Post: #1
Title: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 03-31-2010, 07:04 AM
المرشحين كملو المفوضية ذااااتها كملت !!
اها المرشح رقم 12 دا وضعو كيف ؟؟ والله بسال جاده
هل اجاب حنين على هذا السؤال فى اى حلقة من الحلقات ؟؟
ذكرنى الكلام دا تعليق الصادق يحي فى بوست استاذ بشرى
Quote: استاذي العزيز/
د. بشرى الفاضل
اعجبني اتهامه المباشر لبابكر حنين بان فكرة برنامجه هي to discredit المرشحين لصالح المؤتمر الوطني |
|
Post: #2
Title: Re: لماذا لم يستضف حنين المرشح رقم 12 ؟؟؟؟ !!!
Author: omer osman
Date: 03-31-2010, 07:55 AM
Parent: #1
الاخت دينا تحياتي ...........
تفاصيل ماحدث في الاعداد لبرنامج مجهر سونا .........
قدمت وكالة سونا للانباء الدعوة لكل مرشحي رئاسة الجمهورية لحضور اجتماع يناقش فكرة البرنامج (مجهر سونا) بالطبع حضر ممثلين
لكل المرشحين بمافيهم مرشح المؤتمر الوطني ........ بعد عرض الفكرة والاتفاق عليها مع الاخذ في الاعتبار بأن المشاركة في البرنامج
اختيارية ترك أمر اختيار اليوم لممثلي المرشحين حسب جدول اعمال المرشحين ....... في داخل قاعة الاجتماع اختار البعض الايام التى
تناسبهم ووعد البعض الاخر بالرد لاحقاً لتحديد موعد ..... برنامج عمل مرشح المؤتمر الوطني مزدحم بالجولات الولائية وتصريف اعباء
مهامه الرسمية اذا سنحت الفرصة سيظهر في البرنامج اسوة ببقية المرشحين ............ وهذا ما لزم توضيحه.
|
Post: #3
Title: Re: لماذا لم يستضف حنين المرشح رقم 12 ؟؟؟؟ !!!
Author: Yassir Tayfour
Date: 03-31-2010, 08:00 AM
Parent: #2
عمر عثمان صاحبي النفاي
مافي طريقة تنفي لينا كلام الترابي ده؟
راجنّك، أنقر تحت الشختة:
____
http://www.youtube.com/watch?v=BeHJYmxj4YI
|
Post: #6
Title: Re: لماذا لم يستضف حنين المرشح رقم 12 ؟؟؟؟ !!!
Author: omer osman
Date: 03-31-2010, 08:12 AM
Parent: #3
ياسر طيفور صديقي العزيز ............
في محاكمة مدبري انقلاب مايو .... طفق احد الشهود يكيل الاتهامات ويروي القصص التى تدين مدبري الانقلاب واسهب في شهادته حتى
ظننا انها لن تنتهي .............. مولانا عبدالعزيز شدو محامي الدفاع عن المتهمين مدبري انقلاب مايو عندما اتيحت له فرصة
توجيه اسلئته للشاهد اكتفي بان قال ((أود ان الفت نظر عدالة المحاكمة الى ان الشاهد .... كاتب مسرحي معروف وله العديد من
المسرحيات التى تعرض على خشبة المسرح)) وجلس بعدها وكل برأة الدنيا في عينيه .........
|
Post: #4
Title: Re: لماذا لم يستضف حنين المرشح رقم 12 ؟؟؟؟ !!!
Author: Wasil Ali
Date: 03-31-2010, 08:01 AM
Parent: #2
Quote: تراســـيم..
يسألونك عن الرئيس ونائبه !!
عبد الباقــي الظافــــر
يبدو أن سونا قد نجحت فى حبس المشاهدين فى منازلهم نحو أسبوع بعد أن أفرزت مساءات مترعة بالنقاش والحوار وذلك عبر برنامج مجهر سونا والذى استضاف المرشحين لرئاسة الجمهورية وحكومة الجنوب.المجهر انقسم حوله الناس - بعض الناقمين يراه مجهر حنين الذى يبصر بعينى الحزب الحاكم , وفريق يعتقد أن البرنامج أتاح للشعب أن يحكم سلباً وايجاباً على البرامج المقدمة على طاولة الانتخابات . من متابعتى من داخل الاستديو , ومن خلف الكواليس استطيع أن أجزم أن البرنامج كان من المفترض أن يكون سانحة طيبة للمرشحين الذين ما وسعتهم الأجهزة إلاعلامية الخاضعة قولاً وفعلاً للدولة . صحيح أن جلّهم قد انتهز المكرمة الحكومية و تمكنوا من طرح رؤاهم العامة . منهم من نجح بتفوق ومنهم من جاء الى البرنامج بلا بروفات أو إعداد طيب فخصم منه المجهر بدلاً من أن يضيف إليه . والمشكلة أن الوقت حرج وأى خسارة ومهما كانت صغيرة يصعب تعويضها . البرنامج الآن أمام ورطة ويبدو أن السيد رئيس الجمهورية ونائبه الأول لا يهتمّان كثيراً بأمر البرنامج .الرئيس كان من المأمول أن يخاطب المنبر فى وقت سابق وقد استبدل سانحته مع مرشح آخر . ولم تعلن الوكالة الرسمية حتى الآن متى سيمثل الرئيس امام الجمهور .أما نائب الرئيس ووكيله فى انتخابات رئاسة الجمهورية فلم يعلنا بعد مشاركتهما فى الاستجواب الذى يعدّه خصمهما بابكر حنين . سونا لم تعلن بعد عن موقف الحزبين الحاكمين فى جوبا والخرطوم .واضطرت أن تتجاوزهما برفق وتعلن عن حلقة تفاعلية مع الجمهور وممثلى المرشحين ويعقب ذلك حلقة أخرى مع المفوضية القومية للانتخابات. وكل من المنشطين يفترض ان يكون خاتمة حلقات المجهر ..وعبرهما يمكن للشعب ان يقيّم . من الصعب أن تسأل الجمهور رأيه والمسلسل فى منتصف الحلقات . أعتقد أن الحزب الحاكم والحركة الحاكمة لا يحتاجان خدمة سونا فبمالهما الوفير يستطيعان أن يوصلا رسالتهما الى أبعد مدى وعبر احتكارهما وتوظيفهما لأجهزة الحكومة يمكنهما تعويض سانحة المجهر ذات المشاهدة العالية بسانحة أخرى وبتكلفة أقل . غياب السيد الرئيس ونائبه من ساحة سونا يمكن أن يُفسّر على أنه هروب من المواجهة مع الشعب السودانى ..وترفّع عن ركوب وسائل الاعلام العامة رغم أن كليهما يمكن وعبر أكثر من آلية تقليل أى آثار سالبة وإلى حدّها الأدنى لأن وكالة سونا مهما تجرأت هى فى النهاية مؤسسة حكومية . من الأفضل للسادة الكبارالبشير وسلفاكير وعرمان ..ان يتواضعوا كثيراً وأن يسمعوا للشعب قليلاً. |
|
Post: #5
Title: Re: لماذا لم يستضف حنين المرشح رقم 12 ؟؟؟؟ !!!
Author: tmbis
Date: 03-31-2010, 08:11 AM
Parent: #4
| Quote: اها المرشح رقم 12 دا وضعو كيف ؟؟ |
..
يا (استاذة) دينا:
أهـا قولي المرشح رقم اطناشر دا جا .. بتقدري تجي إنت ..؟
إنت قايله قلت ليك كدا لييه ...؟
شايف (امبارح) (حليوة) .. في منبر سونا في لقاء عرمان ..
يعني إنت تجي مارة بي حليوة .. سلاخية .. وما تجي منبر سونــا ..؟ إنت بتبالغي ..؟
اووووعك كمان تقولي لي ما بتجي حليوه .. بزعل منك 
|
Post: #7
Title: Re: لماذا لم يستضف حنين المرشح رقم 12 ؟؟؟؟ !!!
Author: معاذ حسن
Date: 03-31-2010, 08:51 AM
Parent: #5
يا دينا سلامات
السؤال دا كل ما يوجه لحنين يغض الطرف
امبارح لما ساله عرمان نفس السؤال اضطر لكلفته الحلقة وقال الزمن انتهى!!
|
Post: #8
Title: Re: لماذا لم يستضف حنين المرشح رقم 12 ؟؟؟؟ !!!
Author: كمال سالم
Date: 03-31-2010, 12:51 PM
Parent: #7
| Quote: لماذا لم يستضف حنين المرشح رقم 12 ؟؟؟؟ !!! |
على ما أعتقد أن الرئيس طلب من بابكر حنين أن يأتى
بكامل فرقته الموسيقيه ( عشان الرقيص وكده ) .
إلا أن منتج البرنامج من سونا رفض الفكره وقال أن طبيعة
البرنامج لا تسمح برقصة العروس ,, (عفوا الرئيس) بالرغم
من محاولات حنين المستميته والتى وضح فيها إن رقيص الرئيس
صار جزءا من برنامجه الإنتخابى فكيف يحرم منه ؟!!
بالله يادينا إذا حدث وتمت إستضافته عايزك تمشى وتقعدى قدام
وتسألى أول سؤال ,, عارفه السؤال ولا أقولو ليك ؟؟
بس قولى ليهو ( قلتو ولا ماقلتو ؟ ) .
معليش شايف الكلام كلو بقى قوالات .
|
Post: #9
Title: Re: لماذا لم يستضف حنين المرشح رقم 12 ؟؟؟؟ !!!
Author: Adil Osman
Date: 03-31-2010, 01:01 PM
Parent: #1
عندما تتحول حريات التعبير وحقوق المرشحين الديمقراطية الى مكرمة حكومية حسب عبد الباقى الظافر فإن صاحب الوليمة سيأكل آخر زول أو قد يأكل فى المطبخ فى نهاية العزومة بعد ان ينصرف الضيوف.
|
Post: #10
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 03-31-2010, 04:32 PM
Parent: #9
عمر عثمان
شكرا للتوضيح الشحمان !
| Quote: اذا سنحت الفرصة سيظهر في البرنامج |
والبرنامج قاااعد مستنى السنحان دا ؟؟ ماعندو زمن ؟
ياسر طيفور يا مطرطش قول ينفى كلام البشير
كلام الترابى موثثثثق !!
|
Post: #18
Title: Re: لماذا لم يستضف حنين المرشح رقم 12 ؟؟؟؟ !!!
Author: Yassir Tayfour
Date: 04-01-2010, 01:27 AM
Parent: #10
Quote: ياسر طيفور يا مطرطش قول ينفى كلام البشير
كلام الترابى موثثثثق !! |
كلام عمر يا دنانيش لا يحتاج لنفي من صديقنا عمر، الريِّس سوف يحلف بالطلاق إنو ما قال كده؛ لكن كلام الترابي بي توثيقو ده، عمر بيلقى ليهو فيهو فرقة تشكيك..
____
عمر عثمان يا صديقي، يا قول حمودي ما أديتني نجيضة، لكن برضك مشيتني، أها بالله الحاصل شنو الأيامات دي داخل كوخ الوطني؟
|
Post: #11
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 03-31-2010, 04:36 PM
Parent: #9
واصل على البركة بالشوفه
ازيك ياخ
عارف هم الناس ديل احسن ناس بيدافعوا طوالى ربطوا الموضوع
بالنائب الاول !!
هسه النايب الاول الدخلوا شنو ؟؟
البرنامج كان لمرشحى رئاسة الجمهورية ال 12
رئيس حكومة الجنوب دا امره مختلق مهما كان هو ما مرشح رئاسة ..
ـــــــــــــــــــــ
ماااا تجيب لينا شمار جوبا دا !!
|
Post: #12
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 03-31-2010, 04:40 PM
Parent: #9
معاذ حسن
قووووول جا ياربى بقدروا يزرزروا ؟؟
ـــــــــــــــــــــــ
غايتو حنين اليوم داك الا ينوم نافع !!
|
Post: #13
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 03-31-2010, 04:48 PM
Parent: #9
كمال سالم ..
عاش من قرا نقرات كيبوردك ياخ وينك ؟؟
مشتاقين
والله المنصة دى فيها حلات رقصة !
Quote: بالله يادينا إذا حدث وتمت إستضافته عايزك تمشى وتقعدى قدام
وتسألى أول سؤال ,, عارفه السؤال ولا أقولو ليك ؟؟
بس قولى ليهو ( قلتو ولا ماقلتو ؟ ) .
معليش شايف الكلام كلو بقى قوالات |
لوووووووووووووووب يا كيمو انا عويرتكم ؟؟ وكمان قداااام
الدنيا انتخابات انتو قايلين الدنيا حريات ؟؟
اها وبعد يوم 15 _ ابريل بمشى وين ؟ القصة دى ياخوى
اتورط فيها الشيخ المثل الصينى قال البتبلبل يعوم .. ترسلو لى هو
واخر بقول ربنا ببتلى من يقدر ..
|
Post: #14
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 03-31-2010, 04:51 PM
Parent: #9
عادل يا عثمان
برضو مشتاقين
| Quote: عندما تتحول حريات التعبير وحقوق المرشحين الديمقراطية الى مكرمة حكومية |
برضو يا عادل احسن من ما تتحول للمطبعة الحكومية !!!
لووووووووووووووول .
|
Post: #15
Title: Re: لماذا لم يستضف حنين المرشح رقم 12 ؟؟؟؟ !!!
Author: Adil Osman
Date: 03-31-2010, 05:50 PM
Parent: #14
دندون الشوق والشوق
المطبعة الحكومية؟ كاااااااااك
طبعوها وانتهوا. تلت بطاقات التصويت طبعوها فى (سك العملة) كأنها حرامي. شوفى الفيديو ده.
http://www.youtube.com/watch?v=JDJ1x_X9XoI
|
Post: #16
Title: Re: لماذا لم يستضف حنين المرشح رقم 12 ؟؟؟؟ !!!
Author: كمال سالم
Date: 04-01-2010, 00:48 AM
Parent: #15
Quote: طبعوها وانتهوا. تلت بطاقات التصويت طبعوها فى (سك العملة) كأنها حرامي. شوفى الفيديو ده.
|
ياعادل إنت خطير والله ,, يأخ لبن الطير أظنو بتلقى عندك !!
الأخ ciA لا سمح الله ؟
|
Post: #17
Title: Re: لماذا لم يستضف حنين المرشح رقم 12 ؟؟؟؟ !!!
Author: Adil Osman
Date: 04-01-2010, 01:04 AM
Parent: #16
Quote: ياعادل إنت خطير والله ,, يأخ لبن الطير أظنو بتلقى عندك !!
الأخ ciA لا سمح الله ؟
كمال سالم |
فى كاتب بريطانى كان شيوعى قال ما معناه:
( الشيوعي السابق يمكن ان يكون ضابط مخابرات ممتاز)
ليه؟
لأنه شغل الشيوعيين وحلفائهم من الديمقراطيين فى ظل الانظمة الشمولية شغل سري
وفيه وعى وانتباه لاساليب ومؤامرات السلطة. وحتى فيهو تدريب بدائى على مكافحة التجسس counter intelligence
انا يا سيدى لا اعمل مع اى مخابرات. وإنما متابع جيد للسياسة السودانية وعلى معرفة جيدة بطرائق التفكير والنفس البشرية على العموم.
واحب دينا خالد واثمن ذكائها ومساهماتها الذكية والجسورة. واهديها هذه الاغنية
http://www.youtube.com/watch?v=f9JFDYTpTjw
|
Post: #19
Title: Re: لماذا لم يستضف حنين المرشح رقم 12 ؟؟؟؟ !!!
Author: GAAFER ALI
Date: 04-01-2010, 01:55 AM
Parent: #17
هو لما رقم 12 كيف ظهر في بطاقة التصويت رقم(1)
|
Post: #20
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 04-01-2010, 06:21 AM
Parent: #19
ادى القرعة وادى حكمتها يا جعفر
القرعة ذاااااتها جابتو رقم واحد او فى المقدمة
يعنى ياها القرعة الما بتعرف تبلبص ؟؟
عادل وانا بالاكتر ياخ شكرا كتير على الاضافات
الكنوز
|
Post: #21
Title: Re: لماذا لم يستضف حنين المرشح رقم 12 ؟؟؟؟ !!!
Author: Amira Elsheikh
Date: 04-01-2010, 11:13 AM
Parent: #20
والله يادينا متفائلة وياسر عرمان كان اشطر,,,,,
|
Post: #22
Title: Re: لماذا لم يستضف حنين المرشح رقم 12 ؟؟؟؟ !!!
Author: Dalal Ezzaldin
Date: 04-01-2010, 11:24 AM
Parent: #21
هل اجاب حنين على هذا السؤال فى اى حلقة من الحلقات ؟؟
___________________________________________________
دندون ازيك
مره حنين قال انه ح يستضيفه في حلقه من اخر تلات حلقات
(ياسر عرمان , سلفاكير , عمر البشير )
دا طبعا قبل الانتخابات ما يغيروها
|
Post: #23
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 04-07-2010, 06:35 AM
Parent: #22
اميرة الشيك ودلال ..
عارفة الهنود بقولوا للسيخ ديل السيك ..
وطبعا الخا دى اظنها فى حروف الدنيا كلها مافى !!
انتو دايرين البشير دا يجى عند حنين ولا ما دايرين ؟؟
ـــــــــــــــــ
ياخ اجابة السؤال دا بسيطة مافى اى زول جاوب !
ببساطة لانو دا جايى بالدرب ... وحنين بستضيف
الناس الساقطين .. والفايز ما بجى لووووووووووووول
هسه علووويا وود الباوقة بكونوا اتكيفوا شديد !
|
Post: #24
Title: Re: لماذا لم يستضف حنين المرشح رقم 12 ؟؟؟؟ !!!
Author: tmbis
Date: 04-07-2010, 06:53 AM
Parent: #23
مضحك أمر بعضهم ..
الواحد يجتهد .. وينكش راسو .. وينحت مخو في شكل وردة .. ويكتب ليهو مداخلة
ويتفط عااادي ..
...
ما مشكلة .. حنغير الوردة لي منديل ..
|
Post: #25
Title: Re: لماذا لم يستضف حنين المرشح رقم 12 ؟؟؟؟ !!!
Author: دينا خالد
Date: 04-08-2010, 10:00 AM
Parent: #24
طالما المخ متحجر وبحتاج لى نحت فكل ما تنحت
ما بيضر لعل وعسى يفك التحجير
بى وردة بى منديل ما فرقت ياكا تمبس ياكا ..
نفس الوش نفس التى شيرت ..
شكرا اخى تمبس على المرور واضفاء تلك الرائحة على المكان ..
ــــــــــــــــ
كدا كويس ؟؟ ولا ينظر ويفاد؟؟
ياخ عازماك كتاب اسمه تلك الرائحة لصنع الله
ابراهيم افتكر كدا .. لازم تقراهو
|
|