يا أبوي مشيت أجيب اللبن جيت لقيت النتيجة 3 صفر: والهلالابي يرفض العشاء - توجد صور

هكذا تحدث إبني المريخابي (الأمين) وأنا أسأله عن مباراة المريخ والترجي
(والله يا أبوي خليتا صفر/صفر، مشيت أجيب اللبن جيت لقيتا تلاتة/صفر(المسافة بين بيتنا وناس اللبن حوالي تلت ساعة رايح جاي)
أها وقلت شنو لما لقيتا 3/صفر، قال لي: قلت لاحول ولاقوة إلا بالله،
قلت في سري الزول ده شكلو داير يبقى لينا زي كمال ترباس ولا شنو؟
أما محمد أبوعبيدة فقد كان شامتاً رغم تأكيده أنه قد شجع المريخ وأقسم بالله على ذلك لأن المريخ أدى مباراة كبيرة في الشوط التاني –
وكان ردي له ياخي شوط تاني بتاع شنو ما الترجي ضمن النتيجة ولعب بتراخي كبير فتمدد المريخ.
عقب مباراة الإسماعيلي بالأمس إتصلت لأتحدث مع محمد فقالت والدته: أنها قد نادت عليه منذ قليل للعشاء فرفض وقال: ماداير
وناولته الهاتف: قلت ليهو يازول العشاء بنفعك لكن الهلال ده مافيهو ليك رجا فأحسن ليك تتعشى،
فرد علي وهو غضبان أسفا، (ماداير عشاء أن شبعان)، (والقون الجابو الإسماعيلي ده قون بتاع (بلادة) ساكت (يقصد المدافع والمعز)
وإن شاء الله هناك (يقصد في الإسماعيلية) الهلال بفوز 2/صفر) إنتهى كلامه مع تأكيد عدم رغبته تناول العشاء.
(هذا البوست من باب الدعم المعنوي لفريق الهلال في محنته
وإنكشاف حاله بالأمس بصورة محزنة.)

وسآتيكم بصور قطبي الهلال والمريخ بمنزلنا العامر بإذن الله.

ابوعبيده ياصاحب

Quote: (هذا البوست من باب الدعم المعنوي لفريق الهلال في محنته وإنكشاف حاله بالأمس بصورة محزنة.)

اخجلنا المريخ بمهزلته
وحزنا للهلال بدفنه في مقبرته












--------------------
سلامات ابوعبيده

الأخ الحبيب وليد عبداللطيف
السلام عليكم ورحمة الله وبركاته

ياخي والله الحزن يخيم على الشارع الرياضي السوداني

Quote: اخجلنا المريخ بمهزلته وحزنا للهلال بدفنه في مقبرته

فريق المريخ ينقصه الكثير من العمل والترتيب لينصلح
حال الفريق للموسم القادم أو بالأحرى ليواصل في الكونفدرالية
التي تواضع وهبط إليها منذ الدقيقة 26 من شوط اللعب الأول أمام الترجي
مايجي زول يقول نقهر المستحيل وما إليه، دفاع المريخ لم يصمد أمام أضعف
الفرق في الدوري المحلي السوداني وللترجي سيشرع الأبواب
ليس بالعواطف فقط يصمد الدفاع وليس بهدير الجماهير تأتي الأهداف
أما الهلال فناديه يحتاج لإعادة بناء بالكامل (مبنى ومعنى): مجلس إدارة (الرئيس بالذات)
مدرب، لاعبين.

وليد:غيبة طويلة طبعاً بس لسوء الشبكة العالمية طرفنا

Quote: والهلالابي يرفض العشاء

ليه ... العشاء كان حمص ولا ايه

العم/حمزاوي

Quote: ليه ... العشاء كان حمص ولا ايه

نعم وقال كمان بعمل ليهو حساسية شديدة بالذات لما يضاف زيت الزيتون
التونسي أو يركب الطائرة التونسية زينا كده

أخوى أبوعبيده
كيفنك ياغالى ..


نعم أنهزمنا بالثلاثه ..

لكن بمشئية الله سنرد

الصاع بصاعين ..

وقول لولدنا المريخابى الغالى

بإذن الله المره الجايه لمن تمشى
تجيب اللبن سوف تجد المريخ أمطر
شباك الترجى بعدد كافى من الاهداف
نقول بإذن الله ..

تحياتى ياغالى

تاج السر

الأخ الحبيب الأستاذ/تاج السر
السلام عليكم

Quote: وقول لولدنا المريخابى الغالى بإذن الله المره الجايه لمن تمشى تجيب اللبن سوف تجد المريخ أمطر شباك الترجى بعدد كافى من الاهداف نقول بإذن الله ..

لا أتشاءم ولكني سأردد مع (ترباس برضو)
يارييييييييت يارييييييييت

وتسلم ياغالي

يعني اللبن ده حرمان عليكم تاني ما يخش البيت ولا شنو؟

زي حكاية ترباس ، تاني حرمت عليه ما يسافر مع ناس الهلال كورة برة

Quote: وسآتيكم بصور قطبي الهلال والمريخ بمنزلنا العامر بإذن الله.

انت قاعد ترسم فيهم العيال ديل ؟ وين الصور ياخ , ربنا يحفظهم ليك ويخليهم ليك يكبروا ( ويبروك ) من البر والبراية الاتنين

بعدين انا شايف لو قدموا للعضوية في المنبر ممكن ياخدوها وانت ما تكون نزلت صورهم

تحياتي يا صديق

Quote: بعدين انا شايف لو قدموا للعضوية في المنبر ممكن ياخدوها وانت ما تكون نزلت صورهم

لذيذ والله يا أساسي..

ما عارف ليش ذكرتني قصة عضوية حامد أخوي في البورض دا.. القصة بتاعة تقديمه لقطعة الأرض تزامناً مع تقديمه لنيل عضوية

منبر بكري الصعب دا.. الحقيقة الراجل طلعت ليهو قطعة الأرض وبعد كم سنة كدا بناها.. ولم يحصل على العضوية هنا..

تقول لي أولاد أخوي أبو عبيدة؟؟

أها نجي لسيد البوست..أبو عبيدة يا سليم الذوق.. لو تعرف الشوق..

ياخي ما قلت ليك جاني الهناي دا في صمة خشمي... ما تقعد تزازي بينا هنا..

إيميلي هو [email protected]

وكمان برسالة في المااااااااااا سنجر الداخلي أرزع لينا جوالك..

كيب ان طوتش.. على وزن الفاينال توشيز بتاعة مجذوب داك بدون ذكر أسماء..

نهايتو:
كونفدرالية مباريتين ونرجع نكابس في المحلي..

أشواق وتحايا عطرة للجميع..

محمود مصطفى
السلام عليكم

وعشان جاك الهناي داك - أولاً تبتعد تشجيع الفرق السودانية
تاني شي سودانيز اولاين تاخدها على قدر مايتعامل به أخونا عمر الفاروق
تالتاً تكتر من الرياضة
رابعا يعلم الله مشتاق ليك وده المهم وسلم على حامد أخوك
نسيت موضوع جميع المجاذيب
الايميل عملت اضافة جاني رد انه في حسابين بالإسم ده وتمت الإضافة
دحين حدد لي انت ياتك في الاتنين؟ يعني ترد لي بالإيميل الليلك
كنفدرالية كنفدرالية مازعلانين عشان ماعندنا لاعبين

اساسي ياحبيب
السلام عليكم

وأقول آمييييييييين ياأساسي للأولي أما التانية دي حاصلة من هسع
والبركة في صور الأقطاب الخلتك تتكلم في إمكانية ركوبنا كمريخاب للتونسية
بعدين داير تحليل بإعتبارك زول سنير وكده في جاذبية الصور لأي موضوع
يعني العميان بجي شايل المكسر لما الواحد يكتب توجد صور
أنا كنت قاصد أكتب صور معنوية لكن طالما الواحد إتورط في الموضوع خلاص
بنزلها بس بعد مالشبكة تتحسن طرفنا.
أما العضوية الفكوها الأيام والله حقو نوسطك ياخي والله بكري ده قصر رقبتنا
مع أخوي وودخالتي مقدم ليهم لي زمن طويل وهو مدينا الطرشاء
ومع ذلك نسألك كمان يا أساسي التونسية كيف؟

الأخ/فخرالدين أحمد
مرحباً بكم في سودانيز أونلاين
ولولا رداءة الشبكة في السودان هذه الأيام لرحبت بكم مباشرة
لكن ماقادر أدخل في الموقع ولو قدرت مابقدر أرد

Quote: يعني اللبن ده حرمان عليكم تاني ما يخش البيت ولا شنو؟ زي حكاية ترباس ، تاني حرمت عليه ما يسافر مع ناس الهلال كورة برة

نحن طبعا ناس بطانة كان خلينا تشجيع المريخ مابنقدر نخلي اللبن، وعليك الله يافخرالدين، دحين ديل لاعبين
الزول يحرد العشاء من أجلهم خلي كمان نحرم اللبن بالمرة، دي يلقوها عند الغافل القائل ديل لاعبين.
مرحباً مرة ثانية وبرضو كما تضمن رد الأمين ماقاله ترباس من قبل
فسنردد ماقاله ترباس ونقول: ياريييييييييييييييييييييييييت ياريييييييييييييييييييييييييت

من ناحية النتيجة لم نحلم ولم نتوقع غير ماحدث
ولكن مالم نتوقعه هو
حصب الملعب بالحجارة
حيث لم يكن هنالك مايشير
الى أن الحكم تحامل على المريخ
بتشكيلة الأمس رجع المريخ 3 سنوات للوراء
النفطي ذاتو بقى نص مكنة لم يقدم مايشفع له
وارقو الله يخارجو
العجب مع السلامة
قلق فهو قلق
مصعب ده مفتكر نفسه ....

ياخي أقول ليكم حاجة والله عجبتني النتيجة
وكانت عادلة رغم إنه الزول الهلالابي قال:
والله يا أبوي كنت عاوزكم تفوزو، قليت ليهو لي شنو؟
قال لي عشان الترجي ده غلب الفرق السودانية كتير خلاص،
قلت ليهو ديل مش الفرق السودانية إنما ده فريق الهلال بس يا أخوي
والله يمرقكم من الإسماعيلي، فقال إنه واثق من إنه الهلال سيهزم الإسماعيلي
ويتأهل بإذن الله.

نحيا ونشوف آخرتا