Post: #1
Title: الرجل البراية.... البراية التبرا روسين المجننكم
Author: سجيمان
Date: 02-22-2010, 06:05 PM
Parent: #0
البراية هو النضام... وهو الذي يبريك حتى تصبح في حجم سن قلم الرصاصة أو أدق..نعم هناك من الرجال من يمسكك ويقعد ينضم معاك من الليلة لي باكر ... وممكن لو إنت ما مستعجل ووراك حاجة وطاوعتو يبريك سنة للحول... وهؤلاء الرجال أسأل الله أن لا يبتلي بهم حبيب ولا قريب...الواحد فيهم يلم فيك في زقاق ضيّق ويزنقك زنقة ترزي يوم الوقفة....ويقعد ينضم معاك... وفيهم برايّات برشاش.. براية رشاشة.... أو بي دُش.... ينضم ومع كل حرف منقّط يطلع من خشمو بصاق بعدد نقاط الحروف... ويا ويلك لو بتكلم معاك في موضوع شيناتو كتيرة.... دا لو قابلتو أرجع بيتكم بسرعة وجيب بشكير وتعال أسأل ربنا أنو برايتك يكون الجّن!... أما الجاف فهو لا خطر منه إلا النضم الكتير.... وهناك الرجل البراية اللكادة.. وهو ينضم معاك وكل مرة يكلدك بيدو عشان تنتبه لما تنتهي منو أو ينتهي منك.. أوصيك أنك تتمسح بملح وزيت سمسم أو تغشا الأجزخانة وتشتري دواء فلايت...... والبراية الخامشة.. ودا يخمش يدك ويمسكها قوي في يدو عشان يضمن وجودك معاهو وما يفكك إلا يكورك حمار الخلا...والرجل البراية بصورة عامة وصفو هين.... تلقى شلاليفو دقاق وناشفات.. وريقو ناشف... وحيلو ناشف ولحمو كملان في الغالب الأعم....ويتكلم ويرمّش كتير... وعيونو زايغة، وبعد مرات ينططن ومرات يغمدن بسرعة ويفتحن بسرعة عشان ما تكون في المسافة دي زُغتا منو...وربنا لو غدبان عليك يلم فيك براية فيهو الصفات الفوق دي مجتمعة... يعني رشاشة وخماشة ولكادة...يمسكك في طرف شارع بيتكم ويقعد ينضم ويرش ويلكد لحدي ما تصل بيتكم لحدي ما يوصلك خشم بابكم.. أوعك تقول ليهو اتفضل لأنو ح يتفضل وعشان يطلع تاني إلا تتصل بالنجدة والعمليات... والمصيبة بعد ما تتصل بالنجدة والعمليات يلم فيك ظابط بوليص براية برضو... الحل تخليهو جنب خشم الباب وبراحة تملص يديك من يدو وتدخل... لكن برضو ح يكون واقف جنب خشم الباب ومنتظر أي زول يطلع من بيتكم ويستلمو ويوصلو راس الشارع... ولوما طلع زول وصادف طلع كلبكم برضو ما ح يسيبو ح ينضم معاهو ويقول ليهو "لا حولاااااا.. انت المقعدك مع الناس ديل شنو؟...ما شفتا الكلاب الجد جد...بيسو في شنو؟...ما شفت الجرايد وشفت الكلاب المو خمج سوت في الناس شنو؟.....انتو كلاب مرطبة ومرتاحة ساكت..." ويقعد يحكي ليهو تاريخ الكلاب من كلب أصحاب الكهف إلى اليوم وينضم مع الكلب لحدي ما الكلب يزهج منو ويهوهو فيهو.. أو لو كلب مؤدب يحاول يخارج نفسو ويلوي ضنبو ويقوم جاري... وزي البراية المحلي دا بيكون واقف جنب خشم الباب حق بيتهم ويتصيد الفرائس... غايتو لو شفتو من بعيد تملّص نعلاتك وتشيلن في أباطك وتعضي طرف جلابتك وتقوم صوف... لكن لو كان براية عكليتة.... ح يجري وراك ويكورك ليك.. ولو ما لحقك يقيف ويعاين ليك ويقول لنفسو" عاد بيمشي مني وين؟... إلا يرحل من الحلة دي...باكر دي بلاقيهو"...
|
Post: #2
Title: Re: الرجل البراية.... البراية التبرا روسين المجننكم
Author: أبو عبيدة البصاص
Date: 02-22-2010, 06:37 PM
Parent: #1
Quote: والبراية الخامشة.. ودا يخمش يدك ويمسكها قوي في يدو
عشان يضمن وجودك معاهو وما يفكك إلا يكورك حمار |
والله يادكتور الفوق ممكن تعمل منهم ساتر وتطلع باقل الخسائر لكن الخماشه يمين
اسالني منو انا وتلقاهو كاتل حيلو وهو زي الكربه ماسك في ايدك حتى لو عرقت مابفكها
اها الحل اكان ماشي اعمل نفسك عتر ليك حجر ولا عاوز تربط شريط الجزمه
لكن اكان واقفين انتظر الحمار داك يكورك
|
Post: #3
Title: Re: الرجل البراية.... البراية التبرا روسين المجننكم
Author: سجيمان
Date: 02-22-2010, 06:59 PM
Parent: #2
ا
ابو عبيدة البصاص
| Quote: اها الحل اكان ماشي اعمل نفسك عتر ليك حجر ولا عاوز تربط شريط الجزمه |
ح يقول ليك.. اربطها باللليد التانية.. ويدنقر معاك..
|
Post: #4
Title: Re: الرجل البراية.... البراية التبرا روسين المجننكم
Author: سجيمان
Date: 02-22-2010, 07:38 PM
Parent: #3
اها
|
Post: #5
Title: Re: الرجل البراية.... البراية التبرا روسين المجننكم
Author: أبو عبيدة البصاص
Date: 02-22-2010, 07:48 PM
Parent: #4
.
.
.
.
شبكه جنس دي بعدها في اها
اكان كدي اخير الرشاشه داك
عشان تجاره البشاكير و صابون اللايف تزدهر
|
Post: #6
Title: Re: الرجل البراية.... البراية التبرا روسين المجننكم
Author: Hadeer Alzain
Date: 02-22-2010, 08:16 PM
Parent: #5
يا سجيمان
وماذا عن الفتاة/المرأة البراية ؟؟؟!!
|
Post: #8
Title: Re: الرجل البراية.... البراية التبرا روسين المجننكم
Author: Hayat Hussien
Date: 02-22-2010, 10:55 PM
Parent: #6
سلام يا هدير عليك الله خلي سيجمانف في شبكة مع الرجاله
اصلو الليلة متحلف ليهم ومفرغ نفسه ليهم انا عضوه جديده
بس متابعه ليه من زمان ومعجبه بكتابتهف فلك وله التحيه
حياة حسين (ام محمد)
|
Post: #13
Title: Re: الرجل البراية.... البراية التبرا روسين المجننكم
Author: سجيمان
Date: 02-24-2010, 07:12 PM
Parent: #8
لك الف تحية يا حياة حسين"ام محمد"
|
Post: #14
Title: Re: الرجل البراية.... البراية التبرا روسين المجننكم
Author: Hadeer Alzain
Date: 02-24-2010, 07:35 PM
Parent: #8
Quote: سلام يا هدير عليك الله خلي سيجمان في شبكة مع الرجاله
اصلو الليلة متحلف ليهم ومفرغ نفسه ليهم
انا عضوه جديده بس متابعه ليه من زمان
ومعجبه بكتابته فلك وله التحيه
حياة حسين (ام محمد) |
الأخت الغالية حياة حسين
منورة البورد .. ونأسف للترحيب المتأخر مع الجري والمشغوليات
فلك العتبى ياخ. كلنا سجيمان فانز قبل ما ندخل الحوش برضو ..
وربنا يشفيهو من وجع الضهر وأمراض الكبر دي .. لووول
أهو بسرعة أداك النجيضة في النساء .. وتب ما بقصر 
تحياتنا ليك ولمحمد
|
Post: #9
Title: Re: الرجل البراية.... البراية التبرا روسين المجننكم
Author: سجيمان
Date: 02-23-2010, 00:05 AM
Parent: #6
يا هدير .....شفتي المرا البراية... عايني لي جاي.... كان جاتك ضيفة تنضم معاكي... وان مشيتي علي التكل تصوطي ليها كباية شربات تلقيها ف مبارياكي ي ضنبك وتنضم.. وتجي مارقة معاكي على البرندة وتنضم برضو... وتقعد في العنقريب تتوهط وتنضم... وتشرب من كباية الشربات جغينة قوام قوام وتنضم.... وتقدميها تصلبك في خشم باب الحوش اربعة ساعات وتنضم....ولما تمرق منك انتي تجري علي العنقريب وتتكفلتي تحت البطانية وتشدك المراريا
|
Post: #19
Title: Re: الرجل البراية.... البراية التبرا روسين المجننكم
Author: سجيمان
Date: 03-20-2010, 08:18 PM
Parent: #6
<font face="Tahoma" size="5" color=red>
فوق من اجل برايات الانتخابات
|
Post: #7
Title: Re: الرجل البراية.... البراية التبرا روسين المجننكم
Author: سجيمان
Date: 02-22-2010, 09:15 PM
Parent: #5
اخير الرشاشة ساكت
علي الاقل بيدك فرصة تتقشقش
|
Post: #11
Title: Re: الرجل البراية.... البراية التبرا روسين المجننكم
Author: أبو عبيدة البصاص
Date: 02-23-2010, 08:52 AM
Parent: #7
Quote:
اخير الرشاشة ساكت
علي الاقل بيدك فرصة تتقشقش |
لكل امه علماؤها
ههههههههههههههههههههههه
يكمن الابداع في المألوف والواقعي من حياتنا
سجيمان يشهد الله انا بريدك لي الله
يلا مع السلامه
البصاص
|
Post: #15
Title: Re: الرجل البراية.... البراية التبرا روسين المجننكم
Author: سجيمان
Date: 02-25-2010, 08:32 AM
Parent: #11
شكرا يا بصاص
ما قصرتا معاي تب
|
Post: #10
Title: Re: الرجل البراية.... البراية التبرا روسين المجننكم
Author: سجيمان
Date: 02-23-2010, 08:41 AM
Parent: #1
فوق
|
Post: #12
Title: Re: الرجل البراية.... البراية التبرا روسين المجننكم
Author: سجيمان
Date: 02-24-2010, 08:41 AM
Parent: #1
فوق من اجل البري
|
Post: #16
Title: Re: الرجل البراية.... البراية التبرا روسين المجننكم
Author: سجيمان
Date: 02-25-2010, 05:01 PM
Parent: #12
انا يظهر ح ارجع لي تكيتيك البوصطي الواحد
|
Post: #17
Title: Re: الرجل البراية.... البراية التبرا روسين المجننكم
Author: سجيمان
Date: 03-03-2010, 11:21 AM
Parent: #1
فوق
|
Post: #18
Title: Re: الرجل البراية.... البراية التبرا روسين المجننكم
Author: سجيمان
Date: 03-04-2010, 08:18 AM
Parent: #1
فوق
|
|