فرقة زيدان إبراهيم الموسيقية ..إنتو ما طبيعيين ..!!

زيدان إبراهيم فنان كبييير ماف كلام عذوبة في الصوت ونسق متصاعد في الاداء مع مرور السنوات وكل ما كبر زيدان كبرت اعماله وبقت أكتر جودة ..
أغنيات زيدان إبراهيم تنافس بعضها لحناً وكلمة مع إني من بين كل أعمال زيدان ارتاح كتييير مع كنوز محبة ..
زيدان إبراهيم حضور أنيق على شاشات التلفزيون السودانية المختلفة فزيدان ابراهيم في تلفزيون السودان اناقة وروعة اداء وزيدان ابراهيم في قناة الشروق اناقة ومتعة اداء اما زيدان في قناة النيل الأزرق فلعمري فهو ضرب من ضروب الخيال وكل حلقة يسجلها زيدان تكون أروع من التي قبلها وغن كانت الحلقة اللي سجلها مع المبدع حسين خوجلي وهو لابس البدلة الكبدية وقاعد في الكرسي كما الملوك تظل الحلقة الأجمل لزيدان من وجهة نظري من بين كلللللل تسجيلات زيدان في حياته الفنية .
تتبعت مسيرة زيدان ابراهيم الفنية وأسرار النجاح المتصاعد الليلة أجمل من امبارح وبكرة اروع من الليلة فلقيت السر واااااااااحد ..سر إسمو فرقة زيدان الموسيقية المصاحبة ليهو في كل تسجيلاته..
مع غنو نفس اعضاء الفرقة ديل بيعزفو مع كللل الفنانين نفففففس الاشخاص ونفففففس الالات إلا إنو بصراااحة فرق كبييير بين الشغل مع زيدان وباقي الشغل..
فرقة موسيقية واضح جداً إنها تهتم بكل صغيرة وكبيرة في الشغل ..بتعمل بروفات كتييير قبل التسجيل ..فاهمين بعض أكتر من اللازم ..متناغمين للحد البعيد ..ماف صوت الة بيطغى على صوت الة بتاع الأكورديون مجنوووون ..ضابط الإيقاع مزاجو عااااااالي..كمنجات شغالة طالع نازل بي نفس واااحد ساكس مجنون بيز وجيتار رايقييين ..فرقة متكاااملة في كل شئ ..ما حصل شوفتهم مبشتنين ..كل الفرقة بتكون في كامل الأناقة ما شرط يونيفورم بس بيكونوا مرتبين ..حتى في طريقة توزيعهم مرتبين ..حتى في طريقة توزيع الصولات مرتبين ..وهنا واضح جداص دور الفنان زيدان ابراهيم اللي واضح داً إنو بيحب الشغل المجوود مش شغل اليوم بي اليوم وتجسيلات المناسبات وعدي من وشك والسلام ..إضافة لي إنو واضح جداص إنها فرقة تقوم على اساس التشاور في توزيع الأدوار وتقديم النصح لي للفنان زيدان ابراهيم ..
حقيقي اداء هذه الفرقة لفت نظري للحد البعيد وخلتي اتاكد تماااما إنو سر نجاح زيدان ابراهيم في المقام الأول جاي من مجهودات الجماعة ديل ..وفي نفس الوقت فتحت عندي باب تساؤل كبير جداً :
بالرغم من إنو معظم (لو ما كان كلللهم) بيعزفوا مع مجموعة الفنانين التانيين إلا إنو الاداء مع زيدان ابراهيم غير يبقا هل المشكلة في الفنانين التانيين ؟؟
تحية للفرقة وتحية لي ابو الزييك وما حا أقدر اقول ليكم غير ليكم في قلبي كنوز محبة ..

تخريمة :
تقول لي اورغن وبونقز وساكس!!! :)

عمر سلام,

مع أنه زيدان, في الماضي, كان يبدو لي كأنه لم يكن مهتما بكيفية الأوركسترا, يعني تلقى الإيقاعات تكركب زي ما عايزة و الجيتار جكلق جكلق جكلق و (ورشة) كدا عجيبة خلاص !
زيدان أعماله رائعة لكن لم يكن منضبط أوركستراليا و لم يستفيد من أبو اللمين و وردي مثلا و أعتقد أنه حتى الكلام البتقولو هسة دا ما هو إلا نتاج مقترحات بعض الفنانين من العازفين و هم سبب التغير المشهود عند الأوركسترات السودانية!
و يا عمر, و مع أنك تبدو من المهتمين بالموسيقى على عكس العوام البيركزوا على المغنى, لكن شكلك كدا لازلت قادر على هضم الشكل التقليدي للأوركسترا في الأغنية السودانية بدليل زهجك من حكاية "أورغ و sax و بنقز"
مع أنه إذا وظفوا بشكل مرتب و لطيف بيكونوا أحلى مع طبيعة أغنياتنا.. أنا غايتو خلاص كجنت كبسيبة الأوركسترا الكبيرة الفيها سبعتاشر عازف لأنه أغنيتنا ما محتاجة ورشة قدر دا, أما الأكورديون فهو أكثر آلة "مززززززعجة" للأذن في أغنيتنا لأنه قليلين من عرفوا كيفية توظيفه!
أها أنا طارح شكل جديد و كاف من ناحية الموسيقى و طبيعة الأوركسترا و ممكن يجعل أغنيتنا لطيفة و مطاقة لكل أذن حول العالم لكن زمني في اللحظة دي ما ح يسمح لي أشرح ليك لكن أوصيك بالsmooth jaz لغاية ما ألقى فرصة و حا تعرفني بفكر كيف!
------------
رأيك شنو في توظيفات سعد الطيب للبيانو, شايف الأورغنجية كلهم عجبتهم الفكرة !

إن استبدلت فرقة زيدان إبراهيم الموسيقية
بفرقة صلاح بن البادية فسيستقيم المعنى

عمر الفاروق ياخ ازيك وكيف حالك ؟

تعرف يا عمر مع أني ما من انصار ومشجعي زيدان
لكن ده ما بيعني أنو ما فنان كبير ورقم ومهم
في خارطة الغناء السوداني وصاحب اسلوب ساحر
ومميز في كل شئ ومسيرة مدهشة حقاً .

لكن لفت أنتباهي في البوست ده كلام مهم جداً
ويدقق علي الموسيقي والأداء الاكسترالي للفرق
الموسيقية والنقطة تحديداً وردة في كتابتك
الرئيسية ووردة في كتابة الأخ المعز إدريس
(واضح انو موسيقي والله اعلم)وهما حسب التراتب:-

Quote: ماف صوت الة بيطغى على صوت الة

و

Quote: شكل جديد و كاف من ناحية الموسيقى و طبيعة الأوركسترا

وده كلام مهم جداً عن التوظيف الموسيقي أتمنى أنو يتواصل .



مزحة صغيرة يا عمر :-

Quote: تخريمة : تقول لي اورغن وبونقز وساكس!!! :)

عندي واحد صاحبي معلم كان بيقول لي :-
الغناء بالاورغن ده زي سكرة الاسبريت.

كلام سليم

كلامك اخي عمر الفاروق مائه بالمائه وملاحظتك في محلها

زيدان يهتم اهتمام كثير بالاوركسترا

كل حلقة يقدمها يغير في الميلوديه

اختيار موفق للعازفين لانه يعرف امكانيات كل واحد منهم

والكلام ليس في ان هؤلاء يعزفون مع أي فنان ،ودي حقيقه، لكن في اختيار الفرقه المناسبه

أي العازف المناسب للالة المناسبة

يركز زيدان لو لاحظتم علي عازف الاكورديون والايقاع والدنب فلا يغيرهم اطلاقا في أي عمل

حتي مظهر العازفين مع زيدان حيث يكونون في كامل هندامهم

شأن زيدان في ذلك شأن محمد الامين ومحمد وردي

لانه يحترم فنه والمشاهد

اخي ملاسي لا يوجد وجه مقارنه بين اوركسترا زيدان وصلاح ابن الباديه التي يتكون اغلبها من افراد اسرته

الله على زيدان


على فرقتو

على غناءهو , ألحانو وأداءهو

Quote: بتاع الأكورديون مجنوووون ..

لك التحية الاستاذ/ عمر الفاروق

زيدان ابراهيم ملهم الشجن والغناء الانيق

فى ظل الهرج والمرج الذى اصاب الغناء فى السودان

هو امتداد لاجيال منذ عقود طويلة واهبا الابداع ومريح سكن لقلوب المحبين

نسأل الله له الصحة والعافية ومزيدا من التفرد


لك الشكر واكيد الاحترام

المعز يا إدريس:
ياخ والله كلامك عجبني شدييييد وريحني في كنكوجي المعكر ده ..
لكن خلينا نبدا من كلامي الأخير وكلامك كمان ..
بالنسبة للأورغن والساكس والبنقز صدقني انا من أكتر المعجبين بي الحركة دي وهي حالياً وبكل صراحة اللي شكلت أذن المستمع السوداني وبقا ناادر جداً تلاقي ليك زول بيسمع اروكسترا ..
بس كمان صدقني بعيداً عن الجانب الموسيقي في جانب كده الفرقة الموسيقية المتكاملة بتعملوا للفنان الا وهو هيبة الغناء..
لمن تلاقي ليك فرقة موسيقية بتغني مع الفنان بصراحة كده الفنان هنا بيكتسب هيبة ..
يوم زواجي وانا برة السودان كلمت ناس البيت يحجزو واحد من إتنين لي يوم العرس الراحل إبراهيم عوض أو زيدان إبراهيم أنقر العرس ما كان بي طه سليمان ومعاهو واحد حلفاوي كده حلف بي دينو وأيمانو ما ينزل لي طه سليمان الا حنسناهو تحانيس وقلنا ليهو ياخ بس نحلل قروشنا ..
وكللللللللو كان بي الأورغن والساكس ..
مشكلتنا في الالتين ديل التقليدية وماف فرق بين تسمع شكر الله من تسمع احمد الصادق من تسمع ندى القلعة من تسمع حسين الصادق..نففففففس الطريقة ونفففس الايقاعات ونففففس دخلات الساكس مع نفففففس طريقة الايقاعات ..
انا ما شوفت لي ناس مجتهدين في توظيف الة الاورغن واكتشاف كل امكانياته زي عمر القصاص والولد محمد بابكر بتاع سامي المغربي ..
لكن أسة تعال شوف ناس الربع يشبكوك إزعاااج لمممن الله يغفر ليك والحفلة كلللللها هوووبببببببا هووووووووبببببببببا ترررررررررررررررررررررررررر هووووووببببببا ..

ياجماعة الكلام ماعلي الطابور الكلام على التعلمجي البدي النداء .............

نحن طلبة في كلية الشرطة شغالين حصة بيادة مع تعلمجي النداء بتاعو كعب وبالتالي الشغل بقي اكعب ، الضابط المشرف على الشغل كان عاوز يدينا جزاء قلنا ليهو خلي عم دفع الله التعلمجي يدور الشغل ده ............. وقد كان اشتغلنا شغل زي الرصاص ...................................

النجيضة : لو البغني زيدان لازم الموسيقي تكون صاح.

طارق ميرغني إنت لسة ما عرفت حسين ملاسي ده ؟
ما طبيعيين حقت ملاسي مع فرقة ابن بادية تختلف تماااما عن غيير طبيعيين حقتي القاصدها لي فرقة زيدان ...
هذا والله أعلم ولا أدعي فهمي لي سحس الراجل الما مضموووون ..

ناذر يا أخوي انا ما شايف أي شي في مداخلتك دي لأنو قاعد في حتة مقلين فيها الحاجات كلها فدحين لو صورة كتر خيرك وكمان كان أغنية فالعفو في العافية ..:)


سفاين يا نابري :
أها والعقد مع العرس زي شنو ؟:)
بالمناسبة انا جني وجن التبريكات عبر البوستات عشان كده ما باركنا ليك لكن طالبني في التانية اضرب ليك عديييل..

Quote: سفاين يا نابري : أها والعقد مع العرس زي شنو ؟:)

زي عقد الجلاد 86-98 يا معلم .




تعرف يا عمر بمناسبة الفرق الموسيقية وكلامي الجاي ما تستغرب ليهو
حاول اسمع الفرقة بتاعة البعيو وشوفهم بيعملو شنو بالله.






ــــــــــــ
بخصوص التبريكات
أنا ذاتي جني وجن التبريكات
والتعزيات في المنبر.

Quote: حاول اسمع الفرقة بتاعة البعيو وشوفهم بيعملو شنو بالله.

لالالا ما حا استغرب وصدقني سااامعهم لكن أهو زي فرقة البعيو دي عندها العيب القناهو فوق..
أي زول عايز الالة حقتو هي التظهر..
هم اي زول فيهم بيعمل شغل انفرادي جميل بتاع البيز بتاع الجيتار والعجب بتاع الدنب الشايل معاهو المفك في جيبو وفجأة كده بيفك ليهو واحدة منهم يمشي بيها للبعيو :)
عارف فرقة البعيو وفرقة عمر احساس ديل لو رتبو روحهم عندهم شغل جمييل ممكن يطلعوهو للناس ..

تخريمة :
البعيو عيبو إنو الشيالين بيغنو أكتر منو وبعد ده تلقاهو هو البيشيل القروش الكتااار

عمر يا فاروق
انا بحب زيدان شديد وبسمع ليهو كتير
وكنت بدخل معظم حفلاته في السودان
وفرقته عندي خالي بتاع ايقاع بعزف معاهو

لكن الربع ده صاحبي ومكيفنى عديل كده!!!
عليك الله خلي ينطط لينا000شوية0