ساخر سبيل : قبل القيامة !

صحيفة الرأى العام
عددالجمعة 19 فبرير 2010م
موقع الكاتب : alfatihgabra.neten]


يوماً بعد يوم تشتد حاجتى إلى فهامة (حجم عائلى) حتى أستعين بها على (فهم) ما يجرى فى هذا البلد ، فقبل أيام مضت قمت بإدارة ندوة بعنوان (أطفال المايقوما ... من المسئول) وقد أكد جميع الحاضرين بأن هؤلاء الأطفال (فاقدى السند) يتعرضون إلى الموت - وبنسبة عالية - بسبب شح الإمكانات (البعض توفى بسبب عدم وجود حقنة لا يتعدى ثمنها 250 جنيهاً) وكان سؤالى الذى طرحته عبر الندوة لعضو (هيئة علماء السودان) الشيخ محمد هاشم الحكيم هو : أليس توفير إحتياجات هؤلاء الأطفال من صميم مسئولية ديوان الزكاة ؟ وهل من الإسلام فى شئ أن يموت المسلم ولا يجد العلاج بينما ديوان الزكاة يمتلئ بالمليارات؟ ؟
وقد كان رد الأخ عضو هيئة علماء السودان بأن الزكاة تذهب فى مصارفها وأن بند العاملين عليها ينال نصيباً كبيراً جداً في إطار تغطية نفقات الصرف على المرتبات وهذه مشكلة أولى، اما الثانية فتكمن في تعدد المصارف في الوقت الذي يعتبر فيه القائمون على أمرها أن لهم الأولوية .
انتهى رد الشيخ محمد هاشم الحكيم على تساؤلى (المشروع) لكن دهشتى لا ولن تنتهى أبداً فعلى مدى (عشرين عاماً) ظلت فيها الأموال تتدفق على هذا الديوان بمختلف (العملات) أشكال وألوان ومن كافة الأنشطة الإقتصادية و(مثال فقط وليس للحصر) إبتداءً من كبريات شركات البترول والاتصالات والشركات الصناعية والتجارية والبنوك مروراً بالمغتربين ورجال الأعمال والمجمعات والمحال التجارية والصيدليات والمستوصفات الخاصة انتهاء بأصحاب المطاعم والكافتيريات والبقالات والأكشاك والجزارين وبتاعين الخدار ! كل هذا ولم نلحظ أثراً ولو (شبه ملحوظ) لمساهمة الديوان فى تقليل نسبة الفقر .. بل لم نشاهد ولو مشروعاً واحداً كبيراً يتناسب وحجم هذه الأموال التى تتدفق يومياً على هذا الديوان !
(معليش) عزيزى القارئ .. الآن فقط وجدت الإجابة وأنا أقلب فى صحيفة (الحرة) العدد رقم 273 الصادر بتاريخ الأربعاء 10 فبراير 2010م فى حوار أجرته الصحيفة مع الأمين العام لديوان الزكاة وفيه تم سؤال (السيد الفادنى ) :

س : نود أن نسألك عن المبلغ الذى قمتم بدفعه لقناة (الضحى) الفضائية ؟
ج : أنا تحدثت عن ذلك قبلاً ولكننى أقول مجدداً أنا دعيت لإجتماع مع عدد من الخيرين وذكروا لى أنهم بصدد
إنشاء قناة دعوية وأولئك فيهم أناس ممن يشهد لهم بالثقة تماماً وتبرعوا لهذا العمل وطلبوا منا أن
نتبرع لهم ، وقلت لهم إننى سأدفع ولكننى اشترطت عليهم عندما تبدأ القناة البث أن تقدم نشاط الزكاة
وكل ما يتعلق بها فى السودان ولقد قدمت لهم مبلغ 50 (خمسين ألف دولار)
س : لكن يا بروف مر زمن طويل ولم تقم القناة؟
ج : هذه ليست مسئوليتى ولقد كتبت إلى القائمين على أمرها وقلت لهم (عرفوا بأنفسكم أذكروا للناس لماذا لم
تقم القناة حتى الآن؟)
س : بروف هل إستردت ما دفعته للديوان؟
ج : لم أسترده ولكنى سألت عنه وأنا عندما دفعت هذا المبلغ إستندت إلى علمى وفقهى وثقتى فى هؤلاء
السودان وكتبت أسأل أكثر من مرة عن سير العمل فيها خاصة بعد نشر (الحرة) المتكرر لهذه المسألة ولقد
ذكروا أنهم بصدد العمل وإنهم فى شأن إكمال التمويل مع إحدى شركات الاتصال فى البلاد وأظنهم كتبوا لكم
أو لغيركم فى ذلك بعد أن قلتم إنها قناة وهمية، وأقول لكم الآن ربنا يسألنى عن هذا المبلغ إن لم تقم تلك
القناة ويسألهم عنه كذلك يوم القيامة.

المستفاد من الحديث :
- التبرع لقيام القنوات الفضائية يعد مصرفاً من مصارف الزكاة.
- يمكن لأى (ناس خيرين) أن يجتمعوا بالسيد (الفادنى) فيستجيب بالتبرع لمشروعهم متى ما إقتنع بأنه
مشروع خير (وكده) !
- يمكن للسيد (الفادنى) أن يتبرع (لوحدو كده) دون طرح الأمر على أى هيئة او جماعة بالديوان !
- السيد (الفادنى) لم يقم بدفع هذا المبلغ الضئيل (ساااكت كده) بل أشترط عليهم (هم منو والله ما عارفين !)
بإنو (عندما تبدأ القناة البث) !! أن تقدم نشاط الزكاة وكل ما يتعلق بها فى السودان !!
- عدم قيام وإنشاء القناة وبالتالى (ضياع أموال المسلمين) ليست مسئولية (السيد الفادنى) بل مسئولية
الناس القالوا ح يعملوها !!
- عندما دفع (السيد الفادنى) هذا المبلغ إستند إلى علمه وفقهه الذى يبيح التبرع بمثل هذا المبلغ وهنالك من
لا يجد قوت يومه كأطفال المايقوما الذين تحدثنا عن مأساتهم التى تدمى القلوب.
وآخر ما يستفاد من حديث البروف (أمين عام ديوان الزكاة) إنو القروش دى ما ح تروح ساااكت (لو القناة
ما قامت) عشان ربنا سوف يسألوا منها وكمان ح يسأل الناس (الشالوها) كمان وذلك يوم القيامة ! وإلى
ذلك الحين - أعزائى القراء- أستودعكم الله والسلام عليكم ورحمة الله وبركاته !!!


كسرة :
- عاوزين قروووووشنا دى هسه ... قبل يوم القيامة !

يا الفاتح اصبر شوية
في مروري عل كثير من المواقع الأنترنتية يقولون ان القيامة عام 2012م
يعني كلهااقل من سنتين ما قادرين تصبروأ
ما ياكم صابرين عقدين

يا محمد ياخ ما بنصبر .. ما بنصبر .. هو خلو لينا فيها صبر !!!

Quote: كسرة : - عاوزين قروووووشنا دى هسه ... قبل يوم القيامة !

استاذ الفاتح جمعتك مباركة يا زول يا عسل
والله وحشتنا , سبحان الله يوم الأربعاء الفات
في إحتفال بوراداب الرياض , إلتقيت الزميل
الأستاذ/ أسعد الريفي وسألته عنك .

وجودك في هذا المنبر يسعدنا كثير يعلم الله
رجاء عدم الغياب , ربنا يمتعك بالصحة والعافية .

عزيزى أخى : هاشم
والله مشتاقين شديد ليكم وللبورد .. الحقيقة وقفت وقفة طويلة لكن من هنا وجاى إن شاء الله يكون فى تواصل .. تحياتى وسلامى ليك وللعزيز أسعد ودمتم فى صحة وعافية ..

أستاذ الفاتح .. سلام عليك ياخي .. وتحية عطرة

يا خي زي ما قاليك أخونا هاشم ما تحرمنا من إبداعاتك .. ووجودك بيننا هنا ينور هذا المنبر ويعطيه كثير من الحيوية والحركة ..

أما ناس الزكاة ديل فهم يا صديقي جزء لا ياجزأ من الثقافة الكلية لأهل الإنقاذ .. فلا تتعب نفسك معاهم .. ديل بتلقاهم بس لمن تكون في كاميرات ودعايات معمولة لي مصيبة أكبر خاتين عينهم علينا ..

ونحن نطالب معك بقروشنا هسع دي .. قبل يوم القيامة ... وكمان نطالب زيادة على ذلك بالقصاص العادل في أي جريمة أرتكبت في حق هذا الشعب وأبنائه ..هسسسسسسسسسسسسسسسسسسسسع دا .... !!
قبل يوم القيامة ... !!!

لك التحايا والود

"أبوفواز"

عزيزى صديق .. التحايا والود

الحاجة المحيرانى إنو شيخ الفادنى (البروف) قال إنو لمن سلم الجماعة ديل القروش دى إستند إلى (علمه وفقهه) !! يعنى هسه مش عيب عليا أنا العبدالفقير إلى الله (الغير متفقه) أغالطو وأقول ليهو الكلام ده حراااااااااام وليس من الشرع والدين فى شئ وإنو فى مئات الأنفس قد إنتقلت إلى الرفيق الأعلى لأنو ما لاقيه دواء وعلاج بينما القروش دى (قاااعده) ليها زمن عند الناس الأنحنا ذاااتو ما عارفنهم منو ديل؟

أستاذي الفاتح ... يا أخي الناس ديل لا يختشوا .. ولا يلتفتون لأي نقد أو محاولة مساءلة .. ويرتكبن في الكبائر في حق هذا البلد على عينك يا تاجر .. وناس الفادني ديل عطلوا سبع مصارف من مصارف الزكاة وليهم مصرف واحد فقط وهو مصرف العاملين عليها ...!!
وهنالك مآسي كثيرة جداً يمكن أن تحكى .. وأنا أعطيك مثال واحد من هذه المآسي .. وإنني أقسم بالله العظيم ما سأقوله ليس من نسج الخيال ..

أنا مكتبي بالخرطوم بحري _ عمارة رزاز _ الأملاك _ غرب البوستة ، هنالك سيدة من سيدات جنوب كردفان تعمل في مهنة (بيع الشاي والقهوة) وهي من السيدات السودانيات الأصيلات .. شديدة التهذيب ..تحترم الجميع .. ويحترمها ويوقرها الجميع وهي في أواخر الأربعينات من عمرها ، منفصلة عن ذوجها ولديها ثمانية من الأبناء والبنات ، وهي التي تربي فيهم من عمل الشاي والقهوة ، وذوجها لا يعلم أي شيئ عن تربية أو علاج أو طعام أبنائه ...!!
إحدى بناتها أصيبت قبل ثلاثة أعوام بحصاوي في الكلى ، ولقد أدى ذلك إلى تعطل إحدى الكليتين تماماً والثانية تعمل بأقل من 40% من قدرتها وهي مليئة بالحصاوي ، أدخلت مستشفى بحري ثم حولت إلى مستشفة سوبا الجامعي _ ولاحظ أنه مستشفى حكومي _ قبل عام تقرر لها عملية تفتيت للحصاوي في الكلية التي تعمل .. وذلك حتى يستطيعوا إستئصال الكلية التالفة ، وطالبوها بمبلغ 800 جنيه سوداني يعني 800 ألف بالقديم ، ذهبت إلى ناس (الفادني) وعملوا ليه زي ما بيقولوا المصريين (كعب داير) لمدة شهر تقريباً ولم تخرج منهم بأي شيئ ، في النهاية قررجميع الموجودين في منطقة عملها (تحت النيمة) جمع المبلغ ولقد تم ذلك بحمد الله .. وعملت العملية .. ولم تكن ناجحة .. في منتصف العام السابق قررت نفس المستشفى إعادة العملية وطالبوها بدفع نفس المبلغ .. وقمنا أيضاً بجمعه .. وعملت العملية للمرة الثانية .. !!
هذه البنت تركت مدرستها منذ ثلاثة سنوات وعمرها حوالي ال15 سنة الآن .. ومازالت مريضة جداً وما زالت تتردد على مستشفى سوبا الجامعي ...
والله يا أستاذ الفاتح .. أنا وغيري من الذين يعملون في تلك المنطقة مكتوب علينا أن نعيش هذه المأساة كل صباح وقلوبنا تتقطع على هذه السيدة التي تقاتل لإطعام أبنائها وتعليمهم .. ولا تستطيع أن تقنع ناس الزكاة لكي يدفعوا لها علاج إبنتها التي تواجه الموت في كل صباح .... هذا مثال واحد من الذين لا تلتفت إليهم زكاة أهل الإنقاذ ....
لذلك فنحن معك ... نريد حقنا اليوم .. و ... (سداد) لا تستطيع أن تنتظر القيامة .... !!!

"أبوفواز"

سلامات يااستاذ الفاتح


بكل بساطة كدة؟

كل مانجى داخلين البلد , يقولوا ليك , الزكاة الزكاة , انت واصل النصاب القانونى


وندفع, وبإبتسامة



والله ياخ حقو الواحد, يجى ينضم للعاملين عليا ديل


ولايشوف ناس الضحى ديل بوين

عزيزى صديق .. البلاد تمتلئ بمثل هذه المآسى التى تدمى القلوب .. الله موجود يا صديق .. له الأمر من قبل ومن بعد ...

سلامات ندى ...

Quote: ولايشوف ناس الضحى ديل بوين

برضو فكرة .. بس باقى ليكى ممكن يتلقو ؟

استاذنا الفاتح سلام

يبقي الحال علي ماهو عليه...
وعلي المتضرر أن يلجأ لله إذن !!!
لا فض فوه البروف
ذكرني المثل المصري .. قالوا للحرامي أحلف .. قال جالك الفرج

عزيزى الشفيع

سلامات ..

Quote: وعلي المتضرر أن يلجأ لله إذن !!!

بالظبط كده !!

هذا رجل يتصرف في مال المسلمين وكأنه ماله
ثم لا يطلب ولا يتوقع محاسبة من أمير أو قاضي (وفقا لشرع الله) ؟؟؟؟؟
.
.
.
كان معاوية بن سفيان يقول عن مال بيت المسلمين أنه مال الله وهو مستخلف فيه
وكان سيدنا أبوذر الغفاري رضي الله عنه يقول له أتق الله يا معاوية إنه مال المسلمين


قلنا ليكم كم مرة هؤلاء هم بنو أمية الجدد.
الله ينتقم منهم. أموال يدفعها الناس (بعض عن طيب خاطر وبعض مجبور) فيتصرف فيها هؤلاء المنافقون بكل السفه وسؤ التدبير وكثير من الإستهبال

Quote: ثم لا يطلب ولا يتوقع محاسبة من أمير أو قاضي (وفقا لشرع الله) ؟؟؟؟؟

وماذا عن يوم الحساب الأكبر !!

Quote: وماذا عن يوم الحساب الأكبر !!

وتاني يا الفاتح نرجع لحكاية
قالوا للحرامي أحلف قال أبشر جالك الفرج

Quote: ج : هذه ليست مسئوليتى ولقد كتبت إلى القائمين على أمرها وقلت لهم (عرفوا بأنفسكم أذكروا للناس لماذا لم تقم القناة حتى الآن؟)

دليل عن أن الفا دى نى
يطبق "كلكم راع و كلكم مسؤول " بدقة ..
فهو يخرج المال إخراجا .. من صلاحياتو
أما حكاية أين يدهب المال .. فدى موش من صلا حيا تو !!

اخوي الفاتح
شوف يازول وقت ما بتصبر فلنبع القضية
تمشي لي زولك ده بكرة من الصباح
وتقول ليهو انا واخوي الكاشف الي هو انا
عندنا قناة هادفة وكوميدية ومستعدين نعرض فيها اي حاجة من اي هناي
وشيل القروش
ونرجعه يا سنة 2012يا يوم القيامة
اها شن قولك

الحبيب السنى ... والله مشتاقين !

Quote: اخوي الفاتح شوف يازول وقت ما بتصبر فلنبع القضية تمشي لي زولك ده بكرة من الصباح وتقول ليهو انا واخوي الكاشف الي هو انا عندنا قناة هادفة وكوميدية ومستعدين نعرض فيها اي حاجة من اي هناي

الجماعة الشالو القروش ديل سمو قناتهم (الضحى) دحين باقى ليكا قناتنا دى نسميها شنو يا السنى؟

Quote: ج : هذه ليست مسئوليتى ولقد كتبت إلى القائمين على أمرها وقلت لهم (عرفوا بأنفسكم أذكروا للناس لماذا لم تقم القناة حتى الآن؟)

بالله يا أسعد شفتا الكلام ده كيف؟ عليك الله ده مش كلام عجيب وغريب !!؟وبعدين هو ليه يطلب منهم إنو يعرفوا روحهم للناس ما يعرفنا بيهم ويقول القروش دى شالوها فلان وفلتكان

مشتاقين بالكوم
عارف والله تجيب لي روحك الضغط والسكر والوخوخه وخمة النفس ووجع الركب
والستقلينا وشوفت الاستقلينا دي علاجة صعب .ز اها دحين ما القناة بتاعتنا دي
قفلناها ورمينا مفتاحة في البحر ..
ولا اقول ليك سميها قناة العصر
عشان كل ما يجو لي قروشوهم يلقونا نايمين نومة العصر
والله مخولتنا كلام عجيب عليك البتحبهم امشي نوم
الصباح رباح

Quote: امشي نوم الصباح رباح

ننوم وين يا السنى ياخوى والله إلا نوم (عصر) ساااكت ! النايمين ليها شنو ؟
دى قناة أقصد حالة ينوموا فيها ؟؟

Quote: وقد كان رد الأخ عضو هيئة علماء السودان بأن الزكاة تذهب فى مصارفها وأن بند العاملين عليها ينال نصيباً كبيراً جداً في إطار تغطية نفقات الصرف على المرتبات وهذه مشكلة أولى.

يا أستاذ صباحاتكـ طيبة وحمد لله على السلامة








كسرة أكسر من كسرتكـ الفوق دي:
إنتو دايرين الناس دي تشتغل مجانا ولا شنو؟
دي الحالة ما جابو ليكم الأوفر تايمات والأوفر (هبشات)!

ودالصائم .. كيف الحال ومشتاقين !!

Quote: دي الحالة ما جابو ليكم الأوفر تايمات والأوفر (هبشات)!

هى هبشات نصاح يا ودالصائم يا خوى ؟

ألا تعلم أيها الكاتب النحرير (حلوة نحرير دي ،
جاية من نهر ، ينهر ، فهو نهارا) !!!..
ألا تعلم أن النية البيضاء تبرر الوسيلة ؟؟ ...

الراجل نيته يا عديلة يا بيضاء ..
قاموا جماعة القناة خذلوه ..

إيه ذنبه ..... وريني ..
يا صديقي ... وريني ..
يا جبرا ... وريني ..
؟؟؟؟؟؟؟؟؟!!!!!!!!!!!!

ليك وحشة ياخي ...
مافي عزومة قريبة ؟؟!!!!

Quote: الراجل نيته يا عديلة يا بيضاء .. قاموا جماعة القناة خذلوه ..

أنا ذاااتى قلتا كده يا قرض !



وين إنتا ياخى ؟ من ديك وعيييييك ... مشتاقين !!