Post: #1
Title: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: محمد ادم الحسن
Date: 03-23-2010, 06:46 PM
Parent: #0
لا شك في أن الاستاذ جمال حسن سعيد واحد من اعظم المسرحيين السودانيين الموهوبين
بجانب موهبته الشعرية الفذة.
فارجو من الاخوة المسرحيين الاستاذ محمد السني
والاستاذ عبد العظيم حمدنا الله
والاعزاء محمد عكاشة
ومطر قادم
وقاسم مهداوي
اقول لكم بان الاستاذ جمال حسن سعيد يستحق بوست توثيقي
لشبابيك ، وشعيرية ، وأبو الدرداق
واظنكم عرفتوا..
|
Post: #2
Title: Re: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: محمد ادم الحسن
Date: 03-23-2010, 06:51 PM
أظنك عرفتي
جمال حسن سعيد
أظنك عـرفتي عواصفك مهبـي
يسارق خيالك يسوقني ويــــــودي
ونهـرك يعـدي ويجهـل مصبـــي
هواجسي البتزرع وظني البيربـي
بديتك خواطر بتصحى وتسـاور
وطيفك يـزاور وروحـك تحــــــاور
تجيني في زمانـك موشـح أساور
أقـول بس نسيتك وجرحـك يتـاور
أظنك عـرفتي عـذاب المغـني
وطبلـوا المجـدع شظايـــا التمـني
حروفوا البتجزع في لحظة تـجني
خطـاه البتـهــــرع متيــن تطمئـني
مسـرج خيـالك حصاني القبيــل
معربــد غبــــاره وخـلى الصهيــــل
مسـافر مســـافر وفـــــاقد دليــــــل
أظـنـــك عـرفتي همـــوم الرحيـــل
|
Post: #3
Title: Re: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: محمد عكاشة
Date: 03-25-2010, 09:52 PM
Parent: #2
كيفك يارجل
جاهزين بس ادينا شوية مهلة
كل الود
|
Post: #4
Title: Re: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: حبيب نورة
Date: 03-25-2010, 10:20 PM
Parent: #3
أنا غايتو بساعد بي دفرة البوست
لكن حاول تركز علي السني و عكاشة
أما بخصوص أبو الأمطار و حمدنالله و مهداوي
فأظن أنهم في غيبوبةٍ يعمهون
لكن إنت أخبارك شنو
أسعار الدقيق الإسترالي وصلت وين؟
|
Post: #5
Title: Re: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: محمد عكاشة
Date: 03-25-2010, 10:27 PM
Parent: #4
حبيب الحبيب
عظمه ماعارف الحاصل بيهو شنو لكن قسوم حايجيك ناطى هسع..
اعمل نايم كويس ..
بخصوص جمال حاننجض ليك حكاياتو نجاااض..
انت وناس استراليا..الدفرة مهمة..
كل الود
|
Post: #6
Title: Re: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: حبيب نورة
Date: 03-25-2010, 10:42 PM
Parent: #5
يازول نتجادع البوست
بس قول لي مطر
خلي الدماغ صاحي يا عم
|
Post: #7
Title: Re: السني ، وعكاشة ، وعبد العظيم حمدنا الله ، ومطر قادم دايرين بوست توثيقي عن جمال حسن سعيد.
Author: سلمى الشيخ سلامة
Date: 03-26-2010, 00:05 AM
Parent: #6
رغم انه اسمى ما مكتوب لكين اهو
صاحبى جمال
من قبل اكتر من عشرين سنة
ما بعرف بديت اكون صديق لجمال متين ؟
لكن لقينا روحنا اصحاب
بنسال عن بعض بنفتش بعض
بنحكى لبعض عن الهم المشترك
يدخل جمال حسن سعيد الى حد راكوبة حجة سكينة الخاصة فى قعر بيتنا فى امبدة ويطالب بفطور رمضان بسرعة
رفقة خطاب حسن احمد وعميرى بطبيعة الحال
زمن اخضر وجميل
العام 1988 ذات عصرية هيابة النسمات حلوتها
قال
ـ داير اسمعك حاجة كتبتها الليلة
"عادة يحفظ جمال قصائده فى الذاكرة كما القدال ومحجوب شريف ، ويحى فضل الله "
ساقنى من ايدى مشينا من المسرح على النيل قدام المسرح كان فى زول عنده زراعة هناك
قعدنا فى الواطة وقعد جمال يقرا لى
ـ اظنك عرفتى عواصفك مهبى
ولمن تم القصيدة كنت حفظتها
ما سمعتها تانى الا لما لاقيت مصطفى سيد احمدفى القاهرة
يلااحكى ليك عن جمال
جمال دا زول سمح شديد ، اخو اخوان لمن غلط
هو من اولاد الموردة وبرى والهاشماب هو خليط ناس كتار وجميلين زيو
متزوج وعنده اطفال
اها يوم زواجه دا كان اطرف يوم
الشاب اب صلعة اللهو جمال قاعد فى العنقريب حق الحنة
الجماعة يدوهو ليك فى العصير المزيل للكابة كما يسميه او "البلى " كما يحلو له
وهو يجغم
لمن خلاس بقى ثملان قوم ياجمال بعد كاس ما ، وشيل يدينك وامسح الوش اليدين محننات طبعا
جمال حسن سعيد
شاعر
كاتب مسرحى
ممثل
كاتب دراما اذاعية وتلفزيونية
محب للناس وبالمناسبة عنده مفردات خاصة بيهو
يقول ليك "قرشنا بلى ،كوز الحقن ، ديك ملايكة " طبعا الزمن طال بيناتنا
جمال حسن سعيد عارف انى بحبك مش؟
لو قدرت بجيكم تانى
|
|