Post: #1
Title: الصادق المهدى أول مرة نال رئاسة الوزراء سنة1968
Author: منصوري
Date: 03-19-2010, 06:06 AM
Parent: #0
نحن السودانيون برانا سويناها في نفسنا.. ناس عاطفيين شديد... انقلاب ديمقراطية فاشلة انقلاب ديمقراطية فاشلة..ناس تموت ناس يعدموا ناس.أطفال تتيتم نساء تترمل وهن في عنفوان الشباب.. ارواح تزهق
..............
يا ترى لو كان من الزمن داك سنة1968 سدينا دي بي طينة ودي بي عجينة وخلينا الإمام دا يحكمنا، حتى لو اختلفنا معاه شوية في المنهج ..ما كان أحسن لينا.. هسه كان الأنصار أكلوا وشبعوا وشبعونا معاهم.. بعدين الصادق المهدي يعجبك لمان يطلع بره كدة من السودان.. زول وجيه وكلام وأديب ومثقف ورياضي وموسوعة وصاحب إرث تاريخي..ومتدين دين موزون..معقول يعني
الأنصار برضو عندهم نظرات تحررية وجيدة خاصة في تعليم المرأة.. الإمام عبد الرحمن من زمان مع ناس بابكر بدري كان يشجع تعليم البنات.. وأوفد بعضهن الى أمريكا وكت كان الناس ما بيعرفوا أمريكا.. برضو متحررين في لبس البنات ما عندهم التزمت الشديد داك في لبس البنات والخمخمة والدلاقين الكتيرة المربطة والطرح المكوكبة والمربطة والشرابات الفي اليدين.. تقول الواحدة لاعبة في قون فريق الهلال.. طيب ليه هي متخمخمة كدة؟ ماعايزة الناس يشوفوها؟ طيب هي ما بتشوف الناس بي عيونا المارقات ديل وتصور اي حاجة؟ بمجرد ما اتخمخمت المرأة طوالي جات نظرة الإستعلاء ونظرت لكل الناس سيئين وهي الكويسة.. وده يهدم أس التربية وهي أن تنظر لكل الناس كويسين وإنت الكعب عشان تصلح نفسك.. موش تتخمخم وتنظر لكل الناس كعبيين؟ وبعدين الخمخمة دي ليست بزي إسلامي على الإطلاق؟ إذا أصلوا عايزين الزي الإسلامي.. هو( ستر الجسم مع ظهور الكفين والوجه)..الأنصار ما عندهم يونوفورم مفصل للبنات.. الواحدة تلبس زي ما عايزة بس يكون ساتر كدة..
أول البارح جابوا لقاء مع الإمام في بيتو ومعاه مبارك الفاضل وجماعة كدة..الإمام مستضيف الجماعة في برندة كدة واظنها أحسن حاجة في البيت معمولة من القنا المشقق ضارباه المطر لونو مغبش ونبات شعلاق كدة ميت وعروقو ماسكة في القنا.. الناس يتابعوا في اللقاء وانا أتابع وأعاين في منظر البرندة التعبان.. وين بنات البيت وين الأولاد الشغيلة ما يسقوا النبات الشعلاق ده موية .. والله الملازمين وبيت المال مويتها قاطعة.. ما يضربوا القنا ده بوهية؟ يبدو إنو الإمام في الفترة الفاتت دي جاع! ومصدر الدخل قلا.. وين مريم الصادق والبنات التانيات وين عبد الرحمن وين الشباب..
هسه الإمام لو لقا السلطة والديمقراطية تاني يسرقوها منو بليل..ضيعنا عمر الإمام ساكت هسه هو في السبعينات الآن.. كان استفدنا منو ومن حنكتو .. هسه يا ترى لو لقا رئاسة الوزراء تاني مرة بيكون بنفس القوة والفكر والصفاء اللي كان في زمن الشباب داك!
أعجبني أن الإمام اعتذر للشيوعين عما بدر منه سنة 1968 بموقفه من حل الحزب الشيوعي.. ودي رجالة برضو في النزول عند الحق! زول منتخب بالديمقراطية وإنت ارتضيت الديمقراطية ما يحق ليك تحلوا باي سبب كان..المهم الله يسوي الفيها الخير للشعب السوداني.. يبدو إنو ربو سايقو لغاية يعلمها هو وحده.. ونعم بالله
|
Post: #2
Title: Re: الصادق المهدى أول مرة نال رئاسة الوزراء سنة1968
Author: منصوري
Date: 03-19-2010, 06:24 AM
Parent: #1
أيام الانتفاضة الصادق المهدي بعدها مسك رئيس وزراء.. مرة كدة طلع طلعة بره السودان..اثيوبيا أظن.. كان جايبنوا في التلفزيون لابس بدلة وكرفته وبنطلون.. ومعاهن طاقية حمراء كنا نشاهد التلفزيون وقتها في أم درمان كان معي واحد نكته من أولاد المناصير شافو قال( الصادق المهدي شرط عينا... الطاقيي الحمرا شنيي كمان مع البنطلون والقميص) أنا افتكر لوكان طاقية بيضاء ممكن ترمز للورع.. خاصة أن الأنصار عندهم الطاقية ترمز للورع.. حاولت أن أسأل عن سر الطاقية واحد قال لى السيد الصادق عندو ( كومة) كدة فوق الراس يحب يغطيها بي طاقية.. ممكن كيس دهني ممكن حاجة تانية... لكن أنا قابلت السيد الإمام كتير.. وانا لست بأنصاري.. وتونست معاه عن قرب ما شفتا ( كومة زي دي).. يبدو انها الطاقية للورع فقط.. خاصة أن الرجل إمام..
|
Post: #3
Title: Re: الصادق المهدى أول مرة نال رئاسة الوزراء سنة1968
Author: عوض محمد احمد
Date: 03-19-2010, 07:21 AM
Parent: #1
منصورى
سلام و مودة
الامام المهدى ليس اسوا من حكم هذه البلاد
هذه البلاد حكمها قتلة و سفاحون لم يوفروا حتى المفكرين و مجددى الدين هم اولى بالسخرية و التجريح
مودتى
حاشية
اول مرة تولى الامام الصادق حكم البلاد كانت عام 1966م
|
Post: #4
Title: Re: الصادق المهدى أول مرة نال رئاسة الوزراء سنة1968
Author: منصوري
Date: 03-19-2010, 09:54 AM
Parent: #3
| Quote: الامام المهدى ليس اسوا من حكم هذه البلاد |
عوض
لا بالعكس ليس هنالك سوءاً من الإمام.. أي لم يكن سيئاً...هي أخطاء من يعمل بس..
ممكن تقول مذهبية حسنة ومذهبية أحسن حسب حكم الوقت...ممكن تقول الإمام السيد الصادق هو البديل المتاح.. يعني عندو محاولات في الديمقراطية، محاولات في الفهم المتجدد..
|
Post: #5
Title: Re: الصادق المهدى أول مرة نال رئاسة الوزراء سنة1968
Author: منصوري
Date: 03-19-2010, 09:00 PM
بعدين عايزين زول مرشح يصلح لينا العاصمة القومية دي.. بعد ما صارت عبارة عن كوشة كبيرة.. وانعدم الذوق فيها لدرجة مخجلة...وتردي الحياة في كل شئ.. ما تقول لى رياض.. طايف منشية.. كلو أحمد وحاج أحمد...
|
|