كيف تعرف انه فات فيك الفوات

جاتني رسالة بالجوال بالطريقة الخليجية وحاولت اسودنها واضيف ليها من عندي

• كل ما تدخل البيت تطفي اللمبات وتفك الفيش بتاعة الأجهزة
• تبدأ دائما العزف علي نغمة والله زمان وأولاد الزمن دا
• ارتفاع المؤخرة قبل الرأس عند القيام من الجلوس على الأرض او الصلاة
• صعوبة لبس البنطلون واقفا واستحالة لبس الشراب في الوضع نفسه.
• الانزعاج من الأصوات العالية ومن لعب الشفع بالقرب منك
• تبدأ بجمع المسامير والصواميل المرمية
• لو أي زول دخل يده تحت مسند مقعد عربتك يلقي كمية من الاكياس الفاضية
• تبدأ تحس انه ركبك الاتنين لفت
• القلق من انه عيالك طالعين برة البيت وحيدوك السهر
• تلقي الشباب سكتو اول ما جيت داخل , ويتململو من طول قعادك معاهم
• اذا كتر توكيلك من الاهل والاقارب بان تكون وكيل العريس او العروس في عقودات الزواج
• تسمع نغمة انك في مقام الوالد كتير
• تكتر وفيات اهلك ومعارفك

اساسي
سلام
قدر ما احاول ازوغ من نقطة القاها بتنطبق علي
الحاصل شنو؟

الحاصل يا ناصر بعد دا تركز علي الشق الاخير في المقولة الشهيرة المنسوبة لسيدنا علي كرم الله وجهة : اعمل لدنياك وكانك تعيش ابدا واعمل لاخرتك وكانك تموت غدا

سلامات يا أساسي

واحد وأربعة وخمسة وتسعة حاصلات يكون لسة في أمل ؟

كلما يمر اسم واحد من جيلك تقول فان الله يرحمه

ضيعتنـــــــــــــــــــــا

يعني الواحد ينتظر مهرجان الإعتزال يا عمك ولا كيف

Quote: ضيعتنـــــــــــــــــــــا

تعرف ياعمران عندنا عم لينا قال يمش يزور صاحبو
في الابيض لانو ليهو زمن ماشافوا نظام الود بعد المعاش
عامل فيها خواجي وفكر يعيش باقي حياتو ...
اها بعد ما لاقى صاحبو بدت النقه بتاعت المعاشات ديييك
بالله قلت لي حسن صاحبنا اخبارو شنو ؟
عمنا يرد والله جاهو فشل كلوي ومات !!
طيب محمد احمد وين هسي ؟
عمنا يرد يديك عمروا صدمتو عربية !!!
لكن بالجد مشتاق لي عبد الرحيم هو هسي وصل وين ؟
عمنا يرد ماسمعت خبرو غرق في العباره المصرية بتاعت السنه الفاتت

صاحبو يصن مسافه
ويقبل عليهو ياخي انت قدر ما اسالك من واحد تقول لي مات انت قاعد راجي شنو ؟
عمنا يرد فضلت لي انت (وش شمتان في عمو)

البصاص

تحياتي يا أساسي

مالك علينا ياخ

نص الكلام الفوق ده لقيناه فينا

.

.

.


.

هسع كان في داعي لي جنس البوست ده ؟

يا بصاص ده بوست محبط ..
صاحبكـ تابع الحاجات الفوق دي وقارن بواقع الحال لقاها بايظة قال يحمينا النوم باقي الليل ده

والله موبالغه ياخى والله دازول مسلط اناغايتو بتنطبق على حكاية الاكياس دى بصوره مدهشه بس مااكياس صعود زى مافى حالة معظم السودانيين انا كلها اكياس سندوتشات صبوى وبعض كراتين ورق ماكدونالز خصوصالمن تكون مسافر
مره ركبت معاى واحده زوجة صاحبنا ومعاها بنية صغيره وقفنا العربيه فى المطار وسافرنا جينا بعد اربعه يوم لقينا ليك الناس ملمومه والكلاب البوليسيه والناس مكممه من الريحه قالو فى ريه كريهة زى الزول الميت طالعه من الباركن من واحده من العربات اتاريها البنية خلت سندوتشين بيرغر دبل جييز ولسه برضو بخت المصايب دى
لكن الحاجات التانيه دى لسه بدرى علينا يااخوى

يا بصاص ده بوست محبط ..
صاحبكـ تابع الحاجات الفوق دي وقارن بواقع الحال لقاها بايظة قال يحمينا النوم باقي الليل ده

يجازي محنك يا اساسي
اكان كده اخوك فات فيهو الفوات
الله يعين يا حبيب ودوام الحال من المحال
الموضوع ده هبشني والله وقعدت اضحك
لمن وقعت من الكرسي

الأخ العزيز أساسي
لك التحية والتجلة وعاطر الياسمين
يأخي إنت قاصدني عدييييييل كده
الشي نقطة نهرب منها مافي
حالتي ما تميت تستعطاشر سنة
مع خالص تحياتي
د. صلاح البشير

تعرف يا اساسي واحدة من أهم كواشف تقدم السن أن تصبح المشاهدة والأحداث تتكرر أمامك، فتخاطب نفسك دائما: الكلام دة قابلني قبل كدة، اول مرة سمعتو في منتصف التمانينات، وأظن كمان رسلو لي فلان في إيميل سنة 91، ووعقبت على محاضرة في موضوعو سنة 94.
وبهذه المناسبة بوستيك دة أنا قابلني زماااان كتبه جني تحت عنوان: الدهن في العتاقي والشجر الكبار فيه الصمغ اهداء الى عواجيز البورد
وآتي فيه بالطريف اللطيف ـ كعادته عندما يبتعد عن الحديث في الدين ـ
نقل ما يلي:
Midlle age is when a guy keeps turning off lights for economical rather than romantic reasons.

By the time you're 80 years old you've learned everything, you only have to remember it

The secret of staying young is to live honestly, eat slowly and lie about your age

Old age isn't so bad when you consider the alternatives

طبعا نقل ما نقله جني مع وجوده في الأرشيف ياتي من قبل خدمة العواجيز الذين يؤمنون بالمثل السائر (سفراً بالإيد برضو بعيد)، فقلنا نقربو ليهم.

ومواصلة لخدمة النقل التعاوني ، فقد كتبت في ذلك البوست مايلي:

الأخ جني: تحية طيبة، اسمح لي بإضافة التالي:
كيف تعرف أنك من العواجيز؟
ــــــــ أن يجتذبك عنوان هذا البوست وتعود إليه مرة بعد أخرى ولا تعلق!
_________ أن تظل تردد أن الشباب حالة نفسية!
ـــــــــ أن تعين زوجتك على النزول من السيارة!
_________ أن تحاول أن تغتنم الفرصة عندماتنحني لالتقاط شيء، وتبحث عما يمكنك أن تنجزه في تلك الحالة حتى لا تعود إليها قريباً.
ـــــــــ أن لا توفق لمعرفة معجون الأسنان الذي يمنع عددها من التناقص.
ـــــــــ أن تجد لك مقعداً في البص مهما كان ممتلئاً.
ـــــــــ أن تعجب بأقوال مأثورة من شاكلة: الدهن في العتاقي، والشجر الكبار فيه الصمغ.
ــــــــــ أن تنادي على ولدك في الغرفة الأخرى لتأمره أن يشغل المروحة في الغرفة التي أنت بها!
__________ أن تمضي وقتاً طويلاً تبحث عن الرموت كنترول، ولا تنهض لتغير القناة يدوياً.

الحمد لله .. ماف أي حاجة من كلامكـ دا منطبقة علينا!
يعني بالعربي كـدا: كلامكـ دا قولو لزول ما إندو هديده!

أساسي
3 من 13
أرجوك قول إنك راسب

Quote: Old age isn't so bad when you consider the alternatives

looooooooooooooooooooool

هههههه
البباري الزول دهـ ح يضيع

.....

Quote: الحمد لله .. ماف أي حاجة من كلامكـ دا منطبقة علينا! يعني بالعربي كـدا: كلامكـ دا قولو لزول ما إندو هديده

يا ود الصايم



الشنبر أكان ما خفَّ

معناتو ( الهديدة) ما خدمت

ولا مشاويرا قريبة شديد







تحياتى
أبو بكرى




....

أساسي


إنت كم شرط بنطبق عليك من هذه القائمة غير النهائية؟

أساسي


إنت كم شرط بنطبق عليك من هذه القائمة غير النهائية؟

يا اساسي
يا العملت دبلوماسي
ده سؤالك للجماعة
طيب وين موقفنانحن من الأعراب؟
اوعك تخاف
واها رايك شنو
هاك السؤال مني
( تعرفي كيف إنك لحقتي امات احمد؟)
اظن كدى ميه الميه

قصرت معاك .

وأول وآخر وأهم حاجة نسيتها...

نومة الكرسي..............





ست البنيــــــــــــات