Post: #1
Title: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: mayada kamal
Date: 04-09-2010, 01:59 PM
والميس قرب........ ( والفتروا مرقوا يا شيخنا)
فليكن شعارنا الذي نصوت له (الشجرة)
|
Post: #2
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: محمد زكريا
Date: 04-09-2010, 02:09 PM
Parent: #1
مبروك عليكم مقدما
بس سؤال صحيح الاخبار الفي صحف اليوم الجمعه 09.04.2010 دي...صاح؟
|
Post: #3
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: mayada kamal
Date: 04-09-2010, 02:19 PM
Parent: #2
الله يبارك فيك
بس ان شاء الله تكون من قلبك
وما مناقره ساي منك
في الحالتين مقبولة منك
Quote: بس سؤال صحيح الاخبار الفي صحف اليوم الجمعه 09.04.2010 دي...صاح؟
|
اذا سياتك قاصد المانشيت التاني من فوق في صحيفة التيار
فاقول لك نعم زادت رحلات السفر الداخلية والخارجية
بس دا ليس كمؤشر سالب
وانما لانو الناس دارت فيما بينهم اشاعة انو هناك ثلاث ايام عطلة ايام التصويت
الامر الذي تراجعت عنه المفوضية في اخر يوم امس ونفت ان تكون هنالك اي عطلة
لكن انت تعرف السودان
كان ما اجزوا ليهم باجزوا براهم
خاصة وان العطلة الثلاثة ايام الكانت مقررة تصادفت معها عطلة السبت والجمعة وبقت خمس ايام
انا زاتي لو ناس الشغل كانو بسمحوا لي كان اجزتهم
ياتي بعد ذلك المغرضين (والغرض مرض) يقولوا ليك عشان اعمال العنف ووووووووو
*** تخريمة
شكرا على الاسلوب الحسن اللي تداخلت بيه
ما ملاحظ انه مداخلتك ما زي مداخلاتك السابقة اللي بتسم البدن
|
Post: #4
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: السيد المسلمي
Date: 04-09-2010, 02:31 PM
Parent: #3
| Quote: ما ملاحظ انه مداخلتك ما زي مداخلاتك السابقة اللي بتسم البدن |
ميادة صبرك وطولت بالك قلما توجد في هذا المكان ..
وفي الحقيقة أنا كنت مستغرب من مداخلات الأخ محمد زكريا في بوستاتك !!
لأني متابعو في كتير من البوستات .. زول كتاب وعقلاني وكل كلمة عندو ليها ميزان ..
عكس كتابتو معاك هنا .!!
ــ
التحية لك وله ..
والف مبروك مقدماً ياظلامية
|
Post: #5
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: mayada kamal
Date: 04-09-2010, 02:40 PM
Parent: #4
Quote: ميادة صبرك وطولت بالك قلما توجد في هذا المكان ..
وفي الحقيقة أنا كنت مستغرب من مداخلات الأخ محمد زكريا في بوستاتك !!
لأني متابعو في كتير من البوستات .. زول كتاب وعقلاني وكل كلمة عندو ليها ميزان ..
عكس كتابتو معاك هنا .!!
|
سلامات يا سيدنا
والله لا ايد لا كراع.... وبدون سابق معرفه
الزول الاسمه محمد زكريا دا شاميني من قبل ما ينال باسوورد بكري (على حد ما قال مرة بلسانه هنا في البورد)
Quote: زول كتاب وعقلاني وكل كلمة عندو ليها ميزان ..
|
بختك ياعم زكريا
نلت شهادة من سيدنا
أيامك والله
حقيقة يا سيد المسلمي
انا لا متابعاه ولا قريت
وبصراحة انا لا افهم في ال شعر والفن
|
Post: #6
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: السيد المسلمي
Date: 04-09-2010, 02:51 PM
Parent: #5
الأخت ميادة ..
Quote: بختك ياعم زكريا
نلت شهادة من سيدنا
أيامك والله
|
بالله خليك جادة شوية !
|
Post: #7
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: mayada kamal
Date: 04-09-2010, 02:57 PM
Parent: #6
| Quote: بالله خليك جادة شوية |
جادة جنس جداد
مووووبالغة
|
Post: #8
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: محمد زكريا
Date: 04-09-2010, 04:10 PM
Parent: #7
والله ما كنت داير مناقرات وتريٌقا..... وقلنا نهدي اللعب......احتمال الزوله دي تبقي وزيره بعدين..... ونستفيد منها في صفقه ما< 
>
كتبت الظلاميه {كما يحلو لها ان يدعوها سيدنا}
Quote:
والميس قرب........ ( والفتروا مرقوا يا شيخنا)
|
انت عارفه لعبه السكسك كنا بنلعبها في مدرسه بري المحس الابتدائيه والميس جنب المسرح في الصايد الغربي
كانت اللعبه بريئه بتعتمد علي صحه الاقران ونقاء الاجواء والصدق ما كان في حد بيغش ولا يسرق اللعبه......وما بنفتر الا لمن حصه الفطور تنتهي.....
اما يا شيخنا.......والله الحقيقه كان عندنا استاذ اسمو استاذ الشيخ وواحد اسمو استاذ الجمري هم البدقو الجرس.....تعرفيهم ؟.......oops.......سوررررررري تاني جبنا سيره البحر
ما علينا الاترشف اترشف ...ماداير اقول ليك المات مات تفهميها حاجه تانيه ليها علاق بالانتخابات
ونبداء صفحه جديده وعهد جديد وجبهه جديده في عصر ال دي مو ديمقراطيه .....والرئاسه القادمه بي لعبه سكسك اصبحت فقط مع الصينيين.
قلت ليك شاميك قبل باسورد بكري؟ متين.....اوكي انا اسف سعاده الوزير<
الصينيين؟؟؟؟.....دقيقه.
>
======
اهاااااا.....لانهم بتشابهو ما بتعرف البتقبطو دا ياهو الاعب معاك ولا السكيتو ولا التاني<
غايتو>
Quote:
فليكن شعارنا الذي نصوت له (الشجرة) |
الشجره دي 
ولا دي
ونواصل
اما بقيه المتداخلين فلكم التحيه لحدي ما نرد عليكم.....................اخخخ تتريقو علي انا يا سيدنا؟
وحات سيدي المهدي ما بخليكم.........تشوفو ضحك تحسبو لعب<
|
Post: #9
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: محمد أبوالعزائم أبوالريش
Date: 04-09-2010, 04:21 PM
Parent: #8
Quote: لأني متابعو في كتير من البوستات .. زول كتاب وعقلاني وكل كلمة عندو ليها ميزان ..
عكس كتابتو معاك هنا .!! |
الشئ الذي يدعو للبحث عن السبب
|
Post: #10
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: mayada kamal
Date: 04-09-2010, 04:31 PM
Parent: #9
الاخ ابو الريش
Quote:
الشئ الذي يدعو للبحث عن السبب |
قول إنت بقى (على قول عادل إمام في المسرحية)!!!!!!
|
Post: #11
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: Abd Alla Elhabib
Date: 04-09-2010, 05:31 PM
Parent: #10
أيها الشـرفاء علي إمتداد سـوداننا الحـبيب وخارجـه
قاطعـوا إنتخابات التزويـر .. معا ضـد المجـرم البشـير
لا للمجـرمـين ..
لا للقتـلة ..
لا للسارقين
لا للكيزان
المـجد لشعب السـودان ..
|
Post: #12
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: بشرى محمد حامد الفكي
Date: 04-09-2010, 05:43 PM
Parent: #11
دايرين بي صوتنا شنو
عوسوا عواستكم لمان قلبتوها شاورتونا
صحي يا كولا كيف زول
مسلم بالغ
حر
تقبل شهادتو في المحكمة يقول أنا كوز
شيئ غرييييب
|
Post: #13
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: السيد المسلمي
Date: 04-09-2010, 06:53 PM
Parent: #12
Quote: .....................اخخخ تتريقو علي انا يا سيدنا؟
وحات سيدي المهدي ما بخليكم.........تشوفو ضحك تحسبو لعب<
[/QUOTE] والله يامحمد زكريا الظلامية دي براها حورت كلامي ودخلتو في قالب تاني !
وجيت سعادتك وأعتبرت القصة تريقة
ــــ
عليك سيدي المهدي كان تسوي لينا شي ..
وبعدين ياخ .. شايفك جمعتني معاها !!
إت مابتفرز الأجواد من سيد المشكلة ؟؟!
أفرز ..أفرز ياحبيب
|
Post: #14
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: محمد زكريا
Date: 04-09-2010, 06:58 PM
Parent: #12
Quote:
اذا سياتك قاصد المانشيت التاني من فوق في صحيفة التيار
فاقول لك نعم زادت رحلات السفر الداخلية والخارجية
بس دا ليس كمؤشر سالب |
لا وحياتك ياستي قاصد المانشيت اللي بالاحمر العريض وفووووووووق......الزوغه ما عندكم
ما مشكله نركز علي القلتيهو......ما مؤشر سلبي انو الناس برضو خلت انتخابات الخرطوم الميته وقالت احسن تشوف اهاليها ؟
الناس خايفه من تهديداتكم الرعناء وخلوها ليكم تتدردقو فيها براكم
Quote:
*** تخريمة
شكرا على الاسلوب الحسن اللي تداخلت بيه
ما ملاحظ انه مداخلتك ما زي مداخلاتك السابقة اللي بتسم البدن |
والله يا ميدو انتي زي اختي الصغيره بتغيظني شديييييييييد لكن عارف انها طيبه وعلي نياتها......اتسمم انا قبل اسممها
ياخ والله تقلبي اي حاجه وتنسي قصه كوزه دي نرشحك للرئاسه طوالي.....اصل انتي ما بتشبهي الكيزان ديل....لكنها الصدفه
=====
الكلام الاخير ده ممكن تعتبريه كلام جداد ساي لكن جد
=====
اما الاخ السيد ود المسلمي....اول حاجه والله انا قاعد الخبط بيناتكم......انتو كلكم اخوان مسلمي+ ن؟ههه 
Quote:
وفي الحقيقة أنا كنت مستغرب من مداخلات الأخ محمد زكريا في بوستاتك !!
لأني متابعو في كتير من البوستات .. زول كتاب وعقلاني وكل كلمة عندو ليها ميزان ..
عكس كتابتو معاك هنا .!! |
ياخ اهم حاجه اننا نختلف ولكن لا نشخصن الاشاء....غايتو دي اتعلمتها من الخواجيه الكنت معرسها
| Quote: الزول الاسمه محمد زكريا |
هسه يا ودالمسلمي ياخوي.... زول الوكت كلو يقول ليك المدعو والاسمو والشنو ماعارف.....دي ما بتستفز؟.......هسع .العندو طولة بال منو فينا 
التحيه ليك برضو واشكرك علي الكلام الطيب في حقي...العقل والميزان...wow.>>>والله دي شهاده كبيره
واخيراً
=====
Quote:
حقيقة يا سيد المسلمي
انا لا متابعاه ولا قريت
وبصراحة انا لا افهم في ال شعر والفن
|
بطٌلي مكابره.......بعدين مش الكوز ما بكضب....اهاعليك الله ما قريتي لي ولا سطرايه قبل كده؟...والله دي حقاره عديييييل كده
وانا ال ما.... الا اشوف اسمك علي بوست .....واجي تولٌوبوت.....كلامك صح قبال ما اخد باسورد......لكن الحمدلله يا بكري البتجيب جنس اشكالنا دي
ياعملات بابكر حنين {اتفشفش اتفشفش...ده محل الفشفيش}
تحياتي واحترامي
|
Post: #15
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: mayada kamal
Date: 04-09-2010, 08:40 PM
Parent: #14
Quote: ما مشكله نركز علي القلتيهو......ما مؤشر سلبي انو الناس برضو خلت انتخابات الخرطوم الميته وقالت احسن تشوف اهاليها ؟
الناس خايفه من تهديداتكم الرعناء وخلوها ليكم تتدردقو فيها براكم |
وليه ما تكون انو الناس حسبتها منها اجازة يقضوها مع اهلهم ومنها تصويت وكدا
خاصة وانو حتى لو الزول سجل في الخرطوم ممكن يصوت في اي ولاية
يعني التصويت ما زي التسجيل الزامي انو الزول يسجل في محل اقامته
وبعدين الناس مفتحة
زي تقول حفظت الحكومة دي حفظ
يعني بالرغم من اعلان المفوضية انو مافي اي اجازة
الان تسري اشاعة قوية انو حتعلن اجازة من بكرة السبت الساعة 10 بليل
وكمان حظر تجوال من الساعة عشرة منعا للتفلتات
| Quote: ياخ والله تقلبي اي حاجه وتنسي قصه كوزه دي نرشحك للرئاسه طوالي..... |
حكاية كوزة دي ما بيدي
من كترة اللبعي والنضمي الكتيييييييييييرة هنا في البورد كوزة كوزة
انا زاتي لقيت نفسي كوزة..
وبعدين داير ترشحني رئيس جمهورية مرة وااااااااحدة كدا
لالا كفاية علي وظيفتي دي(الحمد لله نعمة كبيرة)
وطبعا ما حقولها وين ... اسع يجوا يشبكوني كوزة كوزة
| Quote: اما الاخ السيد ود المسلمي....اول حاجه والله انا قاعد الخبط بيناتكم......انتو كلكم اخوان مسلمي+ ن؟ههه |
هووووووووووووووووووووووووووي يا مححمد
قوووووووول ما شاء الله
ربنا يحفظهم ويغطي عليهم من العين والحسد
ويا اولاد المسلمي اتحصنوا واتبخروا
| Quote: غايتو دي اتعلمتها من الخواجيه الكنت معرسها |
يا عمك
كنت دي شنو
متين بقت فعل ماضي
مووووش انت القريبات دي هنوك بالزواج في المنبر هنا
واتخيل لي جيت السودان كمان وكايس على بورداب تلاقيهم ( شوفت شيل الحال دا كيف)
Quote: بطٌلي مكابره.......بعدين مش الكوز ما بكضب....اهاعليك الله ما قريتي لي ولا سطرايه قبل كده؟...والله دي حقاره عديييييل كده
|
الله يسالني ... ولا كلمة ... خلي اكمل سطر
انا قلتها قبل كدا
حاجين ما بفهم فيها
الشعر والادب والغناء
ديل لا بفهم فيها ولا بتذوقهم
يعني اقرا ليها شنو بعد دا طيب
|
Post: #16
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: محمد زكريا
Date: 04-09-2010, 09:05 PM
Parent: #15
ترويق المنقه ما عندكم......والله ياهو بس الهدوء الذي يسبق العاصفه.....الانتخابات
Quote:
يا عمك
كنت دي شنو
متين بقت فعل ماضي
مووووش انت القريبات دي هنوك بالزواج في المنبر هنا
واتخيل لي جيت السودان كمان وكايس على بورداب تلاقيهم
|
بالمناسبه نحكي ليك قصه عصام
عصام بتبوبر خطب بنت متطنقعه وشايفه نفسها... .عصام الشفت غشاها قال ليها انه دكتور...لكن هو موظف في مكتب البوسته.....والمكنه شالت
اها ...يوم خطيبتو جات بالصدفه ترسل جوابات لقتو بيختم في الجوابات ساي.....اتخلعت واتصدمت... سجمي يا عصام بتعمل شنو هنا.....ما قلت دكتور؟
عاين ليها ...اخخخخ......وواصل في ختم الجوابات وقال ليها.....ما نقلونا ياخ 
اها انا وعرسي للخواجيه....ما طلقونا ياخ ( شوفت شيل الحال دا كيف) ..... قبل الحنه تمرق ايدي اتكسرت...هههه
====
ندور الهواء بكره
|
Post: #17
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: Kabar
Date: 04-09-2010, 09:21 PM
Parent: #16
الصديقة ميادة.. حبابك
معقولة المؤتمر الوطني محتاج اصوات الغلابة؟..ياخي ده ما فايز من غير اصوات..!
شوف عيني بنات الحور يتسابقن و كل واحدة فيهن شايلة قدح مليان اصوات و يتزاحن لسقيا المؤتمر الوطني اصواتا زلال..
المهم نو اوفنيس ..و نهديك الوصلة التالية.. و نتوقع اشتراكك معنا في تذوق كوميديا الفنان عادل اٍمام.ز ربنا يتمعه بالصحة و العافية..
http://www.youtube.com/watch?v=Pp8IrdX80Ok&feature=related
كبر
|
Post: #18
Title: Re: ( يـلا نصوت للوطــــني) ( يـــلا ما نضيع زمن) (شـــعار الوطـــــني نرفعه للوطـــــن)
Author: Hadeer Alzain
Date: 04-09-2010, 10:51 PM
Parent: #17
| Quote: والميس قرب ........ |
يا ميادة إزيك وعاملة كيف؟
غايتو يا ميدو نشفتي ريقنا بمؤتمرك الوطني دا لمن قولنا الروب! 
أها من هسه ... 
مبروك ليكم مقدمآ
إنتي بالمناسبة فدوى الشريف وين؟!!!
خلت الكيزان ولا شنو؟!! .. لووول
قولي ليها غيابك طال .. أظهري بالله!
تحايا ومودة لكما
|
|
|