نجوم الغد ..وأشياء أخرى ..!

Part I




نجوم الغد



برنامج شغل الكتيرين ـ سودانيين طبعا ـ داخل وخارج السودان ..





وهذا البرنامج الذي يقدم على شاشة قناة النيل الأزرق :



*يحمد له أنه فعلا فتح فرصة لمواهب حقيقة ..وإن كانت معدودة ..


* ويحمد له أيضا انو أصبح متنفسا للسودانيين بعد أن كادت الرتابة تقتلهم ..


* وإن لم يكن مختلفا من جملة ما تقدمه الشاشات السودانية لما وجد كل هذا الإقبال ..



* أضف لذلك إجتهاد الأستاذ بابكر صديق الذي يستحق الإشادة ..


* وإستفادة السر قدور منه ـ أي نجوم الغد ـ في "أغاني اغاني " البرنامج الشغل الناس برضو ..





طيب المشكلة وين ؟

المشكلة في انو البرامج البتلاقي قبول جماهيري قليلة ..ولمن يحصل القبول ده ..


مابتم إستثماره بشكل جيد ..



بيظل الكسل وعدم تطوير الفكرة يحاصرها ..لحدي ما يقتلها لا سمح الله ..

حأبدا من الأخر الحفل النهائي لبرنامج نجوم الغد كمثال :


•المكان : المسرح القومي ..وإختياره كدلالة لا بأس به ..



لكن المسرح كان مالو ؟


إضاءتو كانت تعباااانة ..وديكورو فظيع ، والجمهور ملامحو ما باينة إلا لمن إضاءة الكاميرا تتسلط عليهو
..

مالا قاعة الصداقة ؟ مالا الصالات البقت مالية البلد ؟



السبب شنو؟ مادي ؟


ولا كسل بإعتبار إنو النيل الأزرق جارة المسرح القومي (يعني مشكلة مواصلات ) ..


تمويل الرعاة ما كان ممكن يستغل اكتر في إخراج اليوم المشهود بشكل لائق ؟

التقديم :

ابدا ما بنهضم حق أستاذ بابكر صديق في الإحتفاء ببرنامجو ..


لكن في تقديم الليلة دي كان ممكن يستخدم مذيع/ مذيعة تاني عندهم جماهيرية وكان حيكسبوا البرنامج روح

جديدة ..

خليك من ده يقدمو هو زاتو لكن بحيوية أكتر تناسب اليوم ..



"الكنكشة "في الأشياء بتضرها اغلب الظن

المشاركين :



فهيمة إستحقت الفوز بصوتها الشجي الأطرب الكتيرين ..


أما شول فبعتقد أنو شعبيتو كانت سببها قبولو اكتر من صوتو ..


الباقين والله ما رسخو في ذهني ..وبتمنى إنو ما يسيء ليهم ده..


لكن للأمانة ما حأنسى نطيط الشافعة وهي تغني فات فات فاااات ...




الأزياء كانت تعبانة والإنتقاد هنا ما للمشاركين لأنو في اليوم ده مفروض يكون في شخص مسؤول عن



المظهر وإن كان المشتركين "الأولاد " أفضل حالا ..


البرنامج لمن يبقى جماهيري ..الني ما بنفع ..

الجمهور :

كان وفي وجاء بإخلاص ..وإمكن من زمن الواحد ما شاف جمهور كتير زي ده في النوع ده من البرامج ..

لكنو إتظلم ..لأنو كان ظاهر كالأشباح ..ولأنو ما قدم ليهو مسرح ومكان بييلق بالتفاعل بتاعو..






والحقيقة المسرح القومي في عضمو مظلوم ..ومظلوم لاقا مظلوم..

ولا شنو ؟

Part II



تياب مذيعات النيل الأزرق بجيبوها من وين ؟







الكلام ده إيجابي بالمناسبة ..

وعلى ذكر التياب ..


رشا الرشيد ..عاجبني أناقتك جدا وتيابك رهيبة ..وأنت حلوة ومحبوبة ..


لكن وتاني ؟



حسب رأي المتواضع أنو "رشا الرشيد " إتنجمت في النيل الأزرق وعندها مساحة كبيرة ..لكنها ما إستغلتا

صاح ..، أو لم يتم إسغلالها صاح ؟.



أداءها كما هو ما فيهو جديد ؟


نوعية برنامج "مساء جديد" ده من نوع البرامج البتحرق ؟


بالإضافة لظهورها في أكتر من برنامج وده برضو بحرق ..

وين البرنامج الفيهو بصمتها واضحة ؟


هل ده خطأ رشا ولا ما تمت الإستفادة منها إستنادا على القبول اللقتو والميديا بقت صنعة ..؟




................


نصيحة محبة يا رشا أمسكي في حاجة وااااحدة وجوديها وخلينا نحضرك عشانك ما عشان نشوف تيابك ..

Part III



عدد خاص :


مع كامل الإحترام لبروف البوني وأساذة منى أبوزيد ..


إلا أنو برنامج "عدد خاص " أقل كتييييير من إمكانياتهم على الأقل المقروءة ..




ــــــــــــــــــــــــــــــ



وعلى فكرة مشكلتم أكبر لأنو هم جو الشاشة نجوم ..والناس بتوقعوا من النجوم الكتير

فمثلا :



أولا ما في أي داعي أنو مقدم البرامج يقوم بالشغل الميداني ..


وفي حالة د/ البوني كان ممكن يقوم بدور إنساني ..


يعني كان ممكن الإستعانة بطالب إعلام يبحث عن فرصة وكان دي حتكون اجمل من د/ البوني لجانب


الدفع المعنوي ومساعدة الباحثين عن فرص من جانب ومن جانب أخر بيكسب البرنامج مهنية أكبر ..








كل زول عندو وظيفة ..والبقوم بالشغل كلو ...شغلو بيقع ..

أهابواصل بعدين ..

برنامج نجوم الغد كان بالمواصفات حقت القبول والأكثر مشاهدة فعلاً في نسختيه الأولى والتانية ..
بابكر صديق للأسف بعدها فشل في تطوير البرنامج لأنو نظرتو ضيقة جداص وفهمو في التطوير إقتصر على غنو يلبس البنات والولاد بي نفس اللون ..
وليته كان يشتري لهم الملابس !! للأسف بيقول للبنات بكرة تجو لابسين كبدي بي بنفسجي ويخليهن يطاقشن في الحلة والمكوجية عشان يشدو لبسة للتسجيل وبعد داك تعالي شوفي اختلاف درجات اللون !!
البرنامج بقا يهتم بي الربح المادي أكتر من إكتشاف المواهب وأصبح الأولاد ولابنات سلعة تسويقية بالتالي فقد نكهتو الطبيعية وأصبحت النكهة صناعية ..
عن نفسي فقدت التواصل مع البرنامج تمااااااااما بعد جيل عافية وريماز ..
وللأسف كمان بابكر صديق إقتصر النجوم على البنات وتناسى أصوات ذكورية جميييلة جداص مما يعني إنو البرنامج مااا فير (بس فير اند لوفلي..)
التقليدية في الموسيقى والعازفين وشغل الوساطات أكتر حاجة مؤثرة في البنرماج ..
اللجنة المصاحبة للأسف لجنة أي كلام وسبب واااحد يخلي محمد سليمان يقييم الغنا ماف ..
هم البرنامج بقا الرحلات الخارجية والحفلات الجماهيرية والتزاكر بمباني التلفزيون (مع إنو الدعوة عامة ..)
بصراحة برنامج نجوم الغد اتوقع إنو في النازل ونسبة المشاهدة قلت كتيير جداً عن السابق..

بالنسبة لي تياب النيل الأزرق فهم فعلاً بيجيبو المطرز من التياب المشغولة الجمييلة جداً وشي حراير وتواتل بي الطريقة الصاح برضو..
أعيب عليهم إستهالكهم لي اللون البني بي التركوازي اللي أصبح تقليدي واقترح تركيبة الوان جديدة (اللون الطوبي بي اللون الزيتي) جريبيهو وصدقيني حا تقولي عمر قال ..
كنت أتمنى إنها تكون تياب المقدمات بس للأسف هي تياب للدعاية وليست ذوق المذيعات أو المقدمات ..
قبل فترة جابو معرض تياب سودانية عن نفسي أتوقع إنو كان اجمل معرض فيهو تياب سمحة وكانت صاحبة المعرض شقيقة المذيعة هبة المهندس ..
انا ما نجيض في التياب بس السمح سمممح وعليه لو عايزة تسمعي كلامي وتشتري ليك تياب سمحة اسألي من الزولة دي وعلى ضمانتي لو كلامي طلع ما صاح فانا اتكفل بدفع الخسائر( إستفيدي من هبة المهندس هي معاكم في الامارات )..

تخريمة :
كتب مداخلته وتذكر قول حبوبته وهي في طريقها للحج تودع جاراتها المشاكلاهم لحظة توديعها لهن:
" لو مت العفو والعافية ولو جيت فالحال فيييييييي حالو "..

عمر الفاروق ..


شكرا على المداخلة الطويلة ..


أما

Quote: لو مت العفو والعافية ولو جيت فالحال فيييييييي حالو "..

عفو وما عفو ده ما عندو معنى سمح ؟..أنت زميل هنا وبس خش ارمي كلامك وإطلب الله ..

Quote: Part II تياب مذيعات النيل الأزرق بجيبوها من وين ؟ الكلام ده إيجابي بالمناسبة ..

داليا, سلامو
نجوم الغد بجيك بعدين لكن دى حرقتنى شديد والله

إنت ياداليا مش إعلامية؟ وشغالة فى بلد فيها مهنية عالية ومنافسة وتجويد بتاع شغل ومظهر؟

إيجابى من ياتو ناحية؟
وهِن لابسات سكر سكر , فى برنامج رياضى؟
لابسات أحممممممممر فى لقاء مع طبيب , أو فى إستطلاع فى الشارع الواااحد دة
صبحية ياداليا ياخ , والله صبحية
دى تياب صبحية , ماتياب مذيعات عايزات يوصلن ليهن فكرة أو يناقشن موضوع مفيد
فى حاجة إسما: لكل مقام مقال

آحيييييييي, برجع لكن

Quote: وهِن لابسات سكر سكر , فى برنامج رياضى؟ لابسات أحممممممممر فى لقاء مع طبيب , أو فى إستطلاع فى الشارع الواااحد دة صبحية ياداليا ياخ , والله صبحية دى تياب صبحية , ماتياب مذيعات عايزات يوصلن ليهن فكرة أو يناقشن موضوع مفيد فى حاجة إسما: لكل مقام مقال آحيييييييي, برجع لكن

ندى أزيك


وييين لابسات سكر سكر والله ماشفتهم ما تقول لي دي ميرفت حسين لأني معجبة بيها جدا بمهنيتا ؟



يا ندى مذيعات النيل الأزرق بعتدمو على التوب السوداني صاح ؟

التوب السوداني ده اصلا موش ملون ..؟ مامكن نقارنهم بمذيعات القنوات التانية البكون لبسهم مسحاتو

اوسع السواري لبرامج السهرة ..الكاجول للبرامج الخفيفة والرياضية ..الفورمل للأخبار أو البرامج

السياسية ..التوليفة دي صعية مع التوب ..معاك انو التوب الأحمر ما مناسب مع لقاء طبيب ..وبتظل دي

حالة فردية لكن انا شخصيا متصالحة مع فكرة الألوان أذا كانت منسقة بشكل كويس ومقارنتهم بأي فضائية

غير مورتانيا أو الهند بيكون ظالم ..




البرامج المسائية بتتحمل الأشياء الفيها لمعة ..وبعتقد معظم البرامج مسائية ولا شنو ؟

Quote: وييين لابسات سكر سكر والله ماشفتهم ما تقول لي دي ميرفت حسين لأني معجبة بيها جدا بمهنيتا ؟

ميرفت حسين وغيرها من المذيعات, ميرفت تجود شغلها وبفهم كمان , لكن البرنامج مابستحمل نوعية التياب البتلبسها.

Quote: يا ندى مذيعات النيل الأزرق بعتدمو على التوب السوداني صاح ؟ التوب السوداني ده اصلا موش ملون ..؟ مامكن نقارنهم بمذيعات القنوات التانية البكون لبسهم مسحاتو

وليه ماممكن نقارنهم؟ مازى والزى عاادى ممكن يطوع حسب المكان والزمان, والتوب السودانى فيهو ملّون وفيهو سادة, وفى الألوان ذااتا فى الوان هادئة وجميلة وبقليل من الإجتهاد ممكن يفرزن
ولالازم , شك وخرز وترتر عشان يكون توب؟!

Quote: البرامج المسائية بتتحمل الأشياء الفيها لمعة ..وبعتقد معظم البرامج مسائية ولا شنو ؟

مااى برنامج مسائى بستحمل لمعة, برنامج ولاحفلة هو ياخ

داليا, غير انو الموضوع مزهجنى , اليوم الخميس وفى قرف كمان

Quote: داليا, غير انو الموضوع مزهجنى , اليوم الخميس وفى قرف كمان

خلاس يبقى نتم نقاشنا بعد القرفة تروح ..




فكيها يازولة ..مافي حاجة بتستاهل ..ولاااحتى التياب المورماك دي ..

Quote: فكيها يازولة ..مافي حاجة بتستاهل ..ولاااحتى التياب المورماك دي

تسلمى يازولة يالطيفة


ومافى مشكلة, (لو فضل في العمــر لحظــة. واسع الأحلام واهرب منو ضيقك )

Quote: طيب المشكلة وين ؟

المشكله انو برنامج نجوم الغد عرفنا البيهو والعليهو
اها راجين الاشياء الاخرى ..

داليا حافظ
سلام
طبعا البرنامج دا بينا وبينو فراسخ واميال وتب ما وقعت عليهو عينا لكن كتر خير اليوتيوب..من اهم حسنات البرنامج دا انو قدم باقة متميزة من الاصوات الندية البجد خففة علينا وطاة الغربة وجحيم البعد عن المنبت...
من اهم الايادي الطوق بيها اعناقنا الرائعة العسولة افراح عصام
ربنا يحفظها لينا
اداء متزن وصوت شجي واختيار موفق وكمان وجه ملائكي

برنامج نجوم الغد فعلا قدم كتار حبوهم الناس ..شكر ياالطيب ..

Quote: اها راجين الاشياء الاخرى ..

إنشاء الله تكون شفتها يا علي ..

Quote: دى تياب صبحية , ماتياب مذيعات عايزات يوصلن ليهن فكرة أو يناقشن موضوع مفيد فى حاجة إسما: لكل مقام مقال

ودي برضو حرقتني هي وينا الأفكار دي ؟وين البرامج البترسخ وبتقدم فكرة أنا ما شايفة حاجة غير تياب

وبس عشان كدة علقتا إلا عليها ..


للدقة ..في برنامج فكرتو كويسة لكن مذيعتو صراخة"نجود " ..وتيابا زاتا ما سمحا "للنساء

والرجال "


والتاني مذيعة مممتازة وهي نسرين النمر وفي برنامج اقل من قدراتا وما متذكرة إسمو ..



تاني في تياب تياب تياب ..

تحياتي يا داليا

فيما يتعلق بي برنامج نجوم الغد بتفق مع مداخلة عمر الفاروق كلها تقريباً وأزيد عليها إنو البرنامج بقى فيهو نوع من الابتزال ، غير كدة في اعمال كتيرة في البرنامج مفروض ما تتقدم في تلفزيون بشاهدو الملايين نسبة لضعفها ومن رايي إنو البرنامج ما قدم غير عافيه وفهيمه أما البقة كلها بنطبق عليها وصف المؤدي وليس الفنان .

Quote: نصيحة محبة يا رشا أمسكي في حاجة وااااحدة وجوديها وخلينا نحضرك عشانك ما عشان نشوف تيابك ..

وبضيف ليها غيري التسريحة بتاعتك لأنها مكبراك ..

Quote: وبضيف ليها غيري التسريحة بتاعتك لأنها مكبراك ..

شفتي برضو أسمعي كلام بكري ده ..وفعلا لاحظت انها ما بتغييرا ..التجدد والتغيير موضوعا وشكلا مطلوب ..

السلام عليكم
اها يا داليا جيتى فى اللحم الحى وموضوعى؟؟
نجوم الغد؟؟؟؟؟ انا جاييك بى مهله
امشى الحركه اجدد الرخصه واجى
عشان نتفادى المخالفات؟؟
انور عبد الرحمن

الفكره شنو ده سؤال اساسى
هل تربيه والله تربيه وتعليم والله هويه
والله عرض انماط الغناء السودانى
والله صناعة نجم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
والله هو برنامج والسلام؟؟
هل هو منهج والله خبط عشواء؟؟
وجاىىى
تانى بعد الرخصه دى تنشف؟؟؟
وارقدوا على انغام؟؟

يااستاذ أنور سلامو


بما أنك كنت فى اللجنة - فى بدايات الدورة-


غايتو - انا شايفة أنو فى شباب فنانين جدا ويرجى منهم والله , اللجنة أستبعدتهم , والواصلوا , طلعوا من المراكز الأولى

دة رأى زول ساى- بيشاهد وبيستمتع بالأصوات الجميلة

نسمع رايك ونرجع

خالص التحايا

داليا ... سلام ومحبة ..

Quote: تمويل الرعاة ما كان ممكن يستغل اكتر في إخراج اليوم المشهود بشكل لائق ؟

فعلا ...

ولا طريقة التقديم كما ذكرتي ..

كان ممكن يقدم البرنامج بتاع الليله دي اي واحد غيره ..

ما عارفه ليييييه اتمسك باي شيء حتى التقديم ..؟؟



متابعه انا هنا ..

عفاف يا حبيبة

سلامات

Quote: ما عارفه ليييييه اتمسك باي شيء حتى التقديم ..؟؟

أي زول يتمسك بفكرا إتجاوزتو الفكرة بعد شوية بتتسرب من أيدوا وده الظاهر ..



وعلى فكرة الحاجة دي عندنا بشكل كبير وأكبر مثل شوفي ساستنا مكنكشين في أماكنم الهم فيها

قبل ما يجيبوا الولدونا خلي نحن ..القصة كدة يا عفاف للأسف خنق حتى الموت ..


أستاذ بابكر صديق ممكن بعدا يبقى المشرف العام على البرنامج ..والقناة تكافؤو بأنها تديهو

نفس الأجر هسة دي صعبة ، ما لانو ما قادر على العطاء لكن لأنو ما عندو جديد يقدمو ..وده ماعيب دي

حدود إمكانياتو ..

أهلين أستاذ انور

Quote: اها يا داليا جيتى فى اللحم الحى وموضوعى؟؟ نجوم الغد؟؟؟؟؟ انا جاييك بى مهله

يلا أنا راجايك ..




ــــــــــ


وأهي فرصة الزول يعبر عن إعجابوالشديد بصوتك ..وهذا لن يؤثر على سير القضية لوووول

بحضور أستاذ أنور لا يفتى ومالك في المدينة ..أو بالأحرى بعد مالك يفتي ..




نجي لـ Part IV



البحث عن هدف



ميرفت حسين مذيعة مقتدرة ومتمكنة ومهنيتها عالية ..وخلتني أحضر برنامج رياضي ..


يا ميرفت ندى عنها رأي في طريقة لبس المذيعة البتقدم برنامج رياضي ، والحقيقة أنا ما إنتبهت ليك

إنتي بالذات بتلبسي شنو إلا بعد كلاما ..لأنو أدائك كان بشغلني بالجد والله ..

وأقول ليك أنك أكتسحت مقدمين الرياضة كلللهم حسب وجهة نظري (السودانيين طبعا ) ..



لكن عندي ملاحظة غير دي ما معقول يا ميرفت تكوني بتقدمي برنامج رياضي بالإقتدار ده وما

عندك علاقة بالرياضة .اقصد الممارسة ..يعني( وزنك ) الظاهر ما بدل على شخص بيمارس

رياضة ..ولااا حتى رياضة المشي ..،



غريبة صاح ؟ كدي فكري في الموضوع ..

Quote: يا ميرفت ندى عنها رأي في طريقة لبس المذيعة البتقدم برنامج رياضي ، والحقيقة أنا ما إنتبهت ليك إنتي بالذات بتلبسي شنو إلا بعد كلاما ..لأنو أدائك كان بشغلني بالجد والله ..

ياداليا , سلامات
ميرفت زولة مطلعة وعندها معلومات وافرة عن الموضوع البتتكلم فيهو , لكن صراحة الزى البتلبسو بصرف عن التركيز فى المحتوى

ملاحظتى من عشمى فى أنو مرة واااحدة يكون عندنا شىء متكامل

داليا سلامات ..

برنامج نجوم الغد ماحصل تابعته ولا في أي نسخه,
بسمع عنه هنا في البورد , عشان كده ما حأقدر أفتي فيهو,

أما مذيعاتنا فرأيي من رأي ندي:

Quote: إيجابى من ياتو ناحية؟ وهِن لابسات سكر سكر , فى برنامج رياضى؟ لابسات أحممممممممر فى لقاء مع طبيب , أو فى إستطلاع فى الشارع الواااحد دة صبحية ياداليا ياخ , والله صبحية دى تياب صبحية , ماتياب مذيعات عايزات يوصلن ليهن فكرة أو يناقشن موضوع مفيد فى حاجة إسما: لكل مقام مقال

السبب البيخلي مذيعه بتناقش في موضوع عن المرور مثلا,
تلبس توب صبحيه شنو؟
وليه توب أصلا؟
مش ممكن تلبس لبسه جاده شويه عشان نحس انه الموضوع ما "شو" وخلاص,
أو لبسه حلللللوه وذوق لكن ما توب سهره,
مذيعات القنوات الماسودانيه كلها عندهم فرق بين لبس برامج الترفيه وبين لبس البرامج الجاده,
الا نحن, ألوان فاقعه وبتلمع وميك أب صارخ بصوره مزعجه ..

لكن أقول ليك حاجه, مع احترامي للمذيعات كلّهم, زوله زي ميرفت بتاعت برنامج الكوره مافي ..
بس هي تبّطل الحنن والتياب ومافي زول بلحقها :)

أمّا الباقيات فكتير حاولت أفهم هم بقولوا في شنو وللا موضوعهم شنو ما قدرت,
حتي نسرين سوركتي الراقيه, داخله في برامج باهته وغناء واستضافة ناس,
بقعد أعاين لي لبسها والميك أب بتاعها, وبمشي, لكن يوم واحد ما طلعت منها بكلمه مفيده :(

طبعا هنا الغلطه ما غلطتهم براهم, غلطت معدّي البرامج الناسين مشاكلنا الكتيييره وهمومنا وقضايانا,
وعاملين القنوات كلها غنا وفنّانين واستضافة مبدعين,
المبدعين ديل علي راسنا من فوق, لكن بلدنا فيها بدل المشكله مليون,
حيناقشوهم بجديه ووعي وشفافيه متين؟

والمذيعات حينسوا موضوع الحنه والتياب وتفتيح لون البشره والمكياج,
ويركزوا علي انه الاعلام رساله متين؟

ياجماعه لو في برنامج حواري واحد,
مذيعته شاده حيلها شويه وبتناقش في مواضيع جاده وحيويه ومصيريه,
ومابتلبس تياب سهره, وروني ليها ..

نسيت, في مذيعه وااااااحده عاجباني شديد, بس ما عارفه اسمها,
بتقدم نشرة الأخبار في تلفزيون السودان,
بت سمراء ملامحها جميله, واثقه في نفسها وصوتها مميز, وما متزوجه ..
لو في زول عارف اسمها ياريت يوريني ليهو, البت دي عندها مستقبل قوي لو لقت الفرصه,
وبتلبس بدل واسكارفات معقوله, وما حصل شفتها بتوب ..

شكرا داليا الموضوع مهم ومن زمان عايزه أتكلم فيهو ..

أهلين يا أماني

Quote: مذيعات القنوات الماسودانيه كلها عندهم فرق بين لبس برامج الترفيه وبين لبس البرامج الجاده, الا نحن, ألوان فاقعه وبتلمع وميك أب صارخ بصوره مزعجه ..

كان ده ردي على ندى فيما يخص التياب :

Quote: التوب السوداني ده اصلا موش ملون ..؟ مامكن نقارنهم بمذيعات القنوات التانية البكون لبسهم مسحاتو اوسع السواري لبرامج السهرة ..الكاجول للبرامج الخفيفة والرياضية ..الفورمل للأخبار أو البرامج السياسية ..التوليفة دي صعية مع التوب ..

وأضيف شايفة لبس التوب في السودان إختلف يعني تياب الحرير والشفون هي البقت سايدة وسط

الشابات ..التواتل يقت حقت الخالات لووول ..

جدالناس في السودان عندهم موضات خاصة بيهم وده ما دفاع بقدر ماهو قراية واقع ..عشان كدة لما أعاين

ليها بكون وفق المزاج السوداني الصرف وبقارنا جوة الواقع ده عشان لو حصل غيرا كدة بتكون النتيجة ما

عادلة ..أو هكذا أدعي ..شفتني وانا مدعية ..

Quote: وليه توب أصلا؟ مش ممكن تلبس لبسه جاده شويه عشان نحس انه الموضوع ما "شو" وخلاص, أو لبسه حلللللوه وذوق لكن ما توب سهره,

التوب السوداني واحد من الأزياء القومية ..إتخذتو القناة ليها كرمز على ما يبدو (ده

إجتهاد مني )، رغم أنو مابعبر عن السودان كلو !

وما عارفة قناة النيل الأزرق ألزمت المذيعات بيهو ولا هن بحاكن في بعض ؟ولا ""قلاصة منهن "لووول


لأنو أغلب المذيعات ما متزوجات ولابسات تياب والتوب في عرفناالقريب أصبح للمتزوجة ..وحتى المتزوجة

بقت ما ملزمة بيهو كالسابق ...لكنو ببقى خيار على أي حال ..




جااايك للميك أب ..

Quote: لكن أقول ليك حاجه, مع احترامي للمذيعات كلّهم, زوله زي ميرفت بتاعت برنامج الكوره مافي .. بس هي تبّطل الحنن والتياب ومافي زول بلحقها :)

الشاطر نادر الناس ما يختلفو حولو ميرفت حسين 100% بس تدخل "جيم "


أما الحنة ما بتعامل معاها بصرامة ..يعني ما بكون عندي رأي في الواحدة البتتحنن إلا تكون رافعة

شعارات ما بتتناسب مع الفكرة ..لكن الملاحظ أنو بقى في إحتفاء زايد بالحنة ..إحتفاء هستيري ..



بعرف كتير من النساء في مقام الخلات والعمات ..هجروا الحنة زمااان من شبابهن (بفهمن )..الغريبة أنو

بناتن ساكنات عند الحنانات ,,بناتهم ديل زاتهم متعلماااات في الخارج كمان وأقصد بالإشارة دي التأثر



بثقافة مغايرة عشان كدة برجع وبقول ليك أنو موضات السودان براها ..وهسة هستريا الحنة دي


موضة ..



ندى القلعة أسهمت في الحتة دي كتير بالمناسبة ..جادة والله يا أماني ..

عارفة يا صاحبة البوست .. ممكن تكوني طرحتي نفسك في ردك إنك احرجتيني أو ممكن تكوني عايزة تطرحي نفسك قطيمة أو لئيمة ..عموما صدقيني انا ما بهمني انتي الكاتبة الموضوع ولا كاتبو عبد الجبار المبارك على هذا الاساس جيت رديت وحا اجي ارد تاني وتالت ورابع وممكن ما اجي برضو ..
ما عارفك عاينتي للمداخلة بي ياتو زاوية بس برضو شكراً على التعقيب مع إنو برضو انا بكتب وما بهتم زول يعقب على كلامي الكتبتو .. واسة بتمنى تمشي في الرد ده بي نمرة خمسة فوووو كده عشان ما يتفهم إني جاي اغير مجرى البوست ..

نرجع لي موضوعنا الاساسي يا جماعة ..:
بالنسبة لي ميرفت أعيب عليهاوفي نفس الوقت عاجباني الحتة دي إنها مااا داسا مريخيتها الصارخة ..مع إنو البرنامج هي عايزة تحاول تخليهو برنامج حيادي لكن تعابير وشها بتفضح كل تصرفاتها فتفرح لهزيمة الهلال وفوز المريخ وتزعل جدا لخسارة المريخ وفوز الهلال ..
بالمناسبة ميرفت شقيقة عضو البورد المحترم و المريخابي المرضان
بالنسبة لي رشا الرشيد قابلتها في مطعم الساحة في إحدى الإفطارات الرمضانية ويبدو إنو ناس المطعم مستخدمنها كدعاية للمحل كانت مختلفة تماااما عن ما تظهر بيهو في الشاشة موضة بي الطريقة الصاح وابشركم مغييرا تسريحتا ويبدو عليها إنها صغيرة جدا في السن ..
اكتر حاجة استغربت ليها هي الانفصام في المزيعة سالي اللي كانت في قناة زول بتلبس البنطلون الضييق والبلوزة الكت بعدين لمن جات قناة النيل الأزرق لبست التوب وبقت رااايقة في كلامها وتقديمها ثم فجأة عادت لي قناة زول فعاد (البنطال) والبودي وتغيرت طريقة الاداء..
حاجة إستغرب يا سالي يا بتي..

Quote: ابدا ما بنهضم حق أستاذ بابكر صديق في الإحتفاء ببرنامجو .. لكن في تقديم الليلة دي كان ممكن يستخدم مذيع/ مذيعة تاني عندهم جماهيرية وكان حيكسبوا البرنامج روح جديدة .. خليك من ده يقدمو هو زاتو لكن بحيوية أكتر تناسب اليوم .. "الكنكشة "في الأشياء بتضرها اغلب الظن

داليا ,,, سلااااااااااام

هادئ كم النيل هذه الايام ,,, فلاااااان الفلانى
صوتها كالجرس ,,,,,,,,,,,,,,فلاااااانة العلانية
اصغرهم عمرا واقصرهم قامة رات لجة التحكيم ان صوته قد يتغير .... فلاااااااان الفلتكانى ,,
من جنوبنا الحبيب ,,,, شول الاسمرانى.

وهكذا .. طبعا الفوق دى نماذج من تقديم الاستاذ بابكر الصديق ,,
من اول مرة كان رايئ ما ايجابى فى طريقة التقديم
فيها الكثير من التقليدية والتكلف ,,,
بابكر الصديق يصلح لتقديم برامج التوثيق ومن الامس ,,
طالما ما البرنامج اسمو نجوم الغد , ,, لماذ لايكون المذيع نجما من نجوم الغد ؟؟؟
اما خلف الكواليس كانو النجوم الحقيقين ,,,,
لوووووووووووووووووول

Quote: بابكر الصديق يصلح لتقديم برامج التوثيق ومن الامس ,, طالما ما البرنامج اسمو نجوم الغد , ,, لماذ لايكون المذيع نجما من نجوم الغد ؟؟؟

الفكرة كلها يا أميرة تشبه الدورة المدرسية ..وطريقة تقديم أستاذ بابكر صديق ـ مع كامل


الإحترام ـ لم تفارق محطة الجمعيات الأدبية ..






يعني هاوي لاقا هواة ..

Quote: واسة بتمنى تمشي في الرد ده بي نمرة خمسة فوووو كده عشان ما يتفهم إني جاي اغير مجرى البوست ..

Deal..






ـــــــــــــ


أستاذ أنور ماجا راجع ؟

Quote: نسيت, في مذيعه وااااااحده عاجباني شديد, بس ما عارفه اسمها, بتقدم نشرة الأخبار في تلفزيون السودان, بت سمراء ملامحها جميله, واثقه في نفسها وصوتها مميز, وما متزوجه .. لو في زول عارف اسمها ياريت يوريني ليهو, البت دي عندها مستقبل قوي لو لقت الفرصه, وبتلبس بدل واسكارفات معقوله, وما حصل شفتها بتوب

إعتقد أنو دى : هنادى سليمان

وزى ماقلتى ياامانى يرجى منها

Quote: إعتقد أنو دى : هنادى سليمان

ما عرفتها والله ..للأسف الشديد بحاول أكون متابعة ..لكن التلفزيون اللاقومي إلا أعصر معاهو

ليمونة ..لووول



ــــــــــــــــــ



ولو هي زي ما قلتو إن شاءالله تلقى فرصتها ..

صباح الخير

فعلا برنامج ناجح, اظهر اصوات جيدة.

تياب مزيعات التلفزيون رائعة.

ما رايك فى جمانة نمور ؟

سلام.

داليا

بوست جميــل.
بيعي لي البوست دا يا داليا
تعرفي برنامج نجوم الغد دا ، بعد كدا مفترض يتوقف حتى يحافظ على المكانة التي اكتسبها، لان الحكاية اصبحت تحصيل حاصل...


اما اخانا شول ، فعتبر انو فوزوهو لجعل الوحدة جاذبة، لانو بصراحة ربنا لا يستحق الفوز.

استاذنا عبد اللطيف البوني

البرنامج دا اذا تواصل بالبشتنة الحاصلة دي والرؤية الاخراجية الاكثر من متواضعة ح تكون انتهيت كنجم، مجرد نصيحة،

ح اجيكـ

عارفة ياداليا

كان عندى آمال كبيرة(زمااااااان) , فى عفاف حسن أمين , وكل مااشوفا طوالى كان بتجى فى خاطرى أوبرا وينفرى-

كمذيعة مقتدرة , جريئة فى طرحها لكل المواضيع- ملمة بتفاصيل الموضوع البتناقشو

لكن الله غالب, فجأة كدة عفاف بقت شخصية تانية

غايتو فى رمضان الفات , حطمت لى آمالى دفعة وااااااحدة

وأتمنى أنو عفاف تجتهد وتواصل , وترجع أحسن من زمان

Quote: كان عندى آمال كبيرة(زمااااااان) , فى عفاف حسن أمين , وكل مااشوفا طوالى كان بتجى فى خاطرى أوبرا وينفرى-

ما عارفة يا ندى سمعت أنو عفاف تمت محاربتها من جهة ما..وإغفال التفاصيل ما جبن لكن عدم وثوق من



دقة المصادر ، على اي حال هي من فارقت النيل الأزرق ماقدمت حاجة مهمة ..





بجد بتمنى تلحق نفسها، أو يلحقوها لأنها فعلا بتستاهل ..

تسلمي يا شمائل


بيع ماكو لكن أكو شراكة ..

Quote: استاذنا عبد اللطيف البوني البرنامج دا اذا تواصل بالبشتنة الحاصلة دي والرؤية الاخراجية الاكثر من متواضعة ح تكون انتهيت كنجم، مجرد نصيحة،

والله أنا اتخلعت بالجد من البرنامج ..وبحاول أتوازن في كلامي ..لكن كان أحسن كتير لو إكتفى استاذ

البوني بعموده المقروء والمحبوب ..من الدخول في تجربة لم يتم الإعداد لها بشكل جيد ..






مرات النجم بقع في شرك إستثمار نجوميتو .. والله أعلم ..

Quote: ما رايك فى جمانة نمور ؟

كمذيعة أخبار في قناة الجزيرة ..أجدها ممتازة ..




لكن لماذا السؤال ياسيف ؟

سالتك رايك فى الاستاذة جمانة , ذلك لانها تمتلك كم هائل من الابداع واجادة فن الحوار

خاصة فى برنامج ما ورا الخبر.

ثانيا ما يتطلبة العمل الادبى , حيث رايت انة مناسبا اسال هذا السؤال

وتكون اجابتك ضحكة صغيرة زى دى هاها وخلاص.

مودتى

أختي داليا والأخوة (ات) الكرام (يمات)
آمل أن تكون مداخلتي خفيفة عليكم ...
في الواقع استغربت الحديث عن نجوم الغد دون ذكر شموس ونادية الطيب .. ربما كان إعجابي بهما منبعه مزاج شخصي .. إلا أنني أعتقد أن صوت نادية الطيب وأداء شموس إبراهيم فيه من التفرد الكثير ..
شموس إبراهيم في تقديري فنانة ولدت بأسنانها .. صوتاً وأداءً وحضوراً .. وفي أدائها طرب قل وجوده في مطربي اليوم .. هذا علاوة على أنها لا تقلد بل تضفي مسحة خاصة على كل عمل تؤديه .. حتى لكبار الفنانين أمثال الشفيع وحسن عطية .. مشكلتها فيما يبدو في قوة شخصيتها .. حتى أن بعض العازفين شكا منها .. لذلك ربما لم تجد من يتعاون معها .. إلا أن العبقري حلنقي والموسيقار بشير عباس منحاها عملاً من شاكلة (ما مشكلة) بتاعة الود فرفور .. وأسماها حلنقي (فيها حاجة؟) .. (فيها حاجة الزول يعاين فيها حاجة؟) .. يا حلنقي والله لو ما بتتعلم من الأيام وهجرة عصافير الخريف .. كان الزول ... غايتو بس !!! الظاهر العباقرة ديل بخرفوا بدري شوية .. آمل الاستماع لشموس مرة ومرتين ..
نادية الطيب لها صوت عبقري كما ذكر د. الدرديري .. إلا أن مشكلتها في بساطتها وقلة ثقافتها الفنية .. وأظن أن بعضهم تسلط عليها ونصحها باختيار أعمال معينة ولبس معين وأداء معين .. فجاءت في الحلقات الأخيرة مسخاً مشوهاً .. فظلمت ظلم الحسن والحسين .. أرجو الاستماع إليها في عازف الأوتار للتاج مصطفى واحكموا عليها .. وأظنها لو وجدت من يلحن لها حسب طبقة صوتها لكان لها شأن ..
عثمان الشيخ كذلك يمتلك صوتاً قوياً وأداءً راقياً .. ثم أنه جاء بعمل خاص لا بأس به ..
فهيمة .. لا يختلف اثنان في نداوة صوتها وعبقرية أدائها .. لكنها متمكنة أكثر في الحماسيات كشول .. وكذلك في الإنشاد الديني الذي قلدت فيه حنان النيل بالحرف والشولة .. وقد خدمها أنها وجدت من يهتم بها ويمنحها بعض الأعمال التي ساهمت في فوزها بالجائزة ..
وفي تقديري الشخصي .. أن الترتيب العادل كان .. 1- شموس ... 2- فهيمة ... 3- عثمان الشيخ .. مع جائزة خاصة استثنائية لشول لتجاوزه حاجز اللغة والبيئة ولنجاحه الكبير في الأعمال الحماسية .. وأخرى تشجيعية لنادية الطيب لصوتها النادر ..
حازم .. أداؤه متفرد ..
مازن .. صوته جميل وحزين لكن فيه رتابة ..
هاني .. لم يخرج من عباءة أبو داؤود ..
وضاح .. نرجسي أكثر من اللازم ..
ميرفت بت كسلا .. صوتها قوي .. لكنها تقلد سمية حسن بالمسطرة ..

Quote: آمل أن تكون مداخلتي خفيفة عليكم ...

خفيفة شديد يا عبد الباقي ..لووول


والله كلامك محل تقدير وإحترام



لو لاحظت ما أفتيت كتير في الأصوات لانها ما حتتي ..، قريت الواقع بنظرة شاملة مبنية على

نتائج ..ولخصت الموضوع ، ماهو تجاهل لشموس او غيرا ..، لكن بسمع زول عادي ساي ..صوت شموس ما علق

معاي ..موش في صوت كدة بتتذكرو وانت صاني ..اها ده ما حصل لي ..وبرضو ده ما بقدح فيها ..

وزي ماقلت ليك ..أنا ركزت أكتر على تطوير فكرة البرنامج والرؤية الإعدادية والتقديم ..الخ





عموما مداخلتك بتاعت زول متابع بمزاااج ..

Quote: سالتك رايك فى الاستاذة جمانة , ذلك لانها تمتلك كم هائل من الابداع واجادة فن الحوار خاصة فى برنامج ما ورا الخبر. ثانيا ما يتطلبة العمل الادبى , حيث رايت انة مناسبا اسال هذا السؤال

هكذا إذاً ..معليش ياسيف الأيام دي الكبر دخل والفهم متعسر شوية ...لوووول