Post: #1
Title: ساخر سبيل : لورى زين العابدين
Author: الفاتح يوسف جبرا
Date: 04-14-2010, 07:59 AM
Parent: #0
صحيفة الرأى العام
عدد الأربعاء الموافق 14 أبريل 2010م
موقع الكاتب www.alfatihgabra.net
لدى يقين لا يتزحزح بأن أى إنتخابات تجرى فى السودان و(الدول المجاورة) لن توضح بجلاء ما يريده المواطن، بمعنى أنها لن تكون معبرة عن الإرادة الحقيقية للمواطنين على الرغم من ذلك الشعار الرنان الذى يتردد فى كافة الوسائط الإعلامية مخاطباً المواطن بأن (صوتك أمانة) !
ولأننى أعلم تمام العلم بأن صوتى (لا أمانة ولا حاجه) فى ظل هذه (الجوطة) الحاصلة والإهمال وعدم الإنضباط فلم أشارك فى عملية التسجيل (من أاساسو) ، فهذا الصوت الأمانة لا يعنى أى شئ إذا ما فقدت الإنتخابات (الضبط والربط) وذهبت بقية (الأصوات الأمانات) إلى أصحابها ، فصوت (المواطن) يصبح أمانة فى حالة أن تكون العملية الإنتخابية كووولها (أمانة) !
فما معنى أن يكون صوتى أمانه فى الوقت الذى تضيع فيه أصوات أخرى كما حدث فى ذلك الخبر الذى وردته صحف الأمس والذى يقول : تفاجأ المرشح المستقل في دائرة نيالا وسط (3) زين العابدين المصري، مع بداية الاقتراع أمس بتغيير رمزه من اللوري إلى الجرس !
أى والله العظيم .. الراجل حملتو الإنتخابية كووولها يكلم فى أهلو وعشيرتو :
- يا جماعة ما تنسو .. الرمز بتاعى اللورى !
- رمزى شنو؟
- اللوووورى !
- ح تأشروا قدام شنو؟
- اللووورى !
وبالطبع لم ينس هذا المرشح (المستقل) بأن يقوم بطباعة (بوسترات) عليها صورته وهو يعتلى (لورى 7 طن) رافعاً سبابته بعلامة النصر بينما يرفع بالأخرى (الكريزة) ! وهو ذات اللورى الذى قام بإستئجاره لتدشين حملته الإنتخابية وذلك بالتجوال وسط أحياء وفرقان دائرته الإنتخابية متوقفاً أمام الجماهير وهو يشير بيده إلى اللورى قائلاً :
- ده شنو؟
- لوووورى!
- الرمز شنو؟
- اللوووورى
- ح تدو منو؟
- الللوووورى !
على الرغم من أن (زين العابدين المصرى) مرشح (مستقل) ولا يدعمه حزب إلا أنه لم يبخل بالصرف على حملته الإنتخابية وتعريف جماهير دائرته (باللورى) فهو وسيلته لتحقيق حلمه الإنتخابى ، لذا فقد قام بصرف (الوراهو والقدامو) .. شئ إيجار اللورى وشئ (جاز) اللورى .. وشئ حق السواق .. وشئ حق المساعد .. كلو (دفعو من جيبو) .. بالإضافة لى حق طباعة البوسترات الفيها (صور اللورى) ، بذل المرشح (زين العابدين) كل مجهود ممكن لتعريف الناخبين فى دائرته بأن (اللورى) ده هو شعاره !
وجاء يوم التصويت حيث ذهب (زين العابدين) ليدلو بصوته ... أمسك بورقة الترشيح فلم يجد أثراً (للورى) :
- يا جماعة اللورى بتاعى وينو؟ مشى وين!
- لورى شنو يا زول؟ إنتا جيت هنا بى لورى !
- ما جيت بيهو .. ما جيت بيهو.. يا جماعة اللورى ده الرمز بتاعى
- أيواا ما تقول كده .. إنتا زين العابدين المرشح المستقل؟
- أيوا أنا ذاااتى
- طيب ما تقول كده من الصباح .. رمزك بقى (الجرس) !
- معقولة يا جماعة ؟ من لورى لى جرس ! طيب كان تخلوهو لي (قندرانى)!
- يا زين العابدين رمزك بقى الجرس وبطل الجرسة !
- ما أتجرس كيفن يا جماعة ؟ هسه البكلم ليا الناس دى يقول ليهم اللورى بقى جرس منو؟
بالطبع ليس هنالك وقت كيما يقوم (زين العابدين) بتأجير (لورى تااانى) وإعتلاءه ليطوف على مواطنى دائرته وهو يحمل (جرس) فى جيبه مخاطباً اياهم :
- ده شنو؟
- ده شعارك اللورى يا زين العابدين !
- (يخرج الجرس من جيبه) : وده شنو ؟
- (الجميع) : ده جرس يا زين العابدين !
- (وهو ينزل من اللورى) : اللورى ده خلاااس غيرناهو !
- (فى صوت واااحد) : غيرتو لى شنو !
- (يدق الجرس) : غيرناهو للجرس ده ! غيرناهو لى شنو؟
- (الجميع) : للجرس ده !
- اللورى شنو ؟
- (الجميع) : غيرناهو
- (وهو يدق الجرس) : غيرناهو لى شنو؟
- (الجميع) : للجرس ده !!
حيوا معى جميعاً المرشح المستقل في دائرة نيالا وسط (3) المواطن زين العابدين المصري والذى لا يزال حتى هذه اللحظة يحتفظ بكامل (عقله) لأنى لو كنتا مكانو لأصبحت أحد معالم مدينة نيالا الرئيسة ولرأيتنى أيها القارئ الكريم هائماً على وجهى فى الطرقات أحمل داخل جيب (جلابيتى) المتسخة (جرساً) ما أن أشاهد أحد اللوارى يسير على الشارع حتى اصرخ فى المارة وأنا أشير نحوه قائلاً :
- شفتو اللورى ده !
- شايفنو
- هسه أقلبو ليكم جرس
ثم أخرج الجرس من جيبى وأديهو كم (رنة) ثم إنخرط فى نوبة من البكاء !
كسرة :
بينى وبينكم كده .. معقوله هسه الزول يمشى يصوت (للشجرة) يلقاها بقت (سمكة) !!
|
Post: #2
Title: Re: ساخر سبيل : لورى زين العابدين
Author: الصادق خليفة
Date: 04-14-2010, 10:05 AM
Parent: #1
هاهاهاهاهاهاهاهاهاهاهاها
|
Post: #3
Title: Re: ساخر سبيل : لورى زين العابدين
Author: الفاتح يوسف جبرا
Date: 04-14-2010, 10:12 AM
Parent: #1
اللورى ده الظاهر ماشى بى سرعة مليون .. دقيقة واااحده لقيتو فى صفحة إطناشر .. الحكاية شنو يا جماعة الزول تانى ما ينزل ليهو حاجه ؟ شوف ليكا حل للمشكلة دى يا بكرى!
|
Post: #4
Title: Re: ساخر سبيل : لورى زين العابدين
Author: حبيب نورة
Date: 04-14-2010, 10:22 AM
Parent: #3
استاذنا
سرد ممتع و جميل
ما لقيت كلام غير دة في الوقت الحالي
اقبلوا ساهي و بطل الجرسة
|
Post: #5
Title: Re: ساخر سبيل : لورى زين العابدين
Author: الفاضل يسن عثمان
Date: 04-14-2010, 10:34 AM
Parent: #4
استاذنا:الفاتح جبرا
مقالك تلخيص واقعي،للتردي والخرائب التي عمت البلد في كافة مناحيها
وصارت محل تندر للمراقبين والاجانب .
قناة سكاي نيوز الانجليزية عرضت تقريرا مضحك ومبكي في ان،عن الانتخابات المسخرة
وتهكم فيه مقدمه،من البلد ومواطنيه.
زين العابدين تلخيص لحال المواطن المغلوب علي امره.
تشكراتنا يا استاذ.
|
Post: #6
Title: Re: ساخر سبيل : لورى زين العابدين
Author: وجن
Date: 04-14-2010, 10:38 AM
Parent: #4
استاذي العزيز
شرفت كتير والله
وامتعتنا
بجاي
وفي الفيس
وعلى الايميل
3 حبات في اليوم من الضحك الجميل
الله يديك العافية ياخ
كسرة
بس بيني وبينك صوتك مشى وين وماتقول لي راح :)
|
Post: #7
Title: Re: ساخر سبيل : لورى زين العابدين
Author: عبدالكريم أحمد الامين
Date: 04-14-2010, 10:54 AM
Parent: #6
| Quote: بينى وبينكم كده .. معقوله هسه الزول يمشى يصوت (للشجرة) يلقاها بقت (سمكة) !![/red] |
** البروف ابو ناجى..
** صباحك خير..
## قال ليك الشجره فى السعوديه بيشع منها نور وطالعا منها ريحة مسك ,, عايز تقلبا ليهم سمكه!!!
** على المواطن زين العابدين أن يحمد ربو أهو لقى ليهو رمز... فى مُرشحين أسماؤوا مالقوهوا وواحدين قدام الرمز لقو بياضه لارمز ولايحزنون . (المُتحدث بإسم المفوضيه)
## غايتو زى الإستفتاء دا ماحصل فى العالم ... قال :- إنتخابات قال..
** كسره:- قال ليك واحد جارى فى مضمار 21 سنه براهو ,, كان جا الاول او الطيش فارقه بى شنو حيشيل كل الميداليات بمافيها الصفيحيه..
(ودام الود بيننا)
(ابو محمد فؤاد- دبى) - الماكيكى..
|
Post: #8
Title: Re: ساخر سبيل : لورى زين العابدين
Author: الفاتح يوسف جبرا
Date: 04-14-2010, 01:13 PM
Parent: #7
| Quote: اقبلوا ساهي و بطل الجرسة |
أنا قبلتو يا حبيب نورة .. هو زين العابدين قبل (الجرس) .. تقول ليا شنو !!
|
Post: #9
Title: Re: ساخر سبيل : لورى زين العابدين
Author: الفاتح يوسف جبرا
Date: 04-14-2010, 01:31 PM
Parent: #8
| Quote: قناة سكاي نيوز الانجليزية عرضت تقريرا مضحك ومبكي في ان،عن الانتخابات المسخرة |
ليهم حق يا الفاضل هسه قصة زين العابدين دى ممكن تحصل فى أى إنتخابات فى الدنيا؟
|
Post: #10
Title: Re: ساخر سبيل : لورى زين العابدين
Author: الفاتح يوسف جبرا
Date: 04-14-2010, 01:40 PM
Parent: #9
Quote: كسرة
بس بيني وبينك صوتك مشى وين وماتقول لي راح :) |
إذيك يا وجن
بينى وبينك لمن صوتى راح خفتا يكون إتسرق .. تانى قلتا أنا ما مسجل إسمى طيب يسرقو يعمل بيهو شنو؟ لكن فى واحد صاحبى قال ليا صوت الناس الميتين قاعد يتسرق خليكا إنتا الحى وموجود .. غايتو يا وجن صوتى رجع ليا لكن ما عارف هل أستخدم أم لا !!
|
Post: #11
Title: Re: ساخر سبيل : لورى زين العابدين
Author: الفاتح يوسف جبرا
Date: 04-15-2010, 07:02 AM
Parent: #10
| Quote: قال ليك واحد جارى فى مضمار 21 سنه براهو ,, كان جا الاول او الطيش فارقه بى شنو حيشيل كل الميداليات بمافيها الصفيحيه.. |
الجرى فى المضمار بى مضاعفات العشرة ده يا عبدالكريم ما سمعنا بيهو إلا فى الدول النايمة دى ! تحيااااتى
|
Post: #12
Title: Re: ساخر سبيل : لورى زين العابدين
Author: اسعد الريفى
Date: 04-15-2010, 08:24 AM
Parent: #11
الفاتح
سبقناك من امبارح
وين نضارة القراية .. نسيتها فى المركز "مركز التصويت يعنى"
و بالمناسبة هل كلمة التصويت "من الصوت" أم هي كلمة فرعونية كما يشاع "صوتت المرأة على بعلها" انتخبت "معذرة للخطأ فى الحاء" أقصد انتخبت
لورى زين العابدين
و سألنك
____________
- شفتو اللورى ده!
- شايفنو..!
- هسه أقلبو ليكم جرس..!
____________________
شكرا لاستاذنا الفاتح جبرا
و بالمناسبة ..رمزك شنو ، أوعى يكون الجرس !!
|
Post: #13
Title: Re: ساخر سبيل : لورى زين العابدين
Author: nazar hussien
Date: 04-15-2010, 08:56 AM
Parent: #12
زين العابدين دا البوديه يختار الرموز البتنباع دي شنو...؟؟؟؟
كويس الما ختوا ليه صور سماسرة وكل واحد عايز حقو...
يعني يقولوا ليه بعنا اللوري كيف لو ما ختوا ليه جرس؟؟؟
(افتكر في مدحة بتقول)
ختو ليه جرس في خراب سوووووبا
اللالوبة...
|
Post: #14
Title: Re: ساخر سبيل : لورى زين العابدين
Author: اسعد الريفى
Date: 04-15-2010, 01:59 PM
Parent: #13
استاذنا .. أهديك في مقام الانتحاب ابيات ابن جهيزة في قصيدته الرائية
اين انت يا راكب اللورى الوثير
بين اجراس الصبايا في مواكب الحناطير
نوق ساكنات لا تهيجها انوار النوافير
و صناديق بها التسجيل دونه السواطير
فلا الحبر يبقي بعد الماء دون تغيير
و غطاء للصندوق يخجله الحياء و بلمسة يطير
|
Post: #15
Title: Re: ساخر سبيل : لورى زين العابدين
Author: Bushra Elfadil
Date: 04-15-2010, 02:41 PM
Parent: #14
فاتت عليهم الغيرواللوري لي جرس. ناس التسجيلات ليه ما شافو معاهم فد مرّة اسم المرشح (زين العابدين المصري) ، و ليه ما شكّوا في جنسيته فقاموا على تغيير الاسم على طول؟
_____________
الأخ الفاتح يوسف تحياتي.
|
Post: #16
Title: Re: ساخر سبيل : لورى زين العابدين
Author: Bushra Elfadil
Date: 04-15-2010, 02:41 PM
Parent: #14
فاتت عليهم الغيرواللوري لي جرس. ناس التسجيلات ليه ما شافو معاهم فد مرّة اسم المرشح (زين العابدين المصري) ، و ليه ما ش%
|
Post: #17
Title: Re: ساخر سبيل : لورى زين العابدين
Author: اسعد الريفى
Date: 04-16-2010, 07:38 AM
Parent: #16
|
Post: #18
Title: Re: ساخر سبيل : لورى زين العابدين
Author: اسعد الريفى
Date: 04-16-2010, 05:36 PM
Parent: #3
| Quote: اللورى ده الظاهر ماشى بى سرعة مليون .. دقيقة واااحده لقيتو فى صفحة إطناشر .. الحكاية شنو يا جماعة الزول تانى ما ينزل ليهو حاجه ؟ شوف ليكا حل للمشكلة دى يا بكرى! |
|
Post: #19
Title: Re: ساخر سبيل : لورى زين العابدين
Author: محمد عبد الماجد الصايم
Date: 04-17-2010, 07:39 AM
Parent: #18
اللوري دا بكون ما فيهو بوري!
|
Post: #20
Title: Re: ساخر سبيل : لورى زين العابدين
Author: nazar hussien
Date: 04-18-2010, 07:27 AM
Parent: #19
| Quote: بينى وبينك لمن صوتى راح خفتا يكون إتسرق .. تانى قلتا أنا ما مسجل إسمى طيب يسرقو يعمل بيهو شنو؟ لكن فى واحد صاحبى قال ليا صوت الناس الميتين قاعد يتسرق خليكا إنتا الحى وموجود .. غايتو يا وجن صوتى رجع ليا لكن ما عارف هل أستخدم أم لا !! |
بسيطة:
اعمل الفحص دا:
تهليل...وشوف رد فعل الاصبع السبابة...
|
Post: #21
Title: Re: ساخر سبيل : لورى زين العابدين
Author: othman mohmmadien
Date: 04-18-2010, 08:16 AM
Parent: #20
فرامل .....
Break
|
Post: #22
Title: Re: ساخر سبيل : لورى زين العابدين
Author: ibrahim alnimma
Date: 04-18-2010, 09:58 AM
Parent: #21
في بلد يعج بالامية يشكل اختيار الرمز فيها أهمية قصوي حيث ستتوجه الناس لمدح الرمز
الذي يصير من كثرة المديح مطابق لصاحبه الخالق الناطق ، وانا صغير ايام نميري كنت بشوف
المرشح في السوق يشبه القطية بشكل، اي والله علي ما اقول شهيد.
وقد اثار بعض الصحاب شي غريب عندما ذكر بان العجلة التي يمتلكها اهل محبوبته تتشكل
في داخله عجلة محترمة وذات ضفائر حلوة وانه يكن لها كل احترام في اشارة واضحة لجاهلية
عبادة الاصنام . كامل تضامني مع زين العابدين الغرابي .
كما تشير النظرية الكمية الي ان اللوري الذي يسير بسرعة تقارب سرعة الضوء سيفقد كتلته
( تتحول الي طاقة) وستصبح طاقة صوتية كصوت الجرس(ههههه) 000فنستطيع ان نقول ياللوري
عليك الرسول رنة00
شكراً لك استاذ الفاتح لك كامل الود
|
|