كشوفات انكشاف المكشوف.....كشف الاقنعه والحي ياما يشوف...الاسماء

ضع القلم.........انتهي الزمن.....انتهي الوقت المخصص .....تري هل تكرم ام تهان؟
ضع الورقه فوق الدرج......واخرج


=====
كيف اشتغلت؟....جاوبت شنو علي السؤال رقم اربعه
والله انا زاتي ما متذكر........خليتها فاضيه



ناس ما اتخيلتها تكون كده

انتهت فتره الانتخابات....هجنا وجطنا وكوركنا...............والنتيجه معروفه



الناس ما شغاله بالناس........كل زول في همو

اتصلت علي ناس البيت....كيف الانتخابات؟
تمام ...جونا ....ساقونل.....ودونا...........وجابونا
لكن يا امي انتي اساساً سجلتي يعني؟
انا عارفه....ما زمان جونا في الحله......في البيت... .....وسجلونا
طيب يا والده.....اديتي صوتك لمنو؟
ما ياهو شدرهم القالو ده

يا الله امي الما قرت ابتدائي طلعت كوزه......قناع اول انكشف


ما اتجرات اسأل ابوي.....لانو وقتو كلو في الخلوه العملوها في الجامع الاصلا عملوه في ميدان الكوره الاصلاً مفروض يكون مركز شباب......لسه ما انكشف
امي قالت لي جيرانا كلهم ادو الشدره

لا حولا...الحله كلها بقت كيزان....ما غريبه مركز الشباب يعملوه خلوي.....اقنعه كتيره انكشفت

اخوي قال لي يعني ندي منو؟....علي الاقل ديل شبعو....لو ادينا غيرهم ح نبداء من الاول تاني لحدي ما يشبعو...انسي ياخ........وش جديد لنج
اختي قالت.......ما الليله ادونا اذن من الساعه واحده عشان نصوت....وقبليها ادونا حافز سميييييييييييييين.......يعني ندي صوتنا لمنو يعني؟
الله ...حتي انتي يا نواره البيت........سجل اللسته شكلها هابشاني شديييييييييد الليله

======
الصراحه غير امي ما سألت التانيين لو كانو مسجلين ولا لا.............بطني طامه


طيب الفضل منو؟.........وانا اكورك ليكم......الا الكيزان....ما اشتغلتو بي كلامي الشغله....انتو ما بتقروا المنبر ده




لكن نقول شنو.........ديل اهلي الغبش.......مغشوشين
والظاهر ما بيقروا لي كتابتي في سودانيزاونلاين...........الله يسامحكم

عشرين سنة من غسل أمخاخ البسطاء و تغييب وعبهم
العارضة ضعبفة لأنه كان بإمكانها إبطال مفعول هذا الغسيل
لو كانت هناك قناة فضائية و إذاعة تحت تصرف القوى المعارضة للكيزان
كان سيمكن إستخدامها لبث كل ماقام به الكيزان من فساد و ظلم طيلة ال 20 سنة الماضية
الشعب السودانى شعب عاطقى
تخيل مفعول إستضافة المفصولين من الخدمة للطالح العام و إستضافة أولادهم الذين فقدو مصدر رزقهم ظلما
تخيل مفعول إستضافة أسر من قتلوا ظلما ليحكو التفاصيل
تخيل مفعول عرض كثير من الوثائق التى تجرم بعض منتسبى النظام

وجود قناة تلفزيونية و أخرى إذاعية كان سيغنى المعارضة من التباكى على عدم تكاقؤ الفرض الإعلامية

ولكن المعارضة عجزت حتى عن إستئجار قناة قضائية لمدة 15 يوم
فعجزت عن تعبئة الجماهير فى صفهابالقدر الكافى لتحدى المؤتمر الوطنى وما يستطع من تزوير

Quote: وجود قناة تلفزيونية و أخرى إذاعية كان سيغنى المعارضة من التباكى على عدم تكاقؤ الفرض الإعلامية ولكن المعارضة عجزت حتى عن إستئجار قناة قضائية لمدة 15 يوم فعجزت عن تعبئة الجماهير فى صفهابالقدر الكافى لتحدى المؤتمر الوطنى وما يستطع من تزوير

اخ فيصل محمد عبدالله
كلام ميه الميه
الاعلام هو الذي لعب دور كان له الاثر علي اهلي الطيبين......يجب ان تفكر المعارضه بقنوات تلفزيونيه واعلاميه تخصها
وان تكون اقوي في برامجها الاعلاميه طويله المدي

محمد زكريا - سلام
تحليل منطقي وقراءة واقعية جداً للواقع السياسي في البلد ... وما يحدث في بيتكم يحدث في الكثير من البيوت السودانية ... وليتنا نبتعد عن العاطفة ونكون واقعيين في تقييمنا للأمور ...

صحيح أن للإعلام دور لا يستهان به في بناء الإنسان فكرياً ووجدانياً بحيث يرتبط مباشرةً بما يسمعه ويراه , ولكن مع ذلك كان هناك تخطيطاً دقيقاً , وعملاً مدروساً بذلوا لأجله الوقت والمال واستعانوا بكل الخبرات العلمية والعملية للتنفيذ ...

تعرف يا د. يوسف محمد ان انحنا برضو مالومين لانو ما بنقدر نوعي اهلنا بالحاصل...يعني لو كان بنقول الكلام البنكتبو ده ليهم مباشره ...
الخطاب المباشر مع افراد الشعب البسطاء ابتداء من بيوتنا واهلنا.....المشكله ما بتلقي فرصه تتكلم مع ناس بيتكم في السياسه
المشكله وين ما تعرف........شغلانه محتاجه دراسه
ناس بيتنا......كيزان!!
بالجد محتاج حد يفهمني ليها

طبعاً الغريبه اني كنت بينهم في عيد الاضحي ..وفي صلاه العيد تضايقت من حديث الامام لانه كان يمتدح الحكومه وبأنها لا يجوز للمسلم ان يبدلها .... والكثير فيما يشبه العهد الاول
وكدت ان اقوم من مكاني لو لا ان ابي الذي يجلس بجانبي رمقني بنظره حاده ........فتسمرت في مكاني والغيظ يملؤنى....والغريب بعدها قام الناس يتسالمون ويتصافحون ...عيد مبارك
وانا انظر ال ذلك الامام ذو اللحيه والجلباب الابيض.........ماذا اقول له؟.........لماذا في هذا اليوم يا رجل الا يكفي يوم الجمعه السابق......... لقد تركت لكم صلاه الجمعه لكثره مدحكم للسلطان
وفي طريق العوده الي المنزل وانا احمل بساط صغير تحدث لي ابي بأن هذه امور سياسيه لا نناقشها......واجابني مكررا عندما سألته لماذا تسمحو لهذا الامام ان يتحدث عن السياسه؟
ذبح الخروف وانا في ذهني تلك الخطبه عن الراعي والرعيه وولي الامر القوي الامين...........كأن الخروف يمثل حالنا كلنا كأهل الحي الهاديء و ابن عمي جزار لا يرحم
قبل ان اسافر من السودان كنت اعلم ان اسرتي تنتمي الي طائفه الانصار رقم تهكمي واستنكاري واستهجاني عندما تحلف امي وحات سيد المهدي او وحات الامام الهادي
اخي لم تكن له اتجاهات حزبيه علي الاطلاق فهو مثلي يعشق الحياه ويحب الرسم والخط والموسيقي.........هل صاؤت له الان......حقيقه والله لا ادري
لا ادرى..........هل اصبح في كل بيت سوداني كوز..........كيزان........ هل هذه حقيقه الوضع الراهن؟......اهو وضع مفروض ام اختياري......لا ادري
صرت لا استطيع التحدث عن السياسه معهم.......فهم خائفون......هم يعلمون انني اتحدث ......بلا خوف.......صحيح الجمره بتحرق الواطيها

======
الغريبه انهم لم يذكرو لي شيء عن نتائج اليوم واكتفو بذكر ان بنات ابن خالتي نجحو في مرحله الاساس........شيء عجيب......ماعندي ليهو اي وش