هلالابي وعاجبني المريخ امبارح

هكذا نحلم بأن تكون كرة القدم في بلادنا..
كان المريخ أمس كما لم يكن من قبل..
لأول مرة أرى المريخ وهو منظم بهذا الشكل .. بصمات واضحة للمدرب البرازيلي (كاربوني) أتت ثمارها.. كرة ممرحلة.. إمكانيات فنية مهولة للاعبين ..إكتمال في كل الخطوط..
وهذا (النفطي) للأمانة ساحر وله الفضل في كل هذا الأداء.. وضع الثقة في كل اللاعبين في مبارة الامس.. مكسب كبير وللأمانة ممكن نقول إنو أحسن لاعب محترف مرّ على السودان
بالمناسبة الكلام دة لاحظتو في (أحمد الباشا) بحاول يقلد بس مع اختلاف الفارق لكن برضو حسنة ..
ألف مبروك اخوانا المريخاب وعقبال لينا الليلة .. والله يختينا تنظيرات (كامبوس)..

الأخ العزيز هاشم منصور
سلام
لك هذا الرابط


هِـــــلالاب أُحِــــــبُكُم (1 - 3) .. الزعـــــــيم فنيــــــاً
مع خالص تحياتي
د. صلاح البشير

شكراً هشام منصور
هكذا يجب أن تكون الرياضة
حق وحب وخير وجمال ليس إلا
ولذلك كان هذا:
البرنس هيثم مصطفى يتعرض لحالة حب

ياود منصور تحياتي ..
من حقي افتخر كمريخابي بهذا الفريق الذي يمتلك فريقين جاهزين ..
بس خلينا شوية نتوقف على بعض الملاحظات :
- النصف الامامي للمريخ عالمي اما النصف الخلفي فيحتاج الى وقفة بسيطة ..
- حراسة المرمى نحتاج الى حارس نطمئن عليه اكتر ..
- التوافق بين لاعبي الارتكاز ووسطي الدفاع يحتاج الى نظرة من المدرب ..
- نفتقد للاعب الذي يدير اللاعيبة كقائد للاوركسترا (مثل محمد نور لاعب اتحاد جدة مثلا) ..
- وارغو لاعب يجيد الاحتفاظ بالكورة ومن الصعب ان يفقد كورته ،ودا مفيد عندما يكون الفريق متقدم ويحتاج لتعاون الزملاء معه بس بعض الاحيان تشعر بعدم التوافقية مع بقية لاعبي الوسط المهاج بالرغم من انهم احسن عناصر الفريق ..
بيتخيل ليّ المريخ ممكن يعمل حاجة لو اتعاقد مع المحترف التونسي لاعب الارتكاز المرابط ..
تحياتي ..

لقد عم الفرح جميع أفراد أسرتنا
ونحن نستمتع باداء المريخ بالامس
أمنياتي للهلال بالتوفيق
وأيضا الامل العطبراوي
أحد مشجعي الهلال

وأنا مريخابى وعاجبنى المريخ
وأنت هلالابى وروحك أجمل ، والرياضة فن وجمال
وكلى أمل وأمنيات بأن تسودوا الملعب هذه الليلة
وتكون الفرحة فرحتين ..
مرحب... وتحيتى مربعة ..

محمد مختار جعفر

أعزائي
شكراً ليكم ..
كتير بنتناوش (هلالاب ومريخاب) وكورة جد مافي بس كنا بنتنفس والواحد لما يعاين هو بقول في شنو وفرقنا عاملة كيف ؟؟
حالتنا زي المثل البقول(الطشاش في بلد العمي شوف)
في السنين الاخيرة كورتنا ماشة كويس ومتطورة بي صورة كويسة جداً بس برضو نحن ماشين متخلفين أكتر وعصبيتنا ماشة في زيادة وبرضو لسة راجينا كتير لو قعدنا نقارن روحنا بالدول الحوالينا ...
لما نغلب فريق مصري تلقانا خلاص زي الجبنا كاس العالم،، ولو غلبونا زي الما حاصل حاجة (كأنو دة الوضع الطبيعي) ...
ليه ما بنبغر من المصريين شوفو حالتهم لما طارو من كاس العالم الدنيا ما شالتهم وكنا نحن الضحية .. شوفو الناس ديل جو البلد دي كيف وبشجعو بي ياتو روح ..ولما اتغلبو الدنيا دي قامت كيف؟؟؟
جد المريخ أمس بعجب .. بتحس فيهو بي شغل وشغل ملموس ظاهر في الكورة الممرحلة زمان كان الكورة من القون للقون مرة تصدق ومرة تجلي بس هسة غير ..
مبروك جد للمريخ مش الغلب بتاع امس وبس ... مبروك إنو عندو فريق ماشي بي خطوات كويسة ومدروسة تمام ... بنشجعو لما يلعب برة لانو في النهاية لما يغلب برضو شرف لينا...
والبعجب اكتر إنو نحن بقينا نمثّل بي فرق أكتر ودي برضو محمدة مع اختلاف المستويات الفنية .. والبعجب اكتر زي ما كان في كورة (الخرطوم )الاستاد مليان (حتى لو الدخول كان ملح ساي) والتشجيع كان بي شكل مثالي..
في الكور البرة كلنا (هلال) وكلنا (مريخ) وكلنا (خرطوم) وكلنا (أمل)
بس أعذرونا نحن هنا جوة البلد نحن الهلالاب هلالاب والمريخاب مريخاب (وضع طبيعي) ...
ودمتم