لاياعزوز (جنة الاطفال)

كلنا تاميين كلنا تاميين وانشاء الله كمان دائما سالمين
يااصحابنا نجيكم ونزور مرة شايلين افراح فيها مسرة
وزهور ريحان وعطور ياسمين
ياجنة خلاص اتلمينا والاسرة اكتملت في مودة
الي ان تاتي
كانت لحظات مااحلاها
وفعلا كانت لحظات مااحلاها هذا البرنامج كانت له رسالة عظيمة وكبيرة وكنا ونحن صغار لانفوت حلقة من حلقاته
اخذت هذا العنوان من الفقرةالمحببة لنا جميعا في ذلك الوقت وهي بعنوان لاياعزور كانت تشد الجميع كبار وصغار وينتظرونها بفارق الصبر تري اين هم الان الدكتور عبدالباسط والاخوان يحي وعمر عبدالرحمن
البرنامج من تقديم المرحوم محمود الصباغ (الجد شعبان) وماما امال واخراج بدرالدين حسني
نواصل

التحية لكل من ساهم في هذا البرنامج من الاساتذة المعلمين والمربيين الذي نذروا حياتهم لنشر رسالة امنو بها وعملو من اجلها منهم من قضي نحبه حتي اخر لحظة من حياته ومنهم من نتمني له الصحة وطولة العمر
اهدي هذا لابناء المرحوم الجد شعبان الاستاذ محمود بشير الصباغ
ومن الشخصيات التي لعبت ادوار رئيسية في برنامج جنة الاطفال
الجد شعبان
ماما امال
ماما سهام (سهام المغربي)
ماما صفية (صفية الامين)
ماما امينة (امينة عبدالرحيم)
ماما عشة (عائشة سالم ) فقرةالرسم
جحا (سليمان حسين)
بريقع
السنينة
الحجاج (الاستاذ المرحوم عبدالعزيز عبداللطيف )
عوض حاج حامد (الفقرة الدينية طريق النور)
الثعلب المكار والحاوي والارجواز (الاستاذ الممثل متعدد المواهب يحي شريف)
فقرة الصور والاهداء نهدي الصورة لماما وبابا ولماما صفية والجد شعبان
زي مابقول اخونا عادل ابوجقادو دي ايام لها نعناع
ونواصل

تسلم يا متوكل
زكريات جميلة من الزمن الطيب
قبل 12 سنة تقريبا دخلت بابني المريض على احد اخصائي جراحة الاطفال
فاذا به عزوز بتاع جنة ااطفال
بيني وبينك كدة اول شي خفت وقربت ارجع
ولكن بحمد الله كانت عملية ناجحة وكان الشفاء على يديه باذن الله
ربنا يطراهم بالخير جميعا

تسلم اخي ناصر احمد المصطفي
وعزوز اصبح اخصائي اطفال يستحق منا كل التقدير والاحترام اين هو الان في السودان ام مغترب له منا التحية بقدر مااسعدنا
ولاياعزوز كانت تناقش مختلف القضايا الحياتية العامة وكانت كذلك تختتم بعبارتين اما لا ياعزوز او صاح ياعزوز

الله يخليك ياابوالعازة والفنان والممثل القدير محمد شهوان احد الذين ساهمو في هذا البرنامج الكبير

يا سلام يا متوكل رجعتنا لايام جميلة
حب الخير للناس تلقا الدنيا جميلة .... دي كانت في جزيرة الكنز لمحمد شهوان وكان معاهو العباقرة ديل
عبد الباسط سيد احمد ( عزوز )
يوسف خاطر ( الشاطر بلو )
بريقع
وبقية المجموعة
كمان منظار ابو الافكار مع محمد شهوان وكان معاهو محمد السيد
محمد السيد ويوسف خاطر ديل درسوا معانا في الاهلية وعزوز كان في المؤتمر
على فكرة برنامج الاطفال.... كل اللي كانوا فيهو تقريبا من امدرمان
التحية لهذا البوست الجميل واتمنى لو في واحد من المجموعة دي بوردابي يتحفنا بمداخلة

الأخ العزيز تكعيب متولي مالك
لك التحية والتجلة وعاطر الفل والياسمين
آه من أيام الزمن الجميل، د. عبد الباسط سيد أحمد (عزوز) ، أكاديمي نابغة من الدرجة الأولى زاملته في مدرسة المؤتمر ، له قدرات فائقة في الإخراج المسرحي، أخرج لنا مسرحية في إحدى نشاطات جمعية OMI وهي جمعية مشتركة (عام 1981) بين جمعية اللغة الإنجليزية بمدرسة أم درمان الثانوية بنات وونظيرتها بمدرسة المؤتمر الثانوية وجمعية أصدقاء المعهد العالمي البريطاني لتدريس اللغة الإنجليزية (وقد تشرفت برئاستها) وقدمت على مسرح المكتبة البريطانية بأم درمان، كان نشاطاً رائعاً، أبرز فيه الدكتور عبد الباسط قدرات مهولة، كانت المسرحية باللغة الإنجليزية، وقد حازت على إعجاب الجميع بمن فيهم السفير البريطاني وقتذاك. الدكتور عبد الباسط رجل متعدد المواهب ضل طريقة إلى الطب، وربما في اختياره للتخصص في طب الأطفال بعض العزاء.
أرسل تحاياي معبقة برائحة المسك للدكتور العظيم عبد الباسط
مع خالص تحياتي
د. صلاح البشير

الاخ متولي

سلام الله عليك
وشكرا لهذا البوست الرائع

اكيد انها ايام وذكريات لهذا البرنامج ذو اللون والطعم الرائع
التحية لكل من شارك فيه من اعداد وتقديم
والرحمة الواسعة لمن انتقل الي دار الخلود.

Quote: وعزوز اصبح اخصائي اطفال يستحق منا كل التقدير والاحترام اين هو الان في السودان ام مغترب

التحية لمستر عبدالباسط استشاري جراحة الاطفال
والذي كان لي الشرف في ان انهل من علمه بجامعة الخرطوم
د. عبدالباسط اعتقد انه حاليا بمانشستر (انجلترا).
ــــــــــ
التعديل لغرض تصحيح اسم صاحب البوست

تشكر يا متولي ,,
على هذا الدفق الحينين ,,

بالمناسبة ببحث من فترة عن نشيد من اناشيد جنة الاطفال في السبعينات اسمه لا لا ياقروية ,,

سلامات يامتولى صاحب الابداع



كلنا تاميين* كلنا تاميين وانشاء الله كمان دائما سالمين
يااصحابنا نجيكم ونزور مرة شايلين افراح فيها مسرة
وزهور ريحان وعطور ياسمين

*
التعديل لإضافة حرف

سلاماتى لصاحب البوست وكل المتداخلين والقراء

د:عبدالباسط السيد علي (عزوز) استشارى جراحة الاطفال في م.سوبا علي أخر مرة عرفت اخبارو 2009




د:سلافا العاقب

د. سلافا

سلامات
وشكرا لتصحيح المعلومة عن م. عبدالباسط

د. عبدالرحيم

سلام لي صاحب البوست
وضيوفه الكرام

يبدو أننا من جيل واحد يا متوكل
إعاد لنا الله الأيام الجميلة

الدكتور عبدالباسط مستقر بالخرطوم وعلى ما أعتقد إنه يعمل
بمستشفى سوبا الجامعي
فهو دفعة وصديق للزميل المختفي عن المنبر د. جهاد الغزالي صديقي
وزميلي بالمرحلة المتوسطة ( ببيت المال ) ومنها إنقسمنا بين المؤتمر
والأهلية الثانوية

ومن دفعتنا في المتوسطة وكان يساهم في هذا البرنامج أيضاً
عباس باعو وهو من أولاد حي البوستة

يأخي والله نفضت عن الذاكرة غبار الزمن
فبانت نسمات عطرة

لك التحية


إسماعيل حميم


.

الصف الثانى (بخارى) مدرسة المؤتمر الثانوية النموذجية (وركزو لى
كلمة نموذجية لاننا نكاوى بيها اولاد الاهلية و محمد حسين

عبدالباسط كان يجلس فى الصف الثانى عند مدخل الفصل ..
بينما جهاد الغزالى فى الصف الاولى من الجهة الاخرى ...

الشماشة ناس اسماعيل حامد وياسر سلمان جعفر وعبدالله حسن(عبود)
وشخصى الضعيف فى الصفوف الخلفية ...ناس ورا..

خلف عبدالباسط بكنبتين كان يجلس عباس حمدالنيل (الفتيحاب) وهو معانا فى كندا ..
مرة الاستاذ ساله ليه لابس قميص ملون وليس ابيض كما تقول اللوائح ..اجاب بكل هدوء ان القميص
اكلتو الغنماية ...للمفاجاة الاستاذ قبل العذر ...

اخر مرة قابلت فيها عبدالباسط عندما حضر لتعزيتى فى وفاة والدى عام 1983 بصحبة
زميله فى الجامعة وود حلتنا مصطفى كمال حمزة ..
التحية لهم الاثنين واتمنى صادقا يكونو بخير وصحة وعافية ...


شكرا متولى على البوست الرائع

بالرغم من انو الواحد متعود فى البورد على اسلوب
hit and run

الا انو حتما سيعود للبوست ده

الشكر اجزله لجميع المتداخلين هنا وتصورو قبل كتابة هذا البوست صحيت حوالي الساعة السابعة صباحا وطاف بخاطري هذا البرنامج وصرت اغني بمقدمة البرنامج وتذكرت كل الشخصيات التي كنا نحبها ونحفظها عن ظهر قلب
المرحوم اسماعيل خورشيد كنا ننتظره في شارع حي الامراء عند مروره ماشيا من منزله بالعرضة للتلفزيون ونطلب منه اخبارنا عن برنامج اليوم والسهرة وهو كذلك من المساهمين في برنامج جنة الاطفال
بابا فزاري والاناشيد واذكر اصطحابه لنا لاداء نشيد ماما لبستني الجزمة والشراب في برنامج جنة الاطفال وقد كنا في روضة ميدان الربيع

Quote: على فكرة برنامج الاطفال.... كل اللي كانوا فيهو تقريبا من امدرمان

أعتقد أن شمبات ساهمت بقدر كبير جداً في هذا البرنامج


نضال عبد الكافي

وأيضاً ما يُعرف بـ(المجموعة) وعلى رأسها عازف المندلين سليمان زين العابدين ومن أناشيدهم الكثيرة (ذكريات فيل).

متولي رجعتنا لذكريات جميله


انا تعلوب المكار ده كان مكرهني حياتي, كنت بشارك في البرنامج مرات بمشي مع بنت جيراننا فاطمه سيداحمد و هي كانت بتقدم ركن الاطفال في الاذاعه و من التصوير يبداء و يدخل ثعلوب انا بجعر و ببكي و المخرج يحاول يسكتني و يجيبوني و انا ببكي و التصوير يقيف و انا ببكي (وانا اعيط) و ارجع البيت و انا ببكي و احلم بالليل بثعلوب و اصحي ابكي و لمن بابا و ماما يقولوا لي خلاص ثاني ما تمشي وقت كله بتقضيه بكاء برضه ببكي. عقدتي من ثعلوب ما اتفكت لهسه :)

على فكره يا ناس هوي انا ما قدر متولي مالك. انا الكلام ده سنة اربعه و ثمانين و كنت في اولي ابتدائي :)

شكلي حاتدق الليله :)

الاخوين يحي وعمر عبدالرحمن وكذلك حلمي وحازم جاويش من ابناء الشعبية بحري ونشيد ماهي دنيتنا الجميلة كلمات التيجاني حاج موسي والحان يوسف حسن الصديق وكذلك وصفي كامل من المزاد بحري

ازيك يا متولي يا عزيز

والله اثرت فى~ لواعج الشوق والحنين لفترة من الزمان مازلت اتذكر تفاصيلها الرقيقة والدقيقة

انا امثل احدي اجيال هذا البرنامج جنة الاطفال وبدات فية وانا طفلة ذات الستة اعوام وحضرت زمن ماما امينة وجزء من حياة الجد شعبان

من جيلي الاستاذتان الاعلاميتان عفاف حسن امين وايناس محمد احمد وايضا مني السيد شقيقة الدكتور عبد الباسط (لا يا عزوز )

ومن الشخصيات الهامة جدا وتمثل ركيزة اساسية الموسيقار سليمان زين العابدين الذي انجبته شمبات الخضراء ملهمة الفنانيين

ارتبط اسم الموسيقار الخال سليمان زين العابدين بفقرة الاناشيد وكانت اناشيد بنات شمبات ذات طابع خاص حيت قدم سليمان عدة اجيال

بدات بجيل بنات خضر (محاسن وهندية ومني ) والبروفيسور وردة شكرة الله ومولانا بثينه عباس و( بنات فضل عبد القادر عفاف وعنايات

) وكانت الاستاذة نضال عبد الكافي متميزة ما اهلها لتقديم فقرة صور الاطفال لفترة من الزمن


والتومات المهندسات بنات ( حاج ابراهيم ثناء ورجاء )والاستاذه القديرة ثناء فضل وبنات اشلاق البوليس ايضا تومات ومهندسات ( وفاء وثناء ) ثم جاء جيلي واحفظ

هذه المجموعة الجميلة والتي شكلت دواخلي باشياء نبيلة ما زلت اذكرها - رجاء خضر المحامية مني ابراهيم و بنت العمة سناء محمد الحسن

ونجاة البشاقرة ونجاة علي و يسرا والمرحومه زينب بابكر وعلاء فضل الله مضوي وكانت كل المجموعات تعمل لهدة سنوات تقدم ابداع حقيقي

بطرق مدروسة واداء متفرد وبعدنا جاء ثلاثة اجيال رائعة وما زال الخال سليمان يثري مكتبة التلفزيون باروع الاغنيات يشاركه الروعة عبد

الغول وعبدالعظيم شمبات واولاد عثمان ابو فومة ودرماس فرقة موسيقية جميلة ومنسجمة ومعطاءة

كل واحدة فيهن الان تشغل منصبا هاما ومشرفا

سليمان زين العابدين اثري وجدان وذاكرة الكبار قبل الصغار بابدع الاعمال لحنا ومضمونا وكلمة واداء

ولعلها فرصة طيبة لاتحدث هنا عن الشعراء وعن الاجيال التي قدمها الموسيقار سليمان زين العابدين من اهم اعماله خواطر فيل ( قبضوني

ليه ) الذي يتغني به الان الفنان الكبير النور الجيلاني تقريبا حمالي سبعة اجيال من زهرات شمبات اثرت مكتبة الطفل بالكثير من الاعمال

التي لا تنمحي عن الذاكرة ابدا



وراجعه ليكم يا متولي واشكرك علي اللفته الرائعة

Quote: تشكر يا متولي ,, على هذا الدفق الحينين ,, بالمناسبة ببحث من فترة عن نشيد من اناشيد جنة الاطفال في السبعينات اسمه لا لا ياقروية ,,

اخي وصديقي
عمار عبدالله عبدالرحمن
فعلا هذا النشيد معبر جدا وهو من كلمات المرحوم عمر الضو من ابناء جزيرة توتي



لا لا الليلة ياقروية
انت ياقروية يا السمنتك بلدية
طوريتك الملوية ..زراعتك المطرية
وبين بنات الناس انت بس حوريّيّة

يا الله متين اشوف الخرطوم
وقالوا لي في الخرطوم البت
بتمشي للكوفير

يا الله متين اشوف الكوفير


لا لا الليلة ياقروية

انت ياقروية ما تغرك المدنية
إنت ما منسية والله انت غنية
بزراعتك المطرية وبهايمك المسقية


أحيي متين اشوف الخرطوم
يا ربي متين اشوف الخرطوم

قالوا لى في الخرطوم جنينة البلدية
وقالوا لي في الخرطوم الفُسحة بالعربية

يا ربي متين اشوف الخرطوم

قالو لى فى الخرطوم البت بتختار عريسه
وكمان كان دارت الدبله تمشى تقيسه

الاعلامية المتميزة
احسان عبدالمتعال
الحمدلله انو معانا بوردابية من ذلك الزمن الجميل وعلي مااذكر انو اخت عزوز مني السيد كنت المغنية الرئيسية في نشيد دنيتنا الجميلة واعتقد انها كانت عضوة في عقد الجلاد
اهدي ليك خواطر فيل
تحياتي لدكتور وليد والاسرة

الله الله على الزمن الجميل يا متوكل اخوي
تخيل سرحت بعيد ولم اعود إلا حينما نادتني بتي الصغيرة
يا بابا تعال افتح لي التلفزيون .

سعيد أنا كوني أنتمي لذلك الجيل الجميل وتلك المدارس
التي كانت تبث تعاليمها من خلال الشاشة البلورية
جنة الأطفال ومسابقة المدارس , ياخي الله يسعدك
بقدر ما افرحتني ونفضت عني غبار السنين .

الف الف شكر يا دفعة والتحية عبرك لكل من عبر
من هذا المكان الذي يفوح نداوة وجمال ولكل
من قدم عمل مشرف .

كنت ممثلا يافعا اعمل مع الراحل المقيم سليمان حسين ( جحا ) وكان ممثلي الكوميديا في ذالك الوقت مدخلهم للفن الضاحك فقرة (جحا)
ومنها يعبرون الى قلوب الناس ، وقتها كنت معجبا بفقرة (نحن انتو ) التي يعدها الفنان ـ الهادي الاصديق ـ وفقرة ( لاياعزوز) التي يعدها اروع الناس الراحل المقيم ـ عبدالعزيز عبد اللطيف ـ وكان بطلها ـ عبد الباسط عزوز ،حينها فكرت في عمل فقرة خاصة بي تتوجه لأطفالنا بطرح مشاكلهم عن طريق الكوميديا وكانت اصحاب اصحاب اصحاب ــ وهي التي لفتت عزوز لأعمالي وكان يناقشني بفهم عميق وهو صغير السن كبير العقل راجح الحكمة واعجبت بهذا الفتى الخلوق الحاد الذكاء واصبحنا آصحاب .اصحاب بجد ..وقدمته في اول عمل مسرحي لي للأطفال
( فاطنة الهندل عود الصندل ) الذي كتبناه انا والشفيع ابراهيم الفنان المسرحي المخضرم .
عزوز فنان مطبوع وموسيقي متميز وصاحب جماعة اجتمعوا في حب الموسيقى فكانواوهم صغار اول من كونوا جماعة للأستماع للموسيقى الكلاسيكية
وهم في ذالك العمر النضر . عزوز انسان يملك قلبا كبيرا واحساسا زاهيا وعقلا راجحا ,
سمعت انه في الشرق من العالم ـ استراليا ـ كنت طوال السنوات الماضية دائم البحث عنه مرة يقولوا في اجلترا مرة في استراليا
اتمنى ان نجده من خلال بوستك هذا
شكرا لكم اواصل ذكرياتي مع عزوز

استاذنا واالممثل القدير
محمد سني دفع الله
كان معاك اثنين رائعين جدا في اصحاب اصحاب ارجو ان تذكر اسمائهم
معك نناشد قراءنا او من يعرف مكان او وسيلة اتصال بعزوز المراسلة علي الايميل
[email protected]

متولى يارائع
كعادتك دائما تغيب وتجيب
البرنامج كان يمثل لنا فى وقتهااعظم شى فى التلفزيون
وننتظر يوم الجمعة بفارق الصبر لنشاهده
درس معنا من نجوم البرنامج فى الثانوى العام ود جحا (بريقع)
كنا ننظر اليه وكانه احد نجوم هوليودالان
نترقب حركاته ونسعد بالسلام عليه
فى إجازتى فى العام الماضي فى السودان وفى زيارة للحاج يوسف
وجدت خيمة عزاء ..قيل لى انها لاحد نجوم جنة الاطفال وكان هو (الحجاج)
الاستاذ عبدالعزيز عبد اللطيف رحمه اللة رحمة واسعة ورحم كل الممثلين الذين انتقلوا للدار الاخرة

وفى انتظار حضورك للدوحة شهر اربعة لنكون دائما تامين

يا الله يا متولى رجعتنا لزمن الابيض والاسود
ويوم الجمعة وكيف كنا بتسابق لترتيب ملابس المدرسة من بدرى
عشان ما يقفلو مننا التلفزيون

سؤال للاستاذة احسان عبدالمتعال تذكرى اسم البنت الكان بتغنى

الطيارة سريعة خفيفة .... سريعة
والطيارة سريعة حفيفة ... خفيفة

كل واحد لحزامو يشــد .....
نحن حنبدأ نطير بالجد ....

بنوتة خديره وشعرها ضفيرتين طوال بشرايط بيض


ماما عشة شاهدتها فى تلفزيون النيل الازرق الاسبوع الماضى ربنا يديها الصحة والعافية

آصحاب آصحاب
كانت فكرتها مجموعة من الأصحاب يقعون في مشاكل ياتي اخوهم الكبير وتحل المشكلة
وعندما قدمتها اخترت لها مجموعة من الأطفال كنت اعرف مقدراتهم الأبداعية وبديع موهبتهم
السعدني ـ هو محمود هلالي اخ الشاعر عزالدين هلالي وكان يمثل الفتى العاقل
محمد مدثر ـ ابن مدثر الريح مدير الفنون الشعبية الأداري كومديان حتى النخاع
سليمان الحاج سليمان والده الحاج سليمان وعمه المحامي احمد سليمان وامه الأعلامية والأستاذه هنية عبيد
عاطف جمال الدين الأخ الأصغر للفنان المسرحي والشاعر البروفسير عثمان جمال الدين
جمعتهم في بوتقة كانت اسمها اصحاب اصحاب
لهم محبتي ومودتي وهم الان في يقيمون في بلاد بعيدة متوزعين بين باريس وابو ظبي والأردن والسودان
وهم كبار في كل شئ الان لكم اعتز بهم وافخر

والولد ابو جضوم راس المشاكل الكان بشوت
كورة الشراب لامن تضرب تكسر قزاز الفضية
داك اسمو منو ؟؟؟؟

اسمو عبد الدائم كان راس هوس

ياخي عملتوا لينا ضربة قلب

واهتزاز في المخ

____________________________


استاذ السني

لمن كنا بنشوفك جنب بيت ناس قريبي الدكتور

عز الدين هلالي

بنحكي بي شوفتك يومين

ياخ مشتاقين والله

ولازلنايامتولى نذكر رغم مرور عشرات السنوات
حنان الصغيرة وهى تردد
امى ..أمي
امى حنينة ..حنانها علينا ونور عينينا
أمى الرحمة دوام قدامها
أمى الجنة تحت أقدامها
امى يا امى[

Quote: لمن كنا بنشوفك جنب بيت ناس قريبي الدكتور عز الدين هلالي بنحكي بي شوفتك يومين

ونحن الان فى الدوحة برضو لمن نشوف السنى جنب بيت صديقه الفنان نورالهادى فى مدينة خليفة
برضو بنحكي بشوفتو يومين

اخي ابراهيم قناوي

Quote: ياخي عملتوا لينا ضربة قلب واهتزاز في المخ

انحنا لينا يومين في ضربة القلب واهتزاز المخ من التحسر علي ذلك الزمن الجميل اضحكتني اضحك الله سنك
لاننسي الرسام الرائع ادمون منير والممثل القدير السميح والممثل القدير محمود سراج ابوقبورة والممثلة رابحة محمد احمد والبعيو

Quote: على فكره يا ناس هوي انا ما قدر متولي مالك. انا الكلام ده سنة اربعه و ثمانين و كنت في اولي ابتدائي :)

اختي دانيا بت المكي
سنة اربعة وثمانين انا مااتولدت زاتو ...... ولاشنو
متشكرين ومقدرين علي مساهمتك معانا

بقلم :
مايسة محمود بشير الصباغ
المنامة – مملكة البحرين

الــجـــد شـعــبان

مولده ووفاته

ولد المرحوم الحاج محمود بشير الصباغ في حي أبوروف (البحر) العريق بمدينة أمدرمان عام 1925م . ويرجع سبب لقب "الصباغ" إلى ان مؤسس العائلة الحاج محمد الصباغ كانت لديه مصبغة أيام عهد التركية السابقة في مكان جامع فاروق الحالي بالخرطوم ولأجل ذلك أشتهر بالصباغ ثم صار ذلك لقبا وإسما علما للعائلة .
ترعرع الجد شعبان في حي ابوروف منذ نعومة اظفاره ولم يغادره طوال حياته اللهم إلا خلال الإجازات القصيرة التي كان يقضيها احيانا وسط بعض ابنائه المغتربين في الخليج أو صحبة الفرق المسرحية التي كانت تسافر إلى الأقاليم داخل السودان ... ولكنه بوجه عام عرف عنه ارتباطه الروحي الوثيق واللصيق بالسودان وحي أبوروف. فكان لا يرضى عن وطنه بديلا ولا يحتمل الغياب الطويل عنه.
ثم شاءت الأقدار أن ينتقل إلى رحمة مولاه وهو على السرير الأبيض في مستشفى المفرق بإمارة ابوظبي يوم 14 من شهر أبريل للعام 2007م .. بعد أن قام أبنه الأصغر "مدحت" المقيم في أمدرمان بنقله من مستشفى البراح بالسودان إلى مستشفى "المفرق" بمدينة أبوظبي لاستكمال علاجه الذي بدأه في الخرطوم بحري... ورغم الإمكانات الهائلة التي يتمتع بها مستشفى المفرق بأبوظبي ، ورغم توافر الطاقم الطبي والتمريضي العالي الكفاءة والخبرة والاهتمام والرعاية الخاصة التي وجدها هناك ، فإن قضاء الله المحتوم جاء بعد دخوله مستشفى "لمفرق" بثمانية عشر يوما ، وقد حرص أبناؤه في أبوظبي على نقل جثمانه إلى السودان ليوارى الثرى وسط أهله وعشيرته وقرب والده ووالدته ومن سبقه من أشقائه وشقيقاته في مقبرة أحمد شرفي بأمدرمان المدينة والأرض التي أحبها. وكانت قطعة وثمرة من فؤاده حيث نشأ وترعرع طوال حياته . وحيث لا يجوز لمن كان عطاؤه لأجل بلده بهذا المقدار ولمن كان بمثل قامة الجد شعبان أن يـواريه ذووه في غـيـر تـراب وطنه الحبيب مهما تكبدوا في سبيل ذلك من مشاق.
لقد نشأ والدي رحمه الله يتيم الأم حيث انتقلت إلى جوار ربها وهو لا يزال طفلا . وتولت تربيته ورعايته شقيقاته عمات المحنة والمجمّة "عيشة" و "بتول" و "التومة" رحمهن الله جميعا. فكان لذلك أثره العميق في أن شب على علاقة لصيقة بهن وببقية أشقائه "خليل" و "سيد" و "علي" وشقيقته "أم الحسين" أطال الله عمرها. فكان لهم طوال حياته نعم الشقيق ، وبمثابة الإبن البار. وكان لأبنائهم وأحفادهم بمثابة الأب والجد الحنون الذي يجعل حل مشاكلهم من أولويات اهتماماته مثلنا نحن أبنائه تماما دون فرز.
ولا يفوتني الإشادة بدور زوجته الفاضلة الوالدة الموقرة (ليلى القوصي) التي وقفت إلى جانبه في السراء والضراء. وكانت المشجع والدافع للعديد من إنجازاته وعمله وإبداعاته الفنية التي كان يقدمها دون مقابل مادي. وإنما فقط من أجل إثراء الحياة الفكرية في السودان لإيمانها العميق بسمو رسالته ، أطال الله في عمرها المديد.

برامج الأطفال

كان أكثر اهتمام الوالد محمود الصباغ في هذا المجال منصب على تقديم شخصية الجد شعبان. ولكنه إلى جانب ذلك كان يتولى مهام الإعداد والإخراج والتأليف للطفل .. وقد شهد لدوره ونكران ذاته الممثل القدير "بريقع" . حيث ذكر في مداخلة كتابية خلال برنامج "عزيزي المشاهد" من تقديم المذيعة اللامعة "إيناس محمد أحمد" مافيه أشادة مشكورا عليها بدور الفقيد الكبير في ترقية وإثراء برامج الأطفال. وأنه كان يواصل عمله في هذه البرامج بكل ما يمكن تخيله من خصلة نكران الذات. ولدرجة أنه كان يقوم بتاليف العديد من التمثيليات والأعمال وإخراجها دون أن يذكر إسمه . وكان ملحنا موهوبا ويتميز بصوت جميل وقدرات فائقة في مجال الخطابة والإلقاء . فكان يقوم بتلحين القصائد الدينية لتلاميذه في المدرسة. ويكتب النصوص بأسماء مستعاره (بناء على رغبته) ويجري تقديمها في الإذاعة والتلفزيون دون أن يطلب أجرا أو حقوق أداء . والسر الكامن وراء ذلك هو أنه رحمه الله كان غزير الانتاج ةمتعدد المواهب ويكتب الكثير الكثير من النصوص ويخرجها. وكان يرى أن في تكرار إسمه على العديد من إنتاجه الغزير قد يشكل نوعا من الإحتكار لإسمه وكأنه يفرض هذا الإسم على خريطة البرامج اليومية والدورات الإذاعية والتلفزيونية أو على خشبة المسرح ..... فهو في حقيقة الأمر كان من أولئك الرعيل الأول الذي لا تهمه المادة ولا يسعى للشهرة بقدر ما يهتم بأداء رسالته كإنسان مبدع موهوب ووضع هذه الموهبة والقدرات تحت تصرف المجتمع ومصلحته. وليس سرا أنه رحمه الله كان يعمل مخرجا خلف الكواليس في برامج الأطفال بالتلفزيون مساعدا للمخرج بدر الدين حسني وذلك حسب ما ذكره الممثل "بريقع" في مداخلته المذكورة خلال برنامج "عزيزي المشاهـد".

وتبقى شخصية "الجد شعبان" .. أو كما يوصفه أصدقائه ومحبيه ومعجبيه وتلاميذه بأنه (جد السودان كله) هي الشخصية النمطية التي أبدع فيها وارتبط بها وارتبطت به .. ولقد قدم الفقيد تجربة الجد شعبان في عام 1964م. وللأمانة والتاريخ فإن هذه الشخصية كما ذكر لنا الفقيد كانت من ابتكار المخرج "أحمد عاطف".
وقد كان للعديد من الزعماء السياسيين والإعلاميين الرواد في السودان علاقات وثيقة الصلة مع والدي رحمه الله. وكان دائما يذكرهم أمامنا بالخير . ويعدد مآثرهم ووقوفهم إلى جانبه. وأذكر منهم على سبيل المثال السيد الإمام الصادق المهدي .... و البروفيسور علي شمو ، و د. إسماعيل الحاج موسى ، وميسرة السراج ، وفراج الطيب ... وكان له من الأصدقاء المقربين المرحوم "عثمان حميدة" الشهير بـ "تور الجر" ..... وكذلك من عملوا معه في برامج الأطفال "صفية الأمين" المشهورة بلقب "ماما صفية" ... وأمينة عبد الرحيم ، و سهام المغربي.

Quote: انحنا لينا يومين في ضربة القلب واهتزاز المخ من التحسر علي ذلك الزمن الجميل اضحكتني اضحك الله سنك لاننسي الرسام الرائع ادمون منير والممثل القدير السميح والممثل القدير محمود سراج ابوقبورة والممثلة رابحة محمد احمد والبعيو

يا سلااااام يا متولي ياخ

والله الواحد بقى يهضرب عديل كدة

ديك ايام لها نعناع كما قالوا

شكرا لإنعاش الذاكرة يا وريف

Quote: ونحن الان فى الدوحة برضو لمن نشوف السنى جنب بيت صديقه الفنان نورالهادى فى مدينة خليفة برضو بنحكي بشوفتو يومين

ده كان زمان يا معاوية ياخ

لكن تاني كان شفناهو ما بنحكي بيهو

بنكنكش فيهو سااااااااااي

وناخد لينا كم صورة

واحدة منهن للبروفايل

وكدة الصورة تحكي بدلنا

مش فكرة بالله؟؟؟؟

______________________

شكرا لك اخ معاوية

والتحية للأستاذ القدير

السني دفع الله

Quote: وتبقى شخصية "الجد شعبان" .. أو كما يوصفه أصدقائه ومحبيه ومعجبيه وتلاميذه بأنه (جد السودان كله)

تشرفت برؤية الجد شعبان عيانا بيانا

سنة 1986م عندما زارنا كمشرف تربوي

في مدرسة بحري الأميرية 2 المتوسطة

وكم اعجبنا به على الهواء مباشرة

كإعجابنا به من خلال الشاشة البلورية

أو أشد ...

________________________

ألا رحمة الله على جدنا شعبان ونسال الله

أن يبارك في ذريته والتحية لإبنته مايسة

وياريت لو يقوم اهله بجمع منتوجه

حتى نعرف عنه اكثر واكثر

والتحية لك أخي متولي

فقد فتحت باباً لا يوصد

الاخ عبد الدائم سيد احمد

البنت البتغني الطيارة سريعة خفيفة اسمها نجاة بتغني مع مجموعة الملحن القدير التيجاني عيسي وهناك ملحن اخر هو استاذنا

التيجاني محمد احمد شقيق الاستاذ الملحن والموسيقي الخال (عبيد محمد احمد كما يحلو لآهل الفن منادته ) وابرز مجموعة التيجاني عيسي هي

نور الان تغني مرافقة للفنانيين الكبار (اخر عهدي بها )

ومن مجموعة الموسيقار الكبير الاستاذ يوسف حسن صديق اذكر اميز الاصوات مني السيد شقيقة عزوز وسجلت شريط ( وا اسفاي )مع الفنان الكبير

وردي ومعاها ايضا ضمن المجموعة انهار وشقيقها حازم وهم نفسهم والملحن بالاضافة للشاعر الكبير الاستاذ قاسم الحاج ابدعوا نشيد دنيتنا

الجميلة

راجعة ليكم

يا سلام يا ستاذ متولى لا يا عذوذ

حقيقتا التحيه ليهم جميعا وكل من ساهم معهم من مهندسين ومخرجيين

يا سلام جنة الاطفال فعلا كانت جنه وهى مزروعه فى دواخلنا
وكان الكل صفير وكبير يوم الجمعه الصباح فى انتظار جنة الاطفال
وفى انتظار اغنية خواطر فيل ( لاياعزوز )

و اغنية خواطر فيل كانت الاصليه بغنوها اطفال حلوين وبعد داك غناها
النور الجيلانى

شكـر للوفاء يا ستاذ متولى

الشكر للمتداخلين
هاشم احمد خلف الله
وانا لسعيد لسعادتك يادفعة كذلك
صديقي معاوية محمد الحسن
تذكر اسم بريقع شنو الاول الاخيدر لانو اخر من لعب دور شخصية بريقع هو عمر عبدالرحمن ود الشعبية بحري
عبدالدائم سيداحمد تشكر علي المساهمة
الاستاذة محاسن
من منا لم يستمتع بحلقات جنة الاطفال في ذلك الزمان والبرنامج كان يبداء بعد الفطور وقبل صلاة الجمعة ونظل متسمرين الا ان ينتهي بفلم كرتون اما توم اند جيري او وودي وود بيكر او بق بانسر

مفاجاة من العيار الثقيل ستفرحنا وخاصة محمد السني دفع الله
مش حاتقدر تغمض عينيك

عبد الدائم وينك ما ظهرت تاني ربنا يخلي ليك الأمورات الحلوات لابسين البمبي
وينك يامكاوي
ياخي عزوز صديق روحي واخو فؤادي
بحثت عنه في كل ارجاء الدنيا
لو جبتو لينا تكون كفو
وماليك مثيل
قلت لي لمن كنت بتشاهد برامج الاطفال كان عمرك 3 سنوات
ربنا يديك طول العمر

Quote: اتمنى ان نجده من خلال بوستك هذا شكرا لكم اواصل ذكرياتي مع عزوز

Quote: ياخي عزوز صديق روحي واخو فؤادي بحثت عنه في كل ارجاء الدنيا لو جبتو لينا تكون كفو وماليك مثيل

اخي محمد سني دفع الله
جبتو بس لازم تحكي لينا عن ذكرياتك مع عزوز
رجاء راجع الماسنجر
بعدين كلم الناس الفوق ديل انا متولي وليس متوكل

واصل يا رائع

وعرفنا كمان حاجة جديدة افراح وانوار زاهية سعيدة
وحكم وروائع وطرائف ونوادر وحكاوي جديدة
ياسلام ياسلام ياجنتنا
اتصل بي صديقي صلاح صاموطي بمجرد فتح البوست وقال لي عملت لي رعشة وتنميل في جسمي وقد كان اول من قراء البوست وقال لي البوست سوف يصادف هؤي في نفوس الكثيرين وهو صديق ودفعة عزوز
والاسم الكامل لعزوز هو عبدالباسط سيد علي عبدالرحيم ويعمل الان اخصائي اطفال بمستشفي سوبا ولديه عياده بمستشفي فضيل
لك الف تحية ياعزوز بقدر ما ادخلت الفرح والسرور الي قلوب الاطفال في ذلك الزمان
موعودون بمعلومات زاخرة من عزوز كما وعدني

الثعلب المكار والممثل صاحب المواهب المتعددة يحي شريف وكان معاهو واحد اعتقد انو اسامة حسب الدائم اخ الفنان اسماعيل حسب الدائم وكان يؤدي الشخصية بصوت مميز جدا
يحي شريف كذلك قدم شخصية الاراجواز وابدع فيها وبكي واضحكنا كثيرا
كذلك قدم الحاوي وابدع فيها
التحية ليحي شريف وهو من المواصلين الي الان في برنامج الاطفال متعه الله بالصحة والعافية

تحية طيبة لكل المتداخلين

فعلا ذكريات لها ايقاع في النفس و مشاركة بيسطة عن الاخوان عمر و يحي عبدالرحمن عبده فهما من اولاد الشعبية بحري الاخ عمر كان مقيم لفترة طويلة في ابوظبي وحاليا رجع للسودان وهو متزوج وله اولاد اما اخوه يحي فقد توفاه الله قبل فترة ليست بالقصيرة وهو في ريعان شبابه في ليبيا له الرحمة واالمغفرة

طـــه بجو

لك الشكر الجزيل اخي طه بجو
ونترحم علي روح يحي عبدالرحمن ونسال الله ان يجعل الجنة مثواه

سوف نتحدث عن الاناشيد في جنة الاطفال وكيف كانت تودي رسالة عظيمة للاطفال ونتطرق للشعراء والملحنين الذين كتبو هذه الاناشيد

خواطر فيل
كلمات : حسن بارا

ألحان : سليمان زين العابدين


قبضوني ليه جابوني ليه
عاوزني أعمل ايه هنا
ختوني في قفص كبير
جابوني مسجون ليه أنا
أنا ما عملت هناك شيء
بيه اتسحق هذا العناء
ما عرفت قط في دنيتي
غير اللعب والشيطنة
قبضوني ليه جابوني ليه
حرموني من طعم الهناء
أمي العزيزة هناك تكوس
ما عارفة أبداً وين مشيت
قايلاني حايم بالشجر
زي عادتي كلما اختفيت
المرة دي الموضوع خطير
في حياتي مثله أنا ما رأيت
قبضوني زي مجرم كبير
ما قدرت أزوغ حد ما جريت
قبضوني ليه جابوني ليه
حبسوني ليه أنا ما دريت
خالفت أمي قعدت أحوم
جاهل الأمور الخافية
قبضوني جابوني الحبس
حرموني خيرات وافية
يا يمة وين نلقى الشجر
وألقى المياه الجارية
وألقى الصحاب نلعب سوى
في صحة طيبة وعافية
قبضوني ليه جابوني ليه
حرموني تلك الحياة الصافية
في انتظار البقية اخي متوكل

....... دنيتنا الجميلة
....... قروية
...... اربعة فصول في السنة
........
يلا اتحفونا يا جماعة بالاناشيد دي

Quote: على فكرة برنامج الاطفال.... كل اللي كانوا فيهو تقريبا من امدرمان

تلك فترة خصبة في اذهان العديدين هنا بالمنبر،وشكلت وعي لمن هم الان رواد هنا
فقد شكل البرامج وطريقة اعداده اعتبار لكل فئات الاطفال العمرية،لذلك رسخ في اذهاننا
بل حتي طريقة الالحان للاناشيد من المبدع بابا فزاري،تتطبعت فينا،وصارت مقياسا لدرجات
تقبلنا للاغاني في كبرنا. مقاييس المبدعيين كانت مختلفة في ذلك الزمان النضير
انتقاءهم ودخولهم للتلفزيون،كان يتم وفق معايير صارمة،لتفريغ ابداعاتهم،وتعبير ذواتهم
المبدعة.
فعندما اجلس القرفصاء مع طفلتي،امام برامج الاطفال في البي بي سي،استعيد ذكريات برامج جنة
الاطفال،والجد شعبان وعزوز وجحا،الذي مات كمدا،بموت فلذة كبده في حرب الجنوب اللعينة.
وللمتدخل الذي اشار فوق،اقول الابداع لا يعرف مدينة او قبيلة،تلك موهبة يهبها الخالق
هكذا،محمود عبد العزيز وصديقه وصفي،من ثمار تلك الفترة،وطبيعة الابداع يتاتي متدرجا
بالصقل والمثابرة،المغفرة والرحمة لمن توفاهم الله من معدي برامج جنة الاطفال،والصحة والسؤدد
للاحياء منهم. وتشكر صديقي متولي علي بوستك،فانت دائما تتحفنا بالروائع لزمان نضير
ودمت ومتداخليك محبتي وسلام.

هذا النشيد فاز بالجائزة الاولي في الاردن وهو من كلمات الشاعر يوسف حسن

بدري صحيت من نومي فرحت
مشيت علي أمي و أبوي ًصبحت
شربت الشاي بكل لطافة
وبين أخواني كنت قيافة
أنيقة في لبسي و كلي نظافة
وكانت جنبي صديقتي سلافة
شلت معاي أقلامي و كتبي
ما أتاخرت مشيت في دربي
والأخوات حلوات في قربي
بكرة نجاحنا عليك ياربي
وصلت المدرسة ما تأخرت
وكنت سعيدة عشان ذاكرت
سمعت الحصة و ما سرحت
وآخر العام أنا فزت نجحت..

سلامات متوكل

وذكرياتك جميلة

هاك بس الصوت ضعيف شوية

Quote: وللمتدخل الذي اشار فوق،اقول الابداع لا يعرف مدينة او قبيلة،تلك

الاخ الفاضل لم اقصد ان انسب الابداع لمدينة امدرمان ولكنها الحقيقة فيما يخص من عملوا في هذا البرنامج الناجح .... مالكم لا تنظرون الا من تلك الزوايا ؟؟؟؟

اخواني
الفاضل - محمد الجيلي - جمال
لكم كل تقديري علي المشاركة الفعالة وتسلمو
نشيد دنيتنا الجميلة
كلمات التجانى حاج موسى
الحان الموسيقار يوسف حسن الصديق

ماهى دنيتنا الجميلة
شوفو دنيتنا الجميلة
بوديانها وصحاريها ونخيلها
بأنهارها وباشجارها الظليلة
أربعة فصول فى السنة
بمرو عبر الأزمنة
الشتا والصيف ، وربيع وخريف
وده بيحصل كيف ؟
ماهى دنيتنا الجميلة
أى واحد لو فكر وقدر
عظمة الخالق بتظهر
يبقى واجبنا العلينا
نبتهل نرفع أيدينا
ونعمل المفروض علينا
ماهى دنيتنا الجميلة
الشمس كل يوم بتشرق
أصلو ما اتاخر شروقها
فى العشية تسيبنا تغرب
روعة سبحانو البسوقها

نشيد دنيتنا الجميلة


< width="425" height="344">

له الرحمة ابننا
يحي عبدالرحمن
لكم ابكيتني
حزن عميق وخفوت
له الرحمة والمغفرة وجنة عرضها السماوات والارض

رجعنا بعد ما الهكرز لبت يااخي عذبتنا

شكرا







ماما عشة

علمت عبودي وابوه الرسم

الراحل محمود الصباغ ( الجد شعبان ) تغشاه الرحمة .

متابعين بشغف أخي متولي

التحايا النواضر لك ولكل المشاركين

نشيد التلفون

يلا يا اصحاب نضرب تلفون
تلفون ..... تلفون
الو .... الو .. الو
مين ... مين فى الخط
خالد ... ابدا" ابدا"
احمد ... ابدا" ... ابدا"

الاهداء لاحسان عبدالمتعال


حبوبتى كانت بتقول اول ما السنى يظهر فى اصحاب اصحاب
اها اها اها اب جضوم جاء
غيرو هو البيوقد النيران منو ...

لكم جزيل شكري اخوتي
عمر - عماد - ياسر - عبدالدائم

Quote: حبوبتى كانت بتقول اول ما السنى يظهر فى اصحاب اصحاب اها اها اها اب جضوم جاء غيرو هو البيوقد النيران منو ...

ياعبد الدائم حبوبتك ولعت النيران زمان وانت حاتولعها الان اضحكتني كثيرا