Post: #1
Title: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 05:04 AM
وين باقي الدكاترة والدكتورات ؟؟
الزولة دي ليها يومين أسي وماشة على اليوم التالت ..
أضربت من أجل قضية ومطالب عامة ..
ما مطالب فردية خاصة بيها عشان الناس تخليها براها ..
والله حاجة تخجل الصراحة !
|
Post: #2
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 05:07 AM
Parent: #1
فاروق أبو عيسى ..
يقبض رواتب "النظام" الما خمج ويجي يرمي ليها كلمتين ويمشي !
|
Post: #3
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 05:14 AM
Parent: #2
ناس الأحزاب ..
عاملين رايحين منها ..
أظنهم راجنها تعمل ليهم "انتفاضة" عشان يلفوا عممهم ويجوا متلبين متحكرين في الكراسي
|
Post: #4
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 06:13 AM
Parent: #3
كل التضامن الذي حصلت عليه الدكتورة ناهد في موقفها الراهن ..
لم يتجاوز الإضراب عن وجبتي الفطور والغداء !!
http://www.youtube.com/watch?v=j7ZMA3QtffY
|
Post: #5
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 06:18 AM
Parent: #4
الغريبة نفس الزول المتضامن ده والمضرب عن وجبتي الفطور والغداء
في الفيديو القبالو كان بيأكل ليهو في بلح ..
http://www.youtube.com/watch?v=XfgLXSWKnYM
البلح ده نظام سحور يعني ولا تصبيرة ولا شنو ؟؟
ـــــــــــ
يا مرتضى لكن ما بالغتا
|
Post: #6
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 06:23 AM
Parent: #5
انتو ما دام فاشلين في النضال ..
فاشلين حتى في شغل الدعاية والبروباغندا ؟؟
جاني إحساس انو "مرتضى" ده بكون ياهو نفس الزول اللصق صور ياسر عرمان في الكوشة
|
Post: #7
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: عبد المنعم ابراهيم الحاج
Date: 03-19-2010, 06:31 AM
Parent: #4
سلامات يالهادي ..طبعا اي إنسان ولهو طريقتو في التعبير ، وأصلا التضامن هو في جوهره رمزي
وبيحتاج سقف عالي على مفهوم الدولة ، وبالضرورة الدولة تكون ديموقراطية ، وطبعا هذا
غير متوفر في السودان حاليا .. ومنظمات المجتمع المدني مقهورة هي ايضا ومحاربة ..أنا هسة متضامن مع
الأطباء لتحقيق مطالبهم المستحقة لا منة من احد ، ومضرب عن الطعام الآن تعبيرا ضمنيا لحالة ناهد
ومرت على لحدي هسة أكثر من 26 ساعة .. هذا الأمر يحتاج الي مجموعات ومنظمات كما ذكرت ..
|
Post: #8
Title: Re: ليـه الدكتورة ناهد مُضربة عن الطعام لوحدها .. الباقـيـن ويـن ؟؟
Author: Elhadi
Date: 03-19-2010, 07:19 AM
Parent: #7
تحياتي يا عبد المنعم ..
طيب يا منعم لي ما يوصلوا الرسالة دي للدكتورة ناهد ويقولوا ليها :
(( والله يا بت الناس ياها دي قدراتنا وانحنا ما بنقدر نتضامن معاك بأكتر من الوجه الشفتيهو ده ، وإنو والله ياخ ما عندنا استعداد نقدم "كوادرنا" لمفرمة النظام وانو بنتضامن معاك بالحد الأدنى الشايفاهو قدامك ده ))..
والأبشع من قصة عدم التضامن دي يا منعم إنو الواحد بحس كمان انو هناك محاولة للمتاجرة واستغلال تضحية الدكتورة ناهد..
في الوكت اللي مافي زول عاوز يضحي ويضع يده على النار التي وضعت عليها الأخت ناهد يدها..
يعني شوف زي ديل أسي جوا داخلين عليها بصور ياسر عرمان، في الوقت اللي ما شفنا فيهو أي موقف إيجابي لياسر عرمان وحزبه تجاه ما يجري وتجاه مطالب الأطباء ..
بل على العكس فوزيرة الصحة تتبع لحزب ياسر عرمان .. ولك أن تتخيل حجم الكذب والمفارقة والتناقض ..
حزب زي الحزب الشيوعي .. عنده من الكوادر وسط الأطباء والطبيبات الشيء الكثير ربما ما يفوق حتى كل الآخرين ..
وينهم يا منعم ؟؟ كلهم لابدين ومضايرين رقبتم .. وشكلهم كده عاوزين يشوفوا ناهد حا توصل لي شنو
وفلاحتم بس في التقاط الصور .. وبكرة يجوا يقول ليك والله انحنا العملنا اضراب الأطباء .. أدونا النقابة !!
لمتين الأحزاب دي حا تقعد تعيش على تضحيات الآخرين يا منعم ؟؟
|
|