أجيكم بالجديد
البضرب معاولوا في واطـات الذاكرة الخربة

Quote: يا حبيب والله صراحة خشيت عشان استمتع بما تكتب فهاجت اشجاني الي ازمان بعيدة للحمير فيها ذكريات مجيدة استطاعت ان تخترق بها المجتمع الادمي وتفاصيلة

عمر الحاج

مزنوق زنقة كلب في طاحونة

أو كما قال

برجع ليك بي رواااااقة

كلناآذان صاغية يا أبو عمير

سلمت يداك

حبيب نورة وحبيبنا
تعرف
.
.
.
.
انا والله العظيم بريدك في الله


وعشان تبل شوقك انصحك انزل الصعيد
متع عيونك بالدهشة في دحيشات الصعيد

Quote: حبيب نورة وحبيبنا تعرف . . . . انا والله العظيم بريدك في الله وعشان تبل شوقك انصحك انزل الصعيد متع عيونك بالدهشة في دحيشات الصعيد

ود العطا
ياخي ربنا يخليك
ويعلم الله أنا ذاتي بريدك
لووولز
لكن حلوة الدهشة والدحشة

حقييييقة أنا مندحِش للغاية!!!