Post: #1
Title: ساندرا بولوك .. المحسية بت اللزينا .
Author: Emad Abdulla
Date: 01-28-2010, 09:37 AM
Parent: #0
حسناً ..
عندي ما يُشبه اليقين أن ( ساندرا بولوك ) تتربص بي .
و .. أظنها محسية .
...........
تتنزل صفيحة سماء الصيف فوق رأس المدينة الخليجية الساحلية البعيدة ، فاعرف يا رعاك الله حينها أن صالات انتظار البنوك الإستثمارية هي الأكثر برودة من ( نخرة كلب ) . قلتُ بذلك و استأنستُ للقول ، مضيتُ من فوري فدخلتُ إلى صالة البنك الإستثماري الفخيم في الشارع التجاري - الفخيم أيضا - بوسط المدينة التي تخاصر البحر . أنضح عرقاً كنتُ جراء تفاقم الصيف و أنشوطة ربطة العنق و ربطة الروح و كافة ربطات و عقد لوائح العمل الملزمة لمخلوقٍ مطلوق القيد مثلي ممن لم يعرف للعنق ربطة إلا حين رمته صروف الدنيا إلى بلادٍ لا تقيم لك وزنا و لا التفاتةٍ تعِركَ إن لم تشنقك اثنتان : ربطة للعنق و عقدة في اللسان عجيمة ، داخلاً إليها فموقناً بأنْ لابد لي من شيء أرومه في صالة البنك الباردة هذي خلا الهجرة إليه فراراً من هجير الصيف ، حسناً فأنا عميلٌ محترمٌ ببطاقة بلاتينية و بطاقة فضية و أخرى كلاسيك و دفتر للشيكات و رقم حساب مصرفي متين ، و علي ذلك فثمة إدارة افترعها البنك لشاكلتي من الخلايق الحائسون في مضخة الإقتصاد العالمي و تجارته الحرة و عولمته القسرية ، فأنا عميلٌ إذن و عندي إدارة في ذاك المصرف أسموها « خدمات العملاء « . فأنا أدخله و الحال كذلك « بي حقي « . فدخلت مرفوع الرأس و صاحب مِلِك .
و الفكرة تلك ما تزال خميراً طيباً بذهني .. لقيتني قد علقتُ تماماً بُعيد البوابة الأليكترونية الزجاجية العملاقة ، و ظللتُ لا أفلح في إخراج البطاقة المرقمة من الآلة قرب المدخل بذلما جهدتُ ، فزمت و زمجرت و لعنت ما عنّ لي من هرطقات الكلام ، شأني و رعايا العالم الثالث العامهون في الردة لأصولهم البدوية كلما اصطكوا بالمحدثات البادعة فأربكتهم حذلقاتها و الفنكهة فيها و الفلهمة العورا و شيل البطارية في القمرا ، ظللتُ مراوحاً لعناتي تلك حتي امتدت يدٌ ناعمة صغيرة بمبيةٌ على دهبي على طلاوة و ليونة و سماحة .. إمتدت برااااااحه ساحبة البطاقة الورقية في سهولة و سلاسة .. و ناولتنيها . كانت ساندرا بولوك بشحمها و لحمها و وجعي عليها و المغسة القديمة و الضرس الذي عاود النتحان .
أذكرها ( ساندرا بولوك ) بت اللزينا تلك و قد مارست عليّ أول تربصاتها التي أحب و أنا ما أزال صبياً جديد المقانص و اللحية و الشارب و الصوت التينور ، و في صفي الثانوي الثاني . و قد كنا عائدين من ( كوشة الجبل ) بغنم جدي من بعد أن سعيناهم في الخلاء الواقع شمال الحزام الأخضر : طارق و محمد ود اليماني و أنا .
عدنا بالغنمات من الحزام الأخصر بعد أن أهلكت تلك الكائنات المرعى الأخضر هناك و جل السافنا الفقيرة المحيطة بجنوب الخرطوم ، تتكالب علي الخرطوم كل زواحف الحال مذ تحولت من بداوتها قبل مئات السنين فتخذت لها فرضية التمدن سبيلاً للحاق بالحضر ، فزحف عليها الناس و التصحر و البلاء و الحكم و الحكمة . و قد كان حاكم الخرطوم حينها قد أمر بالقبض و المصادرة لأيما غنمايةٍ ضالة ، فخاف جدي على مراحه الذي يؤثر دون كافة مخاليق الدنيا ، فصب من فوره جام اللعنات علي يافوخ المحافظ الحاكم و باللغات النوبية كافة : دنقلاوي / محسي / حلفاوي ، و هو بليغٌ في ثلاثتها حين يتعلق الأمر باللعنات و سب سنسفيلات من يقف أمام غضبته الجميلة . أسقط في يد جدي الحاج حين توالى القبض و المصادرة لمراحه ذاك ، ثم ما أعقبه من تعدد الزيارات التي أرهقت سنينه الثمانينيات ماشي جاي من زريبة البهايم الحكومية على النيل الأبيض غربا . فأيأسه الحال ذاك و برى عناده النوبي ، فلم يجد مخرجاً غيرما الحيطة القصيرة ( نحن : أحفاده ) ، فصرف لنا من الأوامر المستديمة ما اعتبرناه أحكاماً جائرات تتعطل بموجبها كل مهامنا الصبيانية زمانئذٍ ، بما فيها المذاكرة . الشاهد أننا أُمرنا بمرافقة الغنم التعيسات تلك للرعي و السعاية بأبعد ما يكون عن أعين رجال المعتمدية و البلدية و كذا أعين الحساد من الجيران .. فالأمر لله .
- ملحوظة : ظلت غنمات جدي آفة حياتي لمراحل طوال من زهرة عمري .
ما علينا ..
عدنا من المرعى الحضري جنوب الخرطوم بالغنيمات التي شبعت فتكرعت .. نسوقها أمامنا و قد أخذ منا الرهق ، تأخرت أنا قليلاً خلف القطيع - لشيء في نفسي و لنداء الطبيعة - فبصرت بساندرا بولوك .. فأوجعني شيءٌ ما .
كانت بعيدة قليلا .. لكنها ساندرا بولوك ، و كانت مثلنا ترعى غنما ( ربما جدها أيضا خاف من تهور حاكم الخرطوم فأرسل غنيماته للحزام الأخضر ترعى ، على أن تحلي في طريق العودة بالطيبات الـ Desserts المتوفرات في كوشة الجبل ) .. ركنتُ للفكرة تلك التي تجعل من ساندرا شريكة لي . المهم .
غمزتها ، فضحكت هي علي خفرٍ لذيذ أوقف نشاب دمي و أغواني فاقتربتُ ، تاني غمزتها - و الغمز زمانئذٍ حركة غزلية لا يطيق فعلها إلا كل جبار عُتِلٍ زنيم - فتاني بسمت لي ساندراي بولوكي ، الله يا للسعادة . صحت في الرهط الذي سبقني طارق و ود اليماني أنْ : إتخارجوا يا قوم .. أنا باخعٌ نفسي هنا . الليلة الدّق .
المهم .. جئتها فسلمتُ بأوسع ما قيض الله لي من إبتسامٍ فلم تتمنع عليّ ، و بسمتني بأحسن منها ، حتى شلع برقُها فانخلع قلبيَ الصبي و أوجعني . لي تضاحكت و جدعتني بالكلام اللذيذ الذي يفتح بوابات البلايا ، فتجاسرتُ و أمسكت بيدها مسلماٍ لمرتيَ الألف .. و في فرحٍ طنطنتُ : غنمكم ديل وللاي أحسن من حقيننا ، زاتا ألوانهم كويسة و صحتهم سمحة .. تلقي هسه لبنهم كتير .. مش ؟؟ . ذلك و كثير رغيٍ قلتُ به و أطنانٍ من كلام الطير في الباقير .
فلما استراحت و ارتخت و استرقّت منها الأسارير و سرحت في الترافق معي ، عدتُ فأمسكت يدها للمرة المليون بعدُ .. و مشينا من خلف غبارٍ جميلٍ للغنم السابقتنا و فيه دسسنا النشوة تلك و الخلوة البهيمية ، تلفنا ريح ما حسبتها سعادتئذٍ إلا كوكو شانيل و ميراكل على جنينة السيد علي علي صاروخ فلوردامور .
شالتني الهاشمية و اندفاع الأدرينالين في دمي ، فعمدت إلى يدها القطيفة الدانتل تلك فطقطقت لها أصابعها واحدة واحدة . فلما وصلت إلى طرقعة الخنصر : أوجعها - أذكر - فنهرتني : براحة ياخ ، ده شنو ده ده . فاستأت من النهرة التي أصابت عزة نفسي و الكبرياء . هببتُ لكرامتي الدليقة فرددتُ عليها نهرتها بأشد منها - و كنت أملك حلقوماً كبيرا و حبال صوتي ما تزال ( جديدة كلياً ) خارجة للتو من مراهقتها إلى حيث خوار ثور الرجولة فيها ، فهشت ساندرا أغنامها مغضبة .. و مشت ( تتثنى في دلالٍ ) كما يقول المغني .بقيت أرقبها و أسبها و أغنامها و أصابعها العيانة ، حتى غابت في العفار و الغبرة التي خلفتها بهائمها ذات الرائحة المهببة .
ظللتُ فترة اراها في الحلم و النوم الغزاز فأهضرب أهضرب ثم .. خلاص ، غابت .
|
Post: #2
Title: Re: ساندرا بولوك .. المحسية بت اللزينا .
Author: معاذ حسن
Date: 01-28-2010, 09:45 AM
Parent: #1
وبحب الناس الرايقة
سلامات يا عمده
بذلما جهدتُ في البحث عنك مؤخرا
|
Post: #3
Title: Re: ساندرا بولوك .. المحسية بت اللزينا .
Author: ندى عثمان حسن
Date: 01-28-2010, 09:53 AM
Parent: #2
| Quote: في فرحٍ طنطنتُ : غنمكم ديل وللاي أحسن من حقيننا ، زاتا ألوانهم كويسة و صحتهم سمحة .. تلقي هسه لبنهم كتير .. مش ؟؟ . ذلك و كثير رغيٍ قلتُ به و أطنانٍ من كلام الطير في الباقير |
بارك الله فى الغنم , طلقن لسانك
|
Post: #4
Title: Re: ساندرا بولوك .. المحسية بت اللزينا .
Author: ندى عثمان حسن
Date: 01-28-2010, 09:56 AM
Parent: #3
Quote: حسناً ..
عندي ما يُشبه اليقين أن ( ساندرا بولوك ) تتربص بي .
و .. أظنها محسية |
وأنا أقووووووول , انا مالى بحب ساندرا دى قدر دة
|
Post: #6
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 10:11 AM
Parent: #4
بالله شفتي الزولة دي ( ربّاصة ) كيف ؟؟
إنتي برضو اتربصتك ؟؟
المحس ديل ما كويسين .. جنهم يجهجهو الناس .
.......
يسعد صباح المزاج يا ندى ياخ .
|
Post: #5
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 10:06 AM
Parent: #2
حلاتي دي ياخواننا ..
.....
معاذ ياخ ..
هسه ح نعمل شنو في قصة الإنتخابات دي ؟
|
Post: #7
Title: Re: ساندرا بولوك .. المحسية بت اللزينا .
Author: طارق جبريل
Date: 01-28-2010, 10:18 AM
انت قايلني انا المشلخ لااااااااااورا دة عرست محسية ليه
|
Post: #10
Title: Re: ساندرا بولوك .. المحسية بت اللزينا .
Author: عفاف الصادق بابكر
Date: 01-28-2010, 10:25 AM
Parent: #7
غايتو يا عماد ..
ما عارفه اقول شنو ؟
ساندرا جهجهتك ..
وانت جهجهته الغنيمات ..
صراحة إمتاع ..
|
Post: #29
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 04:42 PM
Parent: #10
مساك حلو يا عفاف ..
عليك النبي شفتي البت دي ؟؟
كتال الكلاب اليومين ديل حايم في الخرطوم ..
أنا خايف على ساندرا دي ياخ .. سعرانة .
|
Post: #28
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 04:39 PM
Parent: #7
طارق ياخي ما جنبكم من محس الأمازيغ شي ؟؟
أنا وحياة الخوة مقتنع إنه الجمال المحسي ده عندو عرق في كل حتة ..
إنت صحي الناس ديل عندهم حاجة كده بتحرق الروح .. يا بتسلها؟؟
.......
و بعدين نضيفين ياخي .. نضيفين يا طارق ياخ و متمرين كده و صوتهم أبو بَحة و ....
مشلخ لا ورا ؟؟؟
|
Post: #8
Title: Re: ساندرا بولوك .. المحسية بت اللزينا .
Author: عمر المهدى
Date: 01-28-2010, 10:20 AM
لله درك ياعماد اضحكتني حتي الدموع
قلت اتاوق لي ساندرا لقيت الاحلي منها
سرد حلو وممتع تحياتي
زورنا في منبر ناس الزقازيق
|
Post: #30
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 04:46 PM
Parent: #8
مساء الخير يا ود المهدي ..
ناس الزقازيق ديل لو جيناهم كيف ؟؟
محس ؟؟
......
شاكر يا عمر مرورك الحلو ..
يديك العافية .
|
Post: #9
Title: Re: ساندرا بولوك .. المحسية بت اللزينا .
Author: خدر
Date: 01-28-2010, 10:24 AM
 في ذمتك يا كافر دي كانت بترعي معاكم ؟
|
Post: #11
Title: Re: ساندرا بولوك .. المحسية بت اللزينا .
Author: خدر
Date: 01-28-2010, 10:37 AM
Parent: #9
 إنعل ابوالريش زاتو
___
قطعا لا اعني ابوالريش زميل المنبر , اعني ريش = feather
|
Post: #32
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 04:56 PM
Parent: #11
| Quote: إنعل ابوالريش زاتو |
إنعل أبو الريش لأبو أي شي مقدقد زاتو ..
.......
ما يكون معانا هنا كمان زول إسمو مقدقد !!؟
|
Post: #12
Title: Re: ساندرا بولوك .. المحسية بت اللزينا .
Author: داليا حافظ
Date: 01-28-2010, 10:43 AM
Parent: #9
| Quote: هسه ح نعمل شنو في قصة الإنتخابات دي ؟ |
ترشحو دي ..
والله عزاااال ..
أصلوا ما نهظر معاكم ..
|
Post: #33
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 05:03 PM
Parent: #12
إنتي أقعدي هظري كده .. !!
أبوي الله يرحمو كان بيقول لينا :
( الحجر ما عندو عين ) ..
أقعدي إنتي هظري و فلقي كده يا داليا ..
........
نرشح ساندرا ؟؟ .. مع قائمة ( الشياطين التلطاشر ) النزلت دي ؟؟
.. حاقدة .
|
Post: #13
Title: Re: ساندرا بولوك .. المحسية بت اللزينا .
Author: GamarBoBa
Date: 01-28-2010, 10:50 AM
Parent: #9
يا زول مالك علي المحس...
وبعدين انت في البلد دي من زمن كان في حزام اخضر...غياتو لمن جيناها كان في حليب الاغاثة بودرة ساي..ما كان في حلب
طيب الهجرة من زمنا قديم زي ساقية فينا ديك طلعت في الالفية دي ليه
المهم كان تخليكم في حفير مشو بدل تجو تطلعوا ميتين السافنا الفقيرة دي
روح كدة يا شيخ عامل لي ساتر بساندرا بلوك الكافرة دي..رايحه ليك جرسة ساي.
يعلم الله الواحد مشتاق ليك وعايز يشوفك...قلت لي عرقهم ينقط؟
|
Post: #14
Title: Re: ساندرا بولوك .. المحسية بت اللزينا .
Author: محمد البشرى الخضر
Date: 01-28-2010, 10:58 AM
Parent: #13
| Quote: غنمكم ديل وللاي أحسن من حقيننا ، زاتا ألوانهم كويسة و صحتهم سمحة .. تلقي هسه لبنهم كتير .. مش ؟؟ . ذلك و كثير رغيٍ قلتُ به و أطنانٍ من كلام الطير في الباقير . |
الله يسألك يا عمدة دا أسي حنك ديامي..
| Quote: شالتني الهاشمية و اندفاع الأدرينالين في دمي ، فعمدت إلى يدها القطيفة الدانتل تلك فطقطقت لها أصابعها واحدة واحدة |
هاشمية وادرينالين وقيامة رابطة وآخرنها طقطيق اصابعين وكمان واحدة واحدة
ادرينالين زمان زايدنو موية خلي بالك
|
Post: #18
Title: Re: ساندرا بولوك .. المحسية بت اللزينا .
Author: رشا سالم
Date: 01-28-2010, 11:25 AM
Parent: #14
التحية لمرشحنا المحسي الديامي عماد عبدالله
(اصوات تصفيق حاد من الجمهور لا يخلو من مأمأة اغنام متفرقة)
|
Post: #37
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 05:40 PM
Parent: #18
مأماة يا رشا ؟؟؟
جمال سالم وين ؟؟
أمسكوا البت دي مني يا جيمي ..
إنتو لا محس و لا أبو النوم .. و كمان تصفقوا ؟؟
الفرحانين ليها شنو ؟؟
.....
سلام ليك يا رشا و للمعاك .
|
Post: #36
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 05:33 PM
Parent: #14
ود البشرى يا مغشم ..
إنت شن خبرك بالتكاتيك يا بتاع الصعيد إنت ؟؟
ده اسمو حنك تقسيمة ناعمة عشان الغان يرخي .. و يستكين ..
و بيان بالعمل .. أهو شال فيك يا برعي , و حنيت علي .
........
درس رقم واحد :
أصلك ما تقوم بنمرة خمسة ..
.. و لا تغسل عدة .
|
Post: #15
Title: Re: ساندرا بولوك .. المحسية بت اللزينا .
Author: خدر
Date: 01-28-2010, 11:09 AM
Parent: #13
صحتها حلوة يا عماد , ماشاء الله
____
|
Post: #17
Title: Re: ساندرا بولوك .. المحسية بت اللزينا .
Author: abubakr
Date: 01-28-2010, 11:23 AM
Parent: #15
ياااخ جدك وقفك زنهار وخلاك ترعي الغنم دي ما بتدييك اي صالح في انو تقول انو لعن بلغتنا الجميلة السلسبيل الغنائية لغة الشدو باقسامها الثلاث العظام .. ياااخ واحدة من اقسامها ما فيها كلمة لعنة ولا شتيمة .. انت ساندرا ادتك شاكوش ونهرتك وقالت ليك روح انت وغنماتك المضبلنات الشينات دييل .. وبس ....
_______
مذهل يا فنانا بالثلاث اقسام من النوبية.. هسع بالله شوف "خدر" الخائن دة ...بدل ما يغني ليك اغنية يقوم يغيظك
|
Post: #49
Title: Re: ساندرا بولوك .. المحسية بت اللزينا .
Author: Emad Abdulla
Date: 01-29-2010, 05:30 PM
Parent: #17
يعني يا ابوبكر ياخي خليت كل شي و مسكت لي في كلام جدك مكاوي ؟؟
ما شايف القاصفات دي ؟؟
و بعدين الزولة دي محسية محسية مافي كلام ..
يعني قريبتنا .. هذه البولوك بت الهِرمه .
و ملاوزة لي من الزمن داك .. زمن كوشة الجبل و أيامها الحلوات ..
أيوه عندكم شتيمة بالرطانة ..
يعني تفتكر جدي ده كان بيمدح البرعي لما يقول لينا :
( هريقة ويلون اسكا هرقي جاميرون يا ولاد الإيه ) .. !!
.......
مساء الخير يا بكور الجميل ..
أما صاحبك خدر .. فليمت بأحقاده .
|
Post: #38
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 06:07 PM
Parent: #15
| Quote: صحتها حلوة يا عماد |
( صحتين ) عا ألبك يا زلمي ..
صحتين يا ود التوم
.........
و إتخارج لينا بللاي ..
أنا زول خشمي خفيف .. و إنت منعول .
|
Post: #16
Title: Re: ساندرا بولوك .. المحسية بت اللزينا .
Author: Hala Hassan
Date: 01-28-2010, 11:13 AM
Parent: #13
ياعماد،
عاتبة عليك،،
كدة تخلى ناس داليا ديل ينطوا من ترشيحاتهم؟؟
Re: نريده وسيما ... مرشح رئاسة الجمهورية (ولاعزاء للشينين) هذا دلوي يابله
تصدق،
مع إنو بت بولوك دى من ممثلاتى المفضلات،
لكن أنا الحاجة دى حاصلة لى مع جوليا روبرتس،،،
دايما بتهيأ لى إنى بعرفها...بعرفها،،،،
| Quote: ظللتُ مراوحاً لعناتي تلك حتي امتدت يدٌ ناعمة صغيرة بمبيةٌ على دهبي على طلاوة و ليونة و سماحة |
ما عندى تعليق،
بس عجبنى الوصف،،،،
|
Post: #19
Title: Re: ساندرا بولوك .. المحسية بت اللزينا .
Author: Faris Mohamed
Date: 01-28-2010, 12:38 PM
Parent: #16
إنا لله
ياقولك
|
Post: #20
Title: Re: ساندرا بولوك .. المحسية بت اللزينا .
Author: بشير أحمد
Date: 01-28-2010, 01:21 PM
Parent: #19
كاتبي المُفضل/العمدة عماد
تحياتي ياجميل ؛؛
بس.
|
Post: #22
Title: Re: ساندرا بولوك .. المحسية بت اللزينا .
Author: عبدالوهاب علي الحاج
Date: 01-28-2010, 02:03 PM
Parent: #20
| Quote: ظللتُ فترة اراها في الحلم و النوم الغزاز فأهضرب أهضرب ثم .. خلاص ، غابت . |
ياخ قوم لف
الخنصر ياخ ما بطقطقوا لجوة بجروا لفوق دا ايه الغشامة دي
امشي ياخ ...
ربنا يفتح عليك سائر هذا اليوم والايام التالية
|
Post: #35
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 05:27 PM
Parent: #13
قمر !!!!
في شنو ؟؟
في زول جاب سيرتك هنا ؟؟
أيوة من زمن الحزام الأخدر ..
و اخدر كان و ضيق و خصير و مقلوظ كده و خاتم و عاج تكارين عديييل .
أي حزام كويس .. طول ما هو مضاير الحاجات و حازما .. فهو منتاز يا غتيت يا بتاع الضهاري .
حفير مشو بتاع طيارتك ؟؟
تعال نتلاقي يا برعي .. عصام جبر الله بي هنا برضو ..
تعال فكني منو ..
الإتنين صحوبيتكم بيض .. و تجيبوا الجلا .
......
بللاي إنت محسي ؟؟
الزمن ده كلو أنا قايلاك زينا كده .. زول ساي .
|
Post: #31
Title: Re: ساندرا بولوك .. المحسية بت اللزينا .
Author: Emad Abdulla
Date: 01-28-2010, 04:54 PM
Parent: #9
أيوة كانت ..
رعت معانا الغنم .. أيوة ..!!
رعت معانا شديد ..
اي نعم كانت هدوما شوية كده مدلقنة ..
لكن ما ازرق خفيف يوجع القلب زي ده ..
أطقطق أصابع قال .. !! .. انا يطقطقني البلى أنا ياخ ..
المحس ديل فيهم نظام إهمال في لبس الهدوم كده .. مش ؟؟
مهملين .. الله يكتلني مهملين .
.........
شيل البتاعة اللصقتها دي من قدام وشي ..
الله يجهجهك بركة الأوليا .
|
Post: #46
Title: Re: ساندرا بولوك .. المحسية بت اللزينا .
Author: Yassir Tayfour
Date: 01-29-2010, 05:42 AM
Parent: #31
عمدة إزيّك ياخي،
سارة دي "يبقالي" يا عملات طارق جبريل، زي القاعده ليها في زير قناوي، أزيار المستشفي ديلك، لو بتتذكرهم، والشوال المربوط في صفحتها دي، محاولة من فراش المستشفى عشان يبرد القناوي، لكن زير سارة ده، كان لفيتو بي تلج، برضو دافي..
___
بوِّز بالزير، الله يرضى عليك، وزح، العطش هلكنا..
|
Post: #50
Title: Re: ساندرا بولوك .. المحسية بت اللزينا .
Author: Elmuiz Haggaz
Date: 01-29-2010, 10:44 PM
ياااا مربص القلوب تربص القلوب.
دا راجلها يا عماد والله الزول الكله وشم وعضلات دا يلقاك تاني تطقطق ليها في أصابعينا
يطقطقك إنت وعبري والجزر المجاورة.
محسية قال محسية بتاعت فنيلتك.
حاشية: عماد أنشر أنشر ياخ كتابة زي دى بطبعوها وبجوا الزينا ديل
يخلفوا رجل فوق رجل يقروا ويستمخوا.
|
Post: #21
Title: Re: ساندرا بولوك .. المحسية بت اللزينا .
Author: عزاز شامي
Date: 01-28-2010, 02:03 PM
Parent: #1
| Quote: المحس ديل ما كويسين .. جنهم يجهجهو الناس . |
غايتو يا عمدة، تفلق و تداوي ...و تطق طق صبعين و تكورك ..
ربونا يا عمدة بيدي النصيبة قدر الصبر،
قلل صبرك المافي ده بكرة تتربصك وودي ولبرغ
|
Post: #23
Title: Re: ساندرا بولوك .. المحسية بت اللزينا .
Author: شول اشوانق دينق
Date: 01-28-2010, 03:14 PM
Parent: #21
| Quote: الخنصر ياخ ما بطقطقوا لجوة بجروا لفوق دا ايه الغشامة دي |
الخال يا خبرة ... هييييييييييييع
متعة والله يا عمدة ... الله يديك العافية ياخ
|
Post: #25
Title: Re: ساندرا بولوك .. المحسية بت اللزينا .
Author: نادية عثمان
Date: 01-28-2010, 04:16 PM
Parent: #23
| Quote: بقيت أرقبها و أسبها و أغنامها |
حكايتك شنو مع الغنم إنت ياخ ؟!
كل مرة غنم غنم ؟؟
قرود مافي ؟!
|
Post: #34
Title: Re: ساندرا بولوك .. المحسية بت اللزينا .
Author: عمر عبد الله فضل المولى
Date: 01-28-2010, 05:14 PM
Parent: #25
سلام
|
Post: #24
Title: Re: ساندرا بولوك .. المحسية بت اللزينا .
Author: Amany Elamin
Date: 01-28-2010, 03:44 PM
Parent: #21
| Quote: المحس ديل ما كويسين .. جنهم يجهجهو الناس |
عمده مالك ياخ؟
طيب المحس المارطّانه برضو؟ محس البندر وكده ؟ :)
------
حكي طاعم,
وحكايتك مع الغنم حكايه هههههه
|
Post: #26
Title: Re: ساندرا بولوك .. المحسية بت اللزينا .
Author: خالد عبد الله محمود
Date: 01-28-2010, 04:23 PM
Parent: #24
لا حولا يا عمدة ..
* أنت من زمن كوشة الجبل !!!!!!
|
Post: #27
Title: Re: ساندرا بولوك .. المحسية بت اللزينا .
Author: خضر حسين خليل
Date: 01-28-2010, 04:27 PM
Parent: #1
كنت مطول من قرايتك شديد يا عماد
والله اليوم ده شكلو كده حيكون سعيد
| Quote: شالتني الهاشمية و اندفاع الأدرينالين في دمي ، فعمدت إلى يدها القطيفة الدانتل تلك فطقطقت لها أصابعها واحدة واحدة . فلما وصلت إلى طرقعة الخنصر : أوجعها - أذكر - فنهرتني : براحة ياخ ، ده شنو ده ده |
لا علي الايمان بالغت في الحتة دي
دي جراءة شنو يا خينا
طقطقة أصابعين حته واحده
ياخ إنت راجل محظوظ بشكل
غايتو هاشميتك دي حتركب التونسية
تحياتي الحارة لساندر بت اللزينا ياعمدة
|
Post: #39
Title: Re: ساندرا بولوك .. المحسية بت اللزينا .
Author: ناصر احمد الامين
Date: 01-28-2010, 06:07 PM
Parent: #27
و ديل كان موقفهم شنو من الموضوع دا؟
الحتة دي مهمة جدا بالمناسبة
|
Post: #40
Title: Re: ساندرا بولوك .. المحسية بت اللزينا .
Author: ابو جهينة
Date: 01-28-2010, 06:49 PM
Parent: #39
و الغمز زمانئذٍ حركة غزلية لا يطيق فعلها إلا كل جبار عُتِلٍ زنيم
*****
|
Post: #41
Title: Re: ساندرا بولوك .. المحسية بت اللزينا .
Author: Osman Musa
Date: 01-28-2010, 07:02 PM
Parent: #39
عيد قصة الغنم تانى
|
Post: #42
Title: Re: ساندرا بولوك .. المحسية بت اللزينا .
Author: عمران حسن صالح
Date: 01-28-2010, 09:45 PM
Parent: #41
| Quote: جئتها فسلمتُ بأوسع ما قيض الله لي من إبتسامٍ فلم تتمنع عليّ ، و بسمتني بأحسن منها ، حتى شلع برقُها فانخلع قلبيَ الصبي و أوجعني . لي تضاحكت و جدعتني بالكلام اللذيذ الذي يفتح بوابات البلايا ، فتجاسرتُ و أمسكت بيدها مسلماٍ لمرتيَ الألف .. و في فرحٍ طنطنتُ : غنمكم ديل وللاي أحسن من حقيننا ، زاتا ألوانهم كويسة و صحتهم سمحة .. تلقي هسه لبنهم كتير .. مش ؟؟ . ذلك و كثير رغيٍ قلتُ به و أطنانٍ من كلام الطير في الباقير . |
يلخي أنا مصدقكـ ..
بتكون سويت التفاصيل دي زي ما هي ..
مش الزمن داكـ كنا عاملين كده ..
هي الحسناء أينما كانت تملأ وجهكـ إبتسام رغماً عنكـ ..
ما أكثر ( النقة والرغي ) في ذلكـ الزمان .. الرجفة وأطنان كلام الطير في الباقير ..
____________________
عمده الله يسعدكـ ويسعد جدكـ وغنمو
|
Post: #43
Title: Re: ساندرا بولوك .. المحسية بت اللزينا .
Author: saadeldin abdelrahman
Date: 01-28-2010, 11:08 PM
Parent: #42
يا عمدة..
الصور- مع جمالها- شبحت البوست
قرايته بقت زي سواقة الركشة.
تحياتي
|
Post: #44
Title: Re: ساندرا بولوك .. المحسية بت اللزينا .
Author: عمران حسن صالح
Date: 01-28-2010, 11:41 PM
Parent: #43
ومن يملكـ غير ( كلام الطير والباقير ) أمام هكذا ( تعابير ) ..
لا يحرم الله النظر في هذه الحالة
هي (نظرة أولى ) مستمرة ولا مجال للثانية 
|
Post: #45
Title: Re: ساندرا بولوك .. المحسية بت اللزينا .
Author: heba Elmahi
Date: 01-29-2010, 05:21 AM
Parent: #44
Quote: ومن يملكـ غير ( كلام الطير والباقير ) أمام هكذا ( تعابير ) ..
لا يحرم الله النظر في هذه الحالة
هي (نظرة أولى ) مستمرة ولا مجال للثانية |
دا انت يا عمران ولا هكر ( ود لزينا ) داخل بي حسابك
ما عهدناك مع البكايين في البورد لوووول
دا حين يا عماد انت كنت سارح بي غنم جدك ولا غنم إبليس ؟
|
Post: #47
Title: Re: ساندرا بولوك .. المحسية بت اللزينا .
Author: عمران حسن صالح
Date: 01-29-2010, 09:46 AM
Parent: #45
| Quote: ما عهدناك مع البكايين في البورد لوووول |
heba Elmahi
البكا (خشم بيوت) يا هبه
|
Post: #48
Title: Re: ساندرا بولوك .. المحسية بت اللزينا .
Author: الوليد محمد الامين
Date: 01-29-2010, 04:49 PM
Parent: #47
ياخ انا من زمان اسمع ليك غنم ابليس غنم ابليس وما عارف القصة شنو !
غايتو ،
غنمنا ولا فريزيان الناس .
|
Post: #51
Title: Re: ساندرا بولوك .. المحسية بت اللزينا .
Author: الوليد عمر
Date: 01-30-2010, 00:47 AM
Parent: #1
......
| Quote: فعمدت إلى يدها القطيفة الدانتل تلك فطقطقت لها أصابعها واحدة واحدة |
يا عمدة ياخ فى قطيفة بيلاووها بالطريقة دى ؟
القطيفة دايرالا طولة بال أبوى ،
و بكان مافوقو أيتها غنم ،
كان أخيرلك تجابد القطيفة فى البنك
أبهمبريبة دا،
قطع شك كان بطقطق و الحبة ما بتجيك.
شكراً للإمتاع .
....
|
Post: #52
Title: Re: ساندرا بولوك .. المحسية بت اللزينا .
Author: عفاف الصادق بابكر
Date: 01-30-2010, 10:47 AM
Parent: #51
عماد .. كيف اصبحته ...
Quote: كتال الكلاب اليومين ديل حايم في الخرطوم ..
أنا خايف على ساندرا دي ياخ .. سعرانة . |
دسها .. دسها يا أخوي ..
بس ما تدسها في كشك الامن الشامل ولا اسمو شنو كده ما عارفه ..؟؟؟
|
Post: #53
Title: Re: ساندرا بولوك .. المحسية بت اللزينا .
Author: حمزاوي
Date: 01-30-2010, 10:58 AM
Parent: #52
محسية كرماوية
غنمي ترعى
والرسول فجولها تلعب
أحييييي أنا
أخوي عماد خليك قريب ما تبتعد
|
Post: #54
Title: Re: ساندرا بولوك .. المحسية بت اللزينا .
Author: بدري الياس
Date: 01-30-2010, 11:40 AM
Parent: #53
| Quote: صحتها حلوة يا عماد , ماشاء الله |
ودي دايره سؤال يا خدر إنت ما شايف غنمن كيف؟
كمان خت بالك لما تحته خط،
| Quote: غنمكم ديل وللاي أحسن من حقيننا ، زاتا ألوانهم كويسة و صحتهم سمحة .. تلقي هسه لبنهم كتير .. مش ؟؟ |
،
كامل تضامني مع القطيفة الدانتل والتي -حسب العارفين- لا تُطَقْطَقْ.
ويُوصى بمردغَتِها -فقط- في اسوأ أحوال الادرينالين.
|
Post: #55
Title: Re: ساندرا بولوك .. المحسية بت اللزينا .
Author: محمد سنى دفع الله
Date: 01-30-2010, 11:53 AM
Parent: #54
[
وردة ليك ووردة لي البطقطقو في اصابعون
|
Post: #56
Title: Re: ساندرا بولوك .. المحسية بت اللزينا .
Author: إدريس محمد إبراهيم
Date: 01-30-2010, 12:39 PM
Parent: #55
Quote: بللاي إنت محسي ؟؟
الزمن ده كلو أنا قايلاك زينا كده .. زول ساي . |
عماد الفنان ...
أزيك ياخي ....
ياخي نحنا محس ... وبنحبك شديد ..إنت وأبو جدك ذاتو ...
وبنحب غنيماتكم ذاتها ..
مع خالص تحياتي وحبي وتقديري ؛؛؛
مع خالص تحياتي وحبي وتقديري ؛؛؛
|
Post: #57
Title: Re: ساندرا بولوك .. المحسية بت اللزينا .
Author: ibrahim fadlalla
Date: 02-01-2010, 04:32 PM
Parent: #56
ياعمدة ...
يديك العافية ..ويسندر ضراعك ...
|
Post: #58
Title: Re: ساندرا بولوك .. المحسية بت اللزينا .
Author: محمد سنى دفع الله
Date: 02-01-2010, 06:18 PM
Parent: #57
|
|