Post: #1
Title: بحب بالجد ومن غير حد
Author: Hussein Mallasi
Date: 02-11-2010, 02:26 AM
نظم طارق الأمين:
..... بحب بالجد
ومن غير حد
أحب بالجملة والتقسيط
أحب بالدور بدون فطفيط
أحب من كسلا لي مليط
أحب من حلفا لي توريت
أحب من دون عذر واسباب
وازيد كل ثانية في الاحباب
أحب الجامعة والطلاب
أحب الثانوي والكتاب
أحب الوالي والارباب
وأموت في كورة الشراب
أها ما لكم.. شنو ليكم؟
بحب الطالبات من جم
وأشوفن زي بنات العم
وأشوف فيهن ظرافة دم
تخلي هوا الحياة أنعم
تسوي على الجراح بلسم
تزيد فرح الوطن الهم
تخلي الحاقدين أرحم
وتخلي الجيم ثري ابكم
أها ما لكم.. شنو ليكم..
بحب أنا مية في المية
كل تنهيدة سودانية
حتى الفول مع الطعمية
هم العملو لي شخصية
أحب ميدان ابو جنزير
وأغاني خضر بشير والصير
بحب عرمان وسلفاكير
ومنكر في القبير.. ونكير
أحب عمر البشير كمشير
وأحب حسن الترابي كغير
ومحمد صالحين وغدير
وعوض الشكسبير كخطير
وطه على البشير ككبير
ام درمان وشارع كرري
وشاطي أبروف.. سرير في سرير
أحب العدل و«الحرية»
والجبهة الديمقراطية
بحب كل حاجة سودانية
حتى لو افترضنا «...ة»
بحب الصادق المهدي
حفيد القبة والمهدي
بريدو وليهو طال سهدي
وضاع صبري وكمل جهدي
أها مالكم.. شنو ليكم
أحب تاريخنا أب ضجة
وأريد المهدي وأبقرجة
أحب العود والكمنجة
والعسكري أب طبنجة
أحب عون الشريف قاسم
وبدري وبابكر وقاسم
أحب الغنا والمراسم
وبحلم بالخليل باسم
وأحب ضل شجرة واقع في بياض
جنحين حمامة بتنقد الحبة
جمب سحلية مكتأبة
وأتوه في بحر المحبة
وأحب أولاد أبو قفطان وناس قطان وابو جبة
وأحب ناس خوجلي العثمان حبة.. حبة
أحب اولاد القماير واحب اصحاب الضماير
والبنات أم خصلا مساير
أحب كل قادة العشاير
وأموت في البت أم ضفاير
أحب ناس حوا الطقطاقة
وأموت في وزارة الطاقة
والباسبورت والبطاقة
أحب شيخ المرغنية
ومامون العجيمية
أريد كل الافندية
حتى البمشو كداري
والما صرفو ماهية
أها مالكم.. شنو ليكم
أريد الويكة والدمعة
وصورة النيمة في الترعة
أحب لمة سوق الجمعة
وأموت أنا في ندى القلعة
أريد محجوب كبوشية
وأحب سوق الحرامية
وأحب معمورة منشية
وأحب عاشة الفلاتية
أحب أولاد حاج الماحي
البيشعلو فرح الضواحي
اللي بيهم طابت جراحي
والبواصلو النمة صباحي
وبرضو بعشق معتز صباحي
أحب نادر واحب حوتة
وجمال فرفور
وبرضو عصام محمد نور
وكل مغمور وكل مشهور
وأغاني السيرة والطمبور
بحب أنا كل سوداني
يستريح في جوة وجداني
المحبة الدايمة عنواني
والبريد في العالم التاني
أحب قدال.. احب حميد
وكل الشعراء .. حتى الطيف
ومحجوب الكلامو شريف
ارقى شاعر واجمل ظريف
لو بقرة عترت يوم في الجريف
هو البساهر حد النزيف
أنا بحب ناس بيت الامانة
وناس علي ابو راس الفي السجانة
لو مرة جات عصفورة زهجانة
يعزموها غدا وبرتكانة
وتاني ترجع.. تصدح معانا
أنا بحب اهلي الفي الديوم
البشوفو الدنيا باليوم
هم رجال التقوى والصوم
وهم قيامتنا الـ ح... تقوم
بحب مجان
احب لله .. بدون الكبرياء والجاه
واحب الله..
وأحب كل البحب الله
واحب شكر الله خلف الله..
وخليفة ولد حسن بله
ولحدت حمزة عوض الله
أحب الهيلاهوب .. وتيراب
وكل الشعراء والكتاب
دكتور مرتضى الغالي
الاديب الشاب
وعثمان ميرغني الكتاب
البوني وزهير وحسين
وحاج وراق
وحتى البدعو للارهاب
وأحب الكورة جندي نميري
وهيثم مصطفى اللعاب
أحب نقد.. وعلي عثمان
والمسجون والسجان
واحب محمود محمد طه ـ
والحرية واللا خوف من الاحزان
واحب الحاج عطا المنان
والشيوعية والكيزان
مادام كلو في السودان
اها مالكم.. شنو ليكم؟
أحب الطرق الصوفية
واحب ناس شيخ الهدية
واحزابنا اليسارية واحزابنا اليمينية
وسجادة المكاشفية
اها مالكم.. شنو ليكم؟
بحب ديلا وبحب ديلاك
منو البقدر/ يمنع قلبي بي قانون
من حب مافي منو فكاك
وشنو ليكم؟ بحب متمردي دارفور وحكاياتم >>> أبو الزفت
واحب الجنجويد ذاتم
اها مالكم؟ شنو ليكم؟
أحب باقان وادوارد لينو >>>>>>> خلي ابورغد أتفلق
والشهداء من الطرفين
احب الماتو دبابين
علي الفتاح وطه الماحي والباقين
اها مالكم.. شنو ليكم؟
أحب عبد العزيز خالد
والدكتور منصور خالد
والدكتور عمر خالد
احب فاطمة وربيكا كمان
كحب الوالدة والوالد
اها مالكم؟ شنو ليكم؟
احب الشوش
وفيليب غبوش
وعبد الناصر الطائف >>>>>>> بستاهل الحب
كمان بالذات
محمد ود نعيم سعد الحلو البسمات
وفايزة اختنا بت عمسيب
في عيني لسه شباب ولسه بنات
وأحب شمبات
ومبارك حسن بركات
احب الاب فيلو ثاوس
وكل جنودنا الاشاوس
والجامع والكنيسة.. واحب علوية وخميسة
احب دكتور مهندس بروفسير
عبد المنعم عطية
صحي ما شفتو قبال دا
ولا لاقتني كورساتو المكثفة بالالمانية
بس عاجبني اسمو شديد
وبكون زول عندو شخصية
بهذا اعلن الحب الكبير
بدون فترة انتقالية
محبة اكيدة دايمة كمان
محبة وطاقة ازلية
وادعوكم جميعاً للمحبة بصورة رسمية
بدون قانون.. وأي ظنون
وافكار فارغة زي دي
متين يكبر معانا الحب؟
ويصبح حاجة عادية؟
متين نعرف نحب الناس
ونمسح ماضي الازية؟؟
متين نعرف نعيش الحب
بدون ادنى انتهازية؟
متين ح تشيلني في عيونك
واشيلك جوة عيني؟
|
Post: #2
Title: Re: بحب بالجد ومن غير حد
Author: Hussein Mallasi
Date: 02-11-2010, 02:26 AM
Parent: #1
عاش طارق الأمين.
|
Post: #3
Title: Re: بحب بالجد ومن غير حد
Author: Hussein Mallasi
Date: 02-11-2010, 02:31 AM
Parent: #2
و شكراً لمن جعل هذا ممكناً 
|
Post: #4
Title: Re: بحب بالجد ومن غير حد
Author: عمر صديق
Date: 02-11-2010, 02:39 AM
Parent: #3
الاخ ملاسي
تحياتي
ودايما بتجيب بيتت الكلاوي وبيت القصيد
|
Post: #5
Title: Re: بحب بالجد ومن غير حد
Author: Rawia
Date: 02-11-2010, 02:40 AM
Parent: #3
He is great
and he has great open mind
____________________
حوطة حوطة ........
دي تحويطة للبوست عشان مايتبهدل
|
Post: #6
Title: Re: بحب بالجد ومن غير حد
Author: دينا خالد
Date: 02-11-2010, 03:20 AM
Parent: #5
لووووووول يا حسين ..
انت اكيد حلمان !!
هسه نفررررض انو طارق كتبو ..
انت المزكرك لى الساعة 3 ونص صباحا شنو ؟؟
Quote: أحب عبد العزيز خالد
والدكتور منصور خالد
والدكتور عمر خالد
|
والله قررررب يقول ودينا خالد !! لوووووول .
بالجد دى معقولة لكن من غير حد دى واسعة شوية ..
وفاتك ان تقول انه القصيده مهداه للوارده اسماءهم
بمناسبة عيد الحب فى 14 فبراير !!
ـــــــــــــــ
عليك الله يا حسين ما دام استلمت الحب دا
ارجو ان تضع اسمى بدل عمر خالد فى اعلى القصيدة
ما تقول لى كلكم ممكن !!!
تحذير ::: مافى زول يجى يشكر القصيده دى
تريثوا .. من الواضح انو شرك .. ودعونا حتى نستبين الخيط
البمبى من البنفسج .. انه تالله لحب غمرنا الا يفرزونا باللون ...
|
Post: #7
Title: Re: بحب بالجد ومن غير حد
Author: دينا خالد
Date: 02-11-2010, 03:29 AM
Parent: #5
| Quote: و شكراً لمن جعل هذا ممكناً |
D:D:D:D:D:D:D:D:D:D:d:D:D:D:D
انت مصييبة !! كبيرة !
ـــــــــــــــــ
والشكر موصول لشيطان الشعر لى الليلة ولى بكرة !
|
Post: #8
Title: Re: بحب بالجد ومن غير حد
Author: elsawi
Date: 02-11-2010, 03:57 AM
Parent: #7
غايتو حب زي ده مافي زول بقدر عليهو الا طارق الأمين ابو قلب زي قطر البضاعة
الولد ده مجنون وما نصيح
Quote:
والله قررررب يقول ودينا خالد !! لوووووول
|
Quote:
انت مصييبة !! كبيرة ! |
والله يا دينا انت ذاتك مصية!!!
|
Post: #9
Title: Re: بحب بالجد ومن غير حد
Author: Tragie Mustafa
Date: 02-11-2010, 04:24 AM
Parent: #8
باقيلك يا الصاوي ده حب ولا استهبال؟؟؟!!!
Quote: غايتو حب زي ده مافي زول بقدر عليهو الا طارق الأمين
ابو قلب زي قطر البضاعة الولد ده مجنون وما نصيح |
يازول الود طارق الامين ده شكله خريج مدرسة اولاد بمبه في الاستهبال!!
قال شنو لكم ومالكم يا سلام!!
ده زول حريص على فنه ويعرف انه جمهوره لازم يكون من كل الاتجاهات
عشان كده اخترع الحب بتاع السمك لبن تمرهندي ده(هههههه)
نجيض لكن يا طارق وزول سوق درجه اولى.
|
Post: #10
Title: Re: بحب بالجد ومن غير حد
Author: Rawia
Date: 02-11-2010, 04:30 AM
Parent: #8
دينا سلامات
Quote: تحذير ::: مافى زول يجى يشكر القصيده دى
تريثوا .. من الواضح انو شرك .. ودعونا حتى نستبين الخيط
البمبى من البنفسج .. انه تالله لحب غمرنا الا يفرزونا باللون ... |
غايتو شكرت فروم ذا دييييببست بارت اوف ماي هارت
لكن مامشكلة لو صحيت الصباح(قولي العصر كدا)
ولقيت الناس شرقوا بشرق
|
Post: #11
Title: Re: بحب بالجد ومن غير حد
Author: داليا حافظ
Date: 02-11-2010, 08:08 AM
Parent: #10
|
Post: #12
Title: Re: بحب بالجد ومن غير حد
Author: أبوعبيدة محمد الأمين
Date: 02-11-2010, 09:36 AM
Parent: #11
شكراً طارق الأمين
شكراً ملاسي
هذا النظم عبارة عن برنامج إنتخابي جااااااااااااااااااااااهز
يحل كل مشاكلنا
|
Post: #13
Title: Re: بحب بالجد ومن غير حد
Author: العوض المسلمي
Date: 02-11-2010, 10:00 AM
Parent: #12
القلب البحب قدر كده يستاهل انه يكون حنين ...
|
Post: #14
Title: Re: بحب بالجد ومن غير حد
Author: بشير جبريل علي
Date: 02-11-2010, 04:48 PM
Parent: #13
| Quote: القلب البحب قدر كده يستاهل انه يكون حنين ... |
ليه ما يكون ..سارة علي؟؟
|
Post: #15
Title: Re: بحب بالجد ومن غير حد
Author: منتصرمحمد زكى
Date: 02-11-2010, 05:04 PM
Parent: #14
تقصد المعلقة
غايتو النية واصلة
شكرا ملاسي
|
Post: #16
Title: Re: بحب بالجد ومن غير حد
Author: انتصار محمد صالخ بشير
Date: 02-11-2010, 05:16 PM
Parent: #15
متين نعرف نعيش الحب بدون ادنى انتهازية؟
|
Post: #17
Title: Re: بحب بالجد ومن غير حد
Author: ALZOLZATOO
Date: 02-11-2010, 05:20 PM
Parent: #15
صدق طارق وكذب ملاسي 
كتاباتك بتوحي غير كده
تحياتي الاكيدة
زاتوووو
|
Post: #18
Title: Re: بحب بالجد ومن غير حد
Author: عمر الفاروق
Date: 02-11-2010, 05:38 PM
Parent: #14
القصيدة فيها حاجات جميلة وبتحس بيها جات عفوية لكن فيها حاجات إتنجرت وإتصنعت صناعة لمممن بيكون طارق اللمين زااتو حرررقت ليهو روحو حتى ظبطت معاهو ..
بحب النمة والدوباي..
بحب الطار وصوت الناي..
بحب الماشي بحب الجاي..
سيد اللبن وست الشاي..
بحب ااا زوول قررب جاي..
بحب سي يو وخلاص باي باي..
بحب العرضة والشاشاي..
وبحب حنكوشة بتقول ياااي.
بحب حمدون ده زول تلاي..
وبحب محمود ده زول غناي..
وبحب النسمة والكتاحة ..
وكل الناس الفقرانة والمرتاحة ..
بحب الدومة والتفاحة ..
وبحب الهايجة والبراحة ..
بحب أتراحنا فيها مناحة ..
وبحبو رقيصنا جوة الساحة ..
بحب المعتقل والأمنجي ..
وبحب أيامنا والبجي بجي ..
بحب المرسال وتجي ولا نجي..
بحب هيييييع بحب أججججججي..!!
بحب المدير والمكوجي..
تخريمة :
عيييبو لي حبي ده أسة عليكم الله
|
Post: #19
Title: Re: بحب بالجد ومن غير حد
Author: فيصل محمد خليل
Date: 02-11-2010, 06:09 PM
Parent: #18
قلبو لوكاندة
|
Post: #20
Title: Re: بحب بالجد ومن غير حد
Author: دينا خالد
Date: 02-11-2010, 07:52 PM
Parent: #19
الفاروق !!!
استحقيت فرقة اسمها ورررردلووب .. تقول لى ال هيلا هوب ؟
شعر حداسى بن 60 كلب ضال ..
بس لو قدرت وزنت ناس خالد خالد خالد ديل ..
كنت ما تخلص ..
ـــــــــــــــــ
اها فى زول كدا لو حسن اخلاقو
ل اديناهو ليها يغنيها ..
|
Post: #21
Title: Re: بحب بالجد ومن غير حد
Author: أبو عبيدة البصاص
Date: 02-11-2010, 08:21 PM
Parent: #20
Quote: متين نعرف نحب الناس
ونمسح ماضي الازية؟؟
متين نعرف نعيش الحب
بدون ادنى انتهازية؟
متين ح تشيلني في عيونك
واشيلك جوة عيني؟ |
|
Post: #22
Title: Re: بحب بالجد ومن غير حد
Author: محمد حيدر المشرف
Date: 02-11-2010, 09:49 PM
Parent: #21
غايتو ما خلى زول ..
* ملاحظه نقديه
كان يورد الاسامى الفابيتكال فى القصيده
|
|