اليوم شم النسيم ووصلني الاتي من صديقتي سناء جعفر و يا جماعة .. كل شم نسيم وانتو طيبين

شم النسيم .. فسيخ نئ وبصل .. وبيض ملون ..
نتوقف قليلاً عن سرد حكايات الاجازة بسبب تدفق ذكريات هذا اليوم الذي كان في فترة من فترات حياتي اجمل الايام .. يوم شم النسيم ..
ذكريات رجعت بقوة ورجعتني معاها لفترة كان فيها الزمن زين .. والشعر مغطي الاضنين .. كنا فيها شعب بسيط بيتقن عزف الحان الفرح من ابسط الادوات ..
ما كنا معقدين .. ولا متعصبين .. ولا مشدودين .. ولا مخنوقين .. مع انو احوال البلد برضها ما كانت عال العال .. لكن الناس كانت بتعرف تفرز الكيمان ..
يعني في وقت للفرح .. ووقت للمظاهرات .. ووقت للمجاملات .. ووقت للعمل .. ووقت للهو ..
بحكم البيئة .. والجيرة الطيبة .. والحي المختلط الديانات .. اتعودنا على مناسبات اعياد المسيحيين .. كنا عارفينها زي ما عارفين اعيادنا .. وبنحتفل معاهم زي ما هم بحتفلوا معانا ..
قبل شم النسيم باسبوع كنت بستعد مع صحباتي المسيحيات لـ ( حد الخوص ) وحد هو اختصار لكلمة يوم الاحد .. والخوص هو سعف النخل .. نمشي نلم سعف النخل الاخضر النديان عشان يساعدنا في التشكيل ..
ونقعد ننسج ونعمل اشكال من خوص النخل الاخضر .. وكل زول يكون فخور بنسيجه الاحلى من حق التاني .. وتتعلق الاشكال المنسوجة جوة البيوت .. في الحيط وعلى الابواب .. وتقعد هناك لمن تنشف ..
معلومة :
يشار إلى أن عيد (حد الزعف) أو (أحد الشعانين) يمثل ذكرى دخول السيد المسيح إلى القدس راكبا على حمار، ويستحب الأقباط فيه عمل مسيرة للأطفال لتمثيل مشهد دخول القدس ويحمل الجميع جريد النخل والسعف وأغصان الزيتون للتعبير عن فرحتهم بدخول المسيح إلى مدينة القدس. -المصدر ويكيبديا
بعدها بنحتفل معاهم بعيد سبت النور وعنده اسامي تانية ( عيد القيامة ) اي قيامة المسيح .. و ( عيد الفصح ) أو الايستر عند الاقباط الغربيين ..
غالبية الفترة دي جيراننا بكونوا صايمين .. وعندهم نوعين من الصيام .. صيام الروح .. ودة بكونوا بياكلو ويشربو عادي بس حاجات خالية من الروح .. يعني لا لحوم بيضاء او حمراء ولا أي مشتق منها زي الالبان والاجبان ..و بيركزوا على البقوليات بكل انواعا ..
الصيام التاني ( طي ) ودة زي صيام المسلمين من الصباح لغاية المغرب .. مع الامتناع عن أي شئ فيه روح برضو حتى بعد الفطور .. كنا بناكل معاهم الطعمية والفول والبصارة ( ما تسالوني من مكوناتا ) بتذكر انها حاجة مجوبكة فيها عدس وملوخية مع بعض وفي وشها بصل محمر ( وما كنت بحبها ) ..
بعد داك بنبدأ نجهز كلنا مسلمين ومسيحيين لشم النسيم .. وتبدا جولات الاستكشاف لاحسن صانعي الفسيخ في نمرة تلاتة ..
الفسيخ لازم يكون بمواصفات خاصة جداً من حيث اللون والحجم ودرجة النجاض .. لازم يكون كبير وراسه احمر وريحته مميزة .. ونجيض شديد ..
اهم شئ النجاض دة لاننا كنا بناكل الفسيخ نئ .. نخت فيه كمية من الشطة والليمون والبصل و ( نادراً ) طماطم .. واحلى اكلة في الدنيا ..
من بالليل نسلق البيض ... ونستنى لمن يبرد .. ونجيب الالوان ونقعد .. وبمزاج طفولي يعشق الشخبطة ... تبدأ مسابقة تحويل قشر البيض الابيض للوحة فيها اكبر كم من الالوان الزاهية ..
بنلون باخلاص كانه القشر دة ما حيترمي بكرة في الزبالة .. لمن يجي المغرب بنكون خلصنا تلوين تلال من البيض ... وبعدها نقعد نتفرج على عمايل ايدينا بفرح وفخر تقولش دافنشي بعد لوحة العشاء الاخير ..
ليلة شم النسيم بننوم بدري استعداداً لقومة الفجر .. وقبل الاذان بتكون الحلة كلها صحت .. العربات طلعت من البيوت .. الانوار ولعت .. والرجلين دبت في الشارع ...
حفاظات موية .. صناديق بيبسي .. شوالات عيش .. حلل وباقات وصحون وكبابي وملاعق وسرامس شاي .. كل زول بكون عارف ماشي وين ..
ناس بتمشي الري المصري في الشجرة .. ناس بتمشي الغابة .. ناس بتمشي جبل اولياء .. كنت من عشاق الري المصري والمكان الاليف والصنادل القديمة المهجورة ..
ومن بعده جبل اولياء والاستراحة الفوق الجبل والخزان .. ما بحب الغابة لانها زحمة وحر وما فيها طريقة لعب ولا سباحة ..
قبل الشروق كنا بنكون في الموقع المختار .. فرشنا الكليم ورصينا الحاجات .. وتبدا النقة بين الاذواق المختلفة ..
انا ما داير الفسيخ نئ خالص .. طشوهو لي بحبة زيت حار .. وطبعا معانا بابور الجاز ابو شرايط لزوم الحاجات الطارئة ..
انا عاوز نئ بدون زيت بس بالطماطم والبصل والليمون .. انا عاوزة طعمية بسلطة اسود .. وين البيض ؟؟ .. جيبوا البيبسي .. لا انا عاوز شاي بالنعناع عشان بهضم كويس ..
ويمشي اليوم ما بين ونسة ولعب وجري ونومة صغيرة بين الضل والشمس .. القعدة بتضم مسيحيين ومسلمين كبار وصغار وحتى اطفال رضع .. كانت الونسة ساهلة وماهلة وطاعمة وشيقة ..
كنا بنحس بفرحة المناسبة برغم انها ما حقتنا .. بنشارك فيها باخلاص ورغبة حقيقية في المشاركة .. بننبسط بيها وفيها .. بنضوق طعمها ..
بالصدفة عرفت انو الليلة الاتنين الموافق 5 ابريل هو عيد شم النسيم .. هنا لو قلت لزول الليلة شم النسيم بعاين ليك باستغراب
شنو يعني شم النسيم ؟؟ وبتكون مجبر تشرح حاجات كتيرة في الاغلب الاعم القدامك ما حيفهما ولا حيحس بيها .. تقوم تسكت .. وتسرح ..
وتجتر ذكريات زمن مضى .. ولن يعود ابداً ...
يا جماعة .. كل شم نسيم وانتو طيبين ..
ولاصحابي وجيراني ورفاق طفولتي وصباي .. كل عيد قيامة وانتو بخير ..
ووحشني الفسيخ النئ بالبصل .. والبيض المسلوق ..
وانتو كمان وحشتوني ..

صديقي ابوبكر ..

شكراً لاعادتي الى هنا بعد طول غياب ..

دي مناسبة عشان نفتح نفاج صغير على سودان زمان ..

لمن كان الزمن وهاج .. وكان الحنين دفاق ...

وكان لكل شئ طعم ولون وريحة ...

احكي لينا يا ابوبكر عن الزمن داك ..

ابدا لينا من حلفاقبل التهجير ..

ومر بكل المدن العشت فيها ..

احكي لينا عن احوال البلاد والعباد ..

واكيد في جرابك في كتير ..

تحيات طيبات زاكيات ...

يا ملونين البيض في شم النسيـــــم ...
لون الحنين و الشوق و خمر النديم....
ما تعرفوش سايق عليكو النبــــــي ....
تلونوا الأيام بلون النعيــــــــــــــم !!!؟

عجبي !

صلاح جاهين

تهانينا الحارة وكل شم نسيم وانت وسناء وممكونة وجميع الاخوة والاخوات بالف خير