سلسلة يوميات حاج سمؤال - بوست توثيقى على وزن (الحاج متذكر) اضحك بس

طبعآ كان مفروض يكون البوست دا بدايتو عام 2005 اول مرة الاقى فيها زميلى وصديقى الحاج سمؤال لكن العضوية جات متأخرة

واللاحظت عليهو من اول يوم انو طوالى فى حالة لخمة نسبة لاختلاط الشغل مع الخدمات الشخصية البيقدمها لمعظم الاهل والاصدقاء بغرض المساعدة

ودا نسبة للطيبة الزائدة لأنو من اهل مدنى (مع انو شايقى) لكن تنحسر فيهو بعض سمات الشوايقة (بدون زعل اهلنا الشوايقة)

حاولت اشبه شكلنا فلقيت اقرب تشبيه لينا فى الفيلم Lethal Weapon بين Mel Gepson و Danny Glover والحضر الفيلم بيعرف انو

ميل غيبسون كان معذب ليك صحبو دا عذاب شديد جدآ نسبة لجرائتو وعدم خوفو من اى شى, اما زميلو التانى من النوع البيكون فى حالة ملاوزة

طواااالى وشكك حتى فى اى حاجة عاوز يعملة ودا بالضبط بيجسد شخصياتنا الاتنين بنفس الطريقة من كمية المواقف الانا مدخلو فيها.

اول موقف بدا لما اتلمينا الاتنين فى مكتب واحد وطربيزتو مقابلة لى طربيزتى وفى خلال الشغل سألتو عن حاجة لكن مالقيت رد

فاستغربت انو حتى مارفع عينو عاين لى !! مع تكرار السؤال لاحظت انو الرد كان (ااه ؟؟ مع رفع الوجه ناحيتى مع تركيز العينين

فى الكومبيوتر)

فى اللحظة ديك عرفت انو منسجم مع السيستم (بتاع الشغل وليس البنطلون) لانو اذا ماعملت اى حركة فيهو لمدة 5 دقايق بيقفل وترجع

تانى تعمل حاجتك من جديد فصرفت النظر وقلت ما اشغلو كتير.

قلت شنو انت؟؟ دا كان اول سؤال بعد ما خلص من الفى يدو يمكن بعد نص ساعة فرديت عليهو بى سخرية انو .... (المدير) كان بينادى فيك

ماسامعوا انت؟؟

فما كان من صاحبنا الا طيران مكتب المدير واسف ياسعادتك كنت بعمل فى حاجة ضرورية وختيت بالى ووزع كمية من البسمات خلت ليك

المدير زاتو اتوهم وافتكر انو اخينا دا عندو غرض لكن بعد الشرح وبعض علامات الاستفهام والتعجب صاحبنا جا راجع وانا ميت

بالضحك وهو يكيل لى من السب والشتائم ماجادت به نفسه

موقف جميل تانى

يوم مارقين من المكتب و بعدين الله يكرمكم عننا كورلا دركسون يمين ودى طبعآ فى السودان لو جيت سايقة الشارع كلو يعاين ليك

زى السايق ليك كارو فى شارع المطار (مع العلم انو مرات بيحصل)... المهم انا سايق وهو راكب فى المقعد التانى واول ماخشيت الظلط قمت

ضايقت بتاع بوكس لانو غتيت وماكان عاوز يخلينى ادخل الشارع لكن عصرتو وخشيت.

صادف انو حاج سمؤال كان بيتكلم فى التلفون فصاحبنا بتاع البوكس هم شوية وجا طاير وبس اول ما بقا قصاد الشباك فتح ليك نيران (( انت ياحاج وكت داير تتكلم بالتلفون ماتقيف قبل ماتقتلنا ولا تقتل ليك زول ولا تققعد فى بيتكم احسن وكت مابتقدروا على السواقة دى
كرهتونا الشوارع الايام دى كمان بقيتو تسوقوا امجادات وحافلات يحرق سنين البيسوق معاكم فى الشارع دا )) وفوووووو شتت

الحاج سمؤال طبعآ بادلو بعض الشتائم لكن لما لقانى انا وقفت من الضحك غلبنى اسوق حتى استوعب انو انا السايق انا ما هو

خبرتو مع التلفونات واجهزة الكومبيوتر مقبولة لكن فى حالة الصعوبات بيرجع لى وهنا تكمن المفاجآت

مرة تلفونو ونحن ماشين على البيت بقا مابيضرب جرس فطبظ فيهو شوية وقام ادانى ليهو عشان اقوم اعالج المشكلة فقمت قفلت التلفون وفتحتو

واتحلت المشكلة ولكن فكرة جهنمية خطرت على بالى فقمت حولت نغمة من عندى (نغمة طوارئ) صفارة عالية جدا جدا وعملتها نغمة تلفونو بدون

وقلت ليهو كدا تمام.

نزلتوا البيت ورجعت انا بيتنا واول ماوصلت قمت اتصلت عليهو ويمكن ان تتخيلو كمية الشتائم بعد الرد على التلفون بعد مسافة طويلة

((ملحوظة))

فى اليوم التانى عرفت انو كان عاوز يتلب من البلكونة اول ما التلفون ضرب

مرحب محمد عوض
وواصل يوميات صاحبك حاج السمؤال
والله محتاجين حاجات تضحك وتدخل الفرفشة في القلوب الملانة عكننة دي
بس خليك حنين شوية على عمك حاج سمؤال

Quote: والله محتاجين حاجات تضحك وتدخل الفرفشة في القلوب الملانة عكننة دي بس خليك حنين شوية على عمك حاج سمؤال

العزيز جعفر

قلنا نزح من السياسة شوية بعدين الراجل دا ما هين, لو كان صادف مخرج كان عملو مسلسل خلى بوست


شكرآ على المرور

مرة جانى صديقى فى المكتب وطلب منى اعمل ليهو CV

بعد ما انتهينا بقينا نتونس فقمت قلت ليهو كد نجهجه عمك سمؤال دا شوية, قمت طوالى عملت اكاونت فى Skype بى اسم مديرة المشروع الشغال

فيهو هو وخشيت ليك معاو وتعال شوف الكبكبة.

اول شى قلت ليهو انو انا حاوقف زول كان معانا فى المكتب وانت حتستلم شغلو لانو الزول دا مانافع

والجواب كان حاااااااااااضر

وانت شغلك ماشى كيف وانا داير احاول ارقيك لانك مجتهد وال وال وال وال

المهم ساعة ونص انا سارح ليك بالزول وزولك نسالو نقولو انت بتتبسم مالك يقوم يبتسم ويقول مافى حاجة

قمت كتب ليهو ماتشتغل بالناس الجمبك ديل كتير لانهم حاسدين

الغريبة انو ردة وقال لى ما شغال بيهم كتير (مع العلم ان الحوار كلو بالانجليزى) وطبعا من الكبكبة مافرز انو قالت ليهو كدا ليه و كان

فى كمية كلمات بتتكتب بى طريقةفى الدكشنرى مافى.

المهم زولنا فى الاخر قمت كتبت ليهو بالعربى انو ياخ واله تعيش وتاخد غيرها فما كان منه الا ان اغلق الجهاز وذهب الى البيت قبل انتهاء الدوام






دا طبعآ بعد كيل الشتائم

الموبايل وما اجمل الموبايل

مرة نسى تلفونو فى المكتب قمت سريع جدا غيرتة اسمى بى اسم واحد شغال معانا فى مكتب تانى افغانى الجنسية بنفس نمرة تلفونى

بحيث انو اول ما اتصل عليهو انا يظهر ليهو اسم الزول الافغانى دا.

المهم اول ما جا اديتو ليك خمسة دقايق وقمت ضربت, عمنا اول ماعاين للتلفون شالو وجرا برة المكتب والو وازى الاحوال ومدة طويلة ووووووو

وكل الكلام بالانجليزى المهم زولنا عشان مايحس بى حاجة قمت قلت ليهو انا جاى الخرطوم وانا عندى مشكلة كبيرة ومحتاج لى اربع الف دولار

فالزول اتعاطف معاى وقال لى انو هو عندو 500 دولار لكن حيتصرف يجيب الباقى فى خلال اليوم وحيجى يستنانى فى المطار وكدا.

اغرب مافى الموضوع انو بعد المكالمة بى زمن وجيز قمت سالتو اذا ممكن يسلفنى 500 دولار طبعا نكر حطب انو ماعندو زاتو لكن دا طبعآ

قبل ما اسمعوا التسجيل الحفظتو انا من المكالمة, بعد سماع التسجيل تم تهديدى بالقتل عديييل كدا

الموقف الجاى دا صعب شوية

الصباح ونحنا ماشين على المكتب بدا يحكى لى فى قصة عن زول عندو معاهو مشروع وقريبو معاهم فى الشغلة وبدا يشرح لى فى المشروع

لكن الارباح يمكن تكون ما تمام وخايف يخسر القروش لكن التزم مع الناس و القصة جرت بعد زمن بديت اتخيل انو انا زى السمعتة القصة دى

قبل كدا وبديت اركز واركز واركز!! بعد شوية لقيت زولنا دا فكا الموضوع القبيل بقى يحكى لى فى الموضوع الشغال فى الراديو بتاع

العربية ومارجع ليهو الا بعد ما قفلت الراديو طبعآ.

ذكرنى واحد فى باكستان كان حنفولى جدا وفجاة العملة بتاعتهم دقت الدلجة بى صورة خلت ليك عمنا دا قروشو المدكنة كلها بقت مابتسوى ربطة

من قروش زمان.

فى يوم مشى الجامع عاوز يتوضأ لغاية ماوصل الرجل الشمال بعد مسافة اكتشف انو بيغسل فى رجل الزول القاعد جمبو.

بعد يوم طويل مارقين من المكتب والحاصل انو انا كل مرة بكون سايق العربية وهو راكب فالمرة دى قلت الا يسوق وحلف يمين مايسوق قدر ما حنست فى الآخر عملتة فيها زعلان وقلت لى مامشكلة انا بسوق, هو من الفرحة جرا طوالى فتح ليك الباب اليمين وركب بى حسابات الكرسى الجمب السواق.


تتذكروا الكورلا الدركسون يمين الفوق ديك ؟ بس بس بس ياها زاتا

لو واحد جرب اشتغل بال office outlook بيعرف انو فيهو ابداعات عجيبة, من ضمن الابداعات انو ممكن تضيف الاسم البتختارو عشان اول ما الايميل يصل زولك البي هناك يشوف اسمك طوالى مع امكانية تغيير الاسم.

قمنا غيرنا اسم حاج سمؤال دا من ايميلو زاتو واستبدلناهو بى اسم المسؤؤولة من شؤون العاملين ورسلنا ليهو الرفدية بتاعتو من ايميلو زاتو وضربنا ليهو حقوقو ووعدناهوانو فى المستقبل لو فى وظيفة ظهرت تانى انو حيكون اول زول وووووووووووو والكلام دا كلو من ايميلو هو شخصيا يعنى ابعد زول شاف الايميل دا هو نفسو منو وفيهو.

الكلام دا طبعآ بعد ماكان هو خارج المكتب ولغاية ما جا راجع وفتح الكومبيوتر وبدا يقرا فى رسايلو ومن محاسن الصدف انو المدير جا وقف بيتكلم معاهو عن شغلو ودا بيجاى بيقرا فى رسالة فصلو وبقا ماعارف يصدق منو ولا يكضب منو.

غايتو لحقناهو فى اخر لحظة كان ماشى يودع فيها باقى المكتب بى غادى وتم شرح الطريقة كيف بعد عدم تصديقه لى انو لسة ما اتفصل من الشغل.

اجمل مافى الموضوع انو بقا كلما يستلم ايميل يجى شوف صندوق الرسائل المرسلة من عندى فيهو نفس الرسالة ولا لا.