تضامنوا مع عبدالواحد محمد نور...

هيي ما دايم إلاّ وجه الله.




التعديل لاضافة الكاريكاتير.

الجماعة كلهم وقعوا ؛وخلوكـ تزازي في فرنصا.

معليش إستعجلنا شوية ؛

اقول مبروك سلام دارفور.

قلت لي تقرير مصير شنو؟


اهو الجماعة رفدوكـ وودوكـ الصالح العام .

كامل تضامني

Quote: كامل تضامني

شكراً يامعاوية علي التضامن.

Quote: اقول مبروك سلام دارفور.

واقول معك مبروك سلام دارفور
لكن بدات تظهر ملامح معارضة جديدة مدعوما بقوي اقليمية
ربنا اكفي السودان الشرور

Quote: لكن بدات تظهر ملامح معارضة جديدة مدعوما بقوي اقليمية

لكن القوي الاقليمية دي منو ؟


شكرا يالشامي.

Quote: لكن القوي الاقليمية دي منو ؟

مصر التي استضافت قيادات دارفورية يا بشير

وليبيالسع عصا نائمة وعصا قائمة

عبدالواحد حواكير إستضافته قناة الجزيرة؛

لم يأتي بجديد ؛

كالعادة طالب بطرد المستوطنين الجدد.

كما يمكنكم التضامن ايضا مع اخونا محمدسليمان

وبقية الرهط

انا ما بفسر وإنتو ما بتقصروا.

الاسم الجديد للـ 4فصائل بقيادة تجاني السيسي

(حركة التحرير والعدالة) ذاتهم ماعايزنك.

الي الميدان ياحميدان ؛

طبعا علي ارض الواقع ماعندكـ ابوالنوم.

بالله بكرة فجر أنتظر المسيرات للاهل في دارفور؛

فرحانين بتوقيع الاتفاق الاطاري ده.



قال حواكير قال.

غايتو زولك دة يا دكتور تاني باريس دي ما بيطلع منها إلا حمار الوادي يكورك ..

شكلو الفرنصييين ادوهو حاكورة هناك ..

هاك اللقيمات دة ..

____
تحياتنا يادكتور

يعني خلوه قاعد في الصقيعة..

Quote: يعني خلوه قاعد في الصقيعة..

هي الصقيعة براها ؟ معاها صقيع فرنصا.



________

تشكر ياودالباوقة.

الجلابة فرحانين براهم

Quote: الجلابة فرحانين براهم

Quote: الجلابة فرحانين براهم

الجلابة وغيرهم فرحانين .

بالمناسبة إنت مع منو؟

Quote:

شكرا ياعبدو ؛اضحك الله ايامك .

مستشارنا ابوالدهب

صباح الخير؛؛؛

Quote: غايتو زولك دة يا دكتور تاني باريس دي ما بيطلع منها إلا حمار الوادي يكورك .. شكلو الفرنصييين ادوهو حاكورة هناك ..

أخد سيك في قبولو ؛والفرنسين بعد ده يسو بيهو شنو ؟

اتو وحرق.

Quote: هاك اللقيمات دة ..

لو معاها شاي بي لبن يكون احسن.

كامل تضامنا مع عبدالواحد محمد نور

كامل التضامن مع مدعو عبد الواحد حواكييييييييير حالته امبارح تحنننننن قال لا يعرف عن الاتفاقية الا من خلال الجزيرة الآن دا كلام يا بتاع المستوطنين الجججججججججججددوالجنجويد والحواكير والتعويضات بعد كدا دا كلو طاااااااار ليك ياحبيب

Quote: فالكيان الصهيوني يعلم أن أي مفاوضات لحل أزمة دارفور سوف تعيد الامور وتردها الى الطابع السوداني الوطني، بقيم الدين وأعراف القبائل المسلمة وتقاليدها وهذا بالطبع لن يفيدها في شئ فالكيان الاسرائيلي لن يجد سهولة في التعامل مع حملة سلاح لديهم إيمان بالدين الاسلامي، والقيم الحضارية للاقليم كما لن يربح شيئاً من وراء تعامل مع أناس كهؤلاء لأنهم – ببساطة – لن يكونوا حصانهم الرابح للولوج الى عمق الاقليم ووضع أيديهم فيه تمهيداً للاستفادة منه مستقبلاً. اذن اختيار عبد الواحد ليكون (مندوب تل أبيب) بشأن دارفور وفي ذات الوقت (مندوب باريس) لم يأت اعتباطاً فقد ظهرت عليه الأمارات والعلامات المطلوبة، وفي مثل هذه الحالات فإن الورقة يتم الاحتفاظ بها لمرحلة لاحقة وليس الآن، وربما لهذا السبب ظل عبد الواحد في كل مفاوضات تعقد يرسل شروط تعجيزية مفارقة تماماً للمنطق والمعقولية، ويتعنت، فهو لا يريد تفاوض لأن الذين خلفه لا يريدون تفاوضاً، هم يريدونه في (مرحلة ما) لأداء غرض ما، وهذا ما جعل رفقائه الميدانيين الذين هم المكتوين بنيران الحرب وشمس الصحراء الحارقة والثعابين والعقارب وقلة المؤونة، وبؤس الحال جعلهم يقررون عزله عن القيادة، وينصبون بديلاً له، فقد أدركو أن قائدهم أدمن حياة الدعة والراحة والحياة المخملية المحاطة بسياج استخباري عصي، يصعب عليه القفز فوقه حتى ان (تاب توبة سياسية نصوحة)، ولعل قادة حركة عبد الواحد الميدانيين (فهموا) بعد طول مدة الرسالة التي أرسلها الموفد الأمريكي الخاص الى السودان (سكوت غرايشن) لمن لا يزالوا يراهنون على عبد الواحد من المقيمين بالمعسكرات والنازحين حين قال لهم قبل اشهر – بصراحة جارحة – أبحثوا عن قائد جديد ولم يكشف لهم عن سر هذا البحث والتغيير فغرايشن – بالطبع – يفهم معنى وقوع عبد الواحد في حضن الموساد!!

الاخ بشير

التهاون والسخريه من الحكومه هو ما اوصل قضيه دارفور لهذا النفق المظلم

علاوة علي عدم الاعتراف بالقضيه مبكرا ..

اتوقع نفس السناريو وسيجد عبدالواحد من يناصره اذا كان الخطاب بتلك الصوره مع الاستخفاف بقضيته ..

اذا نظرنا الى لقاء مشايخ الفور مع الرئيس يوم السبت الماضي ، ثم الى الـ 10 حركات التي تقترب من السلام
سنعلم أن عبدالواحد في خطر

وعندما اعطي فرصة للتعليق على الحدث بالأمس ، أخذ يعيد في كلام "الابادة الجماعية ، والحكومة تقتل أهلنا في دارفور"

اخونا محمد فرح

تحياتي؛؛

Quote: وعندما اعطي فرصة للتعليق على الحدث بالأمس ، أخذ يعيد في كلام "الابادة الجماعية ، والحكومة تقتل أهلنا في دارفور

كلام خلاص انتهي مفعوله ؛عليه يموصوا ومايشربو
يكشحو في اقرب سبورة للنضال.

Quote: التهاون والسخريه من الحكومه هو ما اوصل قضيه دارفور لهذا النفق المظلم علاوة علي عدم الاعتراف بالقضيه مبكرا .. اتوقع نفس السناريو وسيجد عبدالواحد من يناصره اذا كان الخطاب بتلك الصوره مع الاستخفاف بقضيته ..

يثبت الكيزان واعوان الحكومة غبائهم المطلق والدائم والذي ليس له علاج (الحمق ليس له علاج)
بدلا من انتهاز الفرصة وفتح معابر مع عبد الواحد ومحاولة كسبه وجماهيره يقومون بمحاولة اقصائه واستعدائه ..

يا بني كيزان ألم توقعوا مع مناوي امس ؟؟ هل انتهت الحرب ؟؟ ها انتم سعيدون بالتوقيع مع الدباب خليل ابراهيم وتظنون انكم يمكنكم القضاء على عبد الواحد بالسخرية ؟؟ طيب ومناوي موقعو وين ؟؟ ولا برضو حتسخرو منو وتمارسو عليهو الاقصاء ؟؟ هل تتعلمون شيئا ؟؟

استاذنا الكبير عبدالعاطي
بعد التحية

Quote: يا بني كيزان ألم توقعوا مع مناوي امس ؟؟ هل انتهت الحرب ؟؟ ها انتم سعيدون بالتوقيع مع الدباب خليل ابراهيم وتظنون انكم يمكنكم القضاء على عبد الواحد بالسخرية ؟؟

هل شاهدت رد عبدالواحد في قناة الجزيرة بعد حدث توقيع الاتفاق الاطاري؟

الاخ/عادل عبدالعاطي

تحياتي؛؛؛

Quote: يثبت الكيزان واعوان الحكومة غبائهم المطلق والدائم والذي ليس له علاج (الحمق ليس له علاج) بدلا من انتهاز الفرصة وفتح معابر مع عبد الواحد ومحاولة كسبه وجماهيره يقومون بمحاولة اقصائه واستعدائه ..

ياعادل ياخوي ؛عبدالواحد ده فتحوا معاهو كباري عديل موش معابر ؛

لكن هو ماتغير ولا ينبغي له.

شروط تعجيزية ماعندها معني ؛
لو مسكنا بس طرد المستوطنين الجدد دي براها ؛عايزه ليها كم سنة ضوئية

والناس هناك تكون شبعت موت.

ح نظل ندق في راسو الكبير ده لمن يعرف حاجة ويقول الروب ؛
عشان لمن يجي يتفاوض يقعد في علبو ؛

بعدين عبدو ده جماعتو طردوه وقعد لافي ساي في فرنسا ؛
يملا في أكياس الهوا لناس دارفور.

بشير سلامات

Quote: بعدين عبدو ده جماعتو طردوه وقعد لافي ساي في فرنسا ؛ يملا في أكياس الهوا لناس دارفور.

طيب انت لمن عارف كدا حارق رزك معاهو ليه ؟؟
ما تخليهو في لفو واكياس هواهو ؟؟

Quote: طيب انت لمن عارف كدا حارق رزك معاهو ليه ؟؟ ما تخليهو في لفو واكياس هواهو ؟؟

هلا ياعادل ...

ماحارق رزي ولا حاجة ؛

لكن ما بنخليهو يملا اكياس علي الهواء مباشرة ؛

عشان الناس تعرف حاجة ؛ومستوي للطرح لاخونا عبدو .

الاخ/اسامة خليفة

تحياتي؛؛؛

Quote: التهاون والسخريه من الحكومه هو ما اوصل قضيه دارفور لهذا النفق المظلم علاوة علي عدم الاعتراف بالقضيه مبكرا .. اتوقع نفس السناريو وسيجد عبدالواحد من يناصره اذا كان الخطاب بتلك الصوره مع الاستخفاف بقضيته ..

ياخوي إنت قايل الحكومة بتاخد بكلامنا الفي سودانيز ده؟

عبدالواحد ده ماعارف هو زاتو عايز شنو من الحكومة ؛

قالوا ليهو تعال اقعد في واطات الله دي وقول كلامك وعايز شنو ...

شبكنا ليك حواكير ومستوطنين جدد ؛
وقال عايز امن ؛ياخي الامن ده بيجي كيف ما لم الناس تقعد ...

الاخ بشير

Quote: ياخوي إنت قايل الحكومة بتاخد بكلامنا الفي سودانيز ده؟

يابشير الان النت وسودانيز اون لاين اصبح من اكبر المراكز الاخباريه

خاصة للمغتربين بما فيهم انا وانت ..

ماقصدته اخي بشير الاستخفاف والسخريه في الخطاب هي ما اوصلت الحال لما عليه الان ..

الاختلاف في الراي ظاهره صحيه ويجب ان يكون الحوار بشكل جاد مع احترام راي الخصم ..

تقديري..

اخونا ابراهيم علي
تحياتي؛؛؛

Quote: كامل التضامن مع مدعو عبد الواحد حواكييييييييير حالته امبارح تحنننننن قال لا يعرف عن الاتفاقية الا من خلال الجزيرة الآن دا كلام يا بتاع المستوطنين الجججججججججججددوالجنجويد والحواكير والتعويضات بعد كدا دا كلو طاااااااار ليك ياحبيب

زولنا ده حاكورة واحدة ما بلم فيها ؛

الجماعة لمو القلة كلها ومشو ؛

المرفعين قال ياباها مزعمطة يجي يكوس ليها بي ريشها.

حُذف للتكرار.

شكراً ياأيوب خليل علي التضامن.

تحياتى للجميع

اتمنى من كل قلبى ان يعم السلام جميع انحاء السودان من اجل الشعب المغلوب على امره ولاينوبه من وراء الاقتتال غير
الدمار والخراب فى حين يتكسب من يقومون بالاقتتال باسمه من وراء ذلك ويجنون الملايين ... تعرض المواطن
الدرافورى للكثير جدا من الظلم وعدم الاستقرار ارجو ان يكون هذا الاتفاق فاتحة خير عليهم ورفع الظلم عنهم ..
اماالعميل الصهيونى عبدالواحد محمدنور فلابواكي عليه غير اعوان وازيال الصهيونية لعنة الله تتنزل
على الصهاينه ومن يشايعهم ويقف معهم الى يوم الموقف العظيم...
تسلم يارب ....

كامل تضامني معه

وقد رأيته ليلة أمس علي شاشة الجزيرة وشو مختوف ومخلوع تقول راميه بعير


ولا زال يتحدث عن الاغتصاب وقلبو دم ،، دم علي خليل.

الاخ/عبداللطيف السيدح

تحياتي؛؛؛

Quote: ولا زال يتحدث عن الاغتصاب وقلبو دم ،، دم علي خليل.

لكن خليل نجّمو نجام قبورة

قال مافي فصيل غير العدل والمساواة ح يجلس في مفاوضات

مع الحكومة ؛العايز يفاوض يجينا نحنا وبنفاوض نيابة عنه.

الاستاذة/ماجدة

تحياتي؛؛؛

Quote: اتمنى من كل قلبى ان يعم السلام جميع انحاء السودان من اجل الشعب المغلوب على امره ولاينوبه من وراء الاقتتال غير الدمار والخراب فى حين يتكسب من يقومون بالاقتتال باسمه من وراء ذلك ويجنون الملايين

نعم نتمني ان يعم السلام ارجاء دارفور والسودان.

Quote: اماالعميل الصهيونى عبدالواحد محمدنور فلابواكي عليه غير اعوان وازيال الصهيونية لعنة الله تتنزل على الصهاينه ومن يشايعهم ويقف معهم الى يوم الموقف العظيم...

عبدالواحد خلاص بقي ورقة طائرة ؛عليه ان يلحق سوق النضال

ويجيب لينا حاجة جديدة وتغيير خطابه البائس.

بشير .. السلام عليكم ...

Quote: ح نظل ندق في راسو الكبير ده لمن يعرف حاجة ويقول الروب ؛ عشان لمن يجي يتفاوض يقعد في علبو ؛

ده كلام غير مسئول واسلوب بلطجية يابشير ...بعدين ناس دارفور ديل اصحاب قضية حقيقية نتمنى ان تجد الحل واحتواء كل الذين هم خارج عملية السلام بمن فيهم عبدالواحد ...ونتمنى ان نرى اهل دارفور وهم مجموعة واحدة وقضية واضحة وطلبات محددة ..ولكن رغم الموقف الحكومي الذى نختلف او نتفق معه الا ان الحركات نفسها صراحة غير منطقية في مطالبها وكأنها لا تريد نهاية لمعاناة شعوبها وشمس كل صباح تشرق حركة جديدة في سماء دارفور ....لست ضد مطالب اهل دارفور ومؤمن بأنهم ظلموا ولكن هل لهم ان يتحدوا عرب وفور وغيرهم في جسم واحد ويفاوضوا معاً من اجل الخروج من هذه الازمة التى اهلكت كاهل دارفور والسودان ؟!!

اخي بشير السلام مع دكتور خليل هو سلام داخل الحركة الاسلامية ..وقضية دارفور اكبر من ذلك لذلك لن تنتهى هذه القضية طالما هناك حركات اخرى تولد كل صبح جديد حتى لو استصغرنا حجمها فالنار من مستصغر الشرر ...لوماكتلتو القضية دى بالعدل واديتو كل واحد حقه حاتموتو بجهجهة الجوك جوك ...شخص واحد ممكن يهد كل الاتبنى ...فما تستخفوا بهذا الشخص ..

بشير حااذكرك بكلامي ده لانه القضية ابداً مانتهت ولن تنتهى طالما تفكيركم لحلولها بهذه السخرية والاستخفاف ...


ودي ..

ودالقاضي
تحياتي؛؛؛

Quote: ده كلام غير مسئول واسلوب بلطجية يابشير

يافايز ياخوي شايفنا هنا في ملجة بكري دي شايل سيخة

ولا طوق ؟
اعني بالدق دق اسفيري عشان ماتمشي بعيد.

Quote: ولكن رغم الموقف الحكومي الذى نختلف او نتفق معه الا ان الحركات نفسها صراحة غير منطقية في مطالبها

اهو زي موقف اخونا عبدو يافايز؛

طرد المستوطنين الجدد (بالمناسبة المستوطنين ديل جو من وين؟)

Quote: اخي بشير السلام مع دكتور خليل هو سلام داخل الحركة الاسلامية ..وقضية دارفور اكبر من ذلك لذلك لن تنتهى هذه القضية طالما هناك حركات اخرى تولد كل صبح جديد حتى لو استصغرنا حجمها فالنار من مستصغر الشرر .

اصلا من اشعل حرب دارفور يافايز ؟ شيخنا الذي لم يعلمنا السحر ؛

وانشقاق الاخوان وعييك وعاااك .

شوف كل أو اغلب قادة الحركات المصلحة من الاسلاميين اتباع الشيخ ؛
يعني كيزان يارسول الله.

مافي استخفاف ؛اكتر من برطعة الجماعة ديل برة باسم دارفور .

Quote: تداعيات انهيار حركة عبد الواحد محمد نور بقلم/ بكري إبراهيم على خلفية نزوح عدد من المواطنين يتجاوز الـ ( 5000 ) ألف شخص ونيف من قرى بمنطقة جبل مرة والتي تقوم فيها حركة تحرير معسكراتها حيث كانت الحركة قد أجبرت المواطنين على البقاء في قراهم وذلك لاستغلاهم كحصون أو دروع بشرية إذا وقع إي هجوم من جانب القوات المسلحة والى جانب ذلك يقومون بفرض الضرائب الباهظة على المواطنين لإعاشة قواتهم ، وفي الأسابيع الماضية حصل خلاف بين القيادات بحركة تحرير السودان حيث يعود هذا الخلاف إلى أن منسوبي هذه الحركة والقياديين من خارج منطقة جبل مرة من الفور والزغاوة والعرب والقبائل الأخرى قد تولوا زمام قيادة الحركة وبذلك احتج منسوبي الحركة الذين ينتمون لمنطقة جبل مرة من أبناء الفور لقائدهم عبد الواحد نور الذي استجاب للاحتجاج وأمر بتغيير القيادات الوافدة . رفض عبد الواحد نور هذه القيادة التي آتت من خارج منطقة جبل مرة وقال لهم أننا نحن " الأصليون " في هذه الحركة وأن المنطقة تعتبر هي المقر الرئيسي للحركة هي منطقتهم لذلك يجب أن تؤول قيادة الحركة إليهم ، وهذا الشئ أدى إلي خلاف كبير في أوساط الحركة مما أدى إلى نشوب عمليات عسكرية وقتال داخل الحركة وقد تضرر منه المواطنين كثيراً وبعد ذلك استغل المواطنون الذين اجبروا على الإبقاء قصراً في قراهم أبان الفترة الماضية بالنزوح إلى منطقة نيرتتي .

Quote: ونتيجة لهذا الصراعات الدامية بين قوات حركة عبد الواحد نور تدهورت الأوضاع الأمنية والسياسية ففي أوساط جيش الحركة وانعدمت الثقة تماماً بين قيادات الحركة العليا والوسطى مما دعى المجلس الرئاسي لحركة تحرير السودان لاتخاذ قرارات ضد من تسببوا في هذا الوضع وعلى رأسهم رئيس الحركة عبد الواحد محمد نور وآخرين حيث تم تجريد عبد الواحد محمد نور من رئاسة الحركة وتفويض المجلس الرئاسي بممارسة سلطاته ، كما تم إعفاء مستشار الحركة احمد محمدين عبد الله من منصبه كمستشار للحركة وتحويله لجنة تحقيق نتيجة للفساد المالي الذي ارتكبه خلال فترة توليه المنصب ، وأيضا إعفاء الناطق العسكري باسم الحركة نمر محمد عبد الرحمن من منصبه والتحقيق معه في تهم الاغتيالات وتصفية الرفاق على رأسهم هيئة أركان الجيش القائد يوسف احمد يوسف " كرجكولا " . ومن خلال ما يحدث في حركة تحرير السودان نرى الانهيار الذي أصاب الحركة والتداعيات التي تلتها مما يؤكد أن حركة عبد الواحد محمد نور في طريقها إلى الفناء كما ذكرنا في تحليلات سابقاً ، وما يزيد من تساقط سياسات الحركة تمسكها بحق تقرير مصير دارفور المزعوم مع علم الحركة التام بان أفراد الحكومة الذين يحكمون دارفور حالياً هم من أبناء دارفور نفسها وأن حركة تحرير السودان ليس لديها أي وثيقة تلزم الحكومة بتقرير مصير دارفور لأن دارفور ليست مستعمرة بحكومة دولة أجنبية كما هو معلوم ، أن تقرير المصير عادة ما يكون لنيل استغلال الدول من مستعميرها وهذا ما لا ينطبق على ولايات دارفور لأنها جزء لا يتجزءا من أرض السودان . © Copyright by SudaneseOnline.com

فووق

لحدي بكرة ؛كان حيين بنتلاقي.

سلام يا دكتور




اخيرا فرنسا زهجت من عبدالواحد نور

سلام يا د. بشير

Quote: اتوقع نفس السناريو وسيجد عبدالواحد من يناصره اذا كان الخطاب بتلك الصوره مع الاستخفاف بقضيته

أسامة خليفة
أموت والله وبس اعرف قضية الزول ده شنو

كدي لو انت عارف حاجة نحنا ما عارفنها ورينا ليها

طرد المستوطنين الجدد ؟؟؟؟؟؟؟؟؟؟

يا ترى من هم المستوطنين القدامى !!!!

يبدو أن المدعو عبدالواحد تأثيراً كثيراً

ببعض العبارات المستخدمة في فلسطين المحتلة بعد فتح

مكتبه في إسرائيل .

ابوعُلوة

تشكر ياحبيب علي المرور ؛

بالله الابنص خليهو للاخر .

في بيان للقوات المسلحة
تمت استعادة كامل منطقة جبل مرة

Quote: تضامنوا مع عبدالواحد محمد نور

يبدو أن فصيله قد عزله وقرر اللحاق بالدوحة