الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى

جدى الطيب
حوشنا فى العباسية كان عظيما ومحتشدا بالبشر من اول المدخل فى الزقاق (زقاق الشيخ اسحق حمد النيل )الى آخر الحوش الفاتح على شارع الشيخ البدوى،تسكنه اسر ممتدة تشكل فى مجموعها اخوة لاب واحد سوى جدى الطيب وجدتى نفيسة فهما الشقيقان اللذان كانا يعيشان الى جانب اخوتهما غير الاشقاء ، حبوبة فاطنة بت محمود التى لم تنجب لكنهاكانت الام للكل وزوجها عم صالح الرجل الطيب اللطيف ، كان عم صالح يحل بيننا بين الحين والآخر يجئ من كريمة يبقى لامد محدود مرهونة تلك الزيارة لكميات وفيرة من ( القراصة الكابيدة )وكذا بلح البركاوى والقنديلة ، كان حين يهل فى الصباح الباكر يجئ الى حوشنا الصغير يسالم امى نفيسة بكثير من الود يضربنى بمسبحته على راسى ويقدم لى تلك الاصناف التى كنت اتوسل عودته كيما يحملها معه ، يا لذلك الحوش ، تسكن فيه حبوبة آمنة، والعازةونفيسة وفاطنه بنات محمود الماذون ، كانوا يعرفون بهذا الاسم ومن ثم بات احد المعالم فى الحى ( حكت لى امى نفيسة ان قريبتها زينب بت آمنة بت جارة كانت حين تحل ضيفة عليهم تنزل عن الترماى فى محطته فى شارع الموردة ومن تلك الناحية تبدأ بالسؤال ــ هوى يا اخوى دا حوش البنوت ؟ والبنوت هن بنات الماذون الذى كانت تلك هى وظيفته )قلنا ان الحوش تسكنه حبوبة آمنة بت محمود الماذون ، وابنتها آسيا وبناتها وزوجها ، منهم من مات ومنهم من استقر خارج الحوش الان ، فلقد رحلت حاجة آمنة وابنتها وزوجها وحفيدتها رفيقة الصبى سمية مكى عبد الحليم فى سن صغيرة تدعو للتساؤل
وفى مربع آخر تجد حبوبة عازة بت محمود ، وابنتها الوحيدة ,وابناء ابيها اللذان ايضا رحلا عن الحوش لسبب اولاخر
ذاكم زمان مضى حاملا معه عبق الذكرى والايام التى لا تنسى فى ذلك المكان الساحر حيث (نادى اسكيز ) ذلك الذى كنا نتوجه اليه فى الظهيرة يجمعنا ( سمية مكى ، والهام احمد الدرديرى ، وسامى مرتضى احمد ابراهيم ،هؤلاء رحلوا وانصرمت معهم بناية النادى الى الابد ، سافرنا فى رحاب الدنيا وسافروا الى ابديتهم ،وفاطمة عبد الرحيم واخوها الفاتح نلتقى فى ذلك النادى الذى لم يكن سوى راكوبة من الزنك تشوى رؤرسنا لكنا نرتاح للجلوس الى ظلها الذى كان باردا بوجود الاصدقاء نجئ فى الاجازات ونفترق لحظة انصرام الايام العجلى لكن الحوش له كل الوجدان تحتشدبه كل الذكريات التى تتعتق كلما مضى الزمن ، وصورة جدى الطيب ما تزال فى الذاكرة طازجة وحلوة ، فهو من الشخصيات التى تاسرك بطلاوة الحديث وزرابة اللسان ، وازعم ان اشقاءه كانوا يماثلونه لكنهم لا يضاهونه ، اعنى جدى بشير وجدى شيخ الدين عليهم كل الرحمة ، على وجه التحديد كان جدى بشير محبا للحياة كما حكت لى امى فى ذات مرة حين كان الحديث عن اولئك البشر الطيب ، قالت
ـ خالى بشير كان بحب اللعبات بيوت الاعراس يعنى والبهجة ، كان بمرق لمن يعرف يابا محمود نايم بسوق اخواتو لزوم التغيير يعنى زمان لا كان فى ملاهى ولا كان فى اندية لاسينما ، ياها بيوت اللعبات ، بتسحبوا بشويش ، يمرقوا للحفلة ، وبجوا راجعين مسارقة زى ما مرقوا لانو كان يابا محمود سمع الصوت القيامة بتقوم
لكن جدى الطيب طينة اخرى كان زوجا لامراتين رائعتين طالما احببتهما ( ام سلمة بت الخضر ) تلك هى الاولى والصغرى كانت حاجة وداد بت محمدافندى الحسن التى كان يحلو لجدى مناداتها (بت الريف )لما يعترى لونها من حمرة وهى كانت تسكن معنا فى الحوش بيتها مكون من غرفتين وحوش صغيرومطبخ له نفس الخاصية ، ورغم ان الحوش اختلفت خريطته الان لكنى ما ازال احمل تلك الملامح فى ذاكرتى طازجة
كنت مغرمة بلون زوجة جدى الطيب الابيض كما نزعم (لان اللون هنا فى الولايات المتحدة له تقديرات غير التى نعرفها) ، على اى حال كان لونى اسود ،او ازرق كما هو شائع او اخضر كما يصنفه البعض، كانت حاجة وداد تضحك منى حين احدثها عن اعجابى بلونها واقارن اللونين وتقول ساخرة :
ـ انا بستحم باللبن عشان كده لونى ابيض
كنت كلما سمعت طرقات (سيد اللبن )اطير فرحا آملة ان يمنحنى فرصة الاستحمام فى (التمنة)مستميتة لنيل ذلك الطلب المستحيل راجية ان يمنحنى شرف ان اكون بيضاء ، لكنه يضحك منى حتى يسيل الدمع منه ويقول لى بصوت حازم
ـ بت نفيسة البدخل هنا ببقى قرد
ـ قرد ؟
ـ آى قرد ، دايرة تبقى قرد ؟ لكن الفكرة ظلت تراودنى بعنف ، كنت احيانا اغافل جدتى وادخل الحمام ساحبة معى (حلة اللبن)ادلقها على جسدى وانتظر الى ما لانهاية ليتغير لونى
كانت جدتى كثيرا ما تقبضنى متلبسة ،فلا مجال كيما انسب ذلك الفعل (للكديسة )لان ماء (البلاعة) لونه متغير وتعلوه رائحة اللبن فيبدو الماء (رائبا )مائلا للبياض ، لطالما حذرتنى جدتى ان ذلك الامر غير مجد وان (وداد عشان امها من ريف مصر عشان كده لونا ابيض ، واللون الابيض حق الحلب ، انتى دايرة تبقى حلبية ؟)
ـ حلبية ، لا
ـ خلاس تانى ما تسوى كدى وكان سويتى كدى بموص ليك الفطيرة
ـ يعنى شنو ؟
ـ قرصة حارة لمن تجيب الدم
ـ ما دايرة ابقى بيضا توبه
جدى الطيب كان ملكا للطرفة والضحكة وخفةالظل ، يحب الحياة ويقدم عليها ، لا اذكر اين كان يعمل لكنه حين يعود للبيت فى المساءات كنت اطير فرحا ، اظل مرابضة معه فى حله وترحاله احفظ ما يردده من طرائف واعيد صياغته لاندادى مقلدة اياه ، وحين اتعب من متابعته اجدنى الى جواره انام ياخذنى فى حضنه كام تخاف على وليدها ، لعلى كنت اجد فيه الصديق ، والمسرح الذى اتمنى ان لا تسدل ستائره، فهو منذ حلوله فى البيت لا يكف عن الضحك والمرج ، لم اره فى يوم غاضبا ، فهو لا يغضب قط ، ولم اره ينهر احدا او يكلم احدا بلغة لا دعابة فيها فلا تعرف متى يكون جادا ومتى يكون هازلا ؟بل كل ما لديه هو خفة الروح والضحك والسخرية اللذيذة غير الجارحة فان تصادف وقدمت له زوجته الطعام وكانت (الصينية غير ثابتة ) وتزحلقت الصحون هنا وهناك ، نادانا لنمسك له الصينية كيما ياكل دون ان تنحرف الصحون ولا يستبطن الا السخرية من تلك الصينية وامتاعنا بالضحك البرئ
ابنته الكبرى من زوجته الثانية كانت تصغرنا قليلا، لكننا كنا نلعب معا ونخرج معا ، كنا ننتظر بصبر نافذ حلول المولد النبوى الشريف لنخرج الى ميدان الخليفة صحبة جدى الطيب وابنتاه(حياة وسلوى وابنه عبدالرحمن) متوقدين بالفرح لحضور اليوم الختامى للمولد النبوى
المشوار لم يكن بعيدا من البيت ،علينا فقط ان نعبر زقاق الشيخ اسحق حمدالنيل مارين بقبة الشيخ البدوى ثم نواصل سيرنا حتى نعبر الهاشماب لندخل من الشارع الجانبى الذى يمر من دكان البازار وبالتالى مدرسة الاحفاد الثانوية بنات عابرين شارع المرودة ومنه الى بيت الخليفة ومن ثم ندخل الميدان
رحلتنا تبدأ فى العصر غالبا الشمس تبدو خلفنا فى تلك الساعة ، الساحة محتشدة باناس يعدون العدة لليلة الكبيرة تجد الجميع منهمكا فى همة يربطون اعمدة الخيام وينصبونها فارشين ارضياتها بالسجاد الملون ولبروش التى توضع خصيصا لمن هم فى سن الطفولة بعد ، المايكرفونات تسمع اصوات صهيلها مربوطة الى اعمدة الاركان فى الخيام فلم تكن الاجهزة الحديثة قد غزت الاسواق بعداصوات الذين يعنون بتشغيلها تسمعها وهى تنفخ الروح فى تلك الاجهزة
ـ سامعنى ؟شغال ؟ الصوت واصل عندك ؟
ـ ايوه سامعك
خارج الخيام يتحول المكان الى خلية نحل ، فالباعة الجائلون (بكفتيراتهم المربوطة الى كوانين صغيرة يحملونها بيد وجردل صغير مرصوصة فيه( الكبايات )وكلما سار البائع خطوة (كشكش جردله ) معلنا عن بضاعته من هنا الى هناك جائلا بالشاى والماء البارد المعبأ فى الصفائح اللامعة تطفو على سطحه قطع الثلج
تمر الآن من سوق( ام دفسو )حيث النساء يترصرصن فى صف طويل عارضات مبيعاتهن من القهوة والشاى والاطعمة ، ها هن يتأهبن لايقاد نار لا تنطفئ حتى نهاية (قفلة المولد )
باعة الحلوى الجائلون بعربات من الخشب ولها عجلات من الحديد يدفعونها يملاوون بغباراتهم المسارات بين الخيام واصواتهم العالية تصم الآذان منادين على بضاعتهم
او تجد من يرص بضاعته خارج( الرواكيب)فى ترابيز طويلة مصنوعة من الخشب يضعون عليها منتجاتهم من الحلوى المصنوعة فى اشكال احصنة متدرجة الاحجام من الصغيرة الى الكبيرة التى يقف على ظهورها الفرسان بسيوفهم الملونة وبنادق بالوان جذابة حمراء وخضراء وبيضاء هذه من مصر وتلك محلية الصنع ، كما تجد ان ذات الامر يسرى على الحلويات الاخرى من سمسمية وفولية وحمصية فالمصرية ناصعة البياض فيما المحلية لونها مائل للاصفرار
ثم هانحن ها امام عروسات المولدـ مربط الفرس ـ بشماسيهن الملونة المغروسة الى ظهورهن تحسهن يموءن تحت وطاتها بوجوههن المستديرة الكاملة الاستدارة والوانهن الحمراء الفاقعة الحمرة كنا نستمع الى اصوات الباعة ينادون على مبيعاتهم من هذا الى ذاك (السمسمية البتخلى العجوز صبية ) الى الحمصية وارد (بره) باسعار تجذب الفقراء مثلنا
حين ندخل الى باحة المولد يبدأ جدى الطيب فى رسم خارطة ( الطريق ) وتحديد الحركة حتى لا ينفرط عقدنا ( البنات انتن يالسمحات بى جاى ) الاولاد (معاى بى هنا)
نغادر المكان على امل اللقاء فى خيمة الانصار لان الاولاد سيكونون مع جدى الطيب وان حدث وانفرط العقد سنلتقى ايضا فى خيمة الانصار ، وما ذلك الا لاننا نعرف اهلها لكنى ازعم ان جدى الطيب لم يكن ينتمى الى اى طائفة دينية لكن حكاية الانصار ناتجة كما اسلفت من معرفة مرتبطة بالسكن فى حى الامراء ـ العباسية ـ حيث يتمركز معظم الانصار فى امدرمان اضافة لصلات التعارف والصداقة بينهم وجدى الطيب
كنا نجتمع لنجد ان جدى الطيب بانتظارنا فى خيمة الانصارلنبدا رحلة شراء بنات الحلاوة كما يحلو لنا تسميتها ويحلو له مناداتنا ببنات المولد وغالبا ما تكون آخر مشاويرنا لاننا حينها نكون قد وصلنا حد التفكير فى الرجوع الى البيت ، وحين يشتد صوت مطلبنا ويغالى فى العلو يغيظنا جدى الطيب بقوله

ـ انتن هسى ما احلى من بنات ا لمولد
ويبدأ فى اختراع اغنية تجعلنا نضحك وترقص اصغرنا على انغام تلك الاغنية المرتجلة فى التو واللحظة ، لكن ذلك لا يمنع اننا سنشترى بنات المولد ، يشتريها لنا جدى الطيب عن طيب خاطر بنات بشماسيهن الورقية الزاهية (كنا غالبا ما نلتهم الصغيرات من بنات المولد قبل ان نصل الى البيت )اما الكبيرات فمكانهن"رف البترينة تلك الدواليب المصنوعة من الخشب والزجاج معا ، تلوح من خلال زجاجها الاكواب واطقم الشاى التى لا تستخدم الا نادرا ، واكواب من الصينى الانيق التى غالبا تظل مكانها كالاناتيك
نضع بنات الحلاوة الى جوار تلك المعروضات ونتباهى اينا بنته اكبر نطلق عليهن الاسماء والالقاب نزوجهن ، ويوم الزواج ذاك لحظة انتهاء اللعبة غالبا ما كنا نولم بتلك البنات للحاضرين لاننا نستعيض عنهن ببنات ام لعاب المصنوعة من الخرق والمحشوة بالقطن وجوهها ملونة بالالوان محروقة بالنار كيما نتبين ملامحها من عيون وشفتين وانف غالبا افطس
كنا حين يخيرنا جدى الطيب بعد ذلك اين سنذهب لنحتفل ما تبقى من اليوم فاننا نختار ان نبقى فى خيمة القادرية لان نوبتهم كانت تلهب مشاعرنا وذلكم الدرويش كان يفتننى على نحو خاص ، كنت ابدو مذهولة لما ياتيه من حركات تبدو وكانها سحر او كمن جاء من فضاء آخر ، يهبط على الارض وهو دائر يدور كانه مروحية لا تعرف الهدوء،او حلزون لم يدخل الماء قط ، ويستقر الى الارض معلنا انه الاجمل فى تلك الليلة ، تدخل اثناء ذلك الاناشيد التى الفناها خلال ليالى احتفالات اهل الشيخ اسحق حمد النيل بمولد جدهم الشيخ حمد النيل نتابع الموكب منذ خروجه عن باحة المسجد الى حيث تنقطع اصوات الطبول فى آخر الشارع متجهة الى مقابر حمد النيل وذلك امر كان يحدث كل يوم جمعة فى العصر ، واحيانا منذ الصباح خاصة اذا مات شخص مهم من ابناء الاسرة ، لذلك نبقى فى خيمة القادرية لان لها شجن خاص فى نفوسنا اجمعين نتمايل ازاءتلك لانغام الاليفة والاناشيد نرددها معهم ( كنت على نحو خاص احفظ اناشيد الصوفية تلك ربما لذلك السبب ما تزال تلك الاناشيد عالقة كلما سمعتها اوشك ان اجهش ببكاء حار ربما لانها جزء من طفولتى )كنا ندخل رغم عسف الجند وعسس المخيم ، نتخطى مراقبتهم وخطوطها الخائبة ، كانوا يصدوننا لاننا "بنات "ومن ثم لا يسمحون لنا بالدخول لكننا نتحايل على تلك الانواع القمعية بالتلصص من خلال الفتحات التى فى الخيمة اوبالتسرب خلال فرجات ممزقة فى الخيمة ايضا ، او حين تعيينا الحيلة نزحف على الارض بغية ان نشهد تلك الحلقة التى نحفظ سيرها عن ظهر قلب ، حين ينتهى الانشاد كنا نبدأ صخب آخر حادينا ان نستمع الى مزيد من الغناء الصوفى فكل الاصوات تشجينا تنفتح لها اسماعنا اجمعها ،لكننا حين نغالب الانشاد فى تلك اللحظة نعلن انا حتام عائدون الى مقرنا فى الحى (بيتنا) خاصة حين تستهوينا الاناشيد ، نخاف فى تلك الححظة سقوط بنات المولد فى شراك الكسر والضياع
لحظتها يسحبنا جدى الطيب بمرح كعادته بشغبه الطفولى ذاك بابوته التى لا تدانيها ابوة فى هذا العالم ، مدلوقة دونما رياء او تزلف ، ياله ذلكم الرجل يساوى بيننا فى الحب والالفة والحنان يسحبنا بمغناطيس روحه الخفيفة تنشر ابتسامته بردا وامانا نعود كما خرجنا متوثبين تزداد فرحتنا حين نصل الى حيث نضع بنات المولد مصحوبين بضحكات جدى الطيب وهو يعيد نشر مغامرتنا فى تلك الليلة وننام على اهازيجها
ايوا /الولايات المتحدة

اكاد اعيش مع الاشخاص في حركاتهم و سكونهم
سرد ممتع غاية الامتاع ،،
تقرأ كأنك تراهم ماثلون امامك ،،
سلمى الشيخ اشكرك على بث هذا الجمال هنا
و دمتى القاً

الابن على طاهر ، كان احتفال المولد فى ايامنا ، له مذاق خاص لا كما هو عليه قبل ان يغير النميرى موقع الاحتفال ، فلقد درجنا على الاحتفال بالمولد فى امدرمان بالتحديد فى ميدان الخليفة عبد الله التعايشى ،والان حين ترى الى الاحتفال بالمولد لا ترى ذلك الوهج الذى كنا نراه ولا البهجة التى كانت تحط على دنيانا فى الطفولة حتى الحلاوة لم تعد مثلما كانت ربما لاننا لم نعد اطفالا او ربما لان كل شئ اعتراه التغيير

قبضناك ياسلمي اخت هند انا ومحمد العميري نتغالط فيك سلمي اخت هند هي ام لا ياجيران ناس جدي صديق مخير تحاتي الي هند وقولي ليها محمد ومحمد العميري بسلمو عليك

محمد الامين ومحمد العميرى شكرا لكما وتحياتكم تصل الى هند الشيخ فى الدوحة ،لكن بيتنا كان يفتح على بيت ناس عم صديق وزوجته زينب الفضلى عليهما الرحمة فى ذلك الزقاق المفضى الى جامع الشيخ اسحق حمد النيل ، ذلك مكان ما نزال مشدودين اليه بحبل من مسد الحب كلما تعبر من الشارع تمد عنق الذاكرة الى حيث مرامى الطفولة ومعانيها وطلاوتها تلكم ايام ، كان حوش اسحق حمد النيل لا يخلو فى ايام الجمع من باحات للذكر نتمرغ فى ايقاعتها الى هذه اللحظة والانشاد الذى كان يصحب ذلك حيث يحل الشيخ الحضرى والسيد يوسف ابوعاقلة ضيوفا على ديوان جدى ، وكنت اجد نفسى وسط تلك الجموع النقية بملابسهم البيضاء واجلس الى تحت قدمى جدى الطيب كقط وديع استمع الى الاذكار ، التى كانت بدعوة من جدى عبد الرحيم ، فشربت جميل الانشاد بل وكنت احفظ البردة حتى زمان قريب لكن الذاكرة بدات تتاكل ، ثم انهم وهذا ما قراته فى قادم ايام حين شب العود عن الفتوحات المكية التى كانت تدار جلسات شرحها فى ذلك الديوان، لم يكن يمنعنى جدودى من الجلوس اليهم ، بل كان ذلك مصدر ثقتى بنفسى فى قادم الايام ، فكنت استمع الى ماهو يفوق سنى ، لكنى اجدنى الان كذلك الدرويش ابحث فى فضاء الماضى وافتش فى ثنايا الذاكرة عن كل تلك الايام حيث استمعت لاول مرة الى (اعد مدحه ان القلوب تحبه )

استاذة سلمى الشيخ
كل سنة وانت بالف خير ..
كل هذه الطرقات تخصني بشكل جيد .. تجولت فيها بازقتهـا الضيقة ملامح اهلهــا ما تزال مختومة على إنسان العين .. يرف بهم العصب البصري كلما حملني الشوق ..
لفترات طويلة جدا .. كنت انوم في ( سهلة ) الحوش الكبير على انغام ... إيقاع ( الشتم ) الطبل الصغير وطاسات النحاس ونقرشات خفيفة يختمها دعاء القوم من مسجد مرفعين الفقراء وهم يقيمون لياليهم اليومية في ذكر سيدنـا النبي .. كل هذه النسمات ورائحة اللبــان تحملها نسمات الليل من تجاة الغرب للشرق..
في ( جمعات ) الأيام العادية .. قبة الشيخ حمد النيل كانت ملاذنــا .. يحرضني اخي الأصغر ... حتى ادمنت ترجمات القوم .. سريالية شيخ الزبير .. وبخــور عمي النور يطوف به على العباد .. ووجوه طيبة نقية بذكر الله والصلاة على سيدنــا النبي ..
افتقد كل هذه المشاوير .. ميدان المولد الكبير بأمدرمان .. جمعات الشيخ حمد النيل .. الدراويش .. الذكر .. وضربـــات النوبة التي تخترق شغاف القلب .. وهارموني الغرقانين..

اللهم صلي على سيدنـا محمد وعلى آله وصحبه وسلم

كتاباتك ترد الروح يا استاذة ..

العمل المرفق من قنــاة هارموني في بثها التجريبي والتحية للمخرج القدير معتصم الجعيلي صاحب قناة هارموني

يا تمبس العزيز ، زمان ، دائما زمان ، كانت (امى نفيسة ) حبوبتى عليها الرحمة يوم الحمعة العصر بدرى ، بنمشى معاها الضريح فى مقابر حمد النيل ، كانت تسوقنى معاها لمن ندخل الضريح اشوفا دخلت فى حالة غريبة من التوحد لا كلام ولا صوت دموع جارية واسالها ببراءة الطفولة (امى مالك فى شنو ) لا ترد لكنها تدعو وتبكى ، نخرج عن الضريح باتجاه مقابر بعض ذوييها تدعو لهم ، كانت دائما تحمل معها ( حلاوة وتمر ) تفرقهم على الناس هناك ،المشوار من البيت الى مقابر حمد النيل نمشيه على ارجلنا ، نمر من اماكن ذكرتها خاصة شارع مرفعين الفقرا ، وضريح قدح الدم فيما اذكر ، ونعود من هناك الى العرضة حيث اختها عرفة نبقى الى ان تصلى العشاء ونعود الى العباسية ، ذلكم زمان يا تمبس كنا فيه انقياء لم يكن مشينا الى تلك الاماكن الا واحدا من فاكهتنا التى نفتقدها الان ، نفتقد تلك الحميمية فى التعامل وتلك الاريحية والبراءة فى السلوك ، وما ازال اذكر ان دائما فى رفقتنا كانت تلكم المراة الرائعة صديقة جدتى ( حنينة ست الصحة ) كما كنا نناديها امراة تلبس ملابس الرجال ( لكنها ارجل من بعضهم ) وتركب العجلة وتدخن السجاير الذى كنا نجلبه لهامن دكان عم على اليمانى فى زاوية البيت ايام كانت تحل علينا ضيقة وهى غالبا ما تفعل لانها كانت صديقة لامى نفيسة ، كانت كلما اوغلنا فى المشى باتاجه حمد النيل تقول لى ( بت نفيسة تعبتى تعالى نشيلك ) واضحك لاننى كنت كبيرة كما كنت ازعم لها وكانت مع ذلك تحملنى الى كتفها وتمشى بى كانها لا تحمل شيئا ، يا لتلك الايام يا صديقى احلم ان تعود بعض لمحاتها ونقائها

هسى يا تمبس بكرة قفلة المولد كيف (تفارق الضفة والنيل هان عليك )
ليلة المولد يا سر الليالى والجمال

صديقتي النجمة التي خيط حياتها من الحكايات والاصدقاء والحب والشجن والذكري ، صديقتي التي غالب خطوها حذو الناس والبشر والمجتمع ، صديقتي التي تغزلنا بحبرها لتنسجنا في حياة آمنة طيبة مستقره نهفو للناس في حكايتها ونعيش معهم ونشم عبيرهم ورايحتهم ونلمح الدمع يترقرق من ضحكاتهم واجسادهم تختلج من فرط الحياة .
يا لجمال هذه الشوارع وكاني اسمع حيران خلوة الخليفة اسحاق حمد النيل وهم يسحبون الواحهم ينسابقون لدرس القيلولة وترتيل الالواح ومجموعة منهم تزخرف الواحها تؤطئة لشرافة مرتقبة ، وذاك الحادي الذي نسج حوله من الاساطير ما نسج وقبته الان لا يعرفها الا الاقدمين من سكان الحي (الشيخ البدوي) ، والهاشماب والعباسية والامراء احياء الخلافة وبيوت البسطاء وصناع أم درمان (مدينة علي المك التي من تراب ) هي انسان كامل الحياة في هذه السطور التي تنطق (آوليس الانسان من تراب!!!) هي الناس بعينهم يتحركون ويحكون ويتنفسون في هذه الكتابة .
الصداقة والاستقلال في الحكاية سرها الكامن (جدو الطيب) والذي في الحكاية تماماً (كبونديتا) شخص ملامحه ظلت كمدينة لا يغشاها حين يغشاها الموت عاشت طويلاً ناصعة وطيبة ، وفي روح حكاية المولد يمتد الدم بين العمر والارض فامدرمان القديمة هي احياء (الامراء - الطيب- العباسية- الهاشماب) ومابينهم سرة الحياة الطويل نسيج قابع كايقونة تستدل بها ذاكرة الكنابة خيطها فالشوارع تحدثك بلسان جدو الطيب وجدو الطيب كحائط (جالوص) متين (هاش باش) يشبه الحياة .


المولد يا سلمي (كل عام وانتي بخير وكل سنة وانت صديقتي ) البسطاء هم أساس الحياة (والنقد واضح في ما حكيته) ترابيز وعربات خشب وباعة جوالة وصفائح الماء البارد وسوق أم دفسو القهوة والشاي والسندوتشات بسلطة الاسود حياة كاملة الاثر ، كانت في الاصل من طبيعة الناس في المدينة وفي حياتهم الان اصبحت من طبيعة (الفقر الملازم والقهر وشظف العيش) - فيا لحياة الكتابة التي تعرف قيمة الإنسان وقيمة المجتمع وببصارة - .
خيام ودراويش ومدائح وانشاد دينى ومكرفونات ورايات تنصب علي مدار فترة المولد من اقمشة خضراء وحمراء لامعة النظر عاكسة مشرقه كابتسامة حين ترف عليها العين تعلو الوجه بسمة آمنة مطمئنة .

جماعات يهزون ويرزون والنوبة تقرع وحين يرتد صدي الصوت يخفق داخل القلب مرات ومرات في نشوة لا يدانيها شي ، دراويش خفاف يديرون بحركات لا تفك طلاسمها بارجل حافية سريعة الحركة والاستجابة بين كل رنة ورنة يترنحون في سكر توحيدي غارقون ويصدرون اصوات متناغمة ليلة المولد ليلة الصراخ المحبوب من احباب الله والاطفال اكثر فرح من الجميع وياشرون باصابعهم وكل واحد منهم تعجبه حركة ويراها الافضل وتظل في دماغه طول حياته (كنشيد ظل عالق منذ تلك الطفولة) .




محتفي جداً أن تكون هذه الكتابة مهداة الي شخصي وسعيد بها كطفل في لحظة عيد.
واظني سامكث كثيراً هنا .


____________
علاء (تمبس) عليك بمدائح النوبة
وشكراً يا علاء علي هذه المدحة الجميلة.

حضور ومتابعة للاستاذة سلمى وتحية عبرك للانسان الخلوق سفيان نابرى وكل مولد وانتم بالف خير ونتمنى ان تعود تلك الليالى الامدرمانية الجميلة الى عهدها الاول..




مودتى لكم جميعا..

يا تمبس (حوار خارج النص )اول مرة اعرف انك شقيق صديقنا وزميلنا عمر منصور تحياتى له فى منفاه البعيد وما تقول ليهو زلابية اصلا

Quote: خلونى معاكم بى جاى[/ نحنا يا تمبس فى ام طرقا عراض وبقينا ذاكرة شايلنها وحايمين بيها قبل كلامك دا كنت مع زميلى ودفعتى فى التلفون احمد طه امفريب ، وثالثنا عبد الباقى مختار ،احمد طه بفتكر انى عندى ذاكرة حقو احافظ عليها ودا البسوى فيهو فعليكن الله استحملوا نزقى وقصصى وحكاياتى من الزمن الغابر ،كونوا معاى

---

Post: #26 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: tmbis Date: 03-27-2007, 08:40 AM Parent: #12 Quote: اول مرة اعرف انك شقيق صديقنا وزميلنا عمر منصور تحياتى له فى منفاه البعيد وما تقول ليهو زلابية اصلا والله يا سلمى الواحد بعد كده يبقى ( حوارك ) عديل كدا .. وناس سفيان ديل يرسلوا لينا ( مرقوعتنا ) بالفيديكس .. عارفه أمس بعدما طلعت من المكتب مشيت البيت وفتحت الجهاز وفي بالي اقوم انزل أي حاجة في البوست ده يا ارد عليكم .. مجرد ما فتحت البوست .. التلفون ترررن .. رن ، كان عمر منصور وليهو فترة في دوامة عمل مزعجة افقدتنا التواصل بشكل مجدول .. طبعا اتونسنا بشكل ظريف كدا زي كل مرة .. طبعا قلت ليهو زلابية بتسلم عليك طوالي دفعة واحده كدا قام طبعا قال لي : .. يـــاخي ..؟؟ واكيد بتكوني عارفاها عاملة كيف ..؟؟ بالمناسبة يا سلمى كل كتاباتك عن العميري حتى من قبل ما تجي هنــا .. كنت قاعد اقراهــا بي طريقتي الخاصة جدا .. بقراها بي احساس عمر .. وعميري وبي احساس الحاجات الجميلة الكانت بيناتهم .. وطبعا جواي ذكرى جبانة جدا . لي يوم وفاة عميري وأول مرة اشوف عمر منصور يتجرس ويجرس البيت كلو معاهــو.. ياخ نحن شعب عندنــا ( قلبنا) ده بس وكان حصلت ليهو اي حاجة لا قدر الله تاني الحبة ما عندنــا .. وطالما القلب ده مليان بي محبة سيدنا النبي .. تاني مافي حاجة كعبة في الدنيا.. كنا قبل سنين ساكنين في جدة مجموعة من الشباب .. معظمنا من الموردة اولاد الحلة + مجموعة من الصحاب .. كان معظمنا بيداوم أنو يمشي ( مكة المكرمة ) يعمر بشكل دوري .. الما بقدر كان بيحرص على صلاة الجمعة .. طبعا الحج بشكل سنوي متواصل .. ولو مافي معظم الأعياد في مدينة سيدنا النبي المنورة .. يوم كنت ( محرم ) لاقاني واحد من أولاد الحلة السعوديين اصحابنا .. قال لي باستغراب بمعناهو ماشي وين .. ؟؟ وزاد عليها .. إنتو أيش فيكم ياعــلاء . الحين كل السوادنه بالمدينة..؟ مافي غيركم..؟ قال لي تعرف انا عمري كلــو ما رحت عمرة ولا رحت المدينة .. وتخيلي عمرو كان زي خمسة وعشرين سنة.. الحاجة الغريبة جدا .. كمية كبيرة من الشباب السعودي .. بالمدينة المنورة ( سالكين ) زي الترتيب . غرقانين عديل كدا.. بالمناسبة يا سلمى .. عمر طلبمني رقم التلفون .. لكن ما عندي طبعا . وقال لي غالبا اتصرف واشيلو من تماضر..

---

Post: #33 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-27-2007, 11:57 PM Parent: #26 تمبس اخو صحبى اللى زمن من شوفتو وحات ابوى مشتاقة ليهو وتلفونى معلق فى بوست عميرى بتلقاهو وفى بوست مصطفى( جمة حشا المغبون ) بتلقاهو وخسمتك كان ما اديتو ليهو ، بعدين يا تمبس انت عارف الصوفية العندناما شفتها عند شعب تانى ، انت لاحظ طريقة الاكل عندنا وطريقة الحياة عمومافيها زهد غير عادى الواحد يكون معاهو جنيه ويكون زى المالك الدنيا بحالا لغاية الان ما لاقانى النوع البكدس المال ودا حتى لو فى ما صاحبنا ببقى ، المهم خليها ( صاحية خطوط التماس )

---

Post: #31 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: Azhari Nurelhuda Date: 03-27-2007, 06:01 PM Parent: #12 يا سلمى بالغتي في أي حاجة و خاصة..... إنه تمبس ده إطلع علاءالدين أخو كدوص...... لاحولا.... دي ماأدوها لينا في المدرسة زمان..... العيال كبرت يا بت الشيخ دنيا.....(بكسر الداء)

---

Post: #35 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 00:42 AM Parent: #31 ياابو الزوز يا صديق ، نحنا ما بنصاحب الا الزيكم يا فنان شكرا على طلتك ، بعدين كتوص دا مافردة كبيرة وزمان يا ازهرى ما تزال ذكريات المعهد ساكنه جوه الجوف

---

Post: #16 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-26-2007, 07:19 PM Parent: #8 الصديق الفاضل العزيز / ضحية ابراهيم أه يا صاحب لو يسمح الزمان لي بامسية جديدة في حضرة جلالك وبهاك حقاً اشتاق طيب تبسمك ولطفك وسمرك الجميل الخفيف واشتاق عصافيرك الصغيرة ، لكنها يا صاحب الغربة (الكدرومية) أو (البلزندي) فكلاهم حار جاف متلاف (كما قال العارف يسر الادب والكلمة عبدُ الله علي ابراهيم) أما قبل كل عام وانت بخير واطفالك واسرتك بخير يا صاحب فالتعلم أن لا احد في حبوري فسلمي صديقتي التي اعشقها حد الجنونواهدتني ما يجعل عنقي تتطاول علي الجميع (فأتوني بغرسكم) .

---

Post: #9 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: tmbis Date: 03-26-2007, 10:37 AM Parent: #7 صديقي سفيـان .. انتشلني هذا البوست المعتق برائحة اللبــان .. وهمهمات الدراويش وحلاوة سمسمية سلمى الشيخ ســـلامة .. تروي لنــا قصص الاماكن حتى تجدنا نتحسسهــا عبر بصيرتها الحية .. ونلامس الأشياء بببساطة رغم بعدنــا .. لا أعرف كم من أعياد المولد .. مرت وانا هنــا .. لكن ما اعرفه إني احب أن اكون معكم هنــا في هذا المكــان فضموني لذمرة الأصدقــاء .. وخلوني معاكم بي جــاي يا سلمي. ـــــــــــــــــــ حاضر يا سفيان .. بجيهك

---

Post: #17 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-26-2007, 07:32 PM Parent: #9 تمبس أو علاء منصور سلمي الشيخ يا علاء طلعت صديقة لعمر منصور أما انا فابن داركم وعمار منصور ابن دمي وزهرة هي ريحانة الصداقة والمحبة أما ابناء الحارة (متوكل احمد المصطفي) فهم قلبي يخفق علي الطرقات فاي حظ عاثر ذاك الذي مضي بك في معتركات الغربة! تمبس الصوفية والنوبة كنت انسحب لهم انسحاب في قبة ومقابر ابونا الشيخ حمد النيل في ايام الاثنين والاربع ايام يسمونها (العصري) وكنت اري اصناف من البشر لم يجتمعوا الا في مقابر حمد النيل (خواجات نساء ورجال) كان الحال عجيب وكل انسان سابح في خيط ملكوته فالله تتجلي قدرته وعظمته في انها في تلك اللحظة مع الجميع يسمعهم ويستجيب لدعواتهم . اما الاعياد ومضيها يا صاحب صدقني الحال اصبح سيان لا طعم لا رايحة لكن السودانيين ولطبيعة البساطة وهوان اولي الامر استهانوا بنفسهم فغدا الطمح حد الكفاف حتي في الفرح والمناسبات. ولله الامر من قبل ومن بعد. عليك بنا يا علاء فليكن البوست للجميع.

---

Post: #28 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: tmbis Date: 03-27-2007, 10:04 AM Parent: #17 Quote: سلمي الشيخ يا علاء طلعت صديقة لعمر منصور أما انا فابن داركم وعمار منصور ابن دمي وزهرة هي ريحانة الصداقة والمحبة أما ابناء الحارة (متوكل احمد المصطفي) فهم قلبي يخفق علي الطرقات فاي حظ عاثر ذاك الذي مضي بك في معتركات الغربة! يا سلام يا سفيان .. ياخي ده ترف في المحبة .. ده ( مولــد ) عديل كدا.. بس أعمل حسابك دخول البيت ما زي خروجــو .. والله الناس ديل كان لحقو ( طقشوك ) ما بتتخارج بي أخوي وأخوك كدا.. العجب كان حضرت ليك جلسة تنظير كدا بقيادة ( الفاظر ).. زمان ( كيج ) يا سفيان كان بيجي من الثورة .. علشان يسمع شريط ( Bee Gees ) معاي ومع ( الفاظر ) بعدين في ( صولو) في النص كدا فيهو شغل بتاع ( نحاس ) تقيل .. ترامبت وترامبول .. هنا بيشتغل التنظير .. الفاظر بيقول لي ان اوكيج بلاي تابعو بتاع الترامبت ده بيقول شنو .. ؟ بنكون متابعنو طبعا حسب الاتفاق والفهم .. بعد شوية .. ( كيج ) عندو ( صولو) في النص بيقوم طبعا يشتغله ( زكر ). وبيقول لينا عن ازنكم انا عايز ( انقز ) في ( المازورة ) دي المرة الفاتت حكيت لي فاضلابي في البوست بتاع غاندي وببو بي آخر جلكسة لي كيج كلمني بيها عمار . قال لي كيج جا الزاوية وكان طاير ليهو .. قال ليهم انا عايز دراسة جدوى .. لي زاوية يكون فيها كافتيرا وفيها حبشيتين ..طبعا نا بضحك لحدي الآن . هذا ما يخص الذكري والشوق للمكان الجميل .. والشي الغريب الحسسسسع ما ليهو اي علاقة بي اي حاجة تانية سمحة في الدنيا دي .. قاعد اعمل يهو هنــا .. لكن تقول شنو لا الرزق لا الموت من الحياة معروفات.. ماشين ساكت بس. ..القـــــوم.. Quote: تمبس الصوفية والنوبة كنت انسحب لهم انسحاب في قبة ومقابر ابونا الشيخ حمد النيل في ايام الاثنين والاربع ايام يسمونها (العصري ) وكنت اري اصناف من البشر لم يجتمعوا الا في مقابر حمد النيل (خواجات نساء ورجال) كان الحال عجيب وكل انسان سابح في خيط ملكوته فالله تتجلي قدرته وعظمته في انها في تلك اللحظة مع الجميع يسمعهم ويستجيب لدعواتهم. والله يا سفيان امس كتبت ليك الرد في البوست ده واكاد اكون كتبت نفس كلامك ده .. ومسحتو حسيت بيهو جايط في بعض كدا .. حسع لقيت كلامك ده واقيف لي عليك الله في حتت الخواجات دي .. زمان كان جيرانا في الحلة كلهم برهانية بنمشي الخيمة بتاعت البرهانية في كل عيد من بداية المولد لي آخرو .. كان في كمية من ( الالمان ) سالكين من الجنسين .. بتذكر كان فيهم واحد عندو اعاقة في رجــلو الزول ده بيصر أنو يخدم الناس ويكون قريب للشيخ الراحل محمد عثمان عبده البرهاني .. طبعا كان لحظة الانشاد بيستحول بشكل غريب جدا وكمية ( بكا) مبالغ فيهاولحدي الآن مستغرب لي تسرب المحبة دي لي جواهــو لدرجة أنو يحس الكلام ده ويتعمق فيهو .. في الشيخ حمد النيل نفس المناظر دي كانت بتتكرر كل يوم جمعة كنت بشوف الخاجات ديل بي كل الحرص انهم يكونوا متواجدين وبيدخلوا الحضرة عادي جدا ويدروشو هم ويدروشو مع الناس .. وكلمة السر كلها عند شيخ الزبير الفوق معلق ده ربنا يرحمو ويغفر ليهو.. .. البوست ده بملاهو ليكم كلو دراويش.. .. *فرنكـــــش ...وود القوس الغرقــــان* بالمناسبة يا سفيان .. في بوست صغير هنــا بتلقى كاتب عن زول اسمو ود القوس الغرقان .. انا مغير اسمو بس .. تتخيل حسع براجع في الصور دي .. والله قاعد جوه الحضره مع الناس ديل .. طبعا هو شخصية من حلتنا..

---

Post: #34 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 00:32 AM Parent: #28 املانا صوفيه ونحنا اولاد الصوفية ابوى كان برهانى صديق شخصى للشيخ محمد عبده وكان لمن يعملو الحلوية فى البيت كنا بنقعد فى جوه الديوان وبنطفى النور ونقعد نسمع الانشاد ، عارف مرة زارونا ناس الامن فى البيت لامر اعتقال ما قامو لقواكتب الشيخ محمد عثمان عبده وكتب ماركسية وكتب فى الاقتصاد والقانون ومصاحف وحاجات مبالغ فيها من الكتب المهم سالونا انتو حكايتكن شنو ؟ المهم يا تنبس الصوفية فى بيتنا امرها عجب لك ودى

---

Post: #22 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-27-2007, 03:36 AM Parent: #9 يا تمبس ايها الانسان الجميل فاتنى ان اشكرك على هذه الاغنية الروحية المنسابة صوفية فيها جمالية وتجديد، كنا فى معهد الموسيقى والمسرح جاء الى السودان الفنان (الفا بلاندى) لاعب الجيتار وصديق رحلة بوب مارلى فى اوج مجده ، حدثنى صديقى العارف بالموسيقى الدرديرى احمد الشيخ انهم كانوا يذهبون الى حمد النيل كلما دق طبل وشدا شاد كانوا رفقة ذلك الفنان الذى انتج شرطا كاملا موسيقاه مستوحاة من ايقاعات القادرية واناشيد الصوفية فى النصف الاول من الثمانينات ،ولا نملك الا ان نقول مدد مدد يا اهل الله

---

Post: #37 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 00:50 AM Parent: #9 القلب قبل المكان يا صديقنا فلتهنا بالا انك منذ هذه اللحظة مكانك القلب فلتسترح على اوردته وشرايينه

---

Post: #11 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-26-2007, 11:21 AM Parent: #7 سفيان ابنى الحبيب ، يا لك من قارئ حقيقى لما كنت اود قوله ، فلقد نشلتنى فى بعض اللحظات وادخلتنى من جديد الى عالم لا استطيع عنه فكاكا ، هو عالم امدرمان ، لم اعد تلك المتعصبةللاماكن لكن لامدرمان عصبية خاصتها فهى حيث يزدهى ميدان الخليفة يوم (قفلة المولد) كنا نتسابق الى تلك الربوع محملين باشواق لا ينفض سامرها تبقى حتى العام القادم نتداول خلال لك تلك المدة وكلما سنحت سانحة ما كان من امرنا فى العام السابق (منو النام فى الكرسى وجدى شالو ومنو الكسرت بتها ومنو الاكل النمل بتها )تدور بيننا تلك المجادلات التى لا تنحاز الا لذلك الحدث ، وكلنا امل ان تعود بنا الايام للقادم من الايام ان نمشى المولد صحبة جدى الطيب

---

Post: #14 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-26-2007, 12:31 PM Parent: #7 كان المولد فاكهة نتهلل لنضجها تجدنا يا اخى ضحية من العصر فى (حرابة ) نحنا دايرين نمشى المولد الناس كلهن بتهربوا مننا لاننا (عذاب )وما (بنقعد رايقين ) مافى زول بودينا غير جدى الطيب ،الطيب،يشيل واحد فى كتفو والباقيين مجرورين (تهرع خطانا الصغيرة المغبرة لحاقا به )ويشدو لنا فى السكة باغنيات مرتجلة لكل واحد من ( يقطع الاغنية )ويلحنها ارتجالا ونتقافز خلفه كفراشات ( جدى اقيف )ويتوقف ( يا السمحات ما خلاس وصلنا ) تكون الاقدام الصغيرة قد انهكها المشى المتسارع الخطى لجدى الطيب ، ولكم كنا نتوقف كثيرا للسلام والتحايا من العابرين،هو ( متمهل فى السلام ) ونحن نود لونطير الى هناك وبين طيراننا وتمهل جدى الطيب اقف الان مترحمة عليه فله المغفرة ولنا حسن العزاء

---

Post: #15 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-26-2007, 03:47 PM Parent: #1 العباسية ذلكم المكان يا سفيان مكان للنفس فيه( شى من حتى )وامدرمان القديمة التى لم تعد كسابق عهدنا بها ، الان تحول ميدان الخليفة الى صمت حتى العيال الذين كانوا يلعبون فيه ( الدافورى ) لم يعودوا يلعبون ،المولد تحول الى مجرد ( دكاكين )خارج السور وانتفت حلاوة كانت تدهشك وانت تدخل الى ذلك المكان ، وتحول الاحتفال الى ميدان البحرية عقب ان (هد نظام مايو )السور واعادوا انتاجه؟؟ دون مراعاة للتاريخ الذى يحمله هذا البناء الاثرى ،فى كل الدنيا تبقى الاثار على حالها لا يمسها احد الا بتفويض من هيئة الاثار لكننا بلاد لا نعرف كيف تفكر السلطات فيها

---

Post: #20 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: Sudnawi Date: 03-26-2007, 09:46 PM Parent: #15 '' شاراتكم الخضراء، الصفراء، الغبشاء بيارقكم سامقه تبصق في وجه الريح (الحوليه) الخميس القادم جوقات الانشاد، الطبل الهدار مدائحكم و حفظناها (الفوليه) فيها طعم العام الماضي نريد ان ننام... '' ---------------------------------- مدينه من تراب... علي المك

---

Post: #23 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-27-2007, 04:34 AM Parent: #20 قصدت ان ااشرككمامعى فى تجربة طفلة (ماتزال ) تتمنى تلك الايام ان تعود ان نتشمم عطر البخور الذى كان يحمله ذاكم الصوفى المجذوب ، فى المسرح ثمة تقمص يحدث للمثل تجاه الشخصية وفى الحضرة الصوفية يحدث نفس الامر ، وهذا مااشار اليه شيخنا بابكر بدرى حين كان يقدم مسرحه فى العام (1903)فى مدينة رفاعة والتشخيص او فلنقل الانجذاب الذى لدى الصوفى مواز كما ذكرنا للممثل ، لكن المجذوب اكثر تقمصا من الممثل لان لدى الممثل الية اخرى هى (الهيمنة )لكن الصوفى ينساق خلف تلك اللحظة فلا تعرف من هو ومن الصوفى فيه درجة من الاتحاد القوية ، كنت اراقب مثل ذلك الصوفى الذى يزعم بعض العارفين انه دخل مع الطرق الصوفية الى السودان وتلك كانت وسيطنا للدين الاسلامى حيث المكان الوحيد الذى لم يدخل فيه الاسلام (بمرجعية ) سوى الطرق الصوفية فلا مراجع مكتوبة او اثر سوى طبول القادرية والله اعلم لكن الصوفى المنجذب فى السودان غير التركى وغير المصرى ، شهدت المصرى الذى يؤدى دورا فى مسرحية مكتوبة النص ،حتى ان لم تكن مكتوبة فهو ضمن فرقة راقصة ليس له درجة التماهى التى لدى السودانى سواء فى حلبة الذكر فى حمد النيل او فى جامع الشيخ اسحق (المكانين الوحيدين اللذين شهدت فيهما هذا الطقس)

---

Post: #41 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 02:08 AM Parent: #23 ابراهيم الجريفاوى النحكى ليك حكاية السنى دفع الله مع المولد (يوم من ايام الله فى الدوحة اتصل السنى وقال لى جاييك اوقك معاى البيت عندى ليك حاجة طولتى ما شفتيها ، مشينا بيتن ، قام جاب لى قطعة باسطة واحدة فى صحن صغييييييير ولمن سالتو عن الحاجة التانية ، قال لى حلاوة المولد كمان بيدوها؟

---

Post: #42 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 02:15 AM Parent: #41 سودانوى وهنا كان على المك رفيق الروح لخالنا صلاح احمد ابراهيم وكان فى بيت العباسية له حضور فى البيت ان لم يكن باكثر من اهل البيت انفسهم اكنوا يسمونه الفيلا ويجتمع فيه اهل الثقافة ايام ان يكون صلاحا موجود فى السودان ، وبعد فان محبة الراحل على المك فى قلب كل منا فله الرحمة ولنا ان نحمل كل الوان الكتابة لديه بيرقا لا تنزله الرياح ولا توهنه الايام

---

Post: #18 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-26-2007, 07:53 PM Parent: #1 سلمي الشيخ سلامة برضي ليك المولي الموالي وفيك لازم الصبر الجميل ياصديقتي التي من شجن وروح صديقيتي التي تصوب حبر حزنها علي الاصدقاء فتهدينا (سيرة وسريرة) نقدل بها اين ما هف خطونا لاضيم يغشان ولا حسرة ولا ندم . هذا ومن ثم يا صاحبتي وامي وروح قلبي أني هنا باقي في الزفة ووقفة المولد وفي حوائط الجالوص وسوق السمك وابتسامة شيخ هرم يتوكي عصاء ويقين أنه ملك هنا اجلس لاعرف واتعلم . كوني هنا دوماً يا صاحبة ؟ وكل نفساً توجد نصية واليصيبة المولي بيصيبة وبالغدر كم عز الدليل كم ربوعا اجدب خصيبة ومافي فجراً ما عقبوا ليل.

---

Post: #21 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: عبد المنعم ابراهيم الحاج Date: 03-27-2007, 02:54 AM Parent: #18 والله البوست يغباني ماشفتو خالص هو المولد جا.. التحية ليك ياسلمي وسفيان ..والجريفاوي غايتو انا بقول جاييكم يوم القفلة..لكن تاني يوم في العيد تب انا متحكر في واحدة من الحضرات

---

Post: #43 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 02:22 AM Parent: #18 ومافى ليلا ما عقبو ليل ، ابدا من هنا حين كبرنا كان لنا مع المولد حكايات اخرى ، كنا نحن البنات دائما ممنوعات من الذهاب الى المولد بحجة انه ( بلم الصعاليك ) وكن لانمشى لكننا من مرقدنا فى بيت العباسية نعرف اين من الممكن ان تكون خيمة القادرية واين المدائح ، ونتجاوز عن خيمة ( الحكومة )لاننا نعرف زيف المتحدثين فيها / من بعيد نتابع المشهد وننتظر اهلنا كيما يعودوا ب(اكياس الحلاوة وبنات المولد)

---

Post: #44 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 02:45 AM Parent: #18 يا نعومة تبرى من الغبا يغبى اليقول انت كعب ، البيت بيتك وجيب ال(طار )والمداح ، وناس النوبة هناك راجيينك )ما تتاخر بزعلو منك

---

Post: #24 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: Hadia Mohamed Date: 03-27-2007, 04:38 AM Parent: #1 سلمى الونااااااااسة اولاد العباسية ومنعم ابراهيم كل سنة وانتو طيبين يا سلمى النوبه دقت فوق راسى من دخلتة البوست عارفة يا سلمى لا تفارقنى احلامى ببنت المولد الكبيرة حتى الان كل عام احلم باكبر حجم من بنات المولد ولكن اخرج من المولد بحجم صغيرونى وسمسمية وفولية وحمصية وطرب وانشاد جميل لايام المولد طعم ونغم متجدد كل عام نحن ابناء حوش الافندى اكثر الناس حظا بجوارنا لحوش الخليفة ننام ونصحى على الانشاد الدينى ونوبه اهلنا القادرية وانشاد اهلنا السمانية ورائحة الشواء والطعمية المعروضة للبيع فى اركان حوش الخليفة وعجاجة كرعين المحتفلين بالمولد سلمى مالك علينا يا بت عمتى سكينة . الجاب سيرة عمر منصور منو ؟ هسى بظهر فى الصيف دة وبنلاقيه طالع لى فوق راس مسرح وبعزف.

---

Post: #25 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-27-2007, 05:20 AM Parent: #1 يا بت الخال سلام يغشاك تعرفى فى قدام حوش ناس جدى البيلى كنا بنقيف لزوم السلام على خالى جمال محمد عبد الرحيم كان دائم الجلوس فى امام البيت ، كنا نعبره صحبة جدى الطيب وحتى بعد ان كبرنا كان خالى جمال ذلك مكانه الاثير يلتف حوله شباب الحى وهو رجل (حكاى ) كما هى عادة اهل امدرمان ، يرحمهم جميعا فلقد خلا ذلك الحوش العاج الضاج بالناس تفرقت بهم السبل وبقيت اثارهم محكية وددت لو ادون كل ما اعترى امدرمان القديمة من تغيير لدرجة ان الواحد يشك هل هذا شارع الفيل؟ وذلك شارع البدوى حيث قبة الشيخ البدوى (جد سعاد الفاتح وزينب واخوانهما )كل البيوت القديمة تحولت نواصيها لدكاكين ، ومصحات علاج ومطاعم ،اختفى كشك عم سعيد الذى كنا نعبره فى طريقنا الى بيت الخليفة، تحول جزء من بيت داؤد الخليفة الى مستشفى ، القبة نفسها اعتراها الهرم ، جامع الشيخ اسحق حمد النيل بدات عوامل التجفيف البشرى تحده وتوشك ان تجعله نسيا منسيا فلا صيانه ولا ترميم ،تدخلى الى شارع الهاشماب فتظنى ان الناس ليسو فى حالة حياة ،ميدان (السرايا) صار منسيا ، الاطفال لم يعودوا يلعبون ( كرة الشراب والدافورى )كل الامكنة اعترتها يد التغيير والتعمير لكن الرائحة ما تزال تحملها دواخلنا عبق تلك الايام حين كنا نخرج فى الامسيات فى جماعة باتجاه ( كشك عم حسن قرشى )نشرب ليمونه الطارج ونحمل معنا ( اكبر جك فى البيت حتى يشرب من فى البيت من ليمون عم حسن قرشى ) الان وجدنا ان سور بيت الخليفة عاد مكانا لتجمع اكشاك تبيع الحلوى وبمبالغ طائلة لا تطالها يدى الفقراء ، لا تجدين اثرا للاحتفال بالمولد مثلما كان فى تلك الايام انطوت صفحات كانت مليئة بالحياة ليحل بؤس غريب على الامكنة وضجر تحسه فى وجوه العابرين والجالسين فى ركن عم جمال بعد رحيله عليه الرحمة

---

Post: #27 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-27-2007, 09:22 AM Parent: #1 Quote: يابا محمود Quote: (بت الريف ) Quote: طرقات (سيد اللبن ) Quote: (التمنة) Quote: بكفتيراتهم المربوطة الى كوانين صغيرة Quote: وجردل صغير مرصوصة فيه( الكبايات ) Quote: سوق( ام دفسو ) Quote: حي الامراء Quote: الحوش Quote: قدح الدم Quote: مرفعين الفقراء (شوف) ومحبة ودمعاً جاري

---

Post: #29 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-27-2007, 12:15 PM Parent: #1 وهنا حلقة شيخ يرجحن يضرب النوبة ضربا فتئن وترن ثم ترتج هديرا او تجن محمد المهدى المجذوب

---

Post: #30 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: bent-elassied Date: 03-27-2007, 12:43 PM Parent: #29 Dear Selma, I am really appreciate and enjoy your contributions and writings very much Go further and forward With Sunny and warm regards Mey El-assied

---

Post: #32 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: Ibrahim Algrefwi Date: 03-27-2007, 10:16 PM Parent: #30 ( ن ) . . خادم أعتاب السادة العركيين . . . سلمي ، أنا هسه جاي من المولد مشيت مع سفيان ، هو داير إصور ليك جمال الناس ده وأناماشي ساي حوارك . محبة في نديهتك دي، ياها الودتنيي لي إحبابو. أها كان ربنا قبل أنامُتنازل ليك عن عشرة في المية من نصيبي والباقي يقسطوليك سفيان . . وأدينا من ريدك مدد اّنفيسة بت الشيخ عبدالرحيم ...

---

Post: #38 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 01:24 AM Parent: #30 يا مى ،اين مى ؟ اهى فى رياض النيل ام ...يا مى اشكر لك جميل ما كتبتينه وموفور الاحترام لشخصك

---

Post: #36 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: ابوعسل السيد احمد Date: 03-28-2007, 00:48 AM Parent: #29 أيا سلمى بما أنني قد قاسمتك سفيان و الجريفاوي، لكن متاخرا، فأجدني معنيا جدا بهذا الزخ الحميم بذات درجتهما، و إن تفرقت بنا الأجيال و الدروب و المنافي ما نسميه منها غفلةً بالوطن و ما ندعوه بالمنفى البواح. هأنت قد نقلت إلينا المولد فصرنا نحمله داخلنا إلى جوار الشيئ الحزين الذي نسميه الوطن، فيبتهج بتداعيك و بالصور حرفيها و مرسومها و دفق الأماجد هنا؛ سفيان، تمبس، منعم، إبراهيم الجريفاوي و كل هؤلاء الخُلّص و الماجدات. شكرا أنك قد أهجت في النفس جرحا غائرا لن يمحوه عسف المنافي و قسوة الحياة. فالحياة، كما يقول المبدع ميلان كونديرا، هي في مكان آخر. تعيشي

---

Post: #45 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 03:15 AM Parent: #36 الاخ العزيز ابو عسل رد الله غربتنا يا صديقى ، ها نحن نجتر الذكريات فى كتابتنا عسى ان تملا لنا فراغا نحاول اليه بكل السبل ، تبدو كتاباتى جميعا على هذا النحو المرتكزعلى الذكريات لكن لاباس دعنا نحاول ان نعيش الواقع كما هو حتى نلتقى على ضفاف البلد الحبيب وفسحاته وحلقات ذكره ومرابط افراسه ونساءه الجميلات امهاتنا واخواتنا كل ماحوى يا صديقى نحبه ، لك ودى

---

Post: #39 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: Soumeta Date: 03-28-2007, 01:41 AM Parent: #1 طب يا سلمي تصدقي من ما دقيت باب الدنيا،، ما مشيت مولد!! اما المديح ف تأثيره غريب علي من وقت لآخر،، إلي حين حكوة،،

---

Post: #40 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: خالد Date: 03-28-2007, 02:06 AM Parent: #39 مولد الخليفة والزفة بتاعتوا بالنسبة لي اهم من القفلة !!! يا سلمى !

---

Post: #52 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 07:06 PM Parent: #39 البنية ام زين ، تعرفى امك غلطانه ما ودتك المولد ، لكين زمنك فارق ، لانو المولد حولوه فى فترة من بيت الخليفة لميدان البحيرة ومحلة (غميسة ) لكين النحكى ليك ، لمن رجعوا المولد لمحله امك كانت ما موجودة عشان كده حصل الحصل ،هسى انتى كان باريتى ابراهيم وتمبس وسفيان ديل بوروكى المولد (ما بعد الحداثة )شفتو السنه الفاتت لكين مازى حقنا شيتو براهو وملامحو مختلفة ، اولك يا بادى دكاكين الحلاوة بقن بره الساحة وحلاوة المولد ذاتا ما زى حقتنا الزمان غبشا ومسيخة ،ومعلبة وغالية (ما جادة)لكين بس ابقى مبارية الشباب ديل بوروكى المولد وكل سنه وانتى طيبة والمولد الجاى فى نص الساحة سوا

---

Post: #53 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 07:19 PM Parent: #39 خالد العزيز يا سلام عليك ذكرتنى قفلة المولد امى رحمة الله عليها كانت بتحكى لينا عن (زفة ) لكين ما بعرفا ياتا هل زفة المولد ولا العيد لانو كانو ازى ماحكت (بطلعوا فيها ناس الاشغال اليدوية ناس النجارين والخياطين ، الحدادين ، الخراطين وديل البخرطو العناقريب فى سوق امدرمان ، النجادين وغيرهم بجوا مارين بالاحياء راكبين الكارو ، سييييرة طويلة عريضة والشفع فى ضهرن ، كل صاحب مهنة بقول مهنتو والعيال يقولو مثلا العز لمين ؟ الخياطين يقولو للخياطين والعز لمين للنجارين ، والسيرة دى بتلف امدرمان القديمة طبعا لمن تتم الاحياء كلها)اظنيتك كمن بتبارى الزفة وما قلت ليك (كل زول بكون شايل الادوات بتاعتو النجار شايل المنشار والشاكوش ، الخياطين خاتين مكناتن فى ضهر الكارو وكل زول شايل حاجات الشغل حقتو )ولا عندك زفة تانية احكى لينا بيها النمل يقرصك كان ماحكيت

---

Post: #46 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-28-2007, 07:26 AM Parent: #1 قدح الدم طين وروح وتراتيل وحائط يشهد الزمان علي انتماء العارف بالله أحمد محمد (قدح الدم) طالت الجدران الخرصانية وانت يا سيدي كما انت لم يرهقك الزمان ولم تعلو صفحت وجهك سوي السماحه بذات الوسامة وجدرانك العلامة شاهدا شاخصا منذ 1898م . وقبة السيد البدوي قائمة وامتد حولها شارع الاسفلت :- مسجد ومصلي (مرفعين الفقراء) والصلاة قائمة لفريضة العصر قيل عنك يا سيد الفقراء أنك كنت امامهم في الزهد والبساطة واحقاق حقهم فاطلقوا عليك حاميهم ومرفعينهم وكان قومي في القديم يا سيدي اهل مرعي وماشية ولبساطة منبتهم ومعيشتهم يحبون أن يطلقوا علي العلامات من القوم مثل هذه الاسماء فكنت (مرفعين الفقراء :- والفول (مُحلي) والفول (مُملح) سيدتان بجانب من مولد (المصطفي -ص-) مجهدتان ومجتهدتان ولكل رزقه:-

---

Post: #47 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-28-2007, 08:42 AM Parent: #46 ودخلنا (الحلقة) النوبة ترز القوم القوم القوم وحكي لي صديقي ابراهيم الجريفاوي أن بمدينة (ابو حراز) ذات التسعة وتسعين (بنية) كانت هناك امرأة صالحة (حبوبة) صديقنا عبد الرحيم حسن حمد النيل (ابوذكري) تُُدعي (السيدة نفيسة بت عبد الرحيم) من قلب السادة العركيين يحبونها الناس جميعا وقد لحقت روحها الامد ومضي عمرها بين الاخلاص والمسد فسلمت الروح طايعة لخالقها الا أن احد الدراويش (الغرقانين) حين (تجذبه) الحضرة يصيح باعلي صوته وهو يهتز :- أنا نفيسة بت عبد الرحيم ! ويخدمهم بمحبة وصف بين (مرقعة) وبين ملبس حديث بذات المحبة وذات الوجوه (البشرة) خدم السادة (مدد مدد) الرايات

---

Post: #54 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 07:32 PM Parent: #46 سفيان العزيز انا مشتاق لى زمانو وطارى ، وطارت ابراج الراس حين شهدت ما اشهدتنى ، هناك حيث قبة الشيخ البدوى تلكم البقعة التى شهدت اولى عتبات المعرفة لدنى حيث كان الشيخ لم اعد اذكر اسمه كان يعلمنا قراءة الاحرف الاولى فى الخلوة للسور القصيرة من القران الكريم حتى وصلت ياسين ولم اكن قد دخلت المدرسة بعد ، وحين كان يوم الخميس و(ختمة الجزء) كانت امهاتنا يحملننا ( البستلة )ممتلئةكل ما استطاعت اليه حبا وكرامة للشيخ ، وكانت (البليلة )بكل انواعها يصبها الشيخ الى صينية كبيرة ونلتهم ما فيها متدافعين ( متكومين احيانا فى قلب الصينية ) كنت الفتاة الوحيدة بين كل اولئك الصبيان ، فكان يجلدنى (الفلقة ) كما يفعل مع الصبيان حتى كان يوم شهدته امى نفيسة فقررت ان ( (مافى خلوة ، البت امانة يا حاج بتدور تعميها ) ويبدو ان تلك النظرية من امى نفيسة حجبت عنى ما تبقى من الاجزاء من القران فى الخلوة ، مع ذلك حفظتها وما زلت حتى الان

---

Post: #48 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 05:15 PM Parent: #1 راجعين للزمن الزين حيث الانسان والانسانية عامل من عوامل البناء الحضارى والانسانى

---

Post: #50 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: عشة بت فاطنة Date: 03-28-2007, 05:48 PM Parent: #48 سلام سلمى يا طريتينا زمن النداوة ووالجمال والذي اصبح حكايات نغازل بها ذاك الزمن الطيب حكاياتك مطرزة بالحنين وبساطة اهلنا ولمتهم في الحيشان بالوان طيفهم ، شكرا سلمى على كل هذا الجمال وكل مولد وانتى طيبة

---

Post: #51 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 06:44 PM Parent: #50 يا عشه بت فاطنه يا صاحبه فى الزمن الصعب شوق من هنا حتى نلتقى متين ما بعرف لكين حيحصل ، الحيشان يا عشه اختى حليل زمنهم بقت البيوت علب كبريت والناس محشورة فيها بقت الناس المحشورة جارية وبقى الجرى سمه عامة ، يا حليل (ناس ديك الزمان بجونا)مافى زول بمشى لى زول الا بالتلفون ومواعيد ، مرة السنى قال لهاشم صديق سلمى الشيخ بتسال منك ودايرة تعمل معاك مواعيد عشان تجيك زعلو الكلام دا فضرب تلفون قال لى تجى هسى دى ، مشيت يا عشه وقعدت معاهو سته ساعات بنات حفرة ورانى وليدات نعمات وين ؟البت والولد فى الجامعة واهدانى كل الدواوين الطلعت ، واتذكرنا ايام المعهد وزمن ( الدنيا بى خاترا والقعونجة بى راجلا )لكين يا عشه اختى البلد بقت طاردة والناس اتشعكبت (باطن وظاهر )الا ياهو المقسوم بت امى ، يا حليل الناس العدال البسيطين الكنا بنعرفن ، يا ماتو ولا انسحبو خلف الكواليس وحال الدنيا ، خليناك فى العافية يا العديلة

---

Post: #49 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: عمر الفاروق Date: 03-28-2007, 05:38 PM Parent: #1 جيت أسلم عليك وأقول ليك يا عجوزة أمبارح في يوم المسرح جابو سيرتك الدكتور فيصل احمد سعد جاب سيرتك وقال مثلتي معاهو اها خبزتي لي عيد المسرح ده ؟ تحياتي..

---

Post: #55 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-28-2007, 08:16 PM Parent: #49 يا عمر الفاروق ذلك زمان نضر ما برجع تانى ، كانت اول مرة اقيف فى خشبة المسرح القومى فى امدرمان والمسرحية كانت ( كيف تصعد دون ان تقع ) وليد اخلاصى اخراج صديق نور الدين ولاول مؤة اكون بطلة مسرحية شفت(الزمن يايمة ساقنى بعيد خلاس جرعنى كاس ) ومشيت خليت المسرح والسودان والناس السمحة وكلام كتير بقولو القلب

---

Post: #56 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-29-2007, 02:36 AM Parent: #55 فى انتظار ان يعود الشيخ العارف تمبس

---

Post: #57 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: عبد المنعم ابراهيم الحاج Date: 03-29-2007, 03:05 AM Parent: #55 مدد مدد في اول الاحلام ..اخر ليلنا الزنجي اجلس تحت غابات السماء الباسقة ..يندس في جوفي رحيق الحرف تشحنني بنود الاسئلة.. لبست جلابيتي اللبنية ذات الياقة وشدة "السكر" البيضاء ثم دلفت لعربة "البدفورد"نصف نقل تلك التي تعمل بالبنزين مكتوبا علي جانبها السعادة ..وضعني ابي علي حجره بعد ان جلس علي مكانه من الكنبة "فيس تو فيس" مع الكنبة الاخرى.. كلهم في البياض تجلببت اجسادهم ..ولامست وجدانهم اطراف حضرة بعيدة..فناشدتهم: - ياربي صلّ وسلّم دائما ..ابدااااا علي حبيبك خير الخلق كلهم.. صوت المادح يتغلغل متماوجا مع ميلانات العربة في طريق متوعر ..بين بساتين الموالح الكسلاوية وانين "اللساتر" الحنين يغرف الاصوات مع مياه المترات ليدلقها في الروح ..الطقس يبعدني عن الفة القرية التي احسست ابتعادها ملايين الاميال ..فاقترب منها كل ما اصطدم طرفي بعيني طفل في مستوي عمري او اكبر قليلا كان ياخذ نفس وضعيتي من ابيه ..لا حقا تعرفت عليه بشكل افضل ربما بعد شهرين او نحو ذلك .. ونحن ندخل السنة الاولي في مدرسة ابتدائية.. نواصل

---

Post: #60 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-29-2007, 05:04 AM Parent: #57 عبد المنعم يومك زى العسل منتظرين باقى الحكاية

---

Post: #58 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: abubakr Date: 03-29-2007, 03:56 AM Parent: #1 اهل الدار ... وددت لو الكبسيبة البرة دي بس مرت بجاي ثواني لراقت دنياهم ودنيانا ... جيت اتاووق .. قريت كلاما سمح ومديحا عجب بصوت عجب ( بالله ما في واحد يجي ناطي " يابربري مالك والمدائح ما قالو ما عندكم دين ؟ " ) والله وانا لسه في الاولية ( دي في سنين بعيدة يا تمبس .. يعني مع الاستقلال ..قام ابوي الله يرحمو جاب اولاد حاج الماحي وكانت ليلة ليلاء تحت شجرة لالوبة - جنب بيتنا- كبيرة في حي السكة حديد في كوستي .. اها قعدت اتفنجر بيها علي اولاد السكة حديد وحلة النصر لحدما فت كوستي برضو يا تمبس قريب من الاستقلال )... جعلتم صباحي نيرا ونايرا وانا في سبيل يوم عمل طويل في بلد تاخذ اللجم والعضم وسيكون ما قرات وسمعت دافعا يمكني من يوم عمل يتجاوز الا ربع عشر ساعة... فتكم بعافية سلمي : اهل الدار دي يعني ما بتضيع حقك فالبكان بتاعك بوضع اليد (الاصابع العشرة .. شفتي كيف البربري حقاني) مودتي ابوبكر

---

Post: #59 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-29-2007, 04:58 AM Parent: #1 شيخنا العارف ابوبكر البيت بيت الجميع متعة ومديح ونوبة وذكر للكريم المصطفى صلى الله عليه وسلم ، بيت من ملامح كل زول من جدى الطيب ومن بنات الماذون ليكم مفتوح نارو ما بتنطفى وشوق اهله للزمن السمح ماخفى ، ادخلو جاى على التكية جدى قاعد ومنتظركم بالفطير باللبن ولا الشعيرية (كان جدى عبد الرحيم الحاج،عندو حوليه ولا حضرة تقريبا بجى فيها عمنا الحضرى ومديح وذكر وانشاد وتلاوة وكلوونحنا نتاوق اتعلمناتلاوةالقران واتعودنا على الضيفان ، حبابك الف

---

Post: #61 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-29-2007, 07:31 AM Parent: #1 Quote: أصلي صلاةً تملأ الأرض والســماء على منْ له أعلا العُــــــلا مُتبَـــــوَأ أقيم مقاماً لم يقم فيــــــه مُرسَــــلٌ وأمســـت له حُجُبُ الجلال توَطـــأ إلى العرشِ والكرسي أحمدُ قد دنا ونورُهما مِنْ نــــــوره يتـــــــلألأ أراهُ من الآيات أكبـــــــــر آيــــةٍ وما زاغ حاشــــى أن يــزيغ المُبرأ أتاه الندا يا سيد الرســــل لاتخف أنا الله مني بالتحيــــــات تُبــــــــدأ أردناكَ أحببناكَ هــــذا عطـــاؤنا بغير حســابٍ أنت للحب منشـــــأ أخلايَ مَنْ يُحصي مديحَ محمــدٍ وفي مدحـــه كتُبٌ من الله تُقـــــرأ أعِدْ مدحَه إنّ القلوبَ تحبـــــــــه بأمداحـه تجلى إذا هي تصــــــــدأ أتيت إلى مدحي عُلاه مُبــــــادراً لعلي بغفران الذنــــــوب أهَنّــــــأ أنا رجلٌ أثقلتُ ظهري بـــزلــتي ومَنْ زلّ يــأوي للشـــفيع ويلــجأ سلام لاهل الحضرة واهل أم درمان سلام يامنعم ويا ابوبكر ويا كل الاحباب وياستي عشة سلام وحمداً علي جيتك شوفوا لينا ياناس صوت الشيخ(علي المبارك) وياعشة الاعتماد عليك شوفي اخونا (راكوبة) او (عمنا تنقو) ايوة علي المبارك علي المادح علي الجذار الله يرحمو. ــــــــــــــــــــــــــ الانشاد من تاليف الزاهد الشيخ:- مجد الدين محمد بن أبي بكر بن رشيد البغدادي التعديل لتوثيق المؤلف .

---

Post: #62 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-29-2007, 10:37 AM Parent: #1 up

---

Post: #64 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: عبد المنعم ابراهيم الحاج Date: 03-30-2007, 08:24 AM Parent: #62 Quote: عبد المنعم يومك زى العسل منتظرين باقى الحكاية بت الشيخ كيفنك""" نواصل وصل بنا الحال عند سفح الجبل حيث ضريح السيد الحسن وقتها لم اكن ادرك عن الحركات الصوفية "فتخلق في النفس احساس بالرهبة وقد كنت اعتقد بعقلي الصغير انني وصلت آخر الدنيا حيث بيت الرب الجبل لا يمكن ان ترى نهاية قمته وانت تحته مباشرة والجموع الغفيرة وتداخل الاناشيد النبوية بلهجات لم استطع فك شفراتها في ذلك الوقت - هسنيا هسن ياهسنيا هسن ياسولتانا الزمااان ..ياهسنيا هسن ورائحة الابخرة المتصاعدة من بيض النار الحامي والحلويات الشعبية، والمستوردة تضفي علي الروح بعدا تمتزج فيه روحي اليافعة وتفيض بسحر مدهش ..كان علي ان امسك طرف جلابية ابي حتي لا اضيع في زحمة يتشابه فيها البياض ، المريدون مثل حند في معركة اسطورية ومشيتهم المستلفة من تدريبات بارعة تناغم ايقاعاتها محاربين اشداء اقمنا ليلنا ذلك لم يغمض جفن لكائن حتي اصبحنا في طقس آخر "البرزنجي"

---

Post: #68 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-30-2007, 04:45 PM Parent: #64 يا لروحك يا صديقى يا لنا من طقس ازلى نمتح منه كلما اعيانا الزيف المدنى والحضرى نعود مثل غرباء الى الذاكرة الحاضرة فينا ، نحن جماع شعوب تختلف وتتفق لكننا فى الحب مؤتلفين اكتب يا منعم اكتب سيرة خفية لك موصولة ومضافة الى سير الذين نحبهم لنكتب ذلك التاريخ السرى لعلاقاتناالانسانية المعطونة فى الحب والوجد الصوفى الذى جبلنا عليه اينا كان من اى مكان فى ذاك البلد الشاسع المترامى كالابد ، فنحن نتعرف على عادات لم تكتبها كتب التاريخ البائرة لنؤرخ لمثل ذلك الجمال الخفى لنتعارف اكثر امتعنى سردك القصصى فهلا شدوت لنا اكثر

---

Post: #65 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: abubakr Date: 03-30-2007, 08:37 AM Parent: #1 فوق كل السواري فوق تسلمو

---

Post: #66 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: نهال الطيب Date: 03-30-2007, 01:45 PM Parent: #65 للله درك ياسلمى حلقتي بي في تلك الأمكنة كمن عاش فيها ومر بأحداثها هيجت في مشاعر بالشوق العارم لاولئك الغائبين من تركناهم ومن تركونا من رحلنا عنهم ومن رحلوا عنا ياآلهي كم افقتدهم وافتقدأيامهم و هذه الذكريات الحبيبة كل مولد وإنتي فينا وكل سنة وإنتي طيبة

---

Post: #69 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-30-2007, 04:51 PM Parent: #65 وتسلم يا هندسة فنحن ابناء الصوفية تششدنا من طرف الثوب فلا نتردد فى المشى خلفها نمشى خلف النوبة وحلقات الذكر نتهادى وتمتزج اللحظات السكرى بعبق البخور ونرتد طبلا ونئز بشهقة الحياة ومنها وفيها ، نرمى بهمنا ونتحد بلحظة الايقاع والدفق الممتد فيها نشوة لا تضاهى وعبق يلتصق بالقلب الى الابد

---

Post: #70 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-30-2007, 05:03 PM Parent: #65 الحبيبة نهال يا عنبرنا الفواح مازلتى فى ريعان الزهو بعد فازدهى وحلقى فى الفضاء البكر لدنك واكتبى العنبر دعينا نشتم عبيره والورد وفوح القرنفل يا زهرة الربيع الابدية

---

Post: #67 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سفيان بشير نابرى Date: 03-30-2007, 03:16 PM Parent: #1 سلام يامنعم سلام سلام

---

Post: #71 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-30-2007, 05:15 PM Parent: #1 كسلا كانت جد حزينة سواقيها وشوارعهاحين شهدتها اخر مرة العام الفائت، لكنها التى تغنى بها الجميع حبا ونضارة اكتسبتها طويلا بسواقيها وجبالها وحبال الالفة التى مدتها للشعراء والمغنيين

---

Post: #72 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: خالد Date: 03-30-2007, 05:57 PM Parent: #71 Quote: خالد العزيز يا سلام عليك ذكرتنى قفلة المولد امى رحمة الله عليها كانت بتحكى لينا عن (زفة ) لكين ما بعرفا ياتا هل زفة المولد ولا العيد لانو كانو ازى ماحكت (بطلعوا فيها ناس الاشغال اليدوية ناس النجارين والخياطين ، الحدادين ، الخراطين وديل البخرطو العناقريب فى سوق امدرمان ، النجادين وغيرهم بجوا مارين بالاحياء راكبين الكارو ، سييييرة طويلة عريضة والشفع فى ضهرن ، كل صاحب مهنة بقول مهنتو والعيال يقولو مثلا العز لمين ؟ الخياطين يقولو للخياطين والعز لمين للنجارين ، والسيرة دى بتلف امدرمان القديمة طبعا لمن تتم الاحياء كلها)اظنيتك كمن بتبارى الزفة وما قلت ليك (كل زول بكون شايل الادوات بتاعتو النجار شايل المنشار والشاكوش ، الخياطين خاتين مكناتن فى ضهر الكارو وكل زول شايل حاجات الشغل حقتو )ولا عندك زفة تانية احكى لينا بيها النمل يقرصك كان ماحكيت yaaaaaaaaaaah ya salma ma yaha alzafa alana ga9idha zatha i'll be back

---

Post: #73 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-30-2007, 06:23 PM Parent: #72 ومنتظرينك بالزفة يا خالد والليلة قفلة المولد كل سنه وانت طيب وجيب لينا معاك (حلاوة مولد)

---

Post: #74 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: عمر الفاروق Date: 03-31-2007, 07:04 AM Parent: #1 الأستاذة سلمى : تحياتي.. العباسية وما ادراك ما ازقّتها الملتوية وتعريجاتها البهية .. كم أشتاقها بتلك الصورة وكم احبها بتلك الصورة ولا اتمنى ان يأتي زمان يقال لنا فيه نود تخطيطها حتى نرى فيها ملامح المدينة .. نعم نريدها هكذا جامع الفلاتة محطة عابدين خور ابو عنجة شارع الفيل سوق الموردة بهناك جوامعها الصغيرة بروشها المفروشة في الطرقات .. بالأمس القفلة ويا له من يوم !!! كان هو اليوم الذي تجتمع فيه الأسرة الكبيرة سابقاً حيث يأتي الغاصي والداني من الاسرة من يسكن الثورة ومن يسكن ودنوباوي ومن يسكن امبدة ومن يسكن الخرطوم .. كان الجميع يتفقون دون موعد ويتلاقون دون تحديد فساعتنا البيلوجية هي من كانت تخبرنا .. لا نخطط للقيا فالكل يعرف انه سيأتي للبيت الكبير حوش الشيخ صديق العجب عليه رحمة الله .. والكل يعرف أنه يجب أن نقف اليوم مع الخالة أنصارية عليها رحمة الله وهي زوجة الشيخ محمد كزام حيث خيمتهم الكبيرة والطريقة القادرية والعركية حيث يجب ان يقفوا معها وقفة الأهل في إعداد الفتّة بينما نترنح نحن مع النوبة .. ولكن كان علينا كلنا تقديم الولاء والطاعة في خيمة الأنصار وكأنها بيعة الأنصار ونسلم على كبارنا ونستمع لشئ من الراتب ثم محاضرة .. كنا دوماً ما نجلس للشيخ أحمد المهدي والامام الصادق ومن ثم تبدأ جولتنا للحلويات .. كان الجميع يلتقي في الحوش الكبير لأن الوقت يكون متأخراً ولا مواصلات ولا يحزنون .. شارع الموردة مقفل.. شارع المستشفى اقدام بشرية .. الملازمين تكسو عماراتها الإنارة وميدان البحيرة ويا له من ميدان .. دوماً ما كنت أعشق طريق العودة من خلال البلدية ثم سرايا كلية شرق النيل ومدرسة الموردة بنات ثم مطعم الفاتح الكوتش وصولاً لخور ابو عنجة وشجرة اللالوبة .. اقرب لحاف أو مرتبة من جوة البيت تجي تفرشها في أحلى "برش" والنوم في الشارع !!!!! يا سلااااااااااااااااااااااااااام على نوم الشارع !!! ما ان تصحى صباحاً وأشعة الشمس تتسلل إليك من خرم ملاية مقدودة وبداية يوم جديد تشيل لحافك وجري على المطبخ والسباق المحموم للظفر بكباية الشاي باللبن لأنو الليلة العائلة كلها ملمومة والشفّع غزو المطبخ باكراً والكل يتباهى بحلوياته .. دي عروستا أكبر من دي وده أشتروا ليهو حصان وديل شايلين حلاوة لكوم والمرطبين يتباهون بجوز الهند .. وما أروع عروسة المولد وهي تتوسط " الفضّية " وتتحكر وسط الصحون والكبابي وأطقم الشاي .. وما أروع الفرجة عليها ونحن نستخسر أن نقضمها فنخرّب منظرها وننتظر أشجعنا ليبدأ بتناول حلوته .. وأخيراً وبعد ثلاثة أيام نبدأ بكضم جزء صغير من الحصان وشويتين ودي تاكل ليها حتة من عروستها واخيراً نتفق أن نسيّح جميع الحلويات عشان نعمل " كستر " ...

---

Post: #75 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: سلمى الشيخ سلامة Date: 03-31-2007, 02:55 PM Parent: #1 يا عمر الفاروق كل عام وانت تحتفظ بتلك الصور البديعة فى ذاكرتك كل عام ونحن نحتفل بمولد الرسول الكريم بلا قيودانك تنتمى لتلك او هذى من الطوائف التى هدت ظهرنا ، كل عام والنوبة تضرب وتئز لوجه الجمال الذى نحن اسيريه، كل عام والامة بخير والحياة سهلة والحلوى فى ايدى الصغار لذكرى المولد، كل عام ونحن امة غشاها الاتحاد على الكلمة الطيبة والاحساس الدافق مودة لا تناحرا واقتتالا ، كل عام والوطن بخير يا صديقى اخاءا وسلاماوحبا يتعاظم لبناء تلك الربوع والنهضة بها الى ذرى العالم وقمم الامم التى تعرف قيمة مواطنيها لك الود

---

Post: #76 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: نهال الطيب Date: 04-01-2007, 06:46 PM Parent: #75 يلا فوق

---

Post: #77 Title: Re: الى صديقى سفيان نابرى وابراهيم الجريفاوى وكل ابناء جيلهما ... الماشى المولد يجى بى جاى Author: Soumeta Date: 04-02-2007, 04:54 PM Parent: #1 نوبة،،