غيمة الجن .. والبشر القشر

]

يا غيمة الجِن الجَوّاطه
رقرَاقه ودايماً مِنسَاطه
فوق ضهر الشوق آ مجنونه
خَرّاتِك ناصحه ومَحّاطَه
إندلي قُصادِك ضُلاَله
من زيفِك باقي المَلاّلَه
لاوَايَه لَدِيحَه وناتًاله
قَوّالَة عِينه
وسلبَاطه
بتخَرْتِي يقينِك بي ضراعِك
يا غيمة الشوق البِسراعِك
برّاحه يخونِك ويِتواطا
صهينتِي خَبارِك من جارِك
المطر النقرَش أوتارِك
لو نَوبتِك تَخَنِق حِس طارِك
يبقالِك فالِك ود كارِك
يتنسّم ضُلِك أخبارِك
لا بخْرَه تصيبِك
لا حوَاطَه
إندلي وحاتِك من سقفِك
بي مهلِك بِفتح باب أهلِك
تلقيها الدهشه بتندهلِك
تسقيكِ مِحايَة صُلاّحِك
يا بِكْرِي القهوه
السمّاطَه
ترميهُ بياضِك هبّابِي
كُليقة فرحة سَبّابِي
في سُوقِك
جالِب نُوق شوقِك
ربحَانِك قادِل ومِتصَابِي
مِنْدَرَوه دُروبِك
مَرْمَاطه
لو حرّة دَرَه بتنصرَا
كان ضارا صُرَارِك ما ضرّا
مفطومِك بِشرَق لو نومِك
صَحَالِك قلبِك بالفرّا
ما قَطَّ معينِك ما نَطّ
سَفسَطْلِك سِرِك حين حطَ
جادل بِك تِلَحَاً مُنحَطه
عادَل بِك خُرْجِك وما وطّا
فوق جمرِك صابر بِتوطّا
يا بِت القِبله
الربّاطَه
فَكَينَا شلولِك لو طولِك
ما سَهّج ماسِخ قلقولِك
لا وصلِك وصّل مرسولِك
لا كَتّف سِجنِك مسعُولِك
إتْبَرْبَح فرعِك من شوكو
إتشَرّف نيلِك محصولِك
يا فُقَرَا تجَابِد في نبقه
ما سَدّ يقينك جوع لَبَقَه
وزعتي سبَايطِك في باكر
ما بينِك وبينهم كم فرَقه
البشَر القَشَرْ النحس الهم
القَسَم العالَم
كم
طَبَقه
في بَربَخ بُوقتِك مركوزَه
آفات الدِقن المجزوزه
بي موسِك بقطع فانُوسِك
وِردَان الفِقَرْ المَحْزُوزَه
في كبدِك تَنتَح كاللدغه
الشِعْبَه الطوّل مركوزه
لو جِنّو مَصَرّم
ما اتبَكّم
يالجِنِك
ناراً ملزوزه.
يا
غيمه.

!!

يالها من غيمة .. ويا له من حوار .. فقط ينقصه الترجمة

يسلم يراعك أخي ابو حوه .. على بالطلاق النص ده يدوهو لي ولاد أختي في الخليج كامتحان ويقولو ليهم أشرح يقدو جت ..
ياخ أنا استعنت بي كتاب الراحل بروف عون الشريف قاسم .......... شاهق تقديري

يا شعر الجن

Quote: الأخ الشاعر / فاروق أبوحوه تحية الصباح المشرق الجميل ... يالك من رجل جميل .. مبدع بحق وحقيقه يتبعه الابداع اينما حلّ وارتحل ... واصل أخي فاروق وانثر لنا مزيداً من الألق في هذا المكان .. وارقد عافيه .... مع خالص حبي وتقديري ؛؛؛

الحبيب إدريس محمد إبراهيم
تحية المساء الأنيق ،،

أسعدني قولك يا رجل ،،
حد النشيد
وأتمني حضورك الجميل علي مكاتيبي
يشرفني ذلك جداً ،،

وأتمني أن أكون عند حسن ظنك


ممتن يا إدريس

كل الود

الموسيقار حمزه سليمان..

أكتر من جنكم؟

والقولب لهيب الشمس

ما كوش من الرقراق

يا صاحب..


( أمرق حاجاتنا يا مان)




عاطر التحايا..

Quote: يالها من غيمة .. ويا له من حوار .. فقط ينقصه الترجمة

منتصر يا ذكي:
سأقوم بشرح بعض ما جاء عاليه
ليس لأن الكلمات صعبة الفهم
ولكن لإنعاش الذاكرة التي أفقدها التغرب
بعض الكلمات التي توارت هناك في البعيد

Quote: يسلم يراعك أخي ابو حوه .. على بالطلاق النص ده يدوهو لي ولاد أختي في الخليج كامتحان ويقولو ليهم أشرح يقدو جت .. ياخ أنا استعنت بي كتاب الراحل بروف عون الشريف قاسم .......... شاهق تقديري

أخشي مثلك في أن يضرب الإستلاب نهي صغارنا هناك..

تصدق يا منتصر قبل كم يوم بسمع في أولاد يحاولون التمسك بسودانيتنا
كانوا يغنون محتفلين باستقلالنا!!! ، رائعة العطبراوي (أنا سوداني أنا)
يتمايلون ويرقصون رقصه خليجيه مشهوره (تلك التي يضعون (البسطونه) علي أكتافهم ووو.
قلنا ليهم الكلام دا ما بشبهنا .. قالوا: بالعكس دا التمازج وووو
غايتو بشر بس ربك إعين.
أو زي ما قالوا:
الفينا مشهوده
عارفانا المكارم
النحن (بنخوضه).!!!

غايتو..

كل الود يا منتصر

يا غيمة الجن الساساق ،،

يا ذات القدر الخلاك ،،

تتمادي وتمشي الرقراق..

متوزِع كَمك في كيفك ..

لا رحب بابك بي ضيفك

لا وفّر ضُلِك لا حاق.


في رجاك ..
إلي حين
(ضُل).

في رجاك ..

إلي حين

(ضُل).

ياااااا غيمه !!


أجمل ما قرأت على الاطلاق !!

جمال يصيبك بالذهول ..

:)



دمت بخير أستاذ فاروق ..

Quote: ياااااا غيمه !!

يا قيمه ياااااا !!!!!

Quote: أجمل ما قرأت على الاطلاق !! جمال يصيبك بالذهول .. :) دمت بخير أستاذ فاروق

دكتوره نبراس:

حضور يصيبني بالفخر والإعتزاز..

شكراً وأنتي تجملين المنبر ودفاتر شعري.



كل الود

....


لا إسم


لا رسم

.