Post: #1
Title: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا ؟
Author: حمد إبراهيم محمد
Date: 02-04-2010, 12:27 PM
Parent: #0
أهتم العرب من قديم الزمان بالقبيلة وفروعها وأنساب زعمائهم وفرسانهم وشعرائهم، فنجد في التراث العربي الكثير من الكتب التي سطرت في النسب والأنساب.
في محاضرة عن الرواية العربية للروائي السوداني العالمي الراحل المقيم الطيب صالح، ألقاها في منتدى بإحد دول الخليج العربية، قال خلال سرده لتاريخ الرواية العربية وشواهدها، "يا جماعة، السودانيون الخدر ديل عرب، والعربي معروف لونه أخدر، وهذا وارد في كثير من كتب التراث العربي والنسب والأنساب".
التعديل لإضافة حرف
|
Post: #2
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: حمد إبراهيم محمد
Date: 02-04-2010, 12:29 PM
أما كلمة (حلبي) فنطلقها نحن السودانيون على الشخص الأبيض، حتى أن السياسي والمحامي المميز مبارك زروق – يرحمه الله-، سأل أحد الشهود في قضية قتل، قائلا: ماذا تعني بكلمة (حلبي) التي وصف بها الشاهد المعتدي وكان أبيضا، فرد الشاهد بقوله: نحن أي واحد أبيض بنقول ليه حلبي، فقبلها زروق.
الشاهد في ذلك أننا نجد في القبائل العربية في السودان هناك الأبيض والأخدر حتى اليوم، (تاج السر وشادول) مثالا!!
والسؤال من أين أتت ونسبت ومتى استخدمت كلمة (حلبي)، ورديفتها كلمة (عربي)، وهل كلمة (حلبي) أو كلمة (عربي) الشائعة في السودان سبة وإستهزاء أم كلمة أستسهلها السودانيون لينهوا بها جدل طال؟
التعديل عشان خاطر شادول
|
Post: #3
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: عبد القادر شادول
Date: 02-04-2010, 07:39 PM
Parent: #2
| Quote: في السودان هناك الأخدر والأبيض حتى اليوم، (تاج السر وشادول) مثالا!! |
اعكس يا شيخ حمد واحد فيهم يا الاسم يا الصفة . انا حلبي يا اخدر انت ؟؟؟؟؟ الموضوع مهم جدا
و انا ما عارف اتلناس ديل بكهروني والا بحبوني قالوا انا دنقلاوي و قالو يهودي و قالوا حلبي و قالوا
اخدر وقالوا فلاتي وقالوا معارضة و قالوا حزب امة و قالوا شيوعي وش الله جلي
و قالوا محمد علي حسن و قالوا احمد الخاتم و قالوا انا... وانا... وانا.. بس الحمد لله ما قالوا انا...... المهم عرفوني انا شنو وانا منو كديس و الا قط و الا هر و ار بس و الا سنور و الا شنو عشان انا ارتاح و الجماعة يرتاحو و شكرا يا حمد الفيك اتعرفت تسوني حلبي في اخر عمري؟؟؟ الموضوع جميل جداو شكرا للتشبيه
|
Post: #4
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: كمال ادريس
Date: 02-05-2010, 04:03 AM
Parent: #3
| Quote: حمد الفيك اتعرفت تسوني حلبي في اخر عمري؟؟؟ |
*_* *_*
----------------------
التعديل لاستعدال الدهشة
|
Post: #5
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: حمد إبراهيم محمد
Date: 02-05-2010, 12:38 PM
Parent: #4
الأخوان تاج السر محمد حامد وعبدالقادر شادول، من ألد أخواني
عشان كدا أستشهدت بهما في هذا البوست، فهما من قبيلة واحدة
ومنطقة واحدة، رغم ذلك فتاج أبيض، يعني (حلبي) وشادول أخدر، وأنا
في ذات نفسي خاتف لونين من بطانة ود أبسن، وإبن عمي (حلبي) تب وما مركب
مكينة ولا شيء.
طيب أفتوني يا جماعة الخير، من وين جاتنا كلمة (حلبي) الماسكنها لكل زول
أبيض - سبة؟ هل هي مرتبطة بمدينة حلب السورية؟ طيب حلب السورية هي مدينة
جميلة وعظيمة وصناعية راقية ومدينة نبينا إبراهيم الخليل عليه السلام؟
إذا في شيء خافي قولوه وخلونا نقيف على البر، ما كل مرة يجينا واحد يقول
دا حلبي مركب مكينة القبيلة الفلانية وغيرها؟
تسلموا
|
Post: #6
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: عبد القادر شادول
Date: 02-05-2010, 03:47 PM
Parent: #5
شكرا يا جاهز مع اني بسأل ليس في دهشة و انما في ود حقيقي لاحظ نهاية الكلام والاستفسار تعلمنا ان ينتهي هكذا و الا شنو ؟؟؟؟ لك الود وز انت في غربة داخل غربة
|
Post: #7
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: Hayat Hussien
Date: 02-05-2010, 10:03 PM
Parent: #6
والله الاخوان في البيت الابيض بيقولو ليهو حلبي وبدلعوه ابو حيليب
|
Post: #8
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: حمد إبراهيم محمد
Date: 02-06-2010, 10:33 AM
Parent: #7
شكرا للأخ العزيز جدا شادول لأريحته - شكرا للأخ كمال ادريس لمروره ومشاكسته
| Quote: والله الاخوان في البيت الابيض بيقولو ليهو حلبي وبدلعوه ابو حيليب - حياة |
والشكر موصول للأخت حياة حسين لمرورها المفيد
ولا زال السؤال من وين جاتنا كلمة حلبي ومتى - وهل هي سبة أو تهوين وتهميش لشخص أو
مجموعة عرقية معينة في السودان ؟؟؟
أحسب أنها قضية تستحق البحث والمعالجة
سلمتم
|
Post: #9
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: حمد إبراهيم محمد
Date: 02-08-2010, 10:13 PM
Parent: #8
كلنا يعلم إن دولة السودان تمثل أمم متحدة، مواطنيها من عدة أعراق واجناس
ولغات ولهجات مختلفة... ماذا تعني كلمة (حلبي) اجتماعيا، عندما يصف بها أحدنا
الآخر؟
وهل هناك عائلات سودانية اصيلة، مازالت تعاني من هذه الكلمة المغيتة؟
وهل مازال هذا المفهوم يغتصب مساحة في مجتمعنا السوداني حتى الآن، على الرغم من
التزاوج والتناسل الذي أخفى الكثير من سحناتنا؟
سلمتم
|
Post: #10
Title: Re: إنتو يا ناس كلمة (حلبي) أبيض وفي المقابل العربي أخدر، جاتنا من وين، تاج السر وشادول، مثالا
Author: حمد إبراهيم محمد
Date: 02-12-2010, 12:52 PM
Parent: #9
ذكر لي صديق ان من يوصفوا بالحلب في السودان هم "الغجر"!!!
دعني أتساءل هل هناك غجر في السودان - وما مواصفاتهم
وماذا نعرف عن الغجر في العالم؟؟؟
ألا نعلم أن من الأسر السودانية الكبيرة من يرجع نسبهم لتركيا أو المغرب أو المجر؟؟؟
إن لم نناقش قضايانا الإجتماعية الحساسة بجرأة كبيرة، أحسب أننا لن نستطيع أن نبني
وطن جميل معافى يسع الجميع كما يقال.
سلمتم
|
|