سوداني يخترع جهاز لكتم الموبايل في المساجد والمحاكم والاجتماعات وغيرها

كثير من الناس ينسي موضوع الموبايل وهو ذاهب للمسجد وهو في ركعة من الركعات فجأة

ترن نغمة معينة وقد تكون اغنية من الاغنيات مثل "الليل ما بنومو" او مدحة اللالوبة لفرقة الصحوة بمصاحبة الفرقة الموسيقية او او فيتحرج ويدخل يده في جيبة في محاولة لكتم الموبايل وقد ينجح وقد لا فاليتلفت اليه جمع من المصلين بعد انقضاء الصلاة شذراً

وحتي رئيس جمهوريتنا الفتية لم يسلم من ذلك ففي احدي اجتماعات مجلس الوزراء وفي أثناء مناقشتة لاجندة الاجتماع فجأة رن هاتف الرئيس ولعلها كانت نغمة نوكيا الإفتراضية فأدخل يده في جيبه وكتمه

وفي بعض المحاكم استن قانون بمصادرة الموبايل اذا رن في الجلسة وهكذا

نرجع للعنوان

السوداني صاحب الفكرة هو العبد لله

بس داير لي سوداني متبحر في صناعة الإليكترونيات وحتي لو يعمل ماستر في الموضوع وهو اختراع جهاز لكتم الموبايلات في مثل هذه الحالات وإستئناف ارساله بعد انقضاء مثل هذه الأمور

بس عاوزين نسجل براءة فكرة الإختراع قبال يلطشوها الصينيين وبكرة تلقاه مالي الأسواق

يا بو عمير أنسى الموضوع دا عليك الله والنبي!

الناس دي ما خلت شي وختت كل الخيارات يعني ممكن تعملو سايلنت أو هزاز او ي شي!

ما مستعد أحتار تاني زي ما حصل واحترت لمن لقيت اعلان قبل سنوات عن معرض المخترعين السودانيين ولا المخترعات السودانية ما عارف...واحد قال (مخترع) الهليكوبتر ما (مصنع) ااي مخترع عديل ...والناس المشو شافوها قالو عبارة عن قبورة!

أخترع لينا جهاز طفل رخيص أحسن خاشين علي ولادة

ركنية!

بهظر معاك ساي

Quote: بس عاوزين نسجل براءة فكرة الإختراع قبال يلطشوها الصينيين وبكرة تلقاه مالي الأسواق

من زمااااان ... يا مان


تحياتي

أبوعمير كيف أحوالك ..
الجهاز ده موجود من زمااااااااااان ومستخدم في السودان برضو من سنين في بعض قاعات الاجتماعات وبعض المساجد وغيرها ..

Cellphone Jammer

Quote: أبوعمير كيف أحوالك .. الجهاز ده موجود من زمااااااااااان ومستخدم في السودان برضو من سنين في بعض قاعات الاجتماعات وبعض المساجد وغيرها .. Cellphone Jammer

اخي محمد عبدالله ياخي ضيعت علينا الاختراع الجديد القديم

لكنه للأسف غير مستخدم بصورة واسعة وبالذات عندنا هنا في الخليج رغم ما يملكه هؤلاء الناس من ضحاكات

Quote: من زمااااان ... يا مان

اخوي ناصر يا براءة ماتمت!!

Quote: الناس دي ما خلت شي وختت كل الخيارات يعني ممكن تعملو سايلنت أو هزاز او ي شي!

بس المشكلة سامي اخوي انو الناس بتنسي حتي تستخدم الاوبشنات دي كلها عشان كده لازم الكتم يكون اجباري

بالنسبة لموضوع لجهاز الطفل فممكن تعمل تغذية للحاسوب الملحق معاه جهاز الحاجة ام الاختراع وتعمل ليه انستاليشين وبث

الأخ عمر تحياتى الإختراع موجود و مستخدم فى قطر بصورة كبيرة فما إن تدخل فى أى مسجد صغير أو كبيرإلا وترى هذا الجهاز .

Quote: الأخ عمر تحياتى الإختراع موجود و مستخدم فى قطر بصورة كبيرة فما إن تدخل فى أى مسجد صغير أو كبيرإلا وترى هذا الجهاز .

اخي ياسر تحياتي

ياريت يصلنا في السلطنة حتي في المساجد الكبيرة مساجد قابوس مش موجود

وحقوا في الاجتماعات الرسمية والمؤتمرات وغيرها ما التجمعات الهامة يتم تعميمه

عمر الفاروق عبد الله الشيخ
شكراً وأتمنى لك التوفيق والسداد فهو قطعاً إختراع أو إكتشاف يساعد البشرية.
تمنيت على الله الأماني أن يكون هناك إختراع يؤثر في الذوق العام لمستخدمي الهواتف المحمولة على وجه التحديد من إحترام المكان أو الوسط الذي يكون فيه المتحدث والوقت عدا عن النغمات التي تصاحب رنين هذا الجهاز سئ السمعة.
وكما ذكر بعض الزملاء فالإختراع أو الإكتشاف موجود ومطروق في بعض الدول أى أنه لا يعتبر حصري على قنوات الجزيرة الرياضية ، أها في الحته دي يا ريت لو إكتشف أو إخترع أى إنسان قواعد أو عقوبات لابأس تهذب البعض من الذين يسيئون إستخدام هذا الإختراع الرائع ، فمثلاً السواق البتكلم وهو سايق يقوم يا سيدي الجهاز يطبظ ليهو عينو عشان يبطل يتكلم ويذكرو إنه سائق عربية في شارع وهو بهذه الكيفية يعتبر مشروع حادث مروري ، وبهذه المناسبة أحكي ليكم القصة دي وهي قطعاً off point زيها وزي أموري كلها في الحياة: سألني مونج ، الله يديه الصحة والعافية ، تعرف ليه الأعور ما بدوهو رخصة قيادة ، قلت ليهو عشان الشروط الصحية يعني غير لائق طبياً ، قال لي ما تفلسفها لي ليه يعني قلت ليهو ما عارف ، قال لي ببساطه لأنه لو وقعت ليهو وقيعه أو تراب أو أى حاجه في عينو وهو يقود مركبه حا يكون أعمي أو مغمض الإتنين البايظه أصلها مغمضة والكويسة بفعل المؤثر الخارجي.
شوف يا مان الإختراع عدا عن أنه مطروق ما حا يخدم كتير فالكثير من الشبكات لمشغلي الخدمة بطش براها "سوداني وقرط على كده" زي ما بتقول الدعاية. بالمناسبة مشكلة المشاكل لو كنت خاتي الموبايل قدامك وفي الصلاة وبعد الناس ما قالو وراء الإمام آمييييييين ، والإمام أخذ ليهو pause كده إستعداداً للسورة التي تلي سورة الفاتحة "في الركعتين الأولى والثانية طبعاً". يقوم موبايلك يرن ويا ريتها رنه عاديه ، دي رنه أقل ما فيها تطلعك من الجنه.
أنا غايتو البعجبني الزمن دا في شوارعنا ساعة المسلسل تلقي واحد أو واحده لا فرق كابه نقه ناااااااعمه والجو هادي طبعاً غبعهود قد خلت كان النقه وجها لوجه يعني تجكس في الساعه ديك ، لكين هسي بالموبايل يا مان.
يبدو على أنني طبظتها زحا أخزض في موضوع لا علاقة له بالموضوع تحياتي ووفقك الله وسدد على طريق الخير والنجاح خطاك.

اخي almulaomar تحياتي

يبدو أننا فعلاً في حاجة لتقويم في الكثير من الامور وفي الكثير من القيم التي في طريقها للإندثار