Post: #1
Title: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-06-2010, 02:27 PM
Parent: #0
في كل الدراسات التي درسناها علمنا ان هدف الشركات هو الربح ...
وحتي الربح والدعم الاجتماعي هو ايضا ربح مجتمعي مقدر ..
ولكن ان تجد شركة تعمل في مجال الاتصال وتفتح فرصة الاتصال مجانا في اوقات الليل المتاخر فهل في ضياع الابناء والبنات بالسهر مكسب ؟؟؟
وان تعدي الامر باتاحة هذه الفرصة وتم استغلالها من شباب في مرحلة مراهقة ووجدوا فيها متنفس لما في نفوسهم كبت او حرمان فاصبحوا يتبادلون
ارق الاحاديث وانعمها وتخيل مافيها من غش وخداع في ذلك الليل والاهل نيام !!
وكيف يقومون باداء واجبهم الدراسي بعد ذلك السهر المضني والقاتل ؟؟
وحتي لا اظلم تلك الشركة واعني بها شركة MTN للاتصالات فقد اجريت استطلاع علي سبعة مدارس ثانوية بنين وبنات في مدينة بحري وكان الاستطلاع عن اي شريحة
موبايل يمتلكون ولم ؟؟
وكانت نتيجة الاستطلاع ان ما يفوق ال76 % يستعملون شرائح هذه الشركة ..
ومن الاستطلاع كان لم تستعمل هذه الشريحة كانت اغلب الاجابات تقول انها تعطيهم فرصة التواصل الليلي المجاني !!! 
|
Post: #2
Title: Re: توجد في السودان ,, هل هذه الشركة اسرائيلية ؟؟
Author: محمد البشرى الخضر
Date: 02-06-2010, 02:35 PM
Parent: #1
ياحاج كيف الحال
معقول اي مصيبة زمان اسرائيلية
الاتصال المجاني في الأوف ببيك نوع من البروموشن
وماتنسى انو ام تي ان بتحاسب بالثانية ودا مناسب اكتر مع الطلاب
|
Post: #3
Title: Re: توجد في السودان ,, هل هذه الشركة اسرائيلية ؟؟
Author: Hisham Amin
Date: 02-06-2010, 03:05 PM
Parent: #2
العوض
هذا الكتاب يحتوى على كل ما تبحث وتتساءل عنة
By way of deception
:.
|
Post: #10
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 01:36 PM
Parent: #3
لان الامر مخيف اخي هشام امين
وشكرا للافادة ..
|
Post: #4
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-06-2010, 03:10 PM
Parent: #2
حباب ودالبشري ومنور البوست ..
يا عزيزي الغالي ليس الموضوع موضوع تكلفة ولا حساب بالدقيقة ,,
المشكلة في انه اصبح الاتصال في اخر الليل مقلق للاسر بل ويجعل الرقابة صعبة علي الوالدين ..
ولا تنسي اننا في زمن لايرحم ولا يعطي للرحمة فرصة ان تعم ..
ولا اتخيل ان تقوم شركة اتصالات بهذا الامر تخفيفا للمواطن وتنافسا مع الشركات الاخري ..!!!
الا اذا كان خراب عقول الابناء وحرمانهم من التعليم ودفعهم للسهر هدفا مشروعا للشركة ..
ونقول شركة اسرائيلية لثقتنا بان من يريد تخريب العقول هي الشركات الاسرائيلية ولهذا نريد ان نعرف كنه هذه الشركة حفاظا للبيت السوداني
مما يراد به من تدمير ...
|
Post: #5
Title: Re: توجد في السودان ,, هل هذه الشركة اسرائيلية ؟؟
Author: Abureesh
Date: 02-06-2010, 04:52 PM
Parent: #4
الأخ العوض،
الشباب هم ليسوا الزبائن الوحيدين لهـذه الشركـة.. فهناك بقية المواطنين من الأعمار المختلفـة،
وفى ظل ضيق ذات اليد قد يؤجل كثير منهم الحديث مع الأسـر البعيدة فى الأقاليم لليل، أو من
يريد مناقشة أمور تجارية مع وكلائهم أو شركائهم، ويختتارون الليل لأسباب شتى.. فكيف تصـور زبائن
الشركة على أنهم شباب، ولماذا لم تشمل دراستك هـذه الفئات الأخرى من الأعمار وتسألهم عن اسباب تعاملهم مع الشركـة؟؟
ثم موضوع الطلبة، فلماذا تفترض أن أحاديث الطلبة هى بين الجنسين؟ وماذا عن من يريد المذاكرة مع
زميله فى الفصل عشيـة الإمنتحانات؟ أو البنت مع زميلتها (وهـذا هو الغالب) لأى سبب؟
يا أخى حسن الظن بالناس من حسن الظن بالله.
|
Post: #6
Title: Re: توجد في السودان ,, هل هذه الشركة اسرائيلية ؟؟
Author: عبدالوهاب علي الحاج
Date: 02-06-2010, 05:47 PM
Parent: #5
| Quote: انها تعطيهم فرصة التواصل الليلي المجاني !!! |
شيخ العوض
والله دي حسادة من جيلكم دا ... الحسادة الوااااحدة دي !!
وحقد كمان ايوة حقد عديل كدا يعني انتو زمان الواحد يتزبط بالبنطلون الصوف الاسود او التريفيرا والقميص النايلون الابيض وفي احسن الاحوال فرايحية بكون لبني فاتح ... وتسرح القجة لقدام والجزمة السوداء البوز والشرابات مرفوعة بلستك اللباس وتتريح بـ 555 وتطق المشوار لحلة الجكس وتتسكع بهناك وتعمل فيها جايبك الدرب وتتضهب شهر كامل ما تقدر تشوف الحنان الا المدارس تفتح ... جاي تعمل لينا فيها واعظ ؟
العيال ديل ياها دي ظروفهم وبيئتهم كان ما عاجبك اشتري ليك جهاز تشويش ... ونحن بسجمنا داك اخير من القبالنا الكانوا بقشروا بالحمير والقبالنا اخير من القبالهم ... ياخ زمن سيدنا نوح الجكس كان بشرّ ليك الزول 35 سنة شرة واحدة والمشرور كان ما زهج ممكن يستنى تاني 5 سنة لانو احتمال الجكس تكون راكبة ديناصور تعبان وكان اتيح ليهو وعرسها بعد ان يبلغ الرشد في المائة الثالثة بيعملو الدخلة وفق اجراءات امنية مشددة وقد يستغرق شهر العسل حولين كاملين لمن اراد ان ....
قال 76% قال
مسكولات ياعمك وFree اهم حاجة الشاحن يكون جنبك ...
المهم .
|
Post: #7
Title: Re: توجد في السودان ,, هل هذه الشركة اسرائيلية ؟؟
Author: منتصرمحمد زكى
Date: 02-06-2010, 06:19 PM
Parent: #6
بغض النظر عن اسرائيلية أو غيرو .. لماذا تفعيل الخدمة ليلا بالتحديد ؟
الشريحة المستهدفة هم الشباب وان استفاد من الخدمة آخرون .. شكرا المسلمي
|
Post: #16
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 03:36 PM
Parent: #7
لامانع من التسويق ولا مانع من استهداف الشباب للمستقبل فقط الا ترون انه يجب ان يكون هناك من رقابة من الدولة علي الاقل
في امر الاتصالات ؟؟ اليس مصلحة وعقول الشباب هي من تحتاج الرعاية ؟؟
ومنذ متي اصبح الولد ولا البنت في السودان يساهر لما بعد الساعة 12 ؟؟؟
شكرا منتصر ..
|
Post: #15
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 03:33 PM
Parent: #6
وهبة يا صديقي لم تعجبني اليوم لخلطك في الامور
زمن القجة ده زمنك انت والقدرك .
انا زمني اياهو ده علشان كده بستنكر واقول ده غلط مازي زمنكم والصفوف في نص بحري !!!!
|
Post: #11
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 01:54 PM
Parent: #5
حباب ابوالريش
Quote: ثم موضوع الطلبة، فلماذا تفترض أن أحاديث الطلبة هى بين الجنسين؟ وماذا عن من يريد المذاكرة مع
زميله فى الفصل عشيـة الإمنتحانات؟ أو البنت مع زميلتها (وهـذا هو الغالب) لأى سبب؟ |
ليس في حديثي افتراض في هذه النقطة تحديدا فانا اب واتناقش كثيرا مع الاباء وحتي الامهات فوصلنا لقناعة تبعد عنها شبهة اي شك ..
ومنذ متي يا اخي ابو الريش اصبحت تتم المذاكرة بالتلفون ؟؟
| Quote: يا أخى حسن الظن بالناس من حسن الظن بالله. |
من الجهل حسن الظن بمن اوقع نفسه في شبهات وتخفي عن الناس ..
|
Post: #8
Title: Re: توجد في السودان ,, هل هذه الشركة اسرائيلية ؟؟
Author: Ahmed musa
Date: 02-06-2010, 09:50 PM
Parent: #4
| Quote: ولا اتخيل ان تقوم شركة اتصالات بهذا الامر تخفيفا للمواطن وتنافسا مع الشركات الاخري ..!!! |
تخفيفاً الساعة 12 بالليل ؟؟؟؟
ياراجل ...!!!!
المؤسف أن كثير من الشركات بدأت تفكر في أي شئ
إلا المحافظة على قيم المجتمع ...!!!
والله دي اسرائيل قليلة عليها
|
Post: #9
Title: Re: توجد في السودان ,, هل هذه الشركة اسرائيلية ؟؟
Author: أمين محمد سليمان
Date: 02-07-2010, 02:46 AM
Parent: #8
سلام يا أبوعبير 
مجانية الاتصال ليلا القصد منها جذب شريحه مهمه من المواطنين - و اللي هم الطلاب - و ده شغل مشروع و عادي بإعتبار إنو MTN شركه ربحيه و من حقها أن تسعي لجذب الناس لشراء منتجاتها !
تربية أولادنا و بناتنا ما مهمة MTN يا حاج ! دي مهمتنا نحن !!!
|
Post: #12
Title: Re: توجد في السودان ,, هل هذه الشركة اسرائيلية ؟؟
Author: السيد المسلمي
Date: 02-07-2010, 01:57 PM
Parent: #9
| Quote: تربية أولادنا و بناتنا ما مهمة MTN يا حاج ! دي مهمتنا نحن !!! |
برضو ياخال الشركات دي بتقع عليها مسؤليات إجتماعية ..
ولايمكن تبرأتها أو رفع المسؤلية منها .
|
Post: #13
Title: Re: توجد في السودان ,, هل هذه الشركة اسرائيلية ؟؟
Author: Hisham Amin
Date: 02-07-2010, 02:33 PM
Parent: #12
المحير و الغريب فى الامر
انة السودان دة كلة (فكة) خييرب فجاة ووصل الى ما دون الحضيض
الله فى
|
Post: #14
Title: Re: توجد في السودان ,, هل هذه الشركة اسرائيلية ؟؟
Author: محمد عمر جبريل
Date: 02-07-2010, 03:02 PM
Parent: #13
سلامات يا حاج ...
الموضوع عندو علاقة بساعات الذروة .. ودائما بتكون الشبكة بتعمل بأقصى طاقة ليها بالنهار
عشان المكالمات بتكون كتيرة ومعظم الناس بتستخدم الموبايلات عشان تسيير الأمور اليومية
بالليل الشبكة ما بتكون مشغولة بالذات بعد الساعة 12 (بعد منتصف الليل ) يبقى من حق الشركة (تجاريا وتسويقيا)
إنها تعمل أوفرات زي دي بالليل عشان إنت بالنهار ها تكون شايل
نفس الشريحة وشغال بيها .. وها تضطر تشحن شريحتك .. دي منافسة يا العوض في سوق الله أكبر ده
لكن المحافظة على أخلاق مجتمعنا دي مسؤوليتنا نحن ..
في بعض الدول ممكن تشتري الشريحة ويدوك معاها واحدة تانية مجانا والكلام بين الشريحتين ديل بكون مجانا
والحاجة دي قريب ها نشوفها في السودان ..
تحياتي ليك وين ما كنت
|
Post: #27
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-08-2010, 08:09 AM
Parent: #14
مرحبتين بالاخ محمد جبريل
واسال الله ان يوفقنا لتحمل مسئولية الدفاع عن الاخلاق علي الاقل وسط بيوتنا ..
|
Post: #26
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-08-2010, 08:08 AM
Parent: #13
لسه يا هشام تقول حايخرب ؟؟
مقارنة بسيطة بالعشر سنوات الاخيرة لو انتبهت تعرف انه الخراب حصل وخلااااااص ...
|
Post: #25
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-08-2010, 08:06 AM
Parent: #12
شكرا يا ابوالسيد للتوضيح ..
|
Post: #18
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 03:51 PM
Parent: #9
امين الياسمين وينك ؟ وعبير بتسلم عليك وبتشكرك علي الهدية ..
ما قلنا حاجة خليها تسوق وتربح ومن حقها جلب وجذب الناس لشراء منتجاتها ..
نحن في تربية اولادنا ما بنقصر تب ومافي زول بوصوه علي تربية اولاده .. ولكن ما تنسي الشارع بربي والمدارس بتربي والتلفزيون بربي ..
يعني ولدك لازم يختلط بالمجتمع ولو ما اتعاونا علي نقاء المجتمع ومحاربة الدخيل والضار عليه ما بنصل لنتيجة مهما حاولنا تربية اولادنا ..
|
Post: #17
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 03:39 PM
Parent: #8
ده الواقع يا استاذ احمد ولكن من يسمع ؟؟ الاباء في شغل فاكهون والامهات في المطابخ يقبعون الا من رحم ربي ...
نريد ان ندق جرسا فهل من يسمع ؟؟؟
استاذي احمد خليك هنا وما تبعد ..
|
Post: #19
Title: Re: توجد في السودان ,, هل هذه الشركة اسرائيلية ؟؟
Author: خضر حسين خليل
Date: 02-07-2010, 03:58 PM
Parent: #17
حاج العوض تحياتي الحارة
هل بتفتكر ياعوض مثلاً لو منتزه المقرن العائلي عمل تخفيضات ليلية مستهدفةً بذلك شريحة الطلاب
هل معني كدة انها شركة اسرائيلية لأنهم يسعون الي خراب الاولاد والبنات .
شركة سوداني بتعمل تخفيضات شركة زين تقوم بالتخفيضات وعندي رسالة قاعدة هسي في موبايلي تم
إرسالها من شركة زين يخبرونني كعميل عن وجود تخفيض من الساعة 12 صباحاً حتي التاسعة صباح
(سهر ليل) .
وبعدين ده سوق مفتوح ومن الطبيعي جداً انو يكون في استهداف لشرائح محددة وتخفيضات كبيرة لزوم
البقاء فقانون السوق لا يرحم وانت أدري الناس بالسوق .
ببقي الكلام الخطير عن لماذا وقع اختيارك علي اسرائيل ، هل الاسرائيل وحدهم الذين يعملون لتخريب
عقول الأولاد والبنات ؟ أم تظل دوماً إسرائيل هي الحيطة القصيرة لتبريراتنا ؟
إتفق مع الاستاذ أمين انو قصة التربية دي ما مسؤولية الشركات لأنها في المقام الأول ما طارحة نفسها
في سوق الله أكبر كشركات تربوية ، بل شغالين كشركات استثمارية يستثمرون في نقة الناس وونساتهم التي لا تنقطع .
وبعدين ياخ مسؤول من الخير إنت الإستبيان العملتو ده عملتو بمناسبة شنو ؟
مودتي يا العوض
|
Post: #20
Title: Re: توجد في السودان ,, هل هذه الشركة اسرائيلية ؟؟
Author: العوض المسلمي
Date: 02-07-2010, 04:10 PM
Parent: #19
حباب خضر حسين والف مرحب بيك وبما اوردت من ملاحظات ..
فعلا لم يكن اختياري لاسرئيل عشوائيا ولكن بما ارتبط عندنا وبما كررته حكوماتنا عبر اجهزة الاعلام فان كل ماياتي من اسرائيل فهو ضار
ولهذا وتقريبا للفكرة وضعتها عنوان ولا اقصدها بالمعني الحرفي هذا للامانة والتوضيح ..
ولا خلاف عندي ان الشركات لاعلاقة لها بالتربية ولا الاخلاق ولم اطالبهم بدروس في هذا الامر وانما بما رائيته بام عيني ادهشني واراني نجوما وسط النهار
وكما تعلم اخي خضر انا والد لولد وبنت في المراحل الثانوية فما رائته او سمعته عن هذا الامر ومن معلميهم هو مادفعني لهذا الاستطلاع ومن ثم
فتح هذا البوست ..
مودتي وتقديري اخي خضر واتمني ان اراك قريبا ..
|
Post: #21
Title: Re: توجد في السودان ,, هل هذه الشركة اسرائيلية ؟؟
Author: خضر حسين خليل
Date: 02-07-2010, 04:23 PM
Parent: #20
شكراً أخي العوض لتوضيحك لكن بصراحة العنوان صادم ويخلع
سلمت
|
Post: #22
Title: Re: توجد في السودان ,, هل هذه الشركة اسرائيلية ؟؟
Author: Tragie Mustafa
Date: 02-07-2010, 04:57 PM
يا العوض معقوله بس؟؟؟
حسه كل العنوان العجيب ده اتاريه تخمين منك؟؟؟
يا حاج العوض و الله اسرائيل دي شغله ما شغاله بيكم.
يا اخي فوق ال 95% من شعبها لو قلت لهم السودان بيقع وين ما عارفنه!!
معقوله بس!!
وهبه احيك كتلتني بالضحك مكاواة للعوض.
ويا العوض يا ابو روح شبابيه كتلتني بالضحك برضو في ردك.
يا اخي انتو ناس لذاذا خلاص!
اها يا وهبه احتاج شيخ عوض بيكون انه بنعس قبل باقي الشباب ديل وما بيدقر يسهر
شوفوا ليه شركه تدي افورات زي دي بس بدري شويه عشان ينق زيه وزي باقي الشباب
ديل النقه الدقاقه(هههه)!!
لك علي اشوف لك شركه اسرائيله بحق يا حاج عوض تدي افورات زي دي طول اليوم
وخلي الشعب يشبع نقه(هي النقه بقروش)!!(هههههه)
|
Post: #23
Title: Re: توجد في السودان ,, هل هذه الشركة اسرائيلية ؟؟
Author: نوفل عبد الرحيم حسن
Date: 02-07-2010, 11:22 PM
Parent: #22
يحكي أن
الحبوبه ماره بالقرب من سرير الحفيده بعد منتصف الليل
كوركت لام البنت .. ألحقي بتك بتهضرب
رفعوا منها البطانيه . لقوها ماسكه التلفون وبتتكلم
سلامات يا مسلمي
|
Post: #24
Title: Re: توجد في السودان ,, هل هذه الشركة اسرائيلية ؟؟
Author: أمين محمد سليمان
Date: 02-08-2010, 06:35 AM
Parent: #23
Quote: برضو ياخال الشركات دي بتقع عليها مسؤليات إجتماعية ..
ولايمكن تبرأتها أو رفع المسؤلية منها . |
مافي شركه يا سيدنا عليها مسؤليه إجتماعيه ، الناس ديل شغلتهم يبيعو دقايق التلفون دي ، بعد داك كيفية إستعمال هذه الدقايق بتقع علي الناس البتستعمل التلفونات دي و أهلهم إذا كانو قصر .
بمنطقك ده ممكن نجرم أي شركه بتبيع أي سلعه لانو في ناس بيسيؤ إستعمالها .
|
|