Post: #1
Title: ( الزول ) .... ابداع الشاعرالزول صلاح سيد أحمد الغول...
Author: عبدالله كع
Date: 01-21-2010, 07:45 AM
Parent: #0
وصلني هذاالموضوع عن طريق الاميل ...
ـــــــــــــــــــــ
قصيدة حاااااارررة
مناسبة القصيدة:
(أنني رددت على واحد من منسوبي إحدى الدول العربية على الهاتف (بجملة : نعم يا زول )؟
فرد عليّ مستاءً : (بتقول زول ليه شايفني لافي بتاعه على دماغي..)
ـــــــــــــــــــ
أنا الغلطان
تقول لي زول؟!
بقول ليك زول
مالو الزول؟
و انت بتعرف إيه للزول ؟
سخيف وجهول
كمان زعلان
خلاص يا سيدي أنا غلطان
شطحت وكنت فاكرك زول
زول الماهو عاجبك ده
الله الخلقو خلقو كده
سمرة لونو من لون طينو
يبقى الفرق بينك و بينو
إنو نضيف و ابيض قلبو
عارف قدرو شاكر ربو
ساتر عرضو ماسك دينو
مخلص أمين وديع و رزين
حشيم القول بديعو رصينو
لطيف وعفيف و كاتلو حنينو
أسد في الحاره
لا بختاك و لابرجاك تجيو في عرينو
أكان بى حدره بادرتو
بيتلقاك بى عتره
وبستناك تقول الروب
قبل ما يشممك سكينو
يا بتوب يا بيوسدوك الطوب
والراجل يحمر عينو
كمان بى كلمه بتخاويهو
وبى بسمه بجيك خيرو
لا بتقدر تعيش من دونو
لا بتختاهو لى غيرو
زول الماهو عاجبك ده
بلا توجيه ولا تعليم
أديب و فهيم
هميم وكريم
و فطرة ربو من يوم خلقو
لا فتان و لا خوان
أخو أخوان
بكفي الألف و الألفين من الضيفان
و لو اضطر يرهن ولدو
و ان ما كفى
باع بيت أهلو و الجيران
زول الماهو عاجبك ده
يوم تحتاجلو بتلاقيهو
أكان ورطان وكان جيعان
و كان وجعان و كان سجمان
قبل تتأوه و تناديهو
يمين في أقل من برهه
و بين مد الألف و الها
قبل ناسك بجيك حفيان
بضمد جرحك و بداويهو
بكتل أبدرقه بى إيديهو
بطفي الواقده بى رجليهو
ما بتغباههو
لما تدورو بتلاقيو مكان حاريهو
اللافيبا راسو الزول
و متباهيبه إسمها عمة
سنة سيد الأسياد
المعصوم شفيع الأمة
و سيما الأوليا الزهاد
قلال الزاد كبار الهمة
و تاج العزة و الجبرة
و رمز الطيبة و الحكمة
و الملفوف على المبروكة
إسمو التوب
لباس العفة و الحشمة
أزيدك من فضول القول
ولا خلاص عرفت الزول
ده جمل الشيل
دخري الحوبة
فارس العتمة ساري الليل
لبيب و زكي و نجيب بلحيل
فهيم فهماً يهد الحيل
تقول لي ما فهمت عليك عيد القتو لي تاني !
واجيب فهامة عاد من وين
كلامي القتو ألماني؟
أخير ليك تمشي تختاني
وتنسى الزول و تنساني
وفوت قبال تعاديني
و اقول اللوح ده عاداني
و يكفي الزول و يكفيني
إني و إنو سوداني
ـــــــــ
صلاح سيد أحمد الغول
|
Post: #2
Title: Re: ( الزول ) .... ابداع الشاعرالزول صلاح سيد أحمد الغول...
Author: عبدالله كع
Date: 01-21-2010, 07:53 AM
Parent: #1
الحاجه البتجنن . بعض السودانين بزعلو من كلمة ( زول ) !!
عني نفسي بتكيف جدا لمن اسمع ( يا زول )
ماذا تعني كلمة زول؟
كثيرون يعتقدون ( جهلا ) أن كلمة زول كلمة اخترعها السودانيون
وليس لها أصل ولا فصل ، برغم ان (زول) من فصيح العربية .
|
Post: #3
Title: Re: ( الزول ) .... ابداع الشاعرالزول صلاح سيد أحمد الغول...
Author: عبدالله كع
Date: 01-21-2010, 07:58 AM
Parent: #2
زول من شرقنا ....
الزول تلك اللفظة العربية التي أصبحت تعادل كلمة (سوداني) في كل مهجر ومغترب ، حتى أصبحت شعاراً للسوداني ـ هي والعمامة ـ و (زول) من فصيح العربية ولها في لسان العرب لابن منظور أكثر من سبعة عشر معنى ، فالزول تعني:
(1) الكريم الجواد ، أنشد السكيت المزرد:
"لقد أروح بالكرام الأزوال من بين عم وابن عم أو خال"
(2) والزول : الخفيف الحركات ،
قال أبو منصور الثعالبي في حديثه عن الممادح والمحاسن ، حين ذكر أطوار الإنسان :
فإذا كان حركاً ظريفا متوقدا فهو : زول
(3) والزول الفتى ،
قال محمد بن عبيد الله الكاتب المشهور بالمفجع يمدح علياً رضي الله عنه:
"أشبه الأنبياء كهلاً وزولاً وفطيماً وراضعاً وغذياً"
|
Post: #4
Title: Re: ( الزول ) .... ابداع الشاعرالزول صلاح سيد أحمد الغول...
Author: عبدالله كع
Date: 01-21-2010, 08:03 AM
زول صغير - مع(( سخله))
(4) والزّول : العجب،
ألا ترى السوداني إذا استغرب شيئا قال: يا زووول؟؟
يعني ياعجبي من هذا الشيء .
|
Post: #5
Title: Re: ( الزول ) .... ابداع الشاعرالزول صلاح سيد أحمد الغول...
Author: عبدالله كع
Date: 01-21-2010, 08:07 AM
Parent: #4
(5 ) والزول الخفيف الظريف الذي يعجب الناس من ظرفه
(6) والزول: التظرف
(7) والزول : الداهية
(8) والزول : الشجاع الذي يتزايل الناس من شجاعته
|
Post: #6
Title: Re: ( الزول ) .... ابداع الشاعرالزول صلاح سيد أحمد الغول...
Author: عبدالله كع
Date: 01-21-2010, 08:08 AM
Parent: #5
|
|