Post: #1
Title: البلد دي ما فيها هلالاب ... يا خليل ؟
Author: tmbis
Date: 04-04-2010, 09:26 AM
Parent: #0
حالة من الحذر .. والترغب ، وبصيص من الأمل مخلوط بالاحباط ... مسجل على شاشة (راداري ) الشخصي المتعلق بمباراة اليوم .. هذه الحالة النفسية التي لا ترضى أبدا أن يتأخر الهلال عن الصفوف الأمامية.
بالرغم من محاولاتي المتكررة أن أخرج بعيدا عن حساسية الانتماء للأزرق وحمى ما قبل المباراة .. وفي الذاكرة كل ما أدخلنا فيه الهلال العظيم بنفس ابناءه ولاعبيه الذين نراهم الآن تحولوا إلى اشباح وظلال تتحرك داخل المستطيل الأخضر وتجرجر من خلفها كل أنواع الخيبة وترسل لنا إشارات الاحباط .. وخيبة الأمل الكبيرة في حب ادمناه من قبل لحظات الميلاد .. إلا وأني وجدتني محاصر بشعور فرحة تباغتني من حين لآخر .. واحباط يتسلل من خلفها.
واكاد أجزم أن شعوري قد سيطر على معظم الذين يشاركوني الإنتماء لهذا الحب الكبير .. لدرجة أن البعض في المنبر العام اصبح بعيدا عن حساسيات التنافس الأفريقي أو المحلي فقط في انتظار بصيص أمل يصنع مساء اليوم من داخل المقبرة .. ودقائق عصيبة فيها نكون أو لا نكون .. حتى وإن (كنا) فيها ليس لدينا الكافي من الضمانات التي توفر لنا رؤية واضحة تضمن لنا استمراريتنا أو عدمها في المسيرة الأفريقية ...
تأرجح المستوى العام للفريق من جهة .. واللعيبة من جهة لا يجعل كل متابع جيد للهلال أن يركن إلى حدثه في التكهن بأحقية الهلال بشكله الراهن الاستمرارية في ممارسة ما يسمى بكورة القدم .. ويستطيع جازما في نفس الوقت أن يتمنى للهلال التنحي جانبا حاليا من كل ما له شان بالمنافسات على مختلف اشكالها ..
|
Post: #2
Title: Re: البلد دي ما فيها هلالاب ... يا خليل ؟
Author: Yassir Tayfour
Date: 04-04-2010, 09:31 AM
Parent: #1
هلال؟
كادو درمان؟
ولا أم قلي؟
___
أنا منسحب، وإحتمال أرجع مع المرشحين للرئاسة..
|
Post: #9
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 10:10 AM
Parent: #2
| Quote: أنا منسحب، وإحتمال أرجع مع المرشحين للرئاسة.. |
.. الهلال يا ياسر ما كان محتاج لي هلال كادوقلي .. من بداية الدوري شكل الهلال كان واضح جدا .. دا ما هلالنا البنعرفو ..
..
منسحب ؟؟
خايف من الاكتساااح واللا شنـو..؟
|
Post: #3
Title: Re: البلد دي ما فيها هلالاب ... يا خليل ؟
Author: بابكر التوم
Date: 04-04-2010, 09:32 AM
Parent: #1
Quote: بالرغم من محاولاتي المتكررة أن أخرج بعيدا عن حساسية الانتماء للأزرق وحمى ما قبل المباراة .. وفي الذاكرة كل ما أدخلنا فيه الهلال العظيم بنفس ابناءه ولاعبيه الذين نراهم الآن تحولوا إلى اشباح وظلال تتحرك داخل المستطيل الأخضر وتجرجر من خلفها كل أنواع الخيبة وترسل لنا إشارات الاحباط .. وخيبة الأمل الكبيرة في حب ادمناه من قبل لحظات الميلاد .. إلا وأني وجدتني محاصر بشعور فرحة تباغتني من حين لآخر .. واحباط يتسلل من خلفها.
واكاد أجزم أن شعوري قد سيطر على معظم الذين يشاركوني الإنتماء لهذا الحب الكبير .. لدرجة أن البعض في المنبر العام اصبح بعيدا عن حساسيات التنافس الأفريقي أو المحلي فقط في انتظار بصيص أمل يصنع مساء اليوم من داخل المقبرة .. ودقائق عصيبة فيها نكون أو لا نكون .. حتى وإن (كنا) فيها ليس لدينا الكافي من الضمانات التي توفر لنا رؤية واضحة تضمن لنا استمراريتنا أو عدمها في المسيرة الأفريقية ... |
قراءة حقيقية لما يدور بالغالبية من عشاق الازرق ...
فى الصميم اتمنى كما تتمنى انت بداخلك بالفوز لانة مهم فى هذة الفترة ...
حتى يلم الشمل من رجالات الهلال
|
Post: #4
Title: Re: البلد دي ما فيها هلالاب ... يا خليل ؟
Author: ديامي
Date: 04-04-2010, 09:36 AM
Parent: #3
الانتصار مهم جدا اليوم
|
Post: #5
Title: Re: البلد دي ما فيها هلالاب ... يا خليل ؟
Author: عثمان الخير
Date: 04-04-2010, 09:40 AM
Parent: #4
الله يستر اليوم
يوجد قلق
|
Post: #14
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 10:34 AM
Parent: #5
Quote: الله يستر اليوم
يوجد قلق |
.. القلق قايم يا عثمان .. والاقلق منو اللحظات الأولى من بداية المباراة .. لحظات المفاجأت ..
ربك يستر على اصحاب القلوب الضعيفة والأمراض المستعصية ..
|
Post: #6
Title: Re: البلد دي ما فيها هلالاب ... يا خليل ؟
Author: omer osman
Date: 04-04-2010, 09:41 AM
Parent: #4
النجيضة :
افريكا سبورت ليس باحسن حال من الهلال ............
لكن الاسماعيلي كيف ؟؟؟؟؟؟؟؟ 
|
Post: #7
Title: Re: البلد دي ما فيها هلالاب ... يا خليل ؟
Author: محمد عبد الماجد الصايم
Date: 04-04-2010, 09:52 AM
Parent: #6
والله يا تمبس .. وقسما بالله
أنا قاعد من الصباح بعاين في البورد
وبدعي في حاجة واحــدة!
إن شاء الله محمد عادل ما يفتح بوست!
خليل دا موضوعو ممكن يتبلع شوية!
|
Post: #23
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 11:29 AM
Parent: #7
Quote: إن شاء الله محمد عادل ما يفتح بوست!
خليل دا موضوعو ممكن يتبلع شوية! |
.. بالعكس يا عمك .. اليوم دا بالذات كنت بتمنى إنو يكون محمد عادل حضور مكثف .. بوست (تكتيكي) تفك فيهو حالة (الكاروشة) دي .. ويا حبذا لو كان هناك بوست آخر لي (البيضة) الموقف دائما تبلعو ليهو .. على نار هادية..
عارف علماء النفس في حالات زي دي بقولو ليك شنـو..؟ :
بقولو ليك لو خايف من حاجة امشي عليها .. أو أعمله
بي صورة أوضح:
يعني مفترض تكلم اي زول من بورداب الخرطوم يعمل (كولن) لي محمد عادل ويجيبو لينا هنا دا .. اصلها بايظه بايظه..
تحضرني واقعة ليها علاقة بي النظرية السايكلوجية أعلاه والمتلخصة في إنك تمشي للحاجة الخايف منها:
قاليك الأسد لو زنقك في حتة ضيقة .. عاين ليهو شديد في عيونو وركز في (عمود نخرتو) شفت كيف ..؟  .. سرعان ما يركز معاك الأسد في الأشعة الصادرة من (بؤرتك) (الشعورية) .. ويخلي ليك المنطقة في الحال .. *
عندنا واحد قريبنا عمل الحركة دي مع أســد .. عندك اعتراض ..؟
.......
* أووعك تمشي تعمل كدا مع اي أسد.. عارفك شليق
|
Post: #15
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 10:41 AM
Parent: #6
Quote: النجيضة :
افريكا سبورت ليس باحسن حال من الهلال ............ |
يا بوليص ..
افريكا اسبورت زيو وزي الغزالة الأمس دا .. واسهل تيم ممكن يديهو خمسة مع الرأفة .. وحال الهلال لا يبشر حاليا ..
إنت في الاسماعيلي .. واللا الترجي التونسي ..
|
Post: #12
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 10:27 AM
Parent: #4
| Quote: الانتصار مهم جدا اليوم |
... ديامي العزيز كيفنك ..؟
الانتصار براهو ما كفاية ..
الانتصار لابد معاهو ارتقاء بالمستوى .. مع تحسين للشكل العام للفرقة .. الانتصار دا ممكن يا ديامي واحد تدق فوقو وتدخل قونو .. يا تقلش منو .. ويكون الفريق الاداء بتاعو زي السجم ..
انتصار اليوم لو ما كان فيهو اي نكهة تحول من المربع القديم ـ وكان معالجة لي كل هفوات الفترة الفاتت من مستوى لياقة ممتاز إلى عودة لحساسية المباريات .. وارتفاع مستوى اللعيبة .. لا اعتقد اننا في حاجة إلى انتصار ينقلنا غلى مرحلة قادمة .. نندم أننا وصلنا لها بمستوانا المتواضع .. واقولها بصراحة إذا لم يتحسن مستوى الهلال في مباراة اليوم .. حتى وإن كان منتصر فلا اعتقد انه سيتقدم خطوة في المراحل القادمة ..
|
Post: #10
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 10:19 AM
Parent: #3
Quote: قراءة حقيقية لما يدور بالغالبية من عشاق الازرق ...
فى الصميم اتمنى كما تتمنى انت بداخلك بالفوز لانة مهم فى هذة الفترة ...
حتى يلم الشمل من رجالات الهلال |
سلامات يا بابكر ..
الكورة الآن في ملعب .. اولاد الهلال .. لعيبة الهلال .. الجمهور العادي وصافرة الحكم وتقريره ، جميعهم لا يعترفون بالمشكلات الإدارية .. وكذلك الحال ارض الملعب حيث أن إصرار اللاعبين وحده والاداء هو ما يقيم شكل الفريق ..
هناك فرصة أخيرة يجب أن تستثمر بنجاح .. ويجب أن اللعيبة يعونها جيدا .. وبها يمكن أن تحل جميع المشكلات فقط على لعيبة الهلال أن يضمنو جانب القاعده الجماهيرية ويسعون لمصالحتها .. ونحمد الله أن الجمهور واعي بالقدر الذي يتقبل فيها الهزيمة وفق ظروف محددة .. ولا يتعامل بردود الفعل العكسية من حصب للعيبة أو تدمير لممتلكات النادي .. لكن بالمقابل - الأداء الجبان .. والنتائج المخذلة من داخل ارضية استاد الهلال لا يتعامل معها كحدث عادي .. بالامكانية تجاوزه ..
|
Post: #8
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 10:05 AM
Parent: #1
لا توجد ضمانات كافية نستند عليها... تؤكد لنا تجاوز عقبتنا الحالية ناهيك عن عقبة افريكا اسبورت حتى وإن كان لنا حق المبادرة بمقياسات التعادل خارج الأرض .. واللعب وسط الجمهور وفي المنطقة المحببة التي ما خذلتنا وكانت طيلة السنوات الماضية الفال الحسن وروضنا فيها اشرس الفرق .. وكانت ومصدر الفرح الذي تسهر به العاصمة وكل مدن السودان حتى ساعات متأخرة وتصدر احساسها للمناطق المجاورة .. فكان النصر لكتيبة الهلال ليس من أجل النصر فقط .. نصر وامتلاك للميدان طولا وعرضا .. لا فيه هدف بائس .. ولا ركلة جزاء مهدرة .. ولا فيه مهند الطاهـــر يحرز هدفا لا يوقعه ببهلوانية ..
لاتوجد ضمانات كافية نستند عليها... وتتيح لنا أن نسقط الروح الانهزامية التي ارسلها لنا لعيبة الهلال منذ بداية هذا الدوري .. حتى ومباراة افريكا سبورت في أرضهم التي كان من السهل جدا التغلب فيها بفارق هدفين على اسواء الفروض .. أو حتى الظهور بالمظهر الجاد لاكمال باقي المسيرة .. فمعظم الفرق المنافسة بجانب الدراسة الدقيقة لمستوى الفريق وكل لاعبية وطريقة حركتهم وخطط اللعب .. ايضا عينهم على مستوى الفريق في دوري وطنه وترتيبه .. ومستواه .. واعتقد أن معظم الفرق تخبر الهلال جيدا .. وتضع له الف حساب قويا كان أم ضعيفا .. بل الفرق الجادة جدا .. والتي هي بعكس فرقنا تفترض دائما قوة الفريق الخصم ولا نجد فيها الاداء الاستهتاري .. أو الظهور الفردي .. أو تدخل الإدارات أو الأفراد في الجانب الفني ..
لاتوجد ضمانات كافية نستند عليها... تجعلنا أن نتوهم بان الهلال الحالي يستطيع أن يتخطى افريكا اسبورت المتأرجح المستوى المرتبك الأداء والذي تتوقع منه المفاجأة في اي لحظة ، بواقع (ثلاث) اهداف نظيفة باداء رجولي يصالح به الهلال قاعدته العريضة ويجعلنا نعيد ترتيب حساباتنا.
|
Post: #11
Title: Re: البلد دي ما فيها هلالاب ... يا خليل ؟
Author: عمران حسن صالح
Date: 04-04-2010, 10:20 AM
Parent: #8
| Quote: لا توجد ضمانات كافية نستند عليها... |
ومتى كانت ضماناتنا تتعدى الأمل
والأمل فقط لكل حاجاتنا ( وإحتياجاتنا )
|
Post: #29
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 11:59 AM
Parent: #13
معاوية يا هندسة ...
غايتو شد حيلك .. مع عقابنا الهنا ديل .. انا بقفل الغرفة علي .. ولو المسالة ما جايبه تمنه .. احتمال كبير اعمل زي ما بيعمل عمر الفارووق .. اتم الباقي (مزازة) في شوارع الرياض الفسيحة لحدت ما الواحد ينسى المسالة الشبكنا فيها نفسنا دي ..
على العموم الله يقويك وبوستيك دا بكرة كان الله حيانا نلقاهو مليون زهور .. وتبريكات وفرحة ..
|
Post: #26
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 11:43 AM
Parent: #11
Quote: ومتى كانت ضماناتنا تتعدى الأمل
والأمل فقط لكل حاجاتنا ( وإحتياجاتنا ) |
.. هنا الوضع بيفرق يا عمران:
فرق ما بين الضمانات الكافية والأمل ..
الأمل هنا أن تنتظر شيئا ياتيك بضرب من الحظ .. يأتي أو لا ياتي .. فهو مرهون .. أن يدخل أحد لعيبة افريكا سبورت الكورة في مرماه في آخر ثانية من الزمن الإضافي .. ترجح كفتنا
الضمانات الكافية .. إنو هيثم مصطفى في أعلى مستوياته يمرر عدد خمسة باصات عرضية بالمسطرة .. يلتقط منها اتنين سادومبا .. وواحد امبيلي .. ويجيبوها اقوان مباشرة .. والاتنين البقيات يستعرض لينا فيهم كاريكا مهارتو في محاورة القون والجمهور والكشافات .. ويمشي يجيبه من جوه الشبكة اي واحد من قوات مكافحة الشغب ..
ما قلت ليك مهند الطاهر لانو حسب قراية الوضع الحالي للهلال .. هو الشخص الوحيد الممكن يصنع تغيير من ضربة ثابتة .. بي زاوية محددة أمام المرمى .. وهو الشخص الوحيد الممكن ينفذ بشكل سليم من منطقة الجزاء .. حال توفرت مخالفة.. ما بيشوته في الماسورة .. ولا بيوديها الكشافات ..
نحتاج في الوضع الحالي يا عمران لضمانات شديدة .. عشان ما يكون عندنا أمل وحسابات معقدة نشيله معانا ونمشي بيها لي قدام ..
|
Post: #16
Title: Re: البلد دي ما فيها هلالاب ... يا خليل ؟
Author: البدري عبد الله
Date: 04-04-2010, 10:43 AM
Parent: #8
سلامات لي صاحب البوست وضيوفه الكرام
اول حاجة قصة انو الهلال حالتو صعبة وغير مطمئنة دي لا يتناطح فيها كبشان ..وقصة انو المشاكل الحاصلة بين اعضاء مجلس الادارة الهلالية اثرت على الوضع الفني للفريق دي برضو صااااح ..وقصة انو الخطط الفنية للسيد/ كامبوس المربكة للفريق برضو ليها يد .. لكن بالرغم من كل ذلك تظل المقبرة هي المقبرة ..والفريق البيجي امدرمان عشان يلعب في استاد الهلال بيجي وهو منهزم بنسبة خمسين في المية وباقي الخمسين في المية التانية بيتموها زرق الجباه كواريك سااااكت .. عشان كدة انا متفائل انو الناس حتتجاوز مرحلة افريكا سبورت ..ويمشوا لي مرحلة الاسماعيلي وحينها لكل مقام مقال ..عشان نحنا البلح ديل عندنا معاهم ود خاص وتكتيكات مختلفة وحينها حتى لو لم نتاهل للمجموعات سوف نتدحرج لا قدر الله للكونفدرالية وحينها برضو شهر ستة يكون جا والولد بكري المدينة الموهوب جدا يكون اتسجل وحل لينا مشكلة الهجوم وزميلو فيصل موسى يكون برضو اتسجل وحل لينا مشكلة صناعة اللعب الحاصلة اليومين ديل ..وان شاء الله خير
|
Post: #17
Title: Re: البلد دي ما فيها هلالاب ... يا خليل ؟
Author: khaleel
Date: 04-04-2010, 10:51 AM
Parent: #16
هلا تمبسكو
عادة الهلالاب بخافو من مباريات الهلال ومما زاد الطين بلة مستوي الهلال المتردي
هذه الايام
وعادة نوبي وعمر الفاروق لا يظهرون يوم المباراة
طارق الكوتش وود البشري خائفين
جمال السنوسي بكون مشغول
ولكن ولكن الهلال لدور الستاشر
|
Post: #18
Title: Re: البلد دي ما فيها هلالاب ... يا خليل ؟
Author: abuguta
Date: 04-04-2010, 11:00 AM
Parent: #17
ياتمبا
انا بقيت ما بشجع الهلال الا فى المجموعات
ياصديقى دى مرحلة عادية للهلال ولو فى اسواء حالاته
انا اسى بكفر فى مباراة الاياب 9/ مايو
الاسماعيلى مغلوب 2/صفر,,عاوز يعوض
عشان يدخل المجموعات والسودنة فى القنطرة من كل حدب وصوب
اسمع كلام خليل لا تشيل هم,,قال ليك الهلال لدورى ال 16
وانا بقول الهلال لدورى الثمانية,,,
|
Post: #20
Title: Re: البلد دي ما فيها هلالاب ... يا خليل ؟
Author: khaleel
Date: 04-04-2010, 11:06 AM
Parent: #18
Quote: اسمع كلام خليل لا تشيل هم,,قال ليك الهلال لدورى ال 16
وانا بقول الهلال لدورى الثمانية,,,
|
هلا ابو قوتة
بدون ان افتح بوست
الهلال فائز اتنين صفر
هدف لسادومبا وهدف لسادومبا
|
Post: #37
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 02:11 PM
Parent: #20
Quote: هلا ابو قوتة
بدون ان افتح بوست
الهلال فائز اتنين صفر
هدف لسادومبا وهدف لسادومبا |
.. يا خلي لو دا كلام قسطنطين ح تجهجهنا معاك .. لو دا كلامك اعتبرو done وفوق ليهو قون تاني وبوسة ..
|
Post: #34
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 01:28 PM
Parent: #18
| Quote: انا اسى فى مباراة الاياب 9/ مايو |
.. والله يا هندسة أخير أنا
تكفر شنو يا حبه؟؟
يعني عايز تقنعني إنو الرجفة دي من الكيبورد ؟؟
الهلال يا ابقوته كانت فيهو حاجة مميزة .. ببدا بيها من الدوري .. اللي هي لو اي فريق لاعب معاهو من المستحيلات الشديدة تتقدم عليهو بي فارق هدف .. وإن كان ، فبل راسك بعد دقايق معدودة وجهز شوالاتك وابلع حبوب ضغط .. لانو ح تنضغط بي كل الجهات .. أرض أرض جو أرض .. وكم كورة تدق في العراضة وكم كورة تدق في القايم وكم كورة بطلعه المدافع بي يدنو الاتنين من جوووه خالص .. وحارس المرمى بيمشو يجيبوهو من يافطة طعم طفلك من شلل الأطفال الخاتنا في نص الميدان .. والباكات بيكون عندهم انذلاقات غضروفية .. والحكم بيكون راكب ليهو موطر وحايم بيهو جوه الميدان عشان يتجارى مع لعيبة الهلال بي اللياقة العالية ..
الآن يا بوحميد .. ماف حاجة بتخلي الواحد يكون متوقع اي لاعب من الهلال يجيب هدف في اي كسر من الثانية .. عشان يتقدم بيهو .. ناهيك من إنو يعادل بيهو نتيجة المباراة اللي هو خسران فيها بي هدف ..
كان الهلال قبل نهاية كل موسم عدد الاقوان الدخلت مرماو تتعدى بالاصابع .. وكنا بنفاخر بي الدوري بدون هزيمة
حسع دا كلوو وووين ..؟
Quote: اسمع كلام خليل لا تشيل هم,,قال ليك الهلال لدورى ال 16
وانا بقول الهلال لدورى الثمانية,,, |
ماف مشكلة يا هندسة .. حدي معاكم باقي الليل دا .. بعداك بنباصره ..
|
Post: #19
Title: Re: البلد دي ما فيها هلالاب ... يا خليل ؟
Author: جلال عثمان
Date: 04-04-2010, 11:04 AM
Parent: #17
الاخ تمبس والمتداخلين
| Quote: لا توجد ضمانات كافية نستند عليها... |
ياتمبس قراءة جيدة ومريحة لواقع الحال
ونتمني يالبدري ان ...
| Quote: تظل المقبرة هي المقبرة |
----
الله فيّ
|
Post: #21
Title: Re: البلد دي ما فيها هلالاب ... يا خليل ؟
Author: حمزاوي
Date: 04-04-2010, 11:21 AM
Parent: #19
ابوالنسب
مسكاقمي
الناس صاروا محبطين من كل النواحي وفي كل شئ
حتى الرياضة الكنا نناكف فيها بعضنا ونفتح ليها بوستات من قبل يومين من المباراة وهاك يا تعليقات ومداخلات ومكاواة
شوف من امبارح لي حسع ولا بوست لذيذ من الجانبين
وين هلال مريخ والكلام الرهيب والبوستات المتلتلة
لماذا هذه الحالة
هل وصلنا مرحلة اليأس
وشوف فوز امبارح وصل المريخ لي مين
الترجي
وعينك ما تشوف الا النور
كان احسن الخروج ويا دار ما دخلك شر
تخريمة
كنت زعلان ولكن سامحتك يا ابوالنسب
ومقدر ظروفك
الله يكون في العون
|
Post: #22
Title: Re: البلد دي ما فيها هلالاب ... يا خليل ؟
Author: khaleel
Date: 04-04-2010, 11:25 AM
Parent: #21
| Quote: هدف لسادومبا وهدف لسادومبا |
عفوا
هدف لسادومبا وهدف لمهند الطاهر
وجيب البياض بعدين معاك
|
Post: #24
Title: Re: البلد دي ما فيها هلالاب ... يا خليل ؟
Author: محي الدين الريس
Date: 04-04-2010, 11:35 AM
Parent: #22
يا تمبس وين الغيبة البركة في كورة الهلال
وإن شاء الله اليوم منتصرين منتصرين ...
بس بي صراحة ربنا يكفينا شر كامبوس لانه مخه اليوم لو قفل بودينا في ستين داهية وبشمت علينا الشماااااااااااات
ياااااااااااااااااااا كامبوس عذبتنااااااااااااااااااااااا
|
Post: #25
Title: Re: البلد دي ما فيها هلالاب ... يا خليل ؟
Author: mwahib idriss
Date: 04-04-2010, 11:40 AM
Parent: #24
سلام
احوال الطقس
المعنويات كيف
ازمة فى الكركدى
|
Post: #27
Title: Re: البلد دي ما فيها هلالاب ... يا خليل ؟
Author: khaleel
Date: 04-04-2010, 11:45 AM
Parent: #25
Quote: احوال الطقس
المعنويات كيف
ازمة فى الكركدى |
يا مواهب
مرحلة دور ال 32 انتهت
فقط الخوف من الترجي والاسماعيلي في قادم الايام
وحا تكون اول تجربة لكاربوني مع فريق قوي اول تجربة لكامبوس مع
فريق متمرس
|
Post: #28
Title: Re: البلد دي ما فيها هلالاب ... يا خليل ؟
Author: mwahib idriss
Date: 04-04-2010, 11:54 AM
Parent: #27
| Quote: فقط الخوف من الترجي والاسماعيلي في قادم الايام |
خليل الليلة معنوياتك عالية
لكن
تعرف الكرة ما تخذلك الا وقت تكون واثق
على العموم نتمنى لكم التوفيق
المريخ شكلو حيتوج بالكنفدرالية
يا اخوى العافية درجات
|
Post: #32
Title: Re: البلد دي ما فيها هلالاب ... يا خليل ؟
Author: وليد عبد اللطيف
Date: 04-04-2010, 12:20 PM
Parent: #28
Quote: فرق ما بين الضمانات الكافية والأمل ..
الأمل هنا أن تنتظر شيئا ياتيك بضرب من الحظ .. يأتي أو لا ياتي .. فهو مرهون .. أن يدخل أحد لعيبة افريكا سبورت الكورة في مرماه في آخر ثانية من الزمن الإضافي .. ترجح كفتنا
الضمانات الكافية .. إنو هيثم مصطفى في أعلى مستوياته يمرر عدد خمسة باصات عرضية بالمسطرة .. يلتقط منها اتنين سادومبا .. وواحد امبيلي .. ويجيبوها اقوان مباشرة .. والاتنين البقيات يستعرض لينا فيهم كاريكا مهارتو في محاورة القون والجمهور والكشافات .. ويمشي يجيبه من جوه الشبكة اي واحد من قوات مكافحة الشغب .. |
ياتمبس
الامل : هو زاتو ماحصل لفريق المريخ
الضمانات : لو هيثم مصطفى شارك من بداية اللعب الهلال يعلو كعبه
Quote:
إن شاء الله محمد عادل ما يفتح بوست!
خليل دا موضوعو ممكن يتبلع شوية! |
هههههههههههها يكا
ياخي ضحكتونا
تمبس وود الصايم يوم بتكتلو ليكم زول
ياخي ماكفاية عليكم غيرتوا لينا لغة البيت
الجماعة في البيت شابكني النجيضة النجيضة
و الفوره الف ياقول تمبس
-----------------------
الليله الله معاكم
|
Post: #59
Title: Re: البلد دي ما فيها هلالاب ... يا خليل ؟
Author: tmbis
Date: 04-05-2010, 10:59 AM
Parent: #24
Quote: يا تمبس وين الغيبة البركة في كورة الهلال
وإن شاء الله اليوم منتصرين منتصرين ... |
.. كيفك يا محيو ..؟
والله كان شنو وشنو داك الواحد شاغلو .. يوم الهلال دا يا ريس ما بيفوتو ..
الحمد لله كامبوس ريحنا بعد العذااااب دا .. لانو بالمقابل كان هو ذاتو اتعذب عذاب قبوره ..
النتيجة مريحة يا ريس .. والشهية اتفتحت .. بعد كدا يساعدونا بي ضرب الزوووي زي ما قال قسطنطين خليل ..
|
Post: #31
Title: Re: البلد دي ما فيها هلالاب ... يا خليل ؟
Author: Elfadil Sabeil
Date: 04-04-2010, 12:14 PM
Parent: #22
سلام صاحب البوست و المتداخلين
Quote: عفوا
هدف لسادومبا وهدف لمهند الطاهر
وجيب البياض بعدين معاك |
الله يخليك يا خليل و الله يقبل منك و هلالنا فوق بإذن الله.
|
Post: #56
Title: Re: البلد دي ما فيها هلالاب ... يا خليل ؟
Author: tmbis
Date: 04-05-2010, 08:42 AM
Parent: #21
Quote: شوف من امبارح لي حسع ولا بوست لذيذ من الجانبين
وين هلال مريخ والكلام الرهيب والبوستات المتلتلة
لماذا هذه الحالة
هل وصلنا مرحلة اليأس |
.. يا ابو النسب ما وصلنا مرحلة الياس لكن في نفس الوقت محتاجين لي أننا نقاوم الاحباط البتسرب لينا من جهات بتحاول تزرع فينا الاحباط ..
من حقنا نفرح اوان الفرح .. ونحزن للحزن .. نشجع هلالنا ومريخنا واملنا .. كل في محلو .. البيسمح للاحباط يتسرب ليهو هو في النهاية الخاسر .. والما بيقدر يعالج نفسو ماف زول بيعالجو .. اولاد الهلال امس عملوها وفرحونا .. واولادكم عملوها وفرحوكم .. فرحكم وفرحنا اكتمل بي صعود الأمل عطبرة وكلو لصالح السودان
وبالرغم من هزيمتنا من هلال كادوقلي .. بنلقاكم في اي ملف ضيق ح تعرفو حاجة ..
Quote: الترجي
وعينك ما تشوف الا النور
كان احسن الخروج ويا دار ما دخلك شر |
.. إنت يا ابو النسب قول خايف من الترجي يرشكم .. الاحباط دا اتاريهو من الترجي ..؟
معاك حق .. غايتو أنا بوست الترجي حاجزو .. بعدين بس ما تعمل زغبير زي كل مرة ..
.
.
Quote: كنت زعلان ولكن سامحتك يا ابوالنسب
ومقدر ظروفك
الله يكون في العون |
تمام يا خال كدا صافيه لبن .. بعدين لو ما قدرت ظروفي منو غير البقدر ..؟
هي جات كدا يا خال .. لكن الجاي الظرف بيكون احسن من كدا إن شاء الله ..
|
Post: #39
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 02:23 PM
Parent: #19
| Quote: ياتمبس قراءة جيدة ومريحة لواقع الحال |
.. الحال مشروح يا جلال من فترة .. لكن برانا بنتزاوغ منو .. غايتو الليلة لو ما عملوها الأولاد ديل بالنوتة ، تبقى المقبرة بالنسبة ليهم نقطة انطلاق لمتلازمة الفشل ..
الله كريم يا جلال ..
|
Post: #33
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 12:30 PM
Parent: #17
Quote: تم تكليف علاء الدين تمبس بملف وصول الهلال لدور الثمانية هذا العام في بطولة الاندية الافريقية
علي ان يقوم تمبس باصدار بوست قبل 48 ساعة من مباريات الهلال يطمئن فيها الجماهير بالنتيجة
وان يقوم باحضار بديل للانطون قسطنطين |
.. مرسوم اسفيري علاء تمبس مسئولا عن ملف الهلال الافريقي ه...م وتشكيل لجان مساعدة
.. خليل قسطنطين .. كدي اول حاجة اعفي لي .. لانو كبرت اللفه شديد من البوست دا .. لانو الاشارات كلها ما واضحة بالنسبة لي .. وما قادر التقط .. اي حاجة ..
الاشارة الالتقطتها والوحيدة .. قبل يومين .. كانت ضعيفة جدا .. المهم فيها تلاتة .. لكن في واحد ما عارفو تبع التلاتة واللا براهو ..
غسطنطيني يا خليل ما بيفصل معانا بالساهل عشان كدا .. الطمام كان حاصل شديد .. وما كتبني لهذا البوست إلا الخوفه البتعرفه ديك ..
Quote: طارق الكوتش وود البشري خائفين
جمال السنوسي بكون مشغول
ولكن ولكن الهلال لدور الستاشر |
.. غايتو يا خليل .. اتمنى الناس دي اللقاهم بالليل دا . أو بكرة الصباح .. محتفلين معانا بالنتيجة وبالمظهر المطمن وبعداك عندنا كلام تاني ..
مبدئيا بعتمد ليك قسطنطينكم .. ودي آخر فرصة ليهو .. بعداك خوة فرتق ..
|
Post: #30
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 12:11 PM
Parent: #16
| Quote: عشان كدة انا متفائل انو الناس حتتجاوز مرحلة افريكا سبورت ..ويمشوا لي مرحلة الاسماعيلي وحينها لكل مقام مقال |
.. والله يا البدري .. المقبرة هي المقبرة .. لكن في الآونة الأخيرة .. اولاد الهلال بقو ما بيعرفو يدفنو كويس .. بدفنو وبخلو الكراع بره ..
ناس افريكا اسبورت ديل يا البدري لو القلب ما مات .. مفترض نعمل بيهم حفلة الليلة .. والاسباب كتيرة ومسيخه عديل كدا .. نعمل بيهم حفلة .. نعوض بيها كل الهزائم المرت بينا الايامات الفاتت
نعمل بيهم حفلة .. على وزن (دق القراف .. واطعن الفيل المصري) ..
نعمل بيهم حفلة .. شان الناس النست الناس دي تعرف حاجة وتعرف إنو الهلال تاريخ .. وما بيفرط في المنافسة دي بالساهل ..
نعمل بيهم حفلة عشان الناس دي محتاجة تفرح ..
|
Post: #35
Title: Re: البلد دي ما فيها هلالاب ... يا خليل ؟
Author: طلحة عبدالله
Date: 04-04-2010, 01:50 PM
Parent: #30
سلامات يا تامبا
وقد بلغني أنك خليت الحاجات الحلوة البتشبه رماز ميرغني
وبقيت تعافر وتدافر في الجماعة بتوع الأوتبيس أقصد السياطة
وأعني السياسة .
وحتى الكورة الجابتنا للبورد دا وعرفناك من خلالا ختيتا في رف
الهوامش وهي أبعد من ذلك بفراسخ وانت الصادق .
ثم أنني أري وإيم الله أنه لا خير في حسن ولا حسان بيد ان كلاهما
وهم كالورم قام لينا في المحل البنحب بيهو وبقي زي الشامة
السوداء الكبيرة القائمة للزول تحت عينو لا يقدر يقطعا ولا كمان
يقدر يخليها .
وعايز أقول ليك الهلال دا ممكن عادي يعدي من الاول والتاني وربما التالت
لكن الثابت أنو ح يقيف عند الأخير وبعدها وكما يحصل دائما ينكسر مرق
الأمل ويتشتت رصاص التمنيات لينهار بيت الأحلام البناهو الجمهور بطوب
التفاؤل .
وبهذه الفذلكة الفلسفية البليغة أعلاه أحسن حاجة الناس تشوف ليها
برنامج بديل غير التيوة الما جايبا حق وجع الرأس القاعدة تعملو
لينا ذات كل يوم دا .
صدقني لا خير في هلال ولا مريخ إلا في أحلامي واحلامك وأحلام آخرين بعرفم انا .
شكرا .
|
Post: #36
Title: Re: البلد دي ما فيها هلالاب ... يا خليل ؟
Author: احلام وهبي
Date: 04-04-2010, 02:02 PM
Parent: #35
دائما هناك امل
هناك امل
|
Post: #38
Title: Re: البلد دي ما فيها هلالاب ... يا خليل ؟
Author: عبدالكريم الامين احمد
Date: 04-04-2010, 02:20 PM
Parent: #36
| Quote: .. يا خلي لو دا كلام قسطنطين ح تجهجهنا معاك .. لو دا كلامك اعتبرو done وفوق ليهو قون تاني وبوسة |
انا يا تمبس غايتو قسطا سلمني النتيجة 2 صفر دي عبر ابو خليل الليلة عند تلفون الثامنة صباحا اليومي..
وجيت المنبر ومالقيت بوست من ابو خليل حسب الوعد
فعرفت انو (قسطا) الليلة حظو كحظ ياسر عرمان...
ونردد غايتو وبباكات مجهجهة... يا سترلي
|
Post: #40
Title: Re: البلد دي ما فيها هلالاب ... يا خليل ؟
Author: tmbis
Date: 04-04-2010, 02:43 PM
Parent: #38
| Quote: انا يا تمبس غايتو قسطا سلمني النتيجة 2 صفر |
.. يا كيكي اتنين بس ..؟
غايتو اعتقد إنو واحد في الاتنين ..
يا خليل بايع ..
يا قسطنطين بايع .. انا غايتو ظاهرة معاي (تلاتة) .. لكن فوقه واحد بالكرباوي كدا ..
يا شباب البوست دا لو في واحد قلبو قوي .. انا بدرعو ليهو فوق رقبتو .. لانو بي صراحة كدا قلبي (موقوشني) احتمال كبير ما ادخلو بكرة
واعذروني انو رديت من الآخر لي كيكي مساحة .. لانو عارف إنو بجضم لي البوست دا في غيابي واي قون بيجي يكبو هنا دا
..
ادوني الفاتة يا شباب انا مشيت
|
Post: #41
Title: Re: البلد دي ما فيها هلالاب ... يا خليل ؟
Author: الصادق صديق سلمان
Date: 04-04-2010, 03:15 PM
Parent: #40
تامبا
Quote: واكاد أجزم أن شعوري قد سيطر على معظم الذين يشاركوني الإنتماء لهذا الحب الكبير
|
وأنا أجزم ان شعوري نفس الشعور
اشغل نفسي كدا بي اي حاجة في مكان العمل
بعد داك تجيني صورة مهند الطاهر جاري بي راحتو
وصرة محمد عادل جلاها
وصورة كاريكا حاور الناس كلها ونحن معاهم وختاها ميتة بي شمالو للحارس في يدو
ياخي هلالنا ماعارفو مالو والله
مباراة زي دي زمان ايام قودوين وكلاتشي كان بنكون بنجهز في اشياء الفرح
الصادق
|
Post: #42
Title: Re: البلد دي ما فيها هلالاب ... يا خليل ؟
Author: عبدالكريم الامين احمد
Date: 04-04-2010, 06:38 PM
Parent: #41
وانافي الموعد يا تامبا
وقووووون
سيف مساوي..
وقول واااحد
|
Post: #43
Title: Re: البلد دي ما فيها هلالاب ... يا خليل ؟
Author: البدري عبد الله
Date: 04-04-2010, 07:01 PM
Parent: #42
سلامات يا كيكي
اول الغيث قطرة ..والسايقة واصلة باذن الله ..بس لو يرتفع مستوى مهند والبرنس شوية ..(لانهم بي صراحة تعبانين تعب الموت ) ما حيكون في مشكلة ..عموما انتهى شوط وبقي اخر وربك يسهل ..
|
Post: #44
Title: Re: البلد دي ما فيها هلالاب ... يا خليل ؟
Author: عبدالكريم الامين احمد
Date: 04-04-2010, 07:11 PM
Parent: #43
فعلا يا البدري
ابو الهل محتاج لتزبيط المنطقة الامامية من هجومه وضروري ربط الوسط بالهجوم..
بصورة فعالة..
ولو عمل كده سنعود مرة اخري لهذا البوست كوني ماسك موية في الوردية التمبسية دي
وقسطنطين قاطع نصف المسافة...وبختك يا ابو خليل
|
Post: #45
Title: Re: البلد دي ما فيها هلالاب ... يا خليل ؟
Author: Amira Elsheikh
Date: 04-04-2010, 07:11 PM
Parent: #43
والله انا جااااادة ياتمبس,,,
مبرووووك مقدما....
|
Post: #46
Title: Re: البلد دي ما فيها هلالاب ... يا خليل ؟
Author: عبدالكريم الامين احمد
Date: 04-04-2010, 07:16 PM
Parent: #45
انا هنا مرة اخري يا تامبا
بصحبة مساوي
وقووووووووووووون تاني
|
Post: #73
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 02:05 PM
Parent: #45
Quote: والله انا جااااادة ياتمبس,,,
مبرووووك مقدما.... |
والله يا اميرة لكن .. يتبركو فيك .. اها وبكره كيف ..؟
|
Post: #72
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 01:58 PM
Parent: #43
| Quote: عموما انتهى شوط وبقي اخر وربك يسهل .. |
يا البدري ..
إن شاء الله مباراة المرة الفاتت والخرمجة بتاعت الشوط الأول دي تكون تجربة كويسة تخلينا نبتدي الشوط الأول بي نفس .. الطريقة الضاغطه بتاعت الشوط التاني .. وبي نظام دفاع متكامل ونص مكررب وهجوم ضارب ..
يعني بي اختصار الدراويش ديل .. لازم يدروشو زيادة .. ويندرشو
|
Post: #70
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 01:25 PM
Parent: #41
Quote: وأنا أجزم ان شعوري نفس الشعور
اشغل نفسي كدا بي اي حاجة في مكان العمل
بعد داك تجيني صورة مهند الطاهر جاري بي راحتو
وصرة محمد عادل جلاها
وصورة كاريكا حاور الناس كلها ونحن معاهم وختاها ميتة بي شمالو للحارس في يدو
ياخي هلالنا ماعارفو مالو والله
مباراة زي دي زمان ايام قودوين وكلاتشي كان بنكون بنجهز في اشياء الفرح |
.. والله يا الصادق القلوب عند بعضيها .. لكن عشمنا في الخطوط الخلفية .. والأطراف على وجه التحديد .. وما (يبدو) لينا بي (أمبيلي) .. أمبيلي دا الورقة الرابحة .. يعني ماف مشكلة .. ممكن يخرمج لينا محمد عادل ويمرضنا ونكون غالبين .. وكاريكا عايز ليهو شوية ثقة وتركيز ممكن يحسم النتيجة .. مهند الطاهر مزاجاتي .. ولو ظبط مزاجو .. ممكن يفرحنا بي (هوبتين) تلاتة ويلهب الحماس ..
قودويين وكلاتشي يا الصادق في الأحسن منهم .. دا لو ما كانو في نفس مستواهم .. بس عايزين شوية بتاعت ثبات وعدم تسرع وتركيز قدام القووون .. بنرشهم ليك من صلاة المغرب ..
|
Post: #68
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 12:59 PM
Parent: #36
.. الأمل قايم يا حلام .. بس في حال إنو الشباك تكون نضيفة ..
والشباك التانية مليانة من أربعة ولي فوق .. التلاتة ذاته ما كافية .. الفراعنة هناك بتموهـا حكم وموية وفليق بص .. وغالبا يقوليك بتوع الهلال كان معاهم سنج ومطاوي ..
|
Post: #65
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 11:55 AM
Parent: #35
طلحة المسكين ..
هاردلك لما حدث بالأمس .. والله بي صراحـة أنا كنت بشجع في المريخ بكامل قواي العقلية والجسدية .. وكنت برفس معام زي ما قاعدين ترفسو .. وبكورك معاكم زي ما قاعدين تكوركو .. غايتو حرارة قلب ساي مني .. والمريخ دا أمس لو كان لاعب مع اي فريق تاني ما كان شجعتو لكن بس التوانسة ديل بالذات ما عندي ليهم اي عاطفة تجاهم .. تخيل يا طلحة اشجع المريخ شان يضرب التوانسة .. شوف الحب دا قدر كيف ..؟
على العموم معليش .. نلاقيهم في الخرطوم ونديهم اربعة عادي .. Quote: وقد بلغني أنك خليت الحاجات الحلوة البتشبه رماز ميرغني وبقيت تعافر وتدافر في الجماعة بتوع الأوتبيس أقصد السياطة
وأعني السياسة . |
ناس السياطة يا مسكين ما بيعجبم العجب ولا هيثم مصطفى .. وكل يوم عندهم لستة بي فنان جديد يجو يعملو ليهو فرش متاع زي ما اتعمل لي الآستاذ محمد وردي .. يعني يا مسكين كان جبت ليك ملف بتاع مزازيك لي لويس آرمسترونغ بيطلعوهو ليك مؤتمر وطني .. عشان كدا مالنا ومال القراية ام دق .. سوط مع السياطة .. النشوف نهايتم شنو..؟ Quote: وحتى الكورة الجابتنا للبورد دا وعرفناك من خلالا ختيتا في رف
الهوامش وهي أبعد من ذلك بفراسخ وانت الصادق .
ثم أنني أري وإيم الله أنه لا خير في حسن ولا حسان بيد ان كلاهما
وهم كالورم قام لينا في المحل البنحب بيهو وبقي زي الشامة
السوداء الكبيرة القائمة للزول تحت عينو لا يقدر يقطعا ولا كمان
يقدر يخليها . |
.. إنت الصادق يا طلحة المسكين .. في كمية احباط كروي ممتاز جدا .. لكن ما عندنا حل غير إنو نجي نتكبكب يوم الكبكبة .. ونقيس مقدراتنا الثباتيه .. أوان الهزيمة .. ونكورك ونشيل اعلامنــا .. عليك الله عندنا شنو سمح تاني بيحرك كريات الدم في عروقنـا .. وممكن يعمل لينا سكري وضغط ؟ Quote: وعايز أقول ليك الهلال دا ممكن عادي يعدي من الاول والتاني وربما التالت
لكن الثابت أنو ح يقيف عند الأخير وبعدها وكما يحصل دائما ينكسر مرق
الأمل ويتشتت رصاص التمنيات لينهار بيت الأحلام البناهو الجمهور بطوب
التفاؤل . |
.. بتفق معاك يا مسكين .. ما نحن برانـا .. حسع إنتو أمبارح زي ما قال اساسي حلقو ليكم ظلبطـه .. خلاص ادينا مساحة معاك شوية كدا .. نتقدم تلاتة اربعة عتبات .. والباقي دي بنتمو موية .. مع إنو الحال ما مبشر بس نكضب علي نفسنا .. ونعيش لحظات من الوهم الجميل .. Quote: وبهذه الفذلكة الفلسفية البليغة أعلاه أحسن حاجة الناس تشوف ليها
برنامج بديل غير التيوة الما جايبا حق وجع الرأس القاعدة تعملو
لينا ذات كل يوم دا .
صدقني لا خير في هلال ولا مريخ إلا في أحلامي واحلامك وأحلام آخرين بعرفم انا .
شكرا . |
.. انا ح اعمل بي نصيحتك دي يا مسكين .. خاصة بعد رشكم بالأمس .. لكن كمان ادينا معاك (يدين) تلاتة لي قدام ناكل مربوطتنا دي في استاد الهلال .. وفي استاد الاسماعيلي .. والباقي الله كريم علينا ..
شكرا يا مسكين .. وأوعه بس التلاتة بتاعت أمبارح دي تكون عوقتك ..
|
Post: #48
Title: Re: البلد دي ما فيها هلالاب ... يا خليل ؟
Author: عبدالكريم الامين احمد
Date: 04-04-2010, 07:39 PM
Parent: #47
وامسك عندك يا تمبس
ليلو ابمبيلي وقووووووووووووووون
|
Post: #49
Title: Re: البلد دي ما فيها هلالاب ... يا خليل ؟
Author: عبدالكريم الامين احمد
Date: 04-04-2010, 08:00 PM
Parent: #48
امبيييييييييييلي ورباعية هلالية
واييييييييي ده الشغل ده الشغل
ومبروك يا ابو الهل
ومبروك يا تامبا وجموع الهلال
واستلم
|
Post: #50
Title: Re: البلد دي ما فيها هلالاب ... يا خليل ؟
Author: الصادق يحيى عبدالله
Date: 04-04-2010, 08:40 PM
Parent: #49
4
|
Post: #51
Title: Re: البلد دي ما فيها هلالاب ... يا خليل ؟
Author: khaleel
Date: 04-04-2010, 08:45 PM
Parent: #50
ههههههههههههههههههههههه
هههههههههههههههههههههههههه
وضحكت ما هماني شي
وضحكت تاني ما هماني شي
تاني تجو تاني تجو
|
Post: #52
Title: Re: البلد دي ما فيها هلالاب ... يا خليل ؟
Author: Dr. Salah Albashier
Date: 04-04-2010, 08:50 PM
Parent: #51
الأخ العزيز تمبس
زواره الكرام
لكم مني تحاياً عطرات وأمانٍ نضرات وانتصارات باهرات وآمالاً غير عاطلات
ألف ألف مبـــــــــروك للزعيم سيد البلد، آمل منكم زيارة الرابط أدناه
هِـــــلالاب أُحِــــــبُكُم (1 - 3) .. الزعـــــــيم فنيــــــاً
مع خالص تحياتي
د. صلاح البشير
|
Post: #53
Title: Re: البلد دي ما فيها هلالاب ... يا خليل ؟
Author: جلال عثمان
Date: 04-04-2010, 10:19 PM
Parent: #52
تمبس يافال السعد
الف مبروك
الف مبروك
الف مبروك
الف مبروك
فرحة عارمة .... وتهنئة لكل الهلالاب هنا .... وفي كل مكان
شكراً ياكيكي على الوردية .... ويحلوا سد الورديات الاسفيرية لما يكون ابوالهل دا بدرا مكتمل الظهور
----------
هلالاب احبكم والله
|
Post: #54
Title: Re: البلد دي ما فيها هلالاب ... يا خليل ؟
Author: tmbis
Date: 04-05-2010, 07:17 AM
Parent: #53
الف مبروووك يا اسياااده .. يا كل الناس الزرقا في البوست دا والحمرا .. ولي كل الناس الانتشت أمس ..
شكرا يا كيكي مساحة .. كنت بتمنى أمس نكون حاضرين الكورة دا مع بعض هناك جوووه ..
شكرا لاولاد الهلال العظيم ... العرفو كيف يصالحونا .. يوكونو قدر المسؤولية ...
بي كدا الواحد ممكن يفطر ويجيكم راجع .. يضرب القهوة في البوست دا
|
Post: #55
Title: Re: البلد دي ما فيها هلالاب ... يا خليل ؟
Author: عثمان الخير
Date: 04-05-2010, 08:12 AM
Parent: #54
تمبس وكل الاهله
مليون مبروك والهلال أمس كان في الموعد ابدع وامتع
خصوصآ الشوط الثاني وهذا الاهم لانو دائمآ ومن زمان
مشكلتنا بتكون في الشوط الثاني .
صراحة احلى ما في مباراة أمس هو تألق الولد التاج فرغم قلة
خبرة المشاركات الدولية لكنه كان مقاتل شرس ادى بحماس وتركيز عالي
لانو معظم هجمات آفريكا كانت عن طريقه , كذلك التحية لمنير امبدة
عمومآ الدفاع كان رائع , بس المعز ما عارف مالو رغم قلة الكرات على المرمى
الا انو كان مضطرب .
|
Post: #57
Title: Re: البلد دي ما فيها هلالاب ... يا خليل ؟
Author: ميسرة سيد أحمد
Date: 04-05-2010, 10:26 AM
Parent: #55
|
Post: #58
Title: Re: البلد دي ما فيها هلالاب ... يا خليل ؟
Author: محمد عبد الماجد الصايم
Date: 04-05-2010, 10:31 AM
Parent: #57
إنتو الهلال كان لاعب أمس؟
|
Post: #60
Title: Re: البلد دي ما فيها هلالاب ... يا خليل ؟
Author: Omar Bob
Date: 04-05-2010, 12:34 PM
Parent: #58
سلامات يا عريس:
شفت بوستك ده امبارح وكتبت كلام ومسحتو وتاني كتبت ومسحت ومع الرجفه دي كنت متاكد انو الهلال حينتصر وكنت متوقع النتيجه 2/1. لمن زي ما قلت الهلال ليس هو الهلال الذي نعرف, حتي السنه الفاتت الهلال لم يكن هو هلالنا الذي نعرف, الهلال منذ سنتين لا يستطيع نقل خمس بصات متقنه في النصف الخاص بملعب الخصم ودي مشكله اذا لن تحل فلن يفوز الهلال بكاس هذه البطوله. اتذكر في 2007 في مباره هلال مريخ في الدوري المريخ جاب القون الاول (موسي الزومه) بعدها المريخ ده ما شاف الكوره الا لماما وقون التعادل الجابو الكوره اتنلقت بين لاعبي الهلال اكتر من سبع مرات في النصف الخاص بملعب المريخ قبل ان تصل الكره لهيثم ويدرقرها لقودين الذي هز بها شباك بهاء الدين. اين ذهب الهلال منذ ذلك الحين. لا ادري؟
|
Post: #61
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 11:32 AM
Parent: #60
| Quote: يا قسطنطين بايع .. انا غايتو ظاهرة معاي (تلاتة) .. لكن فوقه واحد بالكرباوي كدا .. |
سلامات يا هــــلالاب ..
معليش حمى الانتخابات بعدتني من البوست دا ..
لكن طالما بكرة لاعبين .. نرجع تاني .. لي ملاريــا ما قبل المباراة ونخلي حمى الانتخابات على جمبه كدا ..
شكرا لكل المتداخلين هنا ... والبوست حقنا كلنـا ..
نرجع .. ونشوف الحاصل شنو ..
المهم في الموضوع وبناء على الاقتباس الفوقاني دا .. فمؤشراتي لحدت أمس بالليل كانت ما واضحة كويس .. وبيني وبينكم ما عايز اعتمد على قسطنطين خليل .. ولا شمهروش كيكي .. لكن الله في غايتو ..
علما إنو المؤشرات كانت مكتملة بي كامل ادواته .. لكن (الفنشن) ما كان مكتمل .. لذلك عندنا فرصة الليلة بالليل اكان ظهرت اي دلالات واضحة .. فحمدو في بطنو .. واكان ما ظهرت عنها ما تظهر ..
الثابت في المسالة:
هل فوز الأمل عطبرة بي هــدف يتيم في دارو وبين ناسو .. بيشكل دافع معنوي للهلال لتخطي الاسماعيلي ..؟
وهل هزيمة المريخ من الترجي التونسي بالتلاتية وضبابية مباراة الرد بالخرطوم رمت بمسؤوليتها على الهلال بتخطي الاسماعيلي بعدد وافر من الأهداف يريحنا في مباراة الرد التي هي خارج أرضنا وفي الحسبان ما تفعله الأندية المصرية من سيناريوهات تعودنا عليها من استفزاز .. وحرب اعصاب وربما شراء الحكام ..؟
وهل وجود الاسماعيلي بالمقبرة الهلالية التي اعتاد فيها الهلال دفن الخصوم كما دفن الاهلي المصري قبلها بوجود الحضري وكما دفن الترجي التونسي من قبل وبالأمس .. افريكا اسبورت .. وهل يعود الهلال إلى سياسة تخطي العقبات بطبخهم على نار هادية .. أم سنحرق اعصابنا في الشوط الأول .. ونعود للراحة واللعب المنظم في الشوط التاني ونكسب المباراة لعباً ونتيجة ..؟
|
Post: #62
Title: Re: البلد دي ما فيها هلالاب ... يا خليل ؟
Author: khaleel
Date: 04-24-2010, 11:43 AM
Parent: #61
Quote: وهل وجود الاسماعيلي بالمقبرة الهلالية التي اعتاد فيها الهلال دفن الخصوم كما دفن الاهلي المصري قبلها بوجود الحضري وكما دفن الترجي التونسي من قبل وبالأمس .. افريكا اسبورت .. وهل يعود الهلال إلى سياسة تخطي العقبات بطبخهم على نار هادية .. أم سنحرق اعصابنا في الشوط الأول .. ونعود للراحة واللعب المنظم في الشوط التاني ونكسب المباراة لعباً ونتيجة ..؟
|
يعود الاسماعيلي للعب مع الهلال في بطولة افريقيا الكبري بعد 18 سنة
وقون وليم الشهير في الاسماعيلية والتعادل صفر صفر بعد
حادثة كندورة والثعلب
وحتما مياه كثيرة مرت تحت الجسرة
وكما يقول المثل
دراويش ولاقو مداح
وحتما الانتصار للمداح
|
Post: #64
Title: Re: البلد دي ما فيها هلالاب ... يا خليل ؟
Author: محي الدين الريس
Date: 04-24-2010, 11:53 AM
Parent: #62
يا تمبوسة
هو في منو غيرنا بعد كده في الساحة ... حرم شبعانين نترع ساكت .. ومن هسه لو عملت إستطلاع بقول ليك تلاته واحد..
|
Post: #63
Title: Re: البلد دي ما فيها هلالاب ... يا خليل ؟
Author: عمران حسن صالح
Date: 04-24-2010, 11:50 AM
Parent: #61
دي عشان ( المراريخ ) اليجو حايمين بي جاي يشوفوها ويتخارجو طوالي قبل ما ( يكجوها) ...
|
Post: #66
Title: Re: البلد دي ما فيها هلالاب ... يا خليل ؟
Author: محي الدين الريس
Date: 04-24-2010, 12:18 PM
ياااااااااا تمبس التلاتاب أصبحو كيف
|
Post: #67
Title: Re: البلد دي ما فيها هلالاب ... يا خليل ؟
Author: Gaafar Ismail
Date: 04-24-2010, 12:58 PM
الحبيب تمبس
رغم مستوى الهلال المتذبذب حاليا ، أتمنى أن نفوز على الإسماعيلي بعدد وافر من الاهداف يريحنا في مباراة الرد بمصر لأن الفوز على الإسماعيلي في ارضه و بين جماهيره ليس سهلا ..
تحياتي ومودتي
|
Post: #69
Title: Re: البلد دي ما فيها هلالاب ... يا خليل ؟
Author: وليد عبد اللطيف
Date: 04-24-2010, 01:04 PM
Parent: #67
الله يستر عليكم يا(تمبس )
بس خليك قريب وماتدخل الحله اثناء المباراة
سمعنا تحت تحت قالوا لما الهلال يكون لاعب
ماقاعدين تحضروا الكورة تنتظروا تسمعوا الاخبار والشمار من بره
مع تمنياتي لكم بالتوفيق
ولكل السودانيين
|
Post: #71
Title: Re: البلد دي ما فيها هلالاب ... يا خليل ؟
Author: tmbis
Date: 04-24-2010, 01:51 PM
Parent: #49
Quote: وانافي الموعد يا تامبا
وقووووون
سيف مساوي..
وقول واااحد |
.. Quote: انا هنا مرة اخري يا تامبا
بصحبة مساوي
وقووووووووووووون تاني |
..Quote: وامسك عندك يا تمبس
ليلو ابمبيلي وقووووووووووووووون |
... Quote: امبيييييييييييلي ورباعية هلالية
واييييييييي ده الشغل ده الشغل
ومبروك يا ابو الهل
ومبروك يا تامبا وجموع الهلال
واستلم |
.. والله يا كيكي يوم مشهود .. عشان كدا أنا درعت ليك البوست دا في رقبتك .. وحسع دي اديك النجيضة .. أنا ما بستلم منك البوست دا إلا تسليم مفتاح يوم الأحد ..
اتصرف لينا غايتو .. نحن رادارنا معطل ..
|
|