Post: #1
Title: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-24-2010, 04:50 PM
إتدمدم نوم
غبار وعجاج ما يدي الدرب .. سيارات كثيرة تجوب الأرض ... العسكر والشرطة في سباق تسلح محموم
الصحف السياسية تملأ أرفف المكتبات ... السوق عايز جرايد هلال مريخ .. لا أحد من المواطنين الذين
إلتقي بهم مهموم بأمر الإنتخابات ... أظنها حالة إحباط قد تمكث طويلاً وقد تغور في 60 عما قريب
الشتاء يطل من جديد كأنه جاء هو الآخر ليضيف لأعباء البسطاء عبئاً جديداً ..
في الحافلة لا تكاد تسمع صوتاً الجميع واجمون و(واجمات) حتي الونسات إياها ماعادت لكأن الصمت أضحي
دستوراً لهذا الوطن الذي لا يصمت علي الإطلاق مسؤوليه وربراباته .
في الشارع لمحت إعلاناً يدعوا لدعم السيد رئيس الجمهورية من صيغة الإعلان تتأكد أن من قاموا بتصميم
الإعلان لا يطيقون الرجل فالصورة التي وضعت أنسب لأن تكون صورة نعي في صفحة داخلية لرجل قضي عمره هارباً
تساءلت ونفسي ياربي الاعلان ده عملوا ناس المعارضة ولا إعلام المؤتمر الشعبي ؟
ماعلينا فالننتظر ونري نتائج الانتخابات .
أول الأمس ذهبت لتأبين يقيمه أصدقاء الراحل مصطفي سيد أحمد جاء المغنين وأطربوا الناس بأعمال خالدات تركها مصطفي في وجدان أمته قالوا عن الرجل كلاماً يشبه ما ظل يبشر به مصطفي طوال عمر نبوته التي ما إنقطع وحيها بفعل الموت فكان الكلام حاراً بالرغم من الشتاء الكسول الذي سكن جسد المدينة منذ كم تاشر يوم بالتمام والكمال .
تذكرنا ونحن قابعون في مجلس الحزب شهيد آخر من شهداء يناير الرماد كان الذي تذكرناه محمود محمد طه قرأنا علي روحه التساليم والتعاظيم أنبنا ضمير أبناء أمتنا محكامي الرجل بلا جريرة تذكر سوي فاجر الخصومة وحنك السياسة البيش فماذا جنت البلاد من شنق الرجل ؟ هل تمدد الاسلام أم تمدد الاسلام السياسي يا سادة .
ما إن تحركت الحافلة بإتجاه (جاكسون) حتي خرج من شارع جانبي دورية مرور . أقفوا السائق ثم طلبوا منه الترجل من مركبته والذهاب الي الضابط الذي كان بدوره يتناول (شاي لبن) أبلغ الظن (بلقيمات) غاب السائق لربع ساعة بالتمام والكمال وصوت مغنية شابة تحيل الصباح ببركات صوتها لتمرين بقامة (القيامة) تغني بطريقة تجعلك تستفرغ ماتناولته في عشاء البارحة ثم تستغفر الله علي مآلات واقعنا الثقافي (المقفي) أو (لمغفل) أيهما أنسب .
يعود بتاع الحافلة الآن ماعاد يحمل لقب سائق بل هو أقرب الآن لمفاوض فشل في تقريب وجهات نظر منتدبيه يسب الرجل ويلعن وما أن يمشي قليلاً حتي يتعلل بأن عطباً أصاب دابته ليتركنا في صقيع (الشارع) إنتظاراً في قدوم مفاوض آخر ناج من مقصلة (الإيصالات) . وهكذا وهكذا وهكذا
أثناء وقوفنا الجديد لمحت من علي البعد شابة أنيقة تتحرك بنشاط لا يخلو من إفتعال جاءت الأخري لتنضم لموكبنا المنتظر ما أن وقفت حتي لوحت بيديها الوسيمتين فتوقفت فجأةً حركة المرور أي والله توقفت حركة المرور فتقدمت بذات الخطي المفتعلة لتستقل من وقع عليه الإختيار وهي خدمة دخلت بلادنا حديثاً تحت مسمي (حصلني قبل الجد يفوت) ضمن الكائنات التي دخلت مع إفتتاح دولة المشروع الـ(حصاري) .
تعجب رجل ستيني العمر من جرأة البنت ثم أعلنها داوياً وهو يبتسم ابتسامة خبيثة أحالت هي الأخري صباحنا لصباح (ثعلبي) قائلاً :
هي يا بتي لكن ما بالغتي ..!
دحين البالغ منو ؟ يا عمنا
أنت أم الصباح أم أنا أم بتاع الحافلة أم ناصبي المشانق ؟
كل شئ جائز هالأيام ولا إكراه في الخرطوم
|
Post: #2
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-24-2010, 04:56 PM
Parent: #1
والجدير بالذكر
انو الكهرباء قاطعة من عصراً بدري
وبطارية الموبايل تقول خذوني
فلو ما جينا اعذرونا
ـــــــــ
بمناسبة الكهرباء مسؤولين من الخير وين اخونا محمد فرح ؟
|
Post: #3
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Osman Musa
Date: 01-24-2010, 06:03 PM
Parent: #2
عاين .
عاين يا خضر
العالم الخامس أصلو كدى .
أيام عمرك كلها تطلع فشوش .. تتدفق ساكت .
مابين الخفجى و SACRAMENTO والحافلة..
يا سلام .
القصة يا خضر نحنا طوالى طوالى أمام الباب المسدود .
ورغباتنا بقت فى اطار التأملات والآمال .
..
عليك الله سلم على أى زول يسلم عليك .
|
Post: #4
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-24-2010, 07:31 PM
Parent: #3
والله ما فضل شئ ياعثمان
أعجبني كون أننا الآن فقط وجدنا إسماً
يليق بعالمنا الماشي .
قلت لي عالم خامس
لالا ياخ
ده عالم يجنن عديل
ــــــــ
حمدالله الف علي سلامة (كتاب)
وياريت لو عندك ليهو رقم لمنا فيهو وينوبك عن الثواب ثواب
|
Post: #5
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Osman Musa
Date: 01-24-2010, 08:54 PM
Parent: #4
والله يا خضر أقولك كلام .
كتاب ده لابد وضرورى ضرورى تمشى تشوفو .
والتلفون يصلك تب أنشاءالله .
..
من يومين يا خضر كنت اتحدث
عن الانتخابات والحال فى السودان .
مع أمريكى عجوز أشتغل فى السودان سنة 1958 .
أها يازول الكلام جاب الكلام .
لقيت عمك يحب سودان زمان حب شديد .
قال : فى الحتات ديك السودان كان أكثر البلدان تقدما . كان فى ازدهار .
عمك ضحك وقال : التعامل مع الشعوب بعقلانية مهم .
قال المشاكل دى ما بسبب عدم كفاءات السودانيين بل بسبب فساد ونفاق الحكام .
..
سلامات
|
Post: #6
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خدر
Date: 01-24-2010, 09:04 PM
Parent: #5
حكي جميل , انا مستمتع و متابع يا صاحب
عاوزين البوست ده يصل بوست الزقازيق بالله
يوميا تجي تحكي هنا
و إذا مافي جديد تجي تقول ( الوضع مستقر اليوم )
او ( لم اكن في مزاج يتيح لي المراقبة و التسجيل)
شغل حلو يا صاحب
عثمان موسي
توقع تلفوني يا جميل
|
Post: #7
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Osman Musa
Date: 01-24-2010, 10:03 PM
Parent: #6
طارق أبوعبيدة
ياعزيز .
عليك أمان الله وحشتنا .
أكيد عودتك يا فنان بعثت فى أمستردام الفرح تانى .
حفلتك فى VA داك الليل يا خدر تدفقت فيها غناء وأدب وتهذيب
كل الناس يشكروك ومتكيفيين .
والله شرفتنا كتير كتير .
تحياتى
|
Post: #8
Title: Re: هي لكن ما بالغتي .... يا الخرطوم اذا نامت عليكي هموم ...!
Author: الوليد محمد الامين
Date: 01-24-2010, 10:30 PM
Parent: #7
علي سبيل التحية لخضر والأصدقاء
الي حين تتسهل لنا الكتابة ....
|
Post: #9
Title: Re: هي لكن ما بالغتي .... يا الخرطوم اذا نامت عليكي هموم ...!
Author: ندى عثمان حسن
Date: 01-25-2010, 04:44 AM
Parent: #8
Quote: لكأن الصمت أضحي
دستوراً لهذا الوطن الذي لا يصمت علي الإطلاق مسؤوليه وربراباته |
لكن الوطن ينضم , والمسئولين ينضموا , البسمع منو لكن؟
وآآآدى قعدة هنا
|
Post: #10
Title: Re: هي لكن ما بالغتي .... يا الخرطوم اذا نامت عليكي هموم ...!
Author: محمد عبد الماجد الصايم
Date: 01-25-2010, 06:20 AM
Parent: #9
حاج خدر ..
يمين دي خرخرة ساااي منكـ!!
|
Post: #11
Title: Re: هي لكن ما بالغتي .... يا الخرطوم اذا نامت عليكي هموم ...!
Author: حمزاوي
Date: 01-25-2010, 07:00 AM
Parent: #10
| Quote: هي لكن ما بالغتي .... يا الخرطوم اذا نامت عليكي هموم ...! |
هضر اخوي
والله بقيت شديد في العربي
اتعلمتو كيف المطلع زيتنا دا
بقيت تعرف المؤنث والمذكر
مافي حاجة بيخلبطني الا التأنيث بتاع العربي
يا عمك يا ودالصائم
شوف صاحبك صار يكتب بالعربي الفصحى
|
Post: #12
Title: Re: هي لكن ما بالغتي .... يا الخرطوم اذا نامت عليكي هموم ...!
Author: محمد عبد الماجد الصايم
Date: 01-25-2010, 07:35 AM
Parent: #11
يا خال .. قادر الله!!
لكن هو ما باااالغ!
|
Post: #19
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:29 PM
Parent: #11
والله لكن يا حمزاوي
قلت لي العربي ده عامل ليك عمايل
انا لله
ياخ كسروا وما تشتغل بالقصة دي كتير
بما انك نوبي وصاحب حضارة وصاحب (ودالصايم)
انت عامل شنو والسعودية دي حتفكها عكس الهواء متين ؟
يعني مثلاً بعد كم سنة يا حاج حمزاوي؟
الله يعين
|
Post: #18
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:27 PM
Parent: #10
ودالصايم
وينك ياخ والشوق الواحد
خرخرة شنو يامان والله نحنا الخرخرة دي زاتها شايفنها شوية
في توصيف الحاصل .
مشتاقين والله
|
Post: #17
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:23 PM
Parent: #9
تحياتي ياندي
عارفة قصة النضم ده حقوا يكون بالدور من هنا ولي قدام
يعني حبة ينضموا المسؤولين وحبة ينضم وطنا البقي أبكم ده
طوالي نقة مسؤولين دي ما بتجي
شبعنا شعارات وشبعنا هتافات
غير ان الجوع حاصل في كل مناحي الحياة ياندي
سلمتِ
|
Post: #15
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:17 PM
Parent: #8
يا دكتور الوليد
انت بالتحديد البوست ده ما تجي تقول لي فيهو
علي سبيل التحية والكلام المن النوع ده
انت تتوهط وتكتب
ــــ
وبعدين شنو عامل مني نايم
أما بتبالغ
|
Post: #14
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:15 PM
Parent: #6
ياخدر
اريتك طيب ياخ
حسناً
تتناول المجالس هنا آخر طرفة بخصوص الانتخابات وهي تتعلق بترشح السيد محمدابراهيم نقد
لانتخابات الرئاسة .
المهم قال ليك في مجموعة من الناس قاعدين يطشمو
في زول طرح خبر ترشيح نقد لانتخابات الرئاسة
أها في زول قام نط فوق وقال والله أجمل من الخبر ده
مافي . صن شويتين وقال بس في مشكلة واحدة
المعاه قالو ليهو المشكلة وين ؟
قال ليهم : نفترض انو نقد فاز وبقي رئيسنا
الزول ده لو إختفي فجأة نحنا حنعمل شنو؟
ــــــ
قصصنا البي هنا ما بتكمل ياخدر
غايتو الا الكهرباء ولا النت يقطع
تحياتي يافردة
|
Post: #13
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:05 PM
Parent: #5
عثمان موسي
يخ كويس اني لميت في زول يديني تلفون الزول الممتع ده
بكل تأكيد حأمشي ليهو
بخصوص كلام الراجل الامريكي ده ياعثمان
قبل يومين بقرأ في حوار عاملوا الاستاذ محمد جلال أحمد هاشم
مع خواجات وخواجيات عملوا في التدريس ونية هؤلاء في تنظيم
رحلة للالتقاء بأصدقائهم وطلابهم .
تخيل شلت ليهم هم عديل يا عثمان
الناس ديل علي الايمان حتجيهم (النفيسة)
هم قايلين البلد دي زي زمان
كان ليهم والله
ــــ
أما بخصوص الفساد
فالموضوع ده بقي يعمل لي فلايت أجارك الله
|
Post: #16
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Elmuiz Haggaz
Date: 01-25-2010, 01:18 PM
Parent: #13
خضر يا أيها الحكاي...
منتظرين باقي الحكاوي عن خرطوم الجن دي.
|
Post: #20
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:41 PM
Parent: #16
حال ماهو حال يا أخانا المعز
اليومين ديل في شتاء ناعس
شغال شغل نضيف
بدورنا نردد خلف سميح القاسم في وصيته لدرويش
يا محمود : إحذر البرد والشرطة
ياله من ثنائي قاهر يا المعز
ـــــــــــــ
الحكايات قادمات
بس ربنا يسهل في تساهيل الكتابة (والجية والمشية)
سلمت
|
Post: #21
Title: Re: هي لكن ما بالغتي .... يا الخرطوم اذا نامت عليكي هموم ...!
Author: حمد فتح الرحمن
Date: 01-25-2010, 01:44 PM
Parent: #13
تعرف يا خضر
مشكلتك الانقليزي يا خضر الانقليزي يا خضر
يا الله ياخ
هابي نيو إيييييييييير
|
Post: #22
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 01:49 PM
Parent: #21
لو سمحت ياحمد
البوست ده جادي
جادي خالص ما تخستك
ثم أخونا بدري بتاع هبينيواير
عامل شنو لغتوا اتصلحت ولا لسع
شابك الهنود ييس نوو يا يا يا
قادر الله
ومشتاقين يا حمدأمبس
|
Post: #23
Title: Re: هي لكن ما بالغتي .... يا الخرطوم اذا نامت عليكي هموم ...!
Author: حمد فتح الرحمن
Date: 01-25-2010, 01:59 PM
Parent: #22
الود حنعرس ليهو يوم 20 /2
شفع اخر زمن يا خضر
و انتا جاي راجع متين ؟
|
Post: #24
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 04:41 PM
Parent: #23
تهانينا للصديق بدري
وبيت مال وعيال
بلغه تهانيي ياحمد ورجاءاً مدني بهاتفه
ـــــــــ
بخصوص الرجعة :
خلاص بطلنا يا حمد
والعاقبة عندكم في الجيات
|
Post: #25
Title: Re: هي لكن ما بالغتي .... يا الخرطوم اذا نامت عليكي هموم ...!
Author: نجلاء قرافي
Date: 01-25-2010, 05:38 PM
Parent: #24
ياهدر
تفتكر الخرطوم ياها زاته ايام الاهليه وبعد الاغتراب ولا بقيت تعاين ليها بعين العائد... نظره فاحصه لايجاد الاختلافات .
تفاصيل مكرره لكين قلمك ضبطها زي زيت السمسم بظبط الفول جنس ظبطه .
بالله كتير لينا من زيت السمسم سمح؟
|
Post: #26
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-25-2010, 07:58 PM
Parent: #25
والله كان زيت سمسم ماعارفو يانجلاء
ازيك يازولة وسلامة الجية
العين ياها ذات العين والقلب نفسوا
الا أيام الأهلية زيها مافي تاني ... كانت أيام سمحة بالحيل
والوطن نفسوا كان معقول ومطامن والأمل كان (كبير)
ياخ تشكري علي تذكيرنا بأيام الجامعة و(اللافتات اللامعة)
سلمتي ياشابة
|
Post: #27
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Omer Musa Abbas
Date: 01-26-2010, 08:51 AM
Parent: #26
خضر والجماعة الحداهو
سلام
انا بركب في الحافلة دي وبدنقر ساي
ما فضل شي قدام يعاينو ليه
غايتو
نشوف اخرتا شنو
|
Post: #28
Title: Re: هي لكن ما بالغتي .... يا الخرطوم اذا نامت عليكي هموم ...!
Author: الوليد عمر
Date: 01-26-2010, 09:43 AM
Parent: #27
....
خضر الصاحب ..
نعلك عافية أخوى
حكيك دايماً طاعم .. لامن مؤلم
كأنو كلامك قاعد يكتبك
مش إنت القاعد تكتبو
أمرق على الشارع الماسخ دا
أشرب منو ، وتعال أدلقو لينا هنى دا
خلي بطوننا ال.... تطم ذاتو ..
مشتعلقين نحن ياخ
.....
|
Post: #29
Title: Re: هي لكن ما بالغتي .... يا الخرطوم اذا نامت عليكي هموم ...!
Author: سلمى الشيخ سلامة
Date: 01-26-2010, 12:58 PM
Parent: #28
واحلالى يا خضر اتاريك سمح قدر كدى؟
ما صدقت انى لاقيتك رغم المدة القصيرونة
لكن ما تزال الاصداء فى داخلى ترن وترن وترن
الخرتوم ؟الله ياخ دى بلد عجيبة لا بتقدر تفارقا ولا بتقدر تضمها عليك
مش حاجة غريبة ؟
اول مرة امشى ميدان جاكسون
كان يوم التلاتاء 5 يناير
كنت ماشه تابين صديقى نجم الدين نصر الدين
نزلت من الحافلة حقت امدرمان
وقعدت اتلفت فى ميدان"بومباى"
ناس من كل لون حاجة سمحة طبعالانى مع الكوزمبوليتانية"
شى هنود ، وشى بنغال"غال" شنو ؟
وشى مصريين ، وشى ماشى
احسن حاجة انى لاقيت صديق قديم اسمه على الامين فنان تشكيلى
المهم فضلت ماشه واتفرج فى الخلق
جكس لابس "الشريعة طرشقت"واحدات لابسات حاجات كدا اول مرة اشوفا
مابقدر اوصفازاتو
اتلفت زى بياع "الغريبة" ومشيت ومشيت لمن ابليسى خجل
حتى لقيت المواصلت حقت العمارات
لاحظت كمية من العطالة المقننة يعنى ناس ماعندها سبب يخليها تاخد حق ما حقها
اى عربية تطلع عندهم فيها"خمشة"
ما حسادة لكين ليه؟
المكان ما نضيف مفروض العايد دا يمشى للنضافة ياخى مش؟
|
Post: #32
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-27-2010, 04:43 PM
Parent: #29
سلمي
كيفنك يا زوله
شنو ماصدقنا لمينا في دريباتك قمتي كسحتي
بالله أمريكا دي سمحة للدرجة دي ؟
شفتي يا سلمي ميدان جاكسون ده ممكن تلقي فيهو أي
زول مطول منو وعادي تلقي زول رايح عديل من سنوات
حاجة أشبه بالقيامة أو يوم القيامة لو أضفنا خاصية
القليان .
أما العائد البمشي للنضافة فخلي ساكت ، لأنو لو فتحنا
الجبهة دي مسؤلة من الخير المسؤولين زاتهم مفروض يمشوا
للنضافة قبال العائد . البلد دي محتاجة غسيل ومكوة عديل
بعد داك كان تستعدل .
مشتاقين والله يا فردة
|
Post: #31
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-26-2010, 08:44 PM
Parent: #28
الوليد عمر
خبيراتك يا صاحب ووين الحي بيك
أمرق علي الشارع أكتر من ده كيفن يا صاحب؟
تحياتي الأكيدة
ــــــــــ
جاييكي يا سلمي
فصبراً آل سلامة
|
Post: #30
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 01-26-2010, 05:56 PM
Parent: #27
عمر العزيز
طبعاً لما قريت كلامك ده قلت
الزول ده وصل حتات صعبة بالحيل
ياخ (الدنقير) ده ما حبابو
عاسن فس شارع الله ده صدقني
في حاجات بتستاهل والله
كن بخير
|
Post: #33
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Osman Musa
Date: 01-28-2010, 06:23 PM
Parent: #30
خضر سلامات .
كلام الحافلة جاب الكلام
شوف يا خضر بلدنا زمان كانت كيف ؟
كان فى الخرطوم القديم وبعض المدن لو ركبت البص الصباح الساعة 7
ليك الحق ترجع بنفس التذكرة حتى الساعة 1
وكان مكتوب على ظهر التذكرة Please keep your transfer during your trip
وكت كنا يا خضر بنتعامل تعامل متمدن . الجيران الجاى والجاى كانوا نوم تقيل .
.. شوف هسع حافلتك .. والله أيام يازمان زى ما قال مصطفى سيد أحمد .
لكن برضو سلامى وكتير احترامى للخرتوم الخرتوم دى عسل مهما ضاقت الكلابيش .
|
Post: #34
Title: Re: هي لكن ما بالغتي .... يا الخرطوم اذا نامت عليكي هموم ...!
Author: محمد غلامابي
Date: 01-28-2010, 07:55 PM
Parent: #33
Quote: لكأن الصمت أضحي
دستوراً لهذا الوطن |
لكثرة الفواجع ياخضر أصبح الناس في بلدي لا يتحدثون
فاجعة أخرى أنني لسبب مشاغل العمل الكثيرة لم أتمكن من الونسة معاك في البلد
.... إنما ياخضر وصفت البلد دي بتفاصيل لم ننتبه لها نحنا القاعدين فيها يوماتي
آآآآخ يابلد
غايتو...
|
Post: #35
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 02-03-2010, 01:57 PM
Parent: #33
اليوم يا عثمان تذكرت وأنا أظفر بمقعدي الذي أحب
جالساً في الصف الأخير علي الشباك ، ياخ دار جدال
لطيف بين الركاب دون مقدمات بخصوص (الكلاب اياها)
أحدهم أجزم أنها قادمة من النيجر وآخر حلف طلاق تلاتة
إنو الحيوانات المتوحشة دي جات من جهة مصر
المهم أن الرجل الذي يجلس بجانبي مباشرة صرخ بصورة
هستيرية في الناس طالباً إياهم الصمت لإمتعاضه من السيرة
وظل يقول بصوت أقرب للجنون :
ما معقول في البيت كلاب
في الشارع كلاب
في الحافلة كلاب
الجرائد كلاب
ثم أوقف الحافلة بذات الصورة الهيستيرية وقفز لاعناً الركاب
ولاعناً الكلاب ولاعناً كل ما من شأن أن يلعن .
غايتو أخدنا نصيبنا من اللعنات ثم واصلت سيري ولكأن لم يكن
|
Post: #36
Title: Re: هي لكن ما بالغتي .... يا الخرطوم اذا نامت عليكي هموم ...!
Author: Elmuiz Haggaz
Date: 02-03-2010, 03:02 PM
Parent: #35
Quote: قال ليهم : نفترض انو نقد فاز وبقي رئيسنا
الزول ده لو إختفي فجأة نحنا حنعمل شنو؟ |
غايتو يا أصحاب اللقب الرنان تفلقوا وتداووا براكم.
ضحكت حتى بان طعم فتة الفطور في حلقى.
تسلم يا خضر.
|
Post: #38
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 02-03-2010, 08:21 PM
Parent: #36
والله شر البلية ما يضحك يا المعز يا صديقي
الناس دي هنا بقت تنتج نكات بشكل يمغس عديل
|
Post: #37
Title: Re: هي لكن ما بالغتي .... يا الخرطوم اذا نامت عليكي هموم ...!
Author: محمد أحمد إدريس
Date: 02-03-2010, 03:17 PM
Parent: #35
Quote:
اليوم يا عثمان تذكرت وأنا أظفر بمقعدي الذي أحب
جالساً في الصف الأخير علي الشباك ، ياخ دار جدال
لطيف بين الركاب دون مقدمات بخصوص (الكلاب اياها)
أحدهم أجزم أنها قادمة من النيجر وآخر حلف طلاق تلاتة
إنو الحيوانات المتوحشة دي جات من جهة مصر
المهم أن الرجل الذي يجلس بجانبي مباشرة صرخ بصورة
هستيرية في الناس طالباً إياهم الصمت لإمتعاضه من السيرة
وظل يقول بصوت أقرب للجنون :
ما معقول في البيت كلاب
في الشارع كلاب
في الحافلة كلاب
الجرائد كلاب
ثم أوقف الحافلة بذات الصورة الهيستيرية وقفز لاعناً الركاب
ولاعناً الكلاب ولاعناً كل ما من شأن أن يلعن .
غايتو أخدنا نصيبنا من اللعنات ثم واصلت سيري ولكأن لم يكن
|
ولو ركبتْ فى راسو من قرفو يمشى لوزير الثروة الحيوانية ويرشقو بحذائه لأتت الصحف وأفتت بمرضه النفسى
ولأنبرى احدهم هنا وهو يتأسف على أن إبن حبوبته المريض قد رشق الوزير .
كيفك يا خضر يا عريس . . . ما زلت عريساً فى قاموسنا حتى يسحب منك اللقب فحلٌ آخر من القبيلة .
|
Post: #39
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 02-03-2010, 08:26 PM
Parent: #37
Quote: ولو ركبتْ فى راسو من قرفو يمشى لوزير الثروة الحيوانية ويرشقو بحذائه لأتت الصحف وأفتت بمرضه النفسى
ولأنبرى احدهم هنا وهو يتأسف على أن إبن حبوبته المريض قد رشق الوزير |
عزيزي وقريبي أبو إدريس
تحياتي الحارة
قبل أيام قريت هنا نكتة بمناسبة الحذاء يقول راويها :
إنو في واحد سحب ترشيحوا من رئاسة الجمهورية قائلاً :
كمان جابت ليها جزم
والله أنا في حيرة عظيمة أمام تطور وسائل الرفض الحديثة
مشتاقين يا رجل وتحياتي يا عظيم
|
Post: #40
Title: Re: هي لكن ما بالغتي .... يا الخرطوم اذا نامت عليكي هموم ...!
Author: الوليد محمد الامين
Date: 02-03-2010, 10:52 PM
Parent: #39
Quote: ثم أوقف الحافلة بذات الصورة الهيستيرية وقفز لاعناً الركاب
ولاعناً الكلاب ولاعناً كل ما من شأن أن يلعن .
|
أها يا خضر يعني الزول دا دفع والا اتوصل ملح ساكت !
|
Post: #41
Title: Re: هي لكن ما بالغتي .... يا الخرطوم اذا نامت عليكي هموم ...!
Author: abubakr
Date: 02-04-2010, 07:44 AM
Parent: #40
ميدان "جاكسون" ميدان "بومباي " .. البنية توقف الحركة وانا ما شفت زولا وقف الحركة الا "بشري" الشهير في صينية البركس زمااااااان ..
يا قريبي .. الحاصل شنو ؟؟ انا لي "عقود" من الخرتوم ....؟؟ زمااااانك اهلنا ( اول من اغتربو في السودان وبعدين بقو اول مهجريين ..الخ) كان جماعة منهم اها يجو راجعيين بعد "عقود " يا من الشمال المصراوي او من وراء البحر الابيض المتوسط او الاحمر ولكن هم يكونو اتغيرو ( شي رومانيزم وشي كانراكت في العيون .. وطقم اسنان فضة او دهب ما تيسر) وبرضو يلقو "البلد" ياها البلد ما اتغيرت .. والحنية ياها الحنية .والنخل ياهو النخل والجزر ياهن الجزر ... بس الجنيات كبرو وعدد القبور زادت شوية( كان الموت عندها رحيما ) ....
انتو هسع وانا من زمن ميدان ابو جنزير طلعتو لينابميادين جاكسون وبومباي وبنية توقف الحركة ....
يااااااه
|
Post: #42
Title: Re: هي لكن ما بالغتي .... يا الخرطوم اذا نامت عليكي هموم ...!
Author: ندى عثمان حسن
Date: 02-04-2010, 08:02 AM
Parent: #41
| Quote: الخرتوم دى عسل مهما ضاقت الكلابيش |
سلامو ياخضر
|
Post: #43
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 02-04-2010, 05:46 PM
Parent: #40
| Quote: أها يا خضر يعني الزول دا دفع والا اتوصل ملح ساكت ! |
أقول ليك لعن كل ما من شأنه يا صاحبي تقول لي دفع ؟
هو بلا الدفع البخلي يسب شنو؟
|
Post: #44
Title: Re: هي لكن ما بالغتي .... يا الخرطوم اذا نامت عليكي هموم ...!
Author: خضر حسين خليل
Date: 02-10-2010, 03:39 PM
Parent: #1
اليوم قابلت ذات الرجل الستيني
تسالمنا ثم ودعته ومضيت
وابتسامة كبيرة تعلوني من الوريد الي الوريد
|
|