مـيـزان الغربــة.. (توجد مصاااايب).

لو فاكر سعادتك في الدراهم..
تبقي جاهلاً ماكَ فاهم ..
دنيا كضابه وسراب
تبقي واهماً كب مويتوعشان سراب
جيب ميزانك وأعدل الكفه ..
نوزن حالتك بدري ..
قبل الغربه وحالتك هسه ..
خت الهم . الغم . وطعم الدم
في كفه ..
شعرك شاب .. وراسك لفّ
يالكنت تساب .. ريقك جفّ
جيته شباب .. ورايق دمك
شفت الويل .. وقلبك خفّ
سارح دايماً ويومي حساب
يومي درادر وحرق أعصاب
زي غرقاناً كايس الضفه ..
كم شغلانةً ..
كنت بتضحك في الشغاله
كانت عيب للبقرب لها والبِدناله
جيته وشفت مرارة الحاله ..
مره تقشقش .. مره تكنِّس
وترمي زباله
وغصباً عنك يوت شغاله ..
في الصبحية راجلاً عاتي ..
وفي العصريه تبقي وليِّه ..
وانت الخاتي
مافي الجابرك ..
غير الوهم الحلم الشاتي
جيته وشفت قساوة الحاله ..
ضوق الهانة وانت غريباً تبقي عماله
زيك وزيو كم متبهدل زيو..
بالأبرول وبالبرمودا
وربك يستر من النجلي
هادي الغربه ما بتعزك ما بتخلي
أعدل الكفه عشان تستوفي
وما تتوفي
سارح ديمه ..
وحالتك ماشه بالتقسيمة
وانت محير بين الداله وبين الشيمة
هادي الغربة والله جريمة
وينو حصادك من ها الغربة؟
وشن سويت؟
ركبت الرنج ؟
والله فرشت البيت بالموكيت؟
ياكا (مُحُمَد) ..نفس الحال مافي جديد
ومافي مسافةً بينك والتربال
شن سويت ؟ أوعاك تقولي سترت الحال ؟
الساتر الله هو الرازقنا وهو المولي ..
يوت شغال والحال بطال ..
مالطياني ماكل وشارب ..
دوّر طوفو راجي القسمة ..
سوا الهولو وكرب البسمة ..
واقف طولو وراجي الخالق ..
وحبل العيشه فوق القارب ..
زي النسمة طفّا سجارتو وبرم الشارب ..
زيك عايش بالمقسومة ماكل وشارب ..
أعدل الكفه وانت الناجع شن سويت؟
إطوطحت مع الأيام ..
اتوجعت مع الالام ..
زيفه الغربة وما اتغتيت ..
خدمت شقيت..
تعبت حفيت ..
مرضت عييت ..
وقعت الليلة وما سميت ..
وقالوا رقادك في المستشفي ..
منو الفاضيلك انت يحرسك ؟
مالناس مشغوله ..
سارحة وجاريه وليك مي طاريه ..
والبطراك بس تلفون ..
كتر خيرك يا تلفون يامجنون ..
مافي قصادك غير الحيطه ..
والدكتور الزي الألفه ..
لوك الصبر وشمر ضرسك ..
أدفع ..
وادفع ..
درهم ..
درهم ..
ميه وألفه ..
وراح الداخرو رمشة عين ..
الناس راجنك للمصروف ..
وعاد من وين؟
إلا الحسبة تزيد سنتين..
غربه جديدة يا مسكين..
مابعذروك كان شغال دايما جيب ..
وكان متوقف برضك جيب..
كان حمال جيب جيب ..
كان متوظف جيب جيب..
ويفضي الجيب واة ياجيب ..
دايماً فاضي وكاشف العيب ..
هم فاكرنك انت في جنه..
دوحه وريفه عز وسماحه..
روضه ضليله وافخم واحه ..
زول مرتاح وكاره الراحة..
في التكييف قايم ونايم ..
ماك زي حالن كلو سمايم..
أكلك جاهز في التلاجة جداد وحمايم ..
ساكن الفيلا وهن الحله..
دايما فوق ويوت تتعلا وما بتدلا..
وياعبد الله الساتر الله ..
من الغربة ومن الذلة ..
ياحليلك وانت بتتعب ..
آخ يا حليلك ..
وانت بتشقي اتهدم حيلك ..
ما بتتذكر زمن الوجبه ..
مره بتاكل زي الصايم..
رغم العرق السايل منك ..
جوه ديونك كاسح وعايم ..
آخ يا غربه وآخ يانكبه..
هادي الكفه عليها كتير..
وما بعلمبو إلا الدايم ..
غربة هم نار وسمايم..
كم فرحاناً جاها الغربة ..
ما باقامة ساكت زاير ..
كايس الراحة القرش الناير..
كايس العنب الخبز الداير..
قايل الحالة تين وعصاير ..
باكر يكبر ويبني عماير..
ويلفي بنيةً جيد ومساير ..
لفّ ودور لي شغلانةً تستر حالو..
يلقي نصيبو المال الجالو..
أصبح رايح ساهي وسارح ..
لمّ رويحتو وقبل عاير ..
قرشاً طاير فيها الغربة..
تمنو الهم الدم الفاير..
السواق مربوط في طارتو..
ديمة يلاوح مما تصبح لامن تمسي ..
يشكي القعدة ودمو القطّ ..
الجمر التحتو مولع ..
ماشي وصابر وكم يتوطا ..
وهاك يا نقطة وهاك ياشرطه..
انت مخالف وكيف تتخطي ..
باهي وسارح وعامل أُسطي ..
وين تأمينك وين ملكيتك جيب الرخصة..
لازم تدفع تمن الغلطة ..
كل الداخرو وراح في غلطة..
آة يا غلطه وآة يا ورطه..
وهاك يادين بس ألفين ياأهل الزين..
تعال بعدين وانت تساسق زي البطة..
بس عشمان ..
في البستر حالك للماهية..
ميه وميه وفي الديانه تروح ماهية وكم ماهيه..
وزيد الحسبه كمان سنتين ..
وعاد لمتين؟
ماقصرت ماكل المـُره ولايك الشطه..
لاك مبذر ولاك متبوبر..
ما اتمتعت وما اتظبطَ ..
حافض نفسك صاين قرشك وما فرّطَ ..
في أوكاتك ما بهدلت
ما اتشلهت ما مرمطَّ ..
يوت تعبان يوت شقيان..
وجد يا فلان ..
نص التعب الشفتو محطه محطه..
لو في بلدك في السودان..
كان ارتحت وكان ريحت ..
ناسك أهلك والجيران..
كان لملمت الشايلو الريح ..
العرق السال.
الحال المال.
العقل النط..
هاك نصيحة زولاً زيك ..
جاها الغربة وشاف اللقطة..
ألحق نفسك وقبل صاد..
عيش الواقع راضي وقانع ..
بالمقسوم ومافي مطامع..
رزقك رزقك ..
كان نايملو وكان حايملو وكان بتصارع ..
ما بتفوتو ليه تتبله وإت ماك شافع ؟
بين الغربة وبين اوطانك فرقاً ظاهر..
زي الفرق البين الملهي وبين الجامع..
زي الفرق البين الضلمة العتمة ..
وبين الفجر النور الساطع..
الغربه مذله الغربة درادر..
عارف وفاكر وبرضو تكابر ..
الفات من دارو بقل مقدارو..
ديمه مجهجه وزي الصايع..
سارح وضايع..
في الاوهام الحلم المايع..
كان يومين ياها الغربة..
وكان سنتين ياها الغربة..
وكان عشرين ياها الكربة..
وكان خمسين ياها الطين..
كان في مكتب ياها الغربة..
كان في مشفي ياها المنفي..
كان دكتور وكان ناطور ..
كان في فيلا وكان في (حور) ..
ياها الغربة..
العمر الواحد
كيف بتضيعو في البشتين.؟
لا صابحت الوالد الزين..
لا باركت العيد في الحين..
لا سكّت الشافع الدرفن..
لا قلّبت العيش الصفن..
ولا فتّشت الغنم الرفن ..
لا مارضت ولا سالمت لا كالمت..
ولا عزيتن في الميتين
حالك شين ..
وعاد لمتين؟



الإمارات
15 يونيو 2006م


-------------
هنا وهناك كلو الكوراك..
- ما أقسي الغربتين.

يا مستجير بنار الغربة
إذا مالوطن (رماضَه).

يا مستجير بنار الغربة

إذا مالوطن (رماضَه).

يا مستجير بنار الغربة

إذا مالوطن (رماضَه).