مواطن يحصل على 8 كيلو من الذهب ويودع الفقر باذن الله ...

كما وصف لى عثمان يوسف (الهمباتى) العائد من وادى قبقبة الممتلىء بالذهب والناس هذه الايام فقد وصف لى حظ الشاب(ع.ب) من منطقة القمبرات شمال بربر، بالحظ السعيد اذ ظفر بكتلة ذهب على هيئة دجاجة ابعدته عن دائرة الفقر تماماً اذ انها تزن ثمانية كيلو جرامات ويبلغ سعرها قرابة المليار إلا قليلاً..
عثمان من قرية فتوار شمال الباوقة رغماً عن اراضيه الشاسعة التى ورثها من لدن اجداده الا انه اتجه للعمل فى التنقيب والبحث عن الثراء فى اودية الذهب المنتشرة فى نهر النيل بدءاً من الحجاجية والعبيدية انتهاء بـ (قبقبة) و(المعقل) و(نصب الحصان) و(نقارة) و(جبل الرجل) والذى سمى على لقب مواطن من العبيدية ينادونه بـ (الرجل) وهو اول مكتشفي الذهب الوفير فى ذلك الجبل «خم كفايته وترك للآخرين باب الثراء غير موارب»..
يقول عثمان ان الذهب بالمنطقة عبارة عن متخلفات اثرية من زمن العنج الذين استوطنوا المنطقة عقب المملكة المروية ففى منطقة العنج الخلوية الواقعة بين ابو حمد حتى تخوم شرق السودان كانوا يقومون بـ (تضرية) الذهب تماماً كما نفعل معشر المزارعين مع العيش والقمح وتركت تلك المخلفات التاريخية قيزاناً وتلالاً قصدها الباحثون بعد آلاف السنين ينقبون عن الثراء..
ويرى باحثو الثراء المعاصرون ان جبل ام فتفت الشبيه بكرشة البهيمة لتعرجاته ونتواءته يوجد حواليه حوالى «15» الف منقب لما احتشد به من ذهب لا يحتاج لكثير عناء.. بعد سماح السلطات المختصة بالتنقيب عبر الاجهزة المختصة والتى يتراوح اسعراها بين الـ «15» الى «45» مليونا من الجنيهات ترك المزارعون والموظفون محدودو الدخل وظائفهم ورحلوا الى هناك.. عليك بعربة لحمل الماء واخرى لحمل المؤنة والاكل ثم ان الخالق رازق عقبئذ..
السوح هى المناطق التى بين الجبال يتخذ منها المنقبون مسكناً وبحثاً عن ثروات باطن الارض بينما ينتظرهم الصاغة فى سوق ابو حمد والعبيدية وتصل سعر المداولات المالية الى «4» مليارات يوميا، فالذهب الذى تتم معالجته وغربلته وتجميعه بالزئبق يومياً يصل الى «20» كيلو جراماً فى أسوأ حالاته على حد قول محمد كرار ورفيقه فى الكوماج التنقيبى عثمان هنباتى.. ففى الغالب الذهاب لهناك عبر مجموعات وتوزيع الحظية ثلث لصاحب العربة وثلث لصاحب الجهاز الكاشف عن المعدن وثلث للايدى العاملة..
مصدق (السكران) وهذا لقبه يعتبر من اشهر الشخصيات بمنطقة التنقيب فهو بمثابة شيخ الخلا رغما عن سنه الصغيرة كريم ومفضال وطريف ابتسم له الحظ باربعة كيلوجرامات بعد ان عبث له مراراً، فقد وجد صخرة كشفها له الجهاز باصدار ازيز مفرح فراح محتضنها وصائحا وداعاً للفقر ثم لما زحزحها من مكانها خرج بـ (فلايت) فى الضهر و(جرام واحد) فقط!! أما حسن قبورة (62) عاما فرغماً عن عامل السن زامل الشباب فى المشقة المربحة، فكان نصيبة مسماراً قد سما حفر له كذا مترا بعد ان ظن وظنه جهازه ذهبا!!
وآخرون منهم (م.ا) من منطقة الردى كان حظهم كبيرا اذ وجدوا (عتبة) باب من الذهب حصيلتها «18» كيلو جراما بعد حفر قليل.. وقليل جداً.. انه الحظ فحسب!
آخر المحظيين بثروات باطن الارض من منطقة الردى الاسبوع الفائت وهى من قرى شمال الباوقة اذ ظفر بستة كيلو جرامات مرة واحدة فى منطقة النجيم شمال شرق ابوحمد.
عثمان قضى «40» يوماً فى الخلاء قضاها كعامل بيده قال ان اجرة العمال فى المناقب تصل الى اربعة ملايين فى الشهر وهذا مالا يجنيه من عناء موسم زراعى (ناجح) رغما عن اراضيه الشاسعة بمنطقته قال (الزراعة ختينالها القدرها)..


الراي العام

الخبر قرأته قبل قليل في منتدى الباوقة...

http://www.albawga.com/forums/showthread.php?t=2107

..
.
الصحفى حسام الدين ميرغنى
ومنتدى الباوقة
وانت .._ واشار لود الباوقة_
قطعو رزق الراجل ..
ووين يودع الفقر ..؟؟
كدا رسلتو ليه هيئة حماية الاثار والضرائب
والامن والحرامية وكل الهمباتة

_______

الله يعينك يا عثمان
عملتها براك فى نفسك
خشمك خفيف خلااص

يا اخوانا الدهب دا

دهب الخلا

و اللا دهب البلد؟؟؟

Quote: الخالق رازق عقبئذ

عقبئذ دي من أي وادي ؟؟؟

دي أكيد حصيلة الصحفي ده من دجاجات الوادي

Quote: الصحفى حسام الدين ميرغنى ومنتدى الباوقة وانت .._ واشار لود الباوقة_ قطعو رزق الراجل .. ووين يودع الفقر ..؟؟ كدا رسلتو ليه هيئة حماية الاثار والضرائب والامن والحرامية وكل الهمباتة _______ الله يعينك يا عثمان عملتها براك فى نفسك خشمك خفيف خلااص

جنس خفه هي لاكن يا تبلدينا, والله انا زاتي اول ما قريت الخبر قلت الزول ده كان يسكت هسه يجوه ناس الاثار و لو جل من ديل الضرايب و الجبايات و هلمجرا

..
.

Quote: جنس خفه هي لاكن يا تبلدينا, والله انا زاتي اول ما قريت الخبر قلت الزول ده كان يسكت هسه يجوه ناس الاثار و لو جل من ديل الضرايب و الجبايات و هلمجرا

ووين يا دندونه .._وتم حذف ياء الملكية_
عليك الله ما بالغ ..
داير يغنى وكمان يشتهر ..
دقس الفارة .. او كما يقال _ فى الشارع السودانى_

________

عموما غايتو لو طلع ليهو بمليون ما قصروا
معاهو احسن حاجة يتخارج الليلة قبال بكره ..

Quote: عثمان يوسف (الهمباتى) العائد من وادى قبقبة

يا ود الباوقة عثمان دا ابن شقيقتنا.بعدين الصورة دي انا المالك لحقوق نشرها(عرق جبين كمرتي و يا ها دي كاملة)و بالمناسبة يا عمر البحش في الملوخية دا خضر ابو الفتح الخواجة.غايتو نشوف لينا طريقة نشتكي لي ناس الملكية الفكرية يمكن نلقى حاجة

أما حسن قبورة(62 عاما) يا المسافر
وهو اخونا الأكبر



حسن قبورة و عثمان الهمباتي في الطريق الى قبقبة

قبقبة ويا الدهب النفيس والباهي لونك وغالي
شارد فكري فوقك وفيك سارح بالي
جيتك والعشم فوقك تتم آمالي ياخي أديني منك بالحجار وتسالي
قبقبة نفسي أزورها وليها ناوي القومه بي سبب الدهب عينينا جافت نومها
يا الله الكريم أدينا بكسي وقومة واقهرنا العوارض وقبضة الحيكومة
والبكسي إن قبض حتماً مصيبته مصيبة حلمك بنتهي وعيشتك بتبقى عصيبة
بيصادروا الجهاز وعليك بفرضوا ضريبة تبكي عليهو وتحن ذي الفقدت حبيبة
قبقبة ليها ماش إن حتى بي كرعي أجمل من إقامة وشقة بالمنشية
يا الدهب المتبر ليك مني تحية يا الله الكريم أطنان لكيك وخلية
مفقود السنين الليلة جات أخبارو راجع بي جهاز الليلة عاد لي دارو
خلاه السفر شغلوا الدهب وأخباره راجع لي الخلا وعدسوا وكتر غبارو
والحلال فضت عدمت شبابها رجالها بي جيب الدهب صبحت نفوسها شغالة
سافروا قبقبة وقصدوا السيوح وجبالها والبيت الكبير الليلة حارسو حتالة
تسرح بالجهاز وتمنى نفسك كيلو تمسح في الأرض بي فد إشارة تشيلو
وإن حظك كعب واتمادى في بهديلو تنعل أبو الدهب للبجي وبمشيلو
مزعج يا أبكدر صوتك غراب إنزم فالح في الحديد فوق الدهب مانمى
طاط ما طاط تكورك وتاني ما بهتمى ينعل أبو صناعتك وما كذب من سمى
والداير الدهب يقع الجهاز الجيبي أفضل مكتشف ياهو البيطفي لهيبي
يا رب العباد أتمنى بيو تنقيبي والقالي خلية تزيد علي ترطيبي
قبقبة مرة قاسية وإلا مابتملا فيها دهب يحير لا كمل لا قل
تزهج منها وترجع تجي وتدلى ذي تمر الفكي وباقة عسل عوض الله
والعجب العجيبة العيشة فيها تحير الوش بالوسخ بصبح دشن متغير
أحلام المنام أحلاها تصبح نير أحلم تستحم وللبستو تغير
آحليل اللحوم بالدمع مرشوشة فارقنا النعيم ومشينا دار الدوشة
ناكل في السخينة قرشنا لي قرقوشة قرقوشاً قسم يجرح حشى الحنكوشة
قبقبة فيها حقيقة مرة بقولها من جواي لومك في نهارك وشمسك الشواية
لومك في سمومك ودا البهد قوايا والعدس البمحن والبجيب لوايا
وإن حظك سمح حتماً خلية قليدة تفرح وتنبسط روحك تزيد تنشيدة
وإن حظك كعب مابتلقى فيها حديدة ترجع بالزعل حمة وعدم توريدة
ويا رب العباد أرزق جميع من زارها يركب ليلى علوي ويبني بيته عمارة
في مسك الختام أنا ود ملوك السارة ود المك سراج إن غف مابتجارا

شعر نزار سراج أحمد الحاج - القمبرات

سؤال بسيط ياود الباوقة مع الاحترام

ليه الحكومة فكت القصة دى ساكت كدا وبتاخد منك رسوم فى طريق سفرك للشمال ولو ماعندك ماتمشى؟
ليه الحكومة دى فكت القصة دى ساكت كدا وبدون اجر ولا خصومات ولا ضريبة فى حين انك بتدفع رسوم نفايات وتشيل الزبالة تمشى تشوف ليها محل براك؟
ليه الحكومة فكت القصة دا ساكت كدا وانت لو اتجرحت فى حادث بس ومشيت الحوادث بدون قروش ممكن تموت عادى لانو مافى قطن او شاش الا تشترى من الصيدلية؟
ليه عائدات الدهب من ارياب ما بتدخل ميزانية الدولة؟
ليه بندفع رسوم كهرباء مقدما فى حين لايمكن توفيرها من الاساس؟
مقابل شنو بندفع جمارك 124% من قيمة المستورد؟
عشان شنو امشى اطلع تصديق بى 100 جنيه عشان ماشى رحلة اروح عن نفسى واهلى؟

ليه وليه وليه؟؟؟

انا لست معارضآ ولا مؤيدا لكن علامة الاستفهام دى بتحمينى النوم

Quote: ليه وليه وليه؟؟؟ انا لست معارضآ ولا مؤيدا لكن علامة الاستفهام دى بتحمينى النوم

ولياتك التلاتة ديل فاكيهن بدون مرافق؟؟؟

مع عدم نومك ده أخاف بعد ده انت بقيت من اختصاص ناس آخرين ود الباوقة أصبح اختصاصه أبراج وذهب والثالثة الأخرى ( ياربي النفط معاهن ولا لا )

نقوم نشوف لينا جهاز وندقش الخلا دا ...

نقوم نشوف لينا جهاز وندقش الخلا دا ...

صفة رئيسية من صفات الكوز المنبري هو الاشادة بالنظام والتبشير له بعدة طرق أحيانا بشكل خجول وأحيانا أخرى بشكل مفضوح.

وهذه الصفة تمكنك من معرفة نوعية الكوز:


1. كوز.
2. كوز أمنجي.
3. كوز مفضوح.
4. كوز متستر.
5. كوز مقدود.
6. مغفل نافع.
7. كوز متعاطف.
8- و الاشياء المشابهة



يجب فضح جميع الكيزان وبعض المندسين الجبناء.
أنه لمخجل جدا أن يدعي البعض الوطنية وهم يقفون مواقف المتفرجين


ومعا لكشف عصابة مافيا الانقاذ وجميع المأجورين

الديك تور . بدل عدم الشغلة القاعد

تسوي فيها في المنبر دا ما تحاول

تمشي الدهب دا .. يمكن ربنا يرزقك

بي ضفدعة منه ...

دجاجة اصلك ما بتلم فيها ..

والله يا حبيبنا الفكرة دي عاملة أرق حالياً

مضحك ان يسرق المواطن ثروته
ومضحك ان تتفرج الدولة علي هذه المسرحية
ومضحك ان المسرحية مازالت مستمرة

ياربي قلتوا نفك الباهيم يسرحوا في سوق الدهب (بنعرف نلمهم بعدين في الزريبة)..بدل ما يسرحوا بهموم البلد...نظام دعاية عن

بص شوف المؤتمراللاوطني بيعمل ايه... وتنمية...وانجازات...(اتذكرت البرنامج المصري..دهب..دهب..دهب.عامله شركة اريل للصابون

.الفائز بدوه جنية دهب..طبعا معظم الفايزين بكونوا من الغلابة اللموا اكياس اريل,,معظمم بغسلوا بيديهم مافي غسالات.).



:).

اخونا ود الباوقة

السلام عليكم .. الأداهم كتلة على شكل دجاجة يدينا واحدة على شكل نعامة

وإن شاء الله حالنا بعد الحال قول آمييييييييين

انت عارف اليومين دي في السعودية أي سوداني أمنيته يشتري جهاز كشف المعادن والذهب

وهو الجهاز المسمى GPX4500 وثمنه عارف كم 6000 دولار أمريكي جديد كرت كرتونه

و3000 ألف دولار مستعمل أها رأيك شنو نشترك لينا واحد أنا وانت تمشي تفتش لينا نعامة دهب في الباوقة دي

والله يتوب علينا من الغربة في المهلكة العربية الســـــــــعودية دي (الها دي مقصودة)

يلا فكر في الموضوع >>>>مودتي

Quote: نقوم نشوف لينا جهاز وندقش الخلا دا ...

لازم جهاز يا ود الباوقة، أصل الواحد متعقد من قصة الأجهزة دى،
من جهاز الما يتسماش داك، وحتى جهاز المغتربين، مروراً بجهاز
الـ -------- اللهم دمر أجهزتهم يا رب، اللهم وسلط عليها من يخافك
ولا يرحمهم ولا يرحم أجهزتهم يا رب.

قبل شهرين، وجد بريطانى يبحث بنفس الجهاز فى مزرعة غيره، وجد كنزا عظيما من الذهب فى أشكال مختلفة ومعه دروع وسيوف
من الاف السنين (قبل زمن قبائل الفايكنج فى شمال اروربا)، وطبعا لأنه مواطن صالح وواعى لأهمية تراث بلده، وقبل ذلك واعى
بالقانون، أتصل فورا بالجهات المعنية بالاثار والمتاحف..
وفى هـذه الحالة تقوم تلك الجهة بتقييم المكتشف من الذهب بسعـر اليوم ويدفعونه له. وفعلا تقاسـم القيمـة مع صاحب الأرض
بالمناصفـة.
أرجو من هـذا الأخ أن يسلم ما وجده للمتحف القومى ويطالب بتعويضـه عن الذهب بالسعـر السائـد.

بالطريقة دي الواحد يعمل جهاز ويمشى تب
ان شاء الله نلقى لينا كراع جدادة ساى

Quote: نقوم نشوف لينا جهاز وندقش الخلا دا ...

والله يا ريت يا ود الباوقة ، وكلم معاك غريبة برضو ، الاتنين ألغوا إقاماتكم ، واتخارجو السـودان ، مركز العبيدية ، أدقشوا الخـلا دا ، القاعدين لها شنو ؟ أنا عندي قريبي مشى هناك لقى ليهو سفينة محملة بالدهب والعاج والياقوت في الفجة ديـك ، ما تفوتكم الفرصة ، أصلكم رايحا ليكم فرصة مالقينها.

Quote: أرجو من هـذا الأخ أن يسلم ما وجده للمتحف القومى ويطالب بتعويضـه عن الذهب بالسعـر السائـد.

يا ابو الريش ..
الكلام ده قالوا ليك فى السودان ، مش بريطانيا ..
يطالب بى تعويضوا ؟
اقسم بالله جدادة يتعشى بيها ما يلقاها .. قال يسلم جدادة دهب !!!

Quote: اقسم بالله جدادة يتعشى بيها ما يلقاها .. قال يسلم جدادة دهب !!!

غايتو عمك (قبقبة) دا لو جو سألوهو

حا يقول ليهم: بنجلد ... بس

يا ود الباوقة شايف الفكرة عجبت الشباب
استعجل بالله وما تطول في التفكير
دي شركة بيني وبينك بس
وأهم حاجة تستخدم لينا نفوذك في مخارجة الجهاز من الجمارك وكده
أو تخليهو يمشي لينا بالحقيبة الدبلوماسية بتاعة السفارة
اها دي صورة الجهاز



وشوف ياااااااخ الخواجات ديل دقشوا الخلا وطلعوا كنوز الأرض
أها جحا أولى بلحم توره ولا شنو؟
شيف الخواجات ديل

والمثل بيقول دقشة خلا شهرين ولا اغتراب سنتين

مودتي

***

بريمة

Quote: يا ود الباوقة عثمان دا ابن شقيقتنا.بعدين الصورة دي انا المالك لحقوق نشرها(عرق جبين كمرتي و يا ها دي كاملة)و بالمناسبة يا عمر البحش في الملوخية دا خضر ابو الفتح الخواجة.غايتو نشوف لينا طريقة نشتكي لي ناس الملكية الفكرية يمكن نلقى حاجة

باشمهندس ود الشيخ ..

بحليل خضر او الفتح خال زوجتي طبعا انت عارف

الكلام دا .

بعدين عثمان دا هس وين ..

يا عمر عثمان الآن بالدروشاب و برسل لك تلفونة في الخاص

اللهم أخرج لنا من خيرات الآرض
وأنزل علينا من بركات السماء



اللهم آميييييييييييييييييييييييييييييييييييين

..
.

Quote: أرجو من هـذا الأخ أن يسلم ما وجده للمتحف القومى ويطالب بتعويضـه عن الذهب بالسعـر السائـد.

والله الا تعوضوا انت من حر مالك


______

ما كفاية ود الباوقة بشع بيهو
خليهو ياخد مما رزقه الله ومن حقه الشرعى
ما دام ما لاقى شئ من البترول ..

هذا رزق ساقه الله اليه
كما يوديهو لنا الاثار ..

Quote: مواطن يحصل على 8 كيلو من الذهب ويودع الفقر باذن الله

وهل بقي فقير في عهد الانقاذ ياود الباوقة ؟؟والله اتلومت اول مرة اشوفك تتلوم في الانقاذ؟
بعدين والله القصة دي بتذكر القصص الوهمية الشائعة في التراث الشعبي السوداني ...من قبيل
ان احد الفقراء قد تزوج بنت السلطان بعد ان اوكل اليه امر جلل وقام بحله...مثل شعرة من شارب
الاسد ..

أها يا ود البــاوقة لسه قاعـــــــــد تفكر؟

بالطريقة دي حنمشي نلقى سيو سيو دهب بس

في الانتظار!!!!

هذه اثار الاجداد

كيف يسمح لهذه لايدي الفوضي ان تطال الاثار و الكنوز التاريخية التي من حق كل الشعب السوداني ان يفاخر بها الامم

هذه الاثار المكان الطبيعي لها المتحف القومي


المتابع لاسعار هذا الجهاز هذه الايام يدرك بان هذه سياسة الهاء عن ما يدور في البلاد - لا غير