مصطفى سيد احمد في منتدى دال الثقافي ( توثيق مصور )

الأحد 31 / 1 / 2010

المقر الرئيس لمجموعة دال

الساعة الثامنة مساء





التوثيق المصور طبعا بعد المحاضرة

بقيتوا ولا بتعزمونا

النعيم ياصديقي

المحاضرة الأحد الجاي كرسيك قداااام

لو مابتحب الكورة حبابك ألف

الاخ - عمر عشاري - تحياتي،

كتب حميد في رثاء صديقه مصطفى سيدأحمد:

تغني من التعب لامن كلاك دمن
ولا شكرا رجيت لا من
فهل يعني النهاية الموت؟
ويتبعزق غناك سدى
أم أن الغيم حيتسابق
على الأرض العزيزة فدى

التحية لك ولمنتدى دال الثقافي

Quote: لو مابتحب الكورة حبابك ألف

اخوك علاقته بالكوره (حاجتين)..
حفلة افتتاح كاس العالم..
واستغلال الفرصه للذهاب لسوق امدرمان (الشوارع بتبقي فاااااااااااااااضيه والحكومه كويسسسسسسسسسسسسسسسسه)

احجز لي (كرسيين) وكده..

Quote: تغني من التعب لامن كلاك دمن

محمد ياصديقي

تحياتي وأشواقي
بفضلك بوست محمد عبد الحي

أصبح مرجعا ويمكن الرجوع اليه لإعداد الدراسات عن ذلك الشاعر الكبير


واليوم نتحدث عن مصطفي

ومصطفى عن التعريف ...غني جدا

عندما أستمع لحميد وهو يرثي هذا الفنان العظيم

وتحديدا عند وصولي لهذا المقطع

أتعلم كيف يصبح الفن رسالة

وأذكره وهو جالس من التعب على حافة المسرح

يتعالى على كل آلامه

ليصدح بالغناء

بدا لي حينها
كمن خير بين الحفاظ على صحته وبين الغناء حد الموت

فإختار الغناء حد الموت

ذلك ان كلماته كانت تفضح الزيف وتنشر الوعي

يا نعيم ..
مافي ليك .

عماد عبد الله


الله يخدر ضراعك

ايها الفنان الوسيم

عمر ..
ثم هذا ما نزفه الجميل الطيب برير الجميل ..
حرفٌ نزّاق على مصطفاه :

( مُصطفى .. الوترُ الشّفيفُ المُصطفى )

تزْهُو الحُرُوفْ
لكيفَ تحتملُ الإشارات
الحُروفْ
إزّينتْ في حزنها
أو ..
كيفما رغمتْ أنوفْ
تمضى ..
إلى حيثُ الغناءُ قضيّةٌ
والشّعرُ أغنية الألوفْ
يا سيّدَ الأوتارِ
والصّوت الّذي
هزمَ المُحالَ
و كلّ أسياجِ الظُّروفْ
دالتْ دولةُ التّدجينِ
و الغبنِ المُعبئِ
في استمالاتِ الحُتوفْ
هيا انشبي
يا دولةَ التبريحِ فينا
كلّ أنيابِ التباعُدِ
وانشبي
أظفارَ مخلبكِ الوضيعِ
وقطّعي أوصال
دانية الحُروفْ
....
يسّاءلُ الآتونَ منك
لتّوِهمْ
من مثلهم ؟
كانوا
و كانوا مِلأَ أسماعِ الجمالِ
و كلّ طائفةٍ تطوفْ
يا سمعُ
أرهفْ سمعكَ
المنسوجَ من حزنِ النّبيلِ
المُصطفى
يا مُصطفى
القلبُ أنبتَ ما زرعتَ
فكيف غابتْ أغنياتٌ منك
في قلبٍ هَفا
إصعدْ
كما صعدَ الخليلُ بعزّةٍ
نحو الذي سمّاكَ في المنفي
غريباً
ثُمّ أهْداكَ الوفَا
أيْ مصطفى
قلْ ..
مالَ صوتي خافتٌ
لا يَرتقى حُـزْني
و يعرجُ للحنينْ
كلّ الذين تحبّهمْ
صَعدوا إليكَ
لتَّوِهمْ
لم يترُكوا غيرَ الأنينْ
قدرٌ غناؤُكَ
أنْ يكونَ ملاذهمْ
شرفُ القصيدةِ
أن يصونَ بقاءَها
وترٌ أمينْ
وترُ الشفيفِ المصطفى
....
يا مصطفى
صكّتْ عجوزُ تناغُمي
ورمتْ بحرفِ العقمِ منّي
يا ولدْ
للّه زرعُ مشاعري
فرحاً
ومَا هوانا ..
سِـوى البلدْ
أمدُّ قلبي للسّلامِ
مصافحاً قلباً جَلدْ
يمتدُّ صوتكَ نابتاً
خبزاً
و ماءً
للذين نحبّهمْ
جُبلوا على هذا الكََبَدْ
يمتدُّ منك مقاصلاً
و مشانقاً
للضدِّ
في أبدِ الأبدْ
....
يا مصطفى
أبكي على حرفٍ أبَي
ما لاحقَ الحرفُ المقاماتِ
الكُتُوفْ
قد حتّمَ الظّرفُ الظُّروفْ
بل أحكم الوضعُ الظُّروفْ
لو هَدّني
مثلَ الذي هدَّ الجبالَ
وصاغني سرُّ التّصوّفِ
ما اهتديتُ إلى حُروفْ
تُوفيكَ حزنكَ للسّنابلِ
حين تبذُرها بصوتكَ
في الجروفْ
....
أستجمعُ الآن الحروفَ
ألملم الصّوتَ الجريحْ
وقفوا على شطِّ الوداعِ
دموعهم ..
في قبضة الأمل الذّبيحْ
لو كان يملكُ أن يكون فداءكم
لرأيتهم ..
كُلٌّ خلاصٌ
في عذاباتِ المسيحْ
العينُ ما وسعتْ
تضيقُ
إذا ترى وطناً
يضيقُ بنعشكَ المحمُولِ
في القولِ الصّريحْ
يمشونَ خلفَ كلامهمْ
الخطوُ خطوُ العجزِ
في الزّمنِ الكسيحْ
لو كان ينفعُ
إنّما
لو حتّم الظّرفُ الظُّروفْ
هل يقدرُ الحرفُ
الوقوفْ
لو هَدّني
مثلَ الذي هدَّ الجبالَ
وصاغني سرُّ التّصوّفِ
ما اهتديتُ إلى حُروفْ
تُوفيكَ حزنكَ للسّنابلِ
حين تبذُرها بصوتكَ
في الجروفْ
....
يا مصطفى
فليهزم الله التّمنّي
حين يعجزنا التّمنّي
رغبةً في ..
كنتُ.. لوْ !!
هذا أوان الفجرِ
طيَّ خلاصهمْ
الصّوتُ صوتُكَ
ليس سهوْ
صوتٌ شفيفُ الحسِّ
يصنعُ منتدى
أنت الذي صنعَ المقاماتِ.. القمرْ
إذْ كنت في سمرِ العنادلِ ..
مُبتدا
حتّامَ تمنعُكَ الصّوالينُ
الخبرْ
يرتاحُ في دمكَ الذّكيّ
لهاثنا
يرتاحُ من هذا الضجرْ
....
نرنو هناكَ
لرايةٍ غرقتْ
و يرتفعُ العويلْ
تبدو كما لو كنتَ
تُعلنُ
أو تغني ..
مقطعاً للحزنِ
من أسفِ الرحيلْ
تبدو كما لو قلتَ ليْ :
هدأَ الهديلْ
يا أيّها الولدُ الدّليلْ
كيف اسطعتَ.. تهدئةَ الهديلْ
لو هززتَ حبالَ أجراسِ الغناءِ
منبّهاً
هلْ يمنعُ الجرسُ.. الصهيلْ
....
يا مصطفى..
يا واقفاً أقصي حدودَ الصّبرِ
أشهى من غناءِ الصّدقِ
في هذى الحياةْ
يا ضوعَ تجوالِ الحنينِ
على البيوتِ الساكناتْ
يا مِسْكَ آلاءِ الحروفِ
على نضالِ الأغنياتْ
ألقاكَ ..
في صدقِ الحروفِ
وفي شفيفِ الذّكرياتْ
في الغناءِ الصدقِ
في طرق التّمترسِ
و الثباتْ
أو صِبا لحنٍ ..
تلامعَ
في قصيدِ العارفاتْ
ألقاكَ ..
لا خورٌ يُكبّلُني
ولا.. حرفٌ فتاتْ .

ـــــــــــــــــ
مارس 2008

Quote: يا نعيم .. مافي ليك .

ليه يا عمده..؟

Quote: ألقاكَ .. في صدقِ الحروفِ وفي شفيفِ الذّكرياتْ في الغناءِ الصدقِ في طرق التّمترسِ و الثباتْ

والله ثبات جد

الأستاذ / ربيع عبد الماجد

سيقدم ورقة بعنوان

( التفكير الموسيقي في تجربة مصطفى سيد أحمد )

سلامات يا عمر ..
طبعا خلعتني قلت يكون يوم 31 جا وانا ما جايبة خبر

حضور بإذن الله .. أرجونا في أول الشارع :)

الليلة مات اخر شعاع
شفناهو من نور الامل
وقفت فى نص الطريق
والليل خلاص سترو انسدل
وصفير رياح وعبير جراح
واشباح تقول لى ما بتصل
كيفن تصل وسط الضياع
حتى الشعاع منك افل
كيفن تصل والليل طويل
وعليك تقيل زى الجبل
وسحابة حجبت النجوم
وكست ظلام كل القبل
***
فى اللحظة ديك شفت الضياع
واللوعة فى القدر النزل
وشعرت بى موج الوجع
قلبى انصدع دمعى انبهل
شفت الخيال لوح بعيد
عبر الظلام صاح فى وجل
قال الوداع قال الضياع
كيف الوداع بعد الحصل
*************
ليالي كنت أقضيها هنا
في وجه البدر دفاق السنا
يا ليالي..هل ذكّرتني من أنا؟؟
هل طواك الدهر في جوف السنين
هل خطانا فيك حلم قد مضي؟
أم جفون مغمضات بالرضى
عربدت فيك زمان قد مضي
ونعاني اليوم زفات الحنين
أين صحبي..؟!
أين سمار المساء
عن بعيد بات في حضن الأسى
كم حكيناك الدهر أذ قسى
ورفيق حفظ الشوق الدفين
لست أدري أيّ أمرا
أسكت العصفور عني
أترى مات الشعور
في جميع الكون
حتّي في حشاشات الطيور
أمخبي بين السحاب
لست أدري أيّ أمرا
أسكت العصفور عني؟؟

--------------------------------------------------------
ورحل عنا وما زال السؤال قائما؟؟هل من أجابة؟؟؟؟؟؟؟؟؟؟؟؟؟

ود سيد احمد دق المحلب جوة الفكرة
وخت الذكري
ذكري الليلة وذكرة بكرة
ابية وحرة
مبدأ وعزة
دراية وخبرة
شموخ بيت عازة الما بتهزه
برغم الضيم
وليد ضكران
هز ورز
وتب ما فز
اتقطر نز
ادفق ضي
ود سيد احمد شال الريشة
ورسم اللوحة
وشتت لونها
وتيرب بيهو سما السودان
وكانت النبتة عصارة الغنوة الفيها
ثقافة وحب وسياسة
مزيجا بلدنا
وفيها ولدنا العطنو الريد
والبت الحلوة الوطن الغالي
وسرج بيهو وشد ضهر سودانا القام

سلام يا جماعة الخير

ل عمر وعماد التحية
اعزمونا انا وزوجتي بدلا من شاي في بيت

دي زي الضبيحة


ما عندنا تذاكر لكن بنحب مصطفي وكفي

نرحب بجميع محبي مصطفى سيد احمد في أمسية الأحد 31/1 ضيوفاً على منتدى دال الثقافي
على الراغبين في الحضور، ولأغراض تنظيم الدخول وسعة القاعة، مراسلة المنتدى على الإيميل [email protected]

شكرا ياسلمى

على إزالة الإلتباس

الدعوة التي قمت بتحميلها خاصة بموظفي دال لذلك كتب عليها
يجب إبراز بطاقة العمل

علما بان المنتدى لكل الناس

ولكن يجب مراسلة البريد الإلكتروني أعلاه لأغراض التنظيم كما ذكرت سلمى


صبري الشريف

فوق راسنا مكانك إنت وزوجتك الكريمة

في هذي المدينة الفاضلة
لبس الشعراء تيجان غار وهجوا مع النشيد .. والبوح
وغنوا للغربة المتلتة في الزمن المكان الروح
وما بين الرماد والنار فضا الكلمات ومعناهم
بيمرقوا من هطيل النوح ومغناهم يشقشق للحياة والموت
يغرد للمدائن الفاضلة جواهم جزاير دوح
قدر يوتوبي ترحل في مداين الناس ... مدينة
يندلق حسك حداهم قطرة قطرة تعبي صوتك بي نداهم
مشدود وتر صوتك ربابة مسنود عليك صوت الغلابة
مفرود من الزمن المفتق والمرتق بالرتابة
مولود مع الجدة المعتقة والمجرتقة بالرحابة
ينسدل من شدوه إنشاد المزامير ينسمع في شجوه ترتيل الصحابة
زمن يوتوبي ترحل في العتامير والمغاسل والغنى المندلي من شطر
السحابة
القدال.
__
رحم الله مصطفى سيد أحمد.

ثروت

سلامات

القدال برغم تواجده المستمر معنا في منتدى دال

وبرغم إلحاحي المستمر بأن يمدني ببعض كلمات أقدم بها هذه الليلة المنتظرة


تواضعه يحول بيننا وبين هذه الأشعار التي تناسب هذه الذكرى المجيدة


شكرا

محمد طه وعبد الله


اتمنى ان تكونوا في السودان

لمشاركتنا الإحتفاء بهذه الليلة

يا حنجرة .. يا فنجرة
ياضحكة وسط الزمجرة
ياحالي يازوق ياصعب
يانخلة دلت رطب
حلو الكست تحت الكست
فلنستمع كي ننبسط
ياسهل ممتع و ممتنع
هل نقتنع
ما أنت خليل فرحنا الأتولد
ما أنت جميل بثينة و ود بلد
نعم الولد
البس قميص الفرهدة
أسرح بعيد في المدى
أسرح سعيداً في الصدى
أسمك كبير
أملا المسافات البعيدة شبر شبر
في عشرة الضو والندى
وعلاقة الدم والحبر يا مصطفي

يا للروعة والدهشه فى أماسي مصطفي.....

....يا بختكم برفقته الفريده....ويا بختها دال بيكم يا سلمي وعمر وكل الصحاب................

...........تحيات وود لكم....وأحترام وتقدير للاستاذ القدال....وأشواق لا توصف لمصطفي!!

رثاءالاستاذ الراحل مصطفى سيدأحمد


يالكحلت عيون الدنيا بلون الغنوه
يالضفرت ضفاير احساس الكلمه الحلوه
يالشتت نجوم الليل في وش النيل
عقدا فوق القمره بيقدح فينا الضو
يالطقطقت اصابع السحب الشالن جو
دفق عسل المطره و نقط ..كبت شو
نضمت..غنت ..سكتت ..صنت
مرقت ..دخلت ..قامت ..قعدت
شن بتسو ؟

تقشقش فوق رقراق الدمع الكاسي العين بهدمة دم
كل ما اتعرى يجدد توبو يضاري الريحه الكست الجو
تساسك بين تيار الموج الكسر الجدول ودفق شو
تسارق فوق نجماتا برقن هجن لجن .. باتن قو
تضاير فوق وديانا شبعن .. رضعن ضرع السحب الشالن برا .. جو
تصنت غنوة سيره عريسه مهقد ..مكسي ..مجرتك
يفوح الصندل .. وعطر المحلب منو مدفق
امو تعدل ..واختو الرقصت .. وخالو يبشر ..
وعمو بيعرض وسط السهله .. وخيرو مدفق
غنوه بتعزف نغم اتشتت .. رعدا صفق
بردا هز اتباطن صوتو
اتطانن حر لوح و هوا
وظهرا فارسا تب ما اتلوى
وزغرد ليك ايقاع المطر اتلبب
حضن الارض ونام
ود سيد احمد دق المحلب جوه الفكره
وخت الذكرى
ذكرى الليله
وذكرة بكره
ابيه و حره
مبدأ و عزه
سيما وعبره
درايه و خبره
شموخ بيت عازه الما بتهزه
برغم الضيم
وليد ضكران
هز و رز , تب ما فز
اتقطر نز
ادفق ضي
ود سيد احمد شال الريشه
ورسم اللوحه
وشتت لونها
وتيرب بيهو سما السودان

وكانت النبته عصارة الغنوه الفيها
ثقافه .. وحب .. وسياسه
مزيجها بلدنا وفيها ولدنا اتعطن الريد
والبت الحلوه .. الوطن الغالي
وسرج بيهو و شد ضهر سودانا القام

وكيف بتفوت
وكيف بتفوت ..
يالولد الغنى وشنا ورنه
وخالدا حي
ما بتتضارى بشوفك قاعد بين الرمش الفوق عيني
يالدفيت اعضاء الكلمه في ليل
البرد ..الريح ..الصي
يالنديت اغصان الحرف بصيفا
حرا و شد الكي
وكيف بتفوت يالولد الضوا وشيشو قليب الوتر
الغنا وطربا غطى فجاج الحي

تمرق بين ورتاب الزرع الفرهد
تمرق بين حبات المطر الطقطق نقط
يحضن ليلا سود ..هج ..وهود
تمرق بين النيل الكتر ادفق و نمرق
تمرق بين الوترالصفق غنا و زغرد
تمرق بين صفقات الشجر اخضر و ورق
قام اتشابى و عانق كتف الليل
اتطاول باس القمره و قبل عين الشمس

كيف نبكيك يا راجل الليله و بكره و امس
كيف نبكيك ونحنا بنسمع صوتك
سرا.. وجهرا .. وهمس
كيف نبكيك و انت معانا تشيل و تخت
ترص و تقص
تفج السهله وتحكي الغنوه اللبست صوتك
وشالت حسك ..ونفسك ..وروحك
وسمحة زي

وانت معانا بقيت جوانا و ماك بتفوت
حتلت حنينا جوه القلب
بصمت عليهو وجود موجود ..برغم الموج
وسفر الجسد الما محدود
غلبت تفوت
كسرت الحاجز الراكز جسرو على المسدود
رقعت الهدم الراسي خيوطو على المقدود
مسحت ..مسحت البعد الارضي المامحدود
نسفت مسافة الزمن الروح و مامعدود
سكنت مسامة النغم المن ايقاع النبض
بقيت الدم .. والروح .. والقلب
هزمت الموج .. غلبت تفوت
تفوت لي وين ؟؟
وانت الزول الباقي وحي
انت النور الوج الضي
وانت البحر الدفق ري
تفوت على وين ؟؟..ونحنا زرعنا لسع ني

النيل الابيض لاقى و عانق حضن الازرق
باس الابيض خد الزنجي
اتقلدوا.. اتقادوا
اتوحدوا ..فاتوا
مات العنصر و داب الفارق
من بيناتن

صدر العين اتملى بالعبره
اتنهد نفس الكلمه الحلوه ..اتأوه
آهة طفت القمره و نفخت قلب الجمره
وكبت فينا ضلام
يا انسان .. يا فنان يالقاومت الذاكره و النسيان
دخلت بوين ؟
سكنت الدم الجاري على الشريان
لوليت جوانا عصاية الكلمه ..الشرف ..العزه
العايش فينا في كل زمان
جرجرت علينا حروف النغم الطربا
يهز يفرح كل مكان
ختيت الرأي صريح قولا و فعلا و فكرا
سجل اكتب يا تاريخ

يا استاذ .. يا ممتاز
ختيت الدرس مفيد و صحيح
درسا ما دايرلو وسايلا للتوضيح
ونحنا فهمنا كتبنا درسنا على الكراس
انتهت الحصه و ناحن سكلبن الاجراس
مرقت صحيح ؟؟؟
مشيت بي وين ؟؟
وكيف خليتنا بدون تصحيح ؟!؟
نصحح وين !!؟
شلنا الهم
نصحح وين
جينا الكم
نصحح وين
وكل اقلامنا تقطر دم
كمل الاحمر دفق لونها فحم
ونحنا كبرنا وعينا و زدنا فهم
عرفنا اهداف الدرس تمام
ختينا النقطه ,الهمزه ,الشوله ,الاستفهام
خلصنا خلاص
جمعنا قلمنا حبرنا كتابنا مع الكراس
يالوحدت بسفرك كل الناس
يامقياس
يا ميراث
واساس المعنى
الحب ..المبدأ .. والاحساس
نعم الارث الباقي و اعظم ساس

وكيف بتفوت
و افتش ليك انا جاي بي جاي
و أهلك و ناسك مرقوا يكوسو عليك معاي
وانادي عليك ارتى عليا
فوت بي وشك ارجع جاي
وفجأه ...و فجأه بتطلع من جواي
متل النور الضوا حداي
وموج النيل الرايح جاي
وهج العين الفكر الراي
ومن الشمس بريق ضواي
وصدر الام الليك غطاي
حديثها يناغم فيك لولاي
وصوتها يهدهد فيك هداي

هوها..يا هوها
واحد ..اتنين ..تلاته
إبرة الخياطه
فيها م وفيها ص وفيها ط وفيها ف
وفيها جميع المصطفى


____
عفاف الصادق حمد النيل

اسفين لطول المداخلة
ورحم الله مصطفي
وشكرا..دالـــــــــــــــــــــ

اليوم موعدنا


الساعة الثامنة مساء

في رحاب مصطفى سيد أحمد



هواري نمر

سلامات

رسلنا الايميل يا عشاري



___________________
والله قربت ارسل ال C.V معاهو

صباح الخير

ناجي الملك

طلال عفيفي

سامرعثمان

ارحكم

الصور

الأستاذ قاسم أبوزيد

قال ما حكى مصطفى عن تجربته ... وأدهشني بعبارته "ما أصعب أن تكتب نقداً عن تجربة أنت جزء منها"

الفنان أبوبكر سيد أحمد

في تواضعه المعتاد خدع الحضور حين قال "أنا لست أفضل من يغني لمصطفى" ولكنه فعلها... تسلم هذه الحنجرة والأنامل ورهافة الحس.....

ليتك أكملت عم عبد الرحيم

عمر خليل

كنت أظنه حتى ليلة البارحة مقلداً جيداً لمصطفى سيد أحمد ... بالأمس فقط إكتشفت أنه يعشق ود سيد أحمد المقبول بوعيه فيخرج صوته كالحوار يترجم حباً في حضرة هذا الشيخ الصوفي .... شكراً عمر

الأستاذ ربيع

قامة موسيقية لها وزنها .... أحدث بورقته حراكاً فكرياً ما بين الموسيقى والفكرة ومشروع مصطفى الغنائي فدافع كل بوعيه وعشقه وضجره .... فتجاوز الزمن المسموح محتفظا بابتسامته





ثم غنى مع عمر وابوبكر

مصطفى ......


يا مافي ومالي الفجة