ويسألونـك عن البتنجـان ...!

ويسألونك عن الأسود

ما إن نلتقي حتي يحدثني عن البازنجان كأرخص خدار في تاريخ السودان الحديث .
تزوجوا فقراء يغنيكم الله
تزوجوا فقراء وسيقف البازنجان الي جانبكم

ما أن يخرج من منزله بإتجاه السوق الكبير حتي يقرر (مزمل) شراء كم كيلو من الأسود ، لا تمسكاً بنظرية (القيمة الغذائية) بل إمتثالاً لحكمة (الجيب) . وهو محق في ذلك إذ أن كيلو البازنجان لن يكلفه علي الإطلاق أكثر من جنيهين إضافة لتعدد إستخدامه شئ بالتقلية وشئ بالروب وشئ مسقع وشئ مسلوق وشئ بالليمون وشئ بالكمون وإن تيسر الحال محشي ، لذا كانت وصيته لكل أصدقائه الذين قرروا الدخول في شرك الحياة الزوجية ومطالبها التي لا تنتهي علي الإطلاق بأن عليهم بالبازنجان .

كانت ليلة نادرة من ليالي خرطوم الهزيمة كانت ليلة فرح إستثنائية بدخول صديق عزيز لعش الزوجية أو وكر (المطالب) أيهما أنسب . تقدمنا (مزمل) بحكم السن ونظارته المقعرة التي ساهمت وقبيل أن يتم تعيينه بإحدي المؤسسات الحكومية في أحالته للمعاش الاجباري بفضل ذات العدسات المقعرة ليشغل مقعده بين أرباب المعاشات ، وحينها لم تجدي مساككاته ما بين ديوان المظالم ودووايين النائب العام .

المهم أنه تقدمنا ترافقه حرمه المصون لتقديم التهاني والتبريكات لصديقنا المشترك ، كان يمشي بذات الطريقة الدراماتيكية التي عرفناه بها طوال الأيام التي جمعتنا في سني حياتنا الطالبية ، غير أن الفارق هنا أنه يمسك بذراع شريكة حياته ، وبطريقته الخاصة يشق جموع المهنئين مستخدماً في ذلك صوتاً لا يخالجك شك أنه صادر من رجل في خريف العمر .

لو سمحتوا يا عيالي وسعوا السكة شوية لي عمكم
يا بتي لو سمحتي شوية
وهكذا الي أن ينتقل بنا لنكون مباشرةً أمام صديقنا (العريس) الذي بدوره قفز ناهضاً بطريقة لا علاقة لها ببروتكولات الأعراس . يخيل اليك الشاهد لمنظرنا يومئذ أن (العريس) وأصدقائه قوم زاهدون في الحياة لم يشتغلوا بالمعازيم الشغلة فتسالموا وتحاضنوا وتناضموا كل علي طريقته ولكأنهم في زقاق من أزقة الجامعة أو بيت من بيوت العزابة بسيطة الحال .

ما إن إنتهي الحفل حتي تقدم (مزمل) ناحية العريس لينقل إليه وصيته وهو القادم الجديد لمعترك حياته الجديدة والتي فضلها علي ليالي الأنس وضحكات الرفاق ومواويل العاشقين ما إن يليل ليل البلاد .
قال بصوتٍ خفيض :
شوف الناس ديل كلهم ما في زول فيهم حيقول ليك النصيحة ، المسألة الإنتا غطست فيها دي ما بحلك منو الا (البتنجان) كان يتحدث بثقة مفرطة وبيقين ما بعده ثانٍ .
والله البتنجان ده بس ربنا يخليهو لينا لو ما هو حالنا كان انشال بدري
تمشي السوق من دربك ده وإشتري ليك كم كيلو كدة تقزقز بيهم في شهر العسل . إنفجر الحضور ضاحكين وما دروا علي الإطلاق حكمة الرجل .

هاتفني ياسر منذ أيام من السوق المركزي كان صوته يأتيني عميقاً من بين أصواتٍ شتي أصوات الباعة المتجولون والمتجولون والمتجولات والمتجولون ساي سألته عن الجوطة التي حوله . إنقطع الخط فجأةً بيننا عاد وإتصل بي مرةً أخري قائلاً :

جيت السوق إشتري خدار الأسبوع ، الطماطم ما بتتهبش ، البطاطس خلي ساي ، الـ.... والـ وجد لكل ما تنتجه الأرض السودانية مخرجاً لجيبه سوي الأسود كيف لا وهي وصية صديقنا الأزلي (مزمل) .

عاد (ياسر) حاملاً معه قفة معتبرة أسها وأساسها (البازنجان) . حينما دلف لمنزله هرعت صغيرته ممنيةً نفسها بأي شئ سوي المذكور أعلاه . غير أنها سرعان ما عادت يلفها الأسي لتقول ببراءتها المعذبة : تاني يا بابا ؟

ما أن يرن هاتفي حتي يأتيني صوته مملوءاً بضحكته الأليفة وهو يقول :
عارف يا خضر والله بي صراحة لو ما (مزمل) ده أنا بيتي كان إنخرب .
لكم بسيطة أمنياتنا يا صاحبي
لكم يا ياسر

لكم ...!

تنويه : الأسماء التي وردت هنا حركية بما فيه إسم العبدالفقير الي الله .

فمن رأي منكم بتنجاناً فليرمه بجبل

صورة للمذكور أعلاه

ــــــــــ
عفواً نسيت أن أكتب في العنوان توجد صور

يتأمل في دخان السجائر,
ينظر في ساعة الجيب:
لو أستطيع لأأبطات الدقائق.....
كي أؤخر نضج الشعير...

.....

الي أخر القصيده التي طارت....

من أقوال( محمود درويش)....

الي البازنجان في توهانه

والله مشتاقين بالمليون كده

Quote: يتأمل في دخان السجائر, ينظر في ساعة الجيب: لو أستطيع لأأبطات الدقائق..... كي أؤخر نضج الشعير

ياكوجي
ياخ أقول ليك بتنجااان تقول لي يتأمل
أما بعد
قطايع النص دي مهمة من فترة لأخري بتنعش
الروح وبتصحي الجسد
الجسد القال عاطف خيري انها مصلاية الروح
الروح المفوتة كم وكت


ياالله ياكوجان ليتك هنا لتستمتع معنا بهذا الضنك . عجيبون هؤلاء القوم السودانيون
يمسكون في الحاجة فما يخلوها كلو كلو وكذا لسان حال الصغيرة وأباها يفاجؤها
بالبازنجان بين الفينة والأخري

ياخ مشتاقين دي شوية والله

Quote: لكم بسيطة أمنياتنا يا صاحبي لكم يا ياسر لكم ...!

ونعم بالله يا خضر ... ونعم بالله !

الوليد
ازيك ياخ
مشتاقين يعلم الله .


ونعم بالله
والنعم علي قول البدو

بتنجان فى عينك ياخضر
وحات الله شدة ما بشتهيههو اهاجر "ليك وين ما كنتى "
وحنى على انا يا بتنجانة
هنا ياصديقى هذا الكائن المسمى بتنجان من اغلى الخضروات
اى والله
الواحدة الكبيرة الوزنها رطل سعرها دولارين بالتمام والكمال
لكن بنشتريهو كيتن فى الطماطم
وكيتن فى سلطة الاسود
والنحدسك ما "بنحشى" لانه قدر الليلة وبكره
يعنى لو داير تحشى واحدة داير ليك كم رطل لحمة ورز
بلاش لكين "بنسإعه"دى بالمصرى وبنحمرو "برضو بالمصرى "
ويا بتنجان يا
ارخص حاجة هنا البطاطس
كيس كبير بدولار
لكين ولا بنسال فى حضرتو "دى برضو بالمصرى"
ايه حكاية المصرى اللاحنا طالعين فيها دى؟
مش عارفة يا بيه هى كدا وخلاص
مشتاغون خالس خالس

انت الزول البعرس يمتنع عن المراسلات البريدية ؟
سؤال برى خالس برضو "لحسن تنضرب "بالالم" يا عمنا وتروح فى شربة مية لا ااااااا ما يحكموووشى

صورة مقربة للمذكور أهديها للأصدقاء
كوجان
سلمي
الوليد


جاييكم

شوف يا عمك
اي شي ولا الباذنجان مستعد اقايض الحبة بكيلو اي لحمة انا بما فيها الروبيان
شوف اخوك ما بهظر في تلاتة حاجات
الباذنجان والبيض والعدس

الاصناف السابقة يا كابتن اصناف نضيفة سريعة ما فيها دموية ولا عقدة جيب ولا ولا
البتنجان
ممكن تعمل بابا غنوج يبقي ليك مقبلات
مسقعة تتغدا بيها
تساعد الموضوع بشوية دكوة يبقي سندوتش فطور
تحمر بالزبادي غدا محترم وبعدين الزبادي ده لازم يكون في صحن مفلطح كان ما بتعرف المفلطح يعني زي السرويس لانو التناول بكون زي المد والجزر بتاع البحر


شفت الباذنجان ده بيذكرني نكتة الشايقي القال ده داير يخلي الشاي وأجزم بذلك وقام عمل مؤتمر صحفي

قال ليهم هسة كان خليت شاي الصباح التقيل داك مع اللقيمات بسوي لي شنو
شاي الفطور الاحمر المتل عين الديك داك بسوي لي شنو
شاي العصر وكت الزول يرجع البيت داك بسوي لي شنو
شاي المغرب المقنن داك وكت يرش الحوش بسوي لي شنو

نط ليه واحد قال ليه بسوي لك جنس الجن البتوصف بيه انت هسة

رجاء استهدف اي حاجة تانية امش علي الفاصوليا البترخي البطن،اكره ما اكره الكوسة وفصيلاتها وأي ملاح لايوق

ياخي ما لقفيت الا الحبيب ده ده حتي شكله بشبه تيري هنري اللاعب الانيق كابتن فرنسا كدة

والله يا قمر بحكم اني عارفك من ذوات الأكلات السريعة مقدر جداً
دفاعك المستميت علي البازنجان ، ياخ لكن الشايقي زاتو
بالغ هو وكتين بحب الشاي قدر ده مخليهو فوق كم ؟


بيني وبينك البتنجان ده بقي منقذ لحياة السودانيين
تحديداً الأسر الجديدة من خمسة وتسعين وانت ماش

ما تكتر منو يا قمر هسي صدقني بطير ليك بعدين

سلوم
ازيك
طبعاً السيد البتنجان ده لحدي ما يصلكم بكون كبر ومشي علي (رجلين جوانا)
والله عجبني لي بتنجانكم لكن .
انتو حاجاتكم في بلاد برة كلها حجم عائلي ولا شنو الحكاية
صاحبي ده من كترة ما بشتري البنتجان شكلو كده
حيجي يوم القيامة وليس في وجه سوي بتنجاناية
كرهنا الشهادة لله البتنجان



ــــ
بخصوص المراسلات والله ياسلمي مشتاقين بالحيل لكن وين مع المعافرة والمدافرة
والبتنجان الحاصل ده

سلام يا خضر و مليون سلام للباتنجان !















--------
له المجد هذا الأسود ، لولاه لما طاب الطعام !

يا حليل زمن الثقافة الزراعية
زمن كان التفتيش تفتيش والمزارع مزارع
والأسمدة أسمدة .
يا خضر قالوا طلع سماد جديد فى السودان لقتل ديدان شجرة الأسود .
واحد د / زراعى قال السماد ده من ناحية يقتل الديدان ويساعد فى نجاح
البازنجان نجاح شديد ومن ناحية يسبب السرطان .
وقال : بلغت نسبة السرطان حدود كارثية بسبب سماد البازنجان .
والله العظيم يا خضر من اليوم داك وانا بعيد بعد الطريفى لى جملو من البازنجان
.. عليك يا خضر الناس دى تتاجر حتى فى الزى ده ؟؟؟؟ ملعون ابو دى حيكومة .

سلامات يا خضر
انا حاكون عملي و اشرح ليك كيف "تنقي" الاسود الكويس لما تجي تشتري :
-تختاره وسطا لا هو بالكبير المفرط و لا الصغير .
-احرص على الحبات التي يكون جلدها اسودا لامعا لا "كرمشة" فيه و لا تجاعيد.
-و سر المهنة هي أن تحمل الحبات بيدك و تضغط على جلدها واحدة تلو الاخرى بابهامك ضغطا رقيقا و لترى من ثم اي الحبات قد ترك ابهامك عليها اثرا فتلك هي الاطيب في غالب الاحوال فاخترها على بركة الله.


_________________________________________________
حاشية:
بتاع المحشي لازم يكون من النوع الصغير

Quote: The good facts are: Eggplants are a very good source of copper, dietary fiber, folate, manganese, magnesium, niacin, potassium, thiamin, vitamin K and vitamin B6. They are also an excellent food for losing weight as they are low in calories, saturated fat and cholesterol. Unfortunately here are the bad facts: Eggplant is very high in sodium and a large portion of the calories come from sugars. The medicinal benefits are many for those who tolerate eggplant well. Eating it can reduce swelling, reduce bleeding, clear stagnant blood, comfort bleeding hemorrhoids and treat dysentery. The bioflavonoids in eggplant could be quite beneficial in preventing hemorrhages and strokes. It also contains an antioxidant helpful in preventing cancer and heart disease. If you live in the desert and come across scorpions and sustain a bite, you can apply raw eggplant directly on the affected area. For frostbite, you can prepare a tea of eggplant, bring to room temperature and apply a compress to the area.

من فوائد البازنجان
القصه جميله يا خدر

سلام خضر...
شغلتنا أموالنا وبنونا و(خالدونا,دا فصل من فصول كانتربرى السودانية
فى نسختها الجديدة,أظنك متابعو) فلم ننتبه للباذنجان.

Quote: لكم بسيطة أمنياتنا يا صاحبي لكم يا ياسر لكم ...!

الله غالب.

صديقي العزيز المعز
التحايا كما تجب

Quote: شغلتنا أموالنا وبنونا و(خالدونا,دا فصل من فصول كانتربرى السودانية فى نسختها الجديدة,أظنك متابعو) فلم ننتبه للباذنجان.

الحال من بعضو ياصاحب
عن كانتبري لي جية ماهلة بكل تأكيد

سلمت ياصاح

ماما دوما
التحايا والاشواق
والله اثر كل مداخلة بكتشف لي فائدة جديدة
اتاريهو ما هين


سلمتِ يا عزيزة

حبيب آلبى الباتنجان ياخ


أبوى وأمى ديل أظنهم إشتغلو بنظرية مزمل, ووقف معاهم الباتنجان فى ايامهم الحالكة
فحصل على قدر كبير من التقدير و بقى الباتنجان من المفضلات فى تربيزة ناس بيتنا -اظنو اون ديلى بيز


وتعال شوف العظمة, على الرغم من محلات الخضار الكتييييييرة هنا, إلا أنو أمى تصر على أنو الأسود السمح فى مكان معين - وتهاجر للباتنجان

شفت العظمة دى كيف؟

سلامو ياخضر

يا بتاع البتنجان انت
بوستك دا طوالي يجيب الحرقان
خلي البوست الجاي عن التركين
وما تنوم وانت جعان
عشان ما تجي تكتب لينا بوستات عن الطعام
حلم الجعان بتنجان

مسكاقمي خضر اخوي
هكرفي

Quote: وما تنوم وانت جعان عشان ما تجي تكتب لينا بوستات عن الطعام حلم الجعان بتنجان

والله لكن يا حمزاوي جن وصية
والله أنا يومي الأشبع
بوردكم ده بالتحانيس ما أقربوا



هو بلا الجوع ده الجايبنا هنا شنو؟
في جوع (قوووع قوع ياحمزاوي)

يــا أخــونا والله

الــباذنــجـان مـظــلـوم مــعانا

فــالــباذنـجـان ثــمــرة خــضـرية مـفيـدة للـغايــة

فـعـصــير الـباذنـجـان بـقـشــرته الســوداء مــثـلا عــلى الريــق

يـغــســل الأوردة والشــرايـيـن مــن الشـــحـوم الـكلـوســترولــيـة

ويــخـفـض الكلســترول فى الـدم

والــباذنـجـان ينــقــى ويـدعــم ويـغـذى ويــحـمى خــلايا الـمـخ

ويـحــيـيـد الجـزيـئات الـمؤكـســدة الـضارة

وخـصـائــصـه الـذاتية تـحـميه بـمـنـع نـمـو الـباكـتريا فـيه وتحـمية مـن الأكـسدة الـمـدمــرة

وبالـتالى فــيه فــؤائد إســتئصال الباكـتريا والـفيروســات والكـلـسـترول الـضـار

ومــقاومـة السـرطانات وتـنـقـية الـدم مـن الـحـديد الـفائض الـذى يـســبب أمـراض الـقـلب

ويــخـفف مــن إمـكانات الإصــابة بألإلــتـهابات الروماتـيـزمــية المـفـصـلية.

وفـيه فـايـتـامـين ب1 والـبوتاس والـنحاس والمـانـقـنيــز بــكـمـيات كـبـيرة جــدا

وفـايـتـامـين ب3 ، وب6 ، وثلاث أخـر والـماغــنـيـزيوم بـكمـيات كـبيـرة

وفـيه ثــلاثـة عـشـــر مــضادات فــعالة جــدا لتـحـطـيم الـجـزيئات الـمـدمــرة

مـــع إنــزيــمـات مـفــيـدة

ولــكــن كــل هــذه الــفـوائـــد تـنـقـلـب إلى عـــلل مــدمــرة بــمــجـرد تـحـمــير الـباذنـجان فى الـزيت

حيث تفـســد المـكونات وتتشــبــع بالشــمعيات الدهـنية المـشــبعة الــتى تترســب عـلى جـدران الأوردة

والشــرايين وتـرفـع الـضـغـط وتــؤثـر عــلى الـقـلب

وخــير طــرق أكـله إمـا كـعـصـير،

أو طــازج أو كـســلـطة بالخـل والليـمون والكمـون والبـقـدونس

أو تبــويــخ بالـبـخار فى أناء داخـل حـلة بــها مـاء حـيـث أن السـلق داخـل الـماء يـغـسـل الـمغـذيات

أو الشــواء لـفتره قـصــيرة (تـخـتـخــه)

أو يـطـبـخ لـفتـرة قـصـيرة فى دمـعـة مـجـهـزة مـن قـبل

وبـالــهــناء

الاعزاء المشاركين
قطعاً سأعود اليكم




غير ان الثابت أنني ومن مداخلاتكم صرت أكثر إرتباطاً بالبازنجان

مودتي لكم جميعاً

حبيبي الباذنجان ...
مستعد آكل الباذنجان 24 ساعة بدون أي ملل ...


المؤسف أن زوجتي لا تحبه لذلك نادراً ما أراه في السفرة ....

اسألني عنه بالحيل بعرفه تب ..

بت الكلب البتنجانة لقيته ليك ياخدر محكرة في رف تلاجة باااااردة بس ما برودة صقِع , برودة تحفظه من سرعة موته وكمان تلمع لونه , وقفت أعاين ليها التقول داير أخطبه بفكر في جماله ورقشة سواده لامِن إتخيل لي انو بشوف سواد عيوني فيها وبقت لي زي قزاز الكرسّد ولِيد التايوتا المظلل داك الكان ممكن تقيف قدامو وتهندم نفسك وانت داخِلك على بيت عقد , المهم سرحت في البتنجانة وقلت بيني وبين نفسي اسه ياخوانا ده الأسود المردوف في الواطة جنب الخيران عندنا ولا ياربي يكون اسود الخواجات ده شيِتن تاني أصلو الخواجات ديل ممكن تتوقع منهم أي مفاجعات , المهم إتلفت شمال يمين وقولت يامهون القواسي كدي النهبش الأسوداية دي ونشوف يمكن تكون شيِتن عاملنو لعبة للوليدات ,أصله الخواجات ديل عندهم لعبات ما ناقصها إلأ الروح ,اه آزول هبشته ليك لمّن رجفته التقول سلام بيني وبين حبيبتي اول مره , والرجفة دي ما خلتني اقول آ جماعة دا ما اسودنا ذاتو وبي صفاتو , آ ناس الخواجات الطُرش ديل يبرّدو في الأسود ونحنا ميتنا ما لاقي البرود ..

كدي النقيف ياخدر وبجيك صادي أرجاني وأسالني تاني ..

إزيك يا خضر
جاينكم ... حتسقبلونا استقبال الفاتحين ول نواصل بي جايي ؟

آل بتنجان آل

Quote: انت الزول البعرس يمتنع عن المراسلات البريدية ؟

ويا سلمى ... نعم الزول لمن يعرس بيمتنع عن المراسلات البريدية فى حالة وااااااااااحدة



























لمن تكون الداخلية تخصص حاسب آلي وفى رواية أخرى هاكر (يا جماعة مؤنث هاكر بيكتبو كيف بالعربي؟)

ياخضر
انا مابحبيش البتجااااااان .!

صديقي الاسود - الباتنجان - aubergine بلغة الهولانديز
لولاه ما طابت حياة
له شكري و تقديري و عظيم إمتناني
سعر كيلو البتنجان 3 يورو
غالي و مكمل قروشنا لكن بنحبو برضو

تحياتي

Quote: شئ بالتقلية

معقول يا خضر ؟بالتقلية عديل كدا ؟
زمان في حي العرب كنا نأكله بالفول المصري
اليومين ديل الصندوق الكبير بــ10 ريال في الشرقية
إلا الأبيض غالي

يعني شايفكم كلكم بتنجانيين شديد
وأنا شايل حس مزمل وياسر ساكت



ــــــ

أطالب باليوم العالمي بالبتنجان
أسوةً بالأيام العالمية الأخري




ولله في بتنجانه شؤون

خضر سلامات ...

بس ما تبالغ لأنه سلطة الأسود تحديدا عشقي الأول والأخير ..
ومستعده أتناولها في كل الأوقات وما ببدلها بأي طبق تاني ..

بعدين تحت تحت كده الأطباق الكتيره الممكن تتعمل من الباذنجان دي مرّاقه خطيره لستات البيوت,
يعني الواحده تكون راجعه من الشغل هلكانه,
تقوم تعمل أيي وهمه بالباذنجان مع رز وسلطة خضار وده غداء زي العجب
يوم تاني تكون تعبانه تقوم تغيّر الوهمه بتاعت الباذنجان مع مكرونه وشوربه وسلطة خضار ويطلع غداء سريع ومحترم هههههههه

فبالله ما تطفّش الناس منو ساكت,
خلينا لغاية ما نمارس بيهو الاحتيال ده

Quote: لمؤسف أن زوجتي لا تحبه لذلك نادراً ما أراه في السفرة

والله لا أملك هنا سوي التعبير عن تضامني التام معك يا خالد

حالك حال ياصاحب

العزيز عبدالرحمن ابراهيم محمد
تحياتي الحارة

والله أشكرك علي جملة هذه المعلومات القيمة
والتي إتضح من خلالها مدي أهمية هذا البازنجان

Quote: فـعـصــير الـباذنـجـان بـقـشــرته الســوداء مــثـلا عــلى الريــق يـغــســل الأوردة والشــرايـيـن مــن الشـــحـوم الـكلـوســترولــيـة ويــخـفـض الكلســترول فى الـدم والــباذنـجـان ينــقــى ويـدعــم ويـغـذى ويــحـمى خــلايا الـمـخ ويـحــيـيـد الجـزيـئات الـمؤكـســدة الـضارة وخـصـائــصـه الـذاتية تـحـميه بـمـنـع نـمـو الـباكـتريا فـيه وتحـمية مـن الأكـسدة الـمـدمــرة وبالـتالى فــيه فــؤائد إســتئصال الباكـتريا والـفيروســات والكـلـسـترول الـضـار ومــقاومـة السـرطانات وتـنـقـية الـدم مـن الـحـديد الـفائض الـذى يـســبب أمـراض الـقـلب ويــخـفف مــن إمـكانات الإصــابة بألإلــتـهابات الروماتـيـزمــية المـفـصـلية. وفـيه فـايـتـامـين ب1 والـبوتاس والـنحاس والمـانـقـنيــز بــكـمـيات كـبـيرة جــدا وفـايـتـامـين ب3 ، وب6 ، وثلاث أخـر والـماغــنـيـزيوم بـكمـيات كـبيـرة وفـيه ثــلاثـة عـشـــر مــضادات فــعالة جــدا لتـحـطـيم الـجـزيئات الـمـدمــرة مـــع إنــزيــمـات مـفــيـدة ولــكــن كــل هــذه الــفـوائـــد تـنـقـلـب إلى عـــلل مــدمــرة بــمــجـرد تـحـمــير الـباذنـجان فى الـزيت حيث تفـســد المـكونات وتتشــبــع بالشــمعيات الدهـنية المـشــبعة الــتى تترســب عـلى جـدران الأوردة والشــرايين وتـرفـع الـضـغـط وتــؤثـر عــلى الـقـلب وخــير طــرق أكـله إمـا كـعـصـير، أو طــازج أو كـســلـطة بالخـل والليـمون والكمـون والبـقـدونس أو تبــويــخ بالـبـخار فى أناء داخـل حـلة بــها مـاء حـيـث أن السـلق داخـل الـماء يـغـسـل الـمغـذيات أو الشــواء لـفتره قـصــيرة (تـخـتـخــه) أو يـطـبـخ لـفتـرة قـصـيرة فى دمـعـة مـجـهـزة مـن قـبل

طبعاً الإستغربت ليهو اننا كسودانيين ماسكين في الحتة دي بس

Quote: ولــكــن كــل هــذه الــفـوائـــد تـنـقـلـب إلى عـــلل مــدمــرة بــمــجـرد تـحـمــير الـباذنـجان فى الـزيت

مودتي

سلامو يا ندي
عاجباني خالص تحيتك المميزة دي
يبدوا لي كده يا ندي انو السيد الوالد بكون صاحب مزمل ده
وبالتالي تمسكو بالقصة دي بتكون تماماً كتمسكي وياسر
الغريبة انو من زمن الوالد لي هسي الحال ما اتغير
وظل البتنجان هو سيد الموقف



غايتو ربك يهون
او كما قال بتاع الكارو
بكره بتهون القواسي
ويبقي عندنا كم بكاسي
مودتي ندي

سيف النصر
ايك ياخ ازيك

Quote: و سر المهنة هي أن تحمل الحبات بيدك و تضغط على جلدها واحدة تلو الاخرى بابهامك ضغطا رقيقا و لترى من ثم اي الحبات قد ترك ابهامك عليها اثرا فتلك هي الاطيب في غالب الاحوال فاخترها على بركة الله.

والله لكن يضع سره في بتنجانه
طيب لو لم يترك ابهامي أثراً وهو الغالب في سوق الله أكبر بتاعنا ده
نسوي شنو ؟

والله أضحكتني بخبرتك الخطيرة فيما يخص عزيل البتنجان

معزتي التي تعلم ياسيف

Quote: عليك يا خضر الناس دى تتاجر حتى فى الزى ده ؟؟؟؟

والله ياعثمان موسي انت راجل طيب شديد
ياخ ان لم يتاجر هؤلاء الناس في الـ (زي ده) شن تجارتهم ياصديقي
نحن لم يعد يهمنا الموت علي الاطلاق
وأصلو العمر كان درباً مشيتو كسيح
وكان غرساً سقيتو بكا وقبضت الريح



شفت كيف يعني عادي ناكل السماد المسرطن ونخلي البتنجان زاتو

مودتي ياصاحب

Quote: له المجد هذا الأسود ، لولاه لما طاب الطعام !

العزيز أمين
تحياتي

ياخ والله أنا معاك في حتة له المجد لكن قصة لولاه ما طاب الطعام فده حنك مفلسين ساي
ياخ الدنيا دي مليئة بحاجات سمحة خلاف المايتسماش ده .
مودتي

يتم اختيار الاسود وفقا لسواد ولمعان جلدته ولوزنه
كلما خفت وزن الاوداية كلما كانت اجود
وسلم لي ع البتنجان

غلو الملح
دسو اللبن
دسو العدس
والصلصة دسو الأسبرين
دسو المعايش كلها


(حميد)

إستقرار في اسعار البتنجان

المصدر: سوق ستة

حياتنا من غيرو سلللطة....






سلامو ياخ

وأكان شفت التلاجة ياخدر شيتن كبير بالحيل وكمان فيها التين والزيتون وحبيبنا الأسود ده متحكر قاعد في نصهم التقول بدو بيهو سورة في القرأن ,اها يازول عجبتني عزة الأسوداية دي وبقيت بيني وبين نفسي أشيل واخت وأقول ياربي الطماطم مردومة هناك لاتلاجة ولايحزنون ,والطماطم كوم وكمان البطاطس كوم تاني ,البطاطس البتغسل والبتمّر عند الخدرجية عندنا داك علي كمان الله مفروش بالشوال ,أها آ زول الشيلان والختتان ده وانا لسه ما عرفت الشيئ بايعنو بي بكم وبالكيلو ولا بالكوم ولا مجان زي الخدرجي اليّقلك شيل و الما شغال ليك الشغلة بشوال الأسود وياكافي البلاء كتير من خدرجيتنا ما بيهتمو حتى يطلعهوه من شوالو ومرات انت الزبون تفرتق الشوال وتشيل الدايرو , وطبعاً لآمن اتذكر الكلام وأنا واقف قدام التلاجة ورفّها الأنيق الشايل الشايل الأسود أتعجب زيادة , ولسه بقول الخواجات ديل أكيد قاعدلّهم فوق رأي ..

بجيك ونشوف رأيهم ..