الود طلع كضاب يا إنتي

الود طلع كضاب
قالت مخاطبة صديقتها: كيف الجو بتاعك
قالت ليها بحرقه: معكر كتاحه عديل كده
ليه في شنو مش أمس مشيتي بيتهم وقابلتي أخواتو
ما هو دا زاتو سبب الكتاحه والرياح الجنوبيه الغربية المحملة بالغبار
كدي فهميني بالراحه في شنو حصل شنو أخواتو كشحوها ليك
ضاحكا بحرقة ياريت كانت مقبولة
طيب في شنو ما تكلميني خلاص حرقتي أعصابي
شوفي الود طلع كضاب أتزوج كضاب كيف أرتبط بي إنسان كضاب كيف ؟
يا بت دا كلام شنو كضب عليك قال ليك شنو
قال لي أسألي العنبه الراميه فوق بيتنا كل يوم قاديني بالأغنية دي.
طيب وفيها شنو يعني
فيها شنو قولي ما فيها شنو
لمن مشيت لي بيتهم لا لقيت لا عنبه ولا سدره ولا تمر أبونا حتى بل شجرة نيم عتيقه يتنافس على ضلها غنم الحي وشبابه وكلب نصو في الضل ونصو في الشمس وذلك لموقعها الإستراتيجي بالقرب من شارع ظلط وميدان كوره ومدرسة بنات وجزارة وسوبر ماركت وبتاع تصليح لساتك وباربر شوب.
أقول ليك حاجه إنتي والله براك بتفتشي ليك في سبب
بس دا ما سبب وختى لو كان سبب ما مقنع
عن إذنك
وإنكشحت من قدام صاحبتها دون أن تكمل قزازة الفينو الكل الشابا عايزينو

سلامات يا ملا عمر
وين اراضيك غايب بالسنوات..
الولد فعلا كضاب .و لو العنبة الرامية في بيتهم وردت على سبيل المجاز كان يشير للموضوع ده
صراحة لأنو في ناس المجاز ده ما بيشتغل معاهم .

ياخ انا ما عارف مشكلة الناس البتعرف تكتب دي شنو؟
الواحد تدمن قرايتو يقوم يعمل فيها العميل رقم صفر (بتاع الشياطين التلاتاشر) ويختفي
شوف يا ملا يا عمر
يا تقعد في واطة البورد دا وتكتب زي زمان ونحن نقرا
ويا كمان نحن نشيل كي بورداتنا ونجي نكتب عشان يجيك الضغط
ولا عذر لمن أنزر

الملاعمر الوقور
طالت غيبتك شهور و ليك وحشة و الله

لك بخير و الأسرة

قال لي أسألي العنبه الراميه فوق بيتنا كل يوم قاديني بالأغنية دي.

ممكن الناس تقيس العنبة دي بحاجات كتيرة مثل المنصب و المال و الجاه ، و هي التي التي ترمي بظلالها على البيوت
و أعتقد أن الفتاة لم تر ظلا أو شيئا يحجب قيظ الفقر

دمتم

حبيبنا الملا عمر

الفين سلام

والعود احمد ( مش احمد بتاعكم)

ياخى انت خليك من بتاع العنية ده، زمان (فى زمننا) الناس كانوا بحبوا يعملوا تعريشات عنب
وبمناسبة العنب دى كان واحد صاحبنا جدو عندو جنينه فيها عنب
مرة مشينا وعجبنا العنب قلنا نضوقوا للزمان
قال لينا اوعكم
والله جدى عادى العنب ده عنبه عنبه

زى صاحبى صلاح
كنت معاه قاعدين فى الفروة
قمت من باب الزهج قطعت لى كم صوفة كده
قال لى :

اللييييييييييييييييييييييييييله
والله جدى عادى الفروة دى صوفة صوفه

انا ما عارف الجلاكين ديل غرامهم شنو مع حكاية العد دى

تعرف بمناسبة العد كمان
ولا ياخى بلاش اقدك ساكت

وعود على بدء وحكاية الود بتاع العنبه
انا الغايظنى ناس تقول ليك الاقحوان وشنو وشنو ما عارف
حاجات اصلو ما شفناها فى السودان
يعنى مش احسن بتاع العنبه

لكن ياخى مش امكن العنبه قطعوها بعد ما اكلتها السوسه
البنات ديل متلقيات حجج ساكت
هسع هى سألت من العنبة
ولا روحها محرقاها ساكت
ودايره ليها سبب

تحية وسلام وشوق
وسؤال عن الاحوال

يا ود الناس
مشتاقييين
سكيناك في كل العناويين
لكن الظاهر انت لاتحب الأضواء ولا التعارف
مشيت السودان تلات مرات وكل من نسأله عنك
لايجد لك عنوان
سعادة لاتوصف بالعودة
وبينا كلام كتير
مودتي ومحبة اكيدة

Quote: شجرة نيم عتيقه يتنافس على ضلها غنم الحي

وطيب ما تسأل الغنماية !!!!

المسافر أما آن لك أن تستريح وتحط رحالك
هي كان ممكن تسأل الغنماية أو ود أبرق لكن يبدو أنها تنتظر من يعلمها منطق هذه المخلوقات ، يعني الغنماية لو قالت ليها ميع بياء واحده أو ميييع بـ Triple حرف ياء بتكون قاصده شنو يا ربي

محمد سني دفع الله الرجل المسكون إبداع ، يا أخي ما عندكم أوضه للإيجار ، مما يؤسف له أن تأتي إلى السودان إلى أمدرمان ولا نتقابل فأنا يا سيدي بلا عنوان محدد جائل ما بين سوق الدباغين أيام أن كانت الدباغة مهنة وبين شارع العدني ذلكم المهاجر اليمني الذي خلده الزمان في أمة عنوانها التسامح فأرتبط إسمه بأعرق شارع تجاري لا يقل عراقة عن شارع الشانزليزيه الباريسي ، هنا في بقعة المهدي حيث أركلس في قهوة العم خلف الله التي تأسست بحسب اللوحة الغير مرئية في العام 1934 للميلاد لا عليك أخي محمد سني فنحن في ركض لا متناهي بين الركشه والكشه ، بين الفراشات والتششاشات بين ركوب الحافلات وركوب الأهوال بين التدبير والتفكير والتشطير والتخدير والتعمير ولا بأس بالتكبير والتهليل كل هذا في حكاياتنا وحنانا زاتو ففي السابق كانت مايو فقط ، هي أمور لم تكتب علينا فقط بل كتبت علينا وتم تنفيذها إنابة عنا وبصمنا بالعشرة أننا فعلنا.
محمد سني دفع الله متين جاي تاني في زيارة لي عاصمة المول والركشه والمس كول.
مودتي

راوية تسلمي على الطله والسؤال عن الأحوال ، فنحن والحمد لله عائشون ودائشون وخائضون لإرتفاع قارب الركبتين بقليل ، تشرق الشمس نبتسم بيوم جديد نجاهد نكابد ونرجع في آخر النهار مهدودي الحيل والحيلة وننخمد لنجدد طاقة نحن في أمس الحوجة إليها ليوم الغد ، وكل غد يبدأ بإشراق نبتسم ونـامل وننتظر.
شكرات مرات ومرات ومرات

إبراهيم السنوسي
أشكرك لأنك وضغتني في مكانة ما مكانتي واصفاً شخصي المهترش بالكاتب ، وأشكرك تالياً لأنك دخلت بوست لشخصي المهترش برضو وأشكرك أخيراً لأن الذي لا يشكر الناس لا يشكر الله.
يا زول حاولت أن افج الناس وأجد لي موطئ قدم في منتديات سودانيز أونلاين ولم أستطع فالناس هنا أصبحت في كثير من الأحيان تتدافع بالمناكب زي الواقفه قدام فرن رغيف أيام الأزمات الله لا عادها ، ولما لم يكن عندي منكب ولم أعطي بسطة في الجسم ولله الحمد كان لابد أن أعود متمشرط الهدمين وبفرده سفنجه واحده يملؤني عطر العرق ويصاب الـ CPU خاصتي بفايروس يفوق فايروس h1n1 فتكاً ويضيع الماوس في ظروف أقل ما يمكن أن توصف بها أنها حزينه.
أشكرك لتحذيرك وأتمنى أن تأتي بيكبوردك وخيلك مشاركاً الجميع في المنتدى بمقالاتك الصاروخية بعيدة المدى ، وكنر خيرك لأنك أنذرتنا فهناك من لا ينذر ولا يعذر ومع ذلك يطبق فيك قاعدة البتقع من السما تحملا الوووواطه. وحتى نرتفع درجة بالردمية عن سطح الأرض خليهم يقولو.
تحياتي يا بوردابي من الزمن الجميل

سيف النصر محي الدين محمد أحمد
لك التحية والتجلة والتقدير والإحترام
ويبدو أن مزاجك يفوق برج خليفه القادننا بيهو الأيام دي طولاً دمت بخير وبمزاج عال العال وأقول ليك حاجه حبس بي شاي.
في حاجات كده لو الإنسان قعد يدقق فيها حا تدخله في حيص بيص وحتى لو رضي أن يدخل ما حا يعرف كيف لأنه أكيد ما حا يعرف الحيص والبيص هل هما شيئين أم شئ واحد وفي الحالتين هي شنو ؟
البت في مرحلة من المراحل بتشوف بي فوق وبالمقلوب ولمن تحاول تنزل من علاها الفوق وتستعدل الصورة بيكون دخل بينها وبين الجو تلات بنات يحجبو عنها الرؤية بالقدر الذي تقول معاهو يا ريت يا ريت يا ريت بالرغم من أن الأمر حينها يكون تو ليت
تخريمة:
الفاز منو في الإنتخابات أوعا تقول لي تعادل صفر - صفر
شكرا سيف النصر محي الدين محمد أحمد مرورك بالجد أسعدني

Quote: قال لي أسألي العنبه الراميه فوق بيتنا كل يوم قاديني بالأغنية دي.

ياملا , زولتك دى أظنها غالاااااااااااتة


كتابة تشبه الحاصل حسة......

سلام يغشاك ..

Quote: بيكون دخل بينها وبين الجو تلات بنات يحجبو عنها الرؤية بالقدر الذي تقول معاهو يا ريت يا ريت يا ريت بالرغم من أن الأمر حينها يكون تو ليت

بالضبط ده الحاصل ..

البت طلعت كضابةياانت,,,

كدا كيف,,,,,,,,,?

عودا حميدا ياملا,,

..
.

Quote: لمن مشيت لي بيتهم لا لقيت لا عنبه ولا سدره ولا تمر أبونا حتى بل شجرة نيم عتيقه يتنافس على ضلها غنم الحي وشبابه وكلب نصو في الضل ونصو في الشمس وذلك لموقعها الإستراتيجي بالقرب من شارع ظلط وميدان كوره ومدرسة بنات وجزارة وسوبر ماركت وبتاع تصليح لساتك وباربر شوب.

البت دى طلعت نظرتها ما مستقبلية ..
بما انو دا موقع الشجرة قدام البيت يبقى البيت موقعو استراتيجى واستثمارى بحت
طوالى كانت توافق وتفتح 3 دكاكين على الشارع قبالة الشجرة ..
وتأجر كما تريد ..

___________

والله كانت لنا ايام يا انتَ
وعدت بى الى يا ( انتِ) ..

المله قاللها العنبه واللا اللعوته ياخ العرديبه كانت أحسن بعدين أم
خشمن خفيف وام ساقن رهيف متجوعله وماشه لى أهلو تقنعهم بى شنو ياخ
مليح الطلع كضاب وحاتك أكان يشرب ما يروى لكن ربك مو كريم عندو العاجل
والآجل والمدخر وناس دى مى دعول وليس هنالك أى إحساس حقيقى بما أقول خارج
النص وأنا أخو ود النلم وعليك الرسول بلغ سلامى لعمر ودالمامور الرجل الأمه ولك خالص السلام......................



منصور

المله قاللها العنبه واللا اللعوته ياخ العرديبه كانت أحسن بعدين أم
خشمن خفيف وام ساقن رهيف متجوعله وماشه لى أهلو تقنعهم بى شنو ياخ
مليح الطلع كضاب وحاتك أكان يشرب ما يروى لكن ربك مو كريم عندو العاجل
والآجل والمدخر وناس دى مى دعول وليس هنالك أى إحساس حقيقى بما أقول خارج
النص وأنا أخو ود النلم وعليك الرسول بلغ سلامى لعمر ودالمامور الرجل الأمه ولك خالص السلام......................



منصور

تبلدينا
يا أخي هذه النصيحةالتي سقتها من أضانها لن تحقق أكثر من هدف واحد من أهداف الزواج أى أنه يكون للمال فأظفر بذات الدين ولا أقول ليك فتش على ذات الشامه.
تحياتي ومرورك أسعدني

جميلة