آخر نكتة إنتخابية

لا أعتقد أن قرار المقاطعة سيمنعنا من المشاركة في الإنتخابات ولو بنكتة ... النكتة جاءتني علي الهاتف وهي متداولة وسط قطاع كبير من المواطنين ..

مسطول سألوه في رايك منو الحايفوز بمنصب الرئيس
قال ليهم حسب الإعلانات الإذاعية والتلفزيونية والصور واللافتات في الشوارع يا شامبيون يا عمر البشير

أعمى مشى محل الأقتراع
ادوهو الورقة قال ليهم الشجره وينا
قام غطى الشجره بيدو وقال لناس اللجنه يلا اشرو اي رمز

عوض الكريم أنا شخصياً حا أصوت للشامبيون ...

زهير الزناتى ..

تحيـــاتى ..

Quote: مسطول سألوه في رايك منو الحايفوز بمنصب الرئيس قال ليهم حسب الإعلانات الإذاعية والتلفزيونية والصور واللافتات في الشوارع يا شامبيون يا عمر البشير

ههههههه..!!

هذه النكتة تؤكد ما يجده ويستفيد منه المؤتمر الوطنى من وسائل الإعلام الرسمية

وتوجيهه فى صالحه !!

كل الود
محمد كابيلا

كابيلا سلامات ... النكتة سلاح يستخدم في الحرب والسلم والإنتخابات ... النكتة الشعبية تعبر عن الناس والمجتمع في مواجهة الساسة وصلفهم ... هنالك نكات تنجر في أقبية الأمن والإستختبارات ومكاتب الحرب النفسية واعتقد أن النكتة الأخري المتداولة أيضاً في الخرطوم قد تكون وراءها جهة ما وهي تقول :
واحد وصف وضع المرشحين لرئاسة الجمهورية قال :
الصدق المهدي حرق بدري
مبارك الفاضل ما عندو أمل نزول
كامل إدريس معرج
نقد ورقو ناقص
حاتم السر ورقو زايد
عبد اللد دينق قافل علي كرت ميت
ياسر عرمان ورقو كعب ولاعب علي دكها
البشير فاتح وراجي الخمسين ...

مر سكران أمام مقر المؤتمر الوطني الخرطوم
وهو يترنح ، تصدي له الحرس ليقودوه لبسط الأمن الشامل القريب ، فما كان من السكران إلا والهتاف بصوت عالي :
سير سير يا بشير
يسقط يسقط أوكامبو
الرد الرد كباري وسـد
طلع واحد من مبني المؤتمر الوطني وبعد أن عرف الحاصل
أمر العساكر بإطلاق سراح الرجل الوطني ،
ومنحه مبلغ مليون
إلتفت السكران لأقرب تاكسي ، وركب في المقعد الخلفي .
سائق التاكسي : علي وين يا أخونا . السكران : المؤتمر الوطني بحري

Quote: مسطول سألوه في رايك منو الحايفوز بمنصب الرئيس قال ليهم حسب الإعلانات الإذاعية والتلفزيونية والصور واللافتات في الشوارع يا شامبيون يا عمر البشير

هههههههه
وحلوة يا الزناتي
وشامبيون wayeeeeeeeee

Quote: أعمى مشى محل الأقتراع

اعمى مشى محل الإقتراع.
الموظف قال ليه:
شغال شنو ياحاج?
الأعمى: شغال ساعاتى.

Quote: اعمى مشى محل الإقتراع. الموظف قال ليه: شغال شنو ياحاج? الأعمى: شغال ساعاتى.

دى ما حصلت نهائى
الله ياخى ضحكت لمن بكيت
قوية
بتجيبوها من وين البتاعة دى ؟

Quote: وشامبيون wayeeeeeeeee

مستشار أمريكا سأل ناس المفوضية: جاهزين ياجماعة؟
قالوا ليه: كل شيء جاهز يا معلم .. حتى النتائج ..

Quote: مستشار أمريكا سأل ناس المفوضية: جاهزين ياجماعة؟ قالوا ليه: كل شيء جاهز يا معلم .. حتى النتائج ..

?Gration: Is everything ready for the coming elections
Bashir: Everything, Even the results
(afronline.org)

فى إستفتاء واحد خت صوتو فى صندوق (لا)
بعد خرج لحقوه ناس الامن، وبداوا استجوابو وليه قال لا للرئيس؟ الزول خاف وسألهم:
هو فى صندوق (لا) كمان، كيف تختو صندوق زى دا جنب صندوق الرئيس؟ أى صندوق جوة
الخيمة دى مفروض يكون نعم.. قالولو طيب، ارجع للجنة قول ليهم إنك غلطت وداير تصحح
الخطا.. مشى قال للجنة يا اخوانا والله انا ما قايل فى صندوق (لا) وهسى داير أصحح
الخطأ دا.. قالولو ياخ أمشى مافى مشكلة، الأخطاء دى كلها تصحح بعدين.

Quote: الصدق المهدي حرق بدري مبارك الفاضل ما عندو أمل نزول كامل إدريس معرج نقد ورقو ناقص حاتم السر ورقو زايد عبد اللد دينق قافل علي كرت ميت ياسر عرمان ورقو كعب ولاعب علي دكها البشير فاتح وراجي الخمسين ...

سلام يا زناتي

الغريبة انا وصلتني كده


الصدق المهدي حرق بدري
مبارك الفاضل ما عندو أمل نزول
كامل إدريس معرج
نقد ورقو ناقص
حاتم السر ورقو زايد
عبد اللد دينق قافل علي كرت ميت
ياسر عرمان عنده تلاته دبل و اقترح الدك
البشير وزع و سرق الجوكرين...

Quote: مسطول سألوه في رايك منو الحايفوز بمنصب الرئيس قال ليهم حسب الإعلانات الإذاعية والتلفزيونية والصور واللافتات في الشوارع يا شامبيون يا عمر البشير

انا غايتو يا زوز ...

بأرشح ....خلف الله ...!!!

واحد مسطول سألوهو حا تصوت لمنو
قال ليهم للرئاسة شامبيون
للولاية فينو


وده طبعاً حسب حجم الإعلانات التي تملأ شوارع الخرطوم

تحياتي زهير...
سمعتا قصة المرشح كرمه الله...
استقبلت نساء القضارف وعود مرشح المؤتمر الوطنى للولاية كرم الله عباس الشيخ امس بتوفير عريس لاى عانس بالغبطة والفرح البالغين.
وامام حشد من مناصريه غلب عليهم العنصر النسائى عرض جملة من المغريات مستهدفا العوانس ابرزها مطالبه الرجال خاصة منتسبى المؤتمر الوطنى بالتعدد فى الزوجات واتباع قاعدة (زوجة واحدة لاتكفى) دونه الخوض فى الآلية التى ستمكنه من انفاذ مطالبته حال فوزه..
وقال مرشح المؤتمر الوطنى لمقعد والى القضارف انه (سيغلق ملف العنوسة فى السودان)
اذا تعامل معه الرجال( بقلب جامد) دون خوف او وجل مؤكدا انه شخصيا سلك طريق التعدد بزيجة ثانية ولاسبيل للتراجع عن هذا المذهب داعيا قواعده لاتباعه فى منهجه لتقليل نسبة العنوسة وسط الفتيات وردد كرم الله بصوت عالى امام مناصريه (من يوم الليلة ماعايزين بايركس) واضاف:يجب ان ترضخ الامهات والفتيات لفكرة التعدد فى الزوجات ,متسائلا مالو كان من الافضل ان تقترن الفتاة بـ(راجل مرة او تصبح بايرة)وفيما اطلقت العذارى الزغاريد تعبيرا عن اعجابهن بحديث كرم الله ,لم يتبين الحضور همهمة المتزوجات اللائى قد يفقدن (ليلة)او ليلتين من نصيبهن فى صحبة ازواجهن لوفاز كرم الله بالمنصب

: حكايات :




رد الفاتح جبرة عابر سبيل على مرشح المؤتمر الوطني للزواج والتزويج



كنت أعتقد قبل قراءتى لهذا الخبر الذى أوردته الصحف نقلاً عن ذلك اللقاء الجماهيرى أن مسألة العنوسة وتأخر سن الزواج مسألة شائكة ومعقدة تسهم فى وجودها عدة عوامل متشابكة ولكن يبدو أننى أعانى من سذاجة فى التفكير وضحالة فى (التحليل) فكيف يغيب عن ذهنى هذا (الحل السحرى) لهذه المشكلة العويصة التى لا يكلف (إغلاق ملفها نهائياً) فى طول البلد وعرضها سوى (التدبيل) ! وكما أن رحلة المليون ميل تبدأ بخطوة واحدة كما قال (كونفوشيوس) فإن حل مشكلة (كم مليون عانس) تبدأ بزواج (متزوج) لعانس واحدة! وكووولها (كم شهر كده) ونلاقى بناتنا كووولهن متزوجات من (رجال نسوان) وأولادنا كووولهم (صايمين) لأن فى الصوم لهم (وجاء)!
مشكلة من يتصدون لحل (مشاكلنا) أنهم أبعد (الناس) عنها وإن أردت عزيزى القارئ التأكد من صحة هذه المقولة فما عليك إلا بالتمعن فى شاكلة مثل هذا الحل (العبقرى) لواحدة من (أعقد) المشكلات التى تواجه مجتمعنا ، فبدلاً من أن ينادى (أخونا كرم الله) بتوفير فرص عمل للشباب وتأهيلهم لسوق العمل الحر، وإكسابهم المهارات اللازمة، وتحسين (الحالة الإقتصادية) ينادى (أخونا كرم الله) أقرانه وزملاءه (فى الحزب) بأن (يدبلو) أو (يتلتو) أو (يربعو)!! وبهذا يتم أغلاق ملف العنوسة فى السودان ويمكن بعد ذلك أن نقوم بنقل هذه التجربة الرائدة فى القضاء على العنوسة لبقية أقطار العالم!
لا شك بأن مسألة (مثنى وثلاث ورباع) قد تسهم فى تقليل نسبة العنوسة (النسائية) إلى حد ما ولكن ماذا عن (عنوسة الرجال) ! هذا الشق من المسألة لم يتطرق له (الحل السحرى) ولا أستطيع تخيل (مجرد تخيل) مجتمع شيوخه يتمتعون بأربع من النساء بينما شبابه يقف (مشاهداً)

راجين نكات الفرز والنتيجة