Post: #1 Title: بالعديل والزين بدري عريس .. والدعوة ليكم بورداب الخرطوم .. Author: معتصم دفع الله Date: 02-15-2010, 08:38 AM Parent: #0
زغردي يا أمه .. أفرحن يا عماته .. بشرّن يا خـالاته ..
بالعديل والزين .. والفال الحسن .. وفرحة الأحباب .. يتم عقد قران الأخ الصديق وزميل المنبر بدري محمد بدري على ست الحسان العروسة رهام .. وذلك يوم الجمعة الموافق 19 فبراير 2010م بحي أركويت مربع 64 جوار مسجد القبب بعد صلاة العصر إن شاء الله .. وسوف يكون الزفاف يوم السبت الموافق 20 فبراير 2010م بصالة الغروب شارع المطار خلف النادي الدبلوماسي .. ولا ننسى حنة العريس يوم الخميس 18 فبراير 2010م بمنزله بالجريف شرق حي الهدى مربع 1 مع صينية كبري المنشية ..
الدعوة موجهة لجميع الأحباب والأهل والأصدقاء .. ودعوة خاصة من العريس لبورداب الخرطوم جميعاً ..
والفرحة للجميع دائماً إن شاء الله ..
Post: #2 Title: Re: بالعديل والزين بدري عريس .. والدعوة ليكم بورداب الخرطوم .. Author: معتصم دفع الله Date: 02-15-2010, 08:45 AM Parent: #1
وقد إحتفل بورداب الشرقية بالعريس بدري يوم الخميس الماضي وكان حفلاً جميلاً ومبهجاً .. حضره الكثير من الأهل والأصدقاء وكنا حضوراً ومجموعة من بورداب الرياض ..
التحية لبورداب الشرقية .. وألف مبروك للعريس بدري ..
Post: #3 Title: Re: بالعديل والزين بدري عريس .. والدعوة ليكم بورداب الخرطوم .. Author: معتصم دفع الله Date: 02-15-2010, 08:54 AM Parent: #2
أيوووووووووووووووووي مبروووك يا بدري بخيت وسعيد وددت ان اكون هناك احضر جديدك وفرحك مع الاحباب بورداب الشرقية ربنا يسعدك ويهنيك معتصم مشتاقين كيمان والله تحياتي عبرك لناس الرياض والمرة الجاية انشاء الله اجي القى بوست حنة شتات يا رب مبروك يا بدري ومنتظرين طلتكم لينا كما وعدت
Quote: وددت ان اكون هناك احضر جديدك وفرحك مع الاحباب بورداب الشرقية
يااااااه يا أم سهى وسارة .. كنتِ موجودة بروحك الطيبة وإنسانيتك .. أي خطوة كنا نمشيها ونحن متجهين للدمام كانت بتسأل عليكم .. كنا متأكدين ح نلقاك أول المستقبلين ..
وكان على الشوق أسكتي ساي .. ياخي مشتاقين لمن شوقنا مدفق زاتو .. فاقدنكم شديد .. سلامي الشديد لسهى وسرورة ..
Quote: تحياتي عبرك لناس الرياض والمرة الجاية انشاء الله اجي القى بوست حنة شتات يا رب
عليك الله الدعوة دي تاني كرريها .. عشان الزول دا يلقى بنت الحلال التسعده .. تحياتك تصل للجميع هنا ..
في زواجك ضجة الشوق والهواجس ريحة الموج البنحلم فوقو بي ..... المودة والترحاب لشخصك الغالي نتمنى أن يجد غمامك أرضاً خصيبة وبالمال والبنون انشاء الله مبروك يا غنانا المشتهنو
عاطف رميتي .. بدري يستاهل كل الخير أمنياتنا له بحياة زوجية سعيدة .. لك التحايا ..
سلمى بت الشيخ سلامة .. كلنا سعادة بزواج الصديق بدري وهو الآن بين أهله وأحبابه يخضبون بنانه بالحنة .. وغداً سيكون عقد الزواج والسبت سوف تكون الأفراح وليلة الزفاف .. عقبال كل من تحبين يا رب .. لكِ الود ..
الزول زاتو .. كنا نمني النفس بجلسة طويلة ولكن هم الرجعة وطول المشوار حال دون ذلك .. لك الوعد بلقاء ثاني أجمل .. تحياتي لكل المعاك والشكر الجميل على السانحة الطيبة ..
عفاف أبوكشوة .. خصمتك بالنبي لما تمشي الحفلة تدي بدري زغرودة زي الفي الصورة دي إهداء مني ليهو .. نتمنى ليكم قضاء وقت ممتع وأفراح دائمة يا رب .. لكِ الشكر والتحايا ..
محاسن إبراهيم .. إزيك يا غالية .. بالله عليكم نوبوا عنا في هذا الحفل وإبتهجوا لينا مع العريس .. عارفنكم ما بتقصروا أصحاب واجب وزيادة والعريس بدري يستاهل كل الخير .. لكِ مودتي التي تعلمين ..
انا غايتو عشان حليفتك دي اول ما يصلنا بدري بزغرد ليه في المطار وبقول ليه دي وصية معتصم يااااااا حليلك يا معتصم يا سيد الفرح بالله تحياتي لعموم ال الرياض وبالاخص شتات وقول ليه اظهر وبان عليك الامان انت مسئول من الخير ويييييييييييييين تمبس؟؟ ولا ما نسال؟؟ اها سكتنا برضو تحياتي ليه ما تخلي زول ما تسلم عليه
Quote: انا غايتو عشان حليفتك دي اول ما يصلنا بدري بزغرد ليه في المطار وبقول ليه دي وصية معتصم
يا سلام عليك يا أم سهى وسارة .. عليك الله كبري الزغروووودة والله أمس كنا في سيرتكم أنا وشتات ودائماً ما تأتي بالخير والفرح .. بالجد فقدناكم هنا وفي الشرقية .. نتلاقى في ساعة خير ومحبة يا رب ..
تمبس موجود وهو بخير وعلى أحسن حال .. زي ما إنتِ عارفه زحمة البلد دي ومشاغله خصوصاً وهو جايي من إجازة .. تقبلي تحياتي وتحيات كل أهل الرياض وخصوصاً البورداب ..