Post: #1
Title: ألـمقابر والهندسة العلـمانية يا كيكي!!
Author: abdalla elshaikh
Date: 03-03-2010, 11:32 PM
ألـمقابر والهندسة العلـمانية يا كيكي!!
بالأمس شاهدت حلقة بالتلفزيون السوداني عن ألـموضه فتوقفت عند حديث واحد من ناس تزكية الـمجتمع منتقدا ألـموضه وما أدراك ما الـموضة!! فقال إن كل ذلك بسبب العلـمانية ثـم دلف قائلا إنه يسكن في حي ليست به مقابر!! والسبب هو ألعلمانية لأن خريجي كليات الهندسة يدرسون وفقا للـمنهج العلـماني ولذلك حينما يخططون ألـمدن لا يستذكرون ألـموت !! فضحكت جهرا وتذكرت عضو البورد كيكي لأسأله لـماذا لا تتذكرون الـموت وأنتـم تخططون الـمدن??
عجايب يا السودان!! فعلا ربنا لامن خلقك صفق يديه وضحك!!
|
Post: #2
Title: Re: ألـمقابر والهندسة العلـمانية يا كيكي!!
Author: عبدالكريم الامين احمد
Date: 03-04-2010, 08:42 PM
Parent: #1
تحياتي يا عبدالله
واسف للتاخير لاني شفت البوست بتاعك ده حسسسسسع..
وياخي دي اشاعة ساكت بتاعة اسلامويين وعايزين يشيلو حس الهندسة والمهندسين..لوووووول
ومع اني مساح وعلي بس استلم الخرطة من الاخوة والاخوات مخططي المدن وامشي انزل مواقعها في المكان المخصص ليها الا ان الشاهد بان التخطيط الحديث للمدن والتجمعات السكنية الدائمة ..يضع امر المقابر والترب في حساباته والمصمم بالتاكيد بلقي ليها حتة مناسبة ومعقولة وتتناسب في موقعها من الاشياء الاخري هندسيا...
بوست ده فيهو جزئية مهمة مربوطة بالثقافة التخطيطية في مدن وقري السودان عموما التي تكاد تكون معدومة (يعني المدن والقري بتقوم برووووس) بدون تخطيط هندسي عشان كده بنلقي الاشياء شترا ما راكبة عدلها..
|
Post: #3
Title: Re: ألـمقابر والهندسة العلـمانية يا كيكي!!
Author: عبدالكريم الامين احمد
Date: 03-04-2010, 08:59 PM
Parent: #2
المشكلة يا عبدالله الاساسية في جزئية مربوطة بمرفق اساسي ومهم زي ده هي مشكلة الثقافة الهندسية في البلد كلها ودي حاجة بتجي من فلسفة الدولة ومقدرتها علي تطبيق نظم تتيح خدمات حياتية لمواطينها..
فلو لاحظنا المقابر الشهيرة بالخرطوم مثالا(فاروق-حمد النيل- احمد شرفي) بنلقاها الان صارت علي مرمي حجر من المناطق السكنية وذلك الاهمال الواضح للخدمات الاساسية المطلوبة كماء وكهرباء وطرق وتسوير وادارة منفصلة (لا ادري الان ماذا يجري علي مستوي الادارة)...
|
Post: #4
Title: Re: ألـمقابر والهندسة العلـمانية يا كيكي!!
Author: عبدالكريم الامين احمد
Date: 03-04-2010, 09:06 PM
Parent: #3
اهم شي في تخطيط المدن هو الخرطة الاساسية للمدينة او (الماستر بلان).. ودي خرطة يتم فيها وضع كل الموجودات الحالية بالاضافة الي التوسيعات المستقبلية من مصانع ومرافق ومساكن وطرق وغيره من الاشياء التي يتوقع لها ان تقوم مستقبيلا ..ودائما المصمم يعمل علي توحيد الانشطة وضعها في مكان موحد
(مصانع مع بعض) والمساكن تتوزع بصورة موحدة حتي يتم دعمها بالخدمات الاساسية....
الماستر بلان دي مفروض تكون مربوطة بخطة البلد الصناعية والهندسية والاقتصادية والسكنية وهي خرطة مفروض يكون المطبخ بتاعها مطبخ استراتيجي ينظر للمدينة لمدة ديشليون سنة لقدام.....
اها احنا في السودان كلام زي ده مافي وهبتلي ..
وفي القري اقرب فسحة فاضية بتكون طواالي هي المقابر.. وحتي الكهرباء والماء والاشياء المساعدة للدفن يتم توفيرها بواسطة التطوع ..
فمشكلتنا يا عبدالله مشكلة استراتجية دولة ونظرتها الاعلي للتخطيط للحياة في السودان بكل مكوناتها واجزائها
|
Post: #5
Title: Re: ألـمقابر والهندسة العلـمانية يا كيكي!!
Author: Elawad
Date: 03-04-2010, 09:15 PM
Parent: #4
السؤال هو هل المدن في عهد الإنقاذ الأغبر يخططها المهندسون؟ خليك من التخطيط الجديد.... الجو هم لقوهو مخطط جاهز هل خلوه في حاله؟ ميادين الأحياء تشهد على كيف يتم التخطيط في عهد دولتنا الرشيدة.
|
Post: #6
Title: Re: ألـمقابر والهندسة العلـمانية يا كيكي!!
Author: عبدالكريم الامين احمد
Date: 03-04-2010, 09:25 PM
Parent: #5
تحياتي يا العوض
والف سلام
قبل فترة يا باشمهندس العوض كان هنالك تطبيق مهين حقا للمهندس والمخطط السوداني للمدن تم بلعه
بصعوبة..
وهو حكاية الكبري الذي حولت من اجل مقابر ومراقد الجدود وكانت عملية نقل هذه المقابر مزلة للانسان السوداني حتي وهو يرقد في ايدي عزيز مقتدر...
التخطيط لمثل هذه الخدمات الاساسية يلعب فن الممكن وتطويع القادم الجديد مع الحفاظ علي الاشياء الاساسية ذات الدلالات والمعاني السامية مثل المقابر..
وانا متاكد بان هنالك مليون حل وحل لمسار ذلك الكبري يحافظ في مساره الجديد علي تلك المقابر التي تم حفرها مرة اخري ونقل الجثث...
.........
ياخي القصة جايطة جوووطة كبيرة يا العوض والجربندية هم اسياد الموقف
والفساد ده ما اكل قروش عام بل ومجرد لخبتة مثل هذا الاشياء فهو فساد وهدم لمكونات بلد حدادي ومدادي
واهانة لانسانه
|
|