منبر سونا .. وتحليل الصغار ..

غايتو اطفالنا ما شاء الله عليهم عندهم صحوه سياسية ..
لو كنا في مكانهم كان حكمنا زمااااااان ..
بس الله غالب ..

مواعيد برنامج حنين ( منبر سونا) بكون في صمت رهيب ..

يلا يا شباب الصمت .. (طبعا دي اوامري) بس فلاحتي فيهم .. هههههه
انتو بتحضروا برامجكم انا ما بذعجكم يلا ده برنامجي ..

طبعا انا والسياسة اصلوا ما بنتلمه ..

خلاااااااس سياستي فكت ذي كورة هناى ....... ( الليله ووووووب على قول اميره )

يعني بحضر البرنامج ده بس عشان اشوف الناس دي حا توصل لي شنو ...؟

يشهد الله حب استطلاع ما شماته ...

غايتو كل المرشحين محاسن ومساوي ..

مافي لحدي الان نسبة متعادله ..

ده رائي شخصي الضعيف طبعا .. لابقدم ولا بآخر ..

بدليل انه صوتي في ذمتي وكدي ..

ولعلمك ما بدئي صوتي لي اي زول لحدي الانتخابات الجايه كان بقينا في...هههههههههه

غايتو ما عارفه دي تخاريف صائم ولا مواطنه مجهجها ..

كتر خير كراعي الاتكسرت فهمتني حاجه وادتني وقت للتلفزيون ..

جزء من الحلقات حضرته في السودان ..

وطبعا .. كانت الاراء مختلفه تماما بين حمودي ودرة اطفالي

وكل واحد عنده تعليق على البرنامج ..

غايتو الحمدلله على الصحوة السياسيه دي ..

وعلى فكره حمودي في صف رابع اساس في دبي..

ودرة ممتحنة الثانوي في السودان وده سبب سفري ليها ..

تعالوا شوفوا تحليلهم ..

غايتو لولا العمر كنت نزلتهم انتخابات ..

طيب يا ماما لو كل واحد يجي يسيء وينعل ويجرح التاني ويمشي نحن نثق فيهو كيف ..؟؟؟؟

سؤال وجيه مش ..

بت الصادق - سلام يرفرق على عرش أسرتك الصغيرة
غيمة حب ومحنة
يا حافظ يا حفيظ من شر حاسد إذا حسد
ومن الرمد والكمد
الكال عيون وقلوب أهل الحل والعقد

كسرة ليها معنى - أسرتي جالسة تستمع لبرنامج بابكر حنين مع قادة المستقبل
الله يستر علينا وعليهم كمان، قامت واحدة من بناتي قال لي شوف يا بابا
الراجل ده - تعني واحد من المرشحين لإنتخابات الرئاسة - زول كضاب ساي
وبلولو الحديث، بسألوه سؤال عديل يقوم ينط يجيب ليك الكلام الدايره هو!!!
يعني أنا لو المعلمة قالت لي يا تقوى قومي سمعي سورة الفاتحة أقوم أجيب ليهاسورة تانية؟!
يابا الناس ديل عاوزين يعلمونا الكضب وأللا شنو؟

سلمتي
حمد

حمد .. كيفنك ..
ربنا يحفظ اسرتك من محن الزمن ..

Quote: يابا الناس ديل عاوزين يعلمونا الكضب وأللا شنو؟

اها عاد نقعد لي جنس ده ..

في حلقة مبارك الفاضل .. بتي قالت لي يا ماما خلاس ده الرئيس ..

قلته ليها لسه ما معروف الحاصل شنو؟ .. قالت لي طيب لييييه بتكلم كأنه رئيس ..


اها كانه دي واقع .. والحاصل واقع تاني ..

تقول لي في صغار ..

الصغار ..

قالوا واحدين صوتو ..

وواحدين مستغربين ..



قصة عجيبة .. تحير الجهال

ياعفاف
سلام
والله مشيت اصوت طلعت انا زاتو محتار والله جنس لعب
الجنبى يعاين لى ورقتى وانا اعاين وناس تضحك وناس
تكوريك الشجرة وحاجات ماتتوصف غايتو انا ادليت
بصوتى لكن قنعان جنس قنع من انو الناس الصوت ليهم
ديل يفوزوا النتيجه معروفه من ايام منبر سونا..
مودتى

سلام اختنا بت الصادق وغيرك ما بنصادق عليك الله سلمى على أخوك ورئيسك عمر ديك العدة الخائن المزوراتى

سلام اختنا بت الصادق وغيرك ما بنصادق عليك الله سلمى على أخوك ورئيسك عمر ديك العدة الخائن المزوراتى

Quote: والله مشيت اصوت طلعت انا زاتو محتار

يعني اطفالي ما براهم المحتارين رغم انهم بعيدين من مكان الحدث ..

لكن البركة فى خلف الله وعذابه ..

Quote: سلام اختنا بت الصادق وغيرك ما بنصادق

الله يسلمك من كل بلاء يا الصديق يا اخوي ..

Quote: سلمى على أخوك ورئيسك عمر ديك العدة الخائن المزوراتى

والله انا بعيدة منه .. ما بقدر اسلم ليك عليهو ..

شوف حبوبة صلاح غريبه .. سمح ..

بعدين ياخ هو حرامي ومزوراتي انت بتسلم عليهو لييييييه ..؟

عفاف سلام

ديل ماجيل الالكترونيات والشبكات

ديل ديل السبقونا ونحن اكبر منهم

لا تتعجبي منهم .. بل تعلمي منهم ..