Post: #1
Title: منعم الجزولي كل سنة وانت طيب
Author: د.نجاة محمود
Date: 03-09-2010, 02:19 AM
8 مارس هو يوم المرأة
ولكن اود ان احتفي فيه بصديق عزيز..
رجل يعرف قدر المرأة ويحترمها ويعاملها بندية
الا وهو عبدالمنعم الجزولي الشهير بالجازلوت
اتمنى بكري يحل مشكلة دخول منعم للمنبر
لانه بالجد نفتقده ونفتقد كتاباته المميزة...
اينما انت يا صديق لك التحية والاحترام
وكل سنة وانت طيب وربنا يكتر من امثالك..
حتى يكون العالم ابهى واجمل.
|
Post: #2
Title: Re: منعم الجزولي كل سنة وانت طيب
Author: د.نجاة محمود
Date: 03-09-2010, 02:28 AM
Parent: #1
[B]اغنية العيد الخمسين للاتحاد النسائى السودانى
شيلناها القفة بلاد
صفيحة الموية
وطبق الكسرة
وقدح الزاد
ملت الزير
كتفناها بالجنزير
قشت
رشت
زرعت
حشت
جازيناها بالاهمال
ردى الاعمال
وسوء القول وقصر البال
وسوط السيد الجلاد
وحمرة عين ابوى
بالكاد
تقول شكرا
*****
غسلت
وفرشت
ربت
وهرشت
صفقنالها بالبرطوش
وسديناها جوة الحوش
وحجبناها
بالعكاز
وبالخرطوش
جمر العفة ولع قاد
*****
حلفت دفرت
زهجت زفرت
عرفت سفرت
قرت الاية ولغة الضاد
كسرت مرقت
غربت شرقت
طفت حرقت
قابلناها بالنكران
وبالكفران
وثبتناها بالاوتاد
وبالاجداد
جدى وجدك
حدى وحدك
سدى وسدك
واتحاوينا فى الاسياد
سيدى وسيدك
ترفع ايدك
تشكم حرمة
انت الفارس المقداد
*****
بتك خشت فى التعليم ياراجل ؟!
جامعة ومدرسة؟!
قرت الهندسة!!؟؟
ما سجم امك واختك عاد
*****
فتشنالها دروب القفلة
لبسناها حجاب الغفلة
سويناها حرمة
وخادم
بلعناها الغصة درادم
برضك نطت
مرقت
برقت
شالت وختت
قلنا ولية وساكت شطت
قرت
اتمطت
قلعت حقها بى ايدينها
مشت الجامعة
والكلية
مشت الغابة
والجمعية التاسيسية
شالت حقنة
وريشة
ومدفع
انت بتدفع اشتراكاتك
برضو بتدفع
رفعت علت
طلت هلت
ربطت حلت
ويوم القدلة عديل اتجلت
*****
ذى ما انت قريت الجامعة
هى قرت الجامعة
وذى ما انت حضرت الندوة
هى حاضرة وسامعة
وذى ما انت قصدت المعنى
هى برضك قصدت
وذى ما انت زرعت
حصدت
هى زرعت وحصدت
انت رعيتها سعيتك وبهمك
رعتم زيك
شغل فهمك
شلت المونة
شالت زيك
قلت تربى لى اخوانك
ربت اخيّك
انت حفيت فى دروب الدنيا
تربى وتسعى
حفيت زيك
واكتر منك
شالت ليك اولادك تسعة
وقفت تناضل ضد الظلم
وترفع راية الاصلاح
وقفت زيك
وغزت كوعها للسفاح
اعتقلوك فى بيت اشباح
اعتقلوها ف بيت اشباح
وزى مالراجل مشى واستشهد
وسجل موقفو ضد المشهد
مشت استشهدت
انت بتشهد
*****
يالخمسين
تاجك فوق راسنا
وعيدك يامّ العول اعراسنا
ناذن ليك من فوق مسجدنا
وجوة كنيستنا
تدندن اجراسنا
الظلموك ظلمونا كمان
والباعوك باعو الايمان
والحرموكى نسيم العافية
شالوا العافية من السودان
2002
|
Post: #3
Title: Re: منعم الجزولي كل سنة وانت طيب
Author: د.نجاة محمود
Date: 03-09-2010, 02:33 AM
Parent: #2
ملحوظة هامة : ليس هنالك اى خطأ فى ترقيم النصوص فلا تنشغلوا/ ن بعدم تسلسلها حيث ان التسلسل ليس من خصائص الخنفشارية اصلا.
(3)
الشارع اطول من احزان المدعوكين فى الحواشة
الشارع مليان دياشة
وعواميد نور مطفية
وناس تتجارى ورا معاشة
واحد شايل سرواله الناصل ومقشاشة
وواحد واقف يبرم فى شنب الامباشى
وجماعة بفرفرو تحت الكماشة
وسكران ماهاميهو الحاصل
واقف فى الخط الفاصل
مابين الزمة وسيد السروال الناصل
وبشاغل فى بنية ملفلفة زى قرطاس السكر
الجوع اتدفق من عينيهو
قزاز النضارة اتكسر
تلميذ شايل كتبو ف سرج العجلة الورانى
دقش البت الزى قرطاس السكر وقع اتكسر
(9)
ما طلحة براهو الكسر الجرة
واحد شايل اخلاقو ف صرة
وواحد شايل اخلاقو ف شنطة مستفة بى دولارات جايبها من برة
وواحد شايل اخلاقو ف ستيانة بتو
وواحد نسى اخلاقو ف رف الحمام
شال شوالو وسافر جدة
وواحد ماكانت عندو الفرصة عشان يعمل اخلاق بى مليم حتى
(2)
الزول الشايل اخلاقو ف ستيانة بتو
ساق الولد الدقش البت الزى قرطاس السكر
وداهو التمنة..الضبطية..المركز..سميها حسب كمية اخلاقك
الضابط كانت بايته معاهو السكرة
وبشرب فى القهوة المرة
دخل الزول الشايل اخلاقو ف صرة
وبكورك
- ياناس ..ياعالم ..
نشلونى..
اخلاقى اتنشات.
(6)
طنّـت ضبانة معلقة فى شرك العنكب جوة الزنزانة
قرقر واحد مقبوض فى قصة جبخانة وماجبخانة
ضحكت واحدة هناية وست انداية
وقالت
- يادوووب اتنشلت ؟
واحد مقبوض فى جناية اتجار بالقصّـر
قاليهو تستاهل
شايل اخلاقك وحايم فى السوق
عميان مـنّ البنك او البوسطة؟
واحد زمّـتو سوسته
ساق الولد الدقش البت الزى قرطاس السكر
وداهو الشفخانة..
المستشفى..
عيادة..
تسميها حسب مفهومك للمادية( الدجلية)
وموقفك التاريخى من الخصخصة
والاستثمار الرأسى.
يازول.. قول الدكتور تاوق جوة دماغ الولد المفتوح للعامة
وشخبط فى الورقة القدامو كلام بالسنسكريتية الفصحى
وقال للشافع..
- عندك قرحة
ولازمك عملية استئصال كلية سليمة
والمشترى جاهز..
ودولاراتو تناهز
خمسين فى المية مقدم
وتلتاشر بعد العملية.
الود ضّــربها فى مخو..
- والباقى؟؟
- باقى شنو كمان..
حقى وحق المستشفى خمستاشر
وزكاة الفطر تمانية
وزكاة الانعام وتبرع لبناء مسجد تانى جوار المستشفى
خلاص.. مية المية
حنسوى العملية
اذا وافقت..اذا ماوافقت
القانون واضح
والواضح مافاضح
(1)
الود قام جارى
($)
سكّــوهو تلاتة تمرجية
وبوليس حركة
وسمسارين
والناظر
(10
اوعك تسألنى عن الناظر دة منو
ومن وين
ودخل كيفن
اهو ناظر لاقيتو ف نص القصة
حليو وقيافة
وقندف
وما مشغول بحكاية دوران الماهية
من الجيب للغيب
عندو مصادر سرية
وواصل لى اقصى حدود التموين
اذن مامهم نسأل عن اصلو وفصلو وجاى من وين
(3 مكرر)
الناظر قال زهجان من ازعاج الشفع فى المدرسة
والمدرسة بس حوش
ومكيتب مامعروش
وقطاطى بروش
يازول تووش
الشافع دخل المدرسة
تلبوا ستة تمرجية وراهو
الكانو تلاتة
استثمرهم الناظر فى مشروع خيرى
مرابحة يمكن
اصبحوا ستة بفضل الله
وفضل الدعوات المبروكات
من جمهرة القايمين الليل
جزو منو عبادة
وجزءا عادة
حراسة كبرى
ودوريات
(أ)
الفات الفات
قال وانا مالى
طلع طوالى
والهون
ضرب السَّــل فون
والزول السافر جدة
شوالو انقدَّ
والبت الزى قرطاس السكر طلعت حامل
وفى شهرها العاشر
والعرقى الشربو الضابط كان داشر
والسكران لسع واقف فى الخط الفاصل
والصورة بقت مهزوزة
ضبابية
مكهربة
والشارع اطول من احزان المهزومين فى الحواشة
ومليان دياشة
وعواميد نور مطفية
وناس تتجارى ورا معاشة
|
Post: #4
Title: Re: منعم الجزولي كل سنة وانت طيب
Author: محمد سنى دفع الله
Date: 03-09-2010, 05:06 AM
Parent: #3
[B]كل عام وكل ام عاملة بالف خير
كل عام ومنعم الجزولي بالف خير
لكل ام واخت اجمل التهاني
|
Post: #5
Title: Re: منعم الجزولي كل سنة وانت طيب
Author: محمد الجزولي
Date: 03-09-2010, 05:42 AM
Parent: #4
ونعوم طيب وانتي طيبة يادكتورة ..
وكل النساء طيبات ..
|
Post: #6
Title: Re: منعم الجزولي كل سنة وانت طيب
Author: عبدالله شمس الدين مصطفى
Date: 03-09-2010, 08:14 AM
Parent: #5
منعم الجزولى زول جميل، كل آل الجزولى جميلين.
ليكن عامه هذا عامر وزاهى زى روحه.
وألف وردة وزهرة ليك يا دكتورة، وكل عام وأنتن
قناديل هذا الكوكب، مصابيحه المتقدة...و( تقّابته) التى
لا تنطفئ جذوتها.
تحياتى
|
Post: #7
Title: Re: منعم الجزولي كل سنة وانت طيب
Author: Mohamed Abdelgaleel
Date: 03-09-2010, 08:35 AM
Parent: #6
إن شاء الله دعوتك تستجاب يا دكتور ويعود عبدالمنعم الجزولي
مغرداً مع سربه نغماً أدبيا رفيعا
|
Post: #8
Title: Re: منعم الجزولي كل سنة وانت طيب
Author: خدر
Date: 03-09-2010, 02:13 PM
Parent: #7
 حزبا مرق للموت قلد القصة لابت لاولد عند المواجهة والجلد صوتك يمين يوزن بلد ---- ---- ميِّز طريقو شرق غرب وتعال عديل شاقى الدرب الجهلِ والجوع والحَرِب صوتك دواهن، انكرب ---- ---- مايغشك القال اتفاق شعبا من الغِمِّـيْدَة فاق صَوِّت محل تلقى الرفاق صوتك تَسَقِّطْبُو النفاق ---- ---- شاكوش مرق نُصَّة... نهار لاكاس وجاهة ولا اشتهار نحنا فى طريق الازدهار ارواحنا نجدعها سمبهار
___
آخر ما وصلني من أشعار الفنان منعم الجزولي .. شكرا يا نجاة منعم يستحق الإحتفاء
|
Post: #9
Title: Re: منعم الجزولي كل سنة وانت طيب
Author: د.نجاة محمود
Date: 03-09-2010, 02:46 PM
Parent: #8
في حضرة الجازلوت يطيب المقام
التحية لكل من اتى للاحتفاء به وكل سنة وانتم اعلى قامةواكثر وسامة...
|
Post: #10
Title: Re: منعم الجزولي كل سنة وانت طيب
Author: د.نجاة محمود
Date: 03-10-2010, 03:25 PM
Parent: #8
يا بكري ما تلحق الزول دا الباسورد
|
Post: #11
Title: Re: منعم الجزولي كل سنة وانت طيب
Author: عبدالله شمس الدين مصطفى
Date: 03-10-2010, 04:16 PM
Parent: #10
يا بكرى (ألكع) ياخ، منعم ده مزنوق فى كلام كتير،
أديه الباسوورد لو سمحت.
|
Post: #12
Title: Re: منعم الجزولي كل سنة وانت طيب
Author: د.نجاة محمود
Date: 03-12-2010, 04:30 PM
Parent: #11
Quote: يا بكرى (ألكع) ياخ، منعم ده مزنوق فى كلام كتير،
أديه الباسوورد لو سمحت. |
بعداك تحنسو كمان يا بكري
وحشتنا يا ملك
|
|