ماهى فرصة فوز عرمان إن لم يقف معه الإتحادى والأمة؟

بدون أدنى شك هذان هما الحزبان الكبيران فى السودان..
فوز أى رئيس يعتمد عليهما معا..
يفترض أن الحزبين ضمن الأحزاب المعارضة لنظام الإنقاذ..
ويفترض أنهما يؤيدان وحدة السودان..
ويفترض أنهما يتوقان لعودة الديمقراطية والسلام والإستقرار فى السودان..
ويبدو أن زعيميهما لا يحبذان المخاطرة فى انتخابات غير مضمونة النتائج..
لذا من المفترض أن يكون عرمان هو الأنسب لتحقيق هدفيهما وبكل الحسابات..
ومن ثم العودة بالبلاد للديمقراطية وبعدها أى حزب يمكنه المنافسة بثقله دون تحفظ أو وجل..

فهل سيقف هذان الحزبان مع عرمان؟
وإن لم يقفا معه كليهما أو أحدهما ماهى فرصته فى الفوز؟
ولماذا لم نسمع حتى الآن تأييد من زعيمى الحزبين والوقت قد أزف؟

المسجلون للإنتخاب 15 مليون
ياسر سوف يكتسح الإنتخابات في الدوائر الجنوبية و بعض دوائر جنوب دارفور و جبال النوبة و النيل الأزرق و الشرق و الخرطوم

بنسبة 35% من المسجلين = أكثر من 5 مليون

وباقي الأحزاب بما فيهم الأمة و الإتحادي و الشيوعي و ........الخ
سيقتسمون ال 10 مليون المتبقية


ياسر عرمان سوف يفوز لو توفرت الشفافية و النزاهة في الإنتخابات

طيب لو المؤتمر الوطنى أخذ ٧ مليون..
وياسر عرمان ال ٥ القلتها..
وباقى الجماعة أخذوا تلاتة مليون..
الوضع كدا كيف؟

بعدين يا كوستاوى هذه الطريقة خاطئة وسلبية كحملة انتخابية لعرمان..
فكأنك تقول ما محتاجين لدعم هذه الأحزاب!!

الأخ بلة موسى ليك التحية

الأنتخابات هذه المرة تختلف عن اي أنتخابات سابقة أغلب الناخبون هم أجيال جديدة تختلف عن الناخبين في السابق اكثر وعياً ويعرفون مصلحتهم جيداً يختلفون عن أبائهم الذين كانوا يدلون بأصواتهم فقط بالأنتماء والولاء الطائفي
الأحزاب التقليدية تأكلت قواعدها الجماهيرية بوعي الناس وأهمال الأحزاب للقواعد ولعب المؤتمر الوطني في فصلها بل وتشويها طوال فترة ال20 سنة الماضية والتعريض برموزها وتعريتها وإبعادها مثلاً حزب الأمة تبع الصادق المهدي فقد كثير من قواعدة في دارفور وكردفان والنيل الأبيض لصالح المؤتمر الوطني الذي كان يسعى من الأول لضم أكبر ما أستطاع وتحييد ما لم يستطيع الصادق المهدي فقد قواعده في دارفور نتيجة للصراع الدائر وفي كردفان أيضاً نشط المؤتمر الوطني وفي النيل الأبيض وفيها قواعد الحزب الجماهرية التي يستند عليها ، حصر الصادق المهدي وأعضاء حزبه أنفسهم في امدرمان لم يخرج الصادق للقاء حتى الجماهير في غير امدرمان أظن الصادف في حياته لم يزور الحاج يوسف أو الكلاكلة أو خارج الخرطوم _ أما بالنسبة لجناح مبارك فهو شخصية مثيرة للجدل ليس له أي قاعدة جماهيرية في أي مكان في السودان حتى لو دائرة واحدة في أمدرمان
بالنسبة للحزب الأتحادي دعني أحكي لك ما قالته لي قريبتي في كسلاً عندما ذهبت مباركاً بيتها الجديد بالقرب من جبل التاكا قالت (أنا كنت ختمية وأبوي ختمي يصلى صلواته الخمسة في مسجد السيد القريب وجاء كسلا وقمنا عندنا عقيدة ومعتقد شديد في الختمية في يوم صبحت كل كسلا على صوت رصاص وضرب مدافع قالوا لينا دا جون قرنق مع ود الميرغني بعد الأحداث مكان بتي دا كان واطه فاضية تبع اولاد الميرغني ومافي زول بقرب منها الناس كرهت الختمية وجوا احتلوا الواطة دي)
الختمية بالعدد الأن حتى مسجدهم الكان عامر يوم بالختمية ما يغشاه إلا عجايز بالعدد أغلب قادة المؤتمر الأن أولاد خلفاء الختمية الميرغني لمن رجع السودان استدرك التأكل السريع وهو يحاول الأن الحفاظ على الباقي من الختمية ، جماعة حسنين بالعدد من العواجيز والباقي تطبيل وتضخيم في الأعلام فقط
المؤتمر الشعبي أو جماعة الترابي زي ما بسموهم الناس طلبت من قريبي يعد لي كيزان الترابي في الحي فشل طلبت منه يذكر لي واحد منهم فشل مافي حاجه أسمها المؤتمر الشعبي فقط الترابي ومجموعة من القياديين الأنشقوا معاه ، غير دا أسم الترابي كفيل ينفر اي شخص من الحزب دا

بقية الأحزاب لو شبهتها ليك بالهلام أكون اديتها اكبر من حجمها لأنو الهلام قد يكون ليه كيان منظور ومحسوس تصدق الليله أول يوم أعرف أنو في حزب أسمه الأتحاد الاشتراكي
دي خطة المؤتمر الوطني من زمان يديهم مساحة في الأعلام اكبر ويشغلهم في انفسهم حتى ينسوا يقربوا من الجماهير وفي الوكت نفسه تلقى أعضاء المؤتمر الوطني بسعوا للأحتكاك والتفاعل مع الجهور الحايصوت في النهاية امشي يا بلة شوف مقرات المؤتمر الوطني كل يوم اجتماعات وشوف الأعضاء كل فئات الشعب ، قدروا يقنعوا الشعب بالمجاملات والترضيات حتى في العزاء في الحي وفد من المؤتمر الوطني متقدم المعزين وقايمين بالواجب
البشير الليله في دنقلا بكرة في بورسودان بعده في الأبيض يخاطب الجماهير ويحافظ عليهم والصادق والميرغني وغيرهم في بحري وأمدرمان ودار الحركة

عرمان والشيوعيين لسه براهنو على غباء الشعب
يا بلة يا أخوي هل ممكن تنسى أخوك ولا صاحبك ولا ود جيرانك ولا معرفتك المات في الجنوب والكتله منو مش ياهو دا عرمان الكان مع قرنق قبل أيام وهو الكان بجعجع في المناظرات في التلفزيون مش ياهو دا عرمان بتاع الحركة الشعبية الروعوا الناس يوم موت قرنق
أعتمادهم على أنو الشعب دا غبي سبحان الله أداهم تجربة توريهم قوتهم قبل أيام في مظاهرات لبنيى ومظاهرات باقان وعرمان مصرين يكذبوا نفسهم ويلوو الحقيقة
الشعب كان ذكي ما طلع ولا اشتغل بيهم

معليش يا بلة أخوي بكتب ليك في ظروف ضغط عمل شوية وكلامي ما مرتب بس إنشاء الله يكون الفهم وصلك

Quote: الأحزاب التقليدية تأكلت قواعدها الجماهيرية بوعي الناس وأهمال الأحزاب للقواعد ولعب المؤتمر الوطني في فصلها بل وتشويها طوال فترة ال20 سنة الماضية والتعريض برموزها وتعريتها وإبعادها مثلاً حزب الأمة تبع الصادق المهدي فقد كثير من قواعدة في دارفور وكردفان والنيل الأبيض لصالح المؤتمر الوطني الذي كان يسعى من الأول لضم أكبر ما أستطاع وتحييد ما لم يستطيع الصادق المهدي فقد قواعده في دارفور نتيجة للصراع الدائر وفي كردفان أيضاً نشط المؤتمر الوطني وفي النيل الأبيض وفيها قواعد الحزب الجماهرية التي يستند عليها ، حصر الصادق المهدي وأعضاء حزبه أنفسهم في امدرمان لم يخرج الصادق للقاء حتى الجماهير في غير امدرمان أظن الصادف في حياته لم يزور الحاج يوسف أو الكلاكلة أو خارج الخرطوم _ أما بالنسبة لجناح مبارك فهو شخصية مثيرة للجدل ليس له أي قاعدة جماهيرية في أي مكان في السودان حتى لو دائرة واحدة في أمدرمان

عفوا اخي دا كلام فطير وليس عميق والدليل على ذلك ان حزب الامة عقد مؤتمرات قاعدية في كل مناطق السودان وتوالت زيارة قيادته لمعظم مدن السودان ..
ولو انك متابع فقط هذا المنبر لوجدت انه انزلت معظم هذه اللقاءات وبالصور فان لم يزيد اعداد مؤيدي الحزب لم ينقص .
مثل هذا الكلام كانت تروج له صحف الجبهة الاسلامية باعلامها المضلل في 85 والنتيجة ان احرز الحزب يومها 101 دائرة انتخابية في 86.
المطلوب الان ليس الاسماء بل المطلوب ان تتوحد الجهود من اجل برنامج واضح المعالم لانقاذ السودان من طغمة وفساد النظام الحالي
والمهم ان يعمل الجميع من اجل اخراج انتخابات حرة ونزيهة ان توفر ما يدلل على امكانية ان تكون كذلك والا فالمقاطعة.

Quote: معليش يا بلة أخوي بكتب ليك في ظروف ضغط عمل شوية وكلامي ما مرتب بس إنشاء الله يكون الفهم وصلك

الأخ عبد العزيز حسين

الفهم الوصلنى من كلامك هو أن عرمان لن يفوز حتى لو أيده الأمة والإتحادى!!

وماهو موقف الحزبين العجوزين حتى الآن من ترشيح عرمان؟