مره عمه ومره كاب

هذه القصيده ارسلها لى الاخ الصديق عادل عثمان عبر البريد الالكترونى وهو لايعرف من الكاتب ولكى لا افوت عليكم فرصة قراءتها اردت ان انشرها عبر الموقع فهى جديره بالقراءه

ايه تكون ...؟؟
وانا ايه أكون ...؟؟
ما السكه ديمه مضلمة ..
كل الشوارع ..
تايها في بطن البيوت
وشرابنا مر ..
شفقت زقاقتك عليك ...
نوح الارامل في الشتا ...
العين محكرا في السما .. والايد يباس ...!!!

حتى العصاري مضلمة ..
لافيها تدريس .. لا بخور
والعزة فرتكت المشاط
تتجارى لحق الفطور ..
والارض بور ..

محمد احمد انكفى ..
وضو الفوانيس انطفى ..
والحالة .... أوووف
شفع بطقعوا في النخل .. قبل النجاض
اكلوه مر ...
صابرينو صبر الانبيا

الارض عطشانة الخدار ..
الارض ملاها الغباش ...
الارض فترانة الطشاش ...
الارض ماهي ارضنا ...
كانت غتانا وعرضنا ...
والليلة ..
انهتك العرض ...
الظلم نشف للضروع ...
الجوع .. تفاصيلو الضلوع ...
الحالة مر ...
ياعزة كملتي الصبر ..
بعتي الوراك ...
حتى الشرف ..
عارضاهو في السوق الكبير ...
مين يشتري ..؟؟؟؟
ادوها بس حق الحلم ...

فترت مواعين الشحاته .. من تلف
بيت جار .. وجار
حبة دقيق ..
حبة شحم ..
أو كوم عضم ...
أو حتي فول .. بايت مخمر في الصحون ...

والناس هناك
شارع المطار ..
ياعزة غالباها المشي ...
بالتخمة والاكل الكتير ..
بس ياتو عدل ..
ياااااااااااربنا
شارع بداياتو النعيم حي المطار ...!!!
ونهايتو ناس مايو الجياع ...
اكلو الحجر ..؟؟؟؟

ياعزة كم فيك من عجب ...!!!!!!!!!
مابين قصور .. جنات ونور ..
والارض بور ...!!!
مابين كهاربك .. والانارة ..
وظلال فوانيسك حيارى ..!!!
مابين اطبا .. وغرفة خاصة ...
وداية واحدة معمشة ...!!!
احترت فيك

هل هذا شكلك يا وطن ..؟؟؟
تعصر مساكينك خمور ..
تديها للفوق ينتشوا ..!!!
هل هذا عدلك يا وطن ..؟؟؟
تخزل ملاينك فقر ..
علشان مئات ...
ما بشبعوا ...!!!

مليون جريح في كل ميل
مليانة ارضك بالوجع ..
والنيل رجع ..
من غير سبيل ..

عزة في هواك ..
الدنيا ليل ..
وللبخوض صفاك ..
حار الدليل ...
وعازة ما سليت
أرضك مقيل ..
ولا أرتضيت لهواك بديل ...

بس عزة شابهتي القبور ...
بطنك رحيب .. والدنيا نور ...
والفوق ضلام ..
هتك الستور ..
يا عازة قاربنا الفجور ...
وهواك هنا ...!!!!

يا الله هوووووووووى
بردك شديد ما بنحملو ..
دخل العضم
كسر شبابيكنا ودفر ...
والدنيا حر ..
دوخ مراوحنا الفتر ...
ووطنا صيف ...

و يا الله هوووووووووي
كسناك سند ..
كسناك ضهر ...
لعزة في وش الزمن ..
ظلموها كسروها الكلاب ...
مرة عمه .. ومرة كاب ...!!
كان انتخاب .. ولا انقلاب ...
الزلة سجلت الحضور ..
والناس ...
غيااااااااااااااااااااااااب
أين المفر ....؟؟؟؟

هل هذا شكلك يا وطن ...؟؟؟؟



__________________

حال البلاد
حال العباد
حال الرماد
هل هذا شكلك يا وطن؟
شكرا سيد أحمد

شكرا ود قاسم للمداخله واعمل حسابك من الهكر

الهكر فات اخدو راحتكم فى الكتابه

شعر بديع
وكلام يلمس شراشيف القلب