الشاف جنة الاطفال في التلفزيون الليلة منو؟؟

عرض التلفزيون القومي و في برنامج جنة الاطفال فقرات من احتفال مدارس "القبس" بنهاية العام الدراسي على مسرح قاعة الصداقة ،اي و الله مسرح قاعة الصداقة بشحمه و لحمه.من الطبيعي أن يتساءل المرء عن ماهية هذه المدارس التي يسعى التلفزيون لاحتفالاتها لينقلها للملايين على امتداد السودان ممن شاء حظهم العاثر أن يكونوا على اثيره القومي. هل هي مدارس حكومية ؟؟ أم خاصة؟؟ و هل "استاندرد" هذه المدراس-إن كانت خاصة كما يبدو- هو نفسه ما تلتزم حكومتنا الرشيدة بتقديمه لمواطنيها الصغار في شرق البلاد و غربها و شمالها و جنوبها؟؟
هل يحتفل الصغار في مدارس الحكومة بنهاية العام الدراسي و يلتزم تلفزيون الحكومة بنقل احتفالاتهم ليعرضها على شاشته؟؟

يا د. سيف
المدارس دي السنة الماضية أقامت المعسكر الصيفي لطلاب مرحلة الأساس فيها في ماليزيا ..
أي والله ماليزيا ..

د. سيف النصر محي الدين

سلامي وتحياتي..
مدارس القبس هي مدارس خاصة وتدفع للاعلانات في التلفزيون فمن الطبيعي أن يرد لها التلفزيون الجميل بدعاية مجانية
والله يرحم المدارس الحكومية زماااااان
يا سيف لو ما عندك قروش لا يمكن أن تتعلم أو تتعالج في الســـودان
اتخيل أنا عندي بنت في سنة خامسة ابتدائي تدرس في أحد المدارس الخاصة
ادفع لها سنويا ما يقارب 2,500 ج (بالجديد)عشان تقرأ كويس
اتخيل واحد عنده 3 أو اربعة طلاب كيف يكون حاله؟
والمبلغ المصروف عليها حتى الآن لم اصرفه أنا طيلة مدة دراستي والى حين تخرجي من الجامعة
اما ان تدفع ليتعلم أولادك كويس أو ترمي بهم الى اتون المدارس الحكومية حيث يحتوي الفصل الواحد على أكثر 70 طالب
وتجيب كرسيك معاك كمان وتشتري الكتب المدرسية .... وخليها مستورة بس

مودتي

الاخوان فتحي الصديق و امين البشاري
شاكر المرور و التعليق
اذكر أن قبل سنة او اكثر ثارت الضجة على المنبر بخصوص الرحلة لماليزيا و قد تابعنها من بعيد لبعيد دون ابداء اي رأي ، و رأيي -إن كان لي أن ابدي رأيا في هذه المسألة- هو يجب على هؤلاء الناس أن يمارسوا برجوازيتهم هذه بعيدا عن الناس و الا يؤذوا بقية الشعب السوداني بعرض ترهاتهم على شاشات التلفزيون او صفحات الجرائد.
و يا امين فعلا يجب أن تفكر في أن لو جاء اخوة لبنتك هذه فهل ستدفع لهم جميعا هذه المبالغ؟؟
هذا النوع من التخريب المتعمد الذي احدثه اهل الانقاذ هو مما يصعب اصلاحه و التخفيف من اثاره الاجتماعية و السياسية.

ياحليل زمن الخلاوي هو الخمج كلو جابتو المدارس دي
ولبس الارديه والبناطلين مسخره ...

نطالب بارجاع الخلاوي والكتاتيب
ومنها للمعهد العلمي بام درمان
وهذا يكفي






قال تعالى : (ثم لتسالن يومئذ عن النعيم)



البصاص

الاخ سيف

لاتندهش فقد سمعت ان هذه المدارس هى ملك لنور الهدى زوجة عبدالله حسن البشير ؟

وقيس على كده

نطالب بارجاع الخلاوي والكتاتيب
ومنها للمعهد العلمي بام درمان
وهذا يكفي
ـــــــــــــــــ
يابصاص يارجعي ( وش مدور )
والله ياحليل زمن الخلاوي والتقابة .. والفجرية والضحوية .. الخ
أيام جميلة ومفعمة بالإيمان ..




.....
سلام ياأخ سيف .

يادكتور سيف
سلامات
التلفزيون القومي او غيرو بيعتمد في دخلو على الاعلانات بشكلها المعروف او الاعلان البرامجي
يعني تدفع ممكن يعملوا ليك سهرة كاملة عن مؤسستك ... وبرنامج الاطفال اليوم مدفوع القيمة بالمناسبة دي

اما حكاية المعسكر بتاع ماليزيا دا لقسم الدبلوماسيين او اي زول قادر يدفع لابنو مصاريف السفر
والاقامة وخليك من مؤسسة كبيرة بالامكانيات دي د. نجاة محمود زميلتنا هنا بتعمل معسكرات احسن من دي

اما ملكيتها تتبع لمؤسسة الخرطوم للتعليم الخاص والتي تتبع لمنظمة خيرية وماعندها اي علاقة بالست المذكورة اعلاه
وزميلنا في المنبر هنا خالد ماسا يعمل ضمن طاقم التدريب للمدارس دي
وشكرا

الأخوة البصاص و السيد المسلمي و عادل عبد العزيز
شكرا على المرور و المشاركة.
الخلاوي و الكتاتيب كانت توحد بين ابناء السودانيين و كان الجميع يعاملون نفس المعاملة
لا فرق بين ابناء الاغنياء او الفقراء .

Quote: لا فرق بين ابناء الاغنياء او الفقراء

الاخ سيف
لو تدبرت ستجد انه ليست النظره للتعليم كما كانت من قبل
وليس المرجو من الأبناء هو ذاته السابق
كما انه ليس المعلم هو ذات المعلم الذي يلم بكل تفاصيل تلاميذه

الامر تجاوز هذه النظره المبسطة للاشياء فقد دخل السودان
مرحلة التكوينات الاجتماعية المعتقده وتلاشت الاسر الممتده
وغيرها من التغييرات في بنية المجتمع شئنا ام ابينا وعليه
سيدي الكريم

اضحت النظره للتعليم ليس هي ذات النظره القديمه بل اضحى الامر
اقرب للاستثمار في الابناء سيدي والنبته التي تصرف على عنايتها
كثيراً تجود عليك بما تتوقعه منها بمشيئة اللله

هذا هو المحرك الاساسي للكثير من الاسر الغني منها والفقير
ولا احسب ان كل من في تلك المدارس من الصفويين الذين يرون
ان الاختلاط بالفئات الاخرى إنقاص لهم او يمارسون الشوفونية عبر الاجهزة المسموعه والمرئية
ان كنت ترى ذلك ...

ثم انه مادام اسر هولاء (القبسيون) لديهم القدره على تعليم أبنائهم على النفقة الخاصة
فخيراً وشكراً في ظل واقع تعليمي تتناوشه الكثير من السهام والتحفظات

وحتى ان كان غير ذلك فيكفي انهم تركوا مساحات للطلاب الفقراء جهد الاستاذ
والمساحة في الفصل ولم يخلقوا التمايز الطبقي الذي قد يفضي للاحباط لدى الفقراء من الطلاب
في ظل الإمكانات الكثيره المتوفره للطلاب من ابناء مؤسرين ...

والكل ينشد الافضل لأبنائه حتى في تلك الايام السابقات كان التمايز موجود
وان للامكانيات المادية كان هنالك دور كبير في تهيئة الكثير من الفرص لبعضهم
فقط تدبر في سابق التعليم في السودان
وان تدبرت فيه الحاضر ستجد ان به ايضاً خير كبير



ـــــــــــــــــــــــــــــــــــــ
معليش تعديلات لابد منها



كن بخير


البصاص

Quote: التلفزيون القومي او غيرو بيعتمد في دخلو على الاعلانات بشكلها المعروف او الاعلان البرامجي يعني تدفع ممكن يعملوا ليك سهرة كاملة عن مؤسستك ... وبرنامج الاطفال اليوم مدفوع القيمة بالمناسبة دي

يا وهبة شنو الجدية دي ؟؟
ما فضل ليك الا تقول لي "نحيطكم علما".
الاعلانات و رعاية البرامج شي معروف و لا اعتراض عليه لكن أن يمتد ذلك لبرامج الاطفال
و يمارس عبره ما يشبه "الحندكة" و الشو مما يتسبب في جرح مشاعر ملايين الاطفال الذين
اهملتهم حكومتهم و رفعت يدها عن تعليمهم فهذا مما لا يجب السكوت عليه.
ناس القبس اليحتفلوا براهم و يقفلوا عليهم مسرحهم و يشوفوا لو في زول سألهم و للا جاب
خبرهم.

سلام يا سيف

الأيام دي بنسمع كلمة "خاصة" دي كتير بدون ما تذكر أسماء
أها طيب خاصة بمنو؟
منو ملاكها يعني؟

وهبة دا بكون عارف

:)



ليه أغلب (الملاك) في اقتصاد السجم دا مركزين في أشخاص لهم صلة بالسلطة والإسلام الاقتصادي/ السياسي؟
وليه لما قسموا لروحهم البسطة في الرزق دي، ما أدوا الناس معاهم؟
وقعدوا يبيعوا للناس كلمات (الرزق من الله)..
اريتهم لو قالوا
(عسكري علي مستفيد) علي الأقل فيها حبة طرافة..

دا يا سيف رزق نتيجة سياسات محددة، يصح وصفها بالسطو المسلح
الذي يوجب الحد.


كلامي دا ما عن المدارس دي بوجه التحديد، لكن من خلال الشي الشايفنو..





(الطفيلية) شحمت من خير الناس والبلد لدرجة انو أبوابنا بقت ما بتمررها
فلازم يفرزوا عيشتهم.

ويجو يعيروا الناس:

أبوابكم دي ضيقة كدا لييه!


أها
شحمها دا ذاتو بجيب معاه قيم ومعايير جديدة سوف تحدث تحول في البنيات الثقافية والفكرية لحركتهم في عضمها
دا بقي ظاهر في بعدهم عن النموذج المعهود (للدين الأخواني) الذي خبرناه في السابق، أو قل القيم الدينية على إطلاقها.
جابت ليها كمان حنكشتن شترا كدا ما عارف أقول عليها شنو.
ومفارقة واضحة لقيم الايثار ونصرة المستضعفين، وما الى ذلك
فتركوها غريبة تبكي حالها وتتراجع حسيرة رويدا رويدا
لتحل محلها قيم التمكين والتفضيل في الرزق والجخ والمباهاة .. الخ..












.

سلامات يا احمد المرضي يا صديقنا الذي في فيلادلفيا
و الله كلامك الكتبتو ده هو نفسو الكلام الانا قاصدو و ما عرفت اصيغو بصورة محكمة مثل
التي صغتها انت .
غايتو بقت علي زي البقت على عادل امام في مسرحية شاهد ما شفش حاجة لما المحامي
قال لوكيل النيابة :"وضح ، ابن ،افصح" و عادل امام غلبو يعيدها فقام قال لوكيل النيابة
"اللي بيقول عليه دلوقتي ده.

سيف

لكن ياخي ما حرررقوا روحنا

Quote: يا وهبة شنو الجدية دي ؟؟

هلا يا ابوالسيوف
جدية شنو ياصاحب ؟
انا بالجد زعلت من المتداخلين الفوق ديل
واحد قال ماليزيا
والتاني قال بتاعة واحدة ست .. انت عارف الاشاعات في البلد
ياها بتنطلق كدا ... واحد ساااي يسمع اي كلام فارغ في ونسة
يجي يطرشها هنا ودا بورد مقروء وليهو روادو الواحد مفروض يراعي الدقة
ما امكن ذلك ... وبس اها اخت ليك وش ضاحك اخدر بدور عشان تصدق اني ما جاد

Quote: وهبة دا بكون عارف

ود المرضي يافنان
ليك وحشة والله
ياخ مغروض لي في كاركاتير كنت نزلتو انت
لاحد اعضاء المنبر المشاغبين والمزعجين جدا
اللي هو كان آخر واحد تقريبا
الفيو البطل شايلنو ماشين بيهو على برميل الوساخة
محتاج للكركتير دا بشدة عليك الله ارفعو ورسل لي الكود بالماسنجر
واكون شاكر ومقدر وبرضو سيف صحبي دا بكون مقدر جدا
ما تغيب كتير كدا

صور لطلاب الاساس بمدارس القبس المشاركين فى معسكر كوالالمبور

وهبة


زولك دا شكلو كدا رفع الراية البيضا زمان ففكيتهو
توخيا للعدل واجتنابا للفجور.

لكن ما زلت مدخر ليهو "عتلة"..

برسل ليك الشي الدايرو عملا بمبدأ رد الصاع 3 صاعات مشنترات

أديني أي ميل
















.

Quote: زولك دا شكلو كدا رفع الراية البيضا زمان ففكيتهو توخيا للعدل واجتنابا للفجور. لكن ما زلت مدخر ليهو "عتلة".. برسل ليك الشي الدايرو عملا بمبدأ رد الصاع 3 صاعات مشنترات أديني أي ميل

ودالمرضي ياحبيبنا
دق القراف والجمل الاثنين معا
شكرا للاستجابة
وكان رسلت العتلة دي لخالك
تكون ريحتني شديد
ودا ايميلي [email protected]
مع خالص الود

_______________
ملحوظة : اي ايميل ما جاي من طرف احمد المرضي لن يفتح ولن ينظر فيه