Post: #1
Title: موسيقي الوطن .. حباب
Author: فاروق أبوحوه
Date: 04-04-2010, 05:48 PM
يا واعِد إبليس بالنعيم
قولك سراب
يا واجع القلب الحليم
حلمك خراب
راكوبة العز القديم
ساترانه ما دايراله باب
يبقاله ضروه من الشتا
لامانا لي آخر العقاب
يا واعد إبليس بالجنان
تاوِق علي الروح
المشحتفه بالعذاب
تلقاها قاربت المروق
من جِتّة الوطن الشباب
تاوِق علي النيل والجروف
شِن تلقي غير نار المجوس
تقابة الوجع
الموهّط في النفوس
والصبر إن كان بِفِيد
لُكناها بالصبر الضروس
يا حالب الغيم المطر
يبرد حشانا الإغتراب
قولك سراب
حِلمك خراب
يا سارق اللحن الوتر
جيب الحروف ما حقتك
صعلوك ..قبيلتك وسبّتك
شقيش دروبك ودّتك
مركوب حنين حاريه وين؟
عولت تواريب مسرتك
تالا الحراز رطن المطر
سكن المطامير الغراب
حاربت في المطر الوطن
ضيعتو من غيمك إذاً
شريت دموع الليل سِحن
بعزقت عمرك في الفِتن
غيرت لونك والإهاب
ودرت طعم الأغنيات
فكيتو (وكايَـك) سُداً
عطشت حلق الأمسيات
دفقت مويتك للرِهاب
حاحيت زرازير الحبيب
ناحيت مواقف عهد عاد
نشفت ريقك بالوعود
فاكر حديثك هو العماد
لا طيرك الفرّ بيعود
لا عيشك إتموسق حصاد
لا مسرة أفراحك تجيب
شوق المسافرين البعاد
إياك يا جرف النشاف
رفة جناح الريح سماد
تقدح زفير النور صباح
في شوق عذابات الجراح
ويفرح عصيفير القليب
بالعافيه لي لحضن التراب
يا واعِد إبليس بالأمان
شيطانك المطرود ضحي
قال الخلاص ما في الرجِم
يا توبك المرقوع نضِم
عشمان وبالك متوهِم
بي جنه في الخاطر حِلم؟
خليك من قولاً طشاش
تكية رقادك آآآ بتجِم
شِن جِبت غير إيداً خلا
راجِع أباطك والنجِم
فرسك جمح بيك وسرح
يا كبوه في حُفَر الرِحِم
ودرت مفتاح الصهيل
في الزحمه ضيعتَ اللِجِم
يا واجع القلب الحليم
غيمة خلاصنا الما عبط
ضحوي المِطور الليك ربط
يبقي الخلاص
بتودي وين جرفك تدِس؟
جغرافيا ما بتعرف مناخ
غضب الرعود ما بِتحبِس
تلقانا فيك نملاك حِس
شيخاً من الجاييهُ شاخ
أنساهُ نومك لينا حِس
روّح نهيقك والشطط
باكر غنانا الإنضبط
إيقاعو في زمنك غلط
تينور وباص
يلقي الخلاص
تبقي السلالم نيل ونال
تملا العوالم حيل وفال
يبقي الأصيل .. تالانا سيل
تمتم .دليب .مردوم جميل
نوتة غنانا بتنسجِم
وعداً نبيل
لزمات خلاصك وفرحتك
مشتاقه لي حِس الخليل
مارقات من النيل والصحاب
غنوات تردد
مرحباب
مرحباب
م
ر
ح
ب
ا
ب.
نوفمبر 1997م
|
Post: #2
Title: Re: موسيقي الوطن .. حباب
Author: حبيب نورة
Date: 04-04-2010, 05:57 PM
Parent: #1
أبو حوة
عيييييييك يا أبو حباب
حلاة الدنيا عليها
|
Post: #3
Title: Re: موسيقي الوطن .. حباب
Author: فاروق أبوحوه
Date: 04-05-2010, 07:07 PM
Parent: #2
حبيبه
شفت الإيقاعات دي كيف محتدمة..
يا ريت تلم في (نياق) الدوزنه.
حبابك يا (المرِح) (بابك)
حلاة الشوق إليك
|
Post: #4
Title: Re: موسيقي الوطن .. حباب
Author: فاروق أبوحوه
Date: 04-06-2010, 02:46 PM
Parent: #3
.
|
Post: #5
Title: Re: موسيقي الوطن .. حباب
Author: فاروق أبوحوه
Date: 04-08-2010, 09:04 AM
Parent: #4
لزمات خلاصك وفرحتك
مشتاقه لي حِس الخليل
مارقات من النيل والصحاب
غنوات تردد
مرحباب
مرحباب
م
ر
ح
ب
ا
ب.
|
Post: #6
Title: Re: موسيقي الوطن .. حباب
Author: فاروق أبوحوه
Date: 05-06-2010, 11:10 AM
Parent: #5
.
|
|